И БÖРА ТУЛЫС

Тулыс, годлöн медчож, чатыра нылыс, лэбзис перыт борддэз вылын. И кытчö сiдз тэрмасьö сiя? Эшö кольöм неделя вылын понулляа Жогормыс вöлi каттьöма кымöссö чочком чышьянöн, а талун, видзöт, рудмöма ни, лымтор некытöн абу, и сералö-ошшасьö, дзик понпутшшезöн, незьдöм горрезнас, кытiсь горвартiссез босьтлiсö сёйсö.

Эшö сэсьудерлун Олявка öшын увтын вöлi тöвся туйлöн череп, а öнi сылöм, гöппезас пукалö ва, а ва вылас уялö турун ёг. Поснитик да вöснитик быгья, дзик кень, ваок сулалö и палисадник одзись канаваын, кытiсь сэсьудерлун жö хозяйка чапкис сöнöгсялöм, сьöктöм лымсö.

Куим лунöн да куим ойöн шоныт зэррез, тöввез да шондi вильöтiсö-сёйисö лымсö и вылынжык местаэзсис ештiсö тöвзьöтны небзьöм мусö, незьдöм туйесö, шурöтiсö ыббез.

Талун Олявка узис умöля: рытсяняс оныс эз лок, а югдандорас, кöр надейтчис пöтны узьöмнас, сылiсь онсö гусялiс кыр. Сiя, тыдалö, кошшисис яг вылiсь пуэзын и не только кокис-сизьдiс, а орöттöг торгис, дзик пулемётiсь лыйис. Колiс бы пöднавны форточкасö, и чулалiс бы бедаыс, а инькаыт сы йылiсь мылякö нач вунöтчис.

Висьтавны кö веськыта, оныс öшис не кырыс шумсянь. И не сысянь, что талун, эта апрельскöй субöтаö, сельпоись уджалiссеслö колö уджавны не сiдз, кыдз прокод, а мöднёж и колö уна ештыны керны: талун ыджыт помеч — ленинскöй субботник.

Сылiсь онсö пышшöтiс сьöд дума. Сiя думаыс, кöда олö сы юрын не öтiк неделя ни и мукöдпырись оз сет узьны.

Чулалiс месяц сэксянь, кыдз сiя лыддьöтiс Вероникалiсь письмоэз, а медбöрьясö, лыддьöттöмсö, нöбöтiс Андрей Никитич жырö да пуктiс öтнасö, янсöтiс газетаэз дынсянь, но кыкнанныс чöлiсö удерлунся рытöдз, кöр Вереповлö, кино видзöтiкö, усис тöдвылас кöркöся баитöм, и сiя юалiс:

— Кöр инö заявленнёнымöс пондам гижны?

— Кытшöмö, Андрюша?

— Загсас...

Олявка колис пызан дорас гöрдззисянсö, пуксис диван дорö, гижсьытöм жöникыскöт ордчöн, висьталiс: — Ог тöд, Андрюша.

— Мыля нö он тöд? Этадз и лоам кульгозъя?

— Видзчися тай мыйкö, а мый — ог вежöрт.

— Может, не мыйкö, а кинöскö видзчисян? — шутитыштiс Верепов.

Дыр чöлiс Олявка, кошшис, мый горöтчыны сэтчö, ачыс думайтiс: «Эз я сылö кывсьы, что леспромхозас ветлi?»

Савыркина былись ветлiс, ашынас жö, кыдз мунiс Дорохин. Ветлiс сiя тракторист дынö, кöда вайис юöрсö важ жöникыссянь. Конечно, не нарошно эта могöн, а и мöдiк дело керис: сельпоись нöбöтiс ма (таво Гублянын унаöв сiя, а сэтчин абу), леспромхозiсь вайис треска. Первöй майнас гублянса сёйисö чериняннез, кöднатöг овлö гажтöмöв праздниккез коста.

