ПÖЖАВТÖМ НЯНЬ

Öтiк акта пьеса

ОРСIССЕЗ:

АННА — не ни том инька, порсьвердiсь, вывтас фуфайка, запон

ЗИНА — 20-годся нывка, тожö порсьвердiсь, сьöд халата, чочком шаля, пимиэза

ОВДОКА — фермаись сторож, 55-годся, учöтик, тоша старик

ÖГАНЬ — Овдокалöн инь, ыджыт да ён старуха. Вывтас пуджöм соса кофта, кузь дубас, чочком юркöртöт. Кокас виль нинкöммез

НИКОЛАЙ НИКОЛАЕВИЧ — комплекснöй бригадаись бригадир, 30-годся, ыджыт мыгöра, костюма, сапога

Порсьвердiссезлöн керку. Бокись стена бердын лабич, веськыта — пызан, кык стул. Стена вылын картина, плакаттэз, диаграмма. Пызан вылын лампа.

АННА (Пырö фонарьöн. Öт киас видзö запон подувсö. Запонас куглина). Вот эстöн и бöрйышта. Эстöн шоныт, ки оз кынмы. Кöть кырым етш öкта. (Пуксьö лабичö, паськöтö запонсö пидзöс вылас, фонарьсö сувтöтö бокас, кусöтö.) Зонкаыслöн радыс лоас! (Киись киö кисьтлö куглинасö, тöлöтö. Сы коста комсянь мыччисьö ОВДОКА, шысеттöг видзöтö Анна вылö.)

ОВДОКА. Бöрйисян, сватьюшка? Сiдз, сiдз...

АННА. Да зонкажугыс корö. Жоннесö сё бы ёнмöтö.

ОВДОКА. Сiдз, сiдз... Тусёккесö — аслыт, а ёгсö — порссезлö? (Анна дугдö тöлöтны.) Тöлöт, тöлöт, бöрйы кöдзысоккесö, нiя эд öддьöн виаöсь. А колхозыслöн голяыс кыз, терпитас.

АННА. Да ме, сват, невночка токо.

ОВДОКА. Но, но... Абу нем сэтiсь. Порсьыс эд оз тöд, мый сы понда вайисö. А тшыгыс и куш куглинасö, йикисö гартас-сёяс. Зато аслат госажык лоас.

АННА. Эн жö, сват, грекас пырт. Ме тай шуа: невна токо — кырым етш. И не порсьлö, а жоннезлö.

ОВДОКА (лöгöнмоз). Тэ невночка да мöдiк сiдз жö — вот джыныс и абу. Öтiклаись эд.

АННА. Бöр нö пукта, эн ни видчы.

ОВДОКА (нерöмöн). Бö-öр пукта... Кулöмсö могиласис оз ни чеччöтлö. Сюрин дак отвечайт öнi.

АННА. Ме бöр пукта. Тэ дырни жö петкöта. (Каттьö запоннас, чеччö.)

ОВДОКА. Тырмас лёбнытö! Ме тiян понда ог понды вежтiсьны! Öнi жö бригадирöс кора, ась акт гижö... Адззан, кытшöмöсь нiя: кöда умöля куйлö — сразу пианыс! А думайтiн я тэ кашникнат, кытчö сiя вашöтö? Вот и надейтчы тiян вылö.

АННА. Овдока сват, эн ыждав абусис. Забыль, некöр эта эз вöвлы, а вот талун дявыс чувйыштiс.

ОВДОКА. Дявыс ли, кин ли, а тэ шедiн. Тэныт и вежтiсьны ковсяс... Суд тшöктас.

АННА (кеймисьöмöн). Он жö, сват, сэтшöмсö кер... Абутöмыс понда... Кыдз нö сэк ме öтöрас пета? Кытшöм синöн отирыс вылö видзöта? (Сувтö пидзöс вылас.) Жалейт, сват, простит...

ОВДОКА. Простит тiянöс, сет волясö, дак джын фермасö куштат. А сторожыс ме, меным и кышаласö.

Пырö ЗИНА.

ЗИНА. Чеччит ни? Здравствуйте! (Мунö Анна дынö.) Тэ мый, Анна, пидзöс вылат кыскасян? Ноко чеччы! (Лэбтö кипöлöттяс.) Мый лоис, а? (Видзöтлö то öтыс, то мöдыс вылö.)

