КУДЫМ-ОШЛÖН ДА ПЕРАЛÖН МУ

ВАЖ ВИСЬТАССЭЗ СЬÖРТI.

Коми-пермяцкöй легенда юöртö:

«Ылын му вевдöрын, кымöрас, олiсö Ен да сылöн Зарань ныв. А вöра му вылын олiс том вöралiсь Пера.

Öтпырись, кöр Енöшка пондiс юны вöрöт котöртан юись, Зарань Енöшкаыс кузя лэдзчис му вылас.

Казялiс сiйö Пера, корис:

— Ло менам гöстяöн, ме мыччала тэныт муыслiсь мичсö быдсöн.

Пера новйöтiс нывкасö аслас муэзöт, мыччалiс вöрсö да кушиннэсö, оллесö да керöссэсö, визыв юэсö да сöстöм шорресö.

Зараньлö ёна гленитчис зелёнöй Пармаыс. И Пера гленитчис. И Енлöн нылыс кольччис овны му вылас.

Чулалiсö годдэз, и эта Пармаын шогмис Пералöн увтыр — коми-пермяккез».

Пондылам-ко фольклорись басöк образзэсö сувтöтны ордчöн ловья оланкöт, историякöт, мый аркмöтiс неыджыт народ — Пермскöй областьлöн ойвыв пельöсын олiсь, кöдалöн гортыс шусьö Коми-Пермяцкöй автономнöй округ.

«Зелёнöй Парма» — этö вöра пельöс, кöдалöн вöр увтас 70 процентся унажык му, а пармаöн коми отир шуöны лыса вöрлiсь вылынiн.

«Визыв юэз да сöстöм шоррез» — этö уна ваа Кама, сылöн пияннэз-вожжез Весляна, Коса, Иньва да эшö четыреста гöгöр ыджыт и учöт ю.

«Муыслöн мичыс» — керöссэз да мыссэз, ыббез да видззез.

Ен — язычниккезлöн медыджыт дорйись, сiя быдтö быдöс, мый эм му вылас, сiя ыстö гым да чардби. Этадз думайтöма йöз, кöдалöн историяыс пондöтчö пыд веккезын: Коми-Пермяцкöй автономнöй округлöн му вылын первобытнöй отирыс олöмась ни дас тысяча год одзтi.

Легендаэзiсь да преданнёэзiсь Пера — Пармалöн хозяин, медвына морт да шуда вöралiсь. Сыкöт ордчöн фольклор сувтöтö Кудымöс, сылiсь Ош нима зонсö, Бачöс, Чадзöс, Мизяöс да мöдiк богатыррезöс, кöдналöн пияннэзныс Кудымов, Ошев, Бачев, Чазов да Мизёв фамиллёэз увтын пантасьлöны быдсöн Урал пасьта.

Парма географияö тор пуктiсö чудскöй паммез-княззез Купра, Май, Юкся, Пукся — ны ниммезöн шусьöны селоэз да посёлоккез.

Легендаэс да преданнёэс чудь нимöн шуöны йöзöс, кöда кöркö овлöма уральскöй да прикамскöй каррезын да горттэзын. Учёнöйес шуöны, что сiя нимöн асывыв славяна шувлöмась Европейскöй Северись финно-угорскöй йöзöс, кинлöн кылыс и оланыс эз вачкись славянскöй вылö, вöлi «чуднöй». Чудьöн шусисö важ йöз, кöдна увтырись петiсö эстонеццез, вепссэз, кареллэз, удмурттэз, коми, коми-пермяккез. Миян эраöдз куимöт тысячелетиеын нiя аркмöтiсö финно-угорскöй общность. Вот мыля и талун эна йöз кыввезын неетша öткодьыс. Лыддьöны, что и «Пермь» кылыс шогмис вепскöй «пера маа» кыввезiсь, мый лоö «сайисьжык, ылiсьжык му».

