Или Мöдiк тор, кöдö пöрись вöралiсь висьтасис ужин бöрын

Юим мийö, и Овдокич сё жалейтiс, что етшаöв деньгасö босьтiс. И юр кузяс чуннезнас шваткöтiс, мыля сiя бур думаэсö сыбöрын вайöтö, кöр делоыс аркмас ни.

А Софья Юрьевна лöсьöтас бинт да йод, медбы мавтны да кöртавны Егорушкоыслiсь писькöтöм синсö, пуксяс керку одзись лабичок вылö да и видзчисьö. Лабичокыс миян öшын увтын, миянлö быдöс тыдалö. Час пукалö, кыкö, куимö — пистик öктiсьыс абу. Пемдан дорас ме кольлалi гöсьöс гортас, а ачым водi узьны.

Старуха ойбыт пукалас — Ёгорушко сылöн оз берт. Асывнас котöртiс ме дынö:

— Кытöн Егор Ипатовичыс? Эд я тiйö стрöйдö стариксö?

Ме сылö:

— Кинкöт рöдитчит, сылiсь и юасьö.

— Ме юала тэнчит: кытöн олö шпанаыт?

— Сылöн гортыс абу. Ме сiйö туй шöрсис вайöтлi.

— Ага, тэ суськисян! Тэ и нимсö он висьтав?

— Тiйö медалiт сiйö, тiянлö и колö тöдны, — орöтi баснисö. Сiя тай сэтчö кыдз лэбтiсис, кыдз лэбтiсис! Тiйö, шуö, вийит сiйö — вот мый керит! А ежели сы йылiсь он висьтав часöт, дак аслыт умöльжыксö керан.

И мый, думайтат, керас?

Милицияö звонитас! И юöртас сэтчин, что Егор Ипатович вылö ме важын ни пиннезöс йира и что кöсйися нетшкöвтны сылiсь шульга синсö.

Сэк жö менö тур-тар следователь дын кыскисö, юасьны кутчисö: сiдз да этадз пö вöлi — стариклiсь син мöдiн кыскыны? Эз, мыся, сiдз кыдз ме абу «окулист» и нем ог тöд. А тоша мужиксö пö кин вайöтiс? Ме, мыся, только мийö и чуньöн сiйö эг павкöтö, да и эг думайтö вöрöтны, а просто сiдз ыжмалыштiм. Дак мортвийöмыс пö тэ моз — ыжмалöм? А ноко пö часöт жö висьтав, кин мöд уголовникыс?

Кыдз кылi этö — сразу гыркам путькöтны пондiс: вон кытчöдз орсiм! И сразу Овдокичлiсь нимсö казьтi. А сiйö, пöрись вакульöс, тожö гортас оз пукöт: кытчöкö касьтiсьны мунас, да некинлö оз висьтась. Милиция решитас сiдз: старик весь пышшавны оз понды, сiдзкö, сiя и кочкис мортсö. А кочкыны отсалi ме. И йöртiсö менö радзза öшын увтö — видзчись, кöр Овдокичлöн покойниккес вошшасö!

Сiдз чулалiс лун, мöдiк, а стариккет некöда абу. Менö треситны пондiс. И нёштöм вöттэз öдöлейтiсö: то Овдокич лякöтöм тошокнас нимöтö, то Софья Юрьевна сьöктанöн вöтлiсьö, медбы шульга синöс гуддьыштны, то Егор Ипатович ойбыт петухöн кытсасьö.

Кык оёк сэтчин узи, а годдэзöс, натьтö, кык дасок чинтi!

Куимöт лунас адззöмась менчим артистöс и вайöтiсö ме дынö. Но мый эм, дак эд эм, а мый абу, дак и абу — и Овдокич немöн нылö эз отсав! Софья Юрьевна чижьялö-котрасьö пö, джын городсö кок йылас лэбтöма, а милициялö и ловзисьны оз сет: кытшöмкö шпанаöс, дак сразу пö кыятö, а славнöй мортсö неделя пондат кошшыны?..

Видзöв-керисö да лэдзисö миянöс горттэзö. Мунам, кыдз шышшез, йöзыс вылö видзöтны ог лысьтö: эд каждöйыс тöдö, что мийö — преступниккез. Ме решитi ни кольны и бытшöм квартираöс, и долыт уджöс, медбы только не пантасьлыны идзасовöй дöваыскöт да не кывны сылiсь жексöмсö, сылiсь лёкöтчöмсö.

Туйвежас янсöтчимö — киасьтöг, шытöг, кыдз муксуннэз. Сибöтча керку дынас — ачым сюррезнам мусö гöрны готов — и кыла:

— Здорово, дона сосед!

Лэбтi юрöс, адзза: Софья Юрьевна баитö. Голосыс рамыник, гажа. Мый одзын жö этö сiя? А старуха чувйыштiс бокам да вашкö пель одзам:

— Видзöт, кытшöм смирнöй пукалö менам — дзик ичмонь! Хе-хе-хе!

Дзарнитi — и синнэзöс барöтi: менам öшын увтын пукалiс Егор Ипатович. Шульга рожабаныс да синыс каттьöмöсь алöй чышьянöн.

— Письтöм?

— Öтыс письтöм.

— Шульгаыс?

— Шульгаланьсис.

— Не синыс разь?

Адзза: Софья Юрьевналöн чикыртчö синокыс и паськалöны нырборддэс.

— Кытшöм син? Тэ мый этö лёбан?! — горöтлö сiя. — Али етша милицияас олiн, а? Сiя не кытшöмкö шулер нето винаюись, медбы син писькöтöмöдз локтiс. А эз вöв гортын, дак Перемö слонöс видзöтны ветлöма да кынмалöма сэтчин, вот и чирöйез öдöлейтöмась. Вежöртiн? Только эшö кыла небаснитö — бугыллетö шедтала! Кылан?

Вот сiя вöтыс кыдз бергöтчис!

Шымырöн-шымырöн пыри гортö да садьтöг уси койка вылас.

Кульыслöн тэ инька, а не соседка!

МОРТЫС БЫДÖС ВЕРМÖ

Чулалiс гора-гыма май, тюк локтiс июнь. Сылöн медодзза луныс асывсянь вöлi лöнь, шоныт и öддьöн югыт, бытьтö курскöй мусö шонтiс да югдöтiс не öтнас миян важ югдöтiсьным, а десяток дзардан шондi. И югдöтiс и вылiсянь, и улiсянь, и öтмöдöрсянь. Талун нельки соловей вель дыр ошшасис аслас сьылöмöн, а ыбшаррез даки öнöдз öшалöны аэродром весьтын и тэрмасьöны кöть невна гажöтыштны ранитöм мусö — ась чожжыка веськаласö-бурдасö войнаöн дойдöм местаэс.

Гажа и Лёня Болдоровлö: сiя талун нимлуна, сылö тырис восемнадцать. Конечно, гортын эта лунö вöлi бы эшö гажажык. И сур бы вöлi, и нöкьяйöв. И лук бы вöлi — таво одз тулыс.

Ефрейтор Болдоров — авиационнöй мастер. Сылöн и синнэс авиационнöйöсь: югыт-лöзöсь, кыдз и погоннэс да петлицаэс, кыдз июньскöй сöстöм небоыс.