ОВДОКА. Вот тэ, Зина, свидетель. Лён кöдзыс мöдiс гусявны. Адззан мый керö! Сiйöн и порссес оз ёнмö. А шуö немöн верднытö, пизьыс пö етша. А кысь сiя унаыс лоас, кöр складсис бокö нильдö.

ЗИНА. Тэ, Овдока, мыйкö мöдöрö изан.

ОВДОКА. Пукалö эстöн, ме чожа. (Петö.)

ЗИНА. Анна, мый эта лоö?

АННА. Ох!

ЗИНА. Да висьтав жö тэ, Анна! Пуксьы то этчö. (Пуксьöны.)

АННА. Куглинасис то кöдзыссö мöдi босьтыштны. Зонö корис, жоннезлö. А Овдокаыс ме вылö уськöтчис: гусясян пö.

ЗИНА. И быдöс?

АННА. Быдöс. Мый нö эшö?

ЗИНА. Фу, адззöма мыйись тöждiсьны. А ме думайтi... Мун ректы öлöдзсит да вердсьыны пондам.

АННА. Норовит, одзöв эшö. (Пауза.) И пизьыс да сюыс, шуö, тожö öшö... И сiя пö тэнат жö уджыс.

ЗИНА. А-а, кывзы тэ Овдокаыслiсь! Адззöма безответнöйесö! Вот локтас, дак ме сылö висьтала.

АННА. Былись, примечайта ме, пизьыс чинö.

ЗИНА (сералöмöн). Сiдзкö петö, что былись тэ гусясян?

АННА (повзьöмöн). Мый тэ, Зина?! Эн жö баит, кöдö оз ков. Пыр тэнат син одзын...

ЗИНА. Но, ладно. Чиннытö чинö, да кин чинтö? Тöдан?

АННА. Ог тöд, ог тöд, нывка, кытчö сiя лоö.

ЗИНА. А ме тöда, адззылi.

АННА. Кинöс?

ЗИНА. Кывзы, мый ме кери... Тöн, кыдз Овдокаыс шогдi пизьсö вайис да пыртiс складас, ме бöрсяняс пыри, видзöта: пизь киськассьöм. А мешöкыс дзонь и устьеыс кöрталöм... Пондi смекайтчыны — торшенёк казялi...

АННА (дивуйтчöмöн). Но и но!

ЗИНА. Цемент мешöккес сайö сюйыштöма. Видзöта, мешöчокыс Овдокалöн. Чöв, мыся, ме тэнö велöта, кыдз шыравнытö. Чинтi сэтiсь джынсö да цементсö сы туйö бузйыштi, сорлалi пизьнас! Не порссезлö, дак и не тэныт! Видзöтi часöт — нöбöтöма.

АННА. Мый тэ, Зина, сiйö керин? Виян эд морттэсö.

ЗИНА. Нем оз ло. Пöжавтöм няньсö эд оз сёйлö. Нылöн квашняаныс пöжассяс. Но и чеччалас Öганьыс, но и сетас Овдокаыслö жарсö! Поди, тöн жö и кöтiс.

АННА. Кöтiс, натьтö. Изöмныс абу жö.

ЗИНА. Нiя гозйöн дышкучиккез моз важын ни колхозас миян шея вылын ысласьöны. Иньыс пыр тай няргö: «Ой, ог вермы уджавнытö, öддьöн шогала, чожа кула ни, натьтö», а ачыс деревняэзöт ворожитчытöн шляйтчö да сплетняэз кöдзö. Кин жö сылö эта бöрын веритас?! А Овдокаыс кынымись ни сюрлiс аслас кузь киэзöн? Öнi бытьтö бур лоöма. Мöйму кутiм анькытшнас да кыдз кеймисис: «Эдö жö, шуö, кöть висьтасьö некинлö, жалейтö менö, старикöс, а то судитасö; жалейтö кöть менчим старухаöс, эсся, шуö, некöр нем ог вöрзьöт». Тыдалö, бöра эд вунöтöма...

Пырöны ОВДОКА да НИКОЛАЙ НИКОЛАЕВИЧ.

ОВДОКА. То видзöт, Николай Николаевич, мый керсьö.

НИКОЛАЙ НИКОЛАЕВИЧ. Тэ мый нö, Анна, уджалан?

АННА. Ме нем умöльсö эг кер.

НИКОЛАЙ НИКОЛАЕВИЧ. Куглинасö тай гортат пö новьян.

