ТÖВСЯ ЯГÖД

Эшö ытшкисян коста Котöрок ошшасис Венькалö:

— Дзуга ме таво ассим оланöс. Вот адззыв — дзуга! Внучокыс тöдiс, мый мöдö керны дедыс, но сёравно юавлiс:

— Трактор, поди, небан? Неб, неб! Но перво Мемесьтö вузав, а то Бакармыс увтас лэдзчöтас, — казьмöтiс Венька неважынся купайтчöм йылiсь.

— Небнытö и позис бы, да кысь? Понда ачым керны.

— Сэки — «Дружба»? Да, сiя дзугас олантö: он ни понды узьлыны, ой и лун пондан гужгыны.

— Может, и «Дружба», — перкйис тошоксö Котöрок да шыннялiс öм дорнас. — Арнас кывсяс вот.

— Конечно, кывсяс, некытчö он ыскöвт дак.

— Ме муна? Мак-маковей!

— А мый тiянлiсь босьтан? Шуöны тай: пöрись да челядь... Бöбöтас кытшöм-нибудь мамзель — и фить! Не сiдз я?

— Питькиссьöма ни менам, Вень. Чожажык Бакарыс али Жогорыс мунас — нiя абу сы бурна, кыдз ме, вужьясьöмась.

Колö висьтавны, что старикыт эта гожумö стрась пондiс радейтны мотопила: сiя не мотоцикл, кряж дынсис бокö оз сярöт, а главнöйыс — весись оз нöит мусö, а керö дело. Пескерöмыс одзжык уна жугдiс сылiсь вынсö, уна кад бырöтiс, дак старикыт кыдз бытьтö мöдiс бергöтны öнi кöркöся öштöмсö, кадыслiсь мырддьöмсö, и сiя летiс-вотiс цепнас пусö ой и лун.

Пилаыс вöлi колхознöй, сiйö Венька сетiс дедыслö, вöв картаись сторожлö, только дозирайтны, а Котöрок велалiс пилитчыны. Да и кин, ежели сiя настоящöй мужик, оз заводит сiйö, оз пешлы уджын, кöр сетiсö пиласö сы кипод увтö? Эд пилитчыны — сэтшöм гаж! Сэтöн тэныт и музыка, сэтöн и поэзия!

Тулыснас быд улицасö нёштöмтiс орлавтöм пес, а гожумнас, видзöт, посад туйес весамисö, пессэс поленичö чукöртчисö. И кöр Котöрок мунö улицаöт, полениччес кыдз бы приветствуйтöны сiйö, и старикыт ровно томмö: öшöтчöм йисö лэбтыштас гöг вевдöрöдз, йöрнöс кöрöввесö одзсис бöрланяс вешталас, гублянкасö веськöтас — папаха моз чурдöтас, коза тошоксö, чели-пелисö, паськöтыштас и важнöя, дзик смотр вылын генерал, косьöвтö-оськалö.

Мунас, мунас да сувтчыштас и бöрланяс дзар керас, любуйтчыштас весамöм да гажмöм улицанас, отирыс уджöн и висьталас понлö нето балялö, кöда сы вылö видзöтö да юрсö чуклялö:

— Вот сiдз вот, гынмöм бöж!

И оськалас одзлань. Чужöмыс югьялö, топ горись кыскöм картовошнöй шаньга. Эх, балалайка бы сэтöн сы киö!

Мукöдпырсяс пиласö босьтлiсö, и сэк удав пилитчись заптылiс турун да корось, тшак да ягöд, уджавлiс мошшез дын, а ежели кин тшöктас — керас куран, коромысла кöстас, черпу лöсъяс и стеклоöн волькöтас, лöсьöтас зыр ороп: этшöм уджыс сы киись петлiс, кыдз пельнянь. А вот вартны-серöтны вагонкаöн керку эз лысьт кутчыны, сё надейтчис Андрей Никитич вылö. Сiйö лöсьöтчис керны август конецö, а сэсся босьтны карч и вöлись дзугны пырся олансö — гöтрасьны.

Виль карч, вильмöм керку, виль инь — этö виль олан.

И нельки решитiс ни, кинöс вайöтны — Васькишнаöс. Кöть и старухаытлöн öт киыс увечнöй, только куим чуня, а морт рамыник, бур стряпка и сöстöма олö. Сэтшöм кисьöра и колö Котöроклö.

План вöлi бур, дзик Советын думайтöм, да разьсис сiя, эз пет сы моз — нёштöма аркмис. И разьсис Верепов кузя. Эн мун сiя Перемö — и август конецын Котöроклöн керкуыс бы вöлi виль йöрнöса. Сентябрь чулалiс бы карч дынын. А мый керны октябрьнас? Дзимлявны керку гöгöрись чаг ёгсö, а сэсся, покровскöй субöтаöдз, кыдз керлывлiсö вексö, вайöтны инькаöс...

Первöйся жö ноябрьскöй луннэзö небурика кынтiс, усис лымок. Стариклö нем лоис керны, а весь пукавны эз вермы. Вот и кошшисьö, вот и гуддисьö, кытчö юрсö сюйыштны. А сэтчö Олявка:

— Карп Иванович, шöма пирöггез охота сёйны?

— Вердан дак...

— Пöттöдз верда, только рябина колö вайны. Кытöн сiя татöн быдмö, висьтав-ко.

— Тылашорын, ольöттяс быдмö.

— Сэк кайöт.

А Котöроклö мый? Вöвлi сэтчин не öтпыр, оз öш, и коккес, не вомдзалöмöн, кöстасьöны — не тоиннэз. И вöр рунас лолалыштас — крепытжык лоас.

Доддялiс вöв, розвальö турунок чапкыштiс, и мунiсö: Венькоика Лена, Олявка, Васькишна да ачыс.

Вöлi сэтшöм лун, кöдö эз на позь шуны тöвсяöн, но арсяö он ни пукты: кынтöм туй, учöтик, рамыник морозок-ёрток. И лымок сысъялö — шочыник, жагыник, поснитик, кöдö шуöны Гублянас — тöрича.

Котöроклöн сьöлöмыс важын ни сьылiс бы, и старикыт нюжвыла, небытика пондöтiс:

Ок ни да ок да,

Вöрыс паськы-ыт.

Ок ни да ок да,

Туйыс векни-ит.

Ок ни да ок да,

Кöзыс дзуртö-ö.

Ок ни да ок да,

Сьöлöм висьö-ö...

Кытöнкö пу бердö зыртчö пу — ружтöмöн, чуть кылан ойзöмöн. Оглобля кын завёрткаас дзуркöтö-тöждiсьö. И песня тöждiсьö:

Ок ни да ок да,

Кöда колö-ö,

Ок ни да ок да-а,

Абу дына-а-ам...

Песня тöждiсьö, и вöрыс тöждiсьö-думайтö.

Мый думайтан, вöр? Мый касьтылан?

Может, казьмöтчис тэныт война годдэзся вöрзаптöм, кöр эстöн мырсисö проктöм стариккез, некужись челядь да горзiсь дöваэз? Вон öтiк ны коласiсь, горе курмалiссес коласiсь, пукалö Котöрок одзын да кывзö сылiсь песнясö, кывзö тэнчит, вöр, шочыник шыэтö, кывзö лöньтö. Этö как раз сiя, кöда дöванас лоис двадцать годсяöн и эз ешты лоны мамöн. Этö как раз сiя, кöда эна местаэзын — эн вунöтчы, вöр? — öтпырись тшынмороз коста кольччис ёрттэс сьöрись, а тыра додьыс пöрис — не лэбтыны öтнаслö! И гезсö пöрччавтöн (керавны сiйö эз лысьт — казённöй) кынтiс и пидзöссэсö, и ки чуннесö. Этö сiя, кöда оз вермы овны уджтöг, кöда стыдитчö новйыны орден да медаллез.

Может, вöрöй, тöдвывтö вöрзьöтiс таланись медодзза колхознöй год да трагедия, кöда шогмис неылын Тылашор юок дынсянь? Тэ, конечно, эн вунöт сы йылiсь. Сэк вöлi тулыс — сiдз эд? — и тэ сьылiн да орсiн, узьöмсö эн тöд. Кытшöмкö лунö Тылашор хуторсянь Гублянö мунiс таратайка. Сыын пукалiс öтiк морт — шабура, нинкöма, бокас — кöдзсянкуд. Векнит местаын сылö паныт петiс сапога морт, сувтöтiс вöвсö. «Кöдзин?» «Кöдзи». «А вундыны он понды?» «Раз кöдзим, дак вундам ни...» Басниыс орис, и тэнчит сьылöмтö, вöр, пöдтiс обрезлöн лыйöм.

Кöдзисьыс вöлi Иван Которков, коммунист, Гублянскöй колхозлöн медодзза председатель — Котöроклöн ай...

Ок ли да ок да,

Ок да о-о-о-к...

Туйыс бырсис, и песня бырсис.

— Тпру-у, Савраско!

Тылашор сайö вöвнас пырны эз позь, и Савраскосö юскисö да колисö лог дорö, асьныс вуджисö мöдöрас.