Öддьöн важ, кыдз ачыс народыс, этноним «коми» аслас вежöртас сьöртi йитсьö «морт» вежöртаскöт. «Пермяк» содтöтыс только мыччалö олан места вылö. Пыд каддэзсянь коми-пермяцкöй увтыррес олöмась ойланись Чусовскöй ты дорсянь лунланись Чусовая ю дорöдз. Этö вель ыджыт мусö медодзза летописеццес шуöны Пермь Великаяöн. Нiя местаэзiсь, кытöн кöркö олiсö коми увтыррес да кöднаись шогмис коми-пермяцкöй йöзыс, археологгез адззисö уна сотня историческöй памятник.

Коми-пермяккеслöн медодзза каррес мыччисисö VII векын кыдз сэкся увтыррезлöн центррез. Не эта йылiсь я висьталö национальнöй эпос: «Чуддэзлöн Кудым-Ош пам керис виль кар, сетiс аслас увтырлö да ордчöн олiссеслö сю, вынсьöтiс военнöй дружина. Кулiкас висьталiс увтырыслö: «Эд олö весь, прокод кошшö аслыныт шуднытö. И некöр эд воюйтö соседдэзкöт, ёртасьö ныкöт...».

И сiдз вöлöма. Пермь Великая торгуйтлöма Урал сайись йöзкöт, Новгородкöт, Волжскöя Булгариякöт. Новгород да лунвыв муэз пырйöт Пермскöй вöррезiсь кучиккез мунiсö рытвыв государствоэзö, Ближний Востокö да ылöжык. Сэтчинiсь локтiсö мöдöтчаннэз, золото, серебро.

Но пермскöй чудьлöн оланыс кывтiс не пыр мирнöя. Етшасьлöмась, кыдз висьталö история, öтамöд коласын увтыррез. Ны вылö уськöтчывлöмась Урал керöс сайись княззез да ханнэз, кöдна коласын вöлöмась лёк Кучум да Асыка. Преданнёэс касьтылöны югорскöй Еграм да Шавель нима разбойниккезöс, кöдналöн вöввезныс чеччавлöмась пермскöй каррезiсь заплоддэз.

Пермскöй чудь эз пондыв мырддявны йöз муэз, но асьсö дорйыны кужлöма.

ВАЖ ЙÖЗЛÖН АССЯМА ИСКУССТВО.

Коми-пермяккес вöралiсö, чериалiсö, гöрисö му да быдтiсö нянь. А эшö нiя кужисö сылöтны металл, сыись басöка керны берсяторсö. Эта йылiсь миянлö висьталö кöркöся художниккезлöн öддьöн ассяма удж, кöдаын зэв бура тöдчö «зверинöй стиль». Меднöй да бронзовöй бляшкаэз, паськöм вылiсь чачаэз да сярöтчаннэз, пристежжез, культовöй предметтэз асланыс оригинальностьöн вöрзьöтöны сьöлöм. Нiя вывтi ассямаöсь композиция сьöртi, серöн, пытшкöсöн. Пермскöй зверинöй стильсö аркмöтö йöз искусстволöн аскодь традиция: öтiк художественнöй образын тöдчöны мортлöн, кайлöн да зверьлöн синбаннэз. Эна лов гажöтан предметтэзын пантасьлöны морт-вöрмöс, морт-ош, кай кодь идол, адззывлытöм дзöдзыв. Важ искусство мыччалö, кытшöм таланттэз, кытшöм ыджыт духовнöй культура вöлöма мортлöн, мыччалö сылiсь ёся мывкыд, воображеннё, природакöт топыта йитсьöм.

Коми-пермяцкöй искусствоын мöдiк тöдчана визьöн лоис пуовöй скульптура. Сiя сьöрна пырис отир оланö кыдз архитектуралöн тор, кыдз чачаэз да пань-бекöр, культовöй предметтэз. Но тöдтöм мастерреслö медыджыт славасö керисö язычниккезлöн пуовöй еннэз. Нiя сулавлiсö кöркö каррезын да горттэзын, креста туйез дорын, öшымöссэз-ключчез дынын — «болваны истуканные, изваянные, издолблённые, вырезом вырезаемые...» («Житие Стефана Пермского»). ХIV—ХV веккезö, невна мöдкодьсьöтöмöсь ни да мöдкодь ним увтын, нiя пырисö православнöй вичкуэзö. И мастеррес нiйö керисö сэтшöм чужöмаöсь, кытшöмöсь адззисö ас гöгöрсиныс. Видзöтан талун ны чужöммезö, ны мывкыда да гажтöм синнэзö и адззан, что нiя — коми-пермяцкöй крестьяна. Эта векись двадцатöй годдэзö öтiк «Пукалiсь Спаситель» адззисис Кочёвскöй районын. Сiя вöлi сiдз бура керöм, краситöм да пасьтöтöм пермяцкöй шабурö, что лампада югöр увтын вачкисис ловья вылö. Да и видзсисö комиэс ныкöт сiдз жö, кыдз морткöт, эз лыддисьö. Миян просвещённöй кадö ни, кöр ковсьывлiс тöв-отсалiсь, коми-пермяк гора шутньöвтöмöн «кытсавлiс» Ойпельöс — Ойвыв енöс, Тöв енöс.

