Декорацияыс сiя жö.
КОСТÖ да ПÖВСИН герьясьöны Кудым-Ош дынын, кыскасьöны пидзöс выланыс. ЧИКЫШ гöснечалö Ойпельöс да горт мусö — корö отсавны аслас волшебствоын, медбы ловзьöтны чудскöй увтырлiсь памсö. Гöснечасьöм бöрын Костö отсöтöн Чикыш мыйöнкö мавтö Кудым-Ошлiсь ранаэсö да пондöтö «вурны» нiйö. Костö да Пöвсин пидзöс вылын сулавтöн керöны сы моз жö.
Чикыш содззезнас «куралö» мулiсь вынсö да «кисьтлö» Кудым-Ош вылö. Эта бöрын юрбитö Енлö и вöрöтöв-керö кулöмыслiсь кикоксö да вынöн вачкö му кузяс увья бедьнас — тшöктö чеччыны Кудым-Ошсö.
Зэв вынöн гымыштö-вирдыштö. Кудым-Ош зэгнитчö вывтырнас. Чикыш кыкись вачкö бедьнас му кузяс, и кыкись вирдыштö да гымыштö, а пам — öддьöнжык зэгнитчö. Куимöтпырсяс Чикыш вачкö бедьнас куимись, сымдаись жö вирдыштö да гымыштö, и — Кудым-Ош жагвыв чеччö. Сiйö пасьтöтöны, юр вылас пуктöны колпаксö, киас сетöны памскöй бедьсö.
Ворота одзö мыччисьöны враггес. Нiя пöрлалöны куддэзнысö, кытчö тэчлiсö кучиккез, а öнi ны туйö лоöма турун — этö сiдз керöмась Пöвсин да Чикыш.
Карын лэбö шум-гам. Кудым-Ош лöньсьöтö отирсö, иньдöтö нiйö керкуэзö, ачыс мотоузнас мунö вороталань, сайöвтчö стена увтас.
Враггес пырöны ворота вевдöрöт, Кудым-Ош сырйö нiйö öтiкöн и чукöрöн мотоузнас, ештö чапкавны ворота сайö иззэз.
Кынымкö враг пышшисö, кынымкö сюрисö Кудым-Ош киö. Ны коласын и атаманыс. Сiя сувтö пидзöс вылас, кеймисьö лэдзны сiйö. Эта понда сетö ассис дона шапка, пуртсö, браслеттэз.
— Меным нем оз ков тэнчит, только сет бекöрсö, кöда куйлiс Ен одзын, и мун гортат.
Бекöр эз адззись. Отир жöв керсис: öнi Ойпель вермас лöгасьны да öддьöнжык накажитас карсис йöзсö. Сылö колö сетны виль козин!
Кудым-Ош босьтö атаманлiсь пуртсö да лэдзö ворота сайö: мун пö да сэсся некöр эн вовлы грабитöм могись!
Отирыс чидö, горзö, киэзöн вурö боккесö — кин лöгöтiс Ойпельсö, что сiя эз вермы берегитны карсö врагсянь?
ЧИКЫШ мыччалö бедьнас Костö вылö — то кин пö мыжаыс! Сiя, йöз увтырись морт, лöгöтiс Енсö!
Чикыш дор сувтöны кынымкö старуха.
Костö сулалö юрсö öшöтöмöн.
Пöвсин котрасьö öттэс и мöддэс шöрöт — тшöктö лöньсьыны нiйö.
Кудым-Ош сывьялö Костöсö пельпоннэзöттяс да висьталö:
— Тiйö, отир, эд веритö Чикышыслö! Менам иньö, кöда чужтiс миянлö богатырьöс, абу мыжа. А Ойпель понда бекöрсö адззам эшö буржыкö!
Дата добавления: 2015-11-16; просмотров: 46 | Нарушение авторских прав
| <== предыдущая страница | | | следующая страница ==> |
| КОРАСЬÖМ | | | КАР ПРОЩАЙТЧÖ КУДЫМ-ОШКÖТ |