Нимлуна мортлö быдлаын сетöны кокньöт, нельки фронт вылын, кöр абу бой. Часöт самолёттэз мунiсö заданнё вылö, и Лёняöс техник лэдзис быдса час кежö. И солдат куйлö тöдтöм шор дорын да косьтö миськалöм нямöттэз и обмоткаэз. Босьтiс сьöрас книга, кöдö тöн комсорг сетiс, да мыйкö оз лыддьöтсьы: тöдвылас гортыс усис. Этö ыбшаррес казьмöтiсö гортыс йылiсь. Буждымка юок йылiсь, кöда котöртö коми муöт и кöда дорын олöны мам да куим учöтжык вон. А эшö сэтчин олö соседка Зоя. Сiя Лёнясö кольлалiкö козьналiс чышьянок, да не простöйö, а басöка серöтöмö: доррес воттьöмöсь зелёнöй сунисöн, пельöссэзас лöз цветоккез, а шöрас биöн öгралöны куим кыв: «Берт чожажык, Лёня».

Бур думайтны горт йылiсь, кöр тэ ылын сы дынсянь. Бур мечтайтны и сы йылiсь, кыдз тэнö примитас гортыт мöдiклаын дыр олöм бöрын, мечтайтны виль олöм йылiсь.

Аэродром вылын чирыштöмöн унньöвтiс сирена.

Тревога!

Не весь эд кöдковну «рамаыс» öшалiс эстöн — фриц локтö бомбитны аэродромсö. Чу, пондiсö ёркйыны-лыйлыны зениткаэз.

Нямöттэс ваöсь, обмоткаэс ваöсь, но тревога эм тревога — косьтiсьны некöр. Лёня кирни-верни кöмасис, котöртiкас ни пасьталiс гимнастёркасö, ременясис, пондiс поперегавны кöчковника видзоксö — туйесö кошшыны тожö некöр. Неыджыт кымöрокись петiс немецкöй истребитель да пöвсыштiс Лёнялö паныт кузь очередьöн. Пуляэс, кыдз шер, шваткöтöмöн вурыштiсö му кузяс, метр-мöдöн бокасжык. Лёня нёджжöвтiс öтöрö-мöдöрö, матын некин эз тыдав, и вежöртiс, что этö истребительыс сы кузя и лыйис. «Вот срам, öтiк морт сьöрын вöтлiсьö», — видiс немецсö Лёнька и гартыштiс сэтшöм кыв, кöда йылiсь одзжык эз и думайтлы. А «юнкерссэс», дзик кырныш чукöр, уськöтчисö ни аэродром вылас. Нылöн нёштöм шыыс дурмöтiс пеллез, бöбтiс юр.

Гымгис-потiс фугаснöй бомба, сэсся мöдiк, куимöт. Штаб дынын пондiс ёркöтны пулемёт, но лэдзис только очередь-мöд и виньдiс — нето жугалiс пулемётыс, нето лыйсисьыслö инмис осколок. Этö, натьтö, Сабир лыйсис, сiя и лöсьöтiс пулемётсö, чапкöмись керис.

Расок дынас ни, кытöн землянкаэс, Лёня чужйисис. Усьтöнняс казялiс, кыдз сiя местаись, кытöн сулалiс боеприпассэзöн склад, вывланьö койыштiс идзас стопа ыжда би сора тшын да бус. Зэгнитчис муыс — этö öтдруг потiсö кык ыджыт бомба. Стрась вына взрыв Лёнялiсь чанöтiс пеллесö. «Быдöс... быдöс сотiс, нем эз коль... — жалейтiс Болдоров ассиныс складнысö. — Кыдзкö эз на ештö вайны виль запассö, а важыс эз вöв уна».

«Кытöн нö миян, кытöн? — чеччытöнняс думайтiс Лёня. — Мыля нiйö оз вашöтö?» Видзöтыштiс вывланьö, казялiс: эмöсь миян, эмöсь — «яккез» гудыртöны. Ого, öтiк «юнкерс» вон берездасис, адззис, мый кошшис. Но мöддэс, кöть и дзугисö кругнысö, эшö мöдпырся кежöны аэродром весьтас.

Кыдз бы эз паджö миян истребителлес, а немецыт эшö öтпыр вачкис аэродром кузяс. Конечно, вачкис не сiдз ни, кыдз мöдiс, а чапкалiс бомбаэсö кытчö шедас, и вöлись, дзик разбойник, кöдö костiалiсö, шентiс-пышшис аслас позö.

Стоянка тырöма тшынöн да бусöн, нырвуж пиньöвтö сотчöм дук.

Мича да гажа лунлöн и следыс эз кольччы: дугдiсö горавны ыбшаррез, öшис гажыс да югытыс, эз ло быдлунся порядокыс. Нельки штабнöй землянка дынын, кöдö öддьöн сöстöма видзис штабись писарь Айнбер, валяйтчисö маслоöсь трепиччез, цинковöй коробкаэз, гильзаэз. Мазурко, писарьлöн сера кычан, талун эз орс бырöм унтажугöн, а лöня пукалiс землянка юр вылын да нёджжасис юрсö чуклялöмöн. Зверьпиянок и то вежöртö, что тшыксис талуння луныс, дзугсис отирлöн уджыс — аркмис мыйкö öддьöн умöль.

Куимöт эскадрильялöн стоянка, позис висьтавны, вöлi дзонь. Эстöн öтмöдöрö шергйис-котрасис техник Варанкин, мыдзтöм морт, висьтавлiс, кинлö мый керны. Кынымкö солдат мунiсö зыррезöн — нiя тэрмасьöны лöсьöтны бомбаэзöн жугдöм полоса: эд чожа бертас эскадрилья, а пуксьыны некытчö.

Варанкин казялiс Лёняöс, висьталiс сылö:

— Чу, локтö машина, тэ кыскан сы вылын ранитöммесö, сэтчинiсь запчасттез ваян. То эстöн быдöс гижöма, — и мыччис бумага. — Вежöртiн?

— Вежöртi, — шуис Лёня и вöлись казялiс, что нем эз вежöрт: кытöн ранитöммес? кыныма? кытчö нiйö кыскыны? А Варанкинлöн баитöмыс кылiс ни кытöнкö сай дорас — мыйкö шумитiс радисттэз да электриккез палаткаын.

Раз тшöктiсö мунны, дак колö лöсьöтчыны. Лёня мунiс землянкаö, медбы кольны книга да висьтавны аслас механиклö, кытчö сiйö иньдöны, и панталiс Сабирöс: сiя куйлiс кыдзок увтын и небурика ружтiс. Сылöн юрыс каттьöм чышкöтöн, чужöмыс бледся-блед.

— Тэ мый, Сабир? — Лёня сувтiс механикыс дын пидзöс вылас. — Тэнö ранитiс, да?

— Пуля павкис — Сабир кок йылiсь пöрис, — дженыта висьталiс Сабир, кыввесö дзугöмöн. Сiя вöлi башкир, рочöн бура эз тöд и часто басниас пыртлiс ассис кыввез. — Лазарет колö — машина абу. Ситков кулö, Айнбер горзö....

— Эм машинаыс, Сабир. Ме часöт вайöта сiйö.

— Вайöт, Лёня, вайöт.

Машинаыс вöлi важ, но сöстöм и быдлаöт дзонь, ежели не лыддьыны жугалöмöн нöитчöм капот да пуляэзöн писькöтлöм борттэз. Шофёр, мыгöрнас челядь кодь, котрасис пичик моз и адззис быдöс, мый колiс: öтiклаись босьтiс ватнöй чехоллэз, мöдiклаись — важ паськöм, куимöтлаись — ранитöммеслiсь вещмешöккез да бушлаттэз. Быдöс этö нiя Лёнякöт чапкалiсö кузовö, ольсасисö небыта и сэтчö водтöтiсö садьтöм Ситковöс, горзiсь Айнберöс, чöлiсь Сабирöс, а нёльöтыс, армейскöй газетаись корреспондент, небура ранитöм киас, пуксис ачыс да шуис Айнберлö:

— Терпитышт, приятель, эн маит асьтö весись. Писарь дугдыштiс никсыны-горзыны, горöтчис сылö паныт:

— Тiянлö, ёрт командир, кокнит баитны, кöр кинытö небурика павкöтiс. А менчим кынöмöс, поди, быдöс резьöтiс, дак терпит-ко! Этö колö вежöртны, ёрт командир...

