|
Читайте также: |
— Кытчö сiя дзебсисис? — тöждö Канин Шура Чикаляка понда, койкаэз увтöт кошшисикö.
Лег-лег тумбочкаэзын шныритö.
Чангыля ныра зоночка подушкаэз да одеялоэз бергöтлö.
Мöддэс саймисö жö, юасьöны:
— Мый öштiт? Кошшисиссеслöн шы абу.
— Мый кошшат? Куимыс шытöг шныритöны.
Быдöс бергöтiсö да кöдакö вöлись шуис:
— А ыбöсыс тай не топ пöдналöма...
Кöда вешьяна-йöрнöса, кöда öтiк трусикöн — быдöнныс гамазöн уськöтчисö коридорö, но Канин Шура сувтöтiс челядьсö:
— Олö эстöн! Тiйö только повзьöтатö сiйö, а кутны од отсалö. Кöдна озö тöдö, кин сiя, юасьöны:
— Кинöс, кинöс?
— Кань али пон? Лег-лег ылöтчö:
— Ур пыралiс да вон чангыля нырасö пурис... Гы-ы-ы! Мöддэс пурöм ныраыс дынö:
— Бура курччалiс?
Чангыля ныраыс пешлiс чуньнас ныр йывсö, видзöтiс чуньсö:
— Вирыс тай абу, но чепöльтiс буракодь. — И öм пасьтас горöтiс: — То сiя! То урыс, ыбöс одзас!
Быдöнныс уськöтчисö ыбöс дынö, но урыс нылö только бöжсö мыччалiс.
Челядьыс — сы сьöрö. Урыс — коридор кузя.
Только и кылö гым да ёрк!
Пантасяс кин — гатш пöрöтасö.
Вот урыс инмис петанiнö, но поспуэс кузя жагвыв кайис Валентина Байтеряковна, лагерись начальница, кöдалiсь ним-айнимсö челядьыс шувлiсö джендöтöмöн: Вабай.
Сiя ён, поспуыс пасьта жö, и урыслö бокöттис некытi мунны, дак сiя чеччöвтiс перила вылас, сэсся Вабайыс юр вылö, а вöлись — площадка весьтiсь зеркало вылö да öтлаын зеркалоыскöт берездасис джоджас.
Трин-бранн!
Жиль-жоль, жиль-жо-оль!
И лöнь и лöнь лоис. Нельки Вабай чöлiс и, может, эз и чушыкты.
Но вот сiя жагвыв бергöтчис, казялiс пазалöм зеркалосö да кутчис юр бердас:
— Ох-хо-о!
Öмыс нюмыртчис, синнэс лоисö пятак ыждаöсь, кикокыс тувдiс. Осьта öммезöн видзöтiсö вылiсянь улö и челядьыс.
Эта кадö öтöрсяняс пырис Канин Шура (ештöма öтöрас ни кошшисьны), лэбтiсис площадка вылö.
Вабай вöлись вöрзьöтчис да сувтiс зоночкаыслö паныт:
— Тэ мыля он узь? Кытчö ветлiн? Али миян режимыс не тэ сьöртi? Челядьыс, кöдна сулалiсö вылiсь площадка, вылас, гизь рознитчисö кин кытчö. Канин Шура мыйкö пондылiс жö висьтавны, но Вабай, кыдз заводитöм телевизор, только ачыс баитiс, мöдыслö эз сет и кыв горöтчыны. А кöр сылöн баитчиссис, кутiс зонкасö кипöлöт да кайöтiс аслас кабинетö.
Зооугöлок дынöт мунiкö дзар керис осьта ыбöсö да мöдпырся кутчисис юр бердас и одззася норöнжык нюжöтiс:
— Ох-хо-о-о!
И, конечно, вились бы кутчис юасьны да видчыны, но мöдiк жырись петiсö нылочкаэз да шакардаöн котöртiсö Вабай ладорö. А нылочкаэс одзын чеччалöмöн пöльтiс Чикаляка да чирок шыöн чирзiс:
— Ой, кутöны! Ой, вöтöны!.. Мезды менö, Канин Шура, мезды!
Канин Шура мöдiс отсавны Чикалякаыслö, да киыс вöлi бура сибдöма Вабай кырымö.
Нылочкаэс сувтчисö. Чикаляка сибöтчис Канин Шура дынö и лöсьöтчис чеччöвтны сы киэзö, но Вабай сап кутiс сiйö кок пöлöттяс да öшöтiс онняюрöн нюжöтöм ки вылас, вились пондiс юасьны:
— Кин эта? Кысь эта? И мыля баитö?
Чикаляка ойзö да трексьö, лöсьöтчö кокыштны нiйö чуннесö, кöдна зэлöтiсö коксö. Вабай дугдiс юасьны, и челядьыс одзасьöмöн чавзöны:
— Эта кыр!
— Сiя горись петiс.
— Не кыр, а икота, сiя вермас öмö пырны...
Вабай жам пöдналiс öмсö. Сiдз жö керисö нылочкаэс.
— Кытшöм сiя икота? — шыасис Канин Шура. — Одö тöдö, а лёбат! — и корис начальницалiсь: — Сетö меным сiйö.
— Сетö, сетö! — чирзö Чикаляка. — Ой, меным зубыт!
Вабай то одзас керыштас чирзiсьсö, то вывлань лэбтыштас — буржыка видзöтö бы Чикалякасö, а мöдыт эшö öддьöнжык пессьö:
— Мырддьы менö, папа! Мырддьы Вабайыс киись!
— Дак тэ сiдз? — горöтчис Вабай и шув-пав пырис зооугöлокас, локтiс осьтöм форточка весьтö да вöлись лэдзис Канин Шуралiсь кисö. Зоночка вежöртiс, мый мöдö керны лöгасьöм начальница да кутiс сылiсь кисö, но сёрöнöв: Чикаляка свигнитiс öтöрö.
— Горöтлы вöлись сэтчин, нимкодясь! Канин Шура уськöтчис öтöрö. А эта коста.
Дата добавления: 2015-11-16; просмотров: 46 | Нарушение авторских прав
| <== предыдущая страница | | | следующая страница ==> |
| Чикаляка паськöтö ассис олан | | | Эмöсь жö бур отирыс! |