ВУДЖÖТÖМ

ЗАРНИА ЧИКИССЕЗ

(Кудымкар, 1993)

ПЫТШКÖС:

Лыддьöтiссез дынö

Сказкаэз

Бадьпиянко

Быдöсся вынажык

Ванька-вакыскалiсь

Видзморт

Зарниа чикиссез

Куим зять

Кыдз Данько иньсö мездiс

Кыдз мужик вöрдядьлö уджалiс

Маню да Ваню ― сой да вон

Машу да уж

Пöттöм

Петрунь да Петя-петушок

Суседко

Ю туйдiсь

Легендаэз да преданнёэз

Бусыгинскöй керöс йылiсь легенда

Иньва йылiсь легенда

Кыдз шогмис Кама ю

Мыля кудымкарскöй комиэсö шуöны батюррезöн

Роман-лыйсись

ЛЫДДЬÖТIССЕЗ ДЫНÖ

Эта книгаыс, позьö шуны, чужис видзчисьтöг. Вайöта öтiк письмоись неыджыт тор, и тiйö вежöртат, кыдз аркмис.

Редакциялöн дона уджалiссез!

Ме гижи кынымкö сказка. Ежели ола ме комиэс коласын, дак и сказкаэс комиöсь. Гижи рочöн, коми-пермяцкöй кыв вылас гижнытö эг на лысьт. Вот бы ныись дело аркмöтны! (Может, книгаок керны.) Од я адззö сэтшöм мортöс, кöда кутчас менчим сказкаэсö видзöтны да вуджöтны коми кыв вылö? Нiя менам кыкдас мымда...

Гордеева Т. И.

Юсьвинский район, Купрöс-Волок. Июль 5 лун, 1989 г.

Сiйö письмосö «По ленинскому пути» газета иньдöтiс меным. А гижис письмосö öддьöн бытшöм сьöлöма семьдесятгодся бабушка Тамара Ивановна Гордеева, кöдалöн уна внуккез. Ны понда и Пармаись быдöс челядь понда тöждiкö кöркöся велöтiсь и кутчис гижны. И ме эг вермы откажитны сылö.

Книгасö лöсьöтiсь

БАДЬПИЯНКО

Море дорын я, ю дорын я, олiс старик, чери кыйись, аслас старухакöт. Чериыс шедiс умöля, и нiя олiсö беднöя. А умöля шедiс чериыс сiйöн, что старик кыйсис берег дынас: важ пыжнас ылö-ту он мун, а вильсö керны сылöн выныс оз ни судз. Етша шедiс, но старик гозъялö и сiя вöлi тырмöмви.

Асланыс олан вылö нiя эз чидö, только мукöдпыр старуха ыш ловзисяс да горöтчас:

― Вот зонок бы миянлö, кöть быдтасок. Старик эта вылö висьталас:

― Кин жö сiйö миянлö, беднöйеслö, сетас?

Быд годöн стариклö чериыс пондiс шедны умöльжыка и умöльжыка. И вот кыдзкö лунтырöн сiя кыйис только кык чериок да бадь улок.

Сымда и вайис гортас, пуктiс старуха одзö:

― Эз лöсяв меным талун. Да, тыдалö, и одзлань бурсö нем видзчисьны.

Старуха öлö сiйö:

― Эн тöжды, пöрись, тырмас миянлö и öтiк чериокнас. Вот пöжала, сёйыштам и тшыгйöн ог кулö. А сэсся виль лун лоас ― виль сёян лоас.

Весöтiс старуха черисö да пöжалiс. Бадь улоксö каттьыштiс трепичö да гор вылö лэбтiс может, пöжсяс пö да листоккез петасö, а сыбöрын видзöтам пö, мый сэтiсь керны позяс.

Вот пуксисö нiя ужнайтны, пöжалöм чери бердö кутчисö. А гор вывсяняс ― вöснитик да гора шы:

― Дедколö да бабкалö ― чериок, а меным ― бöжок! Дедколö да бабкалö ― чериок, а меным ― бöжок!

