Асывнас ныла локтiс лагерись завхоз. Сивöй вöлöн. Телегаыс зелёнöй, дугаыс гöрд.
Телега радзас ольсалöм веж турунок. Неважын ытшкöм — катшасинлöн чочком дзоридзоккез сё ловьяöсь, абу на нöитчöмась.
Завхоз пукалö кыз подушка вылын, кыдз креслоын.
Сiйö панталiс погона тётя, и нiя мыйкö дырна баитiсö кыкöн. Сэсся завхоз петкöтiс велосипед, пуктiс телега бöрас.
Быдöс этö зоночкаэс да Чикаляка адззылiсö öшын пырйöт.
Эта бöрын погона тётя петкöтiс челядьсö, отсалiс нылö кайны телега вылö, висьталiс кольласян кыввез:
— Мунö бытшöмика! Да сэсся эд вовлö татчö!
— Адззисьлытöдз! — горöтiс Лег-лег.
— Адззисьлытöдз, тётя! — чивöстiс Чикаляка да öвтыштiс кыкнан бордокнас.
— Ö, а ме мый шуи? Мыся, татöн сэсся не адззисьлыны!
Сiя макнитiс кинас, бытьтö тойыштiс отира телегасö да вöвсö, и нiя вöрзисö.
Чики-чоки вартöны подковвес асфальт кузя.
Шондi шынь-шынь видзöтö мунiссес вылö.
А нiя мунöны — юр зэгалö.
Канин Шура думайтö: «Эстiсь петiм бура. А мый лагеряс висьталасö?»
Лег-лег радуйтчö: «Завхозыс оз видчы...» Чикаляка кынöмсö малалö: «Погона тётяыс чöскыта вердсьö!»
Чойкар саяс, кöр телега кайис мыс вылö и гöрд дуга увтöт тыдыштiс лагерь, завхоз горöтчис Канин Шуралö:
— Ноко мыччав меным аканьтö.
Канин Шура мыччалiс, но завхоз эз ошкы зоночкалiсь уджсö:
— Тэ бы кöть курöгöс керин. А эта чачаись кытшöм польза?.. Но эшö буржык бы вöлi, ежели коза пиян... Кывзы, а ручöс кужан керны? Меным руч колö.
Канин Шура эз на ешты и öмсö осьтны, кыдз ёна öбидитчöм Чикаляка петiс сы ки увтiсь, сувтiс завхозыс мышкö да вижлокöн горöтiс:
— Чикалякасянь некытшöм польза, да?! Чикаляка курöгся умöльжык, да?! Чикаляка этiйö... этiйö...
Ох тэ, беднöйка, беднöйка!
Лöгыс да öбидаыс сымда чукöртчöмась, что нiя кыввесö одзалöны петны, телега радзас оз тöрö!
Чикаляка мöдiс горöтчыны мыйкö сэтшöмö, кöдасянь бы стыд лоис завхозлö, но кыввес вевттисисö лöгнас, а сьöлöмыс пизис, борддэс лудiсö, коккес места эз адззö, и сюра герой чеччöвтiс вöлыс кадж вылö, медбы сэтчинсянь ыждавны.
Вöлыс корснитiс кыз нырнас: «Эшö эта ме вылö кышасьö!» — и квотш вачкас сы кузя бöжнас. Но Чикаляка ештiс одзжык пышшыны вöв бöжыс дынiсь да кайис гöрд дуга вылö, чатыртiс сюра юроксö.
О-о, сiя öнi вöлi генерал!
Но эта жö секундаö сы вылö татшкисис гыжжезнас кайварыш да кокнита лэбзьöтiс сiйö сьöрас.
— Кыша, срамина! — ыкöстiс завхоз да сувтöтiс вöвсö. Канин Шура кынмис местаас — пукалö шы не тöв. Лег-лег кöритö Канин Шураöс:
— Ок тэ! Мыйлö кисит лэдзин?
Вöлись и Канин Шуралöн оссис öмыс да вöрзис кикокыс:
— Нöбöтiс! — сiя чеччöвтiс телегасис да уськöтчис котöртны рас ладорö, кытчö пуксис кайварышыс.
— Ой-ой, ноко берт! — сувтöтiс зоночкасö завхоз. Вежöртчис и Канин Шура: разь бордтöмыс вöтас бордасö? Сувтчис, сулалö, а синнэс сё вöтчöны гусясись кайыс сьöрö...
Мый пизис эта коста Канин Шура сьöлöмын, сьöкыт висьтавны, но кокнит шуны: Чикаляка эз ло.
Казявтöг шогмис и казявтöг öшис...
Вот мый висьтасис кузь голяа, кузь кока, кузьмöса шаньга чужöма зоночка Канин Шура, менам бур сосед. Висьтасис меным öтнамлö. А ме — тiянлö.
Кинлö колö — верита, кинлö оз ков — эдö.
Дата добавления: 2015-11-16; просмотров: 39 | Нарушение авторских прав
| <== предыдущая страница | | | следующая страница ==> |
| Канин Шура да Лег-лег вирскöны ныррезöн | | | ВЕСЬ ÖШТÖМ КАД |