Анягур, Анягур. . .

Нёль действиеа драма

ОРСIССЕЗ

ОЛАНОВ ПАВЕЛ ИЛЬИЧ — шляпаа, уссэза да бакенбарда мужик, 45 годся

НИНА ПЕТРОВНА — басöк паськöма, винер горожанка, 45 годся

ОПОНИКА МАРЬЯ — ёныник дöва, эшö боёк колхознöй пенсионерка

ВИЛЬСАЕВА ТАМАРА СЕМЁНОВНА — колхозiсь председатель, кучиковöй курткаа морт

ГУРЬЯН — колхознöй пенсионер, тошока. Новйö гимнастёрка, узöра йи, пыдын калошаэз, колпак. Эм медаль

СУСЕДКИН — оланын öшöм морт, нöитчöм паськöма. Сэсся — бура уджалiсь, сöстöм паськöма

МИША — тракторист, комбинезона том морт

ШУЛЯЕВ — колхозiсь бригадир, дышовöй да лёк мужик. Штормовкаа, кубанкаа, кузь сапога

АРИШКА — зоотехник, не том, не пöрись инькаок, Шуляевлöн модз

ПÖРИСЬ ЧУД — кузь бöжа, сюрока, тошока, чушниа

ТОМ ЧУД — учöт бöжока, сюртöм, чупошкаа

Агитбригадаын орсöны:

УЧЁТЧИК МИТРИЧ — Гурьян

МИТРИЧЛÖН ШУРИН — Нина Петровна

МИТРИЧЛÖН СВАТ — Опоника

ПРЕДСЕДАТЕЛЬ — Миша

АГРОНОМ — Опоника

Эпизоддэзын — правленнёись уджалiссез. Эна роллезö коласö куим-нёль морт

Действиеыс мунö восьмидесятöй годдэз конецö

ОДЗКЫВ

ДЕРЕВНЯÖ, ДЕРЕВНЯÖ!

Рыт. Городскöй квартира. Öтланяс — ыбöс, мöдланяс — öшын. Пызан вылын телефон, лампа. Тумба вылын телевизор. Креслоын пукалö ОЛАНОВ, видзöтö газетаэз да письмоэз. Кузь халата, тапочкаа. Звонитö телефон.

ОЛАНОВ дыша босьтö трубкасö.

ОЛАНОВ. Да, кывза... Кытчö инмин? А кытчö инмöтчин? Космосö? Эта абу космос, эта Му вылiсь город Перем, гражданка... Ах, «Космос» театрö! Дак сiдз бы и юалiн! (Пуктö трубкасö, чидöмöн.) И кин нiйö быдтöм, кин велöтöм! Он ешты трубка босьтны, а тэныт кымöсат, дзик нöшöн: «Кинн?!» (Чöлö.) Культу-ура!

Осьтö газета, пондö видзöтны. Звонитö телефон.

ОЛАНОВ (босьтö трубкасö). Кывза, Оланов! (Газетасö лыддьöтiкö.) Ладно, бур, бур... Мый, мый? (Чапкö газетасö.) Деревняö мунны автобус колö? А-а, быдсöн семьянас! Но, но... (Чöлöв-керö.) И сетi бы, да абу. Абу, мыся!

Босьтö газета, и бöра звонок.

ОЛАНОВ. Кывза, Оланов!.. Бур рыт! Кин, кин? Иван Никитич? Дежуритан, шуан? Мыйкö лоис? (Сувтö) Кытшöм беда?.. А-а, кроссворд оз пет! Сэк, конечно, беда... Ме? Да, авиатор... И джын Европасö адззылi, и Африкаын вöлi. И воюйтi... Эшö содты: дöвеч, семьятöм, и сiйö позьö кöть кöр чувйыны... Кынымись баитi: эн звонит сёрöн, сет шоччисьны!.. (Лöгöн пуктö трубкасö, розеткаись кыскö шнурсö.) Вот отир! Этадз и кувны оз сетö!.. Не-э! Колö пышшыны, пышшыны татiсь, кытчöдз инфаркт эз берездöт, кытчöдз ловья!

