Кöр сюран ылöжык горт дынiсь, сё ни кылан али адззылан мыйкö сэтшöмö, кöда вöрзьöтö сьöлöм. Сэтшöмыс овлö и нач курыт, и сiя бура дойдö сьöлöмтö. Но кылан гажа история, панталан бытшöм мортöс, адззылан мича пожума яг, кöда кок увтiсь боргö-петö синва кодь сöстöм ва, и тэныт лоö долытжык, а оланыс — паськытжык да пыдынжык, и тэ бöра казялан, что сiйö, олансö, мортыс некöр и некöр оз вермы сывьявны не синöн, не думаöн. Сiя тэныт учöтсянь тöдса, кыдз аслат керкуыт, и сэтöн, кыдз керкуат, эшö сымда тöдтöмыс да вежöрттöмыс и, конечно, быдлунся вильыс.
Ме вöлi командировкаын и лöсьöтчи мунны гортö. Деревнясис петi туйвежö, кытчö сувтчывлö автобус, пукси пес чурка вылö.
Вöлi гожум, и деревня тэрмасис лöсьöтчыны тöв кежö: туруналiс, ягöдалiс да тшакьялiс, лэбтiс виль керкуэз. Быдöс этö ме адззи аслам синöн автобус видзчисикö: машинаэз да тракторрез кыскалiсö силос понда ытшкöм подсолнух, кöс турун, керрез да шифер, а отирыс, унажыксö пöрись инькаэз да челядь, бертiсö вöрсянь тыра доззэзöн. Мукöдыс ны коласiсь — кин конувтас, кин кырымас — вайöны пыштурун да гöгьяроз*, кöднö пöжöны чай туйö, и только öтiк морт, дзор тоша старик, оськалiс гортас куш киöн, но тöдчис, что сы сьöлöмын гажыс вöлi не етшажык, нежели мöддэслöн, тыра киа морттэслöн.
Неылын ме дынсянь старикыс сувтчис да нёджжöвтiс вылö — тыдалö, тöдiс бы, оз я кай зэран кымöр.
Пуксян шондiыс лапöтасьöма гöрд чышьянöн, дзик тöждiсись инька, и бытьтö думайтö, мый керны одзлань: то ли эшö мымдакö сулыштны эта местаын, то ли лэдзчисьны вöр коласö, кыдз керлö быд рыт.
Адзза: старикыт сувтчис шоччисьны, и ме кытсöвтi сiйö да тшöктi пуксьыны аслам местаö.
Старик локтiс, горöтчис:
— Öддьöнсö эд эг жö мыдз, да пукышта инö. — Малыштiс чуркасö, пуксис, зэлöтiс бедьсö пидзöссэзнас. — Шонытöла пасьтассьöма, пымалiкодь. — И чöвтiс юр вывсис руд шляпасö, пöрччалiс пиджак киззесö, кыскалiс тапочкаэзiсь лöз носкиа коккесö, но бöр кöмасис.
Пасьтасьöма бытшöма, бритчöма волькыта, и ме ас пондам шуи: «Натьтö, деревенскöй интеллигент нето городскöй морт», и юалi:
— Кöдöрö мунам? Тожö Кудымкарö?
— Некöдöрö, зонка, — кокнита шыасис старикыс. — Ме татiсь... Зелёнöй юра керкусö адззан? — Сiя бергöтчис моз деревня ладорас, видзöт керис сылань. — Сiя менам. Керкусö ачым керлi, а юрсö удерво зонö вежис... Одзжык зелёнöйыс только вичку вöвлi.
Старик баснинас эз тэрмась, но баитö джöмдавтöг. Тыдалö, уна лыддьöтö али ны коласiсь, кöдна учöтсянь велалöны висьтасьны сказкаэз.
— Натьтö, гöститны ветлiн?
— Виль костюма, да сiйöн сiдз думайтан? Эг, зонка, эг гöстит. Кытшöм ни меным гöститöм — семьдесят пять тырис. Этö челядьö сiдз, кыдз велöтiсьöс, мöдöтiсö. А сiдз-ту — сьöд гöг жö.
— Кыдз этö — сьöд гöг?
Старик гусьöна серöмтчис и ме вылö видзöттöн горöтчис:
— А мирас öтiк сьöд гöгыс — колхознöй тракторист... Талун праздник менам да ветлi тай важсö касьтывны — вон сiя вöрок дорö.
— Бура керин, — отсала сылö. — Важсö вунöтан — олантö вунöтан.
Эта вылö сiя сьöкыта ловзисис, чöлыштiс да вöлись шуис:
— Может, и рад бы вунöтiн, да пондыв-ко!.. Вон джек тай тупыльтöмась — сувтöт бокам да пуксьыв, ме тэныт öтiк висьток висьтышта. Али некöр тэныт?
А меным мый некöрыс, кöр некытшöм машина городас оз мун?
