ЧАЙДÖМ УВ

Арся лунö Ефим Вадорин локтiс гортас. Аннушлö, кöда пырис керкуас жöникыс локтöм бöрын, кажитчис, что керкуас лоöма югытжык. Инькалö кыдзкö эз и веритсьы, что счастьеыс, дзик воробей, пуркнитiс-пырис бöр сы оланö. Аннуш видзöтiс сы вылö и эз вермы орöтны синнэсö жöникыс чужöмсянь. А Ефим сё сэтшöм жö, невна буди ляпкалыштöма, чинöм мыгöрнас.

Казялiс солдат, кыдз кошшисьöны иньыслöн югмöм синнэс, меряйтöны сiйö, да пондiс висьтасьны.

— Сьöкытöсь эд, Аннуш, эна погоннэс. Адззан, кыдз нырыштiсö? — сералöмöн баитiс Ефим.

Инька гогинялiс юрнас да смекайтiс, мый бы эшö адззыны вильсö, кöда эз вöв Ефимын одзжык, война вотöдз. Но синнэс сё нiя жö — карöйöсь, ыджытöсь, и позьö кö сiдз шуны — небытöсь да рамöсь: оз бытшкö шучкöп мортöс и оз дзöрö, кыдз мукöдлöн. Ан коскаэс паськытöсь, чорытöсь да дорышаöсь, дзик тупика наковальня доррез. Вит год, быдса вит год эз вöв Ефим гортын, а чужöмыс нем абу вежсьöм. Только пыдынжыкöсь лоöмась кымöс вылiсь чукыррез да син увдöрись бородавка туйö лоöм гöпок, бытьтö павкöтöм кинкö белилоöсь чуньпонöн. Солдаткалö, кöда лун и ой кеймис, медбы жöникыс, ась коктöг, но бертiс ловйöн, öнi жаль лоис чöрс йыв ыжда öшöм бородавкаыс. Аннуш повзьöмöн, бытьтö öшис не бородавка, а мыйкö öддьöн дона, юалiс:

— А кытöн нö эстiсь?

— Осколок чепöльтiс, — серöмтчис Ефим.

— Ен-батюшко, кытшöм страстьыс!.. Но ась, öнi быдöс лоас бур. Ме тэнö ог сет öбидитны, некин и чальöн оз вöрзьöт, — воркуйтiс радсялöм инька и сiдз жмитiс жöниксö чорыт пельпон бердас, бытьтö эта жмитöмöн мöдiс вежтыны кузь кад коста чукöртчöм долгсö.

Аннушлöн медлюбöй зон Митю бордпавйöн пырис керкуö, гажöн горöтчис:

— Мам! Ме чери кыски... — и тувдiс местаас, кöр казялiс мамсö тöдтöм мужиккöт. Диво кутiс айкокпöв зонöс: пыравлiсö ны ордö мужиккез, но медбы жмитлiс кинöскö мамыс — некöр эз вöвлы.

Сулалiс Митю осьта öмöн, дзик сiйöн видзöтчис. Сэсся чериыс нильдiс кисис, а зонка петiс посöдзö.

— Эн пышшы, кага, айыт эд локтiс! — бöрсяняс горöтлiс Аннуш и боккесö клопöтöмöн чепöссис сьöрсяняс. — А мый, а мый!

Кöд коста мамыс кошшис Митюöс, Ефим ректiс ассис солдатскöй мешöксö. Сыын унаыс эз вöв: кузь кистиа подшалок, недона ситец, чачаэз да гöснеч. Кöр Аннуш пыртiс Митюöс, айыс мышкыртчис сы дынö:

— Здорово, мужик! Дак вот кытшöм тэ: эг на эд адззыв! — и босьтiс киас. Сэсся малыштiс размöд юрсö, пуксьöтiс лабичö да сетiс учöтик гармоння. — На-ко везöвт. Да эн пов, эн пов!

Но Митю полöмöн босьтiс гармоннясö, сайöвтчис мамыс сайö да пондiс чышкыны кинас пельбоксö, кыт тёритiс тятюыс тошсялöм тшöканас.

Сэтчö пырис шöрöтыс, Гриша нима, кöда ассис нинкöммесö киас видзис — сё пö кокнитжык котöртны! Сiдз тэрмасьöма, кöр кылöма айыс локтöм йылiсь, что сумкасö партаас и кольöма.

Волькыт, кузьмöса юра да пемыт вира зонка зыртчис айыс бердын, корис наган, пурток и мöдiк чачаэз. А кöр айыс сетiс нiйö, Гриша пöв кок вылас котöртiс деревняö. Недыр мыйись локтiс пажнайтны Степан. Сiя жагвыв осьтiс воротасö, сьöкыта шагньöвтiс оградаас да мыйлöкö вöйыш керис öтöрас. Сэсся кыскис ремень сайсис чер, кышалiс пятанас улiсь тасас и лэбтыштiс воротасö вывланьö. А кöр босьтiс черсö, нитшсялöм радза ворота öшöтчис бöр му бердöдз.

— Не ворота, а няридз. Воть оз öшшы, ― баитiс Степаныс, бытьтö норасис курöглö, кöда пытшын вывсис кокалiс сю туссез. Сэсся зонка пуктiс черсö гу пос вылö, угöв сайись кыскис табак, крöшитiс кырымас нюдзкодь листок да керис чигарка.

— Тэ мый инö, Стёп? — кылiс посöдзсянь тöдса голос. Степан дзебыштiс чигаркасö сосас, но сэк жö сюйыштiс öмас: öнi пö ачым работник и повны нем. Вöлись жаг походкаöн, кыдз велалiс тальны чорзьöм, изöртчöм мусö Карко бöрсянь, поперегалiс оградасö да сибöтчис айыс дынö:

— Локтiн?

— Локтi, Стёпа, локтi, — и Ефим жмитiс бердас зонсö. Стёпа ляпкöтчис блед чужöмнас кöдзыт медаллез бердö...

Аннуш лöсьöтiс öбед. Сэтчö жö вайис четушка. Ефим тöдiс, мый сыын, кöть вевдöрас нем абу гижöм: спирт. Сiя сулалiс сё сэксянь, кыдз хозяин медбöрьяись сёйис эта пызан сайын. И сё сымда жö спиртыс, разь паньетш чиныштöм, пакмöм личытöв пробка увья. Пызан сайын вöлi гажа, дзик праздник коста, кöть и вöлi арся буддень, кымöра буддень, кöдö бы Аннуш эз веж некытшöм мича, гожся праздник вылö.