Эстöн бы и позис öктiсьны, да Венькоикалö колiс эшö буржык ягöд, гырисьжык да гöрджык.

Вуджисö эшö öтiк логок, Тылашорись чальпа, кöда сайын, важ палёжын, быдмис том рябинник. Эстöн и адззисö гырисьсö, но сiя вöлi нёштöм — тшыксьöм туся, гагья али травитчöм — инмылöма кеньжак да тоторкатша. Но мый, вöрыс паськыт, адззасö мöдiклаись! Тусясьöмöн, шытöг, иньдöтчисö пыдöжык, важ керасас: старик — одзас, инькаэс — бöрсяняс. И сэтчö лёкгоршöн эрöстiс ош. Котöрок эз на и казяв сiйö, эз на тöд, кин этадз горзö, а кыдзкö кватитiс му вывсис кряжок и лэбтiс юр вевдöрас, медбы кольмöтны зверьсö, ежели сiя петас паныт. А ошыс эз уськöтчы. И эз пышшы. Сiя пукалiс неылын ны дынсянь да эрзiс мый вын. Пукалiс турунтöм, муöдз куштöм да подтöм кытшын. «Мак-маковей! — дивуйтчис Котöрок. — Да тэ тай дом йылын, Миш!»

Чапкис кисис кряжоксö да эшö öддьöнжык дивуйтчис: «Кыдз нö эта кызасö лэбтi? Но и но!»

Мöдiс лöньсьöтны ёрттэсö и дзарнитiс бöрланяс, но сы дын куйлiсö только мешöк да кеписсез.

Ошыс дугдiс рявзыны, но небурика, голостöг, эралiс.

— Инькаэз, тiйö кытöн? — смекайтчис старикыс. — Уук!

Сылö зубыта бытшкис сьöлöмас, и старик садьтöг пуксис матiсьжык мырок вылö, пондiс нöитны мороссö. Понсэтöрись петiс Васькишна, шушук керис:

— Пышшис бöбыт?

— Кытчö пышшас, петляö шедöма да? Бöрись кокнас...

— Май-май! А мезмас кö?

Лог дорсяняс шыасис Олявка, а Ленкалöн гöрд чышьяныс павьялiс лог саяс ни, Тылашор грива вылас.

— Петам жö, Карпуш, — тэрмöтiс Васькишна. — Мый пуксин?

— Морос жила, тыдалö, вöрзис, — жалуйтчис Котöрок. — Вон мый ыждаö кватитсьöма, — мыччалiс четверть кыза кертор вылö. — Петам инö, дзимляв хламоксö.

Жагвыв, отсöттöг, ляшмасис лог дорöдз. Мöдöрас вуджны отсалiсö Олявка да Венькоика. Сiдз и кыскöмöн-нуöтöмöн вайöтiсö вöлыс дынöдз, водтöтiсö, юрсö пуктiсö Васькишна öлöдзö.

Ленка да Олявка кир-пар доддялiсö Савраскосö, уськöтчисö Котöрок бокö и сточма петiсö вöрись...

Луншöр гöгöр Котöрок ограда одзö сьöрсьöн-бöрсьöн сувтчисö кык газик. Одзиссис петiс чочком халата и дженыт курткаа инька, бöриссис — охотинспекцияись нагана-пишаля мужиккез. Кöть и субöта, не уджалан лун, а локтöмась.

Нiя быдöнныс пырисö керкуö, быдöнныс жö иньдöтчисö комö, кытöн куйлiс висян сьöлöма морт, а ордчöн, небыт стул вылын, пукалiс ештöм ни пасьтасьны сöстöм юбкаö-кофтаö Васькишна, но врач панöвтiс мужиккесö:

— Эд тэрмасьö, перво ме видзöта, а тiйö пукалö лöня.

Котöрок шуис:

— Эн видчы, доктор, ась юасьöны. Мунны оз лэдз, а баитнытö прокма.

— Чöв ни, öвсьы, — не öддьöн ласкова öлiс сiйö Васькишна. — Ась пешлас перво, — и кушöтiс Котöроксö, пондiс пöрччавны косöй ворота йöрнöсiсь киззесö.

Врачыс видзöтiс недыр, дженыта висьталiс:

— Водтöтам больницаö. — И тшöктiс: — Вайö, мужиккез, носилкаэз. А тэ, хозяйка, лöсьöт пасьтасьны.

— Дед, а кин ошыс дынö туйсö мыччалас? — юалiс инспектор.

— Бригадирыс. Сiя тöдö.

— Дед, а эз кывсьы, кин кыйсьö? — юалiс мöдыс.

— Кöдö ог тöд, дак ог висьтав. Вöралöны эд, и городсис вовлöны. — И пондiс закажитны Васькишналö: — Тэ давай дозирайт керкусö и подасö. Капуста солавны тэныт жö ковсяс, тыдалö. Ленкаыс отсалас да эшö сылöн академикыс, Максимкоыс.

«Академикыс» сэтöн и вöлöма.

— Деда, тэ эд адззылiн нiйö, — казьмöтчис зонкаыс. Сiя школьнöй лесничествоын егерь и зверьсö да кайсö донтö, вот и отсалö бы инспекцияыслö.

— Кинöс ме адззылi, Максимка?

— А кöдна, шуин тай, кабаннэсö кошшöны.

— Мак-маковей! А быль эд! Кылан, инспектор?

— Висьтась, висьтась, кылам.

— Кöр тай уткаавны пондiсö, сторожовкаас ме дын оййисö, зэрис да, куима. Ог тöд, кысь нiя, а Чикиськин зятькöт сыбöрын вина юисö.

И Максимка содтiс:

— Кöр мийö кутчим Тылашор флора бердö, нiйö жö адззылiм. Мийö, шуисö, — öтамöдлö ог мешайтö, челядь: тiянлö — флора, миянлö — фауна...

Зонкаыт, конечно, локтiс тöдны, мый керасö ошыскöт, и öтöрас, кöр дедсö носилкаэзнас сюйыштiсö машинаас, сiя сибöтчис формаа мортыс дынö.

— А ошсö кыдз тiйö мездатö?

— Мийö онмöсьтан кыв тöдам, — шуис инспектор. — Только сьылам этадз: «Джаратаб, маратаб, миша, баб, миша, абу. Джаратусь, маратусь, ошкö, узь, ошкö, узь!» — и ланьтас топтыгиныт.

— Сiйö то эталö висьталö, — Максимко чувйыштiс соёкыслö мышкас. — Вердат, медбы онмöссис, али укол керат?

— Натьтö, вердам.

— Ме кая тiянкöт...

— Ошыс дын? Нырыт дженытöв! Быдмыштас да вöлись, — висьталiс инспектор и козьналiс зоночкаыслö учöтик книга. — Сiя — миян вöрын олiссез йылiсь. Картинкаэзöн.

СIДЗ Я, НЕ Я

Эшö декабрь вылас Гублянскöй сельпоö локтiс юöр, что Чикиськинöс да Феняöс пондасö судитны. Эта йылiсь бура тöдiс и Чикиськин, но немымда эз тöждiсь — не эз каитчы, не эз кеймись, медбы сылö отсалiсö, а важмоз ветлöтiс гажа, одззамоз тэрмöтыштлiс счётоводöс, указывайтiс кассирлö, и Олявка эз тöд, кыдз сылö öнi лоны. И тöн думайтiс, и талун, контораö локтiкö, и часöт вот думайтö, кабинетас пукавтöн.

Думаэсö орöтiс Венька, партбюролöн виль секретарь.

— Гажа удж тэныт, соседка! — эшö порог сайсяняс пондiс баитны сiя. — Тридцать год котрася, а эта керкуö эг на пыравлы. Позьö видзöтны, кыдз тэ эстöн олан?

— Пыр, пыр, Веня, — Олявка чеччис паныт, осьтiс гардероб. — Чöвтчы этчö.

Венька кöркö ештöма быдтыны уссэз и, натьтö, этасянь лоöма дзик чужöйжык и лöгкодь. Рыжöй уссэс, тöдчö, чорытöсь, кыдз ид кы. «И табак дукаöсь, конечно, кыдз Колькаыслöн», — Олявкалö тöдвылас усис одззася жöникыс.

Талун öтöрас абу кöдзыт, но Венька шоныт пася, виль пимиа, басöк шапкаа, кöдö таво гожумнас дзель кучикись вурис Котöрок дедыс. Сiя кöсйисис вурны и Олявкалö, и кучишоккесö нöитiс, да вот инмис больницаö.

— Чапкыла пасьöс, пельпоннэзöс шоччöта. — Венька öшöтiс пасьсö, сынасис. — А сöстöма олат, дзик городын.

— Вöтчам бы сы сьöрö, кыдз жö! Али мийö умöльжык отир? — ошшасьыштiс Олявка. — Чай кисьтны?

— Ме колхозник — ырöш юись. Да и некöр. Лöсьöтча öктыны партийнöй собраннё да баитны Чикиськин йылiсь, вот кытшöм йики. И этö колö талун керны, не кольны мöд год вылас.

— Мый колö месянь? — юалiс Олявка.