Дивуйтчöны старик да старуха, нельки сёйны дугдiсö ― кин нö этö шыасьлö? А гор вывсяняс бöра:

― Дедколö да бабкалö ― чериок, а меным ― бöжок!

Кайисö гор вылö, кошшисьöны. Быд пельöсоксö кинаныс куталiсö ― некин абу, только трепичок куйлö.

Лэдзчисö гор вывсис, пуксисö сёйны, а гор вывсяняс сiя жö гора шыокыс:

― Дедколö да бабкалö ― чериок, а меным ― бöжок! Старуха тшöктö:

― Видзöт-ко, старик, бадь улоксö, не я сiя шыасьлыны кутчис?

Старик судзöтiс трепичоксö, путшöтiс. Видзöтöны, а сэтöн учöтик-учöтик, чалёк кодь, пуовöй зоночка. Синоккес ― дзик улок вылын почкаэз югьялöны, öмокыс шыннялö, кикокыс вöрö.

Юалöны сылiсь:

― Не тэ я горöтлiн миянлö? А сiя:

― Кин эшö, месся, эм тiян? Только ме.

― Кин тэ сэтшöмыс?

― Вöлi ме Зелёнöй Бадьлöн, кöда ю бердас топ быдмö, учöт зонок. Вына тöв нетшкöвтiс менö да чапкис кöдзыт ваö.

Дыр ме уялi и берсясö адззылi, а сэсся чериэзкöт ва увтас водi да сетьö шедi. Öнi тiйö шонтiт-веськöтiт, и ме лоа тiянлö зон туйö. Шуö менö Бадьпиянко.

― Мед инö сiдз и лоас, ― висьталiсö пöрись гозъя да вердiсö Бадьпиянкосö черинас, ырöшöн юкталiсö. Сёйыштiс Бадьпиянко нянь крöшки, чери бöжок вильöтыштiс да напёрсток джын ырöшок ньылыштiс, а бура и быдмыштiс ― дедколö пидзöсöдз лоис.

Видзöтöны сы вылö старик да старуха и радуйтчыны оз вермö: зонокныс учöт, да зэв ни эд чож! Не сымда сысянь радöсь пöриссес, что нылöн отсасись лоис, а сысянь, что ны ордын челядь шы горалö.

Рытнас водiсö узьны сёрöн, а ашынас Бадьпиянко югдандор чеччис да саймöтö мöддэсö:

― Чеччö, ая-мама, кад ни удж пондöтны. Старик сералö сы вылын:

― Тöдам тэнчит уджтö: чери бöжок вильöтны! А Бадьпиянко ассис:

― Верд-ко миянöс, мамук, ми айöкöт чериавны мунам.

Старуха сёйны вайис: чорыт нянь да шöма ырöш. Стариклö да Бадьпиянколö и эта бур ― сё жö тыра кынöмöн уджавны мунöны. А сэсся лун лоас ― сёян лоас.

Вот мунiсö нiя чериавны. Луныс тöла, кымöра. Старик ружтö, норасьö:

― Ой, эн видзчись талун бурсö! Весись вын песам. Бадьпиянко корö:

― А тэ чапкы сетьтö, пондыв кыйсьыны!

Старик кывзiс Бадьпиянкосö, и нiя пондiсö кыйсьыны. Öтпыр чапкисö ― сетяс нем абу. Мöдпыр чапкисö ― и черижуг абу.

― Мунам гортö, зонук, ― шуö старик. ― Может, ашын лöсялас миянлö.

Бадьпиянко асныралö:

― Миянлö черитöг оз позь бертны. Мый сёйнытö пондам? Керам сiдз: тэ чапкы сетьсö, а ме сэтчö черисö вашöта.

― Да кытчö тэныт, зонук?

А Бадьпиянко чöвтчöма ни да тэрмöтö стариксö:

― Чапкы чожжык!

