Очерккез да статтяэз

Вера Селина (Редактор М. Вавилин. Кудымкар, 1962)

Йöгын бунт (< Тырдоз. К.,1977)

Пиньöла пу дорын (< Иньва. К.,1987)

Мый висьтасьöны Пармаись ниммез (< Тырдоз. К.,1977)

Миян фамиллёэз (< Иньва. К.,1987)

Мортас пöртöны зыбка дорсянь (Миян шог. К.,1990)

Сёрнилöн зарниа роззэз (< Оласö да вöласö. К.,1990)

Сёрнилöн дзоридззез (< Кытчö тiйö мунатö. К.,1991)

Кудым-Ошлöн да Пералöн му (< Парма Прикамская. К., 1995)

Ыджыт нима кар (< Иньва, 2002)

ВЕРА СЕЛИНА

Николаева деревня (или кыдз сiйö шуöны юсьвинса Мику) сулалö мысок вылын, Чинагортскöй пруд дорын. Видзланяс, векнитик улица конецын быдмö öтка пожум. Сы читкыля зелёнöй шапка увтын сулалö крепыт да вылын керку, кöда гажöна видзöтö деревняас нöк рöма чочком наличниккезöн. Эта — Вера Николаевна Селиналöн горт. Сы дынö туёксö öнi тöдöны не только таланись олiссез, но и нiя, киннэз олöны мöдiклаын. Микуö вовлöны быдласянь: Купрöсiсь, Аксёновись, Öнись, Кудымкарись... Öтiккез кежöны татчö час-мöд кежö, мöдiккез не öтiк лун чулöтöны. Нiя локтöны видзöтны Вера Селиналiсь, колхознöй порсьвöдитiсьлiсь, удж.

Кыдзкö Микуö чукöртчисö сразу нёль морт. Вералö висьталiсö:

— Мийö тэ дынö. Правленнёсянь ыстiсö. Пондамö дыр овны. Сэтчöдз, кытчöдз досповна ог тöдмалö тэнчит секреттэтö.

— Вот и бур, — шыасис хозяйка. — Быдöс мыччала да висьтала, мый верма. И секретсö ог суськы.

Сэк жö, первöй пантасьöм коста, порсьвердiсь юöртiс, что секретыс сылöн абу дзебöма йöз син шогья. То мый бердын сiя видзсьö. Öткö, колö радейтны ассит уджтö, не дышöтчыны; мöдкö, частожык нёджжавлыны журналлэзö да книгаэзö, кытöн гижöны подавöдитöм йылiсь; куимöткö, пыр видзны тöдвылын сiйö, мый понда тэ пессян, кытшöм тэнат могыт... Ежели тэ локтiн фермаö только кадсö чулöтны да босьтны трудодень, бур удж некöр оз аркмы. Вот тэныт и секрет.

Вöлöма быдöс простöй да вежöртана, кыдз мича лун, кыдз Вера Николаевналöн сöстöм сьöд синнэс. Локтiссез видзöтiсö винерик, ыджыт мыгöра инька вылö, дивуйтчисö. И мортыс абу пöрись — нёльöт десяток тыртö и, натьтö, грамотанас ылö эз мун (тöдчö: ны кодь жö колхозница), а кытшöм бура, правильнöя баитö. Тыдалö, адззылöма олансö, тöдö, кыдз нянь кусöкыс шедö. Павкöма нуждаыс, пуктöма морт чужöм вылö ассис визьсö — чукыррез.

Микуын быдöнныс тöдöны, кытшöм натужнöя кутчис удж бердö ичмонь Вера. Сылöн киэс учöтсянь велалöмась видзны чарла да пыркöтчан, кужöны лён-кудель керны. Том морт лунтырöн уджавлiс колхозын. Рытнас, кöр öшын увтын уннялiс ойтöв, каттис лымсö пурга, Вера мыдзтöг кыскис печканiсь конечтöм шöрт нето гуддисис гöрдззисян еммезöн.

Петас ичмонь отир коласö — быдöс сы вылын дзонь да волькыт, быдöс куйлö бытшöма.

— Кöр эд и ештö паськöмсö керны, — баитöны соседкаэс. И асьныс жö содтöны:

— Вагановсаыс сэтшöмöсь и эмöсь — рукодельницаэз. Ойсö оз узьö, ежели удж эм.

А удж быдöнлö тырмис. Машинаэз етша вöлiсö, сё вöлöн да киöн керисö: и вундiсö, и вартiсö, и гöрисö-кöдзисö. Гожумöн пемытсянь пемытöдз ыб вылын, тöвнас — вöрын. Гортся уджжез понда только ойыс и кольччылiс.