Зэв ассяма искусстволöн важторрес талун мыччассьöны странаись краеведческöй да художественнöй музейезын.

«БАРОНСКÖЙ КАБ».

Кама ю да сы вожжез дорö сьöрна локтiсö овны ой ладорись роч крестьяна, тюркскöй йöз да коми-пермяккезлöн родвужа отир — удмурттэз, мордва, мари. ХV векись мöд джынас Пермь Великая сюрис Русскöй государствоö, и сiя кадсянь Прикамьеын отирыс унаöн содiс. Казанскöй ханство öтлаöтöм да Урал сайö, Сибирьö, бур туйез адззöм бöрын татчö йöзыс сiдз и пондiс визывтны.

Иван Грозный прикамскöй муэзсис мымдакö козьналiс Строганов купеццезлö да промышленниккезлö, и лунвыв коми-пермяккес лоисö крепостнöйезöн.

Крепостник кипод увтын олöм, ыджыт оброк да мöдiк сьöкыт уджжез крестьянасö керисö нищöйезöн. Коми-пермяк учöтсянь велалiс удж бердö да уджавлiс, кытчöдз вермывлiс. «Баронскöй каб» — сiдз шувлiсö крепостнöйесö вольнöй крестьяна. И «кабыс» керлiс берся уджсö. Сiя — гöрись-кöдзись и пода вердiсь, плотник и столяр, вöралiсь и чери кыйись, карч быдтiсь и мош видзись, туй керись и керку лэбтiсь. Сiя — вöр заптiсь, шом керись, кузнец, пимокат, кучик керись, нянь пöжалiсь, повар. Сiя великöй князьлöн да царьлöн ратник, кин Россия слава понда бертлiс гортас геройöн нето лöньсьывлiс йöз муэзын пипуовöй крест увтын.

Коми-пермяк Строгановвес кипод увтын вöвлi и сэтшöмöн, кытшöмöн эз мöд лоны: пыль страда коста, кöр ковсис кыскавны баржаэз вапаныт Волга кузя Нижний Новгородöдз, сiйö ыставлiсö бурлачитны караванö, а гортö бертны — подöн, кöть киас и грош эз дöнзьыв.

Уна терпитiс мужик, но быдторлöн эм пом. Öтпыр Иньвенскöй волостись крестьяна нач откажитчисö мунны караванö. Этадз шогмис 1861 годся тулысö, сiя пырис Урал историяö кыдз «караваннöй бунт». Бунтыс вöлi пöдтöм, киссис вир. Сотня-мöд бунтовщикöс ыстiсö Сибирьö.

Вöра пельöслöн пи, шутёма ыб вылын мырсись коми-пермяк эз кув только удж радейтöм кузя. Свадьбася паськöмсö — гаруснöй йöрнöс, лöз виззя дöраовöй вешьян, стрась мича рöма кушак, йи да сапоггез — мужик пасьтавлiс сыбöрын только размöд. Да и инькаыс шоча пасьтавлiс сiйö басöк паськöмсö, кöдö керис ачыс вöснит сöдзись йöрнöс, кöдалöн одзыс да соссэс вöлiсö бура серöтöмöсь, дубассэз да сарафаннэз, дзоридза чышьяннэз да бисирöн вурöм кокошниккез-шамшураэз.