Этадз и пырис счастьеыс Аннуш керкуö и пукалö сыкöт ордчöн, оча пельпон... Счастье, войнасянь мыдзöм солдаткалöн ыджыт счастье! И абу на солассьöм тшакыс — курыткодь ниндуллез да синявкаэз — и чизыр шöма, няпчика няньыс, и курзьöм кöра постнöй виа картошка — быдöс вöлi талун чöскыт. Аннуш дугдывтöг висьтасис аслас олан йылiсь, сы йылiсь, кытшöм басöкöсь вöлiсö сюэс, мымдаöн усьö рудзöгыс, кыдз колхоз таво лэбтiсяс нуждаись.

Ефим кольлалiс мама-зонаöс ворота сайöдз: öтыс бöр мунiс вартны, мöдыс — кöдзны. Пыртöнняс кылiс, кыдз Митю пиксö гармонняöн. «Ась гажöтчö, — думайтiс Ефимыс. — Натьтö, етша чачаэсö адззывлiс. Эх, олан, олан!.. Но, шабаш! Öнi ачым гортын».

Зонкаок нюжлалiс зэлыт гармоння мехсö и мыйкö бобгис орсiкас. Айыс босьтiс Митюсö киас. Зонокыс, кöть и мыгöра, но öддьöн винерик и кокнит. «Бордтыв сьöкыта, — жалейтыштiс зонсö Ефим. — А коккес только чунь кызаöсь».

— Мый нö, мужик, сьылан?

— Нетуликасö... туна-тана гöрд вешьяна, — шынньöвтiс Митюыс да сiдз гажöн, бытьтö душаыс серöмтчис — кыдз кужöны шыннявны только челядь. Ефимлö усис тöдвылас жельнöг цвет, кöдö казялiс сiя первöйся колхознöй гожумö Гортлудiсь.

Кыдз эд петiс: мымда Ефим талис сiйö межасö, а жельнöг цветтэсö эз казявлы. А сэк... сэк панталiс Аннушöс, лапыт пельпона да кыз кикока нылöс, кöдö тожö мылякö эз казявлы одзжык. Сулалiс Аннуш жельнöг дорас и кыйис чикисяс цветтэз. Ефим сибöтчис сы дынö да юалiс, мыйлö кыйöны цветтэсö чикисьö. Нывка дзар керис Ефим вылö, горöтчис: «А сiдз», — и шынньöвтiс. Шынньöвтiсö сылöн вазылькья, дзик лысва тёппез шондi югöр увтын, сьöд синнэс, ляпкöса ныр йылокыс, быдöс чужöмыс. Пот мунiс Епалöн сьöлöмыс, дзик мыйкö шардiс морос пытшкас...

— Тятю, а тöн стынсö тöв пöрöтiс, — бергöтiс думаэсö Митю. — И мöс пыралiс. Мийö вашöтiм сiйö, и столбсö пыкöталiм. А Стёпыс керрез вайис.

— Кыт жугалiс?

— Лок, мыччала.

Ефим петiс огородечö. Виль вирöдз вылын быдмис чукыля заа капуста да пöдтурун. Стена вылын, гид крыша увтас, öшалiс пуовöй пиня. Сiйöн Ефим эшö челядь кадö волькöтлiс этö огородечсö. Кык борозда пöлöн сулалiсö бобиэз, дзик солдаттэз веськыт шеренгаэзын. Ны конеццезын, бытьтö командиррез, сералiсö веж гöгляннэзöн подсолнуххез. Зырöн гöрöм виль пласт вылын пукалiсö паськыт сёртниэз да сяр мыччалiсö, дзик ошшасисö, веж, гöрд да лöзкодь боккезнысö. Саясжык, лог дорас, сулалiс баня да сьöд видзис важмöм ямалöн вевттьытöм öмыс. Быдöс этö кытшöвтöма стын, важ да шоч. Кынымкö прясла видзсьöны только пыкöттэз вылын. Стёпа адззис этö изъянсö, и прокыс судзис бы, да киыс эз сибав: сё некöр вöлi.

Смекайтчис-керис Ефим и горöн, дзик команда сетiс:

— Давай, мужик, уджавны!

Ефим петкöтiс чер да пила, а Митю вожасис зыр ороп вылö да вашöтлiс «вöвсö» юктавны. Карко некыдз бы эз кай крут керöсас, мугис. Митю вартлiс сiйö, а «вöв» зурасис да гöрдлiс и пышшöтiс ямщиксö амбар дынö. Сэтчинсянь вöлись тöвчикöн пöльтiс-кайис айыслань. Ефим видзöтiс эта орсöм вылö да гусьöник китшкис-сералiс. Митю сибöтчис айыс дынö, тпрукнитiс-сувтöтiс «вöвсö» да норасис:

— Сiя, чукыля дышло, велалöма ни: кыдз юас, сiдз и зöр корö. Вот ме сiйö верда, кыдз сюйышта öмас сухарсö, — и пельышсьöм ороп конецас сюйыштiс небытик шатёк.

Арся рыт казявтöг лэдзчисис деревня вылö, мöдкодьсьöтiс йöррез, керкуэз, пöдтiс мичсö аслас пемытöн, гусялiс син одзись и кельыт кыдззез, и гöрд розъя рябинаэз и сайöвтiс крут лог. А öтöрас лоис бытьтö дзескытжык и кöдзытжык, матынсялiс ыб вылiсь машинаэзлöн шы.

Вадоринлöн вазис спинаыс, лякасис голя бердас гимнастёрка сикöджыс, но шоччисьны вöлi некöр, и сiя пондiс уджавны эшö перытжыка. А час бöртi кертöм стыныс кольччис только ыбöс пасьта.

