СЭК НЕМ И ТÖЖДIСЬНЫ

Тöвнас Тоня часто чышкывлiс öтöрись посöдзсö и этö уджсö лöсьöтчывлiс керны мекöт öтдруг и прокод старайтчис одзавны менö, медбы сэсся отсыштны меным.

Кыдзкö öтпырись ме вöлись пета, а Тоня видзчисьö ни менö миян калитка дынын: öт киас рос, кöдöн чышкисьлiс, а мöдас — Данила дедлöн ворота одзись тас.

— Тэ кытчö сiдзи, Тоню, лöсьöтчин?

— Тэ узян и нем он тöд, а ойнас локтöма ош, сiя мöдö колодецнымöс нöбöтны. Нöбöтас, дак мый нö пондам юны? — ловзисьтöг висьтасис сiя. — Öнi кытчöкö дзебсисьöма. Лок ноко кошшам да вашöтам.

— Ак сiя чукыля кок! — видча ме. — Мый сiя этö сэтшöмсö керö! Велалас кö, быдöс колодеццесö новьяс вöрас!

— Конечно! Талун миянлiсь, ашын — Катя баблiсь, — отсалö меным Тоня. — Тэ мыйкö тожö босьт, сэк сiя сразу повзяс.

Ме босьтi пуовöй зыр и колодецыс дынö сибöтчикö шуи:

— А эд ошсö мийö весь видам: сiя öнi кыз онöн узьö. И тöвбыт позсис оз петавлы.

— И öтпыр оз?

— Оз.

— Дак мый инö сёйö?

— Лапасö нималö.

— Йöла разь лапаыс?

— Абу йöла, но кöр нималö, кынöмсис госыс сылö, и ошыс пöтö сiйöн. Гожумнас уна сёйö, и госыс сылöн кыз лоö — тöвбыт кежö тырмö. А саймö вöлись тулыснас.

— Кин саймöтö?

— Кин петухсö — эн вунöтчы? Сiя и ошсö. Тоня думыш керис и размöд чеччöвтiс сразу кыкнан кокнас.

— Тöда, тöда кин — шондi! Вылына каяс вöр вевдöрас, казялас ошыслiсь позсö, сьывны пондас:

Оша-миша, небыт тоша, Тырмас ни туплясьны,

Басöк вöт вöтасьны! Кайес поззэз гöрдззöны, Пияноккез пöжöны, Тэ нö мый думайтан?

— Да, ошсö шондi саймöтö, только невночка мöдмозжык. И не сы понда, медбы пияннэз пöжны. Ошыслöн эшö тöвнас кык пиян чужисö.

— А кыдз мöдмозжык?

— Шондiыс перво саймöтö пуэсö, а нiя пондöны коявны сир дук. А дукыс сидзö ошыс нырö. Мишыт виш-виш керас, думайтас: «Руыс кытшöм чöскыт öтöрас! Не я тулыс локтiс?» А сэтчö лым пондас сывны, пуэс вылiсь ва вотявны: тёп, тёп, тёп...

— И ошыслiсь шебрассö вадас.

— Сiя оз шебрасьлы, сiдз узьö.

— А перинаыс эм жö?

— Эм. Лысовöй, — шуи ме да пондi видзöтны ойся гöсьыслiсь кок туйсö, кöда сiдз бура тöдчис вились усьöм лымок вылын.

Перво ме думайтi, что котрасьöма пон, но следдэс вöлiсö ыджытжыкöсь, и ме висьталi:

— Кöин кошшисьöма.

— А-а, сэк нем и тöждiсьны. Сiя колодецсö оз вермы лэбтыны, — висьталiс Тоня да нöбöтiс тассö Данила ворота дынö.

Чышкисьöм бöрын, кöр Тоня миян йöр дынiсь столаö гарйис керкуок-горок, локтiс почтальон да висьталiс:

— Таой Катялiсь понсö кöин гусялöма...

ВЕШТIСИС

Бобик, чочком юра гöрд кычан, талун дыр узис. А кöр саймис да пондiс чöскыта нюжласьны, кылiс лöг горöтлöм:

— Ге-ге-ге! Ге-ге!

«Кин жö этадз горöтлö? — думайтiс Бобик. — Вай-ко видзöта».

