Очерк
Оланын овлöны сэтшöм случайез, кöднö отирыс некöр оз вунöт. Может, и тöвзяс йöзыс тöдвылiсь сiя луныс и нельки годыс, кöр аркмис вöвлытöм случайыс, но ачыс фактыс пондас овны сэтчöдз, кытчöдз лоас ловья отирыс.
Öтiк сэтшöм случай йылiсь ме и мöда казьмöтны талуння лыддьöтiсьлö.
1861-öй годся март четырнадцатöй лунö Йöг посадö йöзыс чукöртчис сымда, мымда эз öксьывлы олёксия коста — медыджыт базарнöй лунö.
Эшö тöн сельскöй староста да земскöй керкуись сторож гöняйтiсö деревняэзöт, ёркйисö öшыннэзö да чирзiсö:
— Ашын посадын сходка! Локтö, мужиккез, быдöнныт!
Кöда смевжык, юасьлiс:
— Мыйись öктöны?
— Вайисö воля, ашын отирлö сетасö.
И вот талун посадыс ас вылас оз вачкись: быдлаын йöз, быдлаын басни, нельки кинкö тальянкаöн орсö.
Вилесов Логин, двадцатьвосемьгодся мужик, мыйкö дырöв гортас гуддисис и петiс деревняас сэк, кöр пондiсö рытсясö ни звонитны. Ёновöй, рам чужöма, сьöкыт оськöла, сiя валькыта мунiс веськыт туёк кузя и видзöтiс посадланяс, мый сэтчин керсьö. Ыджыт туй кузяс отирыс кыссис подöн и вöввезöн. Вöлiсö и инькаэз, кöть и нiйö некин эз кор.
Öтöрыс шоныт, гажа. Логинлöн и сьöлöм вылас гажа: öнi лоас вольнöй, ачыс хозяин лоас и бариннэзлö податьсö дугдас вештыны. И караванö сэсся оз мун — тырмас розоритчыны. Кольöм гожумö ветлiс да сытöг и видзоксö абу ештöмась ытшкыны, и öнi балялö нем чапкыны... Сов нiя мöйму кылöтiсö. Висьталiсö, что Усольесянь Кама устьеöдз лэдзчыны, да бöбöтiсö — ковсис
Нижний Новгородöдз кайны. Сэтчин совсö ректiсö, баркасö курьяö сувтöтiсö. А приказчик сетiс нылö öтiк рубöн и висьталiс:
— Этö тiянлö туй вылас. Мукöдсö гортын сетасö.
Быдса месяц гортöдз кыссисö. Логин нинкöммесö куим гоз бырöтiс — вот мый кузя туйыс вöлi! Да-а... Куим месяц ветлiс, а куим грош гортас эз вай. Нельки колпаксö нянь вылö вежис. Тридцать рубöн, шуöны, дöнзис бы, да быдöс оброкö да податьö бергöтiсö.
Иньыс, лыддьы, тожö кузьгожум йöз понда уджалiс: неделясис куим лун — барыня понда, öтiкö торговецлö, а мöд луннэзас эз тöд мый бердö кутчыны — нето печкыны, нето енлö кеймыны.
Радуйтчис Логин, кыдз и быдöс добрынинскöй мужиккес, сылöн соседдэс, но и тöждiсис: а оз я бöра веськыт идзас кузя ыскöвтöтö нiйö бариннэс, кыдз не öтпыр вöвлi ни? Сьöкыт разь нылö керны сiдз, кыдз охота? Веселуха деревняись мельник висьтасис тай, кыдз бариныс ылiсь гöсьлö, кытшöмкö австриецлö, кушаккез да ковёр козьналöм, а ныкöт öтлаын и кыйисьсö — Радостева Настуöс. Ежели пö гленитчö тэныт, саридз сайись ёртöй, коми нывкаыс, дак нöбöт сьöрат: миян пö сэтшöм доброыс — кыдз гор сайын тараканнэз. Сiя и быль сiдз: только мужиккес Иньвадорас семнадцать тысяча пö, а иньпöлöсыс, натьтö, кыкись унажык...