Деревняын пондiс кывны баитöм, телегаэзлöн дзуртöм: отир бертiсö уджалансянь. Ефим дынöт первöйöн мунiс Степаниха, бригадаись кладовщица. Ордйис ни вöлi Вадоринöс, да казялiс, кыдз тöдтöм мортыс тэрмасьöмöн кватитлiс стынник, сюйыштлiс сылiсь йывсö вевдöрись потш сайö, пидзöснас пыкöталöмöн кышавлiс дынсö улiсяс. А киыс кутiс ни виль стынник, перыта сувтöтлiс одззасяыс бердö. «Кытшöм чож, — дивуйтчис инька. — Э-э, да эта эд не Стёпыс! Не айыс я локтiс? Муна, ноко, видзöта».

Стынкерись как раз бергöтчис сы ладорö, и инька тöдiс соседсö.

— Здорово, Ефимушко! — ныр пырйöттяс нюжöтiс Степаниха, сувтöтiс му вылас туисоксö да мыччис потласьöм кисö. — Мыля нö менчим эн вайöт, колин йöз сторонаас?

Ефим одзын сулалiс шöрöт мыгöра ён инька. Вадорин сразу жö тöдiс, кин сы одзын, и негорöн висьталiс:

— Эз берт Степаныт...

― Вот и ов öнi, кыскы проктöмыс хозяйствосö, — и Степаниха лэбтiс запонсö чужöм дынас.

А Ефим думайтiс: «Сё сэтшöм, абу и пöрисьмыштöм, некö. И абу вöснямöма: суслон суслон и эм. А, натьтö, нёльöт десяток тыртö».

— Пырав инö, Ефимушко, висьтась, — корис Степаниха и дюттясьöмöн саясис пемытiнас. А керку öшынö ыксiс Митю, кытсалiс дынас айсö.

* * *

Колхозын сулалiс пыль страда. Сэсся, мымдакö вöлi эшö кöдзтöм. Ар тэрмöтiс отирöс, некинлö зника эз сет. Асывсянь часто буситлiс поснитик зэрок, лун кежас дугдывлiс, рытнас мыччасис вежöтöм шондi, а ойнас гöняйтiс сивко-пуж. Локтiс сэтшöм кад, кöр луннас куим погоддя петавлö. И отир тэрмасисö, эз видзчисьö буржыксö. Тöдiсö, что ны понда мöдiк оз кер. Инькаэз, кöдна сё эшö керисö унажык уджсö, шоччисьлiсö только пыд ойшöрнас. «Бертасö мужиккес — сэк и шоччисям», — сё баитiсö öнöдз. Но вот и локтiсö мукöдыс, но уджыс эз чин. Вот и талун бригадир котрасис деревняöт, кошшис уджалiссезöс ой кежö: амбарын шоналiс шогдi, колiс öнi жö мыйкö керны. Он кö вöрöт — сотчас. Вот тэныт и нянь!

Думайтiс-керис и кежис Вадорин дынö. Ефим ештiс только бисö кусöтны, а ковсис бöр чеччыны.

— Эн лöгась, Ефим, — перыта баитiс бригадир. — Тöда, что талун охота семьяыткöт лоны, шоччисьны туй бöрсянь. Но няньыс, няньыс тшыксьö! Этадз пессим сiйö быдтiкö, тшыгйöн олiм! Ог кö сiсьтö — чиг нянь пондам сёйны. А не косьтыны сiйö — пиннетö тув вылö öшöт.

И Ефим, и Аннуш этö бура вежöртiсö, тöдiсö, мый сэтшöм тшыг олан. Аннуш шы эз сет, кöр пондiс пасьтасьны жöникыс, крепитчис, кöть и вöлi невна öбидно.

Кузьой дас морт гöгöр куралiсö да кыскалiсö сюсö сушилкаö, öвиннэзö да горрез вылö. Медбöрья телегасö Ефим кыскис асывнас ни. Но кык керкуö сюсö эз примитö — косьтiсö ассиныс. Вадорин пырис Степаниха ордö, медбы бöр сетны сылö кольччöм мешöккесö.

Старуха, Степанихалöн мам, ештöтöма ни горсö, а внучатка лöсьöтчö школаö: Лида ветлiс дасöт классö. Степаниха юкталiс Ефимöс брагаöн, и лöсьöтчисö мунны, но старуха падмöтiс:

— Ю эшö да висьтась кöть, кыдз сiйö беднöйöс... Гижöмыт тай вöлi.

Ефим юис, чышкис кибöрнас уссэсö да сьöкыта ловзисис:

— Кыскисö миянöс Калининскöй фронт вылö. Локны ни пондiмö... Куйлам сыкöт, чöлам. Кинкö баитö: «Мый сiя, смертьыс? Кытчöдз ловья — эн думайт сы йылiсь. Овны думайт. А виясö — сымда и вöлi». Думайта: Эх, кытшöм кокнита сярзьö. Может, смертьыс öнi миян гöгöр ни чертитчö. Может, эстöн, пемыт небоас, а тэ лёбан... Вдруг вагонным йирка-ёрка сувтiс. Чеччалiм. Öтöрас — кöть синö бытшкы. Рознитчим кин кытчö. Сэтчö у-ух да у-ух бомбаэз. Матын керку öзйис. Адзза: би весьтас морт сулалö, столб бердö кутчисьöма. Степансö чайтi, сибöтчи. А сiя горöтлö: «Миян, миян кытöнöсь?! Гаддэз, ух, гаддэз!» — и грöзитö небоас. Сэк жö пондiсö ёркöтны зениткаэз, шныряйтны прожекторрез... Котöртi одзлань, а сэтчö бöра: у-ух да у-ух... Садяси югдандорас. Куйла кытшöмкö ящикын, дзик гробын. Коккезöс нырыштöма сов кульöн. Ордчöн баитöны женскöйез. Санитаркаэз вöлöмась. Отсалiсö меным сувтны, порошокöн юкталiсö... Кöр югдiс, тöдi: етша кольччöмась миян взводiсь. Солдатыс, кöда горöтлiс, сэтчö и усьöма кыминь. Öт сапог нырыс видзöтö столб йылас, а чикись гöпас чунь пасьта вира осьта. Öтiк воронка дорись адззимö чегласьöм винтовка. Номерыс — ХТ 211. Сiя вöлi Степанлöн...