Быдöс-быдöс юасис: кыдз Колька олö, мый уджалö, кытшöм паськöм новйö, кинкöт ёртасьö, уна я деньга шедтö, кытöн кадсö чулöтö, оз я кодав и, конечно жö, — кöдöрö мöдö керсьыны, кöр строитсяс туйыс. И тракторист висьталiс: «Гортö лöсьöтчö».

Дыр чöлiс Олявка и вöлись висьталiс Вереповлö:

— Да: и кинöскö. Может, мыся, кинкö отсалас, туйдöтас. Эмöсь эд чожжес, овны кужиссес. Тэнö тай некö тожö туйдöтöны?

— Ме — ачым ыджыт, ачым учöт, некин менö оз вöрöт, — увереннöя висьталiс Андрей Никитич да пуктiс кисö иньыс пидзöс вылö. — Тэсся, конечно... И некин оз вувьяв менам свобода вылö.

— Кинкö тай вöлi письмо гижöма да, мыся, поди, вувьялö вöв моз? — Олявка вештiс сылiсь кисö мöд пидзöс вылöдззас, нырыштiс кыкнан кинас.

— Тэ сiйö письмосö шуан?

— Сiйö... Сiйö, кöдалö бöр оз туй бертны — адресыс абу висьталöма. Сiйö, кöда, может, ыджыт-учöтсö оз павкöт, дак мöдiкöс вöрзьöтас, тöждiсьны тшöктас.

— Мый павкöтас? Просто гижис да и... сiдз...

— Просто сiдз... что тэтöг овны оз вермы? Андрей Никитич кыскис кисö сы öлöдзись, сувтöтiс синнэсö Олявка вылö:

— Тэ сiйö...

— Ме сiйö эг лыддьöт, Андрюша. А что тэтöг овны оз вермы, сiя меным ачыс гижлiс. Тэ эд тöдан эта йылiсь. А раз меным гижлiс, дак тэныт и подавно... Висьтав ноко öнi, ачыт ыджыт, ачыт учöт, кыдз сэтöн меным бергöтчыны? Кöдöрö иньдöтчыны, кытöн сувтчыны?

— Немись эн пов, Оля. Кыдз миян эм, сiдз и лоас.

— Лоас кö сiдз, кыдз эм, дак мыйлö инö сэк гижсьыны?

— Ме шуа: менам сыкöт нем абу. Да и мый вермас лоны, кöр öтыс Соликамскын, мöдыс Кудымкарын?

— Ой, Андрюша! Быдöс вермас, быдöс! Ме этö тöда. Бура тöда. Да и овлö сiя «мыйыс» тiян. Эд кöдковну, тöвся каникуллэзнас, сiя тэ дын вовлiс. Только тэ дын.

— Адззылiн?

— Следдэсö адззылi... дуксö сылiсь кылi.

— Кöть бы и сiдз, дак мый сэтiсь, Оля? — винитчöмöн ни баитiс Андрей Никитич. — Йöзыс вон кыдз пансьöны-быдмасьöны, да сё тай олöны. — Сiя мöдiс кутны иньсö пельпонöттяс, но мöдыс бöра вештiс сылiсь кисö. Эта вылö Верепов эз обидитчы, эз лöгась, только шуис: — Тэ, Оля, эн тöжды, быдöс лоас бур.... Давай кино видзöтны...

Унажыксö вот этасянь, удерлунся баснисянь, эз узьöт талун инькатö. И чеччис сiя висян юрöн, и горсö ештöтiс — гажажыкыс эз вöв, и час бöртi нем эз вежсьы: одззамоз кыдз бы ыждö, паськалö юрыс, вирыс кöсича жилаэзас ёткö.

«Не я сьöлöмö висьö? — повзьыштiс сiя. Кывсис, что посадас öтiклöн и мöдiклöн вир давленнё умöль, нельки томмеслöн. — Колö больницаö ветлыны, а то сэтчöдз локтан — и нянь кусöкыт оз понды ковны, не только мужикыт...»