— Юöрт сельпоас, ась быдöнныс локтасö. И баитасö ась — мыля сэтчöдз коммунист лэдзчисис. Ачыт — медодз. И школаö, директорыс дынö, ветлы, проект колö, шу, лöсьöтны. А ме следователькöт понда баитны, тöда, уна я стряпайтiс Чикиськиныс... Некöр эг думайт, что сiдз керас партийнöй морт. Ужас, кытчöдз локтiм! Не-э, нiйö колö зорöн, зорöн! Да, да, кыдз Грозный дырни! А мийö юрси паныт и малыштны ог лысьтö, сё кывнаным: «Сiдз оз туй, дудiок, этадз эд умöль лоö...» Лöсйыны колö сэтшöмсö!

— Зорöн? Этö сiдз парторг рассуждайтö? Но и но!— осудитiс Венькаöс Олявка, но сэтöн жö и согласитчис. — Зорнас-то оз ков, натьтö, а плетьöн — лöсялас,— и серьёзнöя ни содтiс: — Мыля оз вежö законнэсö? Небытöсь нiя — этö каждöйыс тöдö. Ме шуа: социализмыслö чорыт законсяняс оз ло умöльжыкыс... Да, небытöлöсь.

— Куснясьöны, кыдз алюминий... А колö — кöртовöйöсь. Кöртовöй, позьö сiдз шуны, гуманизм колö. Эстöн нем либеральничайтны.

— И керасö... Нужда тшöктас...

Олявка лöсьöтчис мунны тшöтш Венькакöт и пасьтасис ни, да сэтчö пырис Шурончик.

— Застанитi сёдаки, — кокнита ловзисис сiя. — А то, мыся, мунас, кошшы вöлись... Морт локтiс, Галь* пыдöсiсь. Миян моз — созлöй путой, а тiян моз — пичуй... Эн вежöрт? Да лесничествоись вöр сторож!

— Эн гöграв, Шура. Мыйкö колö?

— Сiя и эм, что колö. Каша бы пуö мортыс, öктiсьö. Эн откажит.

— Дак лэдз, эм эд шыдöсыт.

— Каша керö. Сола чери корö, дона пизь, шампанскöй вина.

— Кин сiя? Специалист, начальник?

— Сiя и эм, что специалист — десятöй зон, шуö, чужöма. Вот бы тэныт...

— Эн лёб, ырбыль... Сет, ежели сiдз, мымдакö.

— Бумажка вай.

Воштiсьны предлö некытчö — ачыс сэтшöм порядоксö керис, пондiс гижны бумажка.

— Кин корö?

— Шательников Борис, вöр сторож.

— Вайöт-ко сiйö татчö, баитыштны колö, — тшöктiс Олявка.

Сторож, не том ни мужик, пырис гусьöник, дзик шыралiсь кань, вешшис ыбöс одзсис бокö, чöвтiс шапкасö. Шурончик сьöртi — челядёк: учöтик мыгöра, винерик, шочыник пиня.

— Зон вот, адззан, — паськöтыштiс киэсö: нем пö он кер сэтöн. — Нёль килоöдз пöжöм...

— Поздравляйта, — шыасис Олявка да тшöктiс пуксьыны мужиксö. — Гортат ни богатырьыт?

— Муна вайöтны, — мужик жöдзыштiс местаас, видзöтiс следдэсö, пуксис. — А мамыс шуö: «Шампанскöйтöг эн лок». Каждöйыс, шуö, враччесö потшшуйтö, а тэнчит, шуö, быдса интернат ни примитiсö, да и сурбöж эн вайлы. Рожаöс, шуö, кулян, коскаöдз... позоритан, шуö.

— Сетам. Мымда босьтан?

— Öтiкö. Только родильняас нöбöта.

— А каша кежас?

— Абу велассьöм сы дынö, весь изводасяс. Лучше солаторсö да пизёк бы мешöк-мöд — кашкавдаö диво...

— И сiйö сетам. А ме кора бы вот мый: баня.

— Аслыт?

— Сельпоыслö. Может, баитан кинкöткö да тшупат? Ог обидитö.

— Керам. Ыджытö я колö?

— Ыджытö я? Ноко норовит, юася. — Олявка чеччис, осьтiс ыбöссö. — Кирилл Потапович, пырав татчö!

— Талун ме сы туйö, — шыасис Ванько Вань. — А сiя сöстöм рунас кытöнкö лоласьö.

— Сэк тэ пыр. Да Татясö кор. Сылö пывсьыны...

Дас минута бöртi гижисö соглашеннё, и Олявка мунiс школаö. Мунiс недырик кежö, а олiс обедöдз: юасис велöтiссезлiсь да челядьлiсь, кыдз нiйö вердöны столовöйын. И быдöнныс, дзик öтiк öмись, шуисö: пуöны нечöскыта, керöны пыр öткодь сёян, ви туйö пуктöны гос да маргарин. И чайыс не пыр овлö — компот унажык...

Сэтöн жö, кок йыланыс, керисö совещаннё, решитiсö: сельпо баитас эта йылiсь поваррезкöт, а школьнöй местком, родительскöй комитет да директор пондасö частожыка видзöтлыны, кыдз вердöны челядьсö.

Павжнайтiс столовöйын, гортас эз ветлы, и сразу пуксис керны контрольнöй удж. Пуксис, осьтiс тетрадь, книгаэз, да казялiс öтöрсис жоннезöс. Шоча нiя мыччасьлöны öнi, кыдз и сьöлаэз да бадьöггез. А одзжык, Олявка быдмикö, öтöрыс тöвнас нысянь гöрд вöлi. И кыйлiсö неетша, а эз чинö.

Олöв-керисö жоннес, иргаын мыйкö öктiсисö, ныроккезнысö, бордтыввезнысö весöтiсö да лэбзисö, а Олявка сё видзöтö öшынас, кöда сайын пожнасьö-усьö поснитик-поснитик, мыйкö рудкодь — лымок не лымок, зэрок не зэрок, дзик пöим сора пизь пырзьöтö да чераньвеззэз нюжласьöны.

Ёркöтчытöг пырис Чикиськин и юасьтöг, кыдз керлiс прокод, стаканö кисьтiс графинiсь ва, гулькйис-юис тэрмасьöмöн да пуксис пызан сайö, матöжык Олявка дынö.

— Дак кыдз пондам одзлань овнытö, Гавриловна? Боксянь люкалöны, бöрсянь зуралöны, вевдöрсянь мыйöн шедас сырйöны.

Олявка вештiс одзсис тетраддесö, юалiс: — Кин люкалö, кин зуралö? Подакöт разь олан?

— Веськыта висьтала: хана меным лоö, джагöтны кутчöны.

— А кин виноватыс? — юалiс Олявка. — Ме тшöктi гусясьнытö али Шурончикыс, али Ванько Вань? Али нем вöлi сёйны, пасьтавны нем?

— Вина тшöктiс, код юр тшöктiс...

— Бöра жö ачыт виноват: öмат некин эз кисьт.

— Не сы йылiсь басниыс, Гавриловна... Отсав меным... петлясис юрöс кыскыны. Тэ морт, ме морт. Быдöнным мийö отир и отир моз давай керам... Босьтö менö на поруки... Ме не бандит, ме вежöртча. Кылан? Тэ менö вежöртiн, Гавриловна?

— Кыла, да ог вежöрт...

— Эд лэдзö пуксьöтны, кольö гортö... Долгын ог ло... Сетö кад думайтны, мый лоис.

— Сiйö кадсö сетас суд. И сетас сымда, что ештан сизимпöв думайтны, мыля сiдз лоис.

— Вежöртi, Гавриловна, — шуис Чикиськин да чеччис и кыдз бы ас пондасис содтiс: — Кирилл Потапович каналля, сылö Гублянын сэсся не овны... Сiя бöж вильöтiсь, жулик, винаюись. Сэтшöмыслö татöн нем керны, сылö места — Вайгач остров.

— Олан эшö Гублянат, кöр бертан, — кольлалiс сiйö Олявка гаж голосöн. — И эшö пöттöдз юан...

Мунiс Чикиськин и бытьтö Савыркиналiсь кикоксö да вежöрсö сьöрас нöбöтiс. Пукалö, чöлö — не нырöн виш, не синöн кваркыш. Некытшöм садь, некытшöм дума абу — и юрын, и сьöлöмын нач пусто.

Вöрзьöтiс местасис телефон — тор-тор горöтiс. Этадз районсянь звонитöны-нетшкöны.

Чуньпоннэзнас босьтiс трубкасö, шыасис:

— Да, сельпо. Ме, ме. Кывза! — дынасжык вештiс календарь, босьтiс ручка, но нем эз гиж. — Вежöртi: ашын — райпотребсоюзö совещаннё вылö. Десять кежö? Пондыла. Но, но, лэдзча.

А сэтчö культмагись локтiсö: кык телевизор оз мыччалö, колö пö мастерöс корны. И Шурончик пырис, пондiс дозыляйтны председательлö: велöт пö, кыдз собраннё вылын баитны: отсавны петны барышникыслö али вöтьны?

— Висьтавны правда, — шуис Олявка. — А правдаыс ачыс тöдö, кöдöрö воштыны. И етшажык баитны — только главнöйсö висьтав, осудит...