Чигарка сотiс Ефимлiсь чуньпоннэсö, тырппесö, но фронтовик куритiс. Куритiс и висьтасис öтiк ой йылiсь — страшнöй ой йылiсь, кытшöмöсь сыбöрын пантавлiс эшö не öтпыр. Висьтасис Ефим, а син одзас сулалiсö ва окоппез, жугдöм керкуэз, повзьöм челядь да инькаэз. Адззис Ефим и ассис ёрттэсö, кöдна пуктiсö юрнысö роднöй му понда, но эз сетчö враглö. Да, нiйö, сылiсь ёрттэсö, позис вийны, но эз позь керны ныись раббезöс, эз позь чегöтны нылiсь волясö, победаö верасö.

Ефим эшö öтпыр сьöкыта ловзисис да босьтiс кепись-шапкасö. Сыкöт öтлаын петiс и Степаниха да кайис амбар дынö. Сэтчин Вадорин пыртiс кольöм мешöккесö, сетiс вöлыслö пличатыр тöвбöр да водыштiс сусек бокын чапкöм öн вылö.

Параська быдмис öтка нылöн. Олiсö шоныта: работниккезöс эз видзö, но туруналiкö да страда коста öтнаныс етша уджалiсö. Нывка быдмис кокнита, некöр киын и коса эз видз, эз мышкырась вундiкö. Кöр айыс и пондылас кытчö нуöтны, но мамыс оз лэдз: ештас пö коссö вöрзьöтны нето доймыны, а шогöтöсьсö кинлö пö колö? Мамыс сiйö не уджавны велöтiс, а жöниксайö лöсьöтiс, невестаö пöртiс. Нывка быдмис волькыт да статя и донсö аслыс тöдiс. Кынымкö тöв ветлiс школаö, сыбöрын öдöлейтiс котрасьöм да баняэзын пукалöм. Ефим кодьöмкöт шоча шыасьлiс, тöдчис аслас ровнякöт. А сылö ровняöн вöлi Васька, кöркöся волостнöй писарьлöн зон. Сыкöт и чулöтiс гажа рыттэсö. Но зонка мунiс служитны да вайöтiс сьöрас инька. Сэк нывка «бöбöтiс» гармоньщик Степанöс, чорыт мывкыда да пыр гажöтчись том мортöс, и чожа гöтрасисö сыкöт. Степан радейтiс иньсö да сiдзжö уджöтiс етша. Вельдыр видзчисис сысянь зонöс, а Параська эз и думайт пöртчыны мамас. Сэк вежöртiс Степан, что нем видзчисьны сэсся и босьтiс быдтас. Нылочкасö любитiс, кыдз ассис, пасьтöтiс-мöдöтiс, дзик аканьöс, берегитiс, кыдз ассис синсö. Кöр Лида вуджис кватьöт классö, лэбис война. Айыс мунiс...

Чожа деревняын лёк кыла отир пондiсö шушкöтчыны, что солдатка пö... Да мый только оз и лёбö, кинлöн кыв йылыс лудö, а быль я эта — некин эз тöд.

* * *

Кладовщица мыйкö гуддисис-керис сайись жырын да локтiс ыбöс дынö. Адззö: Ефим ланьтöма. Кытсöвтiс — оз саймы. Мышкыртчис, кутiс нырсö. Сэк вöлись Вадорин осьтiс синнэсö да чеччис. Шинель бöрыс куш ёг, бытьтö йикиын туплясьöма.

— Вай, ноко, пыркöта, — сералiс Параськаыс. — А то иньыт шуас, что кинкöткö орсöтчöмат.

— Висьтала, что тэкöт...

— Старухаыскöт нем ни орсöтчынытö: вирö сайкалöма ни.

— А ме шонта сiйö.

— Мун, покасник, — Параська буткис Ефимлö гора спина кузяс да тойыштiс одзсис. Ефим шамыртiс инькасö морос одзас да небыта тупыльтiс öн вылас.

— Ляпкöтан эд, ош...

Пеганко кылiс баитöмсö, сувтöтiс пеллесö да видзöтiс осьта амбарас: пöрись мерин видзчисис зöр. И кöр казялiс, что сэтчинсянь нем оз пельды, пондiс бöра бöрйисьны тöричаа тöвбöрас...

Аннуш жöникыс локтöм бöрсянь ровно томмис: и ветлöтiс кокнита, и некöр эз норась кос мыдзöмлö. А веськыт стенаö, ордчöн репродукторкöт, бöр öшöтiс ыджыт зеркало, вевдöрас кышалiс бранöй чышкöт и быд асыв сы одзын сынасис да кыйис баличаэз. Эта волькöтчöмыс гленитчис Ефимлö. Сiя видзöтiс иньыс вылö, шыннялiс öм дорнас да думайтiс: «Не весь, тыдалö, баитсьö, что хозяиныс дырни и керку стенаэс гажöтчöны. Сiдз и эм». Аннуш тожö адззис, кыдз жöникыс любуйтчö сыöн, и ассис пеллесö адззис.

Тöвбыт Ефим строитiс колхознöй электростанция. Эта удж сайын и чулалiс пурга-падераа кадыс да локтiс апрель.

Апрель... Кин оз тöд этö тулысся месяцсö, кöда немöн оз вачкись мöддэс вылö! Ефим пыр адззис сыын природалiсь мöдкодь, аскодь приметаэз, лыддис сiйö медвынаöн, мулiсь спасительöн. Зэлöтас мусö звездаа морозыс, дзик лöсьöтчö кынтны быдöс ловьясö, орöтны оланлiсь жиласö. Сэк и сибöтчас голубöй апрель и кутчас вермасьны тöвкöт. Перво несмела, бытьтö ыжмалöмöн, дозыляйтö морозсö только луннэзнас, а ой кежö бöр лöньсяс да öктö, öштöм вынсö. А морозлö сэк воля: лэбтас ассис нетыдалан нöшсö да укнитас-сöтас сiйöн апрельлö поперёк туша кузяс. Мöдыс вöрзьöтчас, ыш ловзисяс да бöра ланьтас. Кывзыштас, норовитöв-керас морозыс — и вились аслас удж бердö. Кöрталас апрельлiсь кикоксö, дöвьялö сы вылö, лöсьöтчö пöдтыны — кынтны кöдзытнас. Но оз ешты нем керны чавмöм жаг дед дженыт ойкöлöн — сэтчö и югдас. И апрель бöра пиньöн и кырымöн кутчисьö ловзьöтны кынмöм мусö: пöльыштас — ушкас ыб вылö — чармöм лым сöнöгö пöртчас; пöльыштас ю вылö — юлöн вевтöсыс йыжольö пöрас, лолыштас расокö — лапья кöз уввез чапкаласö вывтсиныс сьöкыт лым каббез, саймас дзескыт гуын ош, пондас сынавны-куштыны тэлляинын ассис боккесö кöч, пондöтасö тулысся орсан дозмöррез. Апрель... Сöдз руа голубöй апрель... Ефимöс, кыдз только шуралiсö лунпоката ыббез, сувтöтiсö кöдзны. Бригадир Андрей Пуров тöдiс пословица: пöрись вöв бороздасö оз öшты. А Вадорин вöлi как раз сэтшöм: кыдз кутчас уджавны — керас быдöс бура-бытшöма, не тяп-ляп.

