Читайте также:
|
Егор менö саймöтiс одз. Этö ме тöдi, öткö, сы сьöртi, что öтöрыс пемыткодь, мöдкö, стрась охота вöлi эшö узьыштны.
Но ме сораси: вöлöма сёр асыв ни, только кымöра. И зэрыштöм. А сэтшöм пораас и луннас öм паськалö.
Ме эг кыв, кöр Егорыс кытсалiс мöссэсö да резiс сола ванас прудок сайсö. Сiя, конечно, ештiс ни быд мöссö лапкöтны да видзöтны, эз я сылöн чашкав гыж, абу я косялöма боксö нето бытшкöма синсö.
Кык лун ни мийö аслыным спокой эг сетö, сё ветлöтiм-сыналiм палёжсö да вöрсö — кошшим ылöстöм Кузьбöжнымöс. Мунам и талун, только вот перво кайöта ме чери да Егор пуас сёян.
— Дöмöт дынас котрасьны, деда? — юася ме, синнэзöс гуддикö. — Али перво мöссэсö петкöтам?
— Перво-наперво миссьы, сыбöрын письмо гижам, — баитö Егор. — Мордаэсö ачым видзöта, а тэ мöссэсö петкöтан да бöр татчö пыран.
— Кинлö письмосö гижны?
— Адззылан... Миссьы мун, — бöра тшöктiс Егор, и ме мунi миссьыны. Сы коста старик пызанок вылас тэчöма тетрадь лист ыжда симöтоккез, сьöктан да сотчöм конеца увтор.
— Пуксьы да гижмав сьöктан дорнас, а ме висьтавла. Букваэсö рисуйт бöрöн... Гиж: копрасям Синяшорись Висьöвлö Егор да Петю да иньдам гöснеч...
— Жагöнжыка диктуйт, деда...
— Но, но, эшö висьтала öтпыр, мед эн сорась... копрасям Синяшорись Висьöвлö Егор да Петю да иньдам гöснеч... Гижин?
— Гижи.
— Сет миянлö куканьсö бöр... Эн тэрмась, басöка гиж... Он кö сет, дак гижам кайскöй вöрисьлö, тэнат начальниклö... Эн тэрмась, мыся, бытшöмик кырлав.
Ме старайтчи строкаэсö керны веськытöсь, а нiя мылякö чуклясисö, а веськыт дорыс кайис вывланьö. Кынымкö буква петiсö не бöрöн, но Егор ошкис менчим уджöс, сiдз кыдз ачыс эз тöд öтiк буква.
Кырлалi эшö кыкö. Нiйö чожа ни гижи да вились кори симöтсö, но Егор эз сет.
— Куим кабала только ыстöны, унажыксö озö. Öнi вай ме рисуйта сылiсь патретсö.
Егор босьтiс ме одзись кабаласö и говняокнас каждöй симöт вылö рисуйтiс круг, кругас керис синнэз, ныр, öм. Сiдз жö рисуйтiс, кыдз мийö перемена коста доска вылö мелöн: точка, точка, кык черточка, запятöй да тире — петiс Зойка, а не ме. Только Егор жагöника рисуйтiс, дрöжитан киöн, и кругыс пельöса петiс. Но сiя керис эшö кык сюр да тош.
Сыбöрын ме вайи туригум. Егор орлалiс нiйö суставвес бердöт, сюйис пытшкас табак, тупкалiс осьта конеццесö кöс нитшöн. Но вöлöма эшö не быдöс: пöимын пöжасьöмась голиэз, и нiйö Егор кыскалiс да тэчис бановöй коробкаö. Кабалаэсö, туригуммесö, коробкасö — быдöс пуктiс котелокö и мунiс пешлыны мордаэз. Мунiкас сiя кышавлас симöттэсö кöз уввез вылö, мыррез вылö коляс Висьöвлö гöснеч — жаритöм голиэз да туригумовöй чигарка.
Куканнес ньывсисö солалöм местаас, а мöссэс сулалiсö да сунасисö — видзчисисö менчим команда мунны высьтiсьны.
— Ноко тпручы! — горöтi ме Егорыс моз жö. — Ноко тпручы-ы!
Король саймис да дивуйтчöмöн видзöтiс мелань, натьтö, думайтiс — мунны али не мунны? Сылö мый, вöраыс абу, и йöлыс оз дзескöт, оз пет ортсö. А Шывка, öддьöн умнöй мöс, сразу вöрзьöтчис, вуджис плотина кузя меланьö да иньдöтчис грань дорö. Мунiс валькыта, орддьылiс кöчкаэз да колодаэз, шагнялiс бöрись коккесö бокö чапкалöмöн ― берегитiс чердöм вöрасö, мед эз пичкиссьы йöлыс. Сы бöрсянь лёдззöн кыссисö и мöдiккез, а ме мысок вывсянь лыдди нiйö...
Лунтыр мийö кошшим Кузьбöжсö. Ветлiм Пуровскöй грань дорö, петалiм куреньö. Ме мыччалi Егорлö пес кучасö, кöдö разис ошыс. Ме бöрын чукыля кокыс эшö вовлöма да паськöтöма пес увтсис кöдзывкар.
— Адззан, мый понда мырсьöма? — юалiс Егор.
— Кöдзывкарыс понда ли мый ли?
— Кöдзыв госсö охота лоöм пешлыны.
— Дак етша разь нiя вöрас? Вон ордчöн сулалö, куш местаын.
— Не сы сьöртi, видно, сiя. Эстöн, адззан, гырись род олö, а мöдас нето посни, нето гöрд. Чöскыт сёйись сiя, тэнат тöдсаыт, номсöтчись.
— Вон мый вöлöма!
Куреньын Кузьбöж тожö эз вöв, и мийö пырим пожарнöй грань сайö, ыджыт вöрö.
Эз примит, тыдалö, Висьöлыс гöснечсö нето эз на казяв миянлiсь письмонымöс. Ойнас, натьтö, шатласис вöрöттяс, а öнi паськалö-узьö, оз и думайт, что сылö письмо эм.
Важын ни колiс миянлö бöр бертны, но старик сё пырис пыдöжык и пыдöжык, кытчö, натьтö, и ачыс Висьöлыс шоча павкавлö. Кык лог ни вуджим, чулалiм мысок. Пондöтчис лажмытiн. Мыйлö Егорыс сэтчин мунö? Вот эшö пыртас зыбуна нюрö, и асьным öшам.
— Бертам, деда. Эстöн только ошшез олöны.
— Ровно и морттэз ветлöтöмась. Мун-ко одзам — казялан. Ме одзалi Егорсö и видзöтi кок увтам буржыка. Былись, мукöд местаас туруныс водöм. И тальöм сiйö не пода, не зверь, а морт. Следдэс кузьöсь да паськытöсь. Тöдчö, что кинкö сапога ветлöтöм.
— Кинкö нинъялiс, натьтö, вон мый ниныс. И бан эм, — мыччалi ме ляга йылö, кытöн сулалiс ыджыт кыдз, и казялi сэтчинiсь тшынок. Сiя вöснитика петiс сьöктантурун коласiсь и чуть-чуть только тöдчис.
— Видзöт жö, деда, мый сэтчин, — гусьöн шуи ме.
Егор дыр видзöтiс да малалiс тошсö и сiдз жö гусьöн висьталiс:
— Гор, видно, лонтiсьö... Му пытшкас кинкö олö. Туруналö, натьтö. Но ытшкисьö, дак и ась. А мийö бöр мунам...
Мунiмö лöня, смекайтчим, оз я лонтiсь мöдiк гор, оз я кинкö лок бöрсяняным.
Чу, мыйкö дзуртö. Этö, натьтö, косьмöм пу. Может, и уль пулöн уввез оча зыртчöны. Ага, вон кымöрсö пыкö кöс ньыв, гöрд лыса и вожа йыла. Вот сiя и дзуртö.
Чу, кинкö кышöтö бöраным. Бергöтча, видзöта — абу некин, и кышöтöмыс оз ни кыв. Поди, кинкö дзебсисис вон сiя вужья сайö нето кусттэзас? Да не, этö шыр или чужмöр котрасьö.
А кин ружтö гусьöника да нюжвыла — уфф-охх?
— Деда, кылан? — шушка ме. — Кылан али он?
— Мый сэтшöмыс?
— Кинкö кышöтö и ружтö!
— Вöрыс сiйö и кышöтö, и ружтö. Пöрисьмöма Парма-матушка, вот и ружтö. Томыс гажöтчö, орсöмöн олö, а пöрисьыс ойзö да ружтö.
Егор тожö пöрись, но оз ружты, а сакыртö-мунö сiдз, что ме öдва ешта сы сьöрö вöтчыны. Правда, сылöн куим кок талун ― киас эм льöмпуовöй бедь. И нинкöммес вильöсь, некытчö оз кышасьö. А ме жалейта виллезöс, ветлöта уса нинкöммезöн. Вот и кышасьöны быдлаö.
— Деда, поди, кошшисим бы эшö?
Егор сувтчыштiс, босьтiс юр вывсис колпаксö и негорöн пондiс баитны:
— Сьöлöмö кылö: мыйкö неладно эстöн. Висьталi öнтай, мыся, ытшкисьö кинкö, а не, батя. Ачыт думайт, мый сэтшöм урмансис ытшкыны? Не чашьясö жö. Буди, бандит, а не ытшкисись... Петам чожжыка, колö застанитны высьтiссесö да сельсоветö юöр иньдыны.
Кывсис, что Кайдук гöгöрын кинкö ыжмалö. То курöг öшас, то баля дзель, то мордаэзiсь чери нуöтасö. Öтпыр куртiсиссезлiсь павжун гусялöмась. Конечно, дзель вермас кöинлö шедны, кольттесö абу сьöкыт и горш каньлö гусявны, но черисö нiя мордаэзсис оз вермö кыскавны.
Не сiя ли олö му пытшкас, кöда ыжмалö? Эз я сiя начкыв Кузьбöжнымöс? Может, весь ме вида куканьсö, что сiя нарошно янсöтчис, мед миянöс вашöтлыны?
Этö вöрыс только тöдö, но сiя оз висьтав меным нем.
Вöр... Кытшöм сылöн учöтик, дженытик нимыс и — мый ыжда ачыс! Сiя ыджыт и паськытанас, и вылынанас, сiя ыджыт уджнас и олöмнас, ыджыт басöкнас и нёштöмнас, гажнас и гажтöмнас. Кытшöм бура мийö тöдам тэнö, вöр, öт дорсянят мöдöдззат шуч, и кытшöм тöдтöм, невежöртана тэ! Талун тэ миянöс вердан и кöмöтан, а ашын кутан да йöртан ас пытшкат, кыдз налькö, — и абу тэныт не суд, не закон.
Ыш ловзисис вöрыс, пондiсö шушкöтчыны да öвтны уввезнаныс пуэз, бытьтö баитöны меным:
— Не сiдз шшуан, не сiдз шшуан!
Былись, эта не быдсöн сiдз. Егор висьталiс, что вöрыс радейтö сiйö, кöда радейтö вöрсö. И умöль делоыс частожык аркмö ассянят, ежели пö оз бöбав Висьöв. Висьöвсö ме чапка, сiдз кыдз сiя абу. Кольччö öтiк: вöрыс меным нем оз кер умöльсö. Оз кер сiйöн, что ме любита вöрсö. Меным быдöс татöн любо, нельки бытшкасян жельнöгыс и гуткулантшаккес, багсора уль дукыс и вöрлöн сьöкыта ружтöмыс.
Палёжын мийö медодз инмим гöрдсэтöр вылö.
— Сёйыштам, деда, сэтöрсö, — корси ме. — Видзöт, кытшöм розъя!
— Но, дак мый, сёйыштам, — кокнита согласитчис Егор. Согласитчис сiйöн, что не куимöт кокыс, не виль нинкöммес эз содтö сылö вынсö, эз вашöтö кынöм сималöмсö.
Егор босьтiс роз-мöд да пуксис колода вылö, пондiс шырзьыны шуч тыдалан, дзик стекляннöй доноккез, гöрд туссесö. Сiя чапкалö öмас öтiк тусьöн и пичкö нiйö пиньяйезнас нето быдсöн ньылалö. Ме сюя öмам кырымтырьям и ярска-курччала лэчыт пиннезнам. Тöда, что уна сюйны оз туй — пиннез йöрмасö, но разь туйö не сёйны этö шöмакодь чöскыт ягöдсö, кöр кынöмын пустöй кишкаэз польскöтöны?
Но вот менö кезöтiс сэтöрыс, и ме чеглалi роззэсö да тэчи Егор öлöдзö. Сiйö оз шöммöт — старик и ыжман няньтöг сёйö.
Мöдi ме тожö пуксьыштны, но ятнöя кылi мöслiсь нирзöм.
— Тэ кылiн, деда?! — горöтыштi ме.
— Бöра кинкö ружтö?
— Мöс нирзö. Этö сёравно сiя!
Кытшöвтi ме жельнöгöн да кипрейöн вевттьöм мысок и сразу казялi Кузьбöжсö, кöда куйлiс турунтöм му вылын.
— Сiя, деда, сiя! Лок татчö! — чирза и серала ме, ачым кыскася куканьыс гöгöр пидзöс вылам, малала сылiсь бокö чапкöм юрсö. Да и Кузьбöжыс рад, натьтö, кöть и синнэс тырöмась синваöн.
— А-а, вон мый аркмöм, — сибöтчис да шуис Егор. — Ноко кыскам кынöм увтсис коккесö.
Водтöтiм куканьсö бок вылас, нюжöтiм коккесö. Егор пондiс нiйö нöитны мыйлöкö.
— Мый, деда, лоöма?
— Коктöмалö... Висьöв коксадьсö гусялöм. Адззан эд, кыдз кöрчитчöмась коккес? Вердны колö, тшыг эд... Кыдзкö эшö кöдздöтiс, а то бы гнусыс öдöлейтiс.
Кузьбöжыс, мымда судзöм, муöдз сёйöм турунсö да пипуоккесö. А часöт тшыг — не пак не кынöм абу — витш кыскöм.
Вайи ме турунсö öтпыр да и мöдпыр, но куканьлö умöль сiдз сёйны — юрыс му вылас куйлö. Егор казялöма ни этö и вайис быдса ноша кипрей.
— Жилаэсö эшö нöитыштам, вöлись перина ольсалам, — баитiс Егор. — Веськалан, Кузьбöж, öддьöн эшö гöняйтан палёжöттяс. И йöвнат миянöс вердан. А ашын додь кайöтасö, мийö петкöтам тэнö гортö.
— Мыйлö додьсö?
— А кыдз инö татiсь петкöтан? Телегаöн этчö он пыр. Водтöтiм куканьсö кынöм вылас моз, веськыт бок увтас тэчим шаттез да ны вылö ольсалiм кипрей — лöсьöтiм и перина, и юрöдз.
Час бöртi мöссэсö мийö вайöтiмö Кузьбöжыс дынö.
— Эстöн и вердам талун, ылöжык ог лэдзö, — висьталiс Егор.
— Кытчöдз югыт, тэ видзöтлы, Петю, мöссэсö, а ме узьышта. — Шоччись, деда, шоччись, ме видзöтла.
Егор летiс да ольсыштiс турун, водiс и шебралiс юрсö плащнас. Ме котраси Лапьяö, вайи ньöв да ньöвьёссез, медбы киэз да синнэз тренируйтыштны. Паськыт мыр бокö шомöн рисуйтi фашистскöй рожа и пондi лыйсьыны.
Лыйи сувтсöн — эг инмы. Кынымкö ёсь лэдзи пидзöс вывсяням — öтпыр инми. Но, мысся, водсöн сё ни синсö писькöта, но ёсьö бöра мыр бокöттяс лэбзис. Öддьöн метока ни лыйсьылi, а часöт ог инмы. Мый лоис мекöт? Этö сысянь, что талун мыдзи. И синнэзö мыдзöсь, умöля адззöны.
Думайта сiдз, ачым фашистыс чужöмö метитча. А сiя вöрзьöтчис, кваркыш-кваркыш керис синнэзнас и серöмтчис нёштöма. Пиннес кузьöсь, дзик вöвлöн, и сiсьöсь. Сералö да мелань кыссьö, а öмас кинжал видзö.
Öши перво, ог тöд мый керны. Но сыбöрын кватитчи да жагöник, мед эз казяв фашистыс, судзöтi боксим кöртовöй йыла ёсь, кышалi сiйö, зэлöтi ньöввужсö. Видзöта: одзам не фашист, а дзугсьöм тоша старик, дженытик сюрока. Ö-ö, да вон кин сiя — Висьöв! А сёравно — фашист ли, Висьöв ли — öтiк родiсь!
Лэдзи ньöвьёсьöс — только виж мунiс да татшкисис вöрисьыс синö. Пöртчис Висьöлыс тöвчикö, уннялöмöн лэбтiсис небоас. Лэбзьö сiя, а бöжыс, дзик кузь гез, кыссьö палёжöттяс.
Сэтчö кысянькö одзам сувтiс ыджыт да вöснитик, дзик таг шатин, старуха и пондiс жевгыны:
— Тэ мыля зонöлiсь синсö писькöтiн, а?
— А мыля сiя Кузьбöжнымлiсь коксадьсö гусялiс? Одзлань тöдны пондас! Вот ме эшö тэнö...
Мöдi ме виль ньöвьёсь судзöтны, да кинкö кутiс киöс. Ме сайми, лэбтыштi юрöс: одзам сулалiс Егор да баитiс:
— Эн лыйсьы, Петю, пемытiнас, мöслö синас верман инмыны. Отсав-ко би керны да мун узьны.
Егор бишедтаннас öзтiс вата, пуктiс сiйö кöз нитш коласö да пондiс ушкыны. Ме ваялi сiсь мыррез да кокораэз и водi сы ольпасьö.
Ашынас, кöр мiйö йöртiмö мöссэсö загонö, Синяшорас локтiсö кык вöв: öтыс додьöн, мöдыс телегаöн. Телегасис чеччисö Титовна, бригадир Ларион и эшö куим тöдтöм морт. Нiя вöлiсö городскöй паськöмаöсь, и ме вежöртi, мыйлö нiя татчö локтiсö.
Егор дьöгöдялiс Корольлiсь кырöвтöм боксö, мед сэтчö гуттэз эз пуксьö, и дьöгöдь дознас петiс локтiссес дынö.
— Дак мый пондам керны? — юалiс Егор нылiсь.
— Эн тэрмась, дедыс, — горöтчис сьöд, дзик цыган, мужик. — Перво висьтась, кыдз вöлi делоыс, мый адззылiн, кытiсь. А тэ, зонка, — сiя лöгöнмоз видзöтыштiс меланьö, — мун шоччись.
Ме дузгыльтчöмöн мунi казармаас. Öбида кутiс: гусö ме адззи, а пондас кутны бандитсö Егор. Кысь сылö! Öдва талун палёжись петiс: кытчö павкас кок нырыс, сэтчö и усьö. Коктöмсялöма, кыдз Кузьбöжыс жö.
— Петю, петав жö татчö, — кытсöвтiс менö Егорыс, кöр ме водi ни нараэз вылö. «Мöдöны босьтны сьöраныс», — ымйыштiс менö рад дума, и ме бордпавйöн петi öтöрас.
— Локтi, деда. Мый колö?
— Ковсяс тэныт пырны, — шуис Егор. — Косöс паськöтö и коккезöс жугдö... Ме куканьыс дынö нуöта Ларивонсö.
— Ладно, деда, эн пов, — висьталi ме и шынньöвтi сiдз, что, натьтö, öмö пеллез дынöдз паськалiс. — Не учöтик эд и не первуись вöрас муна.
Егор ляшмасис Ларион дынö, а сьöд мужикыс шуис:
— Но, тöдсасямö нö: ме Василь Сидорыч, а эна менам ёрттэз, Миша да Иван. А тэнö кыдз шуöны?
— Ме Тури Петя, а дедö — Жысь Егор.
— Вот и бур... Эн я вунöт, Петя, кöд местын?
— Пожарнöй саяс, гöрд ньыв дынын.
— Ноко висьтав, кыдз сэтчин пырны. Ме висьтаси, кытшöм лягаэз лоасö миян туй вылын, кытчöдз кыссьö вылын места и кытöн пондöтчö лажмытiн.
Василь Сидорыч кывзiс и видзöтiс картаö. Сыбöрын кыскис планшетсис картасö да öтiклаö карандашöн керис кресток.
— Бур дача адззöма.
— Сэтчин некытшöм туй абу, ошшес, буди, пыравлöны, — шуи ме.
— Вот, вот, самöй вöр пыдöсас... Дак пыртан миянöс?
— А кыдз нö, Василь Сидорыч! Старикыс оз вермы, а сэсся кин? — горöтыштi ме.
— Только кепкаыт öддьöнöв басöк. Кольны сiйö колас, а то öштан. И нинкöммет тово, кыдз баитсьö, озö видзö аш два о.
Тöдтöм вöлi ме понда эта басниыс, но ме вежöртi, что Василь Сидорычлö оз гленитчö отопкиэзö да симöтовöй фуражкаö.
— Ме коля фуражкаöс. И виль нинкöммез кöмала, — сярзьыштi ме и уськöтчи казармаас, но кульыс кок увтам сюйыштiс увтор, и ме нюжалi кынöм вылам.
— Эн чепсась, Петя, а то нырнат быдöс мусö гöран, и мöдiккез чужьясьны пондасö, — горöтчис Василь Сидорыч. А ме видi ачымöс: «Гузи-мези сiсьмöм кок! Вот öнi оз босьтö!»
— Эн доймы? — юалiс Миша да отсалiс чеччыны.
— Э-эг, мый меным лоас! Увжугыс то нинкöмам пырис. А виллезас оз пыр.
Вежи нинкöммезöс. Титовна пыртiс кружка йöв и нянёк.
— Давай сёйышт, сыбöрын эшö верда.
Йöвсö юи, а няньсö карманам пуктi — некöр чупкöтчыны öнi.
— Ва нямöттэтö веж, — тшöктiс Титовна.
— Олас, — макнитi ме кинам. — Да и немöн.
— Менчим кöмалан, — сiя пöрччалiс ассис сöдзовöй нямöттэсö да сетiс меным.
Ковсис эшö öтпыр пöрччасьлыны. И шабурöс пасьтавны. Титовналö ме эг лысьт паныт сувтны.
И вот мийö вöрзим. Перво мунiм палёжöт, сэсся вуджим пожарнöй грань, пырим ыджыт вöрö. Менö лэдзисö одзас. Кыдз и тшöктiсö, ме мунi жагöника, кошши волькытжык местаэз, медбы öтiк ув кок увтын эз кажнит. И чöлiмö.
А вöрыс эз чöв. Сiя олiс аслас оланöн: шувгисö статя ньыввез да кöззэз, чорыта кышöтiсö паськыт листтэзöн пипуэз.
Поснит кайезлiсь чивзöмсö шочыника орöтлiс кыррезлöн кивзöм да вöрдудiэзлöн вургöм. Мукöдпырся пуркнитас-лэбтiсяс тар, сайöвтас гора шовкöтöмнас быдöс мöдiк шыэсö. Кöр сiя пуксяс пу вылö, минута етш сулалö лöнь, и кылö, кыдз кöс пуын дзуртö пугаг да пель одзын норöн бöрдöны тшыг номмез.
Пöрись рака, кöда оз ни чайтчы быд асыв петавны ыббезö, горöтас сибдöм голоснас — и вöрын вились лэбтiсьö гожся гор.
Кинкö павкöтiс менö бöрсяням, ме бергöтчи. Этö вöлi Василь Сидорыч. Мöддэс мышкыртчöмась и мыйкö кошшöны турунсис.
— Шоччисьыштам, Петя, — гусьöник висьталiс Василь Сидорыч.
Пуксим мийö кöзоккез коласö. Василь Сидорыч бöра кыскылiс картасö, дыркодь видзöтiс сiйö, сыбöрын шуис:
— Миша, тэ кольччан этчö, кöр шоччисям, и вит минута бöрсянь пыран миян туй кузя. Эстi сiя неважын мунöма, может, эз на лок сэтчинöдз. А босьтны колö сiйö узикас. Ойся хищникыс луннас узьö.
— Зонкасö эз бы ков пыртны, — горöтчис Миша.
— Вайöтас матöжык, вöлись колям. Эна следдэс кинлöн, поди, и эмöсь. Öтнаным ог адззö... Часöт узьны. Ме дежурита двадцать минута. Сэсся Миша сымда жö. Но, лöньсим.
Ме куни синнэзöс, но сразу эг вермы онмöссьыны, кыдз Миша да Иван. А сайми сысянь, что пондi пöдны.
— Но и узян, зонка! — осудитiс Василь Сидорыч. — Быдса час ныртö зэлöтöмöн видзи. — Сiя кыскис вешьян кармансис револьвер да сюйыштiс пиджак карманас. — Вöрзьöтчим.
Öнi мийö мунiм эшö жагöнжыка и бура смекайтчим. Одзаным эз тöдчы некытшöм след. Кöд коста узим, тальсьöм туруныс ештöма лэбтiсьны.
Юрам öтiк дума: не сорасьны бы, не кежны бокö, а петны веськыта сэтчин, кытiсь адззылiм тшынсö. Сылань я ме нуöта нiйö?
Дзарьяся öтмöдöрö, но миян гöгöр нем тöдсаыс абу, нем эз пантась сэтшöмыс, кöда бы усьлiс син вылö одзжык.
Вуджим мöдiк лог, пондiм кайны мысок вылö. Чожа поперегалiм мысоксö, и лоис оль — лажмытiн. Сы дорын и сулалö гöрд ньылыс. Адззам кö сiйö ньывсö, дак кöин позсö ог ни орддьö.
Эшö невна мунiм, петiм оль дорас, но ньывсö эг адззö. Казялi ме, что петiм вывланьöжык: эстöн ольыс векнитжык.
Лэдзчим увланьö, и гöрд ньылыс пондiс тыдавны. А двести метр ылына сы дынсянь, векнитик ляга дорас, быдмö кыдзыс. Öтнас сiя эстöн, мöдiк кыдззез абу, и сiйö адззыны кокнит.
Видзöтiс Василь Сидорыч местасö, висьталiс меным пель одзам:
— Дзебсись кытчöкö этчö да куйлы лöня, кытчöдз ме ог кытсав, — и мышкыртчöмöн моз мунiс кöзоккес коласöт лягаланяс. Иваныс иньдöтчис бокöжык. Ме пыри колодникö, кытчö увсьöн-вевсьöн пöрöмась десяток пу. Ны шöрын, учöтик валёжинаэз вылын поперёк, нюжöтчöм кузь да ыджыт колода, вевттисьöм кузь турунöн. Вот сы йыв бокö и водi да пондi видзчисьны, мый часöт петас. Конечно, пондасö лыйсьыны, горöтлыны. Кинöскö, поди, и ранитас бандитыс, если оз ештö сiйö кутны узянсö.
Джын час, натьтö, куйлi, буржыка ловзисьны эг лысьт, а вöрас только пиксiсö кайез. Неужто нiя эз адззö землянкасö? Али ештiс пышшыны?
Гуж-важ керыштiс одзам и ровно вöрзьыштiс колодаыс. Видзöтчи öтмöдöрö - некин эз тыдав не эз кыв. Нёджжöвтi пу увтас, но и сэтчин нем сэтшöмыс эз вöв, только тыдалiс турун да пу бердсис кыртöм и öшöтчöм каччез. Может, нiя гужöтiсö?
Эшö öтпыр видзöтi пу увтсö. Син вылам усис трепичок, кöда öшалiс самöй комель дынас. Кытшöм сiя трепич, мыля сэтöн öшалö?
Мöдi ни кыссьыны сэтчин да буржыка видзöтны и висьтавны вöлись Василь Сидорычлö, но кинкö чирöстiс-горöтiс бöрам:
— Стой, стой!
Ме пукси и нёджжася. Некинöс ог адззы, но кыла, кыдз киннэзкö котöртöны чашьяöт.
Чавкнитiс лыйöм, и ме уськöтчи турун коласас кыминь.
— Сувтчы, буди, а то вия! — кылi ме — Стой, мыся! Ордчöн мекöт, дзик вöрмöс, котöртiс морт, и сiйö панöвтiс
Василь Сидорычлöн лöг голос:
— Стой! Киэтö вылö!
Пышшисьыс, тыдалö, сувтчис, и Василь Сидорыч негорöн ни висьталiс:
— Не вöрöтчыны!.. Миша, кошшы! А сэсся корис и менö.
Чеччи, сибöтча полöмöн, мылякö коккез дрöжитöны. Миша висьталiс:
— Черок, кисет, биток да чага. Сэсся нем абу.
Видзöта, Василь Сидорыч видзö киас револьвер, а сы одзын сулалö солдатскöй паськöма, но нинкöммеза морт. Эта морт бöрын сулалö Иван. Киас видзö тожö револьвер. Иваныс, видно, и вöтчис бандитыс сьöрö.
— Да эта эд Прокоп! — горöтi ме. Прокоп гажтöма серöмтчис да шуис:
— Этö ме, Петя, вот...
— Тöдан сiйö? — юалiс менчим Василь Сидорыч.
— Кайдукись сiя, но эг думайт, что бандит.
— Тэ мый, Петя, ыштан? — повзис Прокоп и синнэсö барöтiс ме вылö. — Кытшöм ме бандит!
— А мыйлö нö керин ош гутö?
— Чöлö ноко, — сувтöтiс миянöс Василь Сидорыч да гыжйыштiс юрбöрсö. — Висьтась, Петя, мый сы йылiсь тöдан.
Ме висьтаси, что Прокоп стрась чожа кыйö нинкöммез — и панö, и банйö öтдруг — и что таво сельпоö сетiс ни пятьсот гоз. Эшö висьталi, что Прокоп контуженнöй и эмöсь сылöн медаллез.
— Этö сiдз? — юалiс Василь Сидорыч.
— Правда висьталiс Петяыс.
— Мый эстöн керан?
— Нин керавны мöда... и банок, поди, мыся, адзза. Сэсся мый татiсь босьтан?
— Мыля пышшыны мöдiн?
— Билеттöг пыри... штраф, мыся, пуктасö, кутасö ежели. Сельпоыс эз на вешты, и немöн билетсö босьтны. Эг на билеттöг пыравлы, а вот талун пыри.
Адзза ме, что не сiя шедiс, кöдö кошшим. Василь Сидорыч тожö этö адззö, но сё басниэсö лöсьöтлö.
— А гуас некин абу? — юала ме.
— Некытшöм гу абу, — шуö Василь Сидорыч.
— Кыдз жö абу? Мийö эд адззылiм — лонтiсис гор.
— Просто би керлöм. Гöпокö керлöм.
Усис тöдвылам трепичыс. Ме висьталi этö Василь Сидорычлö. Миша недоверчивöя видзöтiс ме вылö и, натьтö, думайтiс, что ме бöбöтча. А Иван даки эз и вöрзьöтчы и сё сiдз жö видзис револьверсö Прокоп бöрын.
— Видзöтам, Миша, — тшöктiс Василь Сидорыч. — Кöда пу увтын?
Нуöтi ме нiйö сэтчин, кытöн сайласи, водi му вылас, медбы мыччавны нылö трепичсö. Ордчöн мекöт мышкыртчис и Миша.
Пу увтас летъялiсö только сьöдöтöм да орласьöм дора качкаэз.
— Бöра, Петя, синнэт бöбöтiсö, — шуис Миша да советуйтiс: — Ветлы-ко больницаö умöля тэ адззан. Эз висьлö одзжык?
— Курöг шогöт вöлi.
— Вот адззан: нездоровöйöсь синнэт. Может, быль сiдз? И тöн вот умöля лыйси...
— А трепичыс вöлi. Натьтö, усис, сейчас видзöта, — шуи ме да лöсьöтчи мунны комель дынас, но Василь Сидорыч кутiс менö пельпонöттям и ыстiс Мишаöс.
Умöль вöлi сибöтчыны комель дынас, и Миша кайис колода вылö да кыскис револьвер. Василь Сидорыч тшöктiс водны миянöс, ачыс пондiс вöйсасьны пу сайсянь.
Миша локтiс пу конецöдз, ыкöстiс:
— А ноко пет! Шы абу.
— Пет, шуöны! — мöдпырся горöтiс сiя. — Пессьыны нем, тэ миян киын! Мыйкö пондiс шоркöтны пу пытшкас, и Миша макнитiс кинас. Сы дынö уськöтчис Василь Сидорыч.
— Стой! Сiдз куйлыны! — командуйтiс Миша. — Киэтö нюжöт одзлань...
Кöр ме чеччи да кайи пуэз вылас, Василь Сидорыч сулалiс кузь турунас да кöрталiс пугыркись мыччöм киэз. Кöрталiс, отсалiс бандитлö петны, тшöктiс сувтны кок йылас. Сiя сувтiс, чатыртчис. Миша лапкöтiс сылiсь карманнэсö — абу я оружие?
Этö вöлi военнöй паськöма, ыджыт мыгöра старик, пашмöм юрсиа да кузь тоша и векыша пиннеза.
Вот бандит дак бандит! Полöм петö и видзöтны сы вылö.
Кöр петкöтiсö сiйö чашьясис, ме эшö öтпыр дзарнитi сы вылö и казялi гöрд рожабан йыввез да лöг и лöг синнэз. Тоша сiя, но абу пöрись. Том старик.
— Извинит, Прокоп, что сiдз аркмис, — висьталiс Василь Сидорыч. — Сэтшöм ни миян уджным.
— Мый, поди, — шыасис Прокоп. — Сяко овлö... Ме вежöрта эдö...
Ме тожö мöдi извинитчыны Прокоп одзын, что умöля думайтi сы йылiсь, но сiя лапкöтыштiс пельпонöс и гордöя шуис:
— Бур мортыс йылiсь кöть мый тэ думайт, а умöльыс сы бердö оз лякась. А что билеттöг, дак ме сыбöрын сразу унажык и вешта... Прощайте инö, ме муна, — и юасьтöг сюйыштiс коскас чероксö, босьтiс кисетсö, бишедтансö, чагасö да мунiс.
Чожа локтiс Миша, чапкис том старикыс одзö сылiсь сапоггез да нятьöсь нямöттэз.
— Вот нямöтыс и öшалiс сэтчин, — висьталi ме.
— Бура адззöны, зонка, синнэт, — висьталiс Василь Сидорыч. Спасибо тэныт.
«Тэ мыля не сэтшöм?» Витя сёйис ыджыт кöбывкаöс. Айöсянь письмо. Öнi ыджыт и учöт уджалö
Недыр только эг вöв гортын, а деревняным совсем мöдiк лоöма: важмöм, быгалöм и лöнь, дзик не олан деревня. Ровно и учöтжык лоöма, бытьтö жмитчыштöм да кöрчитчыштöм жарсяняс. Да не косьмöм сiя, а чинöм ― разьöмась меддорись керкусö, öнi петшöр петалöма. Этö Пилика мунöма пö овны нылыс дынö, а керкусö вузалöма.
Вон и кузница абу, öтiк стойло кольччöм. Кузница юрсö тöв вöлi нöбöтöма, и кузнецыс тшöктöма сувтöтны сiйö горт деревняас, Шулимö: оз пö ков сэсся вöрисьыс туй вылö строитны — сёравно чужйисяс да разяс.
Тöлыс не только кузница юрас люкасьлöма, но и пöрлалöма уна йöррез да стыннэз. Вились нiйö некин абу керöма, а только лэбталöмась да пыкöтавлöмась. Öнi некöр, колö ытшкисьны.
Миян стынiсь öтiк столб абу пöрöм. Кык год вöлись сулалöны, а тятюö ёнöсь бöрйылiс, пожумовöйöсь. Вот керкуным умöль дак умöль. Сiсьмöма, пöлiньтчöма, жёлоббезас турун быдмö. Öшыннэс учöтöсь и лажмытöсь, а стеклоыс — куш тор. Этö Лена да Витя öтнаныс овтöн жугдалöны.
Ордчöн виль керку сулалö, но юртöм, только стенаэс умöлика вевттьöмась. Сiсьмас, натьтö, оз кö чожа берт айö.
Матица конецас, öтöрсяняс, гижöмась цифраэз: 22.6.41. Нiйö айö гижис гöрд краскаöн, сурикöн. Этö число, месяц да год. Сэк вöлi пуктöма матицаыс, сiя лунö вöлi помеч лэбтыны керкусö. Куимöт лунас айö мунiс воюйтны.
Миян оградаын котрасисö да путрайтчисö бусас типпез, а посöдзын пукалiс Лена. Сiя керис муовöй бекöрок и мыйкö баитiс аскöттяс. Пöлок вылын косьмисö муись жö керöм бекöроккез, паннез, кружкаоккез. Öлöдзас куйлiс дöраовöй акань.
— Лена, ме ягöд вайи! — кытсалi соёкöс.
Сiя чеччис, уськöтiс аканьсö и эз лэбты, а пондiс видзöтны менö юрсянь коккезöдз. Видзöтöв-керис, вöлись пуктiс нильыг бекöроксö мöддэскöт öтлаö, сибöтчис ме дынö:
— А мыля тэ не сэтшöм? — юалiс сiя да судзöтiс нятьöсь кинас юр вывсим симöтовöй фуражкаöс и пуктiс аслас юр вылö. — Но висьтав, Петька, мыля тэ не сэтшöм?
— Да кытшöм, Лена?
— Он тöд кытшöм? — дивуйтчыштiс сiя да котöртiс посувтö. Чожа Лена вайис лöз тетрадь корка, мыччис меным. — То эттшöм...
Босьтi бумагасö, видзöта. Сэтчö кинкö рисуйтöм быдса картина. Пу бокын сулалö сьöд морт. Юр вылас кышалöм веж юркытш, а юрсисö лэдзöм пельпоннэсви. Öт киас сiя видзö ньöв, а мöдас — меч. Паськöмыс — öтiк лысовöй юбка. Увтас гижöма: Синяшорись кам.
— Кысь тэ этö, Лена?
— Зойка сетiс. Кам, шуö, Петяыс öнi. Ме шуа: кытшöм кам? То эттшöм, шуö. И сетiс этö. А тэ не сэтшöм.
— Ме только недыр сэтшöмыс вöлi. А типпес кысь?
— Букаторись мамö вайöтiс.
— Не букаторись, а ин-ку-ба-то-рись... Кытöн Витяыс?
— Сiя керкуас. Талун миян нимлун, вот. Витяыслö куим год тырис, а меным вит. Мамö блинöн вердiс, вот. А ме кутi ыджыт кöбывка и сетi Витяыслö. Лок мыччала.
Пырим керкуас, ме сувтöтi корзинкаöс пызан вылö да пондi смекайтчыны. Витя доддялöма нинкöмö важ каб и ваялö пес ― шеггез да бабкаэз. Эз и видзöт миянлань — недосуг.
— Витя, эз курччöвт тэнö кöбывкаыс? — юалiс Лена.
— Ме сiйö ачым курччöвтi.
— Висьтав ноко, кытчö воштiн?
— Öмам воштi, — сералö Витяыс.
— Сёйин я мый я, Витя? — босьтi ме сiйö киам да пукси сыкöт лабичö.
— Ну! Ам только кери да ньылыштi.
— Чöскыт разь сiя? — юалiс Лена.
— Чöскы-ыт.
— Вöрöтчö кынöмат?
Витя пешлiс кынöмсö да висьталiс:
— Вöрöтчö. То эстöн.
— Зубыт кынöмыт, Витя? — юалi ме.
— Зубыт, — кымöртчис Витяыс и пондiс нимавны чуньсö. Ме мöдi котöртны мамö дынö, но сiя сэтчö ачыс пырис — павжнайтны локтöма.
Лена öдззис чеччавны да сьывны:
— Витяыс кöбывкасö сёйис, Витяыс кöбывкасö сёйис! Öнi кынöмыс висьö, öнi кынöмыс висьö!
— Кытшöм кöбывка сёйин, кага? — малыштiс Витяыслiсь юрсö мамö.
— То эттшöмö, — мур-мар горöтчис Витя да тюкыштiс чунёкнас öшын вылiсь гераньö.
— Бöбöтчука тэ, вот кин, — видчö Лена. — Эта сiя и эм, öтiк сюраыс. Эд веритö сылö, сiя эз сёй. И кынöмыс оз вись.
— Чöлö ноко, — горöтыштiс мамö. — Вот ме босьта шатёк, дак сiя адззас правдасö! Сёйин али эн, Витя?
— Э-эг, серöмтчис Витя. — Ме токо бöбöтi сiйö: сёя, шуи, тэнö, а сiя пышшис.
Витя чеччöвтiс джоджö, мырддис Леналiсь фуражкасö и пондiс йöктыны.
Ме кутi кöбывкасö да чапки жугалöм öшынöт типпеслö. Но нiя нюжлалiсö голяэзнысö, пöлiнялiсö юррезнысö да курзiсö, а сёйны эз лысьтö.
Мамö пуксис бокам, да пондiс юасьны:
— Но, работник, эн гажтöмтчы?
— Сэтчин, мам, öддьöн гажа.
— А мийö гажтöмтчимö ни... мыля сы дырна эн лэдзчыв?
— Некöр эд, мам, уджавны колö. Öнi нин кулим, шуллез уна керим. Ашын лунтыр пондам кыйны.
— Уджав, кага, отсав меным. Вот локтас айыт, шоччисян сэк.
— Ме озъягöд вайи... Корзинкасö асьным керимö.
— Эм ни ягöдыс?
— Уна сэтчин... Воронеч сэтöн эм, тэ дзимляв сiйö. Эшö уткаэз да юссез эмöсь, — усисö тöдвылам чачаэс, и ме кыскалi нiйö шабур кармансим да сеталi Витялö.
— Айыт письмо тэныт гижöма, тöн локтiс. Джадж дорас пуктi. Тэ лыддьöт сiйö, а ме сы коста баня лонта. Как раз ыркыт талун.
Паськöтi ме куим пельöса конвертсö, лыддьöтi öтпыр да и мöдпыр.
Вот мый сiя гижöма меным:
Петю, дона менам зон!
Кык год ни тэнö эг адззыв, роднöйöс. А мамыт гижлiс, тэ пö ыджыта ни быдмöмыт и кутчöмыт уджавны. Ме рад, что инмин Егор дынö, бур старик дынö, умнöй морт дынö. Кытчö эг ешты ачым велöтны, велöтас сiя. Только кывзы сiйö, эн аснырав.
Ме ыджыт спасибо висьтала оланлö, что сiя керис менö пастухöн да видзис вöрын. Эта меным öддьöн пригодитчис татöн, кöр мийö петiм враг кытшись. Кин эз тöд вöрсö да полiс сылiсь — кольччисö сэтчин.
Унаö велöтiс менö вöрыс гортын и бура отсалö меным татöн, кöр ме ветлывла ёрттэзкöт кöиннэс ордö да вайöтла нiйö сьöрам ловйöн.
Неважын сизим лун ветлöтiм да вайöтiм ыджыт ошöс, а öтлаын сыкöт дона гижöттэз. Эта понда меным сетасö орден.
Дона менам зон! Эн пов уджсис, кокньöт мамытлiсь сьöкыт олансö, отсав сылö, мымда верман.
И берегит мамтö: сiйö оланыс миянлö сетö только öтпыр. Сьöкыт миянлö татöн, но тöд, что чожа кöин увтырсö мийö пондам вöтлыны. Локтас кад — пиньöвтам сылiсь сивилёнсö. Сэк ме берта гортö, и мый не тiян вын сьöртi, кера ачым.
Уджав, зонö, велöтчы бура. Быдмы, ло повтöмöн. И кинöн бы эн ло — шофёрöн, лётчикöн, велöтiсьöн или пастухöн — ло бур мортöн. Тэ умнöй зонка — чожа тринадцать тырас — и вежöртан, мый ме тэсянь видзчися.
Гижлы частожык, эн дышöтчы.
Тэнат ай.
Эта вöлi первöй письмо, кöда гижöма ме понда. Ме лыддьöтi сiйö неöтпыр, и быд кылыс пыр кежö кольччис менам юрын, менам сьöлöмын.
Кыдз висьтасьлiс Егор, тэнат киэзöн кыйöм медодзза нинкöм, медодзза вийöм ур, медодзза бой — некöр оз вунöтсьы. Сiдз и эта письмоыс.