— Сiя и эм... Ох, нелюбöй, кытчöдз бутылканат беддясин!

Собраннё пондöтiсö сразу, кыдз колхознöй правленнёö пырисö сельповса. Чикиськин мунiс одзас, председательскöй пызан дынас, бокöнмоз паськöтчис векнитик креслоö, дыр сыналiс-малалiс пель вевдöрресö, кытöн эшö сьöд видзис дженытика шырöм юрси. Рытъявнас сiя ветлiс гортас и öнi пукалö мöдöтчöм, дзик городскöй: зелёнöй курткаа, чочком йöрнöса и гöрд сера галстука. И садь — некöда синчачаын оз тöдчы.

Быдöнныс думайтiсö, что собраннё кыссяс дыр, лоас уна шума, а петiс нач мöднёж. Только утвердитiсö повестка, и Чикиськин корис кыв. Президиум дзарьясис-керис и — сетiс. Чикиськин калькöтчис кресло бердiсь, бергöтчис отирыслань, кöдна пукалiсö сы мышкын, висьталiс:

— Ме тiянöс, бур йöз, ог манит. Партия одзын ме виноват, и сэсся оз туй новйöтны меным этö гöрд книжкасö, — и Венька одзö жагвыв колис партбилет, лапкöтыштiс сылiсь вевдöрсö, бытьтö прощайтчис сыкöт, и лешкис-мунiс ыбöслань.

— Тэ кытчö, Кирилл Потапович?! — кватитчис Венька.

— Аслам туй кузя.

— Берт ноко!

Эз берт — не спасибо, не прощай.

Судитiсö-рядитiсö да гижисö протоколö. Чикиськинöс партияись вашöтны, а коммунисттэзлö, медодз партбюролö, этаись петкöтны колан вывод, сiдз кыдз Чикиськин, кыдз баитсьö, мыччалiс бур урок.

Олявкалö эта собраннёыс вайис шог, мыдзтöтiс сiйö, и лоис сiдз охота адззывны Андрей Никитичöс — кöть бы джын минутка баитыштны сыкöт, недырик ордчöн пукыштны, гажа кыв сылiсь кылыштны — и сiя звонитiс сылö, мöдiс тшöктыны кайны. Но трубкасö босьтiс кинкö мöдiк, вöснитик голоса морт, и висьталiс:

— Андрея Никитича дома нет, говорите, я запишу.

— А кытöн сiя? Аллё, аллё!! А кин этö? Аллё! Паныт шы абу.

Юрас вачкис лёк дума: «Сiя эд — Икотайкинаыс!»

Лöгасис, пуктiс трубкасö. «Но, Верепов! Тыдалö, етша тэ бöбöтлiн, дак эшö модзыт!..»

Петiс öтöрас, адззö: леспромхозлöн автобус городö иньдöтчö. Пуксис сы вылö и час бöртi чеччис Кудымкарын.

Рытся городыс олiс, кыдз лунöн: быдлаын йöз, машина, шум. А площадь вылын — югытся-югыт: пемытсö разьöны вына прожекторрез да лампочкаэзлöн гирляндаэз. Медшöрас уна рöма биэзöн орсiс ыджыт кöз. Площадь боккезас, аллеяэз нёжöт, лэбöмась катушкаэз. Сэтöн шуксисö-котрасисö челядь, нiя ысласисö кин кыдз вермö: и кок йылын, и пидзöс вылын, и быкöн, и водсöн, кыминь и гатш, но сё дадьтöг.

Пельöсiсь пельöсö ветлiсö пöрись отир, унажык инькаэз, — кöда кагакöт, кöда понкöт, а кöда ачыс аскöттяс.

Неылын кöзыс дынсянь том отир да бульдозер чукöртiсö баня ыжда чукöрö лым. Ордчöн эта керöскöт сулалiс косви столаын Снегурка. Сылiсь синнэсö краситiс-мавтiс тоша детина, натьтö, скульптор. Кытöнкö трибуна саяс, паркас, триньгис гитара и сьылiсö-вашкисö зонкаэз: не вежöртны, не радуйтчыны сэтшöм сьылöмнас эз позь. Кытöн сiя öнi — «гитара сьылö, сералö и горзö?»

Том город олö Виль годöн ни — сы гажöн, сы тшöктöмöн, сылöн ассяма руöн.

Трибуна вывсянь этö гажсö видзöтö гранитнöй Ильич. Сылö долыт, сiя спокойнöй: и комиэс, вöр пыдöсiсь кöркöся гöна öммес, кöдна эшö пятьдесят год одзтi эз тöдö грамота и эз вöв нылöн литература, лоисö öткодь воннэзöн ыджыт да богатöй семьяын, кöдалö нимыс — Советскöй Союз. Крепыта, тыдалö, комиэс видзсьöны кок йыланыс и повтöг мунöны одзлань оланöт, ежели сiдз бытшöма кужöны уджавны да гажöтчыны нельки кöдзыт рытöн, гажöтчыны праздник панытö.

И Олявкалö лоис долытжык, кöр пантасис эта площадькöт, ойся югыткöт, гитара шыкöт. И сылö сiдз охота вöлi сулыштны эстöн дыржык, матöжык сибöтчыны сьылiссес дынö, олыштны ны оланöн, но... сы пельпоннэз вылын изöн куйлiс эта кузь асыла да кузь рыта луныс, нырыштiс сiйö дженытик, но сьöкыт, дзик гиря, арттöм собраннё, и сiя иньдöтчис гортас и бöра думайтiс Чикиськин йылiсь, сы позор йылiсь, сельпо репутация йылiсь.

Только я винаюöм мортсö тшыкöтiс? Али мöдiс öктыны уна деньга? Но деньгаыс, кыдз мыччалiс следствие, сылöн етша. Сiдзкö, Чикиськин не весь шувлiс: «Кылö менам не öрья, а шорья, сэтшöмыслöн деньгаыс оз чукöртчы». А может, былись, кыдз баитö школаись директор, эстöн причинаыс пыдынжык куйлö, и колö видзöтны, кин сiйö и кыдз воспитайтiс? Но эд сiя чужис советскöй годдэзö и велöтчис советскöй школаын!

Абу, абу кокнит мортсö вежöртны. Йöз мортлöн сьöлöмыс — пемыт ойшöр: не синöн видзöтны, не киöн пешлыны.

Андрей Никитич гортас эз вöв, и Олявка повзьыштiс: а вдруг кайис сы дынö, Гублянас?

Осьтiс замоксö, тойыштiс ыбöссö, а сылö паныт:

— Проходите, не стесняйтесь, будьте, как дома! Шай-пай лоис, чикнитiс выключательöн — абу некин, только Андрей Никитич жырын пондiс орсны музыка. Может, радио?

— Кин сэтчин? — лöгöн юалiс Олявка да пырис комнатаас.

Тожö некин абу — орсö магнитофон. Не я сiя баитö?

Каттис лентасö мöдланьö, включитiс, и недыр мыйись кылiс тöдса ни кыввесö и бöра лöгöн горöтчис:

— Но, Верепов!

Пöдналiс ыбöссö, мыдзöмöн ловзисис: «Лоан я тэ, квартира, менам гортöн? Пондан я менö видзны сiдз жö шонытын да нянь-солын, кыдз гублянскöй гортö?»

Гöгöртiс квартирасö, павкöтчис батареяэз бердö — лонтöны я? — вöлись осьтiс форточка — ась кыскö пöжсьöм дуксö, — чöвтчис. «А может, кытшöмкö финтифлюшка дын кузь рытсö джендöтö?», — саймис небытшöм дума, но эз ешты лэбтiсьны: ыбöс саяс кылiс гора баитöм, сэсся пондiсö осьтны замоксö. «Кинöс сiя вайöтö?»

Оссис ыбöс, и Андрей Никитич лэдзис пырны одзас Олявкалiсь айсö да вонсö и, кöр казялiс иньсö, горöтчис:

— Кин, кин теремокас пырöма? Ноко пантав гöссесö! — и оськöвтiс Олявка дынö, окыштiс. Этö казялiс пöрись Савыркин и осудитiс:

— Йöзыс дырня некöр эн нювсьы, зятёк.

— Сiя, пап, предрассудок, — шуис Витя.

— Ме сэк тэныт,зонка, рочöн жö висьтала: эта — телячьи нежности!

Нiя талун вöлiсö уна басниаöсь и мöдкодьжыкöсь, и Олявка сразу юалiс:

— Кытöн юит?

— Тöдсасим, Оля, а не юим, — висьталiс Андрей Никитич. — Отсав, пожалуйста, нылö чöвтчыны и кöр пызан сайö, а ме чай пизьöта, папыт юö бы.

Чöвтчисö, пуксисö телевизор видзöтны, а Олявка павйöвтiс кухняö.

— Кысь нö панталiн?

— Рынокись адззи.

— Кыдз нö тöдiн?