Кычан петiс пос увтiсь, оградаöт котöртiс подворотня дынö, сюйыштiс юрсö осьтаö. Нёджжасис-керис и казялiс сiйö зоночкасö, кöда олö улица сайись керкуын. Эта кöмтöм зоночкаыс öтпырись летiс Бобиклiсь пеллесö, а сыбöрын лякис сы бердö шышыбаррез, и нiя öнöдз бытшкалöны сылiсь боксö. Дак нёжли сiя бöбкульыс сiдз горöтлыны вермö?

Зоночка казялiс Бобиксö да пондiс кытсавны сiйö дынас. Но сылöн киас вöлi шать, а понокыс тöдiс ни, мый сiя сэтшöмыс.

— Ляв-ляв-ав! — шыасис Бобик. Эта лоö: эн бöбöтлы, ог лок тэ дынö.

А зоночка кыскис кармансис коскатор и пуктiс му вылас. Кычанлö усис тöдвылас ордлы, кöдö сы понда неважын вайлiс мамыс. Ах, кытшöм чöскыт вöлi сiя!

Этö касьтылöмсянь Бобиклöн казявтöг петiс дульыс.

— Бобик, на, на! — кытсалiс зоночка. Талун сылöн голосыс вöлi рам, ласков, и Бобик петiс ворота увтсис да легйис-котöртiс зоночка дынö. Но только ештiс локны улица шöрöдз, кыдз бöрсяняс кылiс лöг гегзöм. Бобик дрöгнитiс, дзарйöвтiс бöрас. Сэк жö сы дынö чеччöвтiс кинкö чочком да нюжöтчис паськыт гöрд öм.

Понок никöстiс да уськöтчис зоночкаыс ладорö, а чочкомыс зубыта курччöвтiс сылiсь боксö, вынöн вачкис юр кузяс, пöрöтiс кок йывсис.

Кöр Бобик садясис да пондiс нювны дойдöм боксö, зоночка матöкодь сибöтчис сы дынö и давай нюжласьны-серавны. Бобик вешшыштiс бокö да пондiс думайтны, кин вермис вартлыны сiйö. Не я эта сералiсь зонкаыс? Но сiя абу чочком и öмыс не гöрд.

Сералiсь зоночкаыс вдруг ойнитiс да уськöтчис пышшыны гортас. А сы бöрсянь бордпавйöн котöртiс сiя — гöрд öмаыс. Зоночка пышшикас и ботинкисö öштiс, но ештiс кайны горт посöдзас. А гöрд öмаыс гегзыштiс небура да пöлiнясьöмöн мунiс вагöплань.

Бöжоксö шымыртöмöн, дзарьясьöмöн, мунiс гортас и Бобик. Вöлi зубыт юрыс, зубыт бокыс. Лöгыс петiс зоночка вылö. Этö сiя бöбöтiс Бобиксö, а сыбöрын сералiс сы горе вылын.

Ыджыт öбидасянь вартлöм понок эшö норöнжык лявгыштiс:

— Ля-ав! Ляв-лявв!

Сэсся мöдiс и бöбкульыс вылö увтыштны, но сiя эз ни вöв öтöрас.

А сэтчö усис тöдвылас коскаторыс: ах, чöскыт!

И эз вермы видзсьыны, котöртiс сы дынö. Но эта вöлöма не коска, а путор. Бобик сiдз лöгасис зоночка вылö, что пöрись пон моз мöдiс горöтны «ув-вув», да сёравно петiс «тяв-тяв». Сэк Бобик кватитiс зоночкалiсь ботинкисö и кыскис позас. Кöть и не коска, а йирны туйö.

БÖРЙЫ ЫДЖЫТЖЫКÖ

Митюлö охота лоис морковок йирыштны. Сiя мунiс дедыс дынö, пондiс нуöтчыны:

— Ветлам огородечас, дедуль, морков кошшам...

А старикытлö недосуг — вугыррез лöсьöтö, — и сiя и кут да висьтав внучекыслö:

— Ачыт нетшкöвт. Адззывлiн эд, кыдз ме кошшывлi? Вот, вот! Бöрйы ыджытжыкö да и сёй на здоровье.

