Гриша да Шурик Мизёввез быдмисö айтöг и этасянь бура вольнöйсялiсö, нач оз кывзö мамнысö. Не бур кыв, не лёк ны юрöдз оз сидз, ежели кутчасö асныравны. А эд видзöтан ны вылö — зонкаэз кыдз зонкаэз, мöдiккезся немöн абу умöльжыкöсь.
Гриша — паськыт пельпона, сьöд кудриа, сiйöн челядьыс сiйö шуöны Пераöн, а винерик, русöй юрсиа Шурикöс — Мизяöн.
Мамныс ны кузя уна горе адззис, уна синва кисьтiс. Тöвнас эшö кыдзкö видзсисö, а гожумнас ― öтiк беда. Лун ли, кык ли чулалас — бöра мамыслö норасьöны, что зоннэс бöбалiсö.
Кин ойнас колхознöй чаннез вылын гöняйтiс?
Гриша да Шурик.
Кин чери кыйиссезлiсь пыж гусялiс?
Гриша да Шурик.
Кин юасьтöг трактор заводитлiс?
Гриша да Шурик.
Мамыс и кывнас, и шатьнас велöтiс, а кöр эз понды судзны выныс, кинас öвтыштiс: кин мый кошшас, сiйö и адззас. И школьнöй собраннёэз вылö дугдiс ветлыны. Мыйлö весь кадсö öштыны, кöр и школаын веськыта висьталiсö: бур морттэз ныись оз петö. И мам вежöртiс: кык абызлö öнi öтiк туй: тюрьмаö. А айыс кувтöдззас баитiс: «Геройез быдмöны! Берегит нiйö!»
Эта тулысö Мизёввез кончитiсö кыкьямысöт класс (ыджытжыкыс, Гриша, витöтын кык год пукалiс), вуджисö öкмысöт классö. Мамыс мöдiс иньдöтны кытшöмкö училищеö, но зоннэс и эстöн сiйö эз кывзö.
Öтiк лунö, кöр инька садитiс картов, карчйöрас пырис тöдтöм морт — лöз штормовкаа, джинсовöй вешьяна, веж ботинкиа.
— Бур лун, Лукия Гордеевна! — здоровайтчис сiя. — Унажык картов быдтыны! Бура уджавны!
Лукия веськöтiс коссö, татшкис зырсö муас, но оропсö кисис эз лэдз. Сулалö, дивуйтчö: этö мый одзын пö менö, инькажугöс, быдса ним-айнимöн шуöны? Ме пö эд быдöнныслö Луки, а эталö мыля — Гордеевна, мыля — морт? Может, сералö? Дак оз: чужöмыс серьёзной, видзöтö рамыника. Май чулалiс, а блед — етша тöв вылас олö.
Лукия учöтсянь розовöй чужöма, а талун — нач гöрд. Этö, натьтö, мышкырасьöмсянь. Может, сысянь, что зоннэс йылiсь уна думайтö.
Мыдзсянь да тшыгсянь — талун эз на öбедайт — Лукия гажтöма шуис:
— Мымда еныс сетас, сымда и быдтам. А бур уджö менам то кытшöм, — Лукия кыскыштiс асланяс оропсö, сiя кокнита торьясис зырыс бердiсь. — Куимись гуддьышта да бöра и дорся.
— Личыт? Ноко видзöтам. — Мужик босьтiс оропсö, шедтiс мусис зырсö, öтлаöтiс нiйö. — Зэлытжыка пуксьöтам, лöсялас. — Сiя казялiс парник дорись зорок, сiйöн вартiс оропсö зырас, бертiс Лукия дынö. — Кöрттув бы эшö.
— Эмöсь кытöнкö, — вöрзьöтчис местасис Лукия, но мужикыс сувтöтiс сiйö:
— Оз ков, карманам шуруп вöлöма. — Кыскис плоскогубцы, крепитiс шурупнас зырсö ороп бердас.
Лукия видзöтiс сы вылö да думайтiс: «Кöбы Гриша да Шурик этадз!»
— Кытчöдз оз чег, оз вöрзьы, — ошкис ассис уджсö мужикыс. — Позьö проверитны?
— А мыля оз? — горöтчис Лукия да мöдiс босьтны зырсö, но мöдыс эз лэдз:
— Ноко кыкöн пондылам.
— Только пыдынжыка гöппесö кер. Да эн шочöт. Ишшо зырыс небытöв, эн жö чегöт...