Быд асыв пара вöла телега сибöтчылiс амбар дынö. Ефим тэчлiс мешöккез вессэз вылö, сыбöрын новйис телегаö. Кладовщица отсавлiс. Ефим баитлiс етша, а Параська леститчис сы дынö, кыдз вермис. И öтiк рытö Пеганко аслас пристяжнöйкöт бöра кошшисис тöвбöрын, хозяинсö видзчисикö...

Аннуш казялiс, что мужиккöт мыйкö неладно: сыкöт неласков, челядьöс дугдiс приближайтны. «Мыдзö, натьтö, — шуис Аннуш, — да сысянь сэтшöм. Чулалас». Но Ефим лун-лун ветлöтiс сё важмоз кымöра, дзик öшöм. Öтiк басни, кöдö кылiс Аннуш вадöрын, вежöртöтiс инькаöс.

— Тiйö, катшаэз, мый менчим ёртöс перкьят? — сералöмöн юалiс Аннуш соседкаэслiсь.

— Да нем... сiдз тай, — ылöтiс öтыс.

— Эн пов, огö гусялö Епатö, — содтiс мöдiк. — Вот Параська, шуöны...

Аннушöс дойдiс эта юöрыс, но висьталiс сiдзжö сералöмöн:

— Ась, и меным, и сылö тырмас...

— Чöв, инька, эн рызйы. Ошшасьö ни пö своянкаыт, что смилитöма...

Аннуш гумалiс васö да сьöкыта кайис керöс вылас. Ведраэс сiдз нырыштiсö пельпоннэсö, бытьтö ныын вöлi свинец, а не ва. Сэки усис тöдвылас неважся вöт. Мунiс бы вала и вöтис öт ведрасö. Кошшис-гудыртiс быдöс берег дорсö, а ведра эз кышась коромысла пеляс. Сiдз и бертiс пöв ведранас. А рытнас Аннуш ачыс казялiс, что сiя быдöс правда, мый инькаэс баитiсö: Ефим эз лок ужнайтны, а бертiс гортас асъяойнас и ляп код. Пондылiс пöрччасьны, эз вермы да сiдз и нёкыртчис ыбöс одзас. Аннуш асылöдз ончир эз кер. Мыйкö сöскис сылiсь сьöлöмсö, личкис мороссö. Куняс синнэсö — адззö асьсö учöтикöн-учöтикöн, топ ем пыс. Юрас вартö-ветлö сьöкыт дума: чапкöм инька, чапкöм, кыдз бырöм отопка! Счастьеыс, кöдö эта дырна видзчисис, петiс сiя жö ыбöсöт, кытi пырис. Кöр, кытшöм лунö öшис эта счастьеыс да колис ас туяс сьöкыт шогсö? И сэтшöм я сiя несчастнöй, кöть и чапкöм? И син одзас бöра мыччисяс горадзуля видз, кытöн нуöтö Аннуш öтмоз отиркöт ота постать, а вылiсянь шыннялö дзирыт шондi, и дзульзьö мыдзтöм ыбшар. Кокнямö сьöлöм вылас: сiя не öтнас, не пельдöм тылöп. Сыкöт отир, зоннэс; сылö югдöтö туйсö шондi, дзоридзасьö, гажöтö видз, триньгöны косаэз. Эта — олан...

Кöр öшынö, ровно маласьöмöн, пырис шондiлöн медодзза югöр, деревня шöрын пондiсö вартны рельс кузя. Пондöтчис виль лун.

Аннуш, кыдз и быд асыв, тэрмасьöмöн пуис-пöжалiс, мый колö, юктыштiс да вашöтiс подасö поскотинаö. Стёпа мунiс ытшкисьны, воннэс котöртiсö чериавны. Вöлись чеччис Ефим да корис сёйны.

— Мун кыз яйыт дынö, — эз вермы видзсьыны Аннушыс. — Менам юан-сёянö курыт, а сылöн, натьтö, ма кодь.

— Но, но, вöрöтчы! — ыждалiс Вадорин.

— Эн вашöтлы: ме абу доддялöм. Кытöн кыскасин, сэтчин и мун!

— Дугды пиньгынытö!

И Аннуш дугдiс: босьтiс лöсьöтöм павжун и мунiс уджавны. Ворота дорын сiйö видзчисисö ни инькаэз да нывкаэз — Аннушлöн группа.

— Мыля нö дыр узян, Андреевна? — панталiсö видзчисиссес ассиныс групповодкасö. — Оз разь лэдз Епаыт боксис?

— Неважын вöлись локтiс... Ойбыт шатласис кытöнкö, — шыасис паныт Аннушыс.

― А мыля лэдзан? — горöтчис пыр гажа да сералiсь нывка Настя. — Ме бы...

— Мужиксö эд он домав бердат, Настя! — баитiс бригадирша Сима. — Да мый тэ эшö арталан? Учöтöв! Менам калекаö тай чуть эз кидмы. Посадiсь вöлi адззöма модзсö... Сэтшöм миян, инькаэслöн, оланыс. Ачыт, поди, сякöйсö адззылан, кöр петан жöниксаят. Тырмöны эшö Параська коддес.

— Ме?! — дивуйтчис Настя. — Мийö ог мунö бöбöтчиссес сайö. Сiдз эд, Ира? А олан кыдз олан, — мунiкас ни баитiс Настя. — И олансö öнi ачыс мортыс керö. Пондан кö надейтчыны судьба вылас — шöмман. Шöма кисельö пöран.