Вайи сы дынö сёёвöй труба торок, пукси. Старик кашельтыштiс — горшсö весöтiс — да пондöтiс:
— Ме талун, зонка, нимлуна — вот кытшöм праздник... Этчин, вöр дорас эмöсь кык лог, а ны коласын — муок, гектар ыжда, натьтö. Жельнöгöн да порськокöн тырöма. Сiя чужан места менам.
— Петшöрас да жельнöгас — чужан места?
— Не петшöрас, не жельнöгас, а ыб вылын. Да эд мый дивоыс — öтiклаас кыкись чужлi. Кыкись!
— Кыдз сказкаын.
— Кыдз сказкаын и эм. Да только быль сiя. Кöть не Христос, а кыкись. Перво — рудзöг суслонын — этö мамö чужтöма. Мöдпырсясö — мамöтöг. Лог пыдöсас. Сiя жö лунö, только двадцать годöн сёрöнжык.
— Счастливöй тэ, дед!
— Счастливöйыс, шуöны, йöрнöса чужöма, а ме — йöрнöса-вешьяна да и нинкöма! — сералö старикыс. — Адззылiн, кыдз?!
Шондiсö сайöвтiс кымöрок, лоис ыркытöв, и старик пуктiс юр вылас шляпасö, кизясис.
Меным чожа ковсяс мунны, и тэрмöта нимлуна мортсö:
— Дак мый нö, дед, логас шогмис? Пу увтö шедлiн али ошкöт пантасин?
— Ошыс гожумнас пöт и рам. Мöдкодь зверьлö — кык кокалö — шедлi... Шуа тай: ме сьöд гöг, МöТöСöын уджалi. Сiя ойö пар гöри. Ойнас ыркыт, бур. Муыс небыт вöлi, тракторыс рысь мунö. Шуляла гöррезнам ыбсö, ачым ковйöта-сьыла. Любитлi, зонка, уджавнытö!.. Локтi лог дорас, мöда бергöтчыны. Видзöта: бороздаас морт. Бригадирным тай, мыся, кайöма. Но, сувтöтi тракторсö, петi да сы дынö муна. А сiя не бригадирыс, тöдтöм кинкö. Юалi: «Мый колö?» А сiя: «Тэнö тракторнат». И пола увтсис чер кыскö. То тай, мыся, делоыт: Распутин!
— Ачыс Гришкаыс?
— Ог куж висьтавны, кöда вöлi, но сы шайкаись, натьтö. Сiдз эд и эз кутö бандитсö... Уськöтчи бöр, ештi лом судзöтны. Ме, мыся, не шыр, он повзьöт! Да и не öтнам — гöр вылас прицепщик пукалö. А сiя тай, прицепщикö, казялас неладносö да пышшас... Вот сэтчö и зорьялiсö бöрсяням — прощай югыт ой!.. Адззылiн, кыдз овлö? Шовк — и мортыт абу...
— Мый понда тэнö сiдз?
— Мый понда? А разь он тöд, мый керсис сэк? Дзескыт вöлi, оланас эг тöрö. Öтiккез сьылiсö, мöдiккез горзiсö. Ме комса* вöлi, сiя — бандит. Кöр ме сьылi, сiя кöин моз уннялiс; кöр ме садьтöг уси, сiя гажöтчис... Дак вот, ашынас вöрзьöтасö менö, и сайми. Улын, лог пыдöсас. Тракторнам öтлаын лэдзöмась. Ась пö тракторыслöн и трактористыслöн родыс орас. И быль, менам родö вермис орны: гöтыртöм вöлi. А тракторыслöн... Кылан, кыдз гургöны?
Деревня ладорсянь ыждiс тракторрезлöн шум, и нiя сэк жö локтiсö миян дынö и мунiканыс кык трактор тутöстiсö гажа сигналöн. Старик нылö макнитiс бедьнас да юöртiс меным:
— Нучоккезö шыасьöны. Куим нучок татöн и быдöнныс трактористтэз. И айныс, менам зонö, — тожö. Вон тай вежыс локтö — сэтöн зонö. Нёль ныв миян, а зонным öтiк.
Веж тракторыс сувтчис миян весьтö. Кабинасис чеччöвтiс дас гöгöр годся зоночка, котöрöн сибöтчис миян дынö.
— Эта правнук менам, Митька, — висьталiс старикыс да юалiс зоночкаыслiсь: — Не я менö кошшан, кага?
— Тэнö. Гортö корисö...
— Но дак мый, мунам инö, — согласитчис внучекыскöт старикыс да сы отсöтöн чеччис и шуис меным: — Яслисянь тракторыс бердö лякасьö, ме кодь жö сьöд гöг лоас... Но, мийö мунiм. Он кö сюр городас, дак пыр миянö узьны.
* Гöгьяроз ― зверобой.
* Комса ― комсомолец.
БИТОК САНКО
Эттшöм делоыс аркмис важын ни, кöр эшö автобусыс миян деревняöдз эз ветлы.
Локта ме кыдзкö городсянь, яблоккез вая. Кысси Мутрокöдз — туй вылам деревня сэтшöм. Шор дорö пукси шоччисьны, öдöс сайкöтны. Кöть и ар, а луныс гожся кодь — бура шоналi.