Зоночка пуксис Пеганко вылö — дедыс бедь вылö — и тöвчикöн пöльтiс-гöнитiс грядоккез дынö. Сiя тöдiс ни, кытöн мый быдмö: меддорас — капуста; корыс сылöн гырись и лöз видзö, сы увтын муыс оз тыдав. Мöдiк грядок вылын луктурун шпынöн сулалö, а доррезöттяс шочыника лэбтiсьöны боби шаттез. Эта грядокыс кузь, и сы вылын берсяыс быдмö: анькытшок, свёкла, кушман, а меддорас — укроп.

Куимöт грядок вылын кудриасьö морковлöн кор. Сы дынö и мунiс Митю, нетшкöвтiс öтiк заок, а му пытшксис мыччисис чунёкыс кызышта веж вужок. Мый ни сэтшöмас сёяныс? Бöр сюйыштiс муас, ась пö эшö быдмыштас. Иньдöтчис мöд ладорас, шедтiс вильö, да и сiя учöтöв. Тожö бöр садитiс. Кытшöвтiс грядоксö, быд лёдзись пешлiс, а ыджытыс эз сюр. Сэк зоночка сувтчис грядок конецас да пондiс видзöтны быд морковоксö: кыскас, видзöтас, бöр местаас татшкас. Сiдз джынсö летiс, а гырисьжыксö эз адззы.

Пырис карчйöрö дедыс.

— Но, адззин, Митю, морковтö?

— Эг на, дедуль, етша эшö кошши.

— Вай-ко ме отсала, — шуис дедыс. Сiя сибöтчис грядок дынас, юкöвтiс морковь заэсö, а нiя ниль пöрисö.

— Ай-яй-яй! — горöтчис дед да гогинялыштiс юрнас. — Но и сюрас миянлö бабытсянь!.. То кыдз эд, мывкыдтöм, бöрйöны, — и старик мыччалiс, кыдз колö мöдпырся керны: кушöтыштны кор бердсис мусö, бура видзöтны, ыджыт я морковыс, а вöлись и решитны, мый сыкöт керны.

АНИСОВКА

Лёля шогалiс нёльöт лун ни: сiйö кокалiс тöв писти. Сiдз шогалiс — синнэс эз оссьö. Поллясьöм да коростасьöм, сiя пластокöн куйлiс аслас койкаок вылын да шочыника ойзiс. Ойзiс зубытсянь. А зубытсö сылö керис са кодь сьöд кай — рака нето кырныш. Сiя пуксис нылочкаыс морос вылö, сайöвтiс борднас югытсö да пондiс кокавны чужöмсö, голясö, пельпоннэсö. Нылочка пышшö бы сы дынiсь, мездiсьö, да выныс воть абу. Кырнышыс кокö кузь нырнас и керксöмöн сьылö:

Тюк, тюк, Кок, кок! Менам вына Ныр и кок. Ме не рака, Не кырныш ме, А тöв писти Пипилисти...

Нылочка дыркодь мамсö корис, а мамыс оз кыв. Сэк бабсö кытсöвтiс, и сiя шыасис:

— Татöн ме, кага, тэ бокын пукала. Нёштöм вöт, тыдалö, вöтасин?

Гажмыштiс Лёля, дугдiс сыркьявны: эта вöлöма вöт, а не быль. А вöтасис сказка, кöдö бабыс одзжык висьтасьлiс.

— Часöт, малинтусь, льöлёк нямыштам, — старуха вайис йöлöн чочком кружка, кöда вылын вöлiсö рисуйтöмöсь яблоккез. Нылочка вештiс некодя кинас юансö, гусьöник корис:

— Яблок вай.

Вöлi ар шöр, отирыс лöсьöтчис пантавны Октябрьскöй праздник, и яблоккес, конечно, ны магазинын абу ни, вузассисö. А бабыслöн нiя важын заптöмöсь, мымдакö миссьöтöмöсь и кипод увтас пуктöмöсь.

— На, дзоридзок менам, сёй на здоровье. Но шогалiсь нылочка шуис:

— Мöдiкö...

— Кытшöмö инö, ыбшарок менам?

— Чöскытсö.