— Что этö нiя — асьныс висьталiсö... Муна, кыла: кинкö мораль лыддьöтö: «Синнэт умнöйся-умнöйöсь, а бöбöвлiсь уджсö керан! Кыдз абу стыд! Разь сы понда дедыт юрсö пуктiс, медбы тэ вина дзурскин да тышкасин, а?» Кежи нылань, видзöта: старичок коддэз коласын киэзнас öвтчö. «А тэ, Аристотель, мый думайтан? Тэныт колö вечнöй мотор керны, а не эстöн кöдзны вынтö да умтö! Миритчö давайте и некöр эд гыжьясьö!»,— и öтлаöтiс нылiсь киэзнысö, шапкаэзнысö ладом пуктiс. «Аристотель» дугдiс кулаккесö пидзравны, сералö: кысь тэ, шуö, дед, сэтшöмыс? Городас тэ коддес абу. А сiя: «Ме Ыштайись Савыркин, кöркöся чекист... Лоö, шуö, здоровöсь, олö богата да менчим басниöс эд вунöтчö!» — и петiс ны коласiсь. Ме сылö паныт: «Здравствуй, Гаврила Лекандрович, ме тэнат зять...» Сэтчö локтiс Витя: «Сэк и менам зять».

— Мыйлö локтöмась?

— Витяыс музейын кошшисьöма, и паптö сэтчин жö корлöмась.

Ая-зоналöн вöлi асланыс басни: старик мыйкö доказывайтiс, а томыс сыкöт эз соглашайтчы, ассис нырсö нуöтiс, кöть öддьöнсö эз спорит. Витя тöдiс, что айсö эта вопросын не вермыны, сылöн аслас мненнё, кöда важынся-важын мöртчöма сы юрö и сэтчинiсь крюкöн сiйö он судзöт и он пыркöт, кыдз шапка вылiсь,бус нето лым.

Эз дугдö вермасьны и пызан саяс, чай юикö.

— Отсавны мортлö, керны сылö бурö — вот тэнат оланыт, — дзирдалiс пöрись Савыркин. — Ме терпитны ог вермы поппезлiсь сябзьöмсö, но ошка нылiсь öтiк заповедь: помоги ближнему твоему.

— Быдöс ловьяыслöн, кöда олö Мушар вылас, первозадачаыс öтiк: не орöтны ассис родсö, кольны пиян...

— Отсавны!.. Сойлö, вонлö ли, тöдтöм дядялö ли, но — отсавны, — эз кывзы зонсö старик. — Отсав и зырымбедьлö, и беддя мортлö. Отсав копейкаöн, няньöн, кывнат — эн йöрт деньгатöмöс одзöсöн, верд тшыгöс, бурöт горзiсьöс. Отсав понлö, кайлö, гаглö — кöда и спасибосö оз куж висьтавны. И немлö видзчисьны спасибосö: бур сьöлöмаыслö, бур делоыслö сiя оз ков. Сiя пустöй кыв.

— Миян кадö, пап, сымдасö он ешты отсавны. Да он и казяв, кинлö отсöтыс колö: лэбзян оланöттяс, кыдз пуля, инерция сьöртi. Мийö эта понда учöтöсь — отсасьнытö.

— Учöтыссянь — чаль гыж кодьö, ыджытыссянь — ыджыт кабыр. Кинлöн кытшöм вын-етш.

— Норовит, пап, ог куж перыта думайтны.. Дак вот мый. Тэ часöт заповедь висьталiн — ог тöд, эм я вичкуыслöн сэтшöмыс...

— Бытьтö эн кывлы? Ог верит! Ны святöй писаннёын гижöм.

— Но, бур... Дак вот, тэ ачыт аскöттят, кыдз и святöй писаннёыт, споритан. Тэ öнтай висьталiн, что каждöйыс ассис крестсö должен нöбöтны ачыс. А ежели ме кутча отсавны тэныт нуны, меным Голгофатö не адззывны — одзжык уся.

— Тэ меным кинат отсалан, а ме тэныт — советöн: велöта, кыдз паокжык нöбöтны, кытi матiжык туйыс... То и часöт сiйö жö кера.

— Сiдз, сiдз, пап. Но а если тэнат отсöтыт некинлö оз ков? Тэ пондан сибöтчыны аслат отсöтöн, а тэныт, кыдз öнтай — эн вунöтчы? — шлёпкасö: «Эн сюй юртö, не тэнат дело!»

Чайсö юис Олявка öтнас, но пызан сайись некин эз чеччы: öт кыкыс споритiсö, мöд кыкыс кывзiсö.

— Кыдз не менам дело? — пöрись Савыркин перыта бергöтчис зоныс дынö. — Мый адзза, мый эм ме гöгöр, син одзам — быдöс менам дело. Быдöс! А мыля? А сiйöн, что Советтэсö кери ме, колхозсö — ме. Распутинöс ме кутi, и фашистсö ме верми: то видзöт, энö, натьтö, весь оз сеталö, — сiя вачкис долоньнас орденскöй колодкаэз кузя. — Бисö и васö мунi ме, старикыс, а ловья кольччи. А мыля? А сiйöн, мыля меным тожö отсалiсö. А вот Никита Верепов, зятёкнымлöн айыс, эз пет бисис — кинкö эз ешты отсавны сылö.

— Сiдз, сiдз, — шуис зоныс да лэбтыштiс лэдзчисян очкиэсö. — А кöр отирсö пуксьöтлiн, кöр Дзолинь тёткатö плетьнат сырйин, тожö...

— Тожö отсалi, тожö бур дело кери. Бур дело государство понда, уджалiсь отирыс понда.

— А нiя, кöднö плетьнас, разь не уджалiсь отир?

— Колöма буржыка сырйыны, быдсöн пыркöтны кыз юрсис монастырскöй чадсö — öнi дело керис бы, а эз шелешенит вичкуэзöттяс.

— Дак мый... — пондöтчис вöлi эшö мыйкö висьтавны зоныс, но старикытлöн, тыдалö, мылаыс бырис:

— Тэ, Витька, нiя годдэзся политикасö эн вöрöт. Тэ сэтiсь и бельме он вежöрт! И давай мун узьны, а ме гостиницаат талун ог ни пыр, — сiя сьöкыта чеччис, вештiс стулсö пызан увтас. — Спасибо, хозяин-хозяйка! Кытчö водтöтат? Горвывныт эм?

— Челядьыс жырö, Оля, водтöт, сэтчин медшоныт.

— Ме ачым верма, менö оз ков водтöтны, — шуис коссö веськöтлiкö пöрись Савыркин. — И тэ, Витя, может, татöн узян? Мыйкö эшö тай юасьны мöдiн...

— Пожалуй, узя, если эм кытчö водны.

— Адззам местасö, — висьталiс Андрей Никитич. — Лöсьöтчы диван вылас.

Мужиккес дугдiсö баитны, и Олявка юалiс:

— Тэ, пап, тöдан Гублянсис пöрись морттэсö?

— Тöдлi. Кинöс тэныт колö?

— Чикиськин Потапöс.

— Потусö? Крепыт хозяйствоа вöлi. Узьлан керку видзлiс. Сэк эд Гублянас торжоккез вöвлiсö, а петыр лунöн, митрей лунöн да конанöн — ыджыт торг. Сы вылö ылiсянь вовлiсö. Вот нiя, торговöй йöзыс, и сулалiсö ны ордын. Ачыс Потуыс поснит товарöн вузасьлiс, Чураккезöдз ветлывлiс, кыдз тiйö öнi автолавкананыт. Нэп костас бура ёнмис, куим вöв сразу доддявлiс. Юрöн олiс мужикыт, да умöль годас — этö вöлi двадцать девятöй, сэк шерöн сюэсö чегис — Галлезас шедöм вийны. Сю мешöк понда... Тэ мый, Олявка, тожö история бы гижан?

— Талун сылiсь зонсö партияись вашöтiмö.

— Зонсö умöля тöда. Но, кыдз шуöны, бадь вылас кöзыс оз быдмы. Гусясис, натьтö?

— Спекулянитiс. Получитасö базаись огуреццез — оз и висьтасьö сельпоыслö, сразу Перемö кыскасö да рынокын витiсь донöнжык вузаласö. Лук видзасö тöвбыт, сэсся гижасö: сiсьмис и — Березникиö, Соликамскö...

— А кытöн председательыс вöлi? Мыля контроль абу? Тэ-ту мый понда деньгасö босьтан?

— Сiйö эшö ме вотöдз, пап.

— Дак тэ вотöдз эд тожö кинкö уджалiс! И тэ сы кодь лоан! Осьтаöммез! Гöна синнэз!

Сэсся Савыркин Гавра шы эз сет, мунiс узьны.

Бура чирзiс папыс, да Олявка сы кыввез вылö эз обижайтчы: сiя честнöй морт, былись отирыслö отсалö бы, отсалö, кыдз настоящöй коммунист. И Витя весись сералö сы вылын.