Думаэз, думаэз, думаэз... Эна думаэзöн Олявка юис чай, чеччис эна думаэзöн пызан сайись, вевттьыштiс миськавтöм чашкаэсö вышивайтöм накидкаöн, мунiс горницаö, пуксис небыт диван вылö, сюйыштiс кисö пиас и сразу кылiс, кыдз мырсьö-вартсьö сьöлöмыс — мороссö зэлöтö. Да и сiдз, кинас пешлытöг кылö, что сьöкыта ветлö, дзик мавттöм телегалöн колесо, только эшö оз на пиксы.

«Больницаö, больницаö — сэсся некытчö!» — сэтшöм думаöн Олявка пасьтасис-кöмасис, сэтшöм думаöн петiс ворота сайö — сунгисис тулысся асылö.

Юр вевдöрас уйисö сера-кутшша кымöроккез и орсiсö шондiкöт: то сайöвтасö сылiсь бледöтöм чужöмсö и му вылö ольсаласö пемыт вуджöр, мыйсянь дузгыльтчас не öтiк векся Жогор да сылöн сосед Бакар и сы гöгöрись муэс, то бöр осьтасö, лэдзасö сылiсь югöрресö, и дедко-пожуммес, понуля керöсыс, и посадыс шынь-шынь серöмтчасö, гажмасö.

Котöроклöн кайпоззэз вылын, кöднö öшлiс Максимка внучокыс, вермасьöмöн сьылöны сьöдкайез. Сэтöн жö, стын вылын, видчöны-кöритчöны пышкайез — сiдз татöн шуöны воробейезöс. А нылöн шумыс лэбис, тыдалö, сысянь, что нiйö репйöмась готовöй квартираэзсис саридз сайись гöссес. Эта шум увтöт кайес дынö стын потш кузя кыссьö руд, потшыс рöма жö, пöрись кань.

Улица шöрас, шуралöм мысочок вылын, вöрзьöтчытöг, дзик кока джек, сулалö Мемесь пиян, а сылiсь спинасö кокö чавкан. А козалö сэтшöм долыт, что сiя и öмнас оз жуит, и кылалöм синнэсö оз вермы осьтны, медбы видзöтны, кыдз поленич вылын чылöны сылöн пияноккес.

Горт воротасис петiс Венька, казялiс Олявкаöс да видзчисьыштiс, кöр матöжык сибöтчас, вöлись здоровайтчис. Сiя пасьтасьöм дзик жених: виль костюма, виль штиблета; розовöй йöрнöслiсь кузь пелёка воротниксö лэбтöма пиджак вевдöрö, а моросас свиттялö Ленин орден. И шырсьöм басöка, и сынасьöм бытшöмика.

— Шляпа бы колiс пуктыны, — советуйтiс Олявка. — Кыдз-некыдз, а сё жö парторг.

— Вöзйö вöлi Котöрок дедö гублянкасö: пукты, шуö, министр, чайтасö...

— Ылöдз я? — интересуйтчис Олявка. — Натьтö, городöдз?

— Школаö корöны, сбор челядьыслöн. А сэсся отирыс дынö жö пета, субботникавны... Кыныма стройка вылас мунасö?

— Кыдз висьталi: вит мужик, вит инька. Мукöдыс — пес поткöтны.

— Ме бригадасис иньдöтi быдöннысö, кöдна тшупсисö. Но тэ ачыт ны сьöрын видзöт, ась оз веснясьö: мед рыт кежас стропилоэз сувтiсö.

Сэтчö Олявка мöдiс висьтавны, что сылöн юрыс висьö и лöсьöтчö больницаö, но казялiс, что оз ни шогав и сьöлöмыс лöня уджалö, и кöсйисис öнi жö мунны уджалiссез дынö.

— А лунокыс кытшöм петiс — чудо! — радувьяс горöтчис сiя.