Йöгас земскöй керку дынiсь Логин казялiс посадскöй старикöс — Петров Кимаöс, кöдö татöн шуисö Кывтыт Кимаöн. Сiя баитiс деревенсакöт воля йылiсь, кöдö кöсйöны сетны отирлö. Старикыт ыджыт шапкаа, дублёнöй пася, пимиа, дзик праздник коста мöдöтчöм. А мöддэс — нинкöмаöсь, поньтокаöсь да зипунаöсь. Ны дынö сибöтчикö Логин кылiс Кималiсь неперыт чорыт басни:
— Бöбöтасö, бöбöтасö! Вот адззыв — бöбöтасö! Бöра тшыгьявны ковсяс...
Кывтыт Кимаöс тöдiсö ывтi. Беднöй йöзыс радейтiс сiйö кыдз умнöй мужикöс, веритiс сы басниэзö, а приказчик, писчик да пöта олiссес сы вылö видзöтлiсö косöйöн, мыля сiя веськыт мывкыда, мыля правданас босьтö, мыля 1850-öй годö бунтуйтiс — быдса артель петкöтiс куренись, кытöн Пожвинскöй завод понда пес заптiсö. Приказчик Яков Кириллович öддьöн пондылiс сы вылö кайны, да нем эз пет.
— Сетасö му — асланым нянь лоас, — радуйтчис сьöд тошока мужичок. А Кима советуйтiс сылö:
— Босьтан да вöлись ошшась.
Вичкуын öдззисö звонитны — горöна, гажöна, кыдз звонитлöны Йöгын ыджыт праздниккез коста — микола дырни, öндрей лунö, олёксияöн. Эта звонитöмыс юöртiс, что пондöтчö öддьöн важнöй минута. Быдöнныс, кин вöлi посадас, чукöртчисö вичку посöдз дорö.
Отирыс одзö петiс начальство. Сэтöн вöлi поп, приказчик, пристав, тöдтöм чиновниккез да военнöй морт. Сiйö, кыдз кывсис, Иньвадорас ыстöма ачыс государьыс. Ыстöма пö видзöтлыны земствоыс сьöрын, медбы нiя нем эз соралö.
Пристав кыскис бумагаэз. Жагвыв, дзик зарниа енöс, сiя видзис нiйö кыкнан кинас — мыччалiс отирыслö — и только эта бöрсянь паськöтiс да сетiс чиновникыслö. Сiя кадö звонитны дугдiсö, и чиновник сразу жö, эз и чöвтав вöснитик перчаткаэсö, пондiс лыддьöтны горöн да не тэрмасьöмöн.
Отирыс чöлiс. Отирыс кывзiс.
Кывзiс и Логин, да эз вермы быдöс вежöртны — öддьöнöв мудрёнöя гижöмась.
«Кысь ни миян юрöн сэтшöмсö вежöртны, — думайтiс сiя. — Кимаыс дынö ковсяс ветлыны, сiя быдöс висьталас».
Вичку стена пöлöнняс, стынок саяс, сьöд видзисö кресттэз. Öтiклаын сулалiс изовöй крест, а сы вылö сизьдöмась Христослiсь распятие. Сiйö, шуöны, керöма Игнатко Логачев. Нёштöмö керöма: Христосыс буржыка лешак вылö вачкисьö — кузь тоша, синкымтöм, — а барчуккеслö сэтшöмыс гленитчö. Керöма Игнатко — аслыс мыжсö кошшöм: кылöма эта йылiсь граф и кыскöма Игнаткосö Питерö, горт му бердсис орöтöма. Öнi пö сэтчин кирпичнöй керкуэз серöтö.
Кывзiс, кывзiс Логин и öтiкö вежöртiс: волясö не öнi сетасö, не мöдгод, а куимöтгод вöлись.
Лэбис негора, неятнöй борскöм. Чиновникыс лöньсис. Синнэс лöга пондiсö дзöрны, но сулалiс спокойнöя... Пристав петiс одзасжык, пондiс öвтны киэзнас. Борскöмыс ыждiс.
«Бöбöтасö, бöбöтасö, — бергалiс Логин кыв йылын Кывтыт Кималöн басни. — Сiдз, тыдалö, и лоис».
Зыкыс жагвыв чинiс, сэсся нач ямис, и приказчик казьмöтiс, что локтö сов кыскан кад, и колö лöсьöтчыны караванö — керны ряда.