Андрей Никитич пишкис-узис, а иньыс любуйтчис би югöррезöн, кöдна пырисö ны öшынö: улица сайись керкуын рытывбыт ни мигайтö праздничнöй кöзок. Видзöтiс сiя югьялан öшынö, а юрас ветлiс талуння баснилöн говкыс и чужтiс быдкодь думаэз. Сiя вились бертiс думанас лунся делоэз дынö и мöдпырся ни переживайтiс сiйö, мый эз шогмы али шогмис не сы моз, радуйтчис бур делоэз понда, сы понда, что сё жö и эта кольöм луныс сетiс отирыслö унажык бурсö, полезнöйсö, нежели умöльсö. И бöра надейтчис, что и ашыння луныс лоас не умöльжык этася, сiдзкö, и мöдлун, и сэсьмöдлун, и одзлань Гублян пондас овны бур оланöн, эд бурыс чужтö только бурö.

«Да, кыдз шуис Гераклит, Вселеннöяс быдöс кывтö, быдöс вежсьö, и оланыс — дугдывтöм пессьöм, пырся пессьöм, — усисö тöдвылас неважын лыддьöтöм кыввез. — И мортыс эта пессьöмын, тыдалö, былись вына орудие. Нельки Дзолинь бабö: эд йöзыс кыянö и сiя содтö ассис шöрток. Бурö я, умöльö я, но содтö».

Кусiс öтöрись би югöр, а сiя сё касьтылiс лунсö.

Пыд ойнас, кöр и Олявка онмöссис ни, быдöннысö саймöтiс гора камöтöм да горöтлöм: ны площадка вылын кинкö желлис-вартiс соседдэзлiсь ыбöс да каститiс, кыдз кужис, мам ним.

Ыбöс дынö медодз чепöссис пöрись Савыркин. Сiя мöдiс, тыдалö, лöньсьöтны кодульсö аслас методöн — лыддьöтны мораль, да эз вермы осьтны ыбöс игансö. Сэтчö локтiс Андрей Никитич, осьтiс ыбöссö, и быдöс горыс-гымыс гамазöн пырис ванйöвтöм ыбöсас, лэбтiс ольпассис и Олявкаöс.

— Корнил Авдеич, тэ кытчö пыран? — трекнитiс пельпонöттяс паськыт бöра мужиксö Верепов. — Эта жö йöз квартира, не тэнат!

Кодыс тапкисьöмöн бергöтчис, валитчис спинанас ыбöс вылас, сибдöм голосöн юалiс:

— Кы... кы... нымöт... таж?

— Мöдöдз. Тэныт вылöжык колö.

— У-улöжык... Куимöттö колö.

Пöрись Савыркин сибöтчис сы дынö, зэгнитiс галстукöттяс, сюйыштiс сылiсь конецсö синбанас:

— Этö мыйлö кышалiн, этö?! Но висьтав: мыйлö? Кодыс тойыштiс Савыркинлiсь кисö, рякöстiс кижгöмöн:

— Куль-тыра! Кылан, старик? Куль-тыра сiя! И тэ энн вöрöтт!

— Вот, вот: культыра-павтыра! — дразнитiс старикыс. — Куллескöт бы и овны тэныт, а не этшöм теремын... Порсь гидйö колö йöртны, дзутуöс!

Вылiсянь лэдзчисö инька да зонка и турйöн-тарйöн кайöтiсö вылö öшöм хозяинсö.

«КОДЫР САЙКЫТ, КОДЫР КÖДЗЫТ...»

Кольöм гожумыс вöлi кöс да жар, и тöвсö видзчисисö вöснит лымаö, кöдзытö, а сiя кутiс да нач мöднёж керис, ас мознас: локтiс не аслас кадö, сёрöнжык, да небытик и рамыник, дзик полiсь невеста, но медодзза жö луннэзас, кыдз кынтiс, вевттис мусö кыз шебрасöн, а город дынiсь кык сой-ю уна местаэзын эз вермö йысявны декабрь шöрöдз.

— Миколаыс зэлöтас, — баитiсö пöриссес. — Сiдз крапкас — пуэсö поткöтлас.

Но вот локтiс микола и вайöтiс не мороз, а пурга-падера погоддя, и сiя неделя етш орсiс-ыждалiс: чышкис мыссэз да керöссэз, кöдна бöра нёштöммисö, пашмисö; ровняйтiс быд гöпоксö, быд кырассö, вылын столаэз сувтöтлiс йöррез дорö, стадионнэз да тротуаррез вылö, тыртiс туйез, фермаэз дынiсь зороддэз, стопаэз.

— Розосвоыс тожно мыччалас ассис вынсö да мывкыдсö, — кöсйисисö тöдiссес. — Уна и воробей кынмас!

А тöв-асныр ассис визьсö видзö: нöбöтiс да нöбöтiс — быдöс учöт туйесö пöдналiс и вöлись синваэсö пондiс рудзöтны, бытьтö неладноыс понда каитчö.

Тшыксис машина туйыс и Гублянö, и Андрей Никитич сибдiс городас да рыт-рыт гуддисис велöтчиссескöт техническöй кружокын, кытöн нiя керисö сю дзимлялан комбайнлiсь да звездолётлiсь виль моделлез, кöднö лöсьöтчисö мыччавны уральскöй выставка вылын.

Талун Андрей Никитич мöдiс рытйыны библиотекаын и лекцияэз бöрын, медбы терпитны сёр рытöдз и не керны ужинсö гортын, топытжыка обедайтiс кафеын. Петiс кафесис, киоскись небис журнал и кынымкö минута бöрсянь вöлись казялiс, что мунö гортас. Эз эд мöд, а мунö. Мыйлö, мыля? Думанас панöвтiс асьсö, эз тшöкты мунны, а коккес сёравно кыскисö. Серöмтчис, думайтiс: «Нинкöммес туйнысö тöдöны. Раз нуöтöны, колö ветлыны, кöть тöда, мыйлö нуöтöны».

Локтiс гортас, и сэтчö — телефоннöй звонок. Босьтiс трубкасö, шуис:

— Квартира. Ме кывза. Сылö — инькалöн голос:

— Привет кудымкарскöй отирлö! Бур лун, Андрюша!

— А кин этö?

— Эн и тöд? — дивуйтчис звонитiсьыс. — Этö соликамскöй отир... Тэ öтнат?

— Öтнам. — Андрей Никитич секунда кежö джöмдiс кывнас и вöлись шуис нимнас: — Ме öтнам, Ника. Тэ кысянь звонитан?

— Татöн ме, городас. Гöститны корся... Примитан, Андрюша?

— Кöть кöр пожалуйста!.. Пантавны тэнö али ачыт адззан?

— Нинкöммес туйнысö тöдöны, — висьталiс Вероника.

— Мый тэ шуин? — горöтчис сэтчö Верепов, но мöдыс трубкасö пуктiс ни. — Чудеса тай: менчим кыввезöс, менчим думаэзöс висьтавлö! Абу я сiя телепатка?

Пуктiс трубкасö, пуксис диван вылö, медбы думайтыштны сы вылын, кыдз сiя шогмис, что как раз талун и как раз нiя минутаэзö, кöр сылö лöсьöтчис звонитны Вероника, сiйö кыскис гортас кытшöмкö вын, кытшöмкö кватьöт чувство. Случайность али быль мыйкö эм сэтшöм, кöда диктуйтö мортыслö судьбасö, мыччалö сылö олан туйсö? «Эм, сётаки эм мыйкö, только не Саваоф, не Христос, а мöдiк, кöда чужлöма уна годöн одзжык и лоас вексö...»

Казялiс, что сервант да тумбочка бусöсьмöмась, что пызан вылын куйлö мый колö и оз ков — пыжьян, шкурка, пурт, газета, нельки эм суса, кöдö керис неважын сойыс понда, но эз на ешты волькöтны, а стул вылö чапкöм галстук да чышкöт — быдöс этö колö чышкыны да дзимлявны син одзись. И сiя öт кинас весöтiс пызансö, а мöднас курмыштiс паськöмсö и нöбöтiс ваннöйö. Сэтчин простайтiс киэсö да небурика вадöм бонöн петiс порогувтiсь жырö, но силькнитiс звонок, сiя осьтiс ыбöссö, и пырис Вероника, горöтчис:

— Позьö я? — и кöр хозяин бергöтчис ыбöслань, шытöг лэдзис киэсö да, кыдз баитсьö, пондiс сёйны локтiсьсö синнэзнас, содтiс рочöн: — Мир да любовь дому сему!

Дзимлясикас, эта дженытик кадö, Андрей Никитичлö некöр вöлi думайтны сы йылiсь, кытшöмöн лоис Вероника, и видзчисис кöркöсясö: визылö, збойö, невна вышитчисьö, кöда сувтöтлiс асьсö ёрттэсся одзöжык и вылöжык, сiдз кыдз вöлi нысся мичажык, басниажык да буржык паськöма, но часöт панталiс нач мöдкодь мортöс — лöньö, рамö, вежöраö. Сылöн шынньöла чужöмыс, кынöм вылас тэчöм киэс, ёнмöм вывтырыс — быдöс мыччалiс ежели не покоритчöм, дак дыш сора жагсялöм. И только ыджыт, паськыта пуксьöтöм синнэс немымда абу вежсьöмась, нiя сё пöттöмöсь, сё ёсяöсь, сё сэтшöм жö сьöдöсь — немымда абу быгалöмась. Но ныын абу ни сiя чарньöлыс, кöдöн кöркö вермылiс сотны обидчикöс, некывзiсьöс, сыкöт споритiсьöс.