Венька дзарнитiс одз-бöр, отсалiс сылö:

— Басöк погоддя. Видзсяс кö этадз неделя — кöдзны петам... Да, вот мый: тэ сет миян столовöйлö таг. Ачыт тöдан, ырöштöг тулыснас оз уджассьы.

— Невнасö адззам...

Магазин дын Венькаöс сувтöтiс тракторист:

— Неладно эд, бригадир, керан. Оль саяс ме тракторнам ог вермы пырны. Дэтэшка бы сэтчин колiс ыстыны.

— А ме тэнö эг и ысты, тэнат аслат бригадир эм. Но делоыс не сыын, кин ыстiс... Тэ эн и пыр. Мун ыджыт туй кузяс да Лунвожас и чеччöвт. Сэссянь керöсöдззас подöн каясö. А рытнас ачыт жö и лэдзчöтан.

— Сiдз буди дак...

Олявка колис нiйö, öтнаслö охота олыштны, мича асывнас любуйтчыны, сылiсь горсö кывзыны. Юрыс нач веськалiс, кокнит и вына лоис.

Кин веськöтiс?

Апрельыс, кöдалöн гажыс быд часöн содö-паськалö. Пуэзлöн почкаэс, кöдна сiдз ни бура осьтöмась чочком пиня öммез и сьылöны ассиныс тулысся песнянысö. Кайеслöн пель чанöтан базарыс. Да и Гублян ю дорсис кöчкаэс, кöдна чышьянасьöны ни зелёнöй чышьяннэзöн. И нёштöмсялöм лыммес, кöдна дзебсясьöмась да дрöжитöмöн олöны посувттэзын, кырассэзын вöр тэлляинын.

Тулысыс, только сiя тойыштiс сылiсь шогсö, дзик тöв пöльыштiс бабапельлiсь пухсö.

Бур Олявкалö, öддьöн долыт! И моросас песня аркмö: «Тулыс, тулыс — песня миян гажа, дзирыт цветтэз, мича радейтöм!..»

Шондiыс нюлö чужöмсö, плащ пырйöттяс шонтö кисойесö, пидзöссэсö. Пöрччалiс киззесö, полаэсö каспöвтiс, кушöтiс пельпоннэсö. Ыркыт тöлок гусясьöмöн малыштiс мороссö, каджсö, коссö, пырис конувтас.

Ого, сайкытöв эшö!

И бöр кизясис.

Сельпо оградаын помечыс чукöртчöма ни: ворота дорö, веськытланяс, сувтöтöмась кураннэз, зыррез да вилаэз, мöд ладорас — виль оропа поткöтчан черрез, ыджытöсь и учöтöсь. А колодец дорын споритöны Ванько Вань да Татя.

— Тэ, старик, öмнат эн вермы, — дзирдалö Татя. — Оз лöсяв сiдз, ме шуа, и оз!

— Лöсьöтан, дак лöсялас, матуш.

— Эн и баит небаснисö, — сулалiс аслас туй вылын инька. ― Предыс сiдз жö и шуас, кыдз ме.Да и кöть кин сiдз висьталас...

— Сiя, пожалуй, тэ дор лоас, тожö эд гöр оропсö эз видзлы и вильсасö эз бергöт.

— Бергöтам, колас кö. Ачым гöра. Зырöн.

— Гöрнытö гöран, да мый быдмас? Сир сёй эд сэтöн! Двадцать год колö назьмитны, сэк вöлись муыс лöсялö.

— Некытшöм назём оз ков, удобреннё колö. А сiя быдлаын куйлö — кöть тонна вай.

Мый понда нiя етшасисö, Олявка эз вежöрт, но тöдiс, что нылiсь спорсö не кокнит сувтöтны: и öтыс, и мöдыс — серьёзнöй морттэз, олансö не книга сьöртi тöдöны — ны вывтi сiя бура и дыр гöняйтiс, велöтiс асьсö радейтны.

— Тiйö мыля сы одза шумитат? — юалiс Савыркина. — Этшöм лун — сьывны колö!

