Кинлöн висяныс зубытжык?

Кольöм арö, кöр уджалiс ни сельхозтехникумын, Андрей Никитич не öтiк газетаö гижис письмоэз, кöднаын, кыдз велöтiс сiйö военком, вöлiсö быдöссö кынымкö кыв: «Кора фронтовиккезöс, кин тöдiс Верепов Никита Авдеевичöс, танкистöс, юöртны меным, кыдз сiя шедiс вийны...»

Одзжык Андрей Никитич айыс йылiсь эз и касьтывлы, унажык мамсö жалейтiс, а öнi тöдвылас олöны кыкнанныс. Да не только нiя, а быдöс сiя кадыс, кöр отир ой и лун олiс öтiк думаöн — война йылiсь думаöн, олiс сiйöн, кыдз вашöтны врагсö горт му вылiсь и керны бур олан. И кыным ылöжык войнаыс кольччö бöрлань, сыным öддьöнжык, сыным унажык охота тöдны сы йылiсь, сыным донажыкöсь лоöны нiя, кин судзöтiс Победа, кин чепöтiс фашизмлiсь вын, кин эз жалейт асьсö.

Сэкся дзирыт кадыс öнi частожык казьмöтчö Андрей Никитичлö, может, и сiйöн, что зоныс лоис тожö солдат и тожö пессьö правда понда, мир понда.

Яшка веськыта эз гиж, кытчö сiйö иньдöны, но чожа и сiдз вежöртана лоис — Афганистанö. Неыджыт письмо, кöдö солдат гижöма командировка вотöдз, öнöдз паськöтöмöн куйлö пызан вылын и дженыт строкаэзнас бытшкö айыслiсь синсö, вашöтö лöньсö сы сьöлöмись, сы жырись, сы городiсь.

Мунiс Яшка мывкыдтöм зоночкаöн, а öнi гижö ыджыт морт моз. Кöр и ештöма быдмыны, кор и велалöма овны!

«Папа, висьтала, кыдз солдат солдатлö: тыдалö, локтiс и менам часö. Мунам сэтшöм туйö, кысянь не пыр бертлöны. Ме понда тэ эн пов: ог позорит не тэнö, не дедöлiсь нимсö, не горт мулiсь славасö...»

Эта кодь жö письмо куйлö пызан пытшкас. Сiя айыссянь. Öт письмоыслö сорок год гöгöр ни, мöдыслö — сизим месяц, а дзик öтiк ки нiйö гижöма, öтiк сьöлöм кыввесö чужтöма. Этö сiйöн, что ны шöрын эм эшö öтiк сьöлöм, сьöлöм-йитöт — Андрей Верепов, кöдалö и зоныс дона, и айыслöн памятьыс дона, кыдз и горт мулöн славаыс.

Горт му, чужан му, Родина-мам...

Эна дженытик кыввес миянлö тöдсаöсь учöтсянь и прокод олöны сьöлöм шöраным кыдз меддонаöсь. Нiя öткодь донаöсь нянь быдтiсьлö и рабочöйлö, велöтiсьлö и врачлö, пöрисьлö и томлö.

Нiя пыр олöны тöдвылын, нiя пыр шонтöны мортсö — и гажа праздникöн, и дзирыт удж коста, и сьöкыт, зэв курыт кадö.

Горт му, чужан му...

Пырся радейтöм, вечнöй сьыланкыв...

Март шöрас, кöр Андрей Никитичлöн аркмис уджтöм неделя, локтiс письмо. Долонь пасьта гижöток юöртiс, что гижисьыс, Прохор Давлетович Дорохин, неважын гöститiс пермскöй зятьыс ордын и «Звезда» газетаись адззис Вереповлiсь нимсö. Да, сiя бура тöдö Верепов Никитасö, тöдö сылiсь медбöрья подвигсö и кöсйисьö вовлыны Кудымкарö.

Лыддьöтiс письмосö и решитiс: «Видзчисьны ог понды, кöр сiя локтас, ачым ветла». Сiя жö минутаö звонитiс Олявкалö да корис дынас. Иньыс пондылiс öвны сiйö тэрмасьöмсис, но эз вермы. И чапкис ассис уджсö да лэдзчис кольласьны.