Босьтö письмо, осьтö конвертсö, кыскö гижöт.

ОЛАНОВ (асьсö осудитöмöн). Но и дышсялi жö! Ой, Пашка, Пашка! Мöдiкö ни гижö мортыс, а ме?.. Но ладно, вот лыддьöта этö и гижа.

Горалö ыбöс дынiсь звонок. Оланов мунö осьтны и локтö НИНА ПЕТРОВНАКÖТ.

НИНА. Позьö недырик, Павел Ильич?

ОЛАНОВ. Локтiн, дак позьö ни.

НИНА. Телефоныт разь оз уджав? Звонитi, звонитi...

ОЛАНОВ. Натьтö, мöдiн юавны, адззылi я Кабалевскийöс, кöр сiя Перемас вовлiс? Адззылi. И Алла Пугачёватö тожö... Эшö мый?

НИНА (öбидитчöмöн моз). А менö эн адззыв?

ОЛАНОВ (нежык ни лöгöн). Чöвтчы, Нина Петровна, пуксьы. (Мыччалö кресло вылö.)

НИНА. Пуксьы да ваксьы, только эн потлась... Сiдз некö важ гортат баитöны? (Пуксьö.)

ОЛАНОВ. Миян шувлiсö: эн чуклясь... Баит, ме кывза. (Ачыс сулалö.)

НИНА. Ме вот мый мöдi. Куимöт цехись начальникыс асныралö: менчим солистöс ойся сменаö ыстö.

ОЛАНОВ. И бура керö. Сылöн, Нина Петровна, сивьяс план öшалö.

НИНА. И клубыслöн — план. А точнöйжыка висьтавны — клубыс, хорыс, заводскöй уджыс — миян öтласа план.

ОЛАНОВ. Дак мун директор дынö, мыля ме дынö локтiн. Ме техникаöн командуйта.

НИНА. Павел Ильич, тэ сылöн — веськыт ки. Сэтчö жö менчим шогöс буржыка вежöртан — сётаки öтiк посадiсь петiмö.

ОЛАНОВ. Но, но... Концертыт талун? (Йитö телефонiсь шнурсö.)

НИНА. Талун. (Видзöтö часы вылö.) Джын час бöртi пондöтчас.

ОЛАНОВ (видчöмöн). А луннас кытöн вöлiн? Луныс тэныт вöлi али эз?.. Кин только тiянöс быдтöм, кин велöтöм! (Öктö номерсö.)

НИНА. Не я öтiк школаын велöтчим? Тэ только одзжык мунiн.

ОЛАНОВ (телефонö). Петрович, тэ? Оланов саймöтiс — извиняйтча! Эн на узь, шуан?.. Аха, концерт вылö лöсьöтчан! Но, но... А медбур солистсö мыля сьöрат он босьт?.. Да, да — сiйö... А клубыс Америкалöн разь? Сiдз, миян жö. Дак вот и сетiн бы приказ... А-а, вöлись вежöртiн... Но, мун сэки гажöтчы. (Кыска шнурсö, Ниналö.) Керас.

НИНА. Спасибо, Павел, отсалiн... Менам эшö öтiтор...

ОЛАНОВ. Сы йылiсь мöдпырся баитам... Некöр меным.

НИНА. Мöдпырсяö кöр эшö! Ашын медбöрья лун уджала, а сэсся... (Сьылö частушка.)

Кык Илля лун, нёль Ёгорей ―

Пыр понда празднуйтнытö.

Кык кыдззаин, нёль видззаин ―

Сэт понда гуляйтнытö...

Муна деревняö, гожумбыт понда шоччисьны. Кык годся отпуск сетiсö. Адресок ни эм, кытчö мунны — öддьöн и öддьöн лöнь да гажа пельöсок!

