Коми му вылын да сы гöгöрын шочыника пантасьлöны географическöй ниммез кар кылöн. Сiя частожык сулалö кыв конецын, но пантасьлö и кыв одзын. Мыся сiя сэтшöм кыв, мый сiя мыччалö?
Вот босьтамö дона миянлö кыв, гора да гажа кыв — Кудымкар, Парма столицалiсь ним — сэтöн эд тожö эм кар. Кысянь сiя лоис, кöр и кыдз лякасис кыв бердö и некыдз оз вермы калькöтчыны сы дынiсь?
Отир то кыдз баитö эта йылiсь.
Оласö-вöласö Надым да Кудым — кык вон. Оласö, дзик горттöм кöккез, парма шöрын: кытöн ой вöтас — сэтöн и узьöны, кытiсь сёян судзöтасö — сэтöн и сёйöны. Крут зэр нiйö вадас — рам тöлок косьтас; лёк мороз кутас — югыт би шонтас.
Шатласясö, шатласясö сiдз, топ вöр кöиннэз, да адззасö гажа места и керасö сэтчö аслыныс горт. Керасö, пуксясö шоччисьны да бытшöм уджöн любуйтчыштны. Шоччисясö-керасö, синнэзнысö да сьöлöмнысö бытшöма керöм уджöн бурмöтасö, да Кудым и шуас:
— Но, кыдз гортнымöс шуамö, Надымко? Сэтчö вдруг кылö:
— Кар! Кар!
Видзöтöны кык вон: кöз йылын рака пукалö да нырнас виль горт вылö мыччалö.
Серöмтчас Надым да висьталас:
— Вот тэныт и ним: Кудым кар!
Вон сiя, карыс, кысянь усьöма — кöз йывсянь! А Надым сiйö босьтöма да вурöма Кудым бердö! Но вурöма, тыдалö, умöльöла — öдва öшшö.
Эм и сэтшöм преданнё.
Важся кадö — может, тысяча али унажык год ни чулалiс сэксянь — öтiк чудскöй увтырлöн вöлöма пан, а шуöмась сiйö — Кудым. Эта паныс янсöтчас айыс дынiсь да пуксяс виль местаö. А медбы овны спокойнöя, медбы враггез эз вермö босьтны нiйö куш киöн, пан аслас отиркöт керас крепость — кытшöвтас оланiнсö ён да вылын стенаöн. И сетасö йöзыс эта селитьбалö ним — Кудымкар, сiдз кыдз сэтшöм крепостьыс шусьö карöн. Вот и лоö — Кудымлöн кар.
[* Кар кылыс не коми. Сiя локтöма миян дынö Иранiсь, кытöн сiдзжö обозначайтöма укреплённöй поселеннё. А эшö одзжык карöн шусьöма скалаын аркмöм, вылынкодь му дынсянь, ыджыт гор — ниша.]
Учёнöйез оз веритö эта преданнёэзлö. Мукöдыс бöрйисö этö нимсö сiдз: Ку дын кар. Ны моз петö, что Кудымкар — Кува ю дын нето Кува ю устьеын кар (коми-зыряна юлiсь устьесö шуöны дiн) — эд карыс ю дорас, устье дынас и вöлöма.
Кува сö одзжык шувлöмась Кудва, а может, просто Куд. Но мый жö лоö куд кылыс?
Кудымкар ним йылiсь медсерьёзнöй исследованнё гижис учёнöй А. С. Кривощёкова-Гантман. Сiя предполагайтö, что кар местасö йöзыс шуисö Куд ма, мый лоö: конда вöра му — пожума му. Сыбöрын, кöр сэтöн аркмис карыс, сылö сетiсö ним Кудма кар, а сэсся уна веккез сьöрна отир веськöтiс да волькöтiс этö кывсö ас мознас — керис сiдз, кыдз кокнитжык горöтчыны, кыдз буржыка кыв лöсялö. Сiдзкö, Кудымкар — пожумаина местаын кар.
Куд кывлiсь ми тöдам и мöдiк значеннёэз: öткö — доз (кöдзсян куд, вурун куд); мöдкö — бес, колдун. Кывлiт, натьтö, кыдз баитлöны мукöдпырся: «Нечистöй сiя местаыс — чуд да куд сэтчин олö»; куимöткö — вевт, вевтöс: «йы куд увтас чериыслö шоныт» (Йöгын шуöны — йы кыд). Но чередь я шогмис городнымлöн нимыс эна кыввезсянь.
А вот эшö öтiк куд — важся-важ кыв — скифскöй. Эта кылöн скиффез шуöмась ассиныс поселеннё, владеннё. Бергалыштам-ко сы гöгöр, бытшöмжыка нёджжалам сiйö öтмöдöрсянь, сiдз кыдз Кудымкар кывлöн да скифскöй куд лöн öткодь понятие. Но вермис я сюрны туйтöм Пармаö эта степнöй кылыс?
История висьталö, что вермис. Эта кылыс вермис локны миянö öтлаын аслас народкöт. А что скиффез вовлiсö миян вöра крайö, баитöны öтi-мöдi документтэз. Древнегреческöй историк, учёнöй Геродот аслас гижöттэзын миянлö юöртö, что öтiк неыджыт скифскöй племя абу покоритчöм царскöй Скифиялö и пышшöма гортсис — Чёрнöй море дорись — ойланьö. Геродот висьталö, кытчö пуксьöма эта воля радейтiсь отирыс — кытчöкö Иньва ю дорö. И ассиныс гортнысö нiя, может, сiдз и шуисö — Кудым, Кудiн, а парма йöз керис ас мознас — Кудкар нето Кудымкар. Вот и пондыв сэтöн вежöртны, кытшöм вир орсö-пизьö Кудымоввез сьöлöмын — чудлöн али скифлöн. Пожалуй, огжык сорасьö, кöр висьталам то этадз: öтыс и мöдыс.
Интересно, что Кудымкар гöгöрын кöркö овлöмась Кудынцов фамиллёа отир, а сiя фамиллёыс эд аркмис Кудын места нимсянь. Только кытöн сэтшöм местаыс вöлi, мийö ог тöдö.
И эта эшö не быдöс. Босьтны кö тамильскöй словарь, то сэтiсь позьö пантавны сэтшöм кыв, кöда горалö почти öткодя миян город нимкöт. Случайнöя, думайтат, лöсялiс, кыдз советскöй Хатанга да африканскöй Катанга или кыдз коми Парма да итальянскöй Парма? Пожалуй, не. Тамильскöй Кудынкар сiдзжö означайтö стенаöн кытшöвтöм городок, кыдз и миян важся Кудымкар. Вот и кошшы буждöм тшакыльыслiсь сунис конецсö!
Колö висьтавны, что тамильскöй словарись коми морт адззас уна тöдса кореня кыввез. Учёнöйез, натьтö, тöдöны этö и кöркö висьталасö миянлö, мыля нач чужöй народдэзлöн эмöсь öткодь кыввез. И может, сэк паськытжыка оссяс тысячелетиеэзлöн шебрасыс и мийö буржыка казялам, кöр и киннэз пондöтiсö керны Кудымкар сö, буржыка пондам тöдны асланым предоккезлiсь героическöй олансö. И эта легендарнöй карлö сувтöтам сэк памятник. Эз бы вöв нем умöльыс, ежели бы и öнi сувтöтны.
Да, да!
Сувтöтны как раз кöркöся кар шöрас, мича Кувалöн крут берег дорас.
Ме уна ни баитi Кудымкар лöн ним шогмöмыс йылiсь, но оз позь орддьыны и сэтшöм предположеннё, что миян городлöн нимыс аркмис морт нимсянь, и эта нимыс — Кудым или Кудын. Но сiя сёжö не коми, а натьтö, угорскöй (хантыйскöй, мансийскöй, мадьярскöй) либо тюркскöй (татарскöй, башкирскöй, чувашскöй да мöд.) отирлöн. Да и кар кылыс тöдса мöдiк йöзыслö: ханты да манси, например, хар öн шуöны поз, город. Сiдзкö, округнымлöн öння центрыс кöркö вермис шусьыны Кудынхар.
Менчим этö предположеннёöс подтверждайтöны и историялöн да языкознаннёлöн даннöйез.
Роч летописец Нестор эшö 1092 годö гижлiс, что остяккез (ханты) олöны перемскöй муэзын сё Печора дынöдз.