Старик бергöтчис эта шы вылö, горöтчис:

— Уджалiсь мортлö асывсяняс грех сьывнытö. Песнясö, кыдз и нянь кусöк, уджöн шедтöны.

Ванько Вань вермö баитны и мöдiс эшö мыйкö висьтавны, да Татя эз сет:

— Кельчиыс эшö йирын, а мийö черива ни лöсьöтчим панявны... Сад понда места бöрьям. Сiя гид дынас лöсьöтö, а ме — ылöжык бы сы дынсянь вешта, гöрöм местаас. Тэ кыдз, Гавриловна?

— Конечно, торйынжык керны. Да эд сiйö местасö архитектор бöрйис ни.

— Начальствоыс ылöдзжык адззö, — висьталiс Ванько Вань. — Только контора дынас матö оз ков, — и доложитiс: — Ойнас нем умöльыс эз шогмы, замоккез дзоньöсь. Струмент готов. Часöт сёйны ветла.

— Тэ шоччись, — тшöктiс Олявка. — Спасибо, инструментсö лöсьöтiн.

— Помечала жö, мый тэ! Руб шедта, и то одзлань, Кытчö сувтöтан?

— Ачыт тöдан... Давай кафесö жö лэбты.

— Понда лэбтыны. Только эшö колö кирпич вайны: джодж увтас стойкаэз тэчтöмöсь. Семьсотыс тырмас? — и ачыс жö ответитiс: — Оз тырмы, дак кольччас. — Да толь куим юк, да цемент квать мешöк.

— Ваям, — Олявка туйö шуис Татя.

Öкмыс час гöгöрас сельпо сайись оградаын пондiс тыргыны мотопила. Этö детсадын пес пилитöны. Сэсся мöдiк да и куимöт горöтiс — дзик петуххез сьöрсьöн-бöрсьöн кытсöвтiсö да ножö посадсö чанöтны!

Пондiс вöрöтчыны и Олявка:

— Татя, доддяв вöв да ваяв, мый мöдiн. Эшö кинöскö иньдöта.

Ровно бы кыдз ни бура планируйтiс, а, видзöт, эшö öтi-мöдi абу гижöмась.

Локтiс Шурончик, простöй чышьянока, лöз халата, гöрд сапога. Тэрмасьöмöн пуксис Ванько Вань лабичок вылö, контора посöдз весьтö, кыскис сумкасис кулиггез, пондiс куснявны-сёйны.

— Гавриловна, пешлы-ко стряпняöс! — кытсöвтiс Олявкаöс. — Пымöсь эшö. Мм! Кывтö öтлаын сёян!

— Кывтöмнас меным оз туй овны, Шура, сiдзкö, йитшкы öтнат на здоровье, — висьталiс Олявка да юалiс: — Тэ гортат кöркö сёйлан жö?

— Сiя и эм... Разь сетасö нечулиммес, — этадз сiя шуö зоннэсö, — меным сёйнытö? Озö-ö! Ны понда этö кер, мöдiкö лöсьöт... Уджавны эн сёрмы... А удж вылö локтан — только и кылан: эстöн тэнат нять — миськав, умывальник абу — öшöт, он куж шуны «пожалста» — велöтчы... Вот этадз и ола: кыт тшыг, кыт лöг. Адззан, кöс ни косьми, — Шурончик тiгыш-тiгыш зэгнитчис мешöк кодь паськыт вывтырнас да малыштiс кынöмсö. — Но, спасибо, кулик-нетулик. — Сiя курк-верк каттьыштiс кольччöм кулиггесö, пуктiс сумкаас. — Вай, Гавриловна, ыджытжык чер, муна поткöтчыны. — Чеччис, бöрйисьтöг босьтiс кузь оропа колун, забор столб вылö пуктiс павжуноксö, кармансис кыскалiс кеписсез, сюйис киэзас. Вот сiя чернас тякнитiс пипуовöй чуркаö, сувтöтiс сiйö, павкöтiс-метитчис сьöлöмöсас чер нырнас, паськытжыка лöсьöтыштiс коккесö и кыдзкö ас мознас, чукыля махöн, шовк поткöтiс чуркасö.

«Мужиктöм оланыс быдлаö велöтö», — Шурончик вылö видзöттöн думыш керис Олявка и мунiс тöдны, тырмас я цементыс да кирпичыс.

Локтiс и культмагись вузасись, пуктiс колодец бокись веж турунок вылö магнитофон, и музыка сьöртi пондiс пиньласьны-йöктыны да треситны учöтик кулачоккезнас — дзик пизь пожналö.

Шурончик видзöтöв-керис сы вылö, осудитiс:

— И мый тiйö эта бесовскöй трам-гамись адззат — ог вежöрт.

— Вдохновеннё, тётя Шура.

— Медбы вежмасьнытö, бöрись нöшшезнытö кöвдавны?

— Вдохновеннё овны, тётя Шура, — серöмтчис йöктiсьыс да пондiс азартнöя куртны кокнас ёгья мусö.

— Бöбмö отирыс, кöть тэ мый шу — бöбмö, — ыш ловзисис Шурончик, орсöмсö кывзiкö. — Этадзи только дикöй пермяччоыс кöркö орсöмась — кин горпöданöн, кин быгрöтчанöн... Чуддэсö повзьöтлöмась... Ог вежöрт, мый керöны томмес. Ровно бы миянкöт öтiк туй кузя мунöны, а — кöда городö, кöда — вöрö... — Сiя сьöвзис кеписсес вылö, эшö öтпыр видiс йöктiсьсö: — Но, кöбыла! — и жог шöриöтiс виль чурка, кöдалöн джыннэс паськалiсö-пöрисö гатш да серöмтчисö рись кодь чочком пытшкнаныс, серöмтчисö отирыслö, шондiыслö.

Тулыс, тулыс!

Ыджыт мотоциклöн сибöтчис бухгалтер, вайöтiс йöзсö коляскатыр. Сувтöтiс мотоциклсö, пöдналiс магнитофонсö, шуис:

— Шура, тэ этö мый керан?

— А мый? — пельпон вевдöрöттяс юалiс Шурончик.

— Мыля добросö пазöтан? Вон кытшöм чачаэз — сувтöт да видзöтлы, эн и вöрзьöт!

— Тэ сiдз гортат кер, но? — советуйтiс сылö Шурончик и командуйтiс: — Мунö, мужиккез, кафе лэбтыны. Мийö, женскöйес, пес дынас лоам.

Павжун гöгöрас, кöр пуксисö шоччисьны мöдпырись, Шурончик мавтыштiс-сёйис медбöрья кулигсö да корасис:

— Гавриловна, гыркö эд нач ни пактiс, пöим лоис.

— Дак кöтöт. Эм пизьöтöм ва, эм лимонад.

— Сiя кырöтö, а оз кöтöт. Мыйкö бы сукжыкö.

Луныс жар, юöтö, а ва да лимонаддэз пермякытлö, кöда быдмöма ырöш вылын, не сьöлöмви. Только Шурончик не квас вылö, не ырöш вылö инмöтчö — быдöнныс этö адззöны и ошкöны сылiсь баснисö шытöг, но председатель лöгöн висьталö:

— Некытшöм сукжыкö. Уджавны петiм, не горшшез мавтны.

— Сурок ме коли, Гавриловна, — кань моз сибалö Шурончик. — Весь эд шöммас...

Шурончиклö отсалö Ванько Вань:

— О, сiя бы ладносьöтiс! Шупытжыка бы делоыс мунiс, а то мийö куим ряд вöлись пуктiм. Сiдз я ме баита, местком? Эд сiя оз тшыкöт...

— Местком сiдз жö думайтö, кыдз и уджалiссес, — висьталiс культмагись вузасись. — Вай, тётя Шура!

Шурончик мöдiс чеччыны, но только вöрзьöтчис местаас да шуис:

— Татя, местком гöснеч сетiс, лэдзчыв вöвнат улöдз.

— Кытшöм эшö Татя? — сувтöтiс Олявка.

— А кöдалöн челядьыс кватя, — серöмтчис Шурончик. — Эд местком тшöктiс, Гавриловна.

— Ме сы кодь жö местком, и вот менам приказ: часöт некытшöм сур, обеднас буди. Давайте уджавны...

Песыс поткöтсис и тэчсис павжунöдз. Полениччес сувтiсö басöка, ровнöя и дыр кежö — доррезас клеткаэзöн. Сэсся быдöнныс мунiсö керку дын, кöда, кажитчис, лэбис быд минутаö и öбед кежас локтiс балкаэзöдз. Сэк Олявка кокнит сьöлöмöн мунiс сельсоветö, медбы висьтавны штабын, кыдз мунö удж, а сыбöрын лэдзчис гортас.

Недыр и ветлiс, а сытöг матичаэсö лэбтöмась ни. Ай да керку кериссез!

А нiя пырöмась пытшкас и шоччисьöны: пуксьöмась паныт-паныт джоджö чапкöм чуркаэз вылö да кывзöны Ванько Ваньлiсь то ли сказка, то ли быль. Мужиккес шöрын пукалö Шурончик да шочыника содталö ассис «сiя и эмсö». Тöдчö, что быдöнныс павжнайтöмась не умöля.

Олявка пырис ыбöс осьтаö, ошкис мужиккеслiсь уджсö:

— Абу дышöтчöмась, абу! Шурончик сылö:

— А мый, мийö разь пакляэз али торк куделлез?

— Адзза, что не... Только вот менчим приказöс вунöтöмась... Ох, и шедлан тэ меным, Шура! — кöсйис председатель.

— Мый понда бы? — лöсьöтчис люкасьны Шурончик. — Раз эн тшöкты, ме эг и вöрöт. Кöркö разь эг кывзывлы, бöбöтлi тэнö?

— Пес гыркись адззим, — висьталiс бухгалтер, — Шураыс эстöн абу виноватöй... Сюйыштöмась гыркас и нитшöн зэв тупкалöмась.

— Матичасö пуктыны пригодитчис, — ошкис Ванько Вань. — А ме думайтi ни: оз ло — талун ог и пуктö. А кыдз тiйö думайтат? Традиция!.. И лöсялiс эд!

Олявка сы кыввезöн жö, кöднö асывнас кылiс, вештiсис:

— Лöсьöтан, дак лöсялас, батюш... Бухгалтер гöрдöтiс, чеччис, öдззис мыктавны:

— Ежели ме... ежели од веритö..

Шурончик сiйö пуксьöтiс местаас, горöтчис Олявкалö:

— Эн обижайт честнöй отирсö, пожалуйста. Мийö правда висьталiм. — Сiя кыскис нитш увтiсь пустöй посудасö, мыччис Олявкалö: — На видзöт: этшöмыс миян вöвлi? Некöр эз вовлы, тэ тöдан. Эта — орслöн.

— Сэк извиняйтча, отир...

— Кытшöм, поди, извиняйтчöм, — шуис Ванько Вань да чеччис ружтöмöн. — Ноко, робяты, череповöй керрез лэбтö. Ме сэтчин ог кай даки.

— Ме тожö ог, — шыасис Шурончик. — Выходаэс оз терпитö.

Ворота дорас кылiс Васькишналöн голос:

— Кытöн жö Гавриловнаыс? Абу я таланьын? Сiйö гортас видзчисьöны.

— Татöн ме! — шыасис Олявка. — Кин видзчисьö?

— Мунан, дак адззылан.

— Инька али мужик?

— Инька да мужик. Лёгковушкаöн.

Дата добавления: 2015-11-16