Дыр мыйись, кöр нёджжалöв-керисö öтамöднысö, бöра шыасис гöстяыс:

— Дак позьö я? Ме бы чöвтча...

— Кыдз жö оз позь? — Андрей Никитич виззьыштiс ваннöяс бонсö, чышьянокö чышкис вадöм киэсö.— Чöвтчы, пожалуйста, — и пондiс пöрчлавлыны Вероникалiсь пась киззесö, но чуннес, дзик вугмöмöсь, некöстасянаöсь, мыйсянькö дрöжитiсö и эз адззö кизь ладсö.

— Ме ачым, Андрюша... Тэ он лöгась, что сiдз шуа, а не ичнат?

— Мый тэ, Ника!.. Ме тай тожö ог величайт тэнö. Вероника чöвтiс пасьсö, сюйыштiс сосас шаль да испоткиэз и, кöд коста Андрей Никитич öшöтiс паськöмсö гардеробö, мунiс ыджыт жырас, сувтчис зелёнöйвевья, дзик тулысся видз, джодж шебрас вылö, кутчис сынасьны трюмо одзын, кöда сулалö ыбöссэз коласiсь простенокын.

Юрсиыс шырöм дженыта, тэчöм-сыналöм юкöвтöг, öтвыв читкыля шапкаокö, и краситöм сьöд краскаöн. Гöрдззöм гöрд платье волькыта жмитiс сылiсь статя вывтырсö и пидзöссэсви вевттис веськыт да вына коккесö. Верепов эшö казялiс, что Никалöн кузь гыжжез мавтöмась сиреневöй лакöн и этасянь чуннес, киэс лоöмась öддьöн басöкöсь.

— Андрюша, тэ некытчö он тэрмась? — Вероника перыта бергöтчис порогувт ладорас, и сы пель бöжжезын сят-сят шыасисö ыджыт цыганскöй пелькытшшез.— Ме баита бы тэкöт... Уна колö баитны, советуйтчыны. А бур советсö меным верман сетны тэ и только тэ.

— И сэсся некин? Сы пасьта мирын...

— Паськыт мирыс эта вопросын ме понда, Андрюша, ливийскöй пустыня, — чорыта шуис Вероника, и сы синнэзын, кыдз кажитчис Вереповлö, недыр кежö öзйыштiс сiя куль биокыс, кöда вермывлiс чарöтны не öддьöн вына мортокöс,

Кöть мирас, быдöс кывтö, быдöс вежсьö, но, тыдалö, морт мывкыдiсь сiя чертаыс, кöда восемнадцать годсялöн вöлi медтöдчанаöн, пондас ыждавны мортыс пытшкын сэтчöдз, кытчöдз сiйö оз пуктö квать пöла гортас. Сiдзкö, эта поговоркаыс — ошшасись да вышитчись мортöс и зорйöн он веськöт — немымда оз бöбöтчы.

Конечно, Андрей Никитич сразу казялiс Вероникалiсь леститчöмсö, сылiсь ма кöра баснисö, казялiс, мый сылö колö, и пондылiс сувтöтны ас коласас да сы коласö, кыдз крепыт щит, Олявкаöс, но эта щитыс сайöвтiс мужиктö недыр, сiдз кыдз сiя, мый колiс Вероникалö, мöдытлö тожö пондiс ковсьыны, и серьёзнöй советтэз сетöм йылiсь сiя эз ни думайт.

— Пелькытшшет öддьöн басöкöсь, Ника, öддьöн ассямаöсь, — горöтчис Верепов, медбы висьтавны мыйкö не пустöйö жö, но и не сэтшöм дельнöйö. — Васно чудскöйöсь.

— Ме и ачым не шукры-мукры, — шынньöв пыр шуис Вероника. — Али нёштöмтчи ни? Ровно бы одзöв. Неважын öтiк морт меным тöдан мый висьталiс?

— Висьтав, сэк понда тöдны.

— Тэ, шуö, мужиккес понда öддьöн бур средство, чöскыт средство. Ов да гажöтчы, шуö, кытчöдз эз быр средствоыт, и мужиккесö гажöт. Тэ, шуö, не мукöд кодь, кыдз пö видзöта, тэ, шуö, ангеллэз коласiсь... И этö висьталiс пöрись инька, кöда олансö пешлöма быд ладорсянь.

Шедiс бöра инькаытлö сiя шыльыт дадёкыс, кöда вылын ысласис томувьяс, кöда часто сiйö нетшкöвтлiс му бердсис да лэбтывлiс вылынжыка мöдiккезся, и Вероника энö мöдiккесö нёджжавлiс виль местасяняс, кыдз пастух баляэсö. И Андрей Никитичлö,вдруг охота лоис мездöтчыны эта басниись, но мездöтчыны кыдзкö деликатнöйжыка, не сразу орöтны, и сiя кывзiс гöстясö, но кывзiс только пель дорнас. Вероника казялiс этö и недовольнöя юалiс:

— Тэ кылан менö, Андрюша?

— Кыла, кыла... И тэ мöдан кутчыны гажöтны нiйö?

— Мöда, Андрюша. Да не — нiйö, а — сiйö. Сiйö öтiксö, кöда понда вийсьö-орлассьö сьöлöмö унася-уна год сьöрна ни...

— И надейтчан, что верман... гажöтны, что тырмас гажыт али, кыдз шуöма инькаыс, чöскыт средствоыт?

— Верма, Андрюша, верма! Этö ме бура тöда. Нем и нем ог жалейт, быдöс и быдöс сета сылö, öтiк воть ог суськы, öтiк чир ог дзеб, — и сiя торс сувтiс басöк пидзöссэз вылас, кöдна сiдз гленитчисö кöркö аслыс и зонкаэзлö, сувтiс, мый некöр эз керлы аслас векын! — и кыссис Верепов одзö да сывьялiс сылiсь кок гумаэсö, павкöтчис кымöснас вакса дука башмаккезас и бöрдчис, ровно учöтик.

Эта вöлi мыйкö мöдiк, не Вероника репертуарись, и Андрей Никитич повзис, пондiс бурöтчыны:

— Ника... Ника, тэ мый этö? — Сiя кутiс горзiсьсö конувттэс дынöт, пондылiс лэбтыны сiйö, но эз вермы орöтны коккес бердiсь; мöдiс мунны сы дынiсь, но эз вермы шедтыны коккесö.— Ника, дугды, пожалуйста, давай баитам бытшöмика, морттэз моз, — и малыштiс пушитчöм юрсисö, лапкöтыштiс пельпонсö. — Ме бура вежöрта тэнö... ме адзза, что тэныт сьöкыт. — И бöра кутчис лэбтыны сiйö пидзöссэс вывтсис и öнi вермис ни да жагвыв нуöтiс диван дынö, пуксьöтiс сэтчö. — Этадз пондан горзыны — письтасö синнэт... Ужо, юны сета.

— Оз ков, Андрюша, — Вероника кутiс сылiсь киэсö, лöсьöтiс оча долонь да пуксьöтiс Вереповöс бокас и пондiс сы киэзöн чышкыны синваöсь чужöмсö. — Кылан, кытшöм дзирытöсь нiя? Эшö курытöсь. И солаöсь, дзик океанскöй ва... Быдса кöньöс ни кисьтi, а некин оз тöд, некин оз бурöт... А кин понда, мый понда — мыля он юав? — сiя кыскис платье соссис чышьянок, пондiс чышкисьны.

Андрей Никитич мездöтiс киэсö, пыдынжыка ловзисис да юалiс:

— Шоколадка сёян, Ника?

— Меным шоколадыс — тэ...

— А кöркö шувлiн, что...

Вероника эз сет сылö баитны, тупкалiс сылiсь öмсö басöк киокнас и ылöтiс:

— Кöркö ме вöлi кöр кодь, а öнi — киссьöм гöр кодь.

— Тэ сiйö ачыт думайтiн? Лöсьыт рифма! Вузав поэттэслö — куим руб сетасö...

— Давай огö пондö сы йылiсь, эм важнöйжык дело, Андрюша, — висьталiс Вероника да топ зэлöтчис Верепов бердö.

И сэтчö локтiсö мöдiк гöссез. Вероника пасьтасис да мунiс, но кöсъясис звонитны невна сёрöнжык.

А мöдiк гöссес вöлiсö Андрей Никитичлöн свестя, важ иньыслöн сой, да сылöн нылокыс.

— Ми, Андрей, корсям узьны... Пиукö каникуллэз вылын, дак локтiмö столицанымöс видзöтны..

Сiя эшö мöйму мöдiс вовлыны, но сiдз и эз вöв не касьтiсикас, не сы бöрын, и Андрей Никитич сы йылiсь вунöтчис ни вöлi, да вот казьмöтчис вöлись. Да не просто казьмöтчис, а эшö казьмöтiс мöдiкö — что сiя Женя сойыслö отсалiс велöтчыны медучилищеын, босьтлiс сылö свадьба кежö фата да чочком платье и уна год сьöрна, кöр Женя олiс Верепов дын ни, отсавлiс небны быдкодь товарсö, кöдö он адззы магазин прилавок вылiсь — свестяыс уджалö орсын экспедиторöн.