Финскöй языковед Тойвонен шуö, что «ханты одзжык овлiсö... сiя жö местаын, кытöн олiсö и олöны öнi коми йöз — лунланьын Перем город дынöдз, ойланьын... Печора дорöдз... XII — XIII веккезö ханты да манси пондiсö вешшыны Урал сайö».
Археолог В. А. Оборин, кöда неважын кошшисис Кудымкарскöй городище дынiсь важ могильникын, гижö, что могилаэзас эмöсь и угорскöй, и удмуртскöй, и башкирскöй вещщез и кулöммесö дзебöмась не öтiк обычай сьöртi. Интересно и сiя, что городищеын олiсь отир радейтöма вöв яй, а сiя — тюркскöй йöзлöн медбур сёян.
Сiдзкö, сiя кадö (VII—VIII веккез) городищеас отирыс олiсö не только не öтiк увтырись, но и не öтiк племяись.
Уна племяэзiсь, конечно, аркмис и коми-пермяцкöй народность.
Прикамьеын эшö эмöсь чудскöй каррезлöн местаэс: Дöйкар, Чумкар, Курöгкар, Майкар, Дзугыркар, Аннюшкар, Кöчкар, Зырянкар, Редикар, Шышкар — эна миян округын; Искар-Пыскар, Редикар, Крымкар, Канкар — Чердынь да Усоллё гöгöрын.
Дзуздинскöй пермяккезлöн, кöдна олöны Кировскöй областись Афанасьевскöй районын, сiдзжö эмöсь кара ниммес. То нiя: Ётшкар (Йотшкар), Зуйкар, Шудякöр, Ускочкар, Мутшкар да мöдiккез.
Унажыкыс ны коласiсь аркмисö, натьтö, морт ниммезсянь. История миян дынöдз вайöтiс то кытшöм языческöй ниммез: Кöч, Жонь, Сырчик, Ош, Учка, Мичко, Катша, Курöг, Рака, Дзуг, Паль. Мийö тöдамö сiдзжö и кынымкö чудскöй оксаэзöс (княззезöс) Кача, Бурман (Бурмат), Мичкин, Кочим, Изынар (Изынат), Зыран (Зырян). Öнöдз позьö коми деревняэзын пантавны Арчу, Оть, Дав, Юк, Ару, Сим, Пать, Лёк, Вупко, Бавча да мöдiк пияннэзöс, кöдналöн родыс кыссьö уна век пыдöсö. Конечно, ны коласiсь неетша ас моз керöм-лöсьöтöм христианскöй ним (Оть — Авдотья, Сим — Серафим, Пать — Фотей, Вупко — Луппа и с. одз.)
Дöйкар вермас аркмыны и дöй кылiсь; дöй öн комиэс шувлiсö рана нето нарыв-лёктоича, а сiдзжö гöгрöса мыс. Чумкар — этö чомья нето шалаша кар — удмурттэз чом да шалаш шуöны чум öн. Май пантасьлö легендаэзын кыдз морт ним, а пöрись отир эта кылöн шуöны, тыдалö, кинöскö вöрдядь родiсь («Каргинскöй волокас только май да макай олöны»). И эшö: арайезын быдмö майтурун, кöдö стрась радейтöны вöрмöссэз и эта понда натодиль петавлöны гожумнас нюррезö да пруддэз дорö. Но оз ков вунöтны и сы йылiсь, что Майкар гöгöрын эмöсь местаэз, кöдналöн ниммес не комиöсь (Чискомур, Турьямор и мöдiккез).
Редикар да Шышкар, натьтö, аркмисö морт ниммезсянь. Шыш öн кöркö коми отирыс шувлöма пышшалiсьöс, сайласисьöс, бродягаöс.
Уна тайнаэз дзебöма веккез пыдöсö аскöттяс дзор Редикар. И только надз легендаэз öтi-мöдi висьтасьöны сы йылiсь.
Олöма сэтöн важ отир — коми кыв сiя абу тöдлöма, ас мознас баитлöма. Челядь кодьöсь только мыгöрнаныс, но öддьöн и чожöсь да лэчыт синаöсь вöлöмась. Кыйсьыны бура кужöмась: чöсöн и налькöн, пильöмöн и сыртöн, педзинöн и лэчöн, дзугöн и вежöн. Чери кыйлöмась етша, унажыксö зверьöс да кайöс. Кыйöны уна, а сёйöны невна: уркай нето дзилимкай мортлö лунйыны тырмö. И паськöм етша колö. Кытчö воштыны кучиккесö сэки? Вузавны, конечно. Как раз кучик небисьыс тыр вöлöма. Кучик понда золото босьтлöмась, и то сiйö öшмöссэзö сюйлöмась. Дзебасö и завечайтасö: кöда локтас пö эта лунö да эта кадö татчö вала, мед сы дозö золотоыс гумыштсяс... Мужик вöлi пö судзöтöма: гумыштас бы симöтовöй чуманокö ва, а сылö шедас золото.
Сiдз, конечно, эз вöв, медбы ключись золото гумалiсö.
А вот йöзыс да важ книгаэз висьтасьöны, что Пятигоры деревня гöгöрись — Редикар ыб вылiсь да Редилог дорись адззалöмась берсясö, нельки серебрянöй ведра, кöдаын вöлöмась джын пуд мымда серебрянöй вещщез. Медбöрья кладсö вöлi адззöма Южанинов 1908 годö.
Мый лоö реди, сьöкыт висьтавны. Сiя кылыс, может, и не коми. Позьö эшö предположитны, что кыкнан Редикар сö керис öтiк увтыр.
Вежöртанажыкöсь лоöны Искар (из кар), Пыскар (пыс — осьта; сравнитö: ныр пыс, ем пыс, чер пыс; пыста нянь). Сьöкытжык висьтавны, кыдз аркмис Крымкар. Сiя, натьтö, обозначайтö сiйö жö, мый и шондiа Крым — крепость (татарскöй кыв кырым — вал, ров; монгольскöй хöрöм — вал, крепость, а сiдзжö, натьтö, и кремль).
Кар кывсянь жö, тыдалö, чужисö и сэтшöм ниммез, кыдз Караин, Карчой, Карин (Харина), Карас (одзза йöзыс сiйö шувлöмась Асванкар). Карас деревнялiсь нимсö аркмöтöны карась чери нимсянь, но этö, ме думайта, весь. Карас öн деревнясö пондiсö шуны сiя кар кузя, кöда вöвлi Карас да Мартин коласын (öнi сэтöн пода могильник).
Мукöдыс и Метшкöр деревнялiсь нимсö (Мечкор) пыртöны эта жö лёдзö, но чередь ли позьö этö керны. Мыля оз позь? Öткö, некытшöм коми морт сiйö оз шу Метшкар öн, а сё ни — Метшкöр; мöдкö, удмурттэзлöн, миян воннэзлöн, эм мутшко кыв — сiдз нiя шуöны кöчка. А кыдз мийö тöдам, удмурттэз да комиэз кöркö олiсö öтлаын и нылöн вöлi öтласа кыв. Удмуртияын тожö эмöсь Метшкöр вылö вачкисян ниммез: Мутшковыр — кöчкаа места; Мутшкомувыр — кöчкаа му. А миян Метшкöр юокным как раз и котöртö нюра кöчковникöт.
Вермис аркмыны эта нимыс метшкыр кылiсь (сравнитö: ош моз метшкыралö-мунö, метшкыралö-сёйö). Метшкыр — каттисьöм, гардчöм.
Каррес лёдзö некыдз оз тöр и Карчик, Кудымкарскöй районiсь городище места. Да и унажык отирыс сiйö шуöны Кöрчик нето Коорчик. Этадз, натьтö, шуисö мортöс. Вöвлöмась тай нiя местаэзын Сырчик кöз да Корчик кöз — священнöй пуэз, видно. А может, сiя öтiк пу вöлi?
И Караты аркмис, тыдалö, мöднёж: кара — этö юын нето тыын залив (сiдз баитöны архангельскöй областьын).
А вот сэтшöммес, кыдз Войкар, Кельчикар, Уркар, Шоркар, Шурышкар, кöдна пуксьöмась Обь ю дорö, петöмась öтiк семьяись коми каррескöт. Да и öнöдз сэтчин öтлаын ханты отиркöт олö коми йöз.
