Или Медодзза тор, кöдö пöрись вöралiсь висьтасис ужин вотöдз

Эта лёквирыс шогмис кольöм тулысö, кöр меным сетiсö виль квартира. Сiя — спасибо керку кериссезлö — вöлi югыт, шоныт, гажа. Бытшöмöсь жö вöлiсö и мукöдыслöн, и олiссес ветлöтiсö сэтшöм мичаöсь, бытьтö год вылас нылö сетлöны куим отпускöн.

Но не быдöнныс ветлöтiсö гаж синнэзöн. Öтiк морт, казялi ме, пыр вöлi дузöм-гажтöм, дзик арся кымöр, и сё видзöтчис зеркалоö да бериняйтiс юрнас. Пукалö ли öшын увтiсь лабичок вылын, мунö ли рынокö — быд вит-квать минута бöртi кыскö писис зеркалотор, дзар керö сэтчö и вöлись — беринь да беринь.

Сiя мортыс — Софья Юрьевна, менам соседка. Уна год сьöрна уджалiс горторг складдэзын, олiс öтнас; пода туйö видзис бöжтöм хомякöс да кеньжакöс; тöв и гожум балкон вылын вердiс дудi чукöр. Öтпырись дудiэсö вердтöн нильдас да усяс ведра пель вылö и синсö писькöтас. Сэксянь и тшыксяс синыс да кусас мича чужöмыс, сэксянь и пондас видзны пиас зеркалоторсö. Да эд кöть мымда видзöт, дак нёштöмыс сё ни нёштöм.

Кытшöмкö рытö мийö инмим сыкöт тшöтш петны öтöрö и ордчöн пуксьыштiм доль и поперёг гижмалöм скамья вылö.

— Од я шогалö, Софья Юрьевна? — юалi ме.

— Ог.

— Мыйкö неладно?

— Быдöс ладно.

— А мыля пыр гажтöмöсь?

— А кытшöм пöрисьыслöн гаж? Да эшö öтiк синаыслöн?

— Сётаки мыйкö тiянлö оз тырмы, — сё кыска сылiсь ловсö. И сэк сiя осьтiс ассис тайнасö:

— Быдöс менам эм: и квартира, и дача, и деньга, но — абу жöник. Вот мый меным оз тырмы.

— И сысянь нырöн мусö тюкны? — кöрита сiйö.

— Сiя разь пустяк? А-а, тэныт не вежöртны этö. Тiян — политика да космос, да эшö утка лыйны, а что мортыслöн оланас главнöйыс гозъя олöм — сы йылiсь од думайтö.

— Не сiя главнöйыс, — пондылi сувтöтны соседкаöс, да только öддьöнжык öдззöтi. Öнöдз ме эг тöд, что эта небыт яя, öшöтчöм тшöкаа да рожабана инькаыт сэтшöм дёка да öда. Сiя строк сувтiс кок йылас, пондiс койны:

— Главнöйыс му вылас как раз сiя! Ежели бы не сiдз, дак мыйлö эмöсь курöггез да петуххез, мöссэз да пороззэз, инькаэз да мужиккез?

— Но, медбы род эз ор...

— Вот-вот! А тэ шуан — не главнöй... Эн думайт, дона сосед, что ме нем ог авйы. Ась ме и етша велöтчи, но сэтшöм отиркöт уджавлi!.. Экспедитор миян вöлi — полкöн командуйтлöма. Европасö шуч мунöма, Африка дорöдз километр-мöд только кольччылöма... Эшö студент Владька олiс — öнi попö велöтчö — дак созлöй учёнöй: быдöс, шуö, мирас керöм сы понда, медбы овны гозйöн да пиявны — и керку, и ольпась, и быд приборыс. — Сiя сярзис ловзисьтöг, öвтiс киэзнас, а медбöрын висьталiс: — Отсав, сосед, öтiк дело керны.

— Кытшöмö?

— А отсалан?

— Ежели бытшöмö...

— Стрась бытшöмö: Егор Ипатовичсö корлы гöститны. Ме деньгасö сета и сёянок запта.

Бöра диво меным: Егор Ипатович, куимöт подъездiсь лöсьыт старичок, Софья Юрьевна ордын овлö часто, и вдруг — гöститöт!

— А мыля не асьныт?

— Ме ордын оз сёй не оз ю. Женскöй стряпнясö, шуö, терпитны ог вермы. Тэ кисьтан сылö юны да стакан весьтас лыддьы то этö: «Локтö ме дынö сизим тöвчик, сизим турöп да нöбöтö менчим кыввезöс веськыта Ёгорушко сьöлöмö, сы жилаэзö, сы коскаэзö, ась сiя ме понда тöждö и косьмö, ась метöг оз вермы овны öтiк лун, öтiк час». Ме тэныт гижа сiйö.

— А может, асьныт ештат?

— Э-э, эн ни баит! — öвтыштiс сiя кинас. — Кöр миськася сы ордын, дак шоколадка али яблок мыччас и быдöс... А старичок сiя славнöй: рамыник, умнöй, сöстöм. И не покасливöй — оз курит.

— А может, веськыта висьталiт бы, что гöтрасьны...

— Вöлi ни басниыс, да шуö: нёштöм тэ, кривöй... На вот, гöститöт, — и сюйыштiс киам пятёрка.

Думайтi-кери и решитi: кытчöдз öтнам (инькаö мунiс зоннэс да ныввес дынö «гастролируйтны»), позяс и корлыны славнöй старичоктö. Коддзöтны ме сiйö ог понды и колдовскöй кыввесö ог понды лёбны. Мыйöн старухажугыт тöдас, кыдз миян рытыс лэбзяс? Винаöн сiйö кылöтам, лук сорöн ньылыштам.

Спасибо природаыслö, что шочыника Софьяоккесö ыставлö миян кодьыслö.

Адззи ме мог — ыбöсö замок лöсьöтны — и рочалi славнöй старичоктö. Локтiс, кыскис замоксис кöрттув йыв (ачым сюйыштлi), а сыбöрын бытшöма öбедайтiм, баитiм политика да космос йылiсь, и янсöтчим кыдз важынся тöдсаэз. А эта курöжокыт сэтöн и эм ни:

— Лыддьöтiн? — потан сьöлöмöн вашкö пель одзам.

— Кыкись эшö, — дзирыта шушка ачым. — Только сiя сы коста эз куйлы, а пукалiс креслоын. Но самöй плеш весьтас, бура, натьтö, сидзис.

— Ятнöя?

— Кыдз артист.

Софья Юрьевналöн нельки стекляннöй синыс ловья моз шоныта югйöвтiс, и сiя радувьяс сюйыштiс киам тришка.

Неделя бöртi вились локтiс ме дынö и гажтöма этадз баитö:

— Тыдалö, умöльöла лыддьöтiн, сосед. Эз и мыччась сэксянь.

— Ашын локтас.

— Оз! Писькöтны колö — и быдöс!

— Мый писькöтны?

— Синсö.

— Кöдö? — серала ме.

— Шульгасö, — серьёзнöя шуö старухаыт. — Сэк сiя тожö кривöй лоас и босьтас менö ас саяс. Эм тэнат, сосед, тöдса шпана? Сэтшöм шпана, кöда тульс, — сiя сьöд да чукыля чуньöн пурскис-чувйыштiс моросам, — и синбугыльыс абу!

— Ме эд не ны коласiсь...

— Конечно, не! Сiйöн и шуа: адззы! Сто сета, если корас.

— Сто?

— Етша? Кык сто ог жалейт.

— Юася инö, кошша, — чожжык мездiся сы дынiсь, а ачым думайта: «Ох и варыш — кузь гыжа! Ме тэныт абу ёрт».

Сiя жö лунö пырис миянö Овдокич, пенсионер. А ме кут да и висьтась, кытшöм удж меным вöзйöны.

— А мыйöн умöль? — радуйтчö сiя. — Мун висьтав, что эм шпана, кöда тырс — и синбугыльыс абу!

Эта баснисянь менам синнэз паськалiсö, а Овдокич сералö:

— Синсö ог писькöтö, а деньгасö босьтам. Невночки.

Рытнас Овдокич локтiс нач мöдiк обличчоа: лякöтöма тошок да усоккез — театрись тöдса мужик сетöма. Но мый, видзöтi-кери да и благословитi. И мунiс сiя Софья Юрьевна ордö. Старуха сетас «шпанаытлö» десятка да иньдöтас Егорушкоыс туй кузя — славнöй старичокыт как раз пистикавны репас. А Овдокич эта туй кузя мунас магазинöдз, босьтас вина да бертас ме дынö.

Чöскыта мийö юим даровöй винасö. И чöскыта сералiм — синваэз петтöдз. Но — чöскытыслöн оланыс дженыт.

Курыт оланöдз локтöм,

Дата добавления: 2015-11-16