Басöка кыйны да гöрдззисьны кужись, природасянь мича чужöма пермячка вöлi абутöм морт туйö, сылöн нимыс эз вöв гижöм и переписнöй книгаэзын. Сiя, полiськодь морт, уджнас вöлi мужикыс сьöрья, нельки промышляйтiс йöз муэзын. Поди, сiя и сьывлiс то этö сьыланкывсö, туй дорын шоччисикö:

Муна ме, муна кузь туй кузя,

Пукся ме, пукся колода вылö,

Осьта ме, осьта котомочкаöс.

Айö да мамö изтор пуктöмась,

Дедö да бабö шомтор пуктöмась,

Сойö да вонö багсьöм нянь пуктöмась.

Бöрам видзöта — сьöд вöр сулалö,

Одзам видзöта — сьöд отир сулалö.

Пермскöй крепостнöйеслö судьба сетлöма сьöкыт да лёк олан. Завод видзиссес да помещиккес нiйö донтiсö только кыдз уджалан вын, мортлöн оланыс вöлi нач донтöм.

А отирыс вермис да кужис керны берсясö.

Отир тöдвылын öнöдз олöны таланттэзлöн сэтшöм ниммез, кыдз крепостнöй художница-зарнивурсись Настя Радостева, скульптор, пу кузя серöтiсь Н. Филимонов, а И. Логачев кужöмöн ляклiс-серöтлiс столичнöй керкуэзiсь карниззэз. Нiя морттэс, кöдна вермывлiсö велöтчыны, лоисö зэв ыджыт личносттезöн, кыдз крепостнöй пермячкалöн зон А. Н. Воронихин, кöда проект сьöртi керöма русскöй архитектураын вöвлытöм памятник — Петербургись Казанскöй собор. Талантливöй художник А. К. Кривощёков кончитiс художествоэз сьöртi Российскöй Академия и вöлi Петербургын велöтiсьöн. Сылöн племянник И. Я. Кривощёков, коми-пермяккес коласiсь медодзза учёнöй, колис миянлö география, этнография, социология, археология сьöртi öддьöн колана уджжез. Сiя жö керис Пермскöй губерниялiсь медодзза карта.

Отирлöн кужöм зэв бура мыччисис сэк, кöр Уралын и Коми му вылын тшöтш, пондöтчисö строитны кöрт да медь керан заводдэз. Талун Камскöй море вöтис Пожвинскöй заводлiсь цеххез, кöдна чужисö ХVIII век шöрын, а сэк завод дивитiс мирсö берся вильторнас. Эстöн вöлi керöмöсь медодзза коноводкаэз, кöднö эз ни ковсьы кыскавны бурлаккезлö, керöмöсь медодзза пароходдэз, кöдна уйисö Кама да Волга кузя, медодзза паровоз, кöдö символичнöя шуисö «Пермяк». Пожваын Петербургся одзжык лоис газовöй освещеннё. Уральскöй промышленность зорöтöмö ассиныс пай пуктiсö Майкорись Никитинскöй завод, Елизавето-Пожевскöй да Кувинскöй кöрт и чугун керан заводдэз.

«БЫДÖС ВÖРЫН ОЛIСЬ УДЖАЛÖ!».

Пармаын промышленнöй зоралöмыс етша отсалiс простöй мортыслö, крестьяналö. Коми-пермяк одззамоз гöрис сабанöн, кöдзис кöдзсян кудiсь, изiс киа изынöн, тусь масьтiс тоинöн, нинкöм кыйис сьöктанöн. И сё юрбитiс важ еннэслö: кочёвса эшö эта векö еныс понда начкывлiсö пороз; гайнса чукöртчывлiсö видз вылö, медбы «вердыштны» енсö пиканöн; верх-язьвинса тулысöн пантавлiсö нянь-ырöшöн сырчикöс.

ХIX век шöрын мыччисис пила, но деревняыс понда сiя вöлi донатор, и мужик, медбы век кежö сувтöтны керку, конда керресö орлавлiс черöн. Эта сьöкыт уджыс пыр керсьывлiс отсасьöмöн — помечöн, кыдз керсьö деревняас и талун.