Но а мый жö миянлö висьтасясö ас йывсиныс горт местаэз — каррезлöн очавоннэз?
Эм Велва ю дорын Чинагорт деревня. Аркмöма эта деревнялöн нимыс вот кыдз.
Нето Дöйкарын, нето Карповын олöмась кык вон — Сель да Чина. Оласö, оласö, локтас кад торйöтчыны айныс дынсянь. Босьтас айныс нянь шöрöм, чегас шöри сiйö, сетас зоннэслö: вот пö тiянлö этö лун кежö, а ашын кежö заптат асьныт. И эшö сьöраныс чер сетас.
— Давай керамö аслыным горт, — шуас Чина. — Вöрыс эм, киэзным эмöсь и чер эм.
— Тэныт колö, дак кер, — шуас Сель, — а ме сiдз ола.
Чина сувтчас Велва дорö и тшупас аслыс керку — вот Чинагорт и лоас. А Сель мунас сы дынiсь мöдiклаö, керас, дзик рака, кöз вылö аслыс поз — и олö сэтöн — думушки абу. А кöр тöлыс локтас да морозыс зэлöтас сiйö, вöлись воныслö кеймисьны пондас. А воныс не мукöд кодь вöлöма: вунöтас важ öбидасö да отсалас Сельлö керку тшупны.
Архангельск посадын Чинагорт йылiсь баитöны мöднёж. Первöй керкусö Чинагорт ас сувтöтöм Истомин, зырянин. А вайöтöма сэтчö сiйö нужда: пышшöма лёк рекрутчина увтiсь. Керас Истомин керкуок умöликö, иззэзiсь гор тэчас, и лонтö горсö лунтыр, медбы керкуас шонытыс видзсис мымдакö. Кöр бы эз видзöтö Карпов сяняс — сё ни Велва дорас керкуок тшынасьö. Вот и ним сылö сетасö — Тшынагорт.
И куимöтнёж висьтасьöны.
Пышшас гортсис зырянин Истомин да пуксяс овны Велва дорас. Сьöрас вайöтас сiя старухаöс — то ли мам, то ли не. Керас Истомин керкужуг — не öшын, не ыбöс оз писькöт — и коляс сэтчö старухасö, ачыс мунас Кама вылö бурлачитны.
Мунасö öтпыр карповса видзöтны старухасö. Кыдз бы эз кув пö, тшыгьялö пö, натьтö.
— Тэ кин Истоминыслöн? — юалöны. — Инь али мам?
— Ме Чина, — шуö старуха.
— Няньыт эм жö? Мийö то невна вайыштiм.
— Менам юрвердiсь эм, — висьталас старуха и оз примит няньсö.
Казяласö: не сöстöм эстöн делоыс, и чожжык бöр мунасö. И быль, сыбöрын кывсяс, что Чина разбой видзöма, да эшö деманыскöт тöдса вöлöма.
Разбойыс «уджалöма» кытöнкö Кама дорас, а грабитöм добросö видзöма Чинаыс ордын. И часöт пö Чинагорт гöгöрас не öтiк клад куйлö.
Тöвйывлöмась разбойниккес старухаыс ордын, но кутны нiйö некыдз абу вермöмась. А этö сысянь, что Чина керку дынсянь Велва дорö и вöрö му пытшкöттяс мунöмась туйез.
Старуха нимсянь и шогмöма пö деревнялöн нимыс.
Эна легендаэзын неетша правда, неетша быль. Что кöркö вöвлöма ыджыт разбой — этö быль; что разбойыс дзебавлöма кладдэз — тожö быль. Адззисö öтiк клад эна годдэзö ни, только не золотöйö, а бронзовöйö. Жаль, что сiйö нöбöтiсö Перемö, а эз кольö школьнöй музейö. Но пондам надейтчыны, что чинагортскöй школьниккес адззасö мöдiк клад да эшö донажыкö.
Быльнöйöсь эна легендаэзын и ним да фамиллё, только нiя, пожалуй, рочöсь: Чина вермис шогмыны Аксинья нимсянь, а Истомин — Истома нимсянь. Юсьвинскöй Истоминнэзлöн деддэзныс овлöмась Новгородын, Устюг Великийын, Москваын. Известнöй богомаз Назарий Истомин XVII векö рисуйтлöма еннэсö и московскöй Кремлись вичкуэз понда, а Карион Истомин керлöма Пётр I понда букварь.
Пешнигорт посадлöн нимыс аркмöма пö пашня да горт кыввезiсь. Не сiдз, натьтö. Этадз эз вермы лоны. Ежели бы охота вöлi кинлöкö аркмöтны этö нимсö непременно пашня кывсянь, то шуис бы просто Пашня, нето Виль пашня.
Дак кытшöм жö кывсянь сiя аркмис бы? А вот мöдiк кыв лöсялö — пешня. Мукöдыс сiдз и шуöны — перво пö вöлi Пешнягорт. Но эд тэрмасьö веритны эта баснилö. Кывзам эшö мöдiкöсь.
— Пешнигортыс таладорын первöй деревня аркмöма, — висьталiс меным öтiк дед. — Правда, Кува дорас, Изъюр вылас, öтiк керку вöлöма ни. Да керку не керку, а яма. Дак вот, Карагайез ладорись татчö локтöма коми морт — Леш Ена. Сьöрас инь вайöтöма. Пуксьöма сiя Иньва кöджас. Палёжок сэтöн вöлöма, сэтчö керку сувтöтас. Сэк эд керкуэс вирöдз сувдаöсь только вöлöмась: Пилатöг уна я кералан вöрсö? Кöть и вывлат пöрö, да пиньнат эд он йир.
Мунас Леш Ена вöравны, иньсö гортас коляс. Дырöв вöралас, пемытöн ни гортас локтас. А иньыс кулöма. Этö вакульыс ыжмалас. Видно, сы усадьба вылö инмас керкусö сувтöтны.
Сотас мужикыт этö нечистöй местасö, каяс керöс вылас. Сы дынö мöдiккез локтасö овны. И сэксянь пондiсö шуны деревнясö Леш Ена горт. Сэсся московскöй писец локтас, столб сувтöтас и гижас: эта пö Пешнигорт...
Роч писецлöн, кöда эз вежöрт комиöн, этшöмыс вермас аркмыны. Эта дынö позьö вайöтны уна пример: Тагьяшор лоö Тагьящер, Курöгсорс — Курыксор, мансийскöй Нёрайка — Неройка, удмуртскöй Извыл — Извиль.
Пöрись отирыс тöдлöмась эшö öтiк легенда.
Пешнигорт вевдöрын эм ыджыт мыс — Яг. Эта Яглiсь медвылын дорсö янсöтö пыдын ров, мыйсянь аркмö гöгрöса мыс — Човпан. Как раз эта Човпан йылын олöма Пеша, повтöм богатырь. Ровсö сiя и гарйылöма — кортöм гöсьлö сьöкытжык сибöтчыны. Богатырь ним кузя и пондöмась шуны этö местасö Пешагорт.
Пешагорт дынас быдмылöма ыджыт пожум — Сторож пожум. И сiя пуыс не простöй вöлöма — заговорёнöй: немöн пöрöтны оз позь. Черöн вачкан — чер дорыс лязсьö; пилаöн кутчан пилитны — пиннес чеччалöны. Сэтшöмöсь жö и мöд пожуммес, кöдна сулалöны триста годся унажык ни: посадас — Ратник пожум, а могильник дынас — Яшка пожум.
И. И. Фирсов, кöда пондiс учителявны Пешнигортын эшö кольöм векö и бура тöдлiс крайлiсь историясö, тожö висьтасьлiс Сторож пожум йылiсь. Важся каддэзö сы увтын котрасьлöмась том йöз, а эшö одзжык сэтöн кеймылöмась енлö да касьтiсьлöмась. Недовольнöй этöн вöлöма вичку.
Поппес и вашöтлöмась сэтiсь отирсö, и молебен коста адöн повзьöтлöмась, но народыс абу чапкöма Яг сö, особенно инькаэс. Сэк, видно, решитöмась керны Пешнигорт ас монастырь — юрбитö пö любöй вичкуын, — но сёравно некывзiсь отирыс мыс вылас кайлывлöмась. Не весь эд баитсьö: мымда кöинсö эн верд, а сiя сё вöрлань видзöтö. Сыбöрын öтiк миссионер, Яков Шестаков, кöда козьнавлöма золотöй наперснöй крест пешнигортскöй сельскöй вичкулö, решитас Яг вылас строитны собор. Эта собор местын служитöмась молебен, сувтöтöмась кык метрся вылынжыкö крест. Öтiк богатöй дзуздяк (сiя пешнигортскöй приходыслö козьнавлöма медыджыт колоколсö) кöсйöма уна деньга. Но революциялöн сибöтчöмыс мешайтöма этö керны.
