|
Читайте также: |
Паськыта овлöма чудскöй увтырыс, да сё дзескыт öтлаын вöлöма, вот и янсöтчывлöмась нiя да виль муэзö мунлöмась.
Олас-вылас кöркö öтiк чудскöй князь. Кык зон сылöн вöлöмась — кык богатырь — Киньöш да Чугуй.
Кыдзкö висьталас князь зоннэслö:
— Ыджыт миян Парманым, да вöравны нем. Бырсьö зверьыс, сёяныс бырсьö. Чожа и парка* немись вурны лоас. Тэ, Чугуй, босьт ассит отирсö да кошшы виль оланiн. И тэ, Киньöш, коль важ оланiнтö. Сета ме тiянлö кык öткодь шодз. Нiя и пуö мöртчöны, и из поткöтöны. Но ась некöр нiя оча йыв оз пантасьö.
Мунас Киньöш лунланьö, а Чугуй ойланьö. И аркмасö Пармаын кык виль горт — Киньöшму да Чугуйкар.
Шестьдесят год оласö нiя торйöн, öтамöднысö вунöтасö.
Локтасö öтпыр Киньöшмуас вузасись отир и сiдз висьтасясö ойвыв отир йылiсь:
― Гажа ю дорын ыджыт кар эм. Сiя карын чочком синма отир олö. А князьыс нылöн мудрöй старик. Дзор юрсиыс пельпоннэз вылас лэдзчисьöма; синнэс, ровно бокаллэз, кымöсас пукалöны; рожаыс, дзик паськыт тупöсь, гöгрöса. Золотöй кизя парка старикыс новйö, небыт низь кучиккез вылын узьлö, золотöй джек вылын пукалö, киас золотöй шодз видзö. И быдöс увтырыс сылöн шоныта пасьтасьö да пöта олö. Вичкуыс нылöн низь кучикöн вевттьöма, и кучикыс сэтöн сюрс*.
Мöдiккез мунасö Киньöшмуöт - сiдз жö висьтасясö.
Киньöш тожö богатöя олас, да эд кинлöн уна доброыс, сылö эшö унажык колö. Вот и öктас Киньöш ассис отирсö да ойвылö нiйö нуöтас — богатöй карсö розоритны.
Дыр нiя ветлöтасö, но адззасö сiйö карсö. И уськöтчасö сэк, ровно баляэз вылö кöин чукöр, и давай тышкасьны. Час тышкасясö, кыкö тышкасясö — оградаö пырас Киньöш увтыр. Но не золотöй джексö, не золотöй шодзсö некытiсь оз адззö: видно, ылö дзебас нiйö Чугуй, а то и сьöраныс нöбöтасö нiя, кин пышшыны ештiс. А низь кучик былись уна да чисто бур киння бур.
И бертiс бы Киньöш гортас ловйöн, уна добро бы сьöрас вайис, да игналiс сылiсь туйсö Чугуй аслас отиркöт.
Уськöтчасö княззес öтамöдлö паныт, ровно лёк пороззэз. Оча йыв локтасö крепыт шодззез, вот-вот мöртчасö бöбсялöм сьöлöммезö.
— Вонö! — горöтас Чугуй, кöр казялас тöдса шодзсö. Но Киньöш оз ни ешты сувтчыны, и сылöн шодзыс писькöтас воныслiсь мороссö.
Аркмас сiя, мыйись тшöктiс берегитчыны айныс.
Киньöш мöртас ассис шодзсö муас, мунас гажа ю дорö да уськöтчас онняюрöн крутик увтас.
Чапкасö этö карсö Чугуй увтыр, мунасö виль местаö.
* * *
Егор дугдiс висьтасьны и пондiс смекайтчыны да кывзiсьны. Кытöнкö ылын кылiс неятнöй шум, бытьтö грань кузяс кыскисö увья пу. Секунда кежö этö шумсö сайöвтлiс негора буткöтöм, дзик кымöрсяняс му вылö усялiсö ыджыт иззэз. Лöгöн шувгыштiс вöр, чож тöлок пöльтыштiс кусны ни пондöм костёрсö. Бичиррез лэбзисö Лапьяö.
— Палёжас колö петкöтны, — висьталiс Егор да чеччис. — Погода лэбтiсьö.
Сiя лöсьöтiс долоннесö труба моз да ны пырйöт пондiс кытсавны мöссэсö. Нiя, тыдалö, кыссьöмась палёжланяс ни, и чожа чукöртчисö сэтчин, кытöн Егор коялiс сола ва.
Лёк тöв, дзик бöбмöм зверь, чепсасис öтмöдöрö, шупкасис пуэз вылiсь орлалöм лысоккезöн да листтэзöн. Грань дорись уль вöр, кыдз Ерика баб аслас гореын, сыркьялiс-горзiс. Югыта вирдыштöм коста тыдалiс, кыдз сiя вартсис пашмöм уввезнас, ровно мöдiс орöтчыны му бердсис да лэбзьыны ылöжык эта лёк тöв дынсянь.