Кöда чöскытыс, оз позь висьтавны, и бабыс вайис быдса бекöр:

— Бöрйы любöйö, уту миян. Дзар керис Лёля, норöн горöтчис:

— Гöрд бокасö вай.

— Ассиным? — юалiс бабыс да пуктiс кисö внучкаыс кымöс вылö. — Эна эд антоновкаэз, öддьöн чöскытöсь, а миян анискаэз только. Да и сёйсисö ни, кагушко, абу.

— Эм... Тэ бура кошшы...

— Пожыс, сили менам, пустöй ни да!

— Листок увтын эм... Петав.

Ны садын только öтiк анисовка и быдмис, а яблоккесö öктiсö быдса семьяöн и, конечно, быдöс босьтiсö.

— Петав, бабу... Видзчися ме.

— Котрася инö, сильканокиньöй, ужо... Старуха пуксьöтiс Лёля бокö ыджыт аканьöс — сё гажажык лоас — и мунiс кошшисьны.

Перво кежыштлiс чомö, кытöн видзис яблоккесö, но сэтчинiсь нем эз адззы, и петiс садö, пырис иргаэз коласö. Ны шöрын, паськыткодь кушинокын, сулалiс неыджыт анисовка.

«Кöть бы учöтикö, кöть бы умöликö сайöвтiн, — кеймисис яблонькаыслö бабыс. — Сiя, может, сылö медбур лекарство...»

Листыс шочамöм ни, и бура тыдалö, что некытшöм яблок абу. Сёжö юкöвтiс уввесö, кöдна йитсьöмась иргаыскöт, и адззис эд!

Яблокыс свиттялiс и вöлi сöстöм-сöстöм. Жагвыв, дзик ёлка вылiсь стекляннöй чача, баб орöтiс улок бердiсь яблоксö да пыртiс внучаткаыслö. А сiя норöн ойзiс да вöрöтiс кöс тырппезнас.

— Адззи, дудiок менам, адззи! — радуйтчис бабыс.

Нылочка осьтiс синнэсö, видзöтöв-керис бабыс вылö да вöлись горöтчис:

— Листок увтiсь?

— Веж листок увтiсь, — яблоксö пым ваöн гывьялiкö висьталiс баб. — Ме шуа: «Сет, анисушко, Лёляыс сёйö бы!» — сiя и мыччис...

Нылочка босьтiс, видзыштiс киас и öтпыр курччöвтiс. Учöтика йирыштiс, шырок моз, и юалiс:

— Спасибосö висьталiн, баба?

— Анискаыслö? Висьталi, ягöдок менам, висьталi. Тэ сёян да тожö висьтав.

Жагöна Лёля сёйис, но быдöс яблоксö йирыштiс. А сыбöрын чай корис. Сiдзкö, нылочкаытлö лоис кокнитжык.

ШОМОК

Ашынас, кыдз пондiсö велöтчыны, учöтжык велöтчиссес мунiсö öктыны сю шеппез. Таво гожумыс вöлi зэра да тöла, сюэс чисто пöрöмась да каттисьöмась, и комбайныс бöрын ыб вылас кольччö уна шеп.

Öктiсисö вель дыр, тыртiсö ыджыт короб и лöсьöтчисö мунны гортö, но казялiсö, что Тимок да Ванюша озö уджалö. Кытчö нiя лоисö? Конечно, дзебсисисö идзас стопаö!

Медчожжес котрасисö идзас стопа дынö — и сэтчин нiя эзö вöлö.

— А ме тöда, кытöн нiя, — шуис Раиса Михайловна, челядьлöн велöтiсьныс. — Кылат — руыс тшын дука?

Пондiсö вишкыны да вирскыны ныррезöн, а вöлись чирзыны:

— Кылам, кылам!

— Дак вот, нiя эта вöрок сайын, — велöтiсь мыччалiс кинас рас ладорö, — керöмась бипур и шонтiсьöны сы дорын. Ноко ветламö!

Быдöнныс мунiсö сэтчин, кысянь локтiс тшын дук, и адззöны: межа дорын, вундöмпод вылас, югыт бикыввезöн орсö неыджыт костёр, а Тимок да Ванюша пöжалöны тшаккез,

Раиса Михайловна стыдитöв-керис пышшалiссесö, босьтiс Тимок дынiсь спичкаэз да висьталiс:

— Часöт мийö мунам öктыны жельнöг, а тiйö кусöтат бипурсö да вöтат миянöс. Вежöртiт?

