Кöч пöртчöма ручö. Мöссэзлöн бунт. Кузьбöж туйö панталi бöжтöмöс

Бура-бытшöма чулалiс неделяся унажык. Егор велöтiс менö кыйны нинкöммез и керны корзинаэз. Гортö эг на лэдзчыв, но иньдöтi ни куим гоз нинкöм да корзинка. Мöдiк сэтшöм жö корзинка коли аслым — ягöдавны. Зойкалö эг отсав коросявны, но аслым чеглалi не öтiк ноша корось шать и тожö иньдöтi гортö.

Эшö öтпырись вовлiс миян дынö Прокоп и ме понда симöтiсь кыйис басöк фуражка.

Мийö сiйö бöра вердiм лязгайöн.

Аслым ме кери бур ньöв, öддьöн зэлытö и метокö. А Лапья дынас, кузь потш вылын, öнi пукалö пуовöй тури и, кöр эм тöв, шевкйö бановöй борддэзнас и öвтö бöжнас.

Мöссэс öнi йöвсö содтiсö. Титовна пондiс сетны миянлö йöвсö луннас куим кружка и гижны вит трудодень. Сэтiсь кыксö Егор сетлiс меным. Эна трудоденнез понда меным дöнзьöма куим кило пизь, и мамö меным иньдöтлiс ыджыт чöвпан. Конечно, чорзьöтыштöмö, мед дыржык тырмис.

Синяшор устьеын видзам мордаэз. Каждöй рыт ме сэтчинiсь кайöтла песканнэзöс, аррезöс да ёкышшезöс. А öтпырись вöлi шедöмась кык щука, да öтыс сы кыза, что сибдöма морда öмас. Сiйö ме эг вермы шедтыны и кайöтi морданас.

— Не бур одзын сэтшöмыс пырис. Огö сёйö сiйö, а кинлöкö сетам, — висьталiс Егор да нöбöтiс мöс высьтiссеслö. Нiя висьталöмась ыджыт спасибо — чериыс ыждаö жö — да тшöктöмась частожык ваявны сэтшöммесö.

Миянся да пуовöй турися Лапьяас вöлi эшö нёльöт олiсь — кöчпиян. Но сiя олiс гусьöн. Кутi ме сiйö тшöк пипуаинiсь и Егорыслö не эг висьтав, не эг мыччав: бöра эд не бур одзын шедiс! Видза ме сiйö йöрокын, а йöроксö вевтти потшшезöн да лысöн. Пытшкас рыт и асыв ме чапкавла небыт турун, пипу шаттез да картошка кыш. Но кöчокыс сёйö умöля — гажтöмтчö. И кöр ме локта сы дынö, дзебсисьö мыр вуж увтö. Мöдi ме сiйö сетны Пашкалö, но вот талун кайис Зойка, и ме кöсъялi кöчоксö сылö. Кыдз жö не сетны Зойкалö, кöр сiя менчим песлалiс йöрнöс и нямöттэз да козьналiс меным военнöй книга.

Егор кыскалiс пым пöимись лöсйöм пуоккез, пондiс кöставны дадь полоззэз. Мийö Зойкакöт перво кытшöвтiм мöссэсö, сыбöрын мунiм видзöтны кöчоксö.

Зойка сибöтчис йöрок дынас, нёджжöвтiс пытшкас и ножö серавны!

— Тэ мый рызъян? Али кöчокыс боккетö гильöтö?

— Абу тэ кам, если он тöд, кытшöмöсь кöччес!

— Ме даки тöда, а вот тэ... — и джöмдi сэтчö, кöр йöроксис казялi бусöй понокöс: моросас чочком звездаок, пеллес дженытöсь. Ачыс пелитчöма пельöсокö да никсö небурика.

— Этö ручпиян, а не кöч, синяшорскöй кам, — чанöтö пеллезöс Зойкалöн вöснитик голосокыс.

— А кыдз инö... сiя ручас пöртчис, — мыктала ме. — Этö... тöдан... Висьöлыс...

— Кытшöм висьöм?

— Не висьöм, а Висьöв. Вöрисьсö сiдз величайтöны. И сiя прокод отирсö дзугö ладсис. Вежöртiн?

Зойка дзир-бар керыштiс öтмöдöрö и горöн висьталiс:

— Некытшöм Висьöв, некытшöм вöрись абу. Тэ кам и эм, а не пионер! Поди, ворожитчыны эшö пондан? Видзöт, мый кöчоксит кольччöм — кучикыс да коскаэз. Сёйöма сiйö ручыс.

Турун вылас былись валяйтчисö коскаэз.

— А кыт инö сiя пырис? — видзöта ме. — И мыля бöр эз пет?

— Эз вермы, вот и эз.

Пырöма эта лёк зверёкыс вевдöрсяняс, лыссэз коласöт, а бöр чеччöвтны, конечно, сэтчö эз вермы.

— Ась сэтчин и олö öнi, — öбидитчи ме ручокыс вылö. — Кычан кодь только, а кöччезöс джагйö ни.

— Сiя жö кулас сэтчин.

— Ась чезнитö, абу жаль.

— Сет лучше меным, — корис Зойка.

— Колö, дак босьт, не менам эд сiя.

— Оз пур? Лöг тай да.

— Куш киöн сiйö он кут.

Осьтi ме клетушка вевдöрсö, чапки шабурöс кöч сёйисьыс вылö и кутi сiйö. Ручокыс тявзiс да гыжьясис, курччалiс шабурсö, но чожа выныс бырис, и дугдiс пессьыны. Сэк мийö иньдöтчим Лапьяö.

Сулалiс кöс жар, кöда йылiсь баитöны — мыр вылын позьö блин пöжавны. Некытшöм тöлок абу. Нельки палёжас, куш местаас, дзингисö номмез, а лöдззез сiдз и лякасисö киэз бердö, зубыта чушкалiсö голя. А киэзö тыраöсь.

— Зойка, кöть лöдззесö вашöтлы, — кеймися ме. — Вот жаритöны, Гитлеррез!

— Вай ме нöбöта ручсö, а тэ ачыт ныкöт воюйт.

Сетi ручсö. Этадз буржык лоас. Тöда, что Егор менö видiс бы, а Титовналiсь нывсö оз лысьт.

Но Егор и сiйö эз жалейт. Кыдз казялiс Зойка киись ручсö, сiдз и уськöтчис миян вылö, нельки полоззэсö чапкис:

— Мыйлö тiйö, жысь, звирсö кутiт, а? Да эшö татчö вайöтöмась!

— Ме, деда, гортö сiйö лэдзчöта, — шуö Зойка.

— Вот тай — гортö! А мыйöн сiйö пондан вердны?

— Картошкаöн, морковöн да мый да.

— Сiя эд яй тыткö, а не картов. Курöггетö быдöс джагьяс. Лэдзö öнi жö, мед и дукыс татöн эз вöв, — Егор öвтыштiс кинас, дзик тойыштiс ас дынсис зверь дуксö и кутчис аслас дело бердö.

Керны нем — нöбöтiм ручсö сэтчин, кытiсь кутiм.

— Может, лэдзчöтан, Зойка?

— Ог ни.

— Повзин, ну?

— Мамö тожö сiдз висьталас.

— Лöг мамыт?

— Не-е, менö любитö сiя. ― Дак мый инö?

— Öбидитчас. Сылö и сiдз сьöкыт.

— Сэк лэдз. Ме тэныт ёжöс кута.

— Сiйö босьта, — висьталiс Зойка и лэдзис ручсö. Руч чеччöвтыштiс, бергöтчис кругом и шымырöн-шымырöн котöртiс кусттэз дынö. Сэтчин сiя эшö сувтчыштiс öтпыр да видзöтыштiс бöрас и дзебсисис тэлляинас.

Öнi Егор панталiс миянöс ласкова и кöсйисис вердны тшакьяшыдöн.

Кöть и одз тулыс таво, но тшакыс сё эз петав. Эз петав сiйöн, что сулалiс кöс погоддя: размöд вöлись зэрис и то небурика. А Егор мöдпырся ни тшаксö вайис. И не кытшöмкö курыт ниндуль али туйдортшак, а коровяккез, кыз кокаöсь да учöтик юрокаöсь.

Старик тöдö местаэз, кытöн быдмö тшакыс, и киськавлö нiйö местаэсö ваöн. Отсалö я эта, ме ог тöд, но киськалöм местаас тшакыс одзжык петалö.

Егор некöр оз шедты вужнас тшаксö, а сувтас пидзöс вылас да аккуратнöя вундыштö му бердöттяс пуртöн.

— Эм тшакыслöн вуж гöрöд, а сы дынö локтö жила, — висьтасьö старик. — Ежели нетшкöвтан гöрöдсö да орöтан жиласö, сiя местö сэсся тшакыс оз пет. А мыйлö нетшкöвтны гöрöдсö, кöр сiйö сёравно чапкамö?

Кöсйыны кöсйис тшакьяшыдсö, да вердны эз ешты: мöссэс öдззисö гöняйтны. И медперво пондiс тронöтны Шывкалöн джыннян. Ылын сiя кылiс, кытöнкö палёж конецас, а минута-мöд бöртi, топ шальнöй, сибöтчис Лапья дынö. Эта ыжда мöс, а чеччалiс, дзик баля. Сы коккез увтын ризя-лопка чегласис чашья, пазалiсö сiсьмöм колодаэз.

— Öка, лöдзыс вашöтлö, — пондiс тöждiсьны Егор. — Поткöтласö вöраэзнысö. Ковсяс загонö вашöтны да ой кежас вöлись лэдзны.

Шывка бöрын, бöжжезнысö лэбтöмöн, котöртiсö мöдiккез и бузгисисö-пырисö ваас, кытöн кынöмви сулалiс Шывкаыс. Эшö минута бöртi ваас сулалiсö двадцаться унажык ни, а палёжсянь сё котöртiсö и котöртiсö. Вот и Король зэгйö-котöртö да бöжнас асьсö тэрмöтлö — боккесö сырйö.

— Котöрт-ко, Петю, Синяшорас. Кыдз бы гортö эз гöнитö... Йöртны колö.

Мийö Зойкакöт локтiмö Синяшорö, босьтiм кианым ыджыт шаттез. И сэк жö мöс табуныс уськöтчис загонас и рознитчис баддяинöт да шор дорöттяс. А Лапьяын сё горалiс Егорлöн голосыс:

— Тпрукö-ö, тпрукö! Тпрукö-ö, тпрукö!

Дыр горöтлiс Егор, кытсалiс дынас кольччöм мöссэсö. Дугдiс кывны сылöн горöтлöмыс, и миян дынö одзасьöмöн петiсö куканнес. Мийö панöвтiм нiйö, иньдöтiм йöрас. Сэтчин нiя гöгöртiсö загонсö да сувтчисö шор дорас. Быдöнныс сьöкыта чашыктiсö и ушкисö нырпыссэзнаныс кузнечнöй меххезся не умöльжыка. Мыдзöмась, беднöйкаэз. Етша садёкныс эшö, мöймуся гöнныс вöлись леняйтны пондöтчö.

Ышки-пойки локтiс Егор, колпактöм и шабуртöм — и сiйö жарыс босьтöма. Шочыник дзор юрсиыс вамöма ньылöмсянь, кокольсялöм; кузь уссэс öшöтчöмась увлань, дзикöдз сайöвтöмась öмсö; паськыт тошас кышасьöмась лысоккез.

— Öдва бергöтi куканнесö, — юöртiс сiя. — Уфф! Инмисö, нетопыррез, мöдöрö и бöбись котöртöны. Ноко видзöтам, быдöнныс я локтiсö.

Меным мылякö охота вöлi, медбы кытшöмкö мöс янсöтчис. Мыля сiдз, ачым ог тöд. Может, сысянь что любитi ветлöтны вöрöттяс, а öтнамöс Егор ылö эз лэдз мунны. Мукöдпырсяс öбида кутлiс, но мый керан? Асныравны жö эг лысьт — только умöльжыкö аслыт кошшан. Вермасö и совсем гортö иньдыны, а эта мед ни умöль дело.

Куимöн мийö кыкпöв мöссэсö лыддимö. Перво Егорлöн öтiк эз тырмы, Зойкалöн быдöс петiсö, а менам нельки унажык петiсö. Сьöкыт лыддьыны, кöр мöссэс кучаын сулалöны да баддез увтö дзебсисьöмöсь. Кокнитжык арифметика сьöртi задача решайтны, ежели мöс юррезö чуньöн тюкöтны.

Мымда бы эг лыддьö, а сё жö öтiк абу локтöма.

— Сэк пышшис кукань, — висьталiс Егор и пондiс нiйö вились лыддьыны. А Зойка и лыддьытöг чожа казялiс, кытшöм абу: Кузьбöж, лапытик гöрд нетель. Зойка нiйö бура тöдö. Мöйму сiя пастучитiс энö куканнесö горт видззез вылын, а таво быдтö кок-сагыз, йöла йöн вылö вачкисян турун, кöдаись пö керöны резина.

— Но, дак мый, кошшыны эд колас, — шуис Егор.

— Кошшам, деда, — согласитчи ме. — Тэ ов татöн, мед эна эз пышшö.

— Мун инö. Кайдукланяс моз кай, вöр дорöттяс. Сэтчин нiя вöлiсö, — висьталiс Егор. А Зойка содтiс:

— И нимнас кытсав, сiя шыасяс. Ме бы ветлi, да некöр ни.

— Ме и öтнам адзза. А тэ мун быдты резинатö.

Лапья дорын ме пöттöдззам юи чöскыт ва и мунi кошшисьны. Кузьбöж, конечно, кытöнкö сулалiс вуджöрын, сiйöн и пыри ме вöрас. Местаэс вöлiсö тöдсаöсь ни. Эстi Егоркöт мийö кералiм бур нин. Да и öшöмсис ме эг пов. Шулим граньлö доль мунiс мöдiк грань — Пуровскöй. Ны коласын вöлi только кык километр мымда, Лапья сайын, рытланяс, энö граннесö поперегалiс векнитик да чукыля пожарнöй грань. Только асывсяняс эз вöв не грань, не визирка, а сё кыссис пемыт вöр Шонытмысöдз, кöдасянь пондöтчисö колхознöй ыббез.

Кайи и лэдзчи палёж дорöттяс, горöтлi мымда вын — кытсалi куканьсö, но сiя не эз шыась, не эз пантась.

Шондi лажмалiс, лоис ыркытжык. Ойланьсянь пондiсö чукöртчыны кымöроккез. Етшажык лоис лöдз, но номыс ройöн лэбалiс. Этö — зэр одзын.

Бертi ме Лапьяö, пасьталi шабурöс, öшöтi бокам пуртöссö. Эшö öтпыр юи да мисси и вились пыри вöрö.

Горöтлыны ме эг ни вермы — голосö бырис — и öнi только бура смекайтчи да кывзiси. Недыр мыйись инми мöс след вылö. Неважын мунöма, туруныс абу на ештöм лэбтiсьны. Конечно, эстi сiя, Кузьбöжыс, ветлöтiс. Сiдзкö, колö тэрмасьны, вöтны беглянкасö югытiнас жö. Пемдас — нем сьöртi лоас адззыны.

Час дырна, натьтö, мунi, и следыс сё тöдчис. Но вот петi турунтöм местаö — öтiк нитш кок увтын кышöтö, кыз да небыт. Сэтöн и öштi следдэсö. Пидзöс вылам кыскаси, кинам нитшсö малалi, но абу, дак эд абу.

Думайтi-кери да мунi Кайдук куреньö, кöдалань одзжык следдэс мунiсö. Куреньыс матын и вöлöма. Но колодаэсö шагнявтöн ме öддьöн мыдзи и, кыдз только петi да нёджжаси пес куча вывсянь, сразу пукси шоччисьны. А медбы коккезiсь чожажык чулалiс мыдзöмыс, ме водi гатш да лэбталi коккезöс, кыдз велöтiс Егор, кöчка вылö.

Эг мöд онмöссьыны, да мыдзöмыс эд, тыдалö, кунис синнэзöс.

Узи недыр, югытöн эшö сайми. Коккезiсь чулалöма мыдзыс, оз ни сотчö-дöлöтö кок пыдöссэз, но номмез даки пöттöдз сёйöмась, тыдалö, и чужöмöс, и киэзöс. Нiя, конечно, и саймöтiсö менö. Сайми, пондi вöлi гыжьявны лудан киэзöс, кыла: мöс зыртчö. Конечно, мыся, Кузьбöжыс, сэсся некинлö эта ылынаас локны. Радöн лэбтiсьыштi и казялi одзсим сэтшöмö, что коккезö асьныс кöстiсисö и пуксьöтiсö менö му вылас: двести метр ылынаын ме дынсянь ош тарöвтiс му кузяс пес кряж.

Кошши Кузьбöжöс, а адззи бöжтöмöс!

Кывлi ме, что ошшес розоритöны мачуркаэз, сёйöны зелёнöй зöр. Öтпыр айöкöт эттшöм жö годовикöс вашöтiмö малинникись. Но медбы ош быглялiс керрез — некинсянь эг кывлы. А миян отирыс часто ныкöт пантасьлöны. Ленка да Витя öнöдз узьлöны ош кучик вылын. Ачыс айö ошсö вийöма, öтнас.

Тарöвтiс кряжсö, колис да мунiс пес куча дынас. Лэбтiсис кык кок йылö, пöрöтiс öтiк кряж и бöра, дзик морт, пондiс быгыльтны му кузяс. Кряжыс пыкöтасис мырö. Ош нюкайтiс мырсö, пешлiс лапанас — ён, он мöдöрт вужжезнас — и колис сэтчö кряжсö.

Сэтшöм диво лоис меным, что и полöмö öшис.

Гöна работник эшö тарöвтiс кык кряж. Сыбöрын гöгöртiс кучасö, лэбтiсис бöрись коккес вылö и мöдiс пöрöтны пессö, да эз судз выныс. Сэк пондiс тойлавны öтiкöн.

Но, думайта, не чожа тэ нiйö чапкалан. Мунны, мыся, колас, а то эшö лöгасяс да лöсъяс пельбоккезöс. Зверьыс зверь и эм эд, мый сылiсь босьтан.

Жагöник кысся вöрланяс, öт синö — одзам, мöдö — бöрам. Сэтчö жекöстiс кеньжак, сылö шыасис мöдiк. Ош чапкис уджсö, ордчис да нюкайтiс воздухсö. Вот бергöтчис мелань. Ме сылi местаам, нельки коккезö пымалiсö.

Ош сувтiс нёль кок йылö и мегырасис-мунiс понсэтöрникö. А менö коккезö нöбöтiсö мöдöрö. И нöбöтiсö сiдз, кыдз кöчöс новйöтöны кöин дынсянь.

Öши бы, натьтö, эта повзьöмсянь, да кыдзкö Егорыс вашöтöма мöссэсö Кайдукланяс, и ме петi джыннян шыэс вылö, а палёжас казялi сылiсь биоксö.

Егор эз повзьы ошсис, но инькаэслö эз на тшöкты висьтасьны эта йылiсь.

— А кыдз Кузьбöжсö джагöтас? — юалi ме.

— Öнi оз, пöт сiя. Арьявнас вермас. А миянлö месяц мымда татöн овны.

— Мыйлö нö сiя пес кучасö разис? — охота меным тöдны.

— Ыжмалö, чукыль кок. Том, вот и вежмасьö. А может, мыйкö и кошшö. Тэ давай сёйышт, похлёбка то пуи.

— Мордаэсö кöр пешлам?

— Ашын асывнас. А сэсся черива сёйыштам и кошшисьны мунам.

— Может, ачыс локтас?

— Чередь. Кытчöкö ылö мунiс нето мыйкö лоис.

— А мый бы лоис?

— Вöрас сякöйыс аркмö эд. Кыдз тэ одзлань тöдан?.. Сёй.

Судзöтi би боксис котелоксö похлёбканас и минутаöн ректi сiйö. А сэсся мый керны?

— Висьтасин бы, деда, сказка, — тшöкта ме Егорöс. — Только басöкö и кузьö.

— Куззесö ме вунöтi ни. Кöдалiсь юрсö тöда — бöжсö ог тöд; кöдалöн бöжыс эм, да юрыс абу. А дженытиксö абу охота висьтасьны... Ноко, ужо, мöссэсö видзöта, а тэ запты сы коста унажык пес.

Дата добавления: 2015-11-16