Айнбер эшö мыйкö баитiс (сылöн басниыс кузь, кыдз поплöн ыджыт лунся молитва), но машинаыс вöрзис, и Лёня эз понды вежöртны нылiсь баитöмнысö.

Туйыс вöлi кöс и юж, но нырока: öткö, май вылас часто зэрасис, а мöдкö, сэтi мунiсö öддьöн уна танккез да быдкодь машина. Кыдзкö шофёрыс вöлöма кужись да добрöй: и перытакодь вашöтö, а оз и зэгнитышт, дзик натодиль велöтчöма шогалiсь отирöс кыскавны, и час бöртi ранитöммесö Лёня колис лазаретö да прощайтчис ныкöт. Сабир öнi нач чочком лоис, кыдз юр вывсис чышкöтыс, и синнэсö сё куньöмöн видзис, а может, и садьсö öштылiс.

— Веськав перытжыка, Сабир, — Лёня кутiс сылiсь кисö да кокнитика жмитыштiс. — Дыр пондан куйлыны — Берлинсö тэтöг босьтам.

— Веськала, веськала... Юöрт гортö, ежели мый...

— А кытчö гижа?

— Гиж: Башкирстан, Бижбуляк... Сэтчин Гульфия-апа, малайка Назир, Гиззат, Нургали, Сулпан... Он вунöт?

— Шибаева Гульфиялö, сiдзкö? Ог вунöт. Да тэ ачыт гижан, Сабир... Кыдз веськалан, корсьы бöр миян дынö, — тэрмасьöмöн баитiс Лёня да чожжык петiс лазаретсис, медбы не мыччавны йöзыслö ассис синваэсö. Жаль, öддьöн жаль лоис мортсö. Джын год только и олiсö сыкöт öтлаын, а эта мымда бурсö сысянь босьтiс: бур мастерöн лоис, мирсö сы кузя паськытжыка казялiс, олансö пондiс ёнжыка вежöртны. Роднöй айыссянь сымдасö эз кывлы, кыдз эта добрöй мортсянь. Конечно, Сабирыс — грамотнöй, а Лёнялöн айыс кык год велöтчöма... Кытöн сiя öнi, ловья ли — некин оз тöд. Гижисö тай — öшöм кытчöкö: может, пленö шедiс, может, бомбитны сюрис...

Öбед бöрын, мыдзöм да бусöсьмöм, дзик туйдорся бабашорика, Болдоров локтiс эскадрильяö. Эстöн öнi вöлi югыт и жар, а руыс эшö сьöкытжык — сотчöм дукыс дынö содöма эшö бензин дук. Бензиннас, натьтö, оружейниккез миськалöны пулемёттэз, а может, и кинкö мотористтэс коласiсь заправитiс самолётсö баккес вевдöрöт.

А гöгöр лöнь, дзик могильникын. Этшöмыс овлö сэк, кöр кытшöмкö экипаж оз берт гортö. А талуння лöньыс сысянь, что бомбитiсö аэродромсö и ранитiсö куим мортöс. Эта тожö сьöкыт лун.

А может, кытшöмкö мöдiк нёштöм дело?

Быдöс правдасö сылö висьталiс фанера лист, кöда öшалiс паськыт дуб увтын. Эта лист вылын вöлi гижöмась куим ним:

Капитан Чалкин

Сержант Войлоков

Ефрейтор Калинник

Абу бертöма сизимöт номер и шедöма вийны Семашкинлöн стрелок, кöда кольöм неделя вылын локтiс школаись.

Талун асывнас Лёня кольччис механиктöг, а öнi — звеноись командиртöг. Солдат-сирота, позьö шуны, лоис.

Баитiсö, что сорок третьöй годас немецсö ылö вашöтасö, может пö, и граница сайöдз шентасö. Но вот и июнь ни пондöтчис, а Курскыс, капитан Чалкинлöн гортыс, кытöн мортыс мечтайтiс пантавны Первöй майсö, эшö оз на тыдав.

Не чожа, не чожа, тыдалö, эталö лоны...

Столовöйын Лёня тэрмасьöмöн дзимлялiс ассис öбедоксö, локтiс горт землянкаас. Сэк жö пырис и замкомэска, ён да жагöв, но чорыт вира морт. Сiя тшöктiс оружейниккесö недыр кежö чапкывны уджнысö и, кöр пуксисö быдöнныс, пондiс баитны сувтсöн, кöть и сетiсö сылö пуксьыны патроннöй ящик.

— Талуння бойын мийö öштiм куим мортöс, и куимöс жö кыскисö лазаретö. Но эм приказ: кык час бöртi эскадрилья мунас штурмуйтны переправа да Курск дынiсь аэродром. Кадыс етша, отирыс етша и отсöтсö видзчисьны некытiсь. Тiян задача — бытшöмика лöсьöтны оружие. Кылат: бытшöмика! И ме кора тэнö, старшина Студяк, кыдз техникöс керны быдöс сiдз, кыдз вöлi висьталöма. Аслат синнэзöн и киэзöн пешлан быд установкасö, быд снарядсö, быд взрывательсö. Эта вежöртана?

Студяк, сорок гöгöр годся украинец, тошсялöм да мавтчöм чужöма, шуис негорöн, дзик ас пондасис:

— Патроннэз етша. А бомбаэсö соткаэс туйö пятидесятнöйöсь вайисö... И морт-мöдöс бы сетлiт, кык сутки, позьö шуны, шоччисьтöг.

— Ачыт тöдан, Студяк, что абу отирыс. Лётчиккес аэродром лöсьöтöны, и мотористтэс сэтчин жö. А сэсся кинöс?

Студяк тöдö, что некинöс босьтны, да нарошно корö, медбы сылiсь эз босьтö кинöскö. Да и сiйö тöдö, что сёравно сылiсь öтiкöс босьтасö. Мотористöс эд пулемёт саяс он пуксьöт, кöда нем оз авйы.

— Эм эшö мöдiк приказ, — шуö замкомэска, — механик Шибаев туйö сувтöтны Волковöс и öтiкöс босьтны Семашкин дынö стрелокöн.

Студяк сьöкыта ловзисис, бöра негорöн пондiс баитны:

— Да эд абу менам отирыс! Кинöс? Но кинöс? Ме пöрисьöв, Ильялöн — язва, Митька — пакля киа. Нысянь и му вылас уджсö он ни кор ладом, нетолишто кымöрö иньдыны...

— Болдоров эм, — горöтчис замкомэска. Студяк сэтчö шуис:

— Дак сiя челядь эшö, вермас боевöй техникасö тово керны...

— Мый керны? — юалiс замкомэска, и Студяк серöм пыр висьталiс:

— Марайтны... Эз на эд лэбавлы. Оружейниккес вак-вак серöмтчисö, а замкомэска öбидитчöмöн висьталiс:

— Часöт, старшина, некöр серавны. А лэбалiс али эз, мийö асьным тöдам.

Эз вермы видзсьыны и Лёня, сiя дузгыльтчöмöн шуис:

— Весь, старшина, сiдзи думайтат. Ме эшö гортын, Кудымкарын, планёр вылын лэбавлi... Вот сiдз, — и гöрдöтiс ныр йылокöдззас. Гöрдöтiс сысянь, что первуись Студяклö паныт горöтчис.

— Сiдз и гижам, — шуис замкомэска, — что талунсянь ефрейтор Болдоров лоас воздушнöй стрелок. Час бöртi штабын инструктаж... Но, öнi уджалö.

Замкомэска мунiс, а Студяк пондiс видны-йывдыны Болдоровöс:

— Бöбöв тэ, Лёнька, тьфу, — сьöласис сiя. — Геройöн мöдан лоны али овны абу охота? Тэнö жö мöдi жалейтны, а тэ, дзик мина: раз и ып потiн... Но и мун! — сiя морос кармансис кыскис щуп да пондiс меряйтны затворись колассэз.

Недолыт лоис Лёнялö старшинаыс баснисянь, но öнi сiя нем эз шу паныт. Может, былись эз ков вöзйисьны? Митя да Илья, тыдалö, тожö оз ошкö сiйö. Поди, шуöны, что сьöкыт уджсис пышшис.

Илья, кöда прокод баитлiс шоча, но прокод справедливöя, сэтчö горöтчис:

— Весь тэ сiйö, Харитон, видан. Бура керö зонкаыт. Ачыт думайт-ко, мый лоас, ежели тэ он мун, ме ог мун, сiя оз мун. А?

— Ась аэродромнöй ротаись корасö.

— Да нiя разь велöтiсö пулемётсö? Нiя разь кужöны лыйсьыны? Эх тэ, техник!

— То тай гореыс — пулемёт озö тöдö! — малыштiс щупнас уссэсö да серöмтчис Студяк. — Тэ дыр я велöтiн?

Илья эз кывзы сiйö, баитiс ассис:

— Кöбы верми, дак ме пушкаэтö эг матегав бы. Маласин бы эстöн öтнат, Харитон, кыдз дзутоккес дынын нёнькаыт.

— Вот сiя и эм, Илья, что некинлö ни тэ он ков. Висьтав спасибо Студяклö, что сiя, добрöй хохол, видзö тэнö — вежöтöмсö, кöстiсьöмсö.

— Спасибо колö? Лöсьöт пилоткатö — тыр тэча.

— Иньытлö запты, может, миронöс тэтöг адззас. Абуöсь тай, шуан, челядьыт, — ствол пытшк нёджжалiкö изгаляйтчис Студяк.

— Медбы тэнат эз адззы. Мыйкö тай шоча пондiс гижны да, — гарйыштiс Студяксö Илья.

— Но-но! — лöгöн дзар керис Илья вылö Студяк. — Тэ ырбыльт, да нёджжасьлы!

Митя, кузь чужöма мужик, кытшöмöс отирас шуöны ярушник рожаöн, шынь серöмтчис да шуис.

— Кывзö, öтiк притча висьтася... Оласö-выласö хохол гозъя. Мужикыт миян кодь жö дыш вöлöм и некытчö абу петавлöм гортсис. А иньыс то кино видзöтö, то собраннё кывзö. Кыдзкö лекция коста виль кыв кылас, а оз вежöрт, мый сiя лоö. Но и юалö жöникыслiсь: «Микола, висьтав, мый сэтшöм агрессор?» «Агрессор — этö... кыдз бы тэныт висьтавны... Вот ежели ме кута да ветла чужöй инь дынö, то лоа агрессор». «А ежели ме чужöй мужик дынö ветла?» «Но-но! Нагайкаыслiсь кöрсö вунöтiн ни?»

Бöра серöмтчисö быдöнныс, нельки Студяк рыз-рыз керыштiс да рамыника, кыдз и частожык баитлö, висьталiс:

— Давайте, челядь, тэрмасьны. Чожа бомбаэз да эрэссэз ваясö, нiйö колö лöсьöтны. А тэ, Лёня, мун котрась стрелоккес дынö, юась нылiсь, кыдз видзсьыны вылын. Бура юась.

Нылöн, оружейниккеслöн, пыр этадз: сераласö-керасö öтамöд вылын, кöр и етшасьыштасö небурика — и бöра кутчасö ниртны-уджавны и кывтор оз горöтчö. Абу ни томöсь, тöдöны, что басниыс уджыслö не ёрт. А удж нылöн ыджыт, важнöй — лöсьöтны оружие. А эта тöдат мый лоö? Бура лöсьöтан сiйö — эскадрилья судзöтас победа; умöля лöсьöтан — враг пондас радуйтчыны. Штурмовиклöн выныс оружиеын, сiя сы понда и лэбтiсьö воздухас, медбы кисьтны фашист чукöр вылö быдöс сiйö, мый тэчасö сы отсеккезö, öшласö борддэз увтас, сюясö кык пушка да куим пулемёт дынö оружейниккез. А штурмовикас тöрö не öтiк тысяча пуля да снаряд, не öтiк десяток осколочнöй да зажигательнöй бомба, реактивнöй снаряддэз, фугаснöй бомбаэз. Быдöс эталö колö бура уджавны. Кöр чöлö пушка да пулемёт — медперво бöрисьыс — штурмовик истребитель понда лоö мишеньöн.

Быдöс эта керсьö Победа понда. Но Победаыс эшö ылын, сiйöн быд мортыслö колö уджавны куим понда: и ны понда, кин куйлö госпитальын, и ны понда, кинлöн коскаэзныс сiсьмöны öтласа могилаэзын, кырассэзын, нюррезын, ва пыдöссэзын.

Лейтенант Семашкин йылiсь Лёня тöдiс етша. Кывлiс, что сiя сибиряк, быдмылöма детдомын, уджалöма кöрттуй вылын. Мыгöрнас — ошвийись, ветлöтö сьöкыта, валькыта; юрыс ыджыт, сьöд синнэс паськытöсь, синкыммес чунь кызаöсь. Кöр Сабир первуись казялiс сiйö, шуис: «Ай-яй, шайтан миян эз вöв — шайтан лоис. Фриц казялас сiйö — дыв пышшас». Болдоров эшö тöдiс, что самолётсö, кöда вылын лэбалö Семашкин, аслас деньга вылö керöтöма пöрись учительница и тшöктöма сетны сiйö медсмелöй лётчиклö. Краситöма самолётыс зелёнöй рöмöн, бокас гöрдöн гижöма: «Родина понда!»

Кынымкö минута Лёня баитiс стрелоккезкöт. Семашкин видзис сiйö джын час — вот и быдöс велöтчöм. Эта, конечно, öддьöн етша, но война немöн оз лыддись. Да и етша я сiя — джын часыс? Война костас джын часнас солдат командирöн лоö, джын часнас ротаэз öштöны, джын часнас быдса городдэз жугдöны. Ыджыт военнöй джын часыс, öддьöн добрöй и страшнöй овлывлö, кыдз талун асывнас.

Лёня Болдоров вежöртiс ассис медодзза уджсö — дозоритны немецкöй истребителлезсянь штурмовиклiсь тылсö. И кöр кольччис öтнас, нельки гижис, мед не вунöтны, кытшöм местаö инмöтчыны «мессершмитлö», «фокке-вульфлö». А кöр локтiс кад пырны стекляннöй колпак увтас да лэбтiсьны кымöрас — гырксö кизертiс: а вермас я сiя, Лёня Болдоров, тыртны ассис задачасö?

Пырис жагвыв кабинаас, лöсьöтчис местаас, кöртасис. Сьöлöмыс орсö, дзик барабан; сьöлöмыс и полö, и радуйтчö; сьöлöмыс и нетшкöвтчö вывлань, лöз небоас, кöда важын ни кыскö дынас, и оз тэрмась янсöтчыны муыскöт.

Кин висьталас, вермас я Лёня керны сiйö, мыйö велöтчис джын час? Некин оз висьтав. И нельки Семашкин эз висьтав. Нет! Семашкин висьталiс! Сiя шуис: «Öнiсянь, Лёня, мийö тэкöт кыдз öтiк морт: тэ — менам бöрланись синнэз да защита, а ме — тэнат. Давай öтамöднымöс пондам берегитны».

Этö колö вежöртны сiдз: тэ верман, Болдоров. Мортыс быдöс вермö керны, кöр сылö доверяйтöны, кöр сы вылö надейтчöны.

Семашкин сетiс команда вешшыны винт дынiсь Механик шыасис паныт, и мотор пондiс уджавны. Натьтö, заводитiсö и мöдiккес, но Лёнялöн самолётыс сулалiс медбöрас, и сiя эз адззы, мый керсьö стоянка вылас.

Минута мымда мотор уджалiс жагвыв, ровнöя, сэсся мымдакö дзик орсiс: то öдззыштас, то бöр дугдыштас, лöньсяс моз, бытьтö пешлö ассис вынсö. Но вот сiя пондiс визжитны — уннялöмöн, норöн, вынсьöтчöмöн. Эта шумын Лёнялö кывсис и горзöм, и победнöй гажа ванзöм, кывсис мортлöн чижьялöм, кöда овлö сэк, кöр морт лöсьöтчö вештiсьны обида понда.

Самолёт зэгалiс, вöрöтчис, чепсасис, орöтчис лэбтiсьны.

Бойö, чожжык бойö!

А Семашкин мыйкö эз тэрмась лэбтiсьны. Сiя жагвыв вöрзьöтiс местасис машинасö и сiдз жö жагвыв, туйсö бöрйöмöн, уйöтiс самолётсö кузь турунöт ыб шöрö, кысянь сьöрсьöн-бöрсьöн лэбтiсисö машинаэс. А лэбтiсис чожа, кокнита, и моторыс, кöть и чирыштöмöн, горалiс гажöн.

Вöлiсö нiя талун етша — только кватьöн, и вылын чукöртчисö чожа. Лёня, кыдз тшöктiс Семашкин, не только видзöтiс öтмöдöрö бокас, но и нёджжалiс мусö и юр вевдöрсö, кытöн не öтiк сувда лэбзисö «яккез». Ны

йылiсь эшö му вылас размöд баитiс Семашкин — медбы Лёня эз сорав нiйö немецкöй истребителлезкöт.

Штурмовиккез мунiсö невылына. Улын мелькайтiсö зелёнöй кушиннэз да вöроккез. Унажык вöроккес кытi сотöмöсь, кытi куштöмöсь — гöрдöтöмöсь, косьмöмöсь, дзик важ коростаэз. Мукöдлаас, тыдалö, пуэс мöдралöмöсь вужсорнас, перкйöм увьяöсь, йывтöмöсь — эта тожö войналöн удж. А ыджыт вöрыс, кöда тыдалiс матöжык фронт ладорас, вöлi дзонь. Сiйö торйöтлiсö кузь просекаэз да туйез. Öтiк туй кузя кыссьöны ордчöн кык визь-сунис — этö лежнёвка, вöр петкöтан туй, кытшöмöсь Лёня адззывлiс и горт вöррезiсь.

Самолёт лэбзис веськыта, ровнöя, сiйö эз шупкав тöлыс, кыдз «дуглассö», кöда вылын кöдковну Лёня лэбзьылiс пулемёттэзла. Этадз позьö уна час лэбавны. Ась павьялö самолётыс, а тэ пукав да нёджжась.

Кöть и бура нёджжасис Болдоров, а эз адззыв, кöр ны дынiсь янсöтчöмась истребителлес да куим штурмовик. Сiдзкö, нiя сибалöны фронт дынас ни. Сiйöн и оз тыдав улын не зверь, не пода, не отир.

Но вот югыт лентаöн свиттьöвтiс юок, и сы дорись Болдоров казялiс и машинаэз, и вöввез, кöдна кыскисö, тыдалö, пушкаэз, и отирöс. Этö миянiссес. А саясжык, ю мöдöрас, — враг.

— Сибалам цель дынö, — шыасис Семашкин, но голосыс вöлi дзик не сылöн: чорыт, кöс, деловöй. — Чожа пондам уджавны.

Болдоров тöдö, мый эта лоö: колö жугдыны ю весьтiсь пос и паздыны враглiсь пос дынö чукöртчöм машинаэз да танккез.

Самолёт чепöссис вывлань, янсöтчис ёрттэс дынiсь. Кöть и тöдö, что быдöс бура лöсьöтöм, Лёня эшö öтпыр видзöтiс, кыдз бергалö пулемётыс, кокнита я ветлö установкаыс, и öддьöн зорöна пондiс видзöтчыны ас гöгöрас. То улынжык, то вылынжык пондiсö потласьны зениткаэзлöн снаряддэз.

— Атакуйтам, Лёня, — висьталiс командир. — Видзсьы! — и самолётыс уськöтчис шульгаланьö, но секунда-мöд бöртi веськöтчис да сьöкыт изöн уйыштiс увланьö. Лёнялöн гыркыс сiдз и лэбтiсис вывланьö, кайис горш дынас, и сьöлöмыс шардiс. Секунда... кык... вит... Чу, мезмисö бомбаэз, а сэсся лöгöн сяркнитiсö пушкаэз да пулемёттэз. Машина дугдiс пикируйтны, лэбтiс нырсö вывлань. Норöн унньöвтiс мотор, самолётыс нетшкöвтчис кымöрас, жмитiс стрелоксö пулемёт бердас. Улын, пос дорас, кыклаын паськыт кольтаöн чепöссис тшын. Этö потiсö бомбаэз. Инмисö я нiя посас — эз тыдав: омöн пос гöгöрыс вöлi сайöвтöм тшын да бус везöн, кöдö лэбтiсö одзись штурмовиккез.

— Но кыдз, Лёня? Быдöс я бур? — юалiс командир да шуис: — Эшö öтпыр сöтам. Видзсьы давай. И нёджжась!

— Видзся, ёрт командир, видзся! — кöсйисис Болдоров.

Штурмовик бöра уськöтчис увлань, но Лёнялöн öнi эз ни кай горшас, а только öддьöн долыта пот муныштiс сьöлöмыс.

Öнi Семашкин перво чапкис эрэссэз, а самöй му бердас ни, кöр лöсьöтчис лэбтiсьны вывланьö, кöдзыштiс отсеккезiсь поснит бомбаэсö и кузь очереддезöн койыштiс пушкаэзiсь да пулемёттэзiсь. Улын, тшын пытшкас, пыкнитiсö виль биоккез — этö öзйисö эшö кынымкö машина.

Лёня видзчисис, что штурмовиккес куимöтпырся атакуйтасö переправасö, а Семашкин негорöн, кытшöмкö позялöм голосöн шуис:

— Öнi гортö. Гортö!

«Вот и бур, — радуйтчис Лёня. — Сiя нельки веськöтiс мыдзöм пельпоннэсö, нюжласьыштiс. — Эшö ешта и мамöлö, и Зоялö гижны...» — и сэтчö казялiс: ны сьöрö вöтчö истребитель — немецкöй Ме-109.

— Ёрт командир, бöраным «мессер»! — чирöстiс-горöтiс Болдоров.

— Пукав спокойнöя, Лёня, — шуис Семашкин, — и кер сiдз, кыдз ме тшöктi. Быдöс бур, öддьöн бур!

Самолёт пöрöтчис борд вылас да ыскöвтiс увлань. Лёня эз вежöрт, кытшöм бур йылiсь баитiс командирыс. Может, думайтiс кокнита пышшыны? Но «мессерыс» лэбалö перытжыка и бергалö кокнитжыка, сы дынiсь «илыс» чожа оз мун.

И быль, «мессерыс» бöра матын ни. Лёня адззö сылiсь кабинасö, адззö лётчикыслiсь паськыт гöрд рожасö и сылöн небурика пондöны дрöжитны коккес да киэс. Эшö матöжык бы колiс лэдзны, но кöр прицелсис крестыс вевттис фрицыслiсь нырсö да синнэсö, Болдоров нырыштiс гашеткасö.

Пулемётыс чöлiс!

Лёня эшö и эшö нырис гашеткасö — просто сiдз, метитчытöг, но лыйöмыс эз кыв.

— Ёрт командир! — быд вынiсь горöтiс Лёня, а голосыс сибдiс, öшис, и Семашкин, натьтö, нем эз кыв, а казялiс сьöрбöжсö да иньдöтiс машинасö вывланьö. «Мессерлöн» очередь шульыштiс-мунiс штурмовикыс бöж увтi.

А мöдöрсяняс сибöтчис мöдiк «мессер». Сiя лэбзьö ордчöнмоз, и бура тыдалö сылöн бокыс, кытöн рисуйтöма крокодиллöн осьта öм — пиннес кузьöсь, дзик финкаэз.

Семашкин казялiс и этö «мессерсö» да лэдзчисис вöр бердöдззас. Фрицыт эшö мымдакö лэбзис веськыта и кырныш моз уськöтчис штурмовикыс вылö. Лёня пöв синнас видзöтiс «мессер» вылö и сё кошшис пулемётiсь изъянсö. И вдруг казялiс: предохранительыс пöдана!

Сразу чулалiс повзьöмыс да öшöмыс, и öтiк секундаö Лёня ештiс чöвтны предохранительсö и прицел вылö кышавны враглiсь сералан рожасö.

Дженыта ёркйыштiс-лыйис Лёнялöн пулемёт, и немецлöн синнэс паськалiсö, дзик бöбöвлöн — лоисö кöш ыждаöсь.

Мöдпырсяс Болдоров лыйис тожö весь: «мессер» нетшкöвтчис бокö и вывланьö, а сэсся пондiс сибöтчыны мöд боксяняс. Öнi немецыс эз ни серав, а мыйкö, тыдалö, горöтлiс — öмыс эз и пöднасьлы. Может, сiя корö аслас ёрттэзлiсь отсöт? А может, оз тшöкты нiйö сибöтчыны матö да мешайтны паськыт öма крокодилыслö ньылыштны гöрд звездаа штурмовиксö, кöдалöн бокас жарöн сотчöны эна кыввес: «Родина понда!»

Немец сибöтчö перыта, вышитчöмöн. Вот сiя мыйлöкö бергöтыштiс самолётсö вывланьö, и Лёня лякöтiс сылö бур очередь. «Мессер» чепöссис вывланьö, керис «петля» и сунгисис улö. «Усьö, — казялiс Болдоров. — Усьö! Вот...» — и пондiс любуйтчыны аслас уджöн.

— Молодец, Лёня! — горöтiс Семашкин. — Ай да стрелок менам!

Но командирыс Лёнясö ошкис одзöв.

Му бердас ни, кöр, кажитчис, некытшöм вын оз вермы сувтöтны усян машинасö и сiя татшкисяс кыдззаинö, «мессер» вдруг дрöгнитiс да кокнита лэбтiсис вылö.

«Мунас гортас», — решитiс Болдоров и гажтöм синнэзöн пондiс кольлавны «мессерсö». Но горизонт дорас, кöр тыдалiс только каёк ыжда ни, истребительыс нетшкöвтчис öтлань, мöдлань, сэсся веськöтчис да пондiс лажмöтчыны.

Штурмовик вежис курссö, и Лёня синнэзö сидзис шондi югöр — неюгыт, надз: рыт ни локтöм!

— Пуксис «крестникыт», Лёня, — кылiс Семашкинлöн голос. — Миян ладорö пуксис.

— Мыля миянö?

— Ранитöм сiя, öшис...

— Лёня радмис: кöть эз уськöт крокодилсö, а пиннесö сылiсь лязiс.

Семашкин öтлаасис ёрттэскöт, и куим самолёт тури лёдзокöн иньдöтчисö асывланьö. Вит-квать минута бöртi мыччисис тöдса аэродром.

«А письмоэсö сётаки гижа, — решитiс Лёня, кöр штурмовиклöн колесоэс небыта павкисö туруна му бердö. — Кöть висьтася, кыдз нимлунö чулалiс».

ТЫРДОЗ

(дзар кер: Иньва дорись зон)

Пöрись Микаш, кöдö бура ни кöстöмась годдэс и нач чочкомтöмась сылiсь чирйиссьöм тошоксö, талун вайис станцияись не товар, а кыскис отирöс — ранитöм солдаттэзöс, кöднö госпиталь бöрсянь иньдöтiсö ны колхозö. Кöть и унасö он кор эна мужиккезсянь, но сё жö мымдакö отсаласö эшö. Вон сiйö, öтка синасö, позяс кузнецöн пуктыны нето кладовщикöн — сылöн кикокыс дзонь; а усiасö — бригадирöн: сылöн киэс извередитöмöсь.

Рыпкö-гöнитö Рыжко, волькыт туй кузя кокнита ыскöвтö додь, чирликтö-южöтö полоззэзнас.

Быдса неделя бимороз сулалiс, а талун, видзöт, небзьöтiс сiдз, что и шинельöн позьö доддяс пукавны.

Вот и ладно: Микашлö бур, и солдаттэслö бур.

Стариклö охота тöдны, кытöн воюйтiсö эна нёль мортыс, кöдна сы додьын пукалöны. Поди, как раз сэтчин, кытöн сылöн зоныс вöлi? Может, кöдакö кывлiс зоныс йылiсь?

Микаш чöлö: небытшöм вöрöтны энö мыдзöм да стрöйдöм отирсö, небытшöм дзугны нылiсь думаэсö. Микаш нiйö пуксьöтiс öддьöн паока, коккезнысö турунöн вевттис, мымда позис, аслас тулупöн каттис. Вот и ась сунасьöны, кытчöдз оз сайкалö.

— Дедусь, а дедусь, — шыасис пöвсина солдат, кöда пукалö додь нырас. — Висьтав-ко, кытчö миянöс кыскан?

— Кыдз кытчö? — дивуйтчö Микаш. — Кудымкарö, зонка, Кудымкарö! Разь эз висьталö тiянлö?

— Кудымкарö?

— Эн кывлы, небось, сы йылiсь? Эм сэтшöм город. Сiя медыджытыс миян — столица ли кыдз ли шуны.

— Кыдз нö эг да — кывлi! Ме эд велöтiсь, дедусь. Географ как раз. Столица и эм сiя тiян.

— Ну, округаным-ту... Коми округ миян.

— Вот и бур! — радмис солдатыс. — Мунам, сiдзкö, Кудымкарö, кöда дынöт котöртö Иньва ю — ыджыт да стрась басöк...

— Но-о, — то ли дивуйтчö, то ли ответ видзö Микаш. — Кывлiн эд, тыдалö, и сы йылiсь? Басöкöсь миян местаэс, гажаöсь.

— Ёрт менам нiя местаэзiсь вöлi,— сьöкыта ловзисис солдат. — Сэтшöм бытшöм зонка, дедусь! Вöлi, да абу öнi... Сё гöститны корис, кыдз войнаыс чулалас; пельняннез, шуö, уммытöдз сёям, чöскыт ырöш пöттöдз юам... — Солдат кыскис табак да бумага, юалiс: — Куритан, дедусь? Сэк жагöнжык лэдз вöвтö, а то киськассяс табакыс, — и пондiс каттьыны чигарка.

Ямщик лэдзис Рыжкосö шагöн, керис чигарка. Кöть и важын ни оз курит Микаш, а охота лоис пешлыштны солдатскöй табачоксö. Солдат öзтiс зажигалкаöн стариклiсь чигаркасö, сыбöрын палитiс аслас чигаркалiсь конецсö, размöд кыскис тшынсö да сетiс чигаркасö мöдiклö, кöда пукалiс бинтуйтöм киэзöн.

— А мый, ёртыт сiя вийны сюрис? — юалiс солдатлiсь Микаш.

— Вийис öтiк гад...

— Менчим мöйму, сорок первöй годö, зон вийисö, — висьталiс Микаш. — А Надежыс, внучаткаö, штабö сюрис, — рад шыöн юöртiс старик. — Тэ кытшöм местаэзын вöвлiн? Пантавлiн, поди, Кудымовöс?

― Кудымовöс эг кывлы, дедусь, ― не тэрмасьöмöн горöтчис солдат. ― А воюйтi ме брянскöй вöррезын, партизанскöй отрядын. Разведчик и подрывник ме. И Коля Четин ― Катшаöн ме сiйö шувлi ― тожö подрывник и разведчик. А мыля Катша, дак сiдз сiя серавлiс ― катша моз: гажöн, боёка, дзирыта. И катша кывсö ачыс велöтiс менö шуны. И велалi, кöть кылö дыр жö эз бергöтчыв, падмывлiс... Ох-хо-хо! ― сiя лэбталiс шапка пеллесö, пöрччалiс шинельыслiсь медвылiсь крючоксö да юалiс:

― Кывзан, дедусь, öтiк история висьтася?

― Висьтась, ― тшöктiс Микаш, ― туйыс дженытжык лоас. Солдат недырик чöлыштiс, видно, уськöтiс мыйкö тöдвылас, и жагöник пондöтiс:

― Öтiк арся рытö мийö Коляыскöт мунiмö разведкаö. Кыдз и колö, колим документтэз, босьтiм автоматтэз и пемдандорас мунiм. Патроннэзöн сэк зэлыт вöлi, сьöраным сетiсö етша. И кыдз нарошно ― пантасим карателлезкöт. А петiс сiдз. Вуджим мийö кöрттуй да расокöт иньдöтчимö посадланьö. Вöлi свищень ― кок йылiсь пöрöтö ― и эгö кылö, что поезд локтö. Эта кöрттуй кузя поезддэс шоча ветлывлiсö рыттэзнас ― партизаннэзлiсь полiсö, ― а сэтöн поезд. Сiдзкö, дона груз кыскö. А мийö, бöбöввез, минаэсö сьöраным эгö босьтö. А кыдз бы нiя пригодитчисö! Но мый керан, сiдз петiс дак. Да и кык кöчыс эд öтдруг шоча шедлö. И сэтчö тай кыдз гымгас, кыдз гымгас!.. Пуксьыштiм мийö кöз увтö, видзчисям, мый лоас одзлань и мый керны сэтöн миянлö: одзлань мунны али бöр бертны. Дырсö, конечно, нем думайтны, колö коккезлö волясö сетны. «Мунам, Лёнька, бöр, а то налькö сюрам. Посадас сёравно öнi он сюр, ― шуö Коляыс. ― Асъяойнас, буди». Но, чеччим, иньдöтчим бöр. И сэк жö автоматтэз сярзьыны пондiсö ― орöтiсö туйнымöс. Мийö бокö и ― давай котöртны, давай котöртны. Джын километр мымда котöртiм ― бöра автоматтэз сяркнитiсö, бокöттяным пуляэс дзингыштiсö. То тай мый сукмö! Уськöтчим шульгаланяс, неыджыт расокö. А немецыт ракетаэз öдззис лэдзавны. И вот öтiк ракета бöрсянь мийö казялiм мортöс: сапырнитöм-кутöм морос одзас кыдзок и сулалö, оз и вöрöтчы, дзик кынмöм пу бердас. Этö сiя, думайта, кинöс немецыс кошшö, кин поездсö нюрас иньдöтiс. Мöдiклö эстöн нем керны. А Коля сы дын ни, кытсалö сiйö, юасьö, а паныт шы абу... Ранитöм, думайтам, колö отсавны зонкаыслö. А кыдз вöрзьöтiм ― тушмыль усис. Водтöтiм гатш ― оз и вöрöтчы. Босьтi ме сылiсь автоматсö, пригодитчас, мыся, а сэтöн öтiк патрон абу. Коля шушкö: «Кулöм, мый пондам керны?» Пышшыны, мыся, колö, сэсся нем керны. Кошшис сiя кулöмыслiсь карманнэсö и, мый адззис, дынас босьтiс. А немецыт ракета бöрсянь ракета лэдзö ― дзик тöлiся ойö югыт лоис. И öтмöдöрын шувка-шовка лыйсьöны... Кужи бы, дак шырö пöртчи да мыр увтö пыри, медбы чулöтны нiйö минутаэсö.

Пуктi ме автоматсö вийöмыс морос вылö, и мийö уськöтчим сылань, кытöн дугдiсö лыйсьыны. Юрам дума: «Адззасö сiйö мортсö и сэсся оз пондö кошшисьны, а мийö гусьöник мунам эстiсь. Но судьбаыс мöднёж керис: эта свинцовöй кытшись мийö эг вермö петны. Да, эг вермö. И вот мый сэтiсь аркмис.

Вуджим мийö неыджыт шорок да каям мысок вылö. А сэтчö: «Хальт!» ― пон моз лявнитiс вöснитик голосок веськыт боканым, нач ордчöн. Дарсасим-усим турунас, а миян вевдöрöт чуйнитiсö пуляэз. Но эшö не сэтöн смертьыс вöлöма. Кывзiсим-керим, кытöн немецыс ― нем оз кыв, только свищень виззьö косьмöм ёгтурунсö. Коля чувйыштiс менö да пондiс кыссьыны бöрланьö, кытöн сьöд видзисö кусттэз. Ме сы бöрсянь. А сэтчö бöра ракета öзйис. Адззам: одзаным немецкöй солдаттэз. Сулалöны, дзик суслоннэз, автоматтэзнысö миянланьö иньдöтöмась.

Тыдалö, думайтiсö, что миян оружие абу. А Коляыс кыдз кожгас, кыдз кожгас!.. Ме öши, ме эг ешты.

Кöр кусiс ракетаыс, мийö чеччöвтiм шор саяс. Но сэтчö бöра öзйис ракета, мийö уськöтчим турунас. А одзаным горöтлiсö: «Рус, сдавай!.. Шнель сдавай!» ― лыйлiсö кымöрас.

Коля сылö: «На, бöжтöм гадина, босьт!» ― и шырзьыштiс автоматсис. И сэк жö бöрсяняным пондiсö увтны: «Рус, стоййать! Бегайт неполезно!» Коля шуö: «Берегит патроннэтö. Лэдз, ась матöжык локтöны, и вöлись вур! Нiя öнi оз лысьтö лыйны, мед ассиныс не павкöтны».

Адзза ме, что каюк миянлö лоö, и шуа: «Коля, чапкы документтэсö, кöднö вийöмыслiсь босьтiн». А сiя то ли эз кыв, то ли мый, шуö меным спокойнöя: «Чеччы, Сеня, мунам одзлань. Кувны, дак сувтсöн, морт моз».

Лэбтiсис сiя, коккез вылас чорыта сувтiс. Чеччи и ме, сыкöт ордчöн керси. И сэтчö нiя ракетницаэзöн миян кузя... Öтмöдöрсянь. Пышкайтöны ракетаэс, котрасьöны, дзик ловьяöсь, сотчöны турунас. Öтiк инмис Колялö чужöмас, палитiс синнэсö. Джöмдiс ёртö, бергалö местаас и горöтлö меным: «Бöрам керсьы, Сеня, бöрам!» И мийö сувтiм оча спина и ештiм ректыны автоматтэзнымöс!.. Да и миянлö дöнзис сэтöн. Ме смерть вылас рад ни вöлi... Охо-хо! Талисö даки сэтöн миянöс. Ог тöд, кыдз и нуöтiсö комендатураö... Синöс сэтчин кыскисö... и джын лолöс. Вот сiя войнаыс!

Садяси ме, может, ашынас, а может, сёрöнжык ― конюшняын валяйтча. Коля пукалö ни, одзжык садясьöма, но öдва поиктö, баитны оз вермы. «Сёравно виясö, ― шуö сiя, ― дак давай, Сеня, донöнжык оланнымöс лэдзам... И нем ог висьталö!»

Нуöтiсö менö кык ки коласын керкуö ― школа, тыдылö, вöлöма сэтöн. Бöрсяням и Колясö вайöтiсö. Пыртiсö ыджыт жырö, джодж шöрас сувтöтiсö. Пызан сайын пукалö офицер, а сы бокын сулалö полицай ― гöрд рожа. Лявгö мыйкö офицерыс ― гутэн-брутэн да шухер-махер сэтчин ― и гöрд книжкаокöн легöтчö. Но, лявгö сiя, а полицайыт менчим юалö: «Тэ, скотина, Поповский?» Не, шуа, полицайыслö, ме не Поповский. «А кöдалöн эта штукаыс?» ― мыччалö чуньнас гöрд книжка вылö. «Менам, ― шуö Коля, ― не сылöн». А эта вöлi солдатыслöн, кöдö вийисö ойнас, партийнöй билет. Полицай мыйкö висьталiс офицерыслö и бöра мыччалiс чуньнас Коляыс вылö.

«Иуде?» ― мурзьыштiс офицер да сувтöтiс синнэсö ёртö вылö, и Коля переводчиктöг висьталiс сылö: «Найн, русише...» ― «О-о, Попоффски... как это... рус монахен! Русс монахен ― коммунистен! Хе-хе-хе», ― серöмтчис офицер да шупкис Колялö синнэзас партбилетсö. «Я, их бин коммунист», ― шуис

Коля и мышкыртчис бы, мед лэбтыны билетсö, но киэс эд домалöмöсь. Офицер кватитiс пызан вылiсь пистолет и гымгис-лыйис сы юр вевдöрö, потолок увтiсь керö, и пондiс чирзыны: «Где партизан?! Где?!»

«Быдлаын, ― шуö Коля. ― И оз ков нiйö кошшыны ― асьныс локтасö... Лöсьöтö гроббез аслыныт, да и фюрернытлö. Вежöртiт?»

Полицай чочкоммис чужöм вылас, тöдчö, что оз лысьт вуджöтны Коляыслiсь кыввесö. А офицерыс видзчисьö. Но вот полицай висьталiс, и офицер лöгсяняс гöрдöтiс сiдз, что чочкомтор рожа вылас абу. Коля шынньöвтiс моз меным: эн пов пö ― смерться умöльжыкыс нем оз ло ― сiдз сiя одзжык баитлiс. Офицерыс сы коста невна сайкалыштiс, но сё пукалiс важ местас и, пистолетнас орсöмöн, чикралiс синнэсö. Дыр сiдз чöлiс, дзик вунöтiс миян йылiсь. Сэсся чеччис, чужйис стул кузя, пöрöтiс сiйö да иньдöтiс пистолетсö Коля чужöмö.

Чатыртчис Коля, юрсö вылынжыка лэбтiс, пыдынжыка ловзисис. Сы вылö видзöттöн и ме веськöтi косöс, мöдi сувтны ордчöн сыкöт, оча пельпон, но бöрсяням тойыштiсö прикладöн ― эзö лэдзö вöрзьöтчыны.

«Где партизан?!» ― чирöстöмöн юалiс офицер да бöра пондiс ляльгыны ас мознас. Полицай вуджöтiс миянлö: господин офицер лыддяс пö куимöдз и, ежели эта еврейыс оз висьтав нем партизаннэз йылiсь, вияс сiйö, кыдз понпиянöс... Мийö чöлам, а нiя видзчисьöны. «Айн, ― негорöн шуис офицерыс и керис öтiк оськöв одзлань; видзчисис öтiк секунда, эшö оськöвтiс. ― Цвай!» ― и бöра невна чöлыштiс. Ме тувдi местаам ― то ли повзи, то ли сьöлöмö сувтiс ― ог тöд, мый лоис. Коля, кöда öдва öшшис кок йылас, кыськö адззис вын и брынгис офицерыслö кынöм увтас. Но сэк жö укнитiс лыйöм: офицерыс ештiс нырыштны лыян крючоксö усьтöдззас.

Усис, кык кусiнь кöстiсьöмöн, офицерыс, а сы вылö пöрис менам фронтовöй ёртö...

Мый сэсся вöлi, ― ог тöд: камгисö юрбöрам прикладöн, и ме садьтöг уси. А садяси асланым партизанскöй лагерьын: сiя рытö, кöр вийисö Колясö, партизанскöй отряд босьтöма посадсö аслас кипод увтö.

Дзебисö Коля Четинöс гажа мысок вылö, мича юок дорö... Эх-хе-хе! Вот эд кыдз сiя овлö, дедусь! Эз вöв Колялöн партбилетыс, но сiя кулiс кыдз коммунист. И мийö сiйö дзебимö кыдз коммунистöс... И öддьöн бур, что ме муна öнi Кудымкарö. Да, öддьöн бытшöм! Кыдз только веськыштасö ранаэзö, ветла Коляыс деревняö да висьтася, кыдз сiя видзис асьсö врагыс одзын, лёк смертьыс одзын. И пукта поклон мамыслö, кöда быдтiс сэтшöм мортöс. И эшö висьтала: «Кытчöдз эмöсь миян сэтшöм морттэс ― матушка Русь оз сетчы некытшöм Гитлерлö».

― А кин шуö, что сетчас? ― боёка шыасис Микаш. ― Некöр оз! Четырнадцатöй годö ― эг сетчö, восемнадцатöйнас ― эгö, а öнi и подавно огö! Вот вöтламö немчурасö, мужиккес бертасö гортö ― и бöра лоас тырдоз!

― Лоас, дедусь, лоас! ― шуис солдат. ― Жаль только, уна отир озö ни адззылö войнабöрся тырдозсö...

Дата добавления: 2015-11-16