Сэтшöм дзирыт луннэзö, кöр омöн округ пасьта пондöтчис ыджыт строительство, пизис öтласа удж, пондöтчис война. И деревня, и город иньдöтiс армияö уна отирöс. Инькаэз киö мужиккез сетiсö быдöс ассиныс хозяйствосö, колисö челядьöс да тшыг и кöдзыт годдэз.

Сiдз чулалiс нёль год.

* * *

Лöньсис война, кокнитжыка ловзисисö колхозниккез. А сыбöрын и тшыг годдэз мунiсö. Колхоз зорамис, сувтiс кок йылö. Гажöнжыка пондiс овны отир. Тырдоз лоис и Вера хозяйствоын. Только бы овны да овны, радъявны уджалiкö. Но бурыс да умöльыс, шуöны, роднöй воннэз — ордчöн ветлöтöны. Мунiс öтпырись Вералöн жöникыс Велва сайö да и нуöтiс инькалiсь счастьесö сьöрас — вöйис васö вуджикö. Вельдыр сулалiс Вералöн гортыс шуштöм-гажтöм. Кыдз терпитiс сэтшöм горесö инька — некин оз тöд, разь только пемыт ойес да ольпасьыс. Кольччис öтiк гаж сылö — быдтыны челядьöс.

Чулалiс и эта зубытыс, лöнис сьöлöмшогыс, вевттисис виль заботаэзöн.

Кыдзкö локтiс Селина дынö бригадир да тшöктiс мунны фермаö. Сетiсö сылö куканнез. Эта уджыс Вера понда эз вöв вильöн: учöтсянь вöдитчылiс ныкöт. Но сёжö полöм петiс невна. Öтiк дело дозирайтны öтiкö-кыкö и совсем мöдiк — быдса табун. Ны сьöрын дозор колö, уна вын да терпеннё. Баитiс гортас ань-йöзайыскöт — оз падмöтö. Раз колö, дак колö. Кутчис. Уджавны вöлi сiя кадö кокнитжык ни, да и вежтiсö не умöля.

Куим неделя ветлiс куканнез дынö. И бöра виль юöр: Селинасö пö иньдöны порссезöс вердны. Эз вежöрт перво, мыля сiйö öтiклаись босьтöны, а сувтöтöны мöдiк местаö. Оз тырмы я мый я отирыс?

— Не каждöйсö подаыс радейтö, — сералöмöн висьталiс начальство. — Этакöт оз туй не лыддисьны. Вот вердiс порссесö öтiк морт да уджсö тяп-ляп керис. Етша колхозыслö сэтшöммезсянь пользаыс.

Эз пыксьы Вера Николаевна и эстöн, шы эз сет. Аспондас думайтiс: «Эшö тай сьöкытжык котома вöзйöны... Верма я сiйö нöбöтны? Поди, откажитчыны да?»

Сёжö мунiс фермаö. Сьöкыт лоас — отсаласö, мый оз тöд — висьталасö. Отир коласын эд олö, не öтнас.

Порсьфермаын панталiсö виль уджалiсьöс бура, примитiсö асланыс коллективö. Пондiсö быдöс керны куимнанныс öтвылiсь. И трудоденнез босьтiсö öтмоз. Кык год сiдз вöлi.

А колхознöй зоотехник сё частожык баитлiс виль методдэз йылiсь. Сiдз жö гижлiсö газетаэзын да журналлэзын. Мöднёж, вильмоз уджалiсö областись передовиккез. Нiя пессисö сы понда, медбы унажык быдтыны порссезöс, донтöмсьöтны порсь яйсö.

Медодз колiс разьны йöртаннэз, видзны порссесö не öтiкöн, а ыджыт жыррезын, öтлаын. Но гыриссесö торйöн посниттэз дынсянь, дöчкаэсö — тожö янын. Быд группасö пондас дозирайтны натодиль сувтöтöм морт. Сэк буржыка тöдчас, кин кыдз уджалö. Öддьöнжык пондасö старайтчыны. И трудоденнез содасö. Этадз и колхозыслö буржык, и вердiсьлö бытшöм.

Сiдз и керис Вера Селина. Босьтiс ас киö двенадцать дöчка. Пытшпияэсö да пияннэсö торйöтiс пиянтöммез дынiсь: карта шöрö тшöктiс керны стена. Быд группа понда вöлiсö писькöтöмöсь петаннэз — осьтаэз-лаззэз. Ны пырйöт порссез ветлöны, кöр нылö колö. Только бöра жö быд группалöн аслас загон, кытöн прокод эм сёян да юан.