Ыджыт дело эта крестьянскöй помечыс — и сьöкыт удж, и томмес понда бытшöм наука, и лов понда праздник. Кöр тшупöны керку, лэбтöны сiйö, вартöны гор, помечас локтö уна отир, и сэк кежö лöсьöтны мöдiк уджжес.

Помеч кежас пондöны лöсьöтчыны одзжык: мужиккес лöсьöтöны инструмент, вайöны вöр, нитш, сёй да мöдiк колан материаллэз, бöрйöны керку увтö места. А оланöн лыддиссьö вылынжык места, мысок, кытöн рыт коста оз сулав ру, кытöн любитöны куйлыны пода. Мед быдöс петiс бура, корлiсö тöдiсьöс: сiя адззö, кытöн Висьöвлöн туй, кытöн куллезлöн-чуддэзлöн орсан местаэз.

Лун-мöдöн одзжык инькаэз пондöны пöжны сур да тагья ырöш, мукöдпыр керöны туран ырöш, пуöны зöровöй да анькытшовöй киселлез, пöжöны сёртни да калиг, медбы сусло сорöн нiйöн вердны ужин коста. А тöвнас удасьöны и дзирыт сурöн, кöдаö пуктöны гормöгись гöрд пуртöс. Помеч кежö пыр керöны черинянь да пельняннез.

Помечöн керку лэбтöм бытшöма мыччассьö коми-пермяккезлöн важся сёрнитанын:

Тури помеч керöма: Кöин кер ваялö, Ош керку лэбтö, Шыр нитш тэчö, Руч гор вартö, Кыр öшын писькöтö, Кöч пес ваялö, Ур гор лонтö, Тар блин пöжалö.

Быдöс вöрын олiсь уджалö! Важ ритуаллэз öнöдз овлöны сэтшöм важнöй уджжезын, кыдз мамкер-матича пуктiкö. Мамкерсö лэбтiкö сы бердö домалöны пызандöра, кöдаö каттьöмöсь черинянь, вина бутылка, деньга, вурунтор, чепöль етш пизь. Мамкерсö лэбтöны кыскöмöн, оз тарöвтö. Деньга, вурун да пизь — шонытлöн да богатстволöн символлэз — пуктiссьöны мамкер увтiсь пазö, и ны весьтын шувлöны кöрткыв-заговор. Вина да сёян дöнзьö мамкер лэбтiссезлö.

Аскодь обряд сорöн кöркö чулöтлiсö «чарла чöвтöт» нето «чомор». Сiя — и вундан ештöтöм, и чоморöс да луншöрикаöс «потшшуйтöм» — эд нiя гожумбыт дозирайтiсö сюэсö, берегитiсö шерсянь, тöвчиккезсянь, травитчöмсянь.

Ыджыт долытсянь, что вундiссис сю, тагья ырöшсянь да сурсянь öдззас орсны удж керисьлöн вирыс, гажмас лолыс — и пондас горавны ыбыс пöлян орсöмсянь да отир сьылöмсянь, визыв тупи-тапсянь! А ордча расокись кушин вылын, кытчö пуктöм «ыб дозирайтiссезлö» торья гöснеч, морт синсянь сайласьöмöн, пируйтöны да йöктöны чомор и луншöрика. Шуöны, вöвлöм и сiдз, что ырöша чомор йöктывлöма отирыс коласын...

Парминсалöн гажаöсь и розосвося орсöммез — кытшöн сьылöм-йöктöммезöн, ойся ворожитчöмöн, берся орсöм-ыжмалöмöн, кöр серöм шедiссес мöдöтчöны ошшезöн, вöввезöн, козаэзöн да мыччалöны сэтшöм номеррез, кытшöмöсь некин оз видзчись.

Коми-пермяк — мортыс простöй, оз радейт ошшасьны, етша баитö. Эта визьыс тöдчö и сы сёрниын, сы кылын. Важ кыввес, медодззаэс, унажык дженытöсь. Нiя басöкöсь и горнаныс, шусьöны кокнита: ен, му, ва, ру, лов, морт, юр, инь.

Басöк, поэтичнöй нимаöсь, лунся да ойся югдöтiссес: шондi — шоныт, шонтан дi (остров); тöлiсь — тöв пытшкись, тöв аркмöтiсь, кöдзыт керись; чарньöв — ньöв, кöда чарöтö, мöртчöтö муö ньöвьёсь.