Пондöтчис туробитны-падеритны, этшöмас эз и ков бы вöрзьöтчыны гортiсь, но кытчö воштiсян. Тöдö ни öнi инькаыт: бура иньдöтан-кольлалан жöниктö — бура и панталан. Ласков кылыт, шоныт шынньöлыт прокод лоас мужикыт пельын да синын, прокод, топ кöдзыт лунö дзирыт гор, пондас кыскыны гортö, кытöн сiйö дугдывтöг видзчисьöны.

Юголь посад сайын туйыс тöдчöмöн тшыксис: веськыт колеяыс, кыт кызжыка, кыт вöснитжыка, быдсöн тырис лымöн, и автобус мунiс сьöкыта, нетшкисьöмöн. Мукöдлаас туйсö поперегавлiс йывсалöм стола, и сэк машинаыс сувтчывлiс да керсьывлiс бöрланьö, медбы ылiсяньжык öдззöтчыны да орöтны колесоэзнас абу на ештöм чорзьыны лымовöй порогсö.

Быдöнныс пукалiсö кымöртчöмöсь и чöлiсö.

Туйыс вöлi эшö кузькодь, а падера сё содтiс вынсö. Сiя сайöвтiс не только ветлан местаэсö, но и лунся югытсö. Пессисö кык стихия, кык вын: стихия-кымöр да стихия-му. Кымöр орлытöм лываöн чапкис-кисьтiс лымсö тöвныр вылö, и сiя кыйис лымсис лэчыт плеттез да люлльöтiс-павьялiс му бердöт и сырйис, мый шедас паныт, висйис вöрсö, ыбсö, деревняэсö — мулiсь пияннэсö, старайтчис гусявны нылiсь югытсö, шонытсö, гажсö, но му, дзик пöрись мудрöй богатырь, сулалiс лöня и öлiс ассис пияннэсö, эз тшöкты кутчисьны уна ныра, уна бöжа свистункöт, велöтiс терпитны сьöкытсö. Муыс и кыныс пытшксянь, лым пырйöттяс, кылiс шондiлiсь вынсö, югытсö, шонытсö и кымöрыс лёккöт вермасис аслас лöньöн-рамöн. Эна кык стихияыс олiсö-пессисö кыдз öтыжда, öтпрока выннэз.

Неыджыт чукылёкын автобус чеччöвтiс-вуджис вель паськыт стола и сунгисис одзнас туй бокись лым стенаö. Унньöвтiс мотор, быдсöн вывтырнас зэгнитчис машинаыс да нетшкöвтчис бöрланьö, но вешшис местасис джын метр мымда.

— Локтiмö, челядь, — гажтöма висьталiс шофёр, пöрись ни морт. — Кин öддьöн тэрмасьö, пöльтö подöн. Кык километр городöдззас — öтпыр ловзисьны.

Одзланьын эз вöв некытшöм туй, а вöлi пöим кодь сибдöтан лым да кок йылiсь уськöтан тöв. Олявка бергалiс-керис автобус одзын да пондiс кыссьыны городлань. И сумкаыс вöлi сьöкыт, и сапоггес кузьöв каблукаöсь, и шальыс шочöв, а мунiс. И сiя жö рытö кольлалiс Андрей Никитичöс Москваö. Аслас сьöлöмыс тожö орöтчис сы сьöрö, да, кыдз баитсьö, бöжыс сибдöма гортас: чожа пондасö Советтэзö бöрйыны, а сiя участковöй комиссияын председатель.

Колiс бы кöть невна песласьны, но Олявкалö лоис недолыт: курöтiс нырсö, несйöтiс и дзинöтiс пеляс. Этö — мыдзöмсянь да кынмалöмсянь.

Лекарствоэсö сiя эз любит юны, лечитчис бабыс моз. И эстöн сiдз жö керис: адззис малиновöй вареннё да юис сiйö дзирыт чай сорöн, диван вылö чапкалiс подушкаэз, каттисис одеялоöн и пондiс видзöтны кино. Курыткодь шöма, чуть-чуть вина кöра малина ва, кажитчис, сидзис быд жилкаö, вашöтiс ныр курытсö да нессö, и инькаыт, кыдз только каттисис одеялоö, сэк жö и онмöссис.