И чапкис старикыт сетьсö куимöтпыр, а Бадьпиянко сунгисис ваас да öдззис пыдöсас соровтны. Чериыс и лэбтiсис куйлан местасис, чукöрöн пондiс ветлыны, а öтiк чукöр старикыс сетьö пырис.

Петiс Бадьпиянко васис, чирзö:

― Кыскы сетьсö, тятю!

Кутчисис старик кыскыны сетьсö ― сьöкытöв, öтнаслöн выныс оз судз.

Сэтчö Бадьпиянко чепöссис ― öдва кыкöн кыскисö. Чериыс сетяс тыр тапкисьöм-пырöм, да сэтшöм гырись, кытшöмö старик олiкас эз на адззывлы.

Нiя тыртiсö черинас пыжнысö да жагöник сибöтчисö берег дорö.

А берег вылас эта кадö богатöй мужик видiс ассис работниккесö:

― Мыля черитöг бертiт? Дышкучиккез тiйö, кад вийиссез!.. Менö розоритны мöдат? Мунö да черитöг эд и бертö!

― Дак оз шед талун, хозяин!

― Нем ог тöд!

Сэтчö мужик казялiс стариксö да Бадьпиянкосö и тувдiс осьта öмöн: кысь нiя сымда черисö кыйöмась? Оз я кытшöмкö секрет тöдö?

Богатöй мужик лэдзчис берег увтас, отсалiс старикыслö пыжсö кыскыны да öдззис юасьны: кыдз да мыля?

Бур сьöлöма старик эз понды суськисьны:

― Менам, адззан, öнi отсасись ― Бадьпиянко зонö. Ме сетьсö ваас чапка, а сiя черисö сэтчö вашöтö. То сiя, сапог саям сайласьö.

Богатöйлöн синнэс жаднöя югйöвтiсö, сiя пондiс кеймисьны:

― Кывзы жö, старик, сетлы меным Бадьпиянкотö, эта понда сто руб сета. Тiянлö эд сымда черисö нем вылö. А ме черинас городсö верда. Меным черисö унася-уна-уна-уна колö!.. Дак гожум кежас сетлы зоноктö!

― Сто руб ― ыджыт деньга, да вольнöй уджыс деньгаысся донажык. Ог сет зонокöс йöзас, мед гортын олас.

А Бадьпиянко шушкö старикыслö:

― Эн пов, тять, медав менö уджавны. Сто рубнас виль керку керан, кытчöдз важыт эз киссьы.

Старик кывзiс Бадьпиянкосö и висьталiс мужикыслö:

― Лöсялö. Сета зонокöс гожум кежас. Только медбы быд лунöн кык чериокöн гортö ваялiс.

И вачкисö мужик да старик оча ки.

Сiя кадсянь Бадьпиянко пондiс уджавны мужикыслö. Пемытöн мунлiс чериавны и вовлывлiс сёр рытöн да эшö гортас ештывлiс отсасьны. Уджалiс шоччисьтöг.

Чулалiс гожум.

Старик да старуха виль керку лэбтiсö, а богатöй мужик сто бочка чери заптiс, медбы тöвнас городын донöнжыка вузавны. Öнi сiя сэтшöм надз да жаднöй лоис, кытшöмöсь светас эз вöвлö. Нельки совсö, кöдöн черисö солалiсö, пондiс сетны етшажык.

Сылö шуöны:

― Тшыкöтан добротö, хозяин! А сiя нылö шуö:

― Тiянлö кытшöм дело? Керö, кыдз тшöкта!

И петiс сiдз, что умöля солалöм чериыс быдöс дуксялiс, и богатöй мужик сiйö чапкис.

Вöлись горзö мужикыт, юрсисö летö, да некин сiйö оз жалейт: сiдз пö тэныт и колö!

А старик гозъя да Бадьпиянко бура пондiсö овны. Черисö кыйисö тырмöмви, а эз жадничайтö. И öнi, натьтö, сё сiдз олöны.

Дата добавления: 2015-11-16