— Вежöртiм, — висьталiсö дузгыльтчöм зоночкаэз, но велöтiсь эшö öтпыр ныраныс и öманыс тшупис:

— Быдöс кусöтат, мед öтiк шомок эз кольччы!

— Муöн тыртат и коккезнаныт талят, — велöтiсö челядьыс.

— Но, но, кусöтам...

Челядьыс мунiсö лог дорö, кытöн быдмö жельнöгыс, а кык ёрток видзчисисö, кöр пöжасясö тшаккес, сёйыштiсö нiйö и пондiсö чапкавны биас му комоккез.

Чепсасисö бичиррез, лэбтiсис чочком тшынок, жагвыв öшисö бикыввез. Пессэз чискисö-пиксiсö, эзö бы кусö, но быд му содз бöрын, быд комок бöрын гöрд головняэс сьöдöтiсö сё перытжыка и öддьöнжык пондiс кайны руд пар.

Но вот и быдöс пессэс тырисö муöн, и пар дугдiс тыдавны, только сотчöм дук кольччис.

Тимок кышалiс сивьяс кокнитик корзинка (нiя Ванюшкакöт босьтлiсö öтiк доз), сюйис киэсö кеписёккезö да горöтчис:

— Ме готов!

— Ме тожö, — шыасис сылö Ванюшка и казялiс, кыдз костёрас пык öзйыштiс шомок да бöр вынтöмсялiс, кусыштiс. — Видзöт-ко, абу на эд кусöма.

— Кусас, колас дак, — мунiкас ни висьталiс Тимок. — Челядьыс озö ни тыдалö, вöтчам!

А шомокыс бöра югйышт керис да кусiс, бытьтö ловья костас медбöрьяись ловзисис, и вдруг лыйис бичиррезöн...

Колiс бы эшö коявны сы вылö уль мусö, да мыйкö жаль лоис этö ловья шомоксö вийны, и Ванюшка эз кусöт сiйö.

Арся луныс крут, чожа буждö: кыдз шондi пуксис — и абу луныс.

Только ештiсö челядьыс локны гортаныс да сёйыштны — пемдiс. Сэк жö деревняöт тэрмасьöмöн мунiс пожарнöй машина, гöнитiсö колёснöй тракторрез, автомашинаэз.

Ванюшка казялiс, мый лоö эта: пожар! Сiя петiс гортсис да сувтчис ворота дынас. А деревня саяс югьялö ыджыт би, чалöтöмыс зоночкаыс дынöдз кылö.

Медперво Ванюшка мöдiс котöртны Тимок дынö, но сэтчö локтiс мамыс и пыртiс сiйö гортас.

— Мый сотчö, мам?

— Вöрыс, кöда ыббес шöрын... Ой, беда! Кыдзкö сюэсö сэтiсь вундiсö ни, а то бы кык беда вöлi.

— Кöда Лунпокатас?

— Сiя...

Куимöт велöтчан луныс пондöтчис собраннёсянь. Районiсь пожарник да колхозiсь бригадир висьтасисö, кыдз ойнас отир пессисö бикöт, но эз вермö сiйö кусöтны, и биыс быдсöн дзимлялiс ыб шöрсис вöрсö. Кöть вöрыс и неыджыт вöлi, и то мымда доброыс тшыксис, да эшö идзас стопа сотчис.

— Вот кытчöдз вайöтö спичкаэзöн орсöм, — висьталiс пожарник. — Ыджыт беда керö учöтик шомок, кöдö мийö колямö дозирайттöг вöрын али ыбын, огö кусöтö сiйö...

Эна кыввезсянь Ванюшка сiдз и кынмис местаас. «Этö ме... ме жалейтi да эг кусöт сiйö учöтик шомоксö... А тöлок ушкис-пöльтiс да и вились öзтiс...»

Зоночка дыр олiс вöрзьöтчытöг, сэсся дзарнитiс бокас: Тимок пукалö юрсö öшöтöмöн, а пеллес сотчöны, дзик öгыра шоммез.

Дата добавления: 2015-11-16