Айöлö ответсö ме гижи сразу, висьтаси, кыдз олам да мый керам. Гижи, что вöрсис ме ог пов и что милициякöт мийö кутiм бандитöс, кöда пышшöма фронт вылiсь. Эшö юöртi, кыдз ме велалi кыйны нинкöммез, мымда заптi тöв кежö нин, бан да корось. И кöсйиси бура велöтчыны, берегитны мамöс, сойöс, вонокöс.
Кытчöдз лонтiсис баняыс, мийö мамöкöт куртiм межаэз вылiсь турун да пыртлiм сарайö. Öбедайтiм быдöнным друг, нельки Витя сулалiс лабичын пидзöс вылас и сёйис озъягöд. А ме сёйи шаньгаэз да юи йöв — быдса кружка. Лена панялiс каша.
Ачыс мамö, конечно, йöвсö эз сёй. Мöсыс тöвнас öддьöн моритчис и öнöдз етша сетлiс йöвсö, а государстволö колö вештыны двести двадцать литр.
Быд серьёзнöй басни мунö пызан сайын, и мийö тожö видзим совет, кыдз овны одзлань.
— Туруныс таво уна чукöртчис, — баитö мамö. — Дак, поди, куканьсö нуöтам государствоас да вештам яйсö эшö Игнатикаыс понда, а сылiсь баля вайöтам тöв кежас. Ме баитi ни сыкöт, согласитчис.
— Дак мый, вайöтам, — шуа ме,
— Пимиэсö немись таво керны, тэ менчим пондан новйыны, кöр кöдзыт лоас.
— А тэ мый?
— Ме нинкöммезнам ола, только бы дзоньöсь вöлiсö.
— Öнi прокод лоасö дзоньöсь. Нин-баныс эм, кыйны кужа.
— Кольттез сельпоö корöны, тöн председательыс öддьöн видчис. Ерика бабытлiсь кори да куим десяток сетi... Арнас картовсö сылö кöсйиси гарйыны.
— Гарьям, мам. И ассиным, и сылiсь гарьям, — кöсйиси ме, ― А мийö бандитöс тöн кутiмö...
— Кытiсь? — юалiс мамö и бöр пуктiс паньыштöм кашасö бекöрас.
— Вöрсис. Гырка пуын олöма. Война вылiсь пö пышшöма.
— Да кинкöт кутiт?
— Куим милиционер кайлiсö, а ме мыччалi, кытöн сiя сайласис.
— Ен-батюшко! — шушкыштiс мамö. — Ме думайтi — Егорыскöт. А кыдз бы вийис? Вон Сирин волокын чöвтöмась мужикöс...
— Абу сылöн оружиеыс.
— Бандитыслöн прокод эм наган нето пурт.
— Эталöн эз вöв... эз адззö. Витя кывзiс, кывзiс да висьталiс:
— Миянö бандитыс тожö пыралiс. Ме ачым кутлi сiйö.
— Эн лёб абутöмсö, — поперегалiс сiйö мамö. — Эн блажит.
— Быль кутлi. Лöг и лöг сiя, а менö нем эз кер.
— Кинöс тiйö, Лена, кутлiт? — юалiс мамö.
— Эг ме адззыв, бöра бöбöтчö.
— Ме ог бöбöтчы, а тiйö од веритö, — дузiс Витя. — Ыджыт сiя, сера и бöжыс эттшöм, — Витя кöстыштiс чуньсö крючокöн.
— Сiя Бантик, Витю, кöдö тэ любитiн. Сiя пон, мöдöрас олö, — висьталiс Лена.
— Ох тэ, заморыш менам ылöстöм, — шынньöвтiс мамö. — Сёй давай, сёй да быдмы чожжыка...
Меным мамö колис сöстöм йöрнöс-вешьян, тшöктiс миссьöтны юрöс кунваöн, ачыс бöра мунiс видззез вылö.
Баняас одзöв вöлi мунны, и ме котраси Пашка ордö, медбы висьтасьны бандит йылiсь, но ны ворота одзын сулалiс тас — некин абу. Конечно, сiя кыскалö турунъюррез нето пинялö бергöтöм пар. Да и быдсöн деревняас часöт некин абу, разь только челядь да слепöй старухаэз. Но и нiя весь оз пукалö: кин гöрдззисьö, кин миськасьö, кин весöтчö да киськалö гряддэсö аслас синваэзöн. Война адззис уджсö коктöмлö и синтöмлö, мывкыдтöм челядьлö и беддя стариклö.
Ленасö да Витясö мамö эз тшöкты миссьöтны, но ме эг на вунöт айöлiсь кыввесö — отсавны мамöлö. Миссьöтi ме сапучейесö сiдз, что нiя лоисö, дзик гывьялöм сёртниэз.
Вöлись пывси ачым. Ох, и пывси — корось шутнялiс. Воззи нудаöсь коккезöс, лöдзöн да номöн чушкалöм спинаöс, незьдöтi да лэдзи вывтсим нятьсö, небзьöтi чорзьöм, вошшитчöм киэзöс.
Öддьöн чöскыта онмöсси баня бöрсяняс, но Витя эз сет дырсö узьны: саймöтiс и тшöктiс керны таратайка. Ме адззи чегöм оглобля, орлалi гöгляннэз да кери тележкаэз: Леналö öтiк кругаö, а Витялö — кык кругаö. Сэтчö и рытыс вöтiс.
Босьтi ме корзинкаöс, кытчö мамö пуктöма луктурун, чаль кыза морковоккез, огурец да шаньгаэз, челядьлö закажитi кывзiсьны и петi туёк вылö, кöда видззез кузя чуклясис Шулимö. Рытнас, биок дорын куйлiкö, ме висьтаси Егорлö айö письмо йылiсь, сы йылiсь, что сiя разведчик, и сылö мöдöны сетны орден.
— Смев тэнат айыт, бур морт. Сизим год, лыддьы, ордчöн уджалiм. Пуд сов сыкöт сёйим, и ме сiйö тöда. Эз веритлы даки, что Висьöв ыжмалö. Эта понда и прикашайтчис, повзьöтлiс сiйö размöд.
— Ноко висьтась, кыдз прикашайтчис, — кора ме. Егор кыскö кисет да трубка. Эта лоö, что старик мöдö висьтасьны, и ме кысся сы дынö матöжык, вода кыминь да пыкöтала тшöкаöс киэзнам.
Дата добавления: 2015-11-16; просмотров: 72 | Нарушение авторских прав
| <== предыдущая страница | | | следующая страница ==> |
| Кöч пöртчöма ручö. Мöссэзлöн бунт. Кузьбöж туйö панталi бöжтöмöс | | | Жысь Егорлöн витöт висьт |