БОНДЯЛÖН ШОГÖТ

Олiс миян деревняын öтiк дышкучик. Öнi сiйö позьö ни шуны инькаöн нето гражданкаöн — кыдз тiянлö любо. Нимыс сылöн Овдя, но быдöнныс сiйö шуöны Бондяöн. Стрась ни сiя ён да гöгрöса, дзик и дзик гыр. И весыс не учöт: кило-мöд разь только оз тырмы центнерöдззас. Бочка, бочка и эм, или, кыдз миян шуöны, — бондя. А нимкодялiсö кö тэнö деревняас — не черöн, не пуртöн он зыртышт, сiдз сiя и лякасяс тэ бердö, бытьтö баг.

Вöлi Бондя колхозницаöн, кöть бытшöмика и кольта эз куж домавны. Да и немлö эта сылö. Пызан вылас Бондялöн прокод куйлiс бан гырдзим кодь бумага чукöр, кöрталöм голубöй лентаöн. Эта чукöр сайын инькаыт кыдз стена сайын вöлi. Кöр и пырас сы ордö бригадир Кондрать Степан, а Бондя сы одзö этö бумажнöй гырдзимсö вайö.

— Вунöтiн разь, начальник! Шогала ме, враччес оз тшöктö уджавны.

Мый эна бумагаэзын гижöма, — Кондрать Степан видзöтны эз пондыв. Да и мыйлö видзöтны? Быд справка вылын куим нето нёль пельöса печать пуктöм. Сразу тöдчö: не простöй гижöт, а документ. Кыдз тэ он верит? Документтэсö эд начальство, грамотнöй йöз сетö. Гыжйыштас бригадир юрбöрсö, макнитас кинас да сы сорöн и мунас. А Бондя эшö бöрсяняс горöтлö:

— Тэ эн видзöт, что ме сэтшöм кыз. Нездоровича ме, лёк яй менö пöдтö. Нельки регентыс сы пырйöт оз сидз. А гарйышт гыркöс, дак, поди, джын здоровьеö абу ни.

Сiдз и олiс инькаыт: колхозö и кокнас эз тальччыв — шогöтыс оз лэдз, — а огородечас лунтырöн гуддисис. Зато огурец, помидор да мöдiк карч Бондялöн медодз воö. Тöбалас карчсö корзинаэзö и — городö. А базарись туистыр деньга кыскö. Мукöдпыр и виль бумажка вайö, а сы вылын мудрёнöй кыввез гижöмöсь и лöзрöма штампок красуйтчö. И бöра гижöтоксö — гырдзимö, а гырдзимсö — пызан вылö, йöз син одзö.

Кин лысьтас кöритны Бондяöс? Сё быдмис да быдмис бумага чукöрыс, а сы сайсянь и Бондя кызамис. Кин тöдö, поди, центнерся унажык ни лэбтö...

И быдöс бы бур, да виль забота вöтiс: челядёксянь оланыс эз ло.

Номсöтчöны угланнэс свежöй карч кузяс. А нiя эд не козаэз, голя выланыс радз он кышав, мед йöрас эз пырö.

Сэк и вайöтiс Бондя породистöй кычанöс. Вайöтны вайöтiс, думайтiс буржыкö керны, да мöднёж петiс — беда аркмис.

Öтiк лунö, кöр Бондя öктiс запонö анькытш, кычаныс кут да и кыскы бумага гырдзимсö. Петкöтас сiйö оградаас да давай летны пиннезнас, рознитны му кузяс. Казялас этö Бондя, кватитас шать. А кычаныт умнöй: вежöртас, что боккесö мöдöны пöжны, и вотьыштас только öтöрас. Рыпкö-котöртö сы сьöрын Бондя, горöтö — öмсö поткöтö, а кычаныс оз коль гырдзимсö: тыдалö, голубöй ленточкаыс сылö гленитчис.

Бондя джöмдiс, кыдз на грех, нюжалiс кынöм вылас — только бус кайис, бытьтö бомба потiс.

— Караул! — ванзö. — Кутö сiйö, кутö!

Пожарник, кöда сунасис каланча бокын, кылiс горöтлöмсö да онзыльувьяс и трингис размöд колоколö. Джын деревняыс чукöртчис, нельки ачыс бригадирыс локтiс. Бондя досповна атшалöм, кыв оз вермы висьтавны. Сэтчö и кычаныс кысянькö локтiс. Пöлiньтыштiс юрсö, кывсö мыччис, дзик нерсьö, да бöжокнас кивыльтö. А гырдзимись öтiк бумажка дзоньыс кольöма. Кондрать Степан мырддис сiйö кычаныслiсь. Только пельöсокыс, кытöн лöз штампок вöлi, кычаныс öмö кольччис. И пöртчис эта документыс неколан гижöтокö. Сэк вöлись бригадир решитiс видзöтны, мый сэтöн гижöма. Лыддьöтiс первöй строкасö: «Диагноз: рецидив тунеядства». Дыркодь мырсис мöдiк строка вылын, кöда вöлi гижöма латинскöй букваэзöн. Петiс сiдз: «Аквае дестиллятае». Сы увдöрын бöра рочöн: «По 1 стол. лож. 3 раза в день» — и невежöртана подпись.

Кöть и важын ни велöтчис Кондрать Степан школаын, но сёжö вежöртiс, мый лоö. Тöдтöм врач адззöма Бондялiсь виль шогöт: тунеядство. А сiйö веськöтöм понда тшöктöма юны дистиллированнöй ва. Вот шутник.

Сэтöн и винитчис Бондя, кыдз бöбöтлiс справкаэсö да рецепттэсö больницаын. Сiя ачыс эз тöд, мый ныын вöлi гижöма. Сылö колiс öтiк тор — штампок, кöдалö бригадир сiдз жö веритiс, кыдз председательлö.

Сiдз öшисö Бондялöн волшебнöй бумажкаэс, а öтлаын ныкöт и лёк висяныс. Кыдз бы эз мöд беднöйка гортсö öтнасö кольны, да ковсис ашынас ыб вылö кайны.

А Кондрать Степан сэксянь быд гижöтоксö пешлö, и нельки гöгрöса печатясö.

Тiйö, поди, тöдат бы, кыдз öнi Бондя ойлунсö чулöтö? Шуöны инькатö сё сiдз: эд миян деревняын кыдз нимкодяласö — не черöн, не пуртöн сiйö он зыртышт. Баг моз лякасяс. Кöть öнi Бондя бура вöснямис — одззася тушасис только джыныс колис, — зато эта джыныс кыдз арся ельдöг. А кытчö лоис шогöтöсь джыныс — Бондя и ачыс оз тöд.

Эз я тiян ладорö сюр?

Эз? То-то жö!

Дата добавления: 2015-11-16