Пукала, видзöта, кыдз челядёкыс городокöн орсöны, да оз пет нылöн орсöмыс, умöля инмöны. Вай, мыся, мыччала ассим кужöмöс. Ась тöдöны, кыдз ми орсiм. Небось, синö эз на ныжмы, да и киö абу чукыля.
Сибöтчи ны дынö, шуа:
— Ме бы орса жö. Примитат?
— А кужан?
— Ме сэк ни кужи, кöр тi гöг выланыт котрасит.
— Ого! Сэк Биток Санкоыскöт орс, велöт сiйö, — рызйöны зоночкаэс.
Жаритчöм шаньга чужöма зоночка лэбтыштiс вешьяноксö, кваркыш керис синнэзнас да шуис:
— Давай орсам. Только чур-чура: кыдзи ме верма, дак быдöннымлö öтiк яблокöн.
Нёджжöвтi ас гöгöрам, лыдди, кыным орсiсь. Абу уна, позяс орсны.
— Лöсялö, — шуа ме. — А кыдз ме верма, сэк мый? Челядьыс рыз-рыз серöмтчисö, а Биток Санко бöра шуö:
— Сэк нем! Нето тшöкты мыйкö керны: сьывны али йöктыны.
— И этадз лöсялö.
Санко сувтöтiс аслыс и меным «ракетаэз», и ми пондiм орсны. Кыдз пöрисьжыклö медбур кляччесö сетiсö меным. Бытшöмöсь зоночкаэс, вежливöйöсь. Босьтi медвеськытсö, метитча да думайта: «Но и йöктат менам, кагаэз! Эд ме вöвлi городошнöй снайпер».
Öвтыштi клячнам, иньдöтi сiйö, кытчö колö. Клячжуг зубыта летöвтiс киöс, вöрзьöтiс пельпонöс да виж мунiс «ракета» бокöт. Сизим пара син шысеттöг нёджжöвтiсö ме вылö, а Санко сюйыштiс киам мöдiк кляч.
Макнитчи пельпон вевдöрöттям, шупки — кляч буткисис «ракета» одзö, лягуша моз чеччöвтiс мöдöрö и беддясьöмöн мунiс тартарары. Сiдз жö лэбзисö куимöт, нёльöт... кватьöт.
«Но, эн чид öддьöнсö, — ола ачымöс. — Перво видзöт, кыдз Санкоыс орсас. Может...»
Санко паськöтчис сажень моз, дуллялiс шульга ки долоньсö да метитчытöг кокнитика иньдöтiс клячсö «ракета» чукö, и городоккес, бытьтö типоккез, резыштiсö-лэбзисö öтмöдöрö.
Сизим чужöм — сьöдöсь, чочкомöсь, понпутшаöсь — бöра бергöтчисö мелань и мыччалiсö ассиныс чочком пиннезнысö.
— Ноко, шульгорук, вай ассит кляччетö! Нiя может, колдовскöйöсь тэнат?
— Вежсям, — спокойнöя висьталiс Санко да вайис ме дынö ассис. — Ми честнöя орсам, ми ог пöрьясьö.
Ме пешлi сылiсь öтiкö, мöдiкö — кляччез кыдз кляччез. Нельки умöльжыкöсь.
— Вачкы менаммезöн аслат «ракета» кузя, — тшöктiс Санко. Босьтi чукыляжыксö, сiйöн крюкышта, мыся, кыдз Санкоыс.
Но эта гормöччаныс кытшöвтiс городоксö да жексöмöн мегырасис челядьыс коккез увтö. Нiя пышкайез моз кинитчисö мелань и, натьтö, думайтiсö, что нарошно ме сiдз кери, что повзьöтла нiйö.
Сэтшöм делоыс кизертiс менö. Да сэтчö жö кытшöмкö куль пондiс летны синлопöс — буржыка метитчыны оз сет. И ме чапкиси орсöмсис.
Сьöкыт сьöлöмöн кыскалi корзинасим яблоккесö да пондi сетавны öтiкöн быд нюжöтöм кырымö. Сiдз сетi сизимö, а одзам сулалiсö кык сизим: кöркö ештöмась локны и мöдiккез.
— Босьталö асьныт, — сувтöтi ны одзö корзинаöс. Минута бöртi ме дынын некин эз ло.
Нёджжöвтi корзинаас — сэтчин шонтiсö гöрд боккезнысö кык яблок.
Мыдз походкаöн иньдöтчи гортлань, а бöрсяням вежливöй челядь чирзiсö:
— Спасибо, дяденька, яблоккет понда!
— Бур тэкöт орснытö!
— Эшö мöдпыра вовлы!
Ме макайтi нылö кинам, шыннялi, а сьöлöмö ордъялiс да сотчис, бытьтö сы пытшкö сюрис петшöр нето öмег.
Дата добавления: 2015-11-16; просмотров: 55 | Нарушение авторских прав
| <== предыдущая страница | | | следующая страница ==> |
| ВАЮКАНIСЬ ЯНЯ | | | МÖД ЮРКИНЛÖН МАНЬЧИ |