Славяна-язычниккез енлö кеймöм понда нарошно керлывлöмась ыджыт курганнэз. Ярославскöй областьын öтiк сэтшöм мыс торйöтöма яг бердiсь сiдз жö, кыдз и пешнигортскöй Човпан. Сiя мыслiсь йывсö отирын öнöдз шуöны Ярилина плешь. Сэтöн, кыдз висьталöны учёнöйез, морттэс кеймылöмась асланыс добрöй Ярило енлö (шондiлö). Может, сэтшöм жö обычай вöлi и важся пешнигортсалöн? Кин сiйö тöдас! Вермис и лоны. Менам бабö да мамö, например, часто юрбитлiсö асывся шондi вылö. Да и молитва эшö лыддьöтлiсö: «Батюшко совнушко, добрöй енушко...» А илля лун коста первöй шаньгасö — сэк пöжавлiсö капуста нето кöкан лист вылын ыджыт шаньгаэз — пуктывлiсö пöв вылö да лэбтывлiсö пöвсö грядка вевдöрö. Мукöдпырсяс, мича лунö, шаньгасö кольлiсö öшын вылö, шондi югöр увтö. Сэк жö эшö сöчöн вылын пöжавлiсö серöтöм дора идовöй пирöг. Эта, тыдалö, вöлi, шондiлö гöснеч: вот пö, совнушко, быдтiн миянлö виль урожай, дак сы понда месянь — козин.
И шаньга, и капуста лист, и сöчöн, и Човпан мыс — быдöс гöгрöса. Гöгрöса сiйöн, мыля Ярило-шондi гöгрöса.
Миян деревняын шондiлö гöснечсö пуктывлiсö керкуас, а мукöдлаас, видно, петкöтлiсö и öтöрö, а может, и кайöтлiсö ыб вылö. Натьтö, как раз эта йылiсь и висьталö öтiк бывальшина. Пешнигорт ас овлöма кöркö Кузь Мишкач, дöвеч. Сiя и няньсö шоча пöжавлöма, нетолишто шаньгаэз: быдöнным тöдам, что эта удж дынö мужикыт абу велалöм. А шаньгаэсö сёйны любитлöма. Но кыз шаньгаэсö сэк пöжавлöмась только öтпырись годнас — виль нянись. Саймас асылöн Мишкач, усясö тöдвылас небыт шаньгаэс.
— Шмач, а талун эд илля лун, Питер ын шаньгаэз öтöрö öшлöны! — шуас мужик да котöрöн мунас Питер ö. А сэтчин каждöй посöдз перила вылын шаньга куйлö, чöскыт дукыс ылö деревня саяс паськалö.
Дорись керкуас нитшья сина старуха овлöма. Сiя сразу куим шаньгаöн петкöтлöма. Да и кунган брага сувтöтлöма. Мишкач сэтчö и велалöма вовлыны. Гартыштас шоныт шаньгасö, ректас кунгансö и сьывтöн гортас бертас да отиркöт тшöтш уджавны петас.
А старуха радуйтчö: «батюшко совнушко» любитö сылiсь стряпнясö. Ежели любитö, то мöдiгод бöра бытшöм урожай сетас.
Интересно и сiя, что Яг вывсис пешнигортса вöлi адззöмась серебрянöй клад. Отир шуö этö кладсö чучкöйöн (чудскöй). Баитöны, что Яг вылас вöлöма кар, но некытшöм историческöй документтэзын эта йылiсь оз гижсьы, а мыс вылас карлöн абу некытшöм след. Но сёжö кладыс эз усь кымöрсянь, а кинкö сiйö сэтчö дзебис. Может, кöркö сэтöн вöлi могильник? Да, сэтöн эм важ могильник.
Кладыс йылiсь, правда эм и мöдiк легенда. Олöма кöркö вöррезас камскöй вольна, а веськыта шуны — разбой. И эта вольнакöт тöдчöмась кротовшана (Яг увтас, лунланяс, вöвлi Крот деревня). А тöдсасьöмась нiя разбойыскöт вот кыдз.
Кыдзкö локтасö Крот ас тöдтöм йöз, пырасö дорись керкуас и корöны:
— Сетö миянлö мöснытö, мийö бы яй сёям. Поданыс поскотинаын вöлöма, вот нiя и шуöны:
— Абу миян мöсным, нем сетны.
Тöдтöм йöзыс кыскасö книга, лыддьöтасö сэтiсь и висьталасö:
— Бöбöтчат. Тiян эм мöс, эм кукань, эмöсь баляэз. Сiдз миян книга висьталö. Вайöтат мöснытö — ог обидитö; од вайöтö — асьным босьтам.
Вайöтасö мöссö, сетасö. Эта понда разбойниккес колясö бырöм кепись — порогувтас чапкасö, кытчö ёгсö чукöртöны. Пондасö керкусö чышкыны да и адззасö кеписьсö. Лэбтасö — а сэтöн золото.
Сэксянь Крот ас разбойлöн патера лоас. А Яг ас дзебöмась пö не этiк клад — десятифунтовöй, двадцатифунтовöй и сорокафунтовöй.
Берсясö отирыс висьталö, но быд сказкалö веритны оз туй. Разь позьö веритны, что Сырчик кöз сiйöн сiдз шусьö, мыля сы вылын сырчиклöн поз вöлöма, а позас — золотöй кольттез? Петö, что и сiя Сырчик кöз ыс, кöда вöлi Пармайыл деревня дорын, пичик поза вöлi? Конечно эз вöв сiдз. Натьтö, кöзсö сiдз шуисö сы понда, что сiя Сырчик родлöн вöлi кытшöмкö реликвия, может, сы увтын сулалiс ен-идол, кöдалö кеймисö отирыс. Сырчик родсянь, натьтö, и лоис Сырчиков фамиллё.
Но бертам Пешнигорт дынö, а то эна кладдэс да идоллэс пыртасö миянöс сэтшöм дзибьяинö, кытiсь чожа он пет.
Что Пешнигорт лöн нимыс вермис аркмыны мöдмоз, сы йылiсь висьталö коми кыв пеш (пöш, тэш), — том кöзъяин сiдз шусьö. И кöзъя дорись медодзза олiсьыс ассис гортсö вермис шуны Пешнигорт либо Пеш на горт (на, места мыччалан суффикс, шочыника пантасьлö и мöдiк ниммезын: Из на дор, Шой на ыб, а может, и Гай на). Сiдзкö, Пешнигорт — том кöзъяинын деревня.
Но эм эшö öтiк коми кыв — пешны, мый миян моз лоö: öзтыны, сотны (сартас пешны, чигарка пешны). Эта кывсянь аркмисö и пеша — светильня, и пешöм му — сотöмöн весöтöм пашня. Сысянь вермис шогмыны Пешнагорт, сыбöрын и Пешнигорт.
Этадз жö, может, лоис и Пешгорт, Юрлинскöй районын вöвлöм деревнялöн ним.
Кама бассейнын эмöсь и мöдiк горттэз. Нылöн ниммес унажыксö аркмисö простöя — кинлöнкö нето кытшöмкö горт: Камгорт (камлöн горт; öнi сiя шусьö Пыскор), Дзельгорт, Кушмангорт, Дзольгорт (Дзель, Кушман, Дзоль нима морттэзлöн горттэз). Мöдгорт (мöдiк местаын горт), Айгорт (айлöн, важ), Мысагорт (натьтö, мыса местаись), Ыбгорт (ыб дорись), Вильгорт, Важгорт, Урьюгорт (Ур ю дорись). Дзольгорт вермис чужны и не морт нимсянь, а дзоль кывсянь (дзоль, дзелька, дзоли — учöт, учöтик, поснитик). Не быдсöн ятнöй Позагорт лöн ним. Шуат, аркмис поз кывсянь? Но кытшöм поззэз сэтöн вöлiсö? Ошшезлöн? Туриэзлöн? Дзимшыррезлöн? Сэк бы колiс шуны Ошпозъягорт, Турипозъя (сравнитö: Ошпозъяин, Сюзьпозъя). Эз я сiя аркмы пуза кывсянь? Öнi мийö вунöтiм ни сiйö кывсö, а одзжык сiдз шувлöмась арай, косьмöм ты. Этадз жö вермисö шогмыны Пузым да Пузанова деревня ниммез. (Коми отирлöн эм и пузым кыв — ваöн вайöтöм песок, песока ю пыдöс, ил). Пузан вермис лоны и роч морт нимöн, кыдз шувлiсö кыз кынöма мужикöс да посни челядьöс.