Торкнитiс-гымыштiс, зэгйыштiс мусö — и вöрыс лöньсис. Эшö öтiк чардби югйöвтiс палёж весьтын, эшö одззася öддьöнжык ёркнитiс кытöнкö Гыркалогас — и му вылö койыштiс гырись зэр.
Мийö Семёнкöт уськöтчимö Лапьяö, пуксим небыт ольпась вылö. Локтiс Егор, чöвтiс вывсис плащсö, öшöтiс ув вылö да пырис миян дынö.
— Давайте узьны, — сетiс сiя команда. — Чожа югдыны пондас.
— Ачыт, Егор, шоччись, а ме пукала, — корсис Семён.
— Ме узьыштi öнтай, сёравно часöт ог онмöссьы, — висьталiс Егор. — А тiйö лунтыр эд кок йылын.
— Сiя сiдз да... — согласитчис Семён и нюжöтчис ме бокö да шебрасис плащ-палаткаöн.
Асывнас менö саймöтiс Семён да нуöтiс миссьыны ключö. Кöр дугдiс зэрны — ме эг кыв. Но клёшшитöм сiдз, что, тыдалö, шучкöп кöтöтöма и вöрсö, и турунсö, незьдöтöм колодаэсö, мырресö, мусö. Быд гöпокын, быд мöс следын, быд турун кор вылын вöлi ва. Гöгöр дзугсьöм, нöитчöм, пашкыртчöм. Пуэзлöн уввез öшöтчöмась, нёкыртчöмась и оз и вöрзьöтчö. Быдöс чöлö, быдöс шоччисьö — öктö вын. Шочыника тёпöтöны ва воттез. Мезмас волькыт кыдз лист вылiсь ва воть да ыскöвтас улö, шваткас мöдiк лист кузя — и бöра шы не тöв. Ляга йылас, ключ бокöт, боргö гудыра шор, кырöтö небзьöм мусö. Шор нуöтö сьöрас турун цвет, лыс еммез да быдкодь вöр ёгсö. Мукöдпырся ёг коласын мелькнитас пöдöм кöдзыв, гöнагаг нето вöрлудык, И быдöс эта чукöртчö прудокö да бергалö сэтöн.
Важын ни, натьтö, лэбтiсис шондi, но асылыс сё вöлi шорыс кодь жö гудыра, гажтöм и дзескыт. Дзескыт сысянь, что нять рöма кымöррес лэдзчисьöмась пу йыввезöдз да ляпкöтöны вöрсö, мусö, отирсö.
Уль руыс чöскыт, но сук, и лолавны сiйöн сьöкыт. Сiдз жö сьöкыт, кыдз ва бöрсянь ньылавны сук шöмтöм.
Полi ме, что эна кымöррес дзугасö миянлiсь уджнымöс: оз лэдзö кошшисьны Чугуйкарын. Но кöд коста мийö петкöтлiм Лапьяись кöс чаггез да вадзöтiм костёр, кымöррес орласисö, шочамисö, и мыччисис шондi. Сiя вöлi югыт-веж, сöстöм-сöстöм, бытьтö сюрлiс ойся зэр увтас да гывьясис сöдз ванас, но шонтiс умöля.
Егор вайис дас гöгöр коровяк. Ме весöтi нiйö да шыри аслам пуртокöн котелокö, гумыштi сэтчö ключ ва, öшöтi би весьтö. Котелокас сразу пырис шондi да водiс небыт ва вылас шоччисьыштны.
— Вот ме тэнö пуа, шондi, и лоас миян шондiсора тшакьяшыд! — повзьöтi ме котелокись шондiсö.
Шондi эз повзьы менам грöзитчöмись и эз пет котелоксис. Содтi ме костёрас пессö, мед чожажык пусис миян сёянным. Пессэс перво везъяссисö чочком тшынöн, сэсся пыкнитiсö-öзйисö, пондiсö гажöн чалöтны. Бикыввез кутчисö нювны котёлок боккесö, судзлалiсö вугсö.
Чочком тшынок паськалiс öтмöдöрö, кыссис самöй му бердöт прудланьö, кöвьясис Лапья весьтын.
Лоас миян бур тшакьяшыд! Лоас сёян, кыдз баитiс Егор, лоас и гажа удж. Гаж да удж ― кык вон.
Дата добавления: 2015-11-16; просмотров: 35 | Нарушение авторских прав
| <== предыдущая страница | | | следующая страница ==> |
| Бур юöр. Неби «Паразитин». Весь эг кывзö Прокопсö. Менам лоас виль костюм. Шондiа тшакьяшыд | | | Кучиковöй вичку. Чугуйлöн бекöр. Адззисьлытöдз, Синяшор, адззисьлытöдз, Лапья! |