Кыдз бы эн шу, а деревенскöй морт öддьöнжык хозяйственник, нежели городскöй. И не сысянь, что сiя надз, а сысянь, что буржыка тöдö, кыдз шедö нянь да ырöш, йöв да яй, и берегитö быдторсö.
— Ог, ог, — кöсйисьö мужикыт. — Ме жагвыв. — Ачыс сапкö-гарйö. Лукия öдва ештö тэчны картовсö. Орсöмöн уджалö: и ёгтурунсö ештö нетшкöвтны, и лэбöм назёмсö гöпас лэдзны. Минута мымда и уджалiс, а картовыс ведра садитсис.
Сьöлöмыс радуйтчö Лукиялöн: эттшöм уджалiсь! Кытiсь сiя, кин? Но вдруг чужöмыс кымöртчис, и Лукия мырддьöмöн босьтiс мужикыс киись зырсö, резьöтiс-висьталiс:
— Тэ ежели курыт ва бы шедтан, дак нем оз пет!
— Ог бы шедты, Лукия Гордеевна. Ме — велöтiсь, зоннэтлöн виль классрук. Шуöны менö Борис Борисович. И локтi зоннэт понда баитны.
Одзжык эттшöм кыввезсянь Лукиялö пыр недолыт вöлi, и сiя медодз юавлiс: «Мый бöрана керисö?». А öнi шы оз сет, разь ловзисис пыдынжыка. Сiдз и талун: лэдзис ышлов, лöсьöтчис кывзыны пеняйтчöм, а кылiс мöдiкö:
— Дзуги уджтö, но ме недыр... Гленитчисö меным зоннэт, и босьта бы дынам уджавны.
— Уджавны ни? Велöтны одзлань мöда, кыдз айыс тшöктiс.
Кöть öтсö — Шуриксö. Сiя кывзöжык, велалö буржыка... Колiс бы ишшо...
— Сiдз, сiдз, Лукия Гордеевна. Велöтчыны пондасö! А ме вот мый йылiсь. Детсад дынсис теремоксö адззылiн?
— Басöк балагансö? Тöда. Öддьöн и гажа — только видзöтлыны, син бурмöтны.
— Сiйö ме кери. Сэтöн эшö крепость лоас, воротаэз, башня... «Зарни кар» — сiдз шуим мийö. Меным отсалiссез колöны.
— А-а, отсалiссез, — лöньсис вöлись Лукия. — Ноко пуксьыштам инö, — сiя петiс межа дорас, пуксис парник пельöс вылö, Борис Борисович — бокас. — Абыззэт нiя здоровöйöсь, да лоас я апракныс?
— Эм толкныс. Гришалöн киыс быдлаö сибалö. Шуралöн синыс лэчыт, художник моз берсясö казялö.
— Тэ быль баитан?
— Мый казялi сiйö и висьтала. Талун ме ныкöт вöв карта вевтти. Кутчисьöны, оз мугö. Только иньдöтны колö, висьтавлыны.
— Ог тö-öд... Вон посöдзö киссьö, йöрыс бедь корö — бытьтö оз и адззö. А разь висьтавтöг? Туйдöтла жö...
— Керам посöдзтö. Öнi жö керам, — кöсйисис Борис Борисович. — Вöрыс öтöрас тэнат?
— Пес вылö тай вайи умöликö.
— Бöрьям... Но дак кыдз инö, Лукия Гордеевна — лэдзан? Пондам öбедöдз уджавны, сэсся гортын лоасö... Шедтасö бура.
— Ме только спасибо висьтала, кутчасö дак. Озжык пондö шатласьны. А деньгасис мый... Десяткаöн-кыкöн дöнзяс, и то сапог да йöрнöс сюрас. Öтнам эд уджала. Да юраныс унажык сюй — овнытö велöт.
— Сэк ме сiдз и висьтала нылö: меным колöны бур плотниккез, локтö уджавны мекöт. А пондöтчам тiян посöдзсянь.
Лукия панöвтiс:
— Менам öнi вештiсьны немöн. Картов унакодь кольччис, вузала сiйö да вöлись нö.
— Кинлö вештiсьны — зоннэтлö?
— Тэ разь он ло? Нiя разьны разясö, а кернытö кужасö я?
— Лоа, но мекöт чайöн вештiсян. А ежели стакан йöв адззисяс — эшö буржык.
— Но, чайсö небам, йöлоксö Серанько сетас.
Дата добавления: 2015-11-16; просмотров: 47 | Нарушение авторских прав
| <== предыдущая страница | | | следующая страница ==> |
| ЛÖЗ ЙÖРНÖС | | | Сьылö соловей |