Нем понда, ровно, сувтчыны Гортлуд ним вылö — и сiдз быдöс вежöртана. Но мийö, натьтö, вежöртам этö нимсö не сiдз, кыдз бы колiс. Важынся-важын кадö пермскöй йöззэс — комиэс да удмурттэс — луд кылöн шуисö не видзок, не улицаись туруна лудовка, а неыджыт вöрок — рас. Удмурттэзлöн эшö XIX век конецын вöлiсö луддэз — йöрйöм расоккез, кытöн нiя касьтiсьлiсö. И быд увтырлöн вöлi аслас луд, кöдö, видно, и шувлiсö гортлуд. Сёрöнжык удмурттэс луднас пондiсö шуны ыб, а комиэс — видз, пода видзан места. Может, косинскöй Гортлудлöн историяыс как раз и пондöтчис сэтшöм языческöй священнöй рассянь.
Миян крайын неетша деревня ниммез, кöднö йитöны тожö морт ниммезкöт да нимкоддезкöт: Мишпиян, Ыджыт Коча, Юксьöв, Чикув, Отёв, Купрöс, Вотяк, Чадзöв, Бачман, Юла, Луп, Юм, Дедеруй — адззисясö не öтiк сотня. Ныкöт ордчöн колö сувтöтны и роч кыв законнэз сьöртi шогмöм деревня ниммез: Жуков, Сидоровчи, Ёгоровчи, Разин, Соболёвчи, Самко, Гущин, Мартя, Бажина, Вагановчи, Казаринчи, Исаковчи, Исаёвчи. Но ежели ми висьталам, что быдöс эна ниммес аркмисö морт ниммезсянь, мийö сорасям. Кажитчö, что Гущин аркмис только гуща кывсянь, но эм эшö удмуртскöй кыв гутшин — сiдз шуöны деревня места. Аксёнова деревнялöн нимыс вермис шогмыны и Аксён нимсянь, и окся (чудскöй князь) кывсянь, кыдз и Оксашор юлöн ним. Вагановчи, может, аркмис Ваган морт нимсянь, но вермис и Вага ю нимсянь (ваган — Вага дорын олiсь). Кыдзи босьтан да пондан гуддисьны кыввезас, нiя уськöтöны тöдвылö отирлiсь быдкодь басниэз, быдкодь историяэз да преданнёэз.
Вот босьтам Коча ним. Преданнё висьталö, что кöркö овлöма Коча, чудскöй князь. И вöлöмась сылöн нёль зон, нёль богатырь: Юкся, Пукся, Чадз да Бач. Быдмасö Кочалöн зоннэс, и пöрись пам торйöтас нiйö ас дынсис — иньдöтас мöдiк местаö овны. Медбы керкуэз нiя вермисö тшупны, сетас нылö чер, öтiкö нёль мортлö.
Бöрьясö зоннэс горт местаэз, пондасö вильса лöсьöтны, керкуэз тшупны. А черыс öтiк только. Вот и чапкалöны сiйö öтамöдлö. Пöрöтас Юксяыс кöз, орлалас сiйö да тшупас, и вöлись ыксö:
— Öхöй, Бач вонöй! Кут-ко черсö!— и чапкас вöррес вевдöрöт.
Керасяс-керасяс Бач да иньдöтас черсö Чадзлö, а Чадз сыбöрын чапкас Пуксялö. Вот сiдз нёль вон öтдруг керасö нёль горт, и быдлöн лоас аслас ним: Юксьöв, Пуксипи, Чадзöв, Бачман.
А вот Джоля йылiсь, кыдз шусьö Ыджыт Коча лöн тор, отир нем оз висьтась. А Джоля — этö, натьтö, коми морт ним. Ыджыт Коча посадлöн нимыс сёжö, видно, аркмис коча кылiсь — сiдз тюрккез шуöны временнöй оланiн, переселеннё.
Мöдiк преданнё юöртö, что олöма-вöлöма Юкся князь, а сылöн вöлöмась куим зон — Чадз, Бач да Пукся. И олöмась нiя не сiдз ни важын — XV векын, кöр Кама йылö локтасö роч поппез.
Юксялö, конечно, аслас еныс вöлöма донажык да добрöйжык, и сiя аслас зоннэзкöт дыв вашöтас роч поппесö öтвыв роч еннэскöт. Сэк Стефан Пермскöй вайöтас войско. Юкся лэбтас паныт ассис отирсö. Пантасясö чудскöй да роч дружинаэс — рез-паз вурасö öтамöднысö.
Öддьöн етшаöн кольччöмась чуддэс, да Стефан одзö юрнысö абу мышкыртöмась.
Вийöм отирсö чуддэз сэтчö и дзебасö, кытöн тышкасясö. Сэксянь сiйö местасö пондасö шуны Шойнаыб — могильник.
Былись я сiдз вöлi, оз туй висьтавны, но Шойнаыб ын, неылын Пуксиб дынсянь, важ могильникыс быль эм. Öнi сэтöн ыб, и гöрикö отирыс адззавлöмась ньöвьёсь йыввез, пурттэз и нельки чегöм меч. А тракт керикö мусис вöлi лэбтöмась морт коскаэз. Быль и сiя, что коми-пермяккез тышкасьлiсö новгородскöй ушкуйниккезкöт* и вашöтлiсö асланыс му вылiсь православнöй вера вайиссесö. Только пермяккесö пыртiс не Стефан Пермскöй, а епископ Иона.
[Ушкуйник — важся Русьын вольнöй морт, кöда öктывлiс аслыс дружина и разбойничайтлiс Кама да Волга юэз пöлöт. Ушкуй — ыджыт пыж.]
Конечно, абу некытшöм документ сы йылiсь, что вöлi сэтшöм пермяцкöй князь Коча, но, кыдз вöлi висьталöма ни, чудскöй оксаэз коласын, кöднö Пермь Великая покоритiкö босьтiс пленö роччезлöн отряд, вöлi Кач (Кача), но сiя нимыс, видно, шогмис Катша нимись.
Эна легендаэзiсь ниммес — Юкся, Пукся, Чадз, Бач — сётаки аскоддяöсь. И аркмöмась нiя мöдмоз, нежели миянлö тöдса пермяцкöй ниммес — Ош, Катша, Сырчик.
Видзöтны кö Удмуртиялiсь места ниммез, то адззамö сэтчинiсь Юкси. XVII векö миян Юксьöв ным шусьöма тожö Юкси. Ме думайта, что эта абу случайность: нiя матiсь родняэз. Сэтчин жö эмöсь уна топониммез, кöдна кончайтчöны пи кылöн, кыдз и миян: Пуксипи, Годольпи, Канькопи, Лукапи да уна мöдiккез.
Юкся ним вермис шогмыны юкса (лямпа кöв) кывсянь, но сёжö, тöдчö, шогмис тюркскöй Юк нимись.
Эг бы ме шу Бачман йылiсь, что сiя коми ним. Öддьöнжыксö сiя вачкисьö тюркскöй отир ниммез вылö (сравнитö татарскöйезкöт: Усман, Башман, Батман, Лукман, Юлман). Да и бачмановса ассиныс деревнянысö öнöдз шуöны мöднёж — Чойил (чой йыл — керöс йыв). Адззан, кыдз сiя гардсьöма!
Косинскöй легендаэзын баитсьö и Чурак йылiсь, удав атаман йылiсь, кöда чудскöй княззескöт вартлöма Стефанлiсь отирсö. А олöма сiя удав атаманыс сэтчин, кытöн öнi сулалö Чурак посад. Но кывсьö эшö и вот кытшöм бывальшина.