Бöра öзйыштiс басни гор, кылiс горöтлöм:
— Таво огö мунö!
— Ачыт кыскав, а миянöс эн вöрöт!
Этö, кылö, Евсей-солдат горöтлö. Сiйö Пожваись мастер зон туйö рекрутö сетлiсö, но служитiкас доймöма и калекаöн гортö лэдзисö.
— Огö и огö мунö!
— Ветлiссис миян!
— Ась бöбöввесö кошшöны, а миянöс велöтiсö ни! — сувтiсö солдатыс дор мöдiккез.
Эшö тöн нiя полiсö енлiсь, полiсö баринлiсь, а талун смевсялiсö. Смевсялiсö не только сысянь, что нылö воля кöсъялiсö, а унажыксö сысянь, что эз сетö сiйö.
Мыйкö баитiс приказчик, грöзитiс кулакнас пристав, а чиновник тэрмасис дзебны бумагаэсö.
Казялiс начальство, что нылö эстöн нем сэсся керны, и быдöнныс пырисö вичкуö. Ны сьöрсянь иньдöтчисö инькаэз. Нiя локтiсö рытся служба кежö, но вичкуас пырны эз тэрмасьö, кольччисö видзöтны роччес вылö да кывзыштны умнöй басниэсö.
Инькаэс бöрсянь пырисö жö кынымкö мужик, но унажыкыс жагвыв мунiсö гортаныс.
Вичку одзись площадьыс кушамис. Сiя вöлi нятьöсь да гажтöм, кыдз дзебсьöм бöрын лöньсьöм керку. Лымыс подмöм да нöитчöм не только вичку дынас, но и улица мöдöрас, кытöн неважын тыдалiсö лым столаэз: сэтчин сувтöтлiсö вöввез, и öнi омöн сьöд видзис назём, а мукöдлаас куйлiс тальöм турун да идзас. Сера коза — сэтшöмсö видзö дьякон — броддис песок кодь кöс лымас да öктiс чöскытжык чирресö.
Посад шöрыс лöньсис, а доррезас — Катытын, Кывтытын, Дзабинын — сё эшö кылiс баитöм. Логин думайтiс-керис да лэдзчис Кывтытас, кытöн олiс Кима. Сiя утлянно тöдö и должен висьтавны, кыдз одзлань овны беднöй мужиклö.
* * *
Сьöкыта овсис барскöй мужиккеслö. Логин аслас хозяйствоын быдторсö берегитöмöн видзö — и совсö, и няньсö, нинсö и бансö, пессö и коросьсö, но тырдозыс мылякö сё абу. Öнi нельки сартассö асыввезнас дугдiсö сотны — югытöдз узьöны. А талун Логин одз чеччис — удж лöсялiс. Чеччис, пешалiс сартас, нинкöм пондiс кыйны. Öнi öтöрас чарöм, нинкöмсö бырöтö — дзик зудöн зыртö, и заптiсьны колö.
— Узин бы эшö, — жалейтiс иньыс, — а то усян кок йывсит.
— Талун куреняс ог мунö. Тöн сiдз баитчимö... А тэ узь давай.
Кыйö Логин, сьöктаннас шульсö шваткö-зэлöтö. Аслас думаэс сьöкытöсь, кузьöсь — юрсö паськöтöны.
Куим неделя чулалiс, кыдз волясö вайисö, а воть нем эз вешшы, быдöс важмоз кольччис. Тöн староста вöлi ыждалö — подать корö. И оброксö тшöктö вештыны. И уджöн кöритö. Да разь сiя оз уджав? Тöвбыт тай вöрын, а долггезсис оз вермы петны. И быль эд, видно, писчикыс не быдöс шедтöмсö гижö. Видзöтны колö, кыдз Кимаыс шуö, уна я сiя пуктö... Кöть бы иньыс эз шогась, дак мымдакö кокнитжыка бы овсис. Кöр эшö веськалас, кöр чожмас... А ежели эшö караванö татшкасö ― беда лоас. Мый нылiсь босьтан — податьыс Логинлöн вештытöм...
Мортыс пö счастье понда чужöма — этадз висьталiс сылö öтiк седок, кöдö Ильинскöйö кыдзкö кыскис. А Логинлöн куимöт ни чужис, но счастьеыс и бöжсö эз на мыччав.