А пельнянь! Сылöн нельки горыс — чöскыттор. Этö кывсö важын ни тöдö роч йöз, и зэв ыджыт лингвист В. И. Даль сылiсь вежöртассö вуджöтiс кыдз «хлебное ухо». Но эта — ыджыт сорасьöм. Пельнянь — Пельлöн нянь, а Пель — важ коми йöзлöн ен. Сiйöн пельняньыс кыдз обрядовöй сёян коми-пермякыс гöгöрын кузьвек да ковсьö и кулöмыслö: пельняньöн пыр вердсьöны дзебсикö, касьтiсикö, кыдз чериняньöн, пöжалöм кольтьöн, селянкаöн.

Коми-пермяцкöй сёрнилöн ассяма кыв запасыс абу ыджыт, но сыын эм изобразительнöй средствоэзлöн берся богатствоыс. 1891 годö велöтiсь Е. Е. Попов лöсьöтiс роч алфавит сьöртi национальнöй азбука, а 1894 годö петiс челядь понда медодзза букварь. Но школаын велöтiсö рочöн.

Коми-пермяккез фольклорын олöны берся жанррез — сказкаэз да легендаэз, эпическöй висьттэз да сьыланкыввез, частушкаэз да загадкаэз, пословицаэз да поговоркаэз.

МЕДОДЗЗА АВТОНОМНÖЙ. ПАРМАЛÖН ДОНТIСЬÖМ.

Семнадцатöй годся октябрьсянь Пармаын вежсис неетша. Гражданскöй война бöрын ыджыт национальнöй задачаöн лоисö — керны государственность да лöсьöтны письменность, кöдна отсалiсö бы зорöтны коми крайлiсь экономика да культура, бурсьöтны олансö. Энö задачаэсö тыртöмын медодзас вöлi Ф. Г. Тараканов, кöда мунiс революциялöн биэз, ваэз да ГУЛАГ-лöн режиммез пыр.

Отир историяын зэв тöдчанаöн лоис 1925 годся феврались 26 лун — Коми-Пермяцкöй национальнöй округлöн, странаын медодзза округлöн — чужан лун. Сы центрöн лоис Кудымкар. Полiсь морттэз да коми йöзлöн враггез висьталiсö, что национальнöй кадррезтöг нем оз пет, и ковсяс бертны важинас. Но адззисисö отир, кöдна вермисö нуöтны государственнöй удж, тыртны национальнöй задачаэз да нёджжöвтны локтан кадö. Вöлiсö лöсьöтöмöсь учебниккез, лоис художественнöй литература, кöдö пондöтiсö керны А. Н. Зубов да М. П. Лихачёв. Нiя жö асланыс ёрттэзкöт паськöтiсö «Коми рыттэзлiсь» отирöс велöтан да гажöтан программа, кöдасянь ловзис, пондiс ымьявны деревня.

Эта гажыс лöньсис, кöр пондiсö чужны колхоззэз, кöр закон кутчис зэлöтны шоныта олiсь крестьянаöс. А сибалан годдэз пыр тыдалiсö ни репрессиялöн шодззез, кöдна ниль керисö обществолiсь дзоридз — творческöй интеллигенциясö.

Кыдз торья талантöс, сiдз и быдсöн народсö, кöдалöн эм бур сьöлöм-лов, позьö мымдакö падмöтны, но сылiсь зоралöмсö сувтöтны оз позь. Коми муыс чужтывлiс и чужтö да аслас национальнöй традицияэз сьöртi быдтö виль мастеррезöс да тöдiссезöс, кöдна донтöны отирлiсь духовнöй олан да вöрдöм.

Прикамьелöн ыджыт художникöн лоис Кудымкарись морт П. И. Субботин-Пермяк. Сiя уна вын пуктiс округись искусство зорöтöмö. Эта аскодь художниклöн картинаэс öнi олöны сы гортын, Перемын, Москваын, мöдiк российскöй городдэзын да граница сайын.