Саймис сёр рытöн, кусöтiс телевизорсö, водтöдззас паськöтiс газетаэз и адззис письмо. Видзöтiс, кинсянь, но адресыс эз вöв.

«А сылöн эд киыс, своянкаöлöн, — казялiс Олявка. — Дак нiя письмоасьöны! И шы эд оз сет, бытьтö нем абу... Да только письмоасьöны я?»

Письмоöн киас пуксис диван вылö, борддэсö лэдзис. Разь эта понда чапкис лунся уджсö и репис-мунiс городас? Мöдiс сьöлöмсö шоччöтны, нерввесö лöньсьöтны, а, видзöтö, бур отир, мый шогмö! Тöдiс сьöлöмнас — эта не первöй письмо, эмöсь и мöдiкöсь. «Нiя менö бöбöтлöны, сералöны ме вылын...»

Чеччис, мунiс Андрей Никитич жырö, пуктiс письмосö пызан вылö да осьтiс книга видзан шкафись вевдöрись ыбöсоксö, кытöн куйлiсö важ письмоэз.

Видзöтiс быдöс, Вероникалiсь адззис куимö. Нiйö нöбöтiс сьöрас, ольпасяс, и кыскис письмосö медкыз конвертсис.

Дона менам, донася-дона! Бöра эд гижа! Умöль эта — ачым тöда, — но ог вермы видзсьыны, медбы не кырöвтны кыв-мöд.

Медбöрья пантасьöмыс менö кымöртiс, но ас кузям. Ме просто вöлi мыдз и тшыг. А тэ меным лыддьöтiн мораль — мам чувство вöрöтiн, стыдитiн менö. А тöдан я тэ сэтшöм чувствосö? Павкöтiс я сiя тэнö кöть öтiк бордтылöн? Тэ ёна менö дойдiн нiя кыввезöн.

Мам чувство...

Тэ тöдан, кöр ме вöлi кулöмви, кöр пульсö эз ни кыв, кикокö эз вöр, ме кеймиси враччеслö: эд сетö кувны, спаситö, эд менам пияннэз, эшö кагаэз!.. Этö тэныт не вежöртны, тэ — не мам. Мамыслö оланыс сизимись донажык, нежели айыслö... Ны понда, кагаэзö понда, вились бертi эта мирö, кöда не öддьöн бура менö гажöтö. Ны понда олi и сёрöнжык, кык ставка босьтi, ой и лун уджалi, ась, мыся, некытшöм нужда оз тöдö.

Да, менам дона, уна, вывтi уна ме уджала и ог халтурит — öтiк морт сiдз оз висьтав. Ме ог вермы малодело уджавны. Ме быдöс ачымöс уджас пукта, ачымöс чега, но кера сiдз, кыдз колö. И пыр сiдз лоас.

А кольöм локтöмö былись вöлi думайттöм. Чапки уджöс, челядьöс и лэбзи тэ дынö.

Мыйла???

Мöдi керны сюрприз: кортöг, юасьтöг-висьтасьтöг, мыся, локта, и тэ лоан öддьöн рад. А эз пет тай сiдз: только лöгöтi тэнö.

А эд часто овлö этадз: котöртан вöв моз, чуть юртö он пиньöвт, а он и думайт, мый тэнö видзчисьö. И сё муна, кöть и шувлi ни аслым: кытчöдз оз кор, ог мун.

Оз пет сiдз! Вежöртан? — оз пет, мый бы эг кер. Охота пантасьны, охота тэнат шоныт борд увтын олыштны, тэнчит басöк синнэтö адззывны...

Пöрисьма, тыдалö, ежели «идзас тылöп» бердö кутчися. И пола: ачым чега, бужда, кыдз кырöтöм берег дор. Сэк меным, восемнадцатьгодсяыслö, янын овныт кокнитжык вöлi... Тэ эн вунöт, мый кöркö висьталiн: «Тэнат — семья, менам — семья. Давай сэсся ог пондö пантасьлыны». Ме шуи: «Пондыла сiдз керны». И дас год крепитчи, эг петав тэнат син одзