|
Читайте также: |
Умöль, öддьöн умöль дело шогмис: Чикалякаöс онняюрöн лэдзисö мöдöдз этажсянь!
Ловья сьöлöмасö, сёрнитан кыласö!
И шмоткисис-усис сiя, дзик изтор, чорыт му вылö.
Кöть и эмöсь Чикалякалöн бордоккез, да эд нiя нярöсь — учöтöсь и вынтöмöсь. Курöглöн куимись паськытжыкöсь, да и то оз лэбав.
Усис, пондiс лёкöн горöтлыны:
— Вийисö, вийисö! Отсалö, отсалö!
Горöтлiс этадз да и нюжöтiс коккесö, паськöтiс öт бордсö — мöдсö эз вермы. Куньсисö югыт синоккес — кулiс! А боки мунö старушка и кылö:
— Вот сало! Вот сало!
И думайтö: «Роч торговка локтöма да гос вöзйö».
А сылö, пöрисьлö, госыс öддьöн колöма, и сiя пондiс нёджжасьны, кытöн госнас вузасьöны. Но матын некин эз вöв, только кулöм кай куйлiс — чавкан, нето сьöдрака. Старуха вöлi бур морт и жалейтыштiс кайсö:
— Ок тэ, шудтöм! Эттшöм гажа кадiсь мунiн... Может, и пияннэзöс колин... Сiя орöтiс шышыбар бердiсь паськыт лист, медбы кутны сы сорöн кулöм кайсö да чапкыны туй дорсис кырасö — ась сэтчин дуксялас. И казялiс: кайыс кöмкöта. И сюра. И борд йылас — кань коккез.
— Эта мый инö сэтшöмыс? Акань я мый я? — и вöрзьöтiс бордöттяс. — То дивоыс: ассим векöс бырöта ни, а чаркиа кайсö эг пантавлы.
Вöрзьöтiс кайсö, и сiя небура горöтчис:
— Отсалö, отсалö!.. Канин Шура! Ятнöя, сöстöм кылöн горöтчис.
— Тэ кужан баитны? Морт увтырись разь? Старуха босьтiс сiйö киас, водтöтiс кисой вылас, но аканьыс сэсся эз шыась.
— Ой, бордыс тай чегöма! — казялiс старуха. — Колö веськöтны сiйö! Ыджыт туй дорас сулалiс гöрд креста машина.
«Сiя и отсалас миянлö, — ас пондас шуис старуха. — Кöть не морт жö, да абу немöй».
Машинаас шофёрыс вöлi öтнас, но чожа локтiс и докторыс. Старуха мыччис сюрока кайсö:
— Отсав-ко миянлö, дона морт. Он кö отсав, кувны ештас.
Докторыс вöлi мыдзöм чужöма том инька. Сiя дзар керис кайыс вылö, шуис:
— Эта клиентыс не менам, и ме сы бердö ог кутчись. — И нарошноись юалiс:
— Мый сыкöт лоис?
— Вийисö, шуö.
— Кин шуö?
— Да этiя... Борда аканьыс.
— Вийöмыс баитö? — докторыслöн синнэс öзйыштiсö гажöн. — А эшö мый висьталан?
— Сiя ловья вöлi. Висьталiс — и кулiс. Комиöн баитiс.
— Ась кöть французскöйöн баитö, сiя сёравно клиентыс не менам... Нöбöт ветеринарнöйö. Лок пуксьы, лэдзчöтам Чойкарö.
И нiя пуксисö да мунiсö — кыскисö Чикалякасö ветеринар дынö. А сы коста...
Дата добавления: 2015-11-16; просмотров: 78 | Нарушение авторских прав
| <== предыдущая страница | | | следующая страница ==> |
| Лэбис ыджыт тыри-ёр | | | Мый и керсьö! |