Изобразительнöй искусство вились бордасялiс да ыждiс 1960-й годдэзö. Эта кадö медодзза «чикиськайöн» лоисö А. Мошевлöн уджжез, кöдна пырйöт мыччассис важ и виль национальнöй олан. Россияись художниккез Союзлöн член, Коми республикалöн искусствоэз сьöртi заслуженнöй деятель А. Мошев — книжнöй да станковöй графикаын ыджыт мастер. Öддьöн аскодяöсь, национальнöй öдаöсь, В. Оньковлöн, Г. Караваевлöн да мöдiк пöрись и том живописеццезлöн портретнöй, живописнöй да историческöй полотноэз.

1930 годсянь Кудымкарын уджалö национальнöй драмтеатр — коми-пермяккезлöн гаж да слава. Пятьдесят год гöгöр театрас уджалiс Россиялöн народнöй артистка А. Г. Котельникова. Двадцать пять год ни нуöтö главнöй режиссёрлiсь удж Россиялöн народнöй артист В. Д. Гуляев. Отирыс донтö Россиялöн заслуженнöй артисттэз Л. И. Столяровалiсь да Н. А. Крохалевлiсь орсöмсö, театрлöн надеждаöн лыддьöны Н. Я. Голеваöс, В. Д. Сырчиковöс, А. П. Четинöс. Сотняся унажык спектакль оформитiс Россиялöн заслуженнöй художник Д. С. Евстигнеев.

Роч да европейскöй классикакöт тшöтш сувтöтсьöны коми-пермяцкöй пьесаэз сьöртi спектакллез. Театр понда гижисö А. Зубов, М. Сторожева, С. Можаев да мöдiккез. Театрыс — Россиялöн К. С. Станиславский нима премиялöн лауреат.

Эшö неважын пемыт, гижантöг олiсь народ, талун лыддьöтö Н. Поповлiсь, С. Караваевлiсь, М. Вавилинлiсь, И. Мининлiсь, В. Баталовлiсь, Т. Фадеевлiсь, Ф. Истоминлiсь да мукöд коми-пермяцкöй гижиссезлiсь книгаэз. Округын эм издательство, книгаэз керöм понда полиграфическöй база. Пармаын и ылын сы дынсянь горалö Россиялöн заслуженнöй работник А. И. Клещинлöн, песня гижись Н. В. Пахоруковлöн да быдмись таланта В. Л. Куликовлöн музыка.

Округын олiссесö гажöтöны сьылан-йöктан ансамбллез, народнöй хоррез, фольклорнöй чукöррез. Искусствоэз сьöртi челядь школа, сельскöй музыкальнöй школаэз, челядь творчество понда керкуэз ассиныс уджнысö нуöтöны сiдз, медбы ёнажык отсавны этническöй культура зорöтöмын.

Коми-пермяккез коласiсь петiсö не öтiк учёнöй: вывтi ыджыт химик, СССР-ись наукаэз сьöртi Академиялöн член-корреспондент А. А. Яковкин; медицинскöй наукаэз сьöртi Академиялöн действительнöй член, медицинскöй службалöн генерал-лейтенант В. Н. Тонков; высокочастотнöй техника сьöртi тöдчана учёнöй, Государственнöй премияэзлöн лауреат В. П. Вологдин; наукаэзлöн докторрез А. А. Нешатаев, А. Г. Томилин, Г. И. Кудымов, С.П. Вилесов, В. П. Калашников.

Парма донтö ассис учёнöй ныввесö — А. С. Кривощёкова-Гантманöс, Р. М. Баталоваöс, Е. В. Ботеваöс, Л. С. Грибоваöс, Г. Н. Климоваöс да мöдiккезöс.

Кыдз и быдлаын, коми-пермяккезлiсь олöмö да культура тöдмалöмö пуктiсö ассиныс тор роч учёнöйез: кольöм векö — лингвист да этнограф Н. А. Рогов, эта век пондöтчикö — Ф. А. и А. Ф. Теплоуховвез, сёрöнжык — этнограффез В. Н. Белицер, Г. Н. Чагин, филолог М. Н. Ожегова, археологгез М. В. Талицкий, О. Н. Бадер, В. А. Оборин, Н. ф. Генинг да мöдiккез.