А кисельсö — охота дак сёй, абу дак — порсь öрö пöрöт. Давайте, кöркö öксям да пывсьöтам Параськасö, кыдз колö.

— Крута, нывка, мöдан босьтны, — серöмтчис Сима. — Кöть мымда сiйö стыдит — симöта рожаыс оз кульсьы.

— Неправда, тётя Сима! Кутчам быдöнным! — вермам. Вот! — Настя öвтыштiс кулакнас, бытьтö чувйыштiс кинлöкö бокас.

— Тэ тай, вон, одзжык öтнат сэтшöммескöт вермасин!

— Сэк, нывка, война вöлi...

Аннуш, кытчöдз эз локтö покосöдз, öтiк кыв эз уськöт, бытьтö не сы кузя гардчис эта басниыс. И только сэк, кöр пуктiс павжунсö, горöтчис:

— Эн пизь, Настя, не нывкалöн эта делоыс. Пондöт постатьсö...

Лун чулалiс Аннушлöн быдкодь думаэзын. Сiя пеняйтiс ас вылас, что видчис асывнас Ефимкöт. Медбöрын сiдз и решитiс, что рытнас баитас жöникыскöт бытшöмика, пондылас бергöтны сiйö важ туй вылас. Но Ефим эта лунö эз лок гортас, эз мыччась и мöдiк луннэзö. Аннуш кучикас эз тöр, но чöлiс. Ачыс думайтiс: «Вот и дöва... Жöника дöва». Чöлiсö и челядь.

Сьöкыт кадö морт кошшö аслыс ёртöс, кöда бы янсöтiс, чинтiс сылiсь шогсö, ректiс сьöлöмсö лёк думасянь. И кытшöм бы эз вöв зубыт мортлö, а бур кыв, ёртлöн шоныт кыв вашöтö зубытсö, кыдз лекарство. Аннушлö сэтшöм ёртöн лоис Настя, югыт вира, топытик да чож нывка. Сэксянь, кыдз чапкис гортсö Вадорин, Настя быд рыт вöвлi Аннуш ордын: то отсалö хозяйкалö, то орсö Митякöт. И пыр баитлiс, что вайöтас ылалöм Ефимöс гортас, пöртас сiйö бöра мортö. И былись, нывка не сымда баитiс, мымда керис: котрасис сельсоветö, школаö, партийнöй организацияись секретарь дынö. Баитiс и аслас ёрттэзкöт — комсомолеццезкöт. И вот зэра лунö инькаэз чукöртчисö бригаднöй керкуö. Öксисö уна. Степаниха тöдiс ассис мыжсö и енöвтчис гортас. Но Настя сёжö вайöтiс и сiйö. И только пыртiс виновницасö, сэк жö пондiс баитны дело йылiсь: талун пö видзöтам, ладно я олö миян соседка Степаниха Парась.

Койыштiс Степанихаыс чужöм кузя гöрд краска, пыкнитiсö рожабан йыввес бикылöн, но сэк жö и бöр кусiсö да öзйисö кöдзыт биöн векнитик синнэс.

— Тэ кытiсь адззисин, зырымöсь судьяыс? — чижйöвтiс Степаниха. — Али ме тэныт ровня? Да ме...

— Кывзы, Параська, — поперегалiс сiйö Сима. — Эн горöтлы, сыбöрын висьталан.

Параська сiдз видзöтiс сы вылö, что, позис дак, натьтö бы орлалiс Симасö. Сэсся петiс джодж шöрас, чурс сьöвзис пызан одзас и шагньöвтiс ыбöсланьö. Но бригадирша Сима игналiс сылiсь туйсö да мыччалiс лабич вылö. Сылöн лöг синнэс падмöтiсö Степанихасö. Симаöс быдыс уважайтiс веськыта баитöм да рассудительность понда, и невночка повлiсö сыись, кöр инькаыс лöгасяс. Да эм мыйись повны: мыгöрнас некытшöм пöлать увтö оз тор, а роженнез да мешöккез новйис öтмоз мужиккезкöт. Жöниксö, учöтик мыгöра Андрейсö, кöр беднöйкалiсь гусялас кок садьсö туран брага, вайöтлiс гортас, кыдз кагаöс. Война коста, кыдз баитiсö колхозниккез, быдöс бригадаыс Симаыс пельпоннэз вылын öшшис, гортас вöлiсö квать челядь да пöрись ань йöзайкöт. И некöр эз норась, что сылö сьöкыт, некин эз адззыв сылiсь синва. Разь тöдiсö эта йылiсь только пемыт ойез да чорыт юрöдз. И каждöй морт дынö Сима тöдiс, кыдз сибавны: кинлö чуньöн мыччавны, кин вылö топнитны, кинлö горöтчыны шоныт, ласков кыв.

Настя, кöр öктiс инькаэсö, Сима вылö и надейтчис: сыкöт некытöн он öш, не биын, не ваын. И только пондöтчис нывка нуöтны собраннёсö, кыдз пырисö стариккез. Настя паймис, эз тöд, мый керны. Сiя кеймисьöмöн видзöтiс Сима вылö и вежöртiс, что чуклясьны нем, и ны шогья, стариккес шогья, суськыны тожö нем. Нывка чапкис лён содз кыза чикиссесö бöрас, чатыртыштiс волькыт юрсö и гöрд пызандöра вылас нырышсьöмöн минута кежö лöньсис, видзчисис, кöр пуксясö стариккес. Вöлись тшöктiс:

— Висьтав инö, Параська, мыля сiдз керин...

— Ме сiйö поводöн эг вайöт и домйылын ог видз, — орöтiс-висьталiс Степаниха.

— А мыйлö кышасян гöтыраыс вылö? — эз вермы видзсьыны Сима. — Али тэ понда законыс абу?! Восемнадцать год олiсö öтлаын! Восемнадцать год, куим челядь, а тэ нiйö янсöтiн... Оз кö берт Епаыс гортас — коккетö летам!

— Не олан, мокресь, важ семьяас лоас, — горöтчис старик Демид.

— Этö мыля сiдз, деда?! — почти оча вайöтiс вöснитик синкыммесö Настя.