ОЛАНОВ (сьöкыта ловзисьö). Шуда морт тэ, Нина! (Чöлö.) Но, бур туй тэныт да гажа Илля луннэз и кыдззаиннэз! Он кö пет сэтчин жöник сайö, дак кöркö адззисьламö.

НИНА. Кöть умöликö, да городскöй жöничок жö колö бы... Адззисьлытöдз, Павел! (Петтöнняс.) И тэныт бы ме сьöрö... А? Али деревняыс оз ни кыскы — чужан гортыт, шуам? Менам некин ни важ гортам абу, а сё тай тöдвылö усьлö.

ОЛАНОВ шытöг кольлалö НИНАСÖ, пуксьö, босьтö письмосö.

ОЛАНОВ. Ноко мый бурсö висьталан, гижöт...

Кылö магнитофон шы.

Здравствуй, ёрт менам Паша! Мый инö чöлан? Эн я понды шогавны? Али уджнат голяви тырин?.. Ме сё жö пышши городсис, мунi аслам нянь вылö... Веськыта висьтала: доминоöн да картiöн лоис некöр орсны, но сьöлöм вылын — долыт: абу некытшöм шог, абу некытшöм висян. Ачым хозяин лои — фермер. Делоыс мöдö аркмыны, только эг на вермы трактор небны... Тöн ветлiмö вöрö да адззим тшак — зэрасис да петöма ни — и жаритiм да пувлiм тшакьяшыд. Сёйим сiдз жö чöскыта, кыдз тэкöт, кöр бертiм война вылiсь, кöдö вунöтны ни пондöмась... Египет, Египет! Эн на вунöт сiйö, Паша? А этö — «Мотор уж пламенем пылает, кабину лижут языки...»? А комисö, ассиным? То этö. (Горалö сьыланкыв.)

Кытi эд только эг ветлöтö,

И эг лэбалö тэкöт кыт,

А том кыдзоксö эг вунöтö,

И лöнь шороксö эг вунöтö,

И тэнö эгö, тшакьяшыд.

Нем эг вунöтö,

Нем эг вунöтö,

И тэнö эгö, тшакьяшыд.

А горт деревня — Анягурным,

Бöра миянкöт öддьöн рам:

Юкталö йöвнас, чöскыт сурнас,

Гажöтö басöкнас да бурнас,

Дзик ласков мам, дзик ласков мам.

Лöнь пельöсокöй,

Лöнь пельöсокöй,

Зелёнöй раса горт менам!

Песня бырсьö.

ОЛАНОВ (чеччö, ветлöтö). Эг вунöт, ёртöй, нем эг вунöт! Разь позьö сэтшöмсö вунöтны? И гымалан годдэс, и порох тшыныс, и сьыланкылыс, и сöдз торокыс — быдöс тöдвылын олö. Олö гусьöника, дзик дзебсисьöмöн. Кöр и мыччисясö бы, а ме нiйö тойлала, бöр йöрта, бöр, бöр! — эд мешайтö уджавны, эд вöрзьöтö сьöлöм, эд каттисьö юрвемын! Но мымда позьö, мымда позьö падмöтны ловтö? Мымда позьö нелюбöй уджсö керны, кöдасянь сьöлöм гудыртчö?! Мымда, а? Ме, деревняись мужик, мырся-ола городын, кытöн и картовсö то оз позь небны... Чиг яйлiсь, йöвлiсь, тшак-ягöдлiсь кöрсö вунöтi ни!.. Ой, Оланов, Пашка Оланов, саймы да барöт синнэтö! Кад ни вежöртны, что городыс не тэ понда! Сiя тэнчит иньтö гусялiс, семьятö разис, а тэ... Ой, Пашка, Пашка! (Сувтчö джодж шöрö, кыкнан кинас шамралö-дзугö юрсисö.) Колö кольны городсö! Городсö колö — кольны! Вежöртiн, Пашка Оланов?! Вот тэныт приказ: деревняö, деревняö!

Дата добавления: 2015-11-16