ЗИНА. Тшыгьялöм тай кинкö тiян куглина вылö. А кöть и босьтiс мортыс содз мымда, дак и гусясьö ни. Сiя мый, замок жугдiс, али пробой кыскис?

ОВДОКА. Сы бöрын и сiйö керас. Горша каньыс и вевтсö чапкö.

ЗИНА. Да мый тэ, Овдока, шöрттöм дöрасö кыян? Аннаыс не мукöд кодь.

НИКОЛАЙ НИКОЛАЕВИЧ. Чöв, Зина. Аннаыслöн аслас эм кыв.

АННА. Ме невна токо мöдi, жоннезлö.

ОВДОКА. Адззан, Николай Николаевич, кыдз нiя öтамöднысö вевттьöны, öм осьтны оз лэдзö. Вор ворöс оз эд пур.

ЗИНА (сибöтчö Овдока дынö). Мы-ый? Ме — вор?!

ОВДОКА. Суськисьны мöдат? Нем оз пет!

ЗИНА. Ворыс тэ, тэ, тэ! Вот кин ворыс.

НИКОЛАЙ НИКОЛАЕВИЧ. А ноко дугдö! Öдззисö шумитны — кык пельшы оз кыв!

Котöрöн пырö ÖГАНЬ. Конувтас квашня. Мöд киас видзö дубас подувсö. Сiя жö киын чегöм мутовка. Атшалöма чожа мунöмсянь.

ÖГАНЬ. Кытöн сiя, гöна синыс, öнджаыс?!

Анна, боккесö хлопöтöмöн, петö.

На, трескы, мый вайин! (Пуктö квашнясö джодж шöрас, мутовкасö лэбтöмöн мунö Овдока дынö. Овдока сайöвтчö бригадир сайö.)

ОВДОКА. Öгань, уту, мый лоис?

ÖГАНЬ. Эшö юасьö, артавтöм! Мый инö тöн вайин?

ОВДОКА (Николай Николаевич спина сайсянь). Öгань, уту, öвсьы жö. Гортын баитамö.

НИКОЛАЙ НИКОЛАЕВИЧ. Тэ мый, бабыс, эта одза лöгасин? Ноко, пуксьы да висьтась, мый лоис? (Мöдö пуксьöтны лабичö, Öгань пуксьö квашня вылö.)

ÖГАНЬ (горзöмöн). Ой ни да ой! Вексö тай ме сыкöт, абутöмкöт, маитча-а!

ОВДОКА. Öгань, уту, мунам гортö.

ÖГАНЬ (оз кывзы.) Сэрпалiс тай квашняöс, изводалiс! Виль квашня, мöймуся! А мутовкаыс эшö мамöлöн вöлi, родимöйöлöн.

ОВДОКА. Öгань, уту...

ÖГАНЬ (горзыны дугдö, чеччö). Ме тэнчит, вежöмлiсь, синнэтö кыскала, остатки мутовкасö юр бердат чеглала! (Размöд вачкö жöникыс спина кузя. Овдока юрсö кутöмöн пышшö öтöрö. Öгань вöтчö сьöрас.) Гöна син тэ, öнджа тэ!..

ЗИНА. Ха-ха-ха! Адззылiт комедиясö? Сэсся од адззылö.

НИКОЛАЙ НИКОЛАЕВИЧ. Эта быдса трагедия, Зина. Только ме нем ог вежöрт.

ЗИНА. Он вежöрт? А ме вежöртi!

НИКОЛАЙ НИКОЛАЕВИЧ. Сэк висьтась!

ЗИНА. Öганьыс квашняö крысаэс бöж йыланыс кыськö пизь ваялöмась. Да, тыдалö, пизьыс цементсора вöлöма... Кöтас Öганьыс нянёксö, талун суктыны мöдас, да и чегöтас мутовкасö.

НИКОЛАЙ НИКОЛАЕВИЧ. Ноко, видзöтам квашнясö. (Пöрöтö бок вылас, пешлö кинас.) Сiдз и эм: измöма кöтöмыс! И мутовка юрыс то сэтöн!

ЗИНА. Öнi казялiн, начальник, кин гусясьö?.. Крысаэс, а не мийö.

НИКОЛАЙ НИКОЛАЕВИЧ. Да-а. Öнi вежöртi. Ковсяс чорытжыка тальччыны крысаэс бöж вылö!

ЗИНА (залö). А тiян, ёрттэз, абуöсь ни крысаэс?

Занавес

Дата добавления: 2015-11-16