Вогульскöй кар, кытшöвтöма йыла заплодöн, йыввез вылас — морт юррез. Заплод одзас чум, чум одзас йöктö шаман.
Локтöны КУДЫМ-ОШ да ВАЯСИ, нiйö вайöтö стража. Шаман мунö, чожа мыйись чум сайись петö князь, сiйö кольлалö стража.
Кудым-Ош да Ваяси копрасьöны князьлö. Ваяси висьталö, мый понда локтiс князьыс ордö чудскöй богатырь — Кудым-Ош.
Князь сiдз лöгасьö, нельки юрыс лöгсяняс зэгалö, ачыс киöн и кокöн öвтчö-вартчö — тшöктö дыв вашöтны кортöм гöссесö!
Но Кудым-Ош костi оз керсьы:
— Ме Костö нывтö мöда босьтны ас саям. Сет сiйö, князь!
КНЯЗЬ шуö:
— Тэнат юр понда менам заплод вылын местаыс абу ни... Уна корасисö, да некин эз босьт Костöсö, и ме нылiсь босьтi юррезнысö. Вунöт, мый шуин, богатырь, и тарöвтчы татiсь!
Кудым-Ош видзö ассис кывсö:
― Ог мун öтнам. Только сiя адззö аслыс шудсö, кöда оз пов
öштыны юрсö, и думайтö аслас увтыр йылiсь.
— Нёштöм менам нылö — не морт, не кукань.
Шай-пай лоис Кудым-Ош, но тöдвылас усисö öтiк памлöн кыввес: «Кыдзи корасян, дак мый бы эз ло, а бöр эн керсьы, невестатöг вогульскöй карсис эн мун...»
И висьталö Кудым-Ош князьлö:
— Ме локтi, медбы нывтö нуöтны сьöрам, и сiдз и кера!
Князь тшöктö мыччавны Костöсö, и чумсис сiйö петкöтасö латтез вылын. Кудым-Ош видзöтö сы вылö и некыдз оз вермы вежöртны, кинöс петкöтiсö: подаöс али гöна мортöс. Сылöн и кылыс тувдiс, горöтчыны оз вермы. Гöна морт осьтiс юр вевтöссö, и Кудым-Ош казялiс мича, но гажтöм морт синнэз. И сэк жö Костö висьталö, а Ваяси вежöртöтö Кудым-Ошöс:
— Эн повзьы меись, том богатырь. Ме не сэтшöм, кытшöмö öнi адззан. Босьт менö, и ме тэкöт муна кöть кытчö.
Кудым-Ош копыртчö князьлö да шуö:
— Князь, сет ме сайö нывтö, сiя меным гленитчис.
Князь корö иньсö. Сiя локтö да гусьöн чöвтö нылыс чужöм вылiсь гöна личинасö, кöдö ачыс жö и кышавлöма сы понда, медбы князь эз сет нывсö кытшöмкö йöй сайö.
Личинасö чöвтöм бöрын княгиня шуö:
— Мед усяс чужöм вывсит гöныс, и тэ, Костö, лоан мича дзоридз кодь!
Костö чеччас, чапкас вывсис кучиккесö да сувтас отирыс одзö сьöд сина да кузь чикиссеза нывкаöн.
Костöлöн паськöм-кöмкöт: югыт-веж малица, гöрд чышьян, гöрд сапожоккез. Морос вылас, голяас, киэзас, пеллезас — берся чача.
Отирыс — ок да ак! Князь перво сувтö осьта öмöн, сэсся нюжöтö киэсö кымöрлань — висьталö енлö спасибо, и зэв гордитчöмöн пондö мыччавны ассис гажсö.
Дата добавления: 2015-11-16; просмотров: 44 | Нарушение авторских прав
| <== предыдущая страница | | | следующая страница ==> |
| ТУЙЫН. КУЛЛЕЗ ЛЁКАСЬÖНЫ | | | ПАМÖС ЛОВЗЬÖТÖМ |