Етша тöдса Россиялiсь йöзлö коми-пермяккез быднёж донтöны гортнысö. Ны коласын уна сотня уджалiсь, кöдна быдтöны нянь, заптöны вöр, уджалöны фабрикаэзын да заводдэзын, керöны керкуэз да унася-уна берся удж.

ВИЛЬ ОЛАНЛÖН ЫБÖС ОДЗЫН.

Эшö неважын кажитчис, что коми-пермяк чужö киас черöн нето чарлаöн. Сылöн киэс вешталiсö му — быдса керöссэз, пöрöтiсö да быд ладорö иньдöтiсö сотня миллион кубометр вöр. Шуöны, что Прикамьеись нияпу вылын сулалö ылiсь Венеция.

Вöрыс и талун округыслöн богатство. Вöр — этö не только пу — медыджыт промышленнöй сырьё, но и поскотинаэз да видззез, ягöд, öрек, тшак, лекарство понда быдмассэз.

Талун, конечно, абу ни сэтшöм пыд вöр, кытчö бы эз сибавлы природа перкйись цивилизация. Шочамисö вöррес, чинö вöрмöслöн чукöр, да и урманлöн хозяин — ош, важ парминсалöн тотем, сiдзжö лоис етша лыда.

Вöр-му да мортлiсь здоровье берегитöм понда округас осьтöмöсь природалöн памятниккез: Буждомскöй кöзъяин, Веслянскöй нияа-кöзъя вöр, Вурламскöй боярышник, Онолвинскöй сыспуа вöр, Веслянскöй яг, кытöн быдмö вереск; Иньва ю, Кувинскöй пруд, Ыджыт Вадты (Адово) да мöдiк ботаническöй да воднöй местаэз, а сiдзжö Ошибскöй заказник, кытöн олöны шоча пантасьлан да оран увтыра зверрез.

Округыс, кыдз Российскöй Федерациялöн мöдiккескöт öткодь правоа субъект, ачыс кутчö лöсьöтны демократическöй олан, тöждö талуння олöм понда, отирыслiсь духовнöй вын зорöтöм, сöстöм этническöй традицияэз берегитöм да ашыння лун понда.

Неетша керсьö сы понда, медбы том йöз быдмис здоровöй и высиннас, и вежöрнас, вöлi грамотнöй, радейтiс аймаммезлiсь мусö. Шöрöт звенолiсь юралiссесö велöтöны округас, а ыджытжык специалисттэсö лэдзöны областись да странаись вуззэз. Пермскöй пединститутын важын ни уджалö филфаклöн коми-пермяцкöй отделеннё.

Эшö етшаöв тöдмалöмöсь округлöн природа ресурссэз, но адззисис нефть, тöдсаöсь кöрт да медь рудаэзлöн, изшомлöн местаэз, пантасьлöны олово, золото, платина, минеральнöй источниккез, строитчöм понда песок, галя, известняк, чочком да гöрд сёй, öтi-мöдi адззисьö пищевöй, лёгкöй да химическöй промышленность понда. Эм мыйись керны стекло да фаянс, мый йылiсь кöркö тöждiсö ни Строгановвез. Босьтны энö богатствоэсö вермас öдззöтны кöрттуй, кöдö думайтöны керны локтан годдэзö.

Вежсьöны каддэз, законнэз, отирлöн вежöр. Вежсьö ойвывся неыджыт отирлöн оланыс, унажыкöсь да ыджытжыкöсь лоöны проблемаэз, кöднö сетö олан. Только оз вежсьы отирлöн мывкыд, оз вежсьы ачыс коми-пермякыс: сiя оськалö дзарьясьöмöн, аслас ашынö лэчыта видзöтöмöн. И вынсьöтчö берегитны да ыждöтны одзза кадсянь дöнзьöм добросö.

Конечно, сы понда, медбы, кыдз баитсьö, быдса мичнас тыдöвтчис коми-пермяцкöй йöз, эстöн висьталöма зэв етша. Да позьö я сэтшöм стихиясö, кыдз народ, казявны и тöдмавны быдсöн?

И эта висьтын, и эта альбомын — Пармалöн да сэтöн олiссеслöн только пассэз, только учöтик торрез.

Дата добавления: 2015-11-16