— То адззан, кагу, гезыс орлöма? — Демид вайис сiйö пызан одзас. — Ме йитi сiйö, öтлаöтi, мокресь. Но орлöмыс тöдчö. То öтiклаö, то мöдiклаö, мокресь, павкö-кышасьö...

— Чайдöм увсö бöр он ни лякöт пу бердас, ― содтiс кинкö бöрись ряддэзсянь.

— Эд тэрмасьö, ёрттэз, не нинкöм сьöкталат... Инькаэс не отопкаэз, нiйöн нем чапкасьны. А челядьыс?.. Епа должен бертны, — негорöн, но чорыта, дзик приговор, висьталiс Настя медбöрья кыввесö. — Кылан, Параська?! Но Степаниха бытьтö öштiс кывсö: сылö нем вöлi висьтавны паныт. Мышкыртiс юрсö, кутiс синнэсö. Гöгрöса пельпоннэс пондiсö зэгавны горзöмсянь: сётаки босьтiсö волясö синваэз. Ныкöт киссис öбида ас вылас, война вылö, öтка олана сьöкыт годдэз вылö. И тöдiс эд, что йöз несчастье вылын оз туй керны счастьесö, но мöдiс. И видзчисис, пыр видзчисис: одз я, не я, а народ юалас сылiсь. И вот локтiс час...

Рытнас Вадорин эз ни пыр виль гортас, енöвтчис бригаднöй керкуö. Демид, сторож, ойшöрöдз сыкöт баитiс олан йылiсь. Водiкö ни висьталiс Ефимлö:

— Сэтчöдз соровтiн, что пöртiн олантö кöс комокö. Нёль год, мокресь, мортыс пессис бур олан понда, воюйтiс. А локтiс гортас — чапкис семьясö. Но висьтав, мокресь, не враг я тэ зонытлö, меным, государстволö? Государствоыс эд, мокресь, семьясяняс и пондöтчö. Вон, мачуркаын кыдз? Соть да соть — рамка. Рамка да рамка — мачурка. Сiдз и государствоыс: семья да семья — деревня. А нiя деревняэс, мокресь, джын Русьсö аркмöтöны... И уджалан бура, а сёжö тэ вредитель... Мун, мокресь, уськöтчы иньыт одзö пидзöс. вылат — проститас. Нылöн, иннеслöн, сьöлöмныс небыт, дзик пöжöм сёртни. И зоныт примитас. Степан не паметливöй öбида вылас.

Эна кыввес пыдына пырисö Вадорин юрö. Сiя öстатки öштiс ассис спокойсö, старайтчис янсöтчыны отир дынiсь, пöжшис, дзик вольтöм пипу чурка аслас кач пытшкын. Дыр эшö олiс, кыдз горттöм кöк, кытöн ой, кытöн лун. И позьö я шуны мортлiсь олöмсö оланöн, кöр сы вылö косöя видзöтöны соседдэс, кöр сiя ачыс оз вермы видзöтны веськыта отир синнэзö? И мунiс бы гортас, да совестьыс маитiс. А иньыс эз кор, эз кеймы, кöть думанас пыр бы вайöтiс гортас. Вадорин дугдiс ветлыны собраннёэз вылö, кöднатöг одзжык ровно и овны эз вермы. Сыкöт етша баитiсö бригадир да колхозниккез. Ефим мукöдпырся думайтiс, что сiйö жалейтöны и сысянь бытьтö оз и адззö, медбы не вöрзьöтны баитiкö мужиклiсь шогсö. Но частожык вöлi мöдiк дума: сiйö нарочно вештöны бокö. И сэк Ефим лыддис асьсö сэтшöмöн, кöдö чеччöтiсö додись и сiя пуркйö-мунö лым столаöт, мунö туйтöг, ордчöн додьыскöт. А туйтöг мунны сьöкыт, стрась сьöкыт. И уна я сiдз, бокöттяс, мунан?

Öтпырись, горт дынöттяс мунiкö, Вадорин казялiс медыджыт зонсö. Сiя мöдiс сюйыштны векнит ямаö ворота столб, но некыдз эз вермы. Лэбтас öт конецсö моросысви, а мöд конецыс пыкöтасьö яма дорас; сэсся выныс оз судз — чапкас. «Орöтас, зонкажуг, асьсö», — жалейтiс Ефимыс зонсö и кежис отсавны. Сувтöтiс ямаас пöв, и столб дорыс кокнита ыскöвтiс сы кузя да сувтiс аслас местаö. Ефим пуксис важ столб вылас, кöдö вежöма Степаныс, пондiс куритны. Зонка натодиль лöсьöтöм зорокöн топöтiс садитöм столб гöгöрсö, öктiс инструментсö да кайис посöдзас. Нёджжöвтiс бöрас — айыс сё пукалiс важ местаас.

— Мый инö? Локтiн дак пыр! — рочалiс Степаныс айсö.

Вадоринлöн ёткöп мунiс сьöлöмыс, и тöдвылас бöра усисö Демидлöн кыввес, пöрись мортлöн простöй басни олан йылiсь. «Пыра, юася — чеччис Ефим. — Кымöсö оз вачкö. А вачкасö — сiдз и колö... Терпита».

И Ефим Вадорин полöм походкаöн иньдöтчис посöдзлань. Эта коста сiя вачкисис пон вылö, кöда ыжмалöм бöрын бöжсö жмитöмöн бöра локтö хозяиныс дынö.

КЫК ДЕД

(ордч.: сёр вариант)

Öтпырись гожумся асылö муна ме ю пöлöн гортланьö. Адзза, мöд берегас вуграсьöны öтамöдсянь неылын кык морт. Киннэз жö нiя? Сибöтчи матöжык, пукси баддез коласö да вöлись тöдi: да этö жö колхознöй пенсионеррез дед Макар да дед Ипат почтальон!

Дед Ипат мöртöма синнэсö поплавоккезас и сэсся нем оз адззы. Дед Макарöс сунöтö, натьтö, сысянь, что талун умöля кокалö.

Вдруг дед Макар сiдз суныштiс, что öштiс равновесиесö да, киэсö паськöтöмöн, сунгисис ваас.

Кув-ко-ов, кув-ко-ов кылiс ме дынöдз.