— Гöтырыт абу на, Андрей?

— Абу, свестя.

— А тайö, кодi мунiс, кин?

— Велöтiсь. Книгала тай вовлiс, — шуис Верепов да, медбы етшажык юасис любопытнöй инькаыт, ачыс интересуйтчис:

— А кыдз своякö овлö? Оз шогась öнi?

— Висьö-ö. Лэбталö жö бы сорссö, быдлаö юрсö сюйлö, да мый тöлкыс? Кодя мортöн, видзöт, служитны мунiс, а локтiс инвалидöн. Кöбы война коста, дак эшö бы öбидаыс эз кут.

— Сiя, свестя, война и вöлi... Лыддьы, что Америкаыт не только Вьетнамыскöт, но и миянкöт воюйтiс.

— Но, мед ни, — ыш ловзисис свестяыс. — Тэ вердышт-ко миянöс, ми некытчö эг пыралö.

Пусьыны эз вöв охота, и Андрей Никитич котрасис столовöйö, вайис яяшыд, жаритöм чери да яй, гортас керис чай, вундалiс сола огурец, и гöстяэс чöскыта да пöта ужнайтiсö, а сыбöрын хозяиныс нуöтiс свестясö мöд жырас, кытöн сулалiсö сервант да паськöм видзан шкаф, осьтiс нылiсь ыбöссэсö, висьталiс:

— Эстöн быдöс, мый кольччис Женя сьöрись. Некин эз вöрöт, некин эз лыддьы, нельки ме ог тöд, мый сэтöн. Бöрйы, свестя, и босьт, мый пригодитчас. Эшö стенаись шкафас вевдöрись паськöм эм.

— Ми, Андрей Никитич, киноö бы ветлам. Кöть öтчид городскöй театрас пыралам... Тайö бöрын и сёрнитам паськöмыс йылiсь.

Свестяыс Вереповся пöрисьжык, сылöн квать пиян, и ны коласiсь зонкаыс только öтiк. Ныввес чисто кöсыникöсь — быд коскаыс вевдöрын, чисто рамыникöсь и öддьöнжыксö вачкисьöны не мамныс вылö — мужиччöй окладя инька вылö, а сы сой вылö, кöда нiйö стрась бура любитiс и сiдз мöдiс гуляйтны ны свадьбаэз вылын, но вот гожйис да и тöвйö ни му пытшкын.

Уна я деньгасö шедтö свестяыс, Андрей Никитич оз тöд, но челядьыс сылöн пасьтöтöмöсь и кöмöтöмöсь дзоньö да сöстöмö, нiя кужöны берегитны сумка и книга, оз чапкасьö няньöн да копейкаöн, асьныс кужöны гöрдззисьны и вурсьыны, отсалöны мамныслö кыйны чышкöттэз да пызандöраэз городiсь сувенирнöй цех понда. И сiя важ паськöмись, кöдö свестяыс нöбöтас сьöрас, быд нывкалö керасö виль мöдöтчан.

— А сэтöн, свестя, нем и баитны, — висьталiс Андрей Никитич платьеэз сорлавтöн, — миян женскöй паськöмсö некинлö новйыны.

— Тадзи и ме думайта... Тэ театрас мунан миянкöт?

— Ог, свестя, но кольлала тiянöс. А сыбöрын пантала, театрас локта... Меным звонитны мöдiсö, дак видзчисьны понда.

— Аттьö, панталан кö, — шуис свестяыс да пондiс видны кудымкарскöй тöвсö. — Тi мöд светын кыдзи олатö. Кутшöм тайö погоддя — нисьö тулыс, нисьö ар.

— Тiян разь мöдкодь Лупьяаныт?

— Лупья дорын мöдкодь: кодыр сайкыт, кодыр кöдзыт, кодыр — кляшшöй мороз...

РАМАЗА ЛОАС

Сотчöны луннэс, сылöны ойес, вöйöны олан мореö годдэс. Котöртö кад-котöрок — не вöтчыны сы сьöрö, не бергöтны бöрланьö.

Важын я Васькишна кольлалiс Котöрокöс больницаö, а, видзöт, виль год ни джынняссис, и луныс тöдчöмöн содiс. Карпуш, спасибо докторрезлö да енлö, веськалiс и талун гортас ни ляшмасьö-ветлöтö да дивуйтчö, кыдз сэтшöм гажсö кужöма йöртны сы керкуö Васькишна. И баитö старик — öмыс оз тупкасьлы: эд больницаас унажык чöлiс и баиттöмыс быдса вагон чукöртчис.

— Мак-маковей, мак-маковей! — пешлö чепöльнас базарскöй пызандöра, куталö тувйись петуха чышкöттэз, малалö öшынiсь гöрд сера штораэз. А кок увтас половиккес — дзик енöшка водöма. И потолок, и гор белитöма, а стена да полать вежöдз песокöн зыртöм — топ шондi свиттялö. Сералö, горалö керкуыс, сьöлöм гажöтö.

— Сöстöм киа тэ, Васькишна... Ленаыс отсыштiс жö кöть?

— Венькоикаыс? Кöр нö сiя ештас? Сылöн эд челядь, пода.

— Томыслö мый сiя — орсöм туйö.

— Эг, некинöс эг корлы... — Васькишна пукалö, путшкисьö, öлöдзас вуруновöй тшакыллез тарласьöны. — Банясö дозирайтi жö, чочкомтi. Таззэсö пöимöн зыртi, ыбöссö пуртöн гогныштi да росöн шоркйи.

— Мак-маковей! Натьтö, городскöй кодь лоис.

— Чомсис да амбарсис буссö босьтi малодело.

— Кöр нö ештiн? — юалö Котöрок и ачыс жö висьталö: — Ештiсьыс эд ештö.

— Сiйö сразу тэ бöрсянь кери, шонытнас..

— Сöстöм киа тэ, — бöра шуис Котöрок. — И сöстöм сьöлöма.

Сiя пуксис Васькишна бокö, киэсö пидзöссэс вылö тэчис.

— Пенсиясö вайисö? Колö би понда вештыны.

— Ме разь эг висьтав? Вунöтi, видно,.. Вайисö, вайисö. Джадж дорö, кудокас, пуктi. — И сьöкыта ловзисис: — Эшö то мый эг висьтав: изъян шогмис.

— Мыйнö жугöтiн? Али öштiн?

— Орсантö изводалi... Струна орис.

— Ноко кытöн сiя?

Васькишна вештiс бокö уджсö, петкöтiс комись балалайка.

— Эг и павкöтчы ровно бы, а швач орис. Видзöт-ко, оз я туй домавны.

Котöрок босьтiс балалайкасö, видзöтiс гардчöм струнасö, висьталiс:

— Вильö колö, йитнытö оз судз.

Павкöтiс дзонь струнаэсö певнас, чепöстiс кык вöснитик шы — трин-тiриннн.

Не öтiк год эз босьтлы киас — сэксянь, кыдз иньсö дзебис, кыдз джын синбурыс кусiс. А кöркö и кисис эз лэдзлы. Кыным каблук сы орсöм увтö чегласисö, кыным морт голостöг кольччылiсö! И Жогор-пожум увтын йöктiс-сьылöтiс, и Гублян кöджын — стречалунöн да семикöн, — и каша коста, и нимлун дырни, и помеч бöрсянь. Венька свадьба вылын сымда вартiс, что сыбöрын чуннес неделя доймисö. А разь кинкö кулитiс, кыдз медбöрья колхознöй пирсö — эшö войнаöдззас — чулöтiс? Питкин, бур сьöлöма доктор, кöда вексö абу йöктывлöма, чеччалiс, дзик ниновöй мяч, — и кыз кынöмсö эз пов зэгöтны.

Уна, уна сылö казьмöтiс балалайкалöн шыыс — джын олансö, поди, син одзöттяс вашöтiс. А эшö... Кыдз инö сiя этö орддис? Эшö Перемын, дворецын, орсiс. Да сiдз орсiс, что грамота сетiсö да виль балалайка козьналiсö — как раз сiйö, кöдö часöт öлöдзас видзö.

— Вот эд кыдз, мак-маковей!

И бöра: трин-тiриннн.

— Эн тöждiсь, босьтам струнатö, — сувтiс одзас Васькишна. — Юаси ни Гавриловнаыслiсь. Эмöсь пö, только висьтав пö, кöдö колö.

Старик кутiс сiйö киöттяс, бокас пуксьöтiс, пондiс баитны:

— Ме вот мый висьтала... Уджавны öнi меным оз туй. Сiдз и шуисö: пес эн пилит, ва эн кайöт, турун эн ытшкы. Венька эшö кöдковну висьталiс: вежи пö тэнö сторожсис, мöдiкö пуктi. И правильно! Мый ме öнi письтöм сьöлöмаыс вöввес дын кера?.. Мак-маковей! А овнытö колö?

— Колö, Карпуш... Вöлись и локтiс оланыс да! То тайка пукалам тэкöт, суждайтам, а сы понда миянлö деньга вештöны. Нем ог керö, а каждöй лун рубся унажык сетöны.

Дата добавления: 2015-11-16