Арся кымöра лун. Кудымкар шöрись лудовка, памлöн виль керку.
Отир масьтiсьöны, изöны, гарйöны пыж, гöрдззöны мордаэз. Тыдалöны кöртовöй шодззез, черрез.
Сцена пыдöсын, неылын Ойпель дынсянь, полатёк вылын куйлö пöрисьмöм Кудым-Ош — пася, шоныт кöмкöта. Полатёк сайын сотчö бипур. Пам юр дынын сулалö зарниöн серöтöм памскöй бедь, ыджыт меч, кöрт юра мотоуз — памлöн знаккез. Сэтöн жö пукалö КОСТÖ.
Би югöрыс югдöтö Ойпельöс, сылöн öлöдзас зарни бекöр, пельпон вылас низь кучик, киас — рудзöг кольтаок.
Костö отсöтöн Кудым-Ош пуксьö, зэгйö сильканнэза бедьнас. Лудовка вылö петö карись йöз. Пам юöртö, что локтiс кад сылö мунны эта оланiсь.
— Миян увтыр öнi пöт и вына: велалiм быдтыны нянь, кöртiсь керны чер-пурт, Мийö ёртасим мöдiк йöззэзкöт. Сiя ёртасьöмыс пондöтчис Костö локтöмсянь...
Кудым-Ош иньыс отсöтöн мунö Ойпель дынö и кеймö сылö сы понда, медбы Ен чожажык иньдöтiс сiйö мöдöр оланö. Эта бöрын нiя кытшöвтöны карсö, и Кудым-Ош павкöтчö бедьнас быдлаö: керкуэзö, заплодö, воротаö, изынокö, пыжö...
Костö мунö ордчöн, и нылöн мунöмыс — дзик айпöв да мампöв юссезлöн медбöрья öтласа уялöм.
Кар шöрын Кудым-Ош прощайтчö светыскöт — копрасьö нёль ладорö, и муыс недыр кежö пемдылö — жалейтö богатырьлiсь овсьöм олансö.
Быдöс отирыс сувтö пидзöссэз вылö.
Кудым-Ош водö полатёк вылö, корö дынас зонсö да сетö сылö ассис знаккесö. Зоныс кытшöвтö карсö да вöлись корö мужиккесö прощайтчыны памкöт.
Мужиккес сувтöны кок йылö, чапкöны юрси кöртöттэз, йиэз, пондöны прощайтчыны. Кудым-Ош велöтö, кыдз колö сыкöт, богатырькöт, прощайтчыны: павкöтчыны кык чуньöн сы юр бердö — босьтны памлiсь мывкыд да вежöр, а одзись чуньöн павкöтчыны сы пельпон бердö — одзöстны богатырьлiсь вын. Павкöтчыны кö пельпон бердас кык чуньöн — эта лоö босьтны кык вын, кöдасянь шогмас öтiк умöль.
Гажтöм обрядсö пондöтö виль пам. Эта дырни иньпöлöс, пидзöс вылын сулавтöн, вог лэдзöны кузь юрсиэзнысö, окласьöны öтмöдöрö. Сiдз жö керö и Костö, кöда пукалö Кудым-Ош дынын.
Прощайтчись мужиккес сайöвтöны кулiсь памсö да Костöсö.
Луныс пемдö, эта пемытын öзйö гöрд югöр, дзик шондi гöглян. Югöр шöрас тыдалö пукалiсь Кудым-Ошлöн юрыс, юр вевдöрас — зарниа кытшлöн джыныс.
Гöрд югöрыс жагвыв ыждö, а тшöтш сыкöт ыждö Кудым-Ошлöн юрыс, пельпоннэс, моросыс — лоö сцена пыдöсыс вылына.
Дата добавления: 2015-11-16; просмотров: 48 | Нарушение авторских прав
| <== предыдущая страница | | | следующая страница ==> |
| ПАМÖС ЛОВЗЬÖТÖМ | | | ОЧЕРККЕЗ ДА СТАТТЯЭЗ |