Счастье — этö му да нянь, вöв да телега. А Логинлöн нем абу: муыс — барскöй, няньыс — чужöй, вöлыс не аслас. Только долггес сылöн. Эшö и рудзöггес оз чочкоммö, а тэныт казьмöтöны ни: колö кöдзыс понда вештыны, вöв понда, му понда. Нёль суслон вундiн — куимсö сэтiсь сетан господалö: нiя няньтöг озö вермö овны. Поп оз вермы, приказчик оз вермы, а граффес да баронпöлöсыс — и подавно. А Логин и няньтöг оз кув: сiя пистикöн, пиканöн, пипу качöн, кыдз кöч, лоас пöт.
Ок-ко-ко! Сьöлöм дузгыльтчö эна думаэзсянь!
Сяркнитiсö öшынö. Этö сосед, сiя корö Логинсö сходка вылö, кöдö керöны Кывтыт Кима да мöдiк посадскöй мужиккез.
— Чеччы, мамыс, — зипун пасьтавтöн шуис иньыслö Логин. — Ме недыр ветла. — И мунiс.
Чöлiсö кузьтуй, сьöрсьöн-бöрсьöн мунтöн.
Вот и посад. Меддорас сулалö ыджыт керку — лабаза юра, учöтик-учöтик, öтiк кер сувда öшыннэза. Сiя дзик дзуз сина Малюш, нищöй, гажтöма да лёка видзöтiс югыт öтöрас. Эта керкуын олiс Öндра, дзор старик, кöда ордын Логин челядь кадö любитлiс пукалыштны. Тöвся рыттэзö сэтчö чукöртчывлiсö мужиккез да челядь.
Джоджын пукавтöн, а мукöдыс и куйлiсö, медбы тшыныс эз курöт синнэз, нiя кывзылiсö богатыррез йылiсь сказкаэз да песняэз. Öндра висьтасьлiс и Кудым Ош йылiсь, кöда комиэслö сетöм бур олан. Эшö висьтасьлiс, кыдз сiя служитöма Пугач атаманлö и кыдз Пугачыс вашöтöма бариннэсö да сетöм гов йöзыслö му и воля.
Да, вöвлöм сэтшöмыс — сетлöмась отирыслö волясö, но бурыс да лёкыс прокод ордчöн ветлöтöны, кыдз кык нинкöм, кыдз лун да ой. И бöра локтiсö сьöкыт ойлуннэз, и отирлiсь бöр мырддисö мусö, вöрресö, волясö...
Земскöй керку дынас жöдзис народ. Тулупа сторож сулалiс ворота одзас и баитiс:
— Эз тшöктö, мужиккез, осьтны. Кучикöс кульыштасö, осьта дак.
— Сэк кор приказчиксö, — тшöктiсö мужиккес.
— Мунiсö ни сы дынö, чожа вайöтасö.
Карта пельöс сайсянь петiс сьöд пася кыз мужик. Коккезас сылöн вöлiсö гöрд узöра чочком пимиэз, юр вылас — дона кучикись базарскöй шапка. Эта вöлi приказчик. Сiя мунiс воротаэз дорöдз, бергöтчис отирыслань, юалiс:
— Этö тэ, Кимка, отирсö чувьян? Али бöра мышкыт лудö?
— Мышкö оз, — шыасис Кима. — Киэзö лудöны...
— Мун пес керавны — дугдасö...
— Сетат волясö да ладом пондат вештыны — муна... Тiйö не быдсöн вештат, бöбöтлат.
— И не государьыслiсь волясö висьталiт — отсалiс Кималö мöдiк мужик. — Вайö миянлö сылiсь грамотасö!
— Мийö лыддьöтiм государьлiсь манифест, а мöдiк бумага эз вöв и абу, — дзирдалiс приказчик. — И быдöс лоас сiдз, кыдз вöлi висьталöма.
— Кыдз бытьтö сiдз: мусö отирлö сетны, а вöрсö быдöс баринлö кольны? — бöра баитiс Кима. — А миянлö — тшакьявны эн мун, ягöдавны эн мун
— Мыля — эн мун? Лэдзны пондамö, лоас кö билет.