Öтiк гозъя босьтасö быдтыны быдтасöс. Дыр нiя нырьясясö-бöрйисясö, крепыт детинка кошшасö, медбы бур работник сыись петiс, да вöзйöны нылö сё ыджыт семьяись. А ыджыт позас и типыс поснитжык. Но вот öтiк хуторын адззисяс мужик да сетас челядьтöм гозъялö тупыль кодь зоночкаöс.
Нöбöтасö кагасö гортаныс, видзчисьöны, кöр сiя баитны пондас, кöр кок йылö сувтас. Куим год чулалас — быдтас пруддьö-сёйö, а местасис вöрзьöтчыны оз вермы. Сизим год чулалас — мöдкодь оз ло. То эд работникыс кытшöм: розоритö, а оз богатсьöт! Корасö тöдiсьöс: отсав пö, бур морт, сет зонкаыслö садьсö.
Видзöтас-керас тöдiсьыс да висьталас хозяиныслö:
— Петкöт тэ сiйö керкусит да водтöт öшын увтас. Мужик петкöтас. А тöдiсь бöра тшöктö:
— Öнi вай плеть да пондыв чеччöтны сiйöн быдтастö. Да эн жалейт, сырйы лэчытжыка.
Жалькодь жö шогалiсь мортсö вартлыны, да эд тöдiсьсö оз туй не кывзыны. Бергöтас мужик быдтассö кыминь и давай шöравны сылiсь бöрсö! Видзöтö: сы одзын чурка куйлö!
Сэксянь и шуасö шудтöм гозъялiсь гортнысö Сiсь чурка, а öнi — просто Чурак.
Демидова деревняын меным висьталiсö, что Чураксö сiдз шуöмась золотöй сьöлöмöса пес чурка кузя, кöдö адззöмась öння посад местiсь важ отир. Сэтшöм пуэс, шуöны демидовса, одзжык пантасьлöмась. Не сiдз важын, эта власть коста ни, чарньöв вöлi öзтöма деревня увтсис важ кыдз, и отирыс адззылöмась, что кыдз пытшксис киссьöма биас сылöм золото. Только некин оз тöд, кытчö лоис сiя золотоыс.
Тыдалö, не быд свиттялан торыс эм золото!
Сiсь чурка да золотöй сьöлöмöса чурка — эта сё сказкаэз.
Аркмис жö Чураклöн нимыс чурк, чурак кывсянь, кыдз ойвыв Прикамьеын шуöны гöгрöса мыс, грива. А Чурак посад сэтшöм кöвдöм вылын и пукалö, кытшöвтöм лажмытiнöн да логöн.
Чикув, шуöны, тожö морт ним, и тожö ассяма. Чикув, кыдз висьтасьöны пöрись отир, мыгöрнас вöлöма неыджыт, но паськыт корпося. И сьöд кырныш кодь. И стрась гора голоса. Петас кö асывнас керöс дорас да несъяс, дак мöд деревнясис Баляль саймö. Саймас Баляль, петас посöдзас, пороз моз бакöстас-шуас:
— Чикы-ыв, разь табакыт эм — несъян?
— Эм невночка, — чирöк голосöн горалö Чикув.
— Дак öнджа кер нö, нюкöт.
— Лок нюкайт. Бура моритчöма, туран кодь крепыт. Чикув, Баляль... А олöмась пö сэтöн эшö Чирсу, Дублень, Давмат, Пакот. Басöк нима отир олöмась, нем он шу.
Кужöмась деддэзным оригинальничайтны, öтiк нимöн кык мортöс абу шувлöмась. Только коми деддэз я этö керисö? Мыйкö тай эна кыввес оз вачкисьö комиэс вылö да. И некытшöм коми словарись, некытшöм сёртокись он адззы нiйö. Зато олöны нiя отирын, а ловья кыв — медбогатöй словарь. Вот эта «словарись» и адззи ме öтiк басни: Баляль ын кузь киа йöз, а Чикув ын — вогулпöлöс. Этадз, конечно, баитöны не öння Чикув йылiсь, а важыс йылiсь, кöда вöлi 100-150 год одзтi. А Баляль лöн дак кольччис только нимыс.
Миян ладорын вогул лэзнас шуöны дышкучиккезöс, лёгостайезöс. А мыля бы сiдз шуисö чикулятасö, кöдна, тöдчö, абу дышöтчылöмась? Поди, былись кöркö сэтöн вогуллэз-манси олiсö? Не весь жö эд стариннöй книгаэзын гижöма, что Иньва дорöттяс 1570 годöдз олöмась вогуличчез. А кыдз мийö тöдам, быд племя, быд народ олан местаэзас прокод кольö ассис след и унажыксö юэз да места ниммезын.
Эм мансийскöй кыв чахыл — неыджыт керöс, мыс. Не сысянь я лоис миян Чикув ным? Сiя как раз керöс вылö и пуксьöма — Иньва крутик дорö.
И эшö öтiк факт, кöда отсалö менам догадкалö, но кöдö оз вермö объяснитны чикуловса. Эм нылöн сэтшöм не то видчан, не то ласкательнöй выраженнё — чикуовскöй панчи, нето чикув паньси. Дак абу я эта панчи ыс вежсьöм манси?
Эта деревняыс том эшö — сылö полтораста год гöгöр, не унажык. Стариккес висьтасьлöны, что важся кадö сэтöн некин абу овлöма, но местасö тожö Чикув öн шуöмась. Сiя му вылö и пуксьылöма пö кöркö Чикув. А вовлiс сiя, натьтö, Пешнигортiсь, кыдз и öння олiссес — Ярковвез, Четиннэз, Фирсоввез да Хозяшеввез. И шувлiсö сiйö, натьтö, перво не Чикув — сiдз пондiсö шуны виль местаыс кузя.
Эстöн колö висьтавны, что Четин да Хозяшев фамиллёэз шогмисö, натьтö, Чета да Кочаш (Хозяш) татарскöй ниммезсянь (вöлi князь Чета, Борис Годуновлöн предок, кöда вовлiс служитны Иван Калиталö Золотöй Ордаись; Пермскöй летописьын пантасьлö Кочаш Тантаровлöн ним).
Чикув деревнялöн эм тёзка Верещагинскöй районын — Чикули деревня, но ме сы йылiсь нем ог тöд.
Оз позь орддьыны и Баляль деревнялiсь ним (öнi сiя шусьö Дублень). Эта кылыс, шуöны, коми-пермяцкöй (баляль, баль — умöля баитiсь морт, немöй). А вот шорокыслöн, кöда дорын сулавлöма Баляль, одззася нимыс, ровно бы, мансийскöй: Ульпыдашор нето Ильпыдашор. Манси кыв вылiсь этö колö вуджöтны кыдз Кедрашор (ульпа — кедр). Но мый жö эта лоö сэки? Эд сэтчин, кытöн дзольгö-котöртö эта юокыс, öтiк кедр абу! Нельки и вöрыс матын абу — гöгöр куш, гöгöр ыббез. Самöй логас, шорок бердас, шочыника пантасьлыны ойбаддез да дуббез (сiдз татöн шуöны ловпу), и только лог бокись гриваэс да чальпаэс тырöмась том пожумьяöн, кöдна коласын, дзик бабукаэз, пашкыртчöмась швавья кöззэз. Но стариккес эшö тöдöны сiйö кадсö, кöр эна деревняэз гöгöр сулалöма сьöд вöр. Ордча Вуровчи деревня, натьтö, аркмис тожö вöр кывсянь. И Дублень вевдöрсö öнöдз шуöны Вöрдорйöр, а Вуровчи боксö — Кулига. Кывлöмась пöрись отирыс, что эта вöрын кöркö быдмöмась кедррез. Но öнi сылöн и дукыс абу, нельки кыдз шусьö комиöн кедр — оз тöдö (а шусьö сiя суспу). Этшöм жö печальнöй история петiс и ыржапукöт (осокорь, нето сьöд тополь), ильöмкöт, кöда Иньва йыв гöгöрын пантасьлö öтi-öтi, катшальöмкöт (дикöй вишня), кöдö öнi тожö не быдлаись панталан.
Ме ог тöд, кытшöм йöз олiс Баляль ын, но, тыдалö, не öння дубленёвсалöн предоккез. Сэтчин часöт олöны Швецоввез, натьтö, кöркöся роччез. И вовлöмась нiя сэтчö, видно, Дублёновасянь — сэтчин олöны тожö Швецоввез.
Дубленёвса асьнысö лыддьöны Дублень увтырöн и, кöр орас Баляль род, деревнянысö пондасö шуны Дублень öн. А волостнöй писарь, эта деревняись олiсь А. Л. Швецов, 1912 годö документтэзö оз ни понды гижны «Балялёв а, она же Дубленёва», а только — Дубленёва. И чöскыт ваа шорокыс тöдö тожö не öтiк ним ни: Ильпыдашор, Баляльшор, а öнi Дублень ричка.
Мансийскöй чахыв сiдз бы и кыскö ас дынас мöдiк ним — Секов. Но менам сы дынöдз эз сибалö киэзö, сiйöн коля сiйö бöрйыны мöдiккезлö, месся смевжык да удавжык отирлö.
Неылын Кудымкар дынсянь эм Отёв, важся-важ посад, может, и Кудымкарысся пöрисьжык. 1579 годö сiя шусьöма мöднёж — Кува (сэк Иньвенскöй краяс, кыдз висьталö писец Яхонтов, вöлöмась только вит селеннё: Кудымкар, Кува, Юсьва, Купрöс да Майкар). Сто год бöртi Кувасö пондöмась шуны Утьва. Этö, натьтö, сiйöн, что Кувакöт ордчöн вöлi мöдiк починок — Утьва, и писеццез гижисö перво öтнёж, а сыбöрын мöднёж (почти быд ыджыт деревнялöн эмöсь «пияннэз»: Йöг лöн — Дзабин, Кывтыт; Юсьва лöн — Вадор, Кырйыв, Трун; Ыджыт Сер лöн — Муксим, Рупöс, Демид, Сершöр, Катыт, Кывтыт; Бажина лöн — Коврига, Мартын, Гожумовчи, Ык).
А кысянь боссис Утьва лöн нимыс? Сiдз, натьтö, шусис кытшöмкö шорок, может, и Батволька, кöда котöртö Отёв дынöт, а сы нимсянь и деревняыс.
Миян областьын эмöсь эшö Утя, мöдiк Утьва да Утка Межевая юэз. И быдöнныс нiя, поди, шогмисö öтiк мамсянь — ут, уть кывсянь, кöда, колö шуны, немымда оз роднитчы утка кöт. Ут нето уть — этö ю дорись зыбун, нять. Баитöны тай: ва дорыс уття-паття — сибöтчыны оз туй.
Утка ю кöркö шусис просто Ут, но роч отир бöра жö лöсьöтiс сiйö ас сьöртöттяс.
Отёв, видно, вежсьöм Утьва. А может, Утьва лö сёрöнжык вöлi сетöма виль ним. Сэтшöмыс вермис аркмыны Оть нимсянь (Оть — дзугöм роч ним — Авдотья, Фотей). Интересно, что Отево посад эм Кировскöй областьын.
Купросскöй библиотекаын кыдзкö миян пондöтчис важ олан йылiсь басни, и ме пондi юасьны, кин сетiс Купрöс посадлö нимсö.
— Купрöс — эта не простöй кыв, а историческöй. Думайтöмась сiйö первöй купеццез, кöдна локтöмась татчö овны, — висьталiс öтi морт. — Куп-рос — эта купечество российское... Поповвез медодз татчö вовлöмась. Нiя первöй вичкуэсö отсалöмась строитны.
Дак кöр жö эта вöлi?
Первöй вичку коми краяс оссьöма Кудымкарын 1597 годö. Сто год бöртi, эшö сьöдöсь, трубатöм гораöсь, оссьöмась Йöгын да Юсьваын. И вöлись 1768 годö «Российскöй купечестволöн» зоннэс отсаласö керны ас посаданыс вичкусö. Купрöсыс жö, конечно, вичкуысся унаöн пöрисьжык. Ежели веритны легендалö, кöда висьталö миянлö Купра йылiсь, то Купрöс ыслö, натьтö, тысяча год гöгöр ни. А легендалö тшöктöны веритны и факттэз: городищеыс Купрöс ас былись вöлöма. Сiдзкö, Купралöн дружина вермис воюйтны и татаракöт, мый йылiсь баитö отир. Да и эта не только басни. Великöй Отечественнöй война вотöдз известнöй археолог М. В. Талицкий да миян музейись сотрудниккез Слудка деревня дынiсь адззисö вийöм монгольскöй воинöс.
Но вот, ровно быдöс вежöртана лоис, позьö и точка сувтöтны. Да нет, эн тэрмась, топонимист, выводдэсö керны. Тэ перво висьтав, дона ёрт, кытшöм сэтшöм Купроска юок визывтö чердынскöй му кузя. Али сэтчин тожö Купра олiс, кöда нимöн и шуисö юсö? Но сэк бы колiс шуны Купра ю нето Куправа. Эта юыс, кыдз и унажык гидрониммес — учёнöйес этадз шуöны ваэзлiсь ниммез — эшö пöрисьжык Купрöс посадся. И миян легендарнöй Купра вермис локны овны Иньва дорö как раз Купроска ю дорсянь. А висьтавны кö точнöйжыка, то должен вöлi локны сэтчинсянь не Купра нима князёк, а кытшöмкö род нето семья, кöда олiс Купроска ю дорас и вайöтiс сьöрас важ месталiсь нимсö. Прикамье сэтшöм примерресö тöдö не öтiк сотня. Например, вагановса локтiсö овны Прикамье Вага ю дорись; белоевса — Ильинскöй районiсь Белоевское посадiсь; Йöгвинса — Кама дорся Йöгись; Зюлёвсаöс Строгановвез вайöтiсö Оханскöй районiсь. Нiя вöлiсö роч отир, но кöр сюрисö комиэс коласö, пöртчисö комиэзö.
Мукöдпырся важ нимыс дынö содтöны мöдiк кыв: Виль Шулай, Виль Чукыль, Виль Ванюк, Учöт Сер, Улiсь Шöрйöг, Новая Лёнва, Новые Рассохи да мöдiккез. А босьтö сэтшöм деревняэз: Питер, Якшин, Пронин, Москаль, Мошев, Разин, Антипин, Баран, Силин, Дёмин, Егоровчи, Сидоровчи — нiя жö нима деревняэз олöны миян областись мöдiк районнэзын. Сэтчинсянь нiя сюрисö миян крайö сыбöрын, кыдз Пермь Великая öтлаасис Русскöй государствокöт и отиртöм муэз вылö пондiсö локны виль олiссез. А коми крайыс сэк вöлi вöра пустыня. Например, öння Гайнскöй, Косинскöй да Кочёвскöй районнэзын XVI векын вöлöмась только кынымкö деревня, кöдна коласын Мысы, Нижняя Коса, Коса (сэк сiя шусис Ныров), Имас да öння Пятигоры дынiсь городище — видно, Чойвыл.
Не быдпырся, конечно, мöдiлаись локтам отирыс сьöраныс вайöтлiсö важ горт ним. Тотьмаись олiссез, кöр локтiсö овны Иньва дорö, эзö шуö ассиныс виль местанысö Тотьмаöн. И только Тотьмянин фамиллё сьöртi мийö тöдам, кытiсь нiя локтiсö татчö. Сiдз жö позьö висьтавны Сысолетиннэз (Сысола нето Сусола ю дорись), Устюжанцеввез (Устюгись), Югриноввез (Югра — ханты да мансилöн му), Долдиннэз (Долдаись), Надымоввез (ханты-мансийскöй Надымись) да мöдiккез йылiсь.
Разин. Мукöдыс думайтöны, что сiя йитсьö Степан Разин нимкöт, но сiя не сiдз. Вот Пугач деревня, кöда вöвлi Верх-Иньвенскöй сельсоветын, йитсьö Емельян Пугачёв нимкöт. Эта атаманлöн армия сибавлiс Оханск дынöдз, а кöр сiя рознитчис, уна отир сэтiсь пырисö дзибья деревняэзö. Вот кынымкö «пугач» — сiдз народыс шувлöм Пугачёвлiсь воиннэсö — не öтiк год сайласьлöмась вöр шöрö сувтöтöм керкуокын. Кывсьö, что ны коласiсь öтiк кольччöма овны Паль деревняö.
Разин, Разим вермис аркмыны розь кывсянь. Розь — осьта, пыранiн. Кылыс сiя важмöма ни, öнi етша кин сiдз баитö, но пантасьлö и сёрниын, и фольклорын. Коми песняын эмöсь сэтшöм строкаэз:
Енмö кайны пос абу,
Муö пырны розь абу.
Но одзжык роч отирлöн вöвлöма и прозвище Разя. Степан Разинлiсь айсö шувлöмась Тимофей Разя.
Баран — öддьöн ни вежöртана кыв. Некин оз шу, что эта мыйкö мöдiк, а не подалöн представитель. Но тэрмасьны оз ков. Позьö тэрмасьны гортö локтiкö, ягöдалiкö, пес керавтöн, только не эстöн. Эд вунöтö: тэрмасян — сорасян.
Кама дорись Баран — öддьöн важся деревня, и нимсö сылö сетiс, натьтö, не роч отир. А ежели не роч отир, то баран — миянлö тöдтöм кыв. Сыкöт ордчöн ме бы сувтöтi Пикан. Болван-Из — этö идъя-зöрья нимсö язьвинскöй комиэс шувлiсö кыдзкö, натьтö, мöднёжжык, а роччес ны понда не вежöртана кывсис керисö болван.
А мый позьö висьтавны Егоровчи да Сидоровчи йылiсь? Медодз позьö казявны ныись морт ниммез: Егор да Сидöр. А ежели кошшисьыштны коми кылын, то эта кошшисьöмыс миянöс нуöтас ниммес дынiсь ылö бокö. Эм егыр — этö нюра вöр; эм сидыр — межа. А эд отирыс, кыдз мийö шуим одзжык, часто ниммесö сеталö места признак сьöртi.
Исак да Исай — тожö морт ниммез. Пöрись отир коласын нiя шочыника эшö пантасьлöны. А эмöсь эшö лэбалiсь исак кез да уялiсь исай ез. Öттэс — юрсигуссез, мöддэс — сынпияннэз, чериэз.
Имас деревнялöн вужжес нюжалöны ылö пыд веккезö. Пермь Великаялöн сiя вöлöма важнöй опорнöй места. А кыным важжык объект, сыным сьöкытжык вежöртны сылiсь нимсö, дыржык кошшыны важмöм кывлiсь значеннёсö. Но не комиэзлöн, не удмурттэзлöн абу сэтшöм кылыс. Сiя нимыс, кыдз шуö А. С. Кривощёкова-Гантман, видно, аркмис тюркскöй отирлöн Имас нимись.
Уран, Амон, Амос, Мартя, Софрон, Софон, Логин (Логвин), Спас, Савин, Артамон — этö сё церковнöй ниммез. Казарин — роч прозвище, кöдö сетлiсö хозаррез племяись мортлö. А. С. Пушкинлöн предок, например, вöлi хозарин, сiйö сiдз и шувлiсö — Казарин (Григорий Пушкалöн прадед). Натьтö, и Каз (Хазова) деревнялöн нимыс тожö хозарскöй. Но эм и коми кыв каз (баитöны: каз кодь ён).
Агиш, Асан, кöднасянь шогмисö Агишовчи да Асановчи деревняэзлöн ниммез, миянö локтiсö татаракöт. Нiя морт ниммез. Правда, асан — этö и этноним (народностьлöн ним). Öнi абу ни сэтшöм йöзыс, но кöркö Сибирьын олöма сэтшöм племя. Да и Сибирь лöн нимыс, пожалуй, аркмис тожö этнонимсянь — Урал сайын олöма кöркö савыр (манси шуöны — сабыр) йöз. Ныкöт, может, тöдсаöсь вöлiсö и комиэс (миян предоккезным вöравлöмась и сибирскöй тайгаас), мыйсянь и олö миян басниын савыр кыв, правда, видчансора: «Мун вакрамеш, савыр пиян!.. Некывзiсь савыр тэ!» Тыдалö, кыдз и татара, эна савыр рес коми отирлö етша керисö бурсö, ежели öнöдз, кöр важын ни абу му вылас эта отирыс, ми нiйö сё казьтам лёк кылöн. Может, эна савыр рес öтлаын Чингис-ханкöт вовлiсö и Прикамьеö? «Монголлэзлöн сокровеннöй сказаннё» книгаын баитсьö, что Чингис-хан покоритöма быдöс вöрын олiсь отирöс, кöдна коласын вöлöма племя шибир.
Отир шуöны, что и Ганин, Ганёвчи, Кекур, Трун, Лягай, Ташка, Тюик, Перкöв, Юньга аркмöмöсь морт ниммезсянь. Споритны ог пондö, но бöра жö вайöтам коми кыввез, кöдналöн вужыс öткодь эна ниммезкöт.
Ганя — поз, деревня. Вöлöма, тыдалö, коми языческöй ним, мыйсянь и öнi олö кыдз родовöй ним Кудымкар гöгöрись деревняэзын.
Кекур — изъя места, скалистöй берег. Может, сiя и не коми кылыс. Прикамьеын вит Кекур. Кыкыс ны коласiсь миян округын, только ны йылiсь оз туй висьтавны, что нiя изъя местаэзын. А оз туй висьтавны сiйöн, мыля эта нимыс локтiс мöдiк местаись.
Трун — этö пö лажмытiн, видз. Но Трун деревня сулалö мыс вылын. Кин вöвлi Юсьваын, дак тöдö, что посадыслöн асыввыв дорыс паськöтчöма керöс вылö. А как раз сiя и эм Трун ыс. Областяным эмöсь эшö кык Трун, но ме ны йылiсь нем ог тöд.
Юсьвинскöй Трунсö эшö шуöны и Турунок, но сiйö мöдкодьсьöтiсö ордча деревняэзiсь коми йöз. Самöй Трун ас олöны чисто локтöмовöйöсь, ны коласiсь унажыкыс роч йöз, правда, мукöдыс комисялöмась ни, мукöдыс идъя-зöрья. Ме кывлi нылiсь забавнöй баснинысö, особенно старухаэзлiсь. Нiя баитлiсö то кыдзи: «По уличи шва да чувки ем нашва; гли-кося, клопёнок-от бежит, да кытшöм чож, культун!»
Колö содтыны эшö сiйö, что вологодскöй отир трунöн шуöны öтрепьё, а чувашшезлöн эм сэтшöм морт ним. Миян Трун ын олöны Колыхматоввез, а Колохмат — этö тожö чувашскöй ним.
Лягай. Эм коми кыв лягай — лягуша. Только чередь я эта гордöй да гажöтчись деревнялö вермисö сетны нёштöм ним. Сэтöн, конечно, мыйкö мöдiк. Чожжыка сiя аркмис лёго кывсянь, кöда удмурттэзлöн öнöдз обозначайтö мыса, керöса места. А Лягай деревняыс эд керöс дорын и эм — Чöвпан мыс понын. Но вермис сiя аркмыны и чувашскöй Лягай нимсянь.
Перков. Сiя, шуöны, Перколöн горт. Перко ним шогмис Никифор нето Порфирий ниммезiсь, кыдз и Ничиперко, Пера, Перку. Мукöдыс Перковлiсь нимсö йитöны Пера-богатырь нимкöт. Эм эта деревня дын ты, кöда шусьö Ператы. Сылöн нимыс, кыдз и Карагайскöй районiсь Пера юоклöн, аркмöма пера кылiсь: пера öн миян отирыс шувлöма пруд.
Вермис аркмыны эта нимыс и мöднёж — кай нимсянь. Перк — кедровка. Миян сiйö шуöны эшö колиперк öн. Ежели Перкöв деревнясö шуисö кай нимöн, то сэтöн, тыдалö, одзжык быдмылiс кедровöй вöр, кытöн любитöны поздiсьны öрек радейтiсь перккез.
Тюик. Стариккес эта деревня йылiсь висьтасьöны берсясö и кин кыдз кужö, но öтмоз шуöны öтiкö: Тюик сулалö умöль местаын — ёрдöм местаын. Сэтöн пö вексö етшасьöмась, доймылöмась, вийсьылöмась. И эта местаыс пö чожа петшöрöн да шышыбарöн тырас — пустöйсялас. Быдöс эта должен лоны пö разбойнöй завет сьöртi, а завечайтöма сiдз шпана Тюик, öддьöн лёк морт.
Дата добавления: 2015-11-16; просмотров: 63 | Нарушение авторских прав
| <== предыдущая страница | | | следующая страница ==> |
| Кинлöн сiя иньыс? | | | Чукыля-викыля |