...Овлö сiдз, что öтiк дöчка вайö шестнадцать пиян, а мöдiк — сылiсь джынсö только. Öтыслöн оз тырмы йöлыс, мöдыслiсь пияннэс досповна оз и нимавлö. Порсьпияннэс янсöтiкас не öткодьöсь лоöны. И медбы зорöтны дзутоккесö двенадцать килограммöдз, öттэсö колö нимöтны месяц, а мöддэсö — квать нето сизим неделя. Эта падмöтö яй керöмсö.

Вера Селина быд дöчкалö пондiс сетны нимöтны öтмымдаöн. А медбы дöчка примитiс да вердiс чужöй пияннэсö, эз кыв ны мамлiсь дуксö, порсьпияннэсö брызгайтлiс дука растворöн.

Но эта только учöтик-учöтик торок сiя уджись, кöдö нуöтö порсьвöдитiсь. Локны кö тöвнас Микуö да видзöтны, мый керсьö порсьфермаын, — эм мыйлö дивуйтчыны. Татiсь казялан и сöстöм коска пизь, и жаритöм ид, и шом, и чери гос... Казялан и ящиккез, кöднаын быдмö зелень. Этö — гöрд глина вылын сюлöн петассэз. Глина öддьöн колö том организм понда. А медбы порсьпияннэс буржыка сёйисö сiйö — отсалö зелень.

Эм татöн и силос.

— Быд лун сетала сiйö öтiк шамырöн, — висьталiс Селина. — Умöль сiя, что силоссö оз керö натодиль порссес понда. Шумöн да грехöн босьта сiйö дояркаэзлiсь. Таво тшöктi керны и аслам пай вылö.

Этасянь, ыджыт заботасянь, Вера Николаевналöн бура йылö пода, абу шогöттэз. 1960 годö сiя быдтiс 340 порсьпиянöс. Эта лоö, что быд дöчкаыс пиялiс 20-öн. 340!.. Эттшöмыс, конечно, «Совет» колхозын эз на вöвлы.. А вот Анна Долдина, кöдакöт соревнуйтчö Селина, тыдалö, уджалöма эшö буржыка. Мöйму Кудымкарскöй свинарка вовлiс Микуö, ошкис Вералiсь уджсö, порськартасö, висьтасис, кыдз вердö ачыс. Öтлаын и Перемö ветлiсö таво, Драчёвакöт пантасьлiсö.

Вежöртiс Вера Николаевна, что позьö дозирайтны не 30 порсьöс, а кыкись унажык.

Сiдз и керис тулыснас. Пöрись дöчкаэсö босьтiс 22 и томмесö содтiс эшö джын сотня. Кöр пиялiсö — картатырьяс бель только видзö. Но уж узьлыны мукöдпырсяс совсем некöр вöлi! Эд тристаыслö колö ваявны сёянсö-юансö да учöттэслö эшö чöскытжыка лöсьöтны. Нылыс, Нинаыс, прокод отсавлiс. Вöвсö вайöтас, посадö выбойла ветлас, картовсö гарьяс, клеверсö ытшкыны отсалас. Нач мамыс кодь жö, весь немымда оз ов. И стрась бура школаас велöтчö. Тöвнас тожö фермасис оз петавлы, сё дзутоккеслö «стряпайтö». Бур кöть сiя, что васö электричество лэбтö, эм тодильнöй запарник да дивнöй машина, кöдаö сюйыштан яй туша нето картов тэчан — он и казяв, кыдз пуас да масьтас. И турунпосньöтан да шыдöскеран машинаэз эмöсь. Ёна нiя кокньöтöны уджсö. Конечно, сэтшöм мортлiсь, кöда оз дышöтчы.

Сiдз вот Вера Николаевна Селина лоис маякöн. А маяклö колö прокод югьявны, мыччавны отирлö туй. И локтöны Мику деревняö, маякыс югдöтöм вылö, округись вились-виль порсьвöдитiссез, мед сыбöрын, кöр бертасö горттэзаныс, мыччавны мöдiккезлö веськыт туй.

А медыджыт маякыс, кöда югдöтö миянлö туйсö, — партиялöн XXII съезд. Сы кежö знатнöй порсьвердiсь лöсьöтiс подарок — быдтiс 800 порсьпиянöс, а быдöссö чулалöм годö 950. Таво пессьö сы понда, медбы быдтыны 1200 дзутокöс.

Этö тэныт, дона партия, тэныт, роднöй страна!

Дата добавления: 2015-11-16