— Сiя и эм: тальччин вöрас — вешты деньга, нитш пельдöтiн — вешты. А кытöн нö подасö видзны, кысь пессö, нин-бансö вайны, кысь пипу качсö сёйöм понда босьтны?
— А кыдз нö тiйö мöдiт?! — горöтiс приказчик. — Вот тэ, Кимка, сетан меным пасёктö весь?
— Öддьöн тай мöдан!
— А кыдз жö тэ пусö весь мöдан пöрöтны? Сылöн эд хозяин эм.
— Пасьсö ме ачым вури, а пусö ен быдтiс. Сiдз али не сiдз, мужиккез? — юалiс сходкаыслiсь Кывтыт Кима.
— Сiдз, батя, сiдз!
— Быль баитан!
Нельки Логин, кöда сходкаэз вылас пыр чöвлiс, висьталiс тöн кылöм кыввез:
— Ась бöбöввесö кошшöны, а мийö велöтöмöсь ни!
— Öнi мийö вольнöйöсь! — горöтлiсö мöдiккез. — Совсö дугдам кыскавны!
— Ог мунö! Ась приказчикыс рядасö косявлö!
— Осьт воротасö, челядь!.. Приказчикыс шагньöвтiс одзлань, горöтiс:
— Од лысьтö, мужиккез! Од лысьтö!
Но одзиссес вöрзисö ни и сылiсь шысö эз кылö, и приказчик, медбы сувтöтны мезмöм отирсö, нетшкöвтiс сторожыс киись пишальсö да ыпкис-лыйис Кимаыс юр вевдöрöт.
Одзиссес бöр-бöр керсисö, сувтчисö.
— Но лешак! — зыкнитiс ыджыт мыгöра детина да курмыштiс приказчикыс кымöсö кулакнас и уськöтiс сiйö кок йывсис.
— Эн вöрöт! — горöтiс кинкö Логиныс бöрын. — Эн вöрöт, челядь! — Сiя вешталiс одзсис мужиккесö, отсалiс чеччыны приказчикыслö. Полусукноöн вевттьöм пасьыс сьöртi, шоныт чушниэс сьöртi Логин вежöртiс, что мортыс сiя не татiсь.
Сторож осьтiс воротасö, и вартлöм приказчикыс пырис керкуас.
Отирыс лываöн, дзик осьтöм шлюзö ваныр, уськöтчис оградаас и ровно падмис бурундук [*лажмытик посöдз] дынас да сувтчис.
Посöдзас кайисö морт вит-квать. Ны коласiсь Логин тöдiс Сыстеров Митрейöс, да Кимасö, да Гусельников Устинöс, кöда эз лэдз вартлыны приказчиксö.
«Вексö поньток новйис — миян кодь жö бырöм вешьян вöвлi, а öнi, видзöт, кыдз пасьтасьöм, — думайтiс Логин. — Поди, быль богатöй лоис, поди, господаыскöт тöдчö ни? Поди, сысянь и эз сет приказчиксö вартлыны?»
— Мужиккез! — пондiс баитны Устин. — Мийö петкöтам часöт земскöй бумагаэсö, и тiйö висьталат, мый ныкöт керны — казнитны али не вöрöтны. — Сiя пыралiс керкуас да петкöтiс сьöрас приказчикöс и писчикöс, кöдалöн конувтас вöлi кыз папка. Устин босьтiс папкасö, кыскис сэтiсь чочком листтэз. Приказчик кеймисян голосöн корис:
— Вежöртчö, мужиккез! Неладно эд кератö! Эта понда цеппезö дорасö!
— Быдöннымöс озö — кöртыс оз тырмы, — висьталiс Устин. — Вон мымда мийö!
— Каторга эд кошшат! — сё повзьöтлiс приказчик.
— Тэнатся умöльжыкыс оз ло, — шуис Кима. — Кер ассит делотö, Устин.
Сэк жö Устин лэбтiс юр вевдöрас бумагаэсö, юалiс отирлiсь:
— Эстöн гижöмöсь нiя, кинöс ыстöны караванö да кинлöн абу вештöм подать. Мый керны эна гижöттэзкöт?
— Керавны! Пельнянь яй моз масьтыны! — горöтiсö ворота дынсяняс.
— Сiдз и колö! — кылiс мöдöрсянь. — Вакрамешö нiйö!
Устин эз понды рядитчыны:
— Воляыс тiян, отир! Ме кера сiдз, кыдз тшöктiс сход.
Вайисö пес чурка, сувтöтiсö посöдз шöрас, медбы тыдалiс быдöнныслö, кыдз лоасö казнитöмöсь лёк гижöттэс, петкöтiсö лэчыт чер.
Логин вöлi матын посöдз дынас, и сiйöн, натьтö, Устин корис сiйö дынас, чапкис чурка вылас гижöттэсö, тшöктiс:
— Керав!
Кокнита, кыдз велассьöм, Логин босьтiс черсö, малыштiс джынысви гижöм бумагасö, думайтiс: «Ок, кытшöм добро тшыкöтам!» — и негорöн шуис:
— Гижтöмсö кольны бы колiс... ковсясö...
— Пондöма сэтöнка! — видчöмöн горöтчис Митрей. — Масьты да и...
Логин керис сiдз, кыдз тшöктiс сходка. Митрей шыннялiс джын öмнас. Кывтыт Кима сулалiс кымöра чужöмöн. Устин чукöртiс чушни нырнас гижöт торресö. Но вот сiя лэбтiс юрсö и висьталiс:
— Мужиккез! Тöн мийö видзöтiм земскöй кассасö. Приказчикыс шырзьö миянлiсь деньгасö. И колёснöй мастерскöяс бöбöтчöны, и кеписсез понда унажык кольöны. Колö я миянлö сэтшöм приказчикыс?
— Вашöтны! Вашöтны сiйö!
— И лöсйыны!
— И мельниксö!.. И объешшиксö! Öтлаын кыйсьöны!
— А медодз — писчиксö!
Ворота дорсяняс шыасис кыз голос:
— Лэдзö, мужиккез, и миянлö кыв шуны.
Этö баитiс Сампой пиян, Йöг ладорсис медбогатöй мужик, кöда податтесö вештö кык год понда одзлань, мыйсянь некöр оз ветлывлы не куреньö, не караванö. Вит год одзтi сiя вöлi отопки новйись, но ёртасис вöв гусясиссезкöт и чожа богатсялiс. Öнi видзö прислуга, вундö да туруналö помеччезöн. Сылöн эм пила — Перемись вайöма. Отирыс баитöны: «Мунам керасьны», а сiя: «Мунам пилитчыны».
— Висьтав, Прокоп, — тшöктiс Устин, и Сампоев чöвтiс юр вывсис ёся вевдöра шапкасö, пондiс баитны:
— А висьтала... Колö, мужиккез, рöдитчыны караванö, колö вештыны податтесö, а не казнитны гижöттэсö. Кин порядоксö дзугö, сiя царьлö и отечестволö враг, сiя аслыс враг! Вон Кимка да Кузёмка бунтуйтiсö кöркö, да пöжöм ньöр шедтiсö. Сiдз эд?
— Сiдз, сiдз и эм! — отсыштiс сылö торговöй Викула.
— Бöбöтан, Прокоп! — эз вермы видзсьыны да горöтiс Устин. — И тэ, Викула, сунистöг вуран! Кин туйсö бур оланас ачыс керö, сiя аслыс абу враг!
— Нем сыкöт нювсьыны, — пондiсö видчыны мужиккес. — Сiя приказчикыскöт öтлаын кыйсьö.
— Нöитны нiйö, кöдна приказчикыс дор! Викула, дженыт кока морток, тшакыльöн тарöвтчис оградасис. Кынымкö морт чепöссисö сы сьöрö да петкöтiсö сьöраныс и Сампоевсö.
Устин видзчисьыштiс, кöр лöньсяс шумыс, и шуис:
— Керам тiян моз, мужиккез: бöрьям виль приказчикöс, виль объешшикöс. И писчикöс да мельникöс вежамö...
* * *
Виль староста Архип Кетов командуйтiс кык лун. Куимöтас Йöгö локтiсö солдаттэз. Тшöтш ныкöт локтiсö перемскöй чиновниккез.
Сэк жö чукöртчисö нiя земскöй керку дынö да тшöктiсö öктыны сельскöй сход. Тöдiсö отирыс, мыйлö нiйö корöны посадас — пондасö иньдыны караванö.
Сiдз и лоис. Кыдз только оссис сходка, земскöй исправник Пейкер пондiс ыждавны мужиккес вылын — тшöктiс керны сiдз, кыдз корö Наталья Павловна Строганова, Иньва ю дорись йöзлöн хозяйка. Стыдитiс отирсö и советник Лукин: колö пö овны земскöй начальствоыскöт кыдз воннэзкöт, кывзыны сiйö быдлаын и прокод, а не етшасьны тiян моз...
Кöр Логин локтiс земскöй керку дынö, сэтöн шумитiсö джын тысяча гöгöр морт. Нылiсь шумсö вынсьöтiс сьöдракаэзлöн карзöм да чавканнэзлöн чавзöм.
«А кытöн инö солдаттэс? Видно, оградаас эд, — смекайтчис Логин. — А вон кытöн нiя.»
Солдаттэс сулалiсö öтöрас, пишаллезнысö видзисö киэзаныс. Сулалiсö оча пельпон, эз и вöрöтчö — дзик забор. А винтовка штыккес да дулоэс метитчисö отирыс мороссэзö и лöга свиттялiсö шондi вылас.
Логин моросö, кыдз сылö кажитчис, вöлi иньдöтöмöсь öтдруг кык штык и кык точка, дзик сотана синнэз, кытшöмöсь рисуйтöны пуовöй еннэз вылын. Недолыт лоис сылö, нельки лопаткаэз увдöрыс сайкалiс. «Неужто лыясö?.. Да озö жö!» Тöдвылас усис мамыс, шогалiсь иньыс, челядёкыс. И эшö таратайка, кöдö тöн сетiс сылö виль властьыс.
А Пейкер горöтö:
— Ме приказывайта: часöт жö керны караван понда ряда!
Сылöн шыыс сорлассьö отир чирзöмкöт:
— Мийö вольнöйöсь! Мийö асьным хозяиннэз — ог кывзö тэнö!
— Кöть баит эн баит — быдöс весь!
— Ась кыскö лешакыс вожа бöжжесö! [*вожа бöж — сiдз шувлöмась комиэс солдаттэсö.] Мийö асьным тшыгöсь, а сэтöн эшö нiйö верд!
Логин кошшö синнэзнас Архипсö, Устинсö, Кимасö. Оз тыдалö нiя. А сылö öддьöн колö тöдны, мый керны часöт мужиккезлö, кöднö бöбöтiсö граффес. Сiя керас сiдз, кыдз тшöктас виль властьыс, кöдö бöрйисö нiя асьныс. Висьталасö: «Босьт чер и пазды штыккесö» — сiдз сiя и керас. И быдöнныс керасö — Сампоевся. Содö чирзöм, видчöм:
— Паздыны нiйö колö, нем видзöтны!
— Вилаэз петкöтö! Черрез...
Чу, ризьöтöны майöггез, потшшез.
«Ага, вон Кывтыт Кима...»
Мыйкö висьталiс, дзик пон тявгыштiс, офицер — и сразу гымгис лыйöм.
Кыдззез да тополлез вылiсь кыш нильдiсö ракаэз да чавканнэз и чукöрöн пондiсö бергавны посад вевдöрöт.
Кимаыс вöлi ордчöн ни — киöн кут. Логин чеччöвтiс сы дынö, но сэтчö кожгис мöдöтпырся лыйöм. Кима вевттис киэзнас чужöмсö, оськöвтiс солдаттэз дынö, джöмдiс, усис лым вылас.
Логинлiсь пöдналiс ловсö, бергöтчис юрыс. Öддьöн зубыта пондiс бытшкыны шульга ордлыэс увтö, бырис садьыс. Пеллезас, дзик пожар дорö звонитöм, горалiс: «Бöбöтасö... бöбöтасö... бöбöтасö...»
Дата добавления: 2015-11-16; просмотров: 46 | Нарушение авторских прав
| <== предыдущая страница | | | следующая страница ==> |
| ОЧЕРККЕЗ ДА СТАТТЯЭЗ | | | ПИНЬÖЛА ПУ ДОРЫН |