Дед Ипат лэбтiс юрсö и казялiс, кыдз дед

Макар голяви сулалö ваын да мыйкö бобгö ныр увтас.

— Тэ мый нö, сват? — юалö дед Ипат, сы дынö локтiкö. — Мыйла пырин ваас? Али жарыс босьтiс ни, госыт сылö?

— Чöв, висьтася... Отсав петны... крут эстöн, — вугырресö кутавтöн мыкталöмöн баитö дед Макар.

Дед Ипат мыччис сачок ороп, кöда бердö кутчисис сватыс кыкнан кинас да пондiс петны берегö, но некыдз эз вермы.

Вот дед Макар сувтiс ни веськыт пидзöснас берег дор вылас да лöсьöтчис тальччыны мöд кокнас, а дед Ипат сюйыштiс пидзöссö сачок ороп увтас, медбы отсавны лэбтiсьны сватыслö, но оропыс, кöда, натьтö, вöлi öтiкгодся хозяиныскöт, ризнитiс-чегис. Беднöй дед Макар гатш-гатш берездасис ваас, только кокпыдöссэс мелькнитiсö, а дед Ипат шлёпкисис сы котёлок вылö, чурс сьöвзис одзас да виззьыштiс сачоксö бокö. Кöр мыччисис Макарлöн галя кодь волькыт юрыс, Ипат негорöн висьталiс:

— Вот эд, икота, кыдз аркмис. Челядьлiсь уджсö керимö. Ужо норовитышт, потш вая.

Дед Макар малыштiс ва кинас чужöмсö и шы эз сет, а дед Ипат ляшмасьöмöн котрасис остожья дынöдз, вайис чегöм стожар да сувтöтiс сватыс бокö...

Недыр мыйись дед Макар пукалiс ни важ местаас.

— Суныштiс эд, тыдалö, пöрись, — шуис дед Ипат.

Мöдыс ружтöмöн чапкис запон, пöрччалiс нинкöммесö, чöвтiс йöрнöс и вешьян, пидзыртiс йöрнöссö да пасьталiс бöр.

— Давай пидзыртам, — горöтчис дед Макар и сюйыштiс сватыслö киас вешьян коккесö. Пасьталiс пидзыртöм вешьянсö да корис куритны дед Ипатлiсь.

— Пукала, думайта, — пондöтiс дед Макар, — кытчö жö лоис гырись чериыс? А кытшöмöсь вöвлiсö ёдiэз — пестерö он тöрöт. А жереххез! Öтiкö кыян — семьялö пöттöдз тырмас сёйны! А щукаэз!.. Эг ешты и думайтны быдсöн, кыдз ваись мыччисис ыджыт щука юр — шляпаö öмас тöрас — и цап нинкöм нырöс: силиöс чайтiс, натьтö. Перво повзьыштi, а сыбöрын лэдзи смелöс да сапки анлассэзöттяс, но кытчö тэ! Кыскис ваас, нечистöй дук!

Ыш ловзисис, нималыштiс чубуксö трубкаыслiсь, лэдзис öмсис лöз тшынок да содтiс:

— Видзöт, кыдз кватитiс...

Быль я веж бан шуллез вылын мыйкö тöдчис сэтшöм, кöда вачкисис щука пинь следдэз вылö, ог тöд, только дед Ипат шынньöвтыштiс гöрдкодь тошас да юалiс:

— Дак, шуан, кутны мöдiн?

— Мöдi, да эг вермы.

— Ме öтпыр öбедсянь рытöдз вöтлiси щукаыс сьöрын и весь... Кува вылö мунi сакасьны, а тулысся ваыс чинiс ни сэк, только видз вылöт лажмытiннэзас да арайезас пукалiс эшö. Сакаси, сакаси — умöля шедö: кöдзытöв вöлi и тöла, чериыс пыдын местö мунiс. Ордчöн карчйöр пасьта вагöп, важ осокаöн да пистикöн тырöм. Видзöта: осокаыс öтiк местаын коласасьö, коласасьö, веськыт визь аркмö ва вылас...

— То тай, — думайта, — да этö эд щука йöрмöма гöпас. Котöртi сэтчин, хлоп сакнам — пышшис... А ваыс непыдын, вонясян вевдöрöдз только. Уйис мöдöрас, ме — сы бöрсянь, сiя бöр, ме сьöрас. Öтпыр сак юрнас нятяс совсем ни нырыштi да видза, ась, мыся, вынтöмсялас, вöлись — кута. Только нюжöтi киöс — лыйис-мунiс, умöля öт кинам зэлöтi. «Бöбöв тэ, бöбöв, — вида ачымöс, — öмсит лэдзин». Сэтчöдз котраси, кок садь бырис, да и пемдыны ни пондiс...

— Да-а, — нюжöтiс дед Макар. — Вöвлi, батя, одзжык чери. Ыджыт я, видзöт, Ярка тыыс, а тыпылыс вöвлi, дзик горпöдан, не учöтжык. Öтпыр петыр лун панытö, ойнас, сакаси ме сэтчин. Вельтума кыйи ни и лöсьöтчи мунны гортö. Вай, шуа, эшö öтпыр сакышта. Эг ешты эшö и вöтьны быдсöн сакöс — буль-боль, буль-боль — нельки уткаэз хоботас повзисö да шумöн лэбтiсисö... Кыски чожжык, адзза; тыпыв, ыджытся-ыджыт. Сакам и вайи гортöдз... Бабыс чеччöм ни вöлi, гор лонтöм — праздникнас одз чеччöны стряпкаэс. Весöтiсö нывкаэс черисö. Ме шуа: «Жаровняö сiйö, ыджытсö, кыдз порсьпиянöс». — «Нет, дед, керам черинянь», — висьталö баб. Черинянь дак черинянь. Керисö, как раз и торыс ештiс. Сюйыштiсö пöжавны. Недыр мыйись кыла: трин-бран-н — и горпöданыс чеччöвтiс джодж шöрас, а сы бöрсянь — тыпыв, кöда кыскис бöж бердас лякасьöм черинянь коркасö...

— Кывза ме тэнö, сват, и думайта, а не öддьöнöв я медбöрын кöстiн? — öт синсö куньöмöн, горöтчис дед Ипат. И кыкнанныс пондiсö китшкыны-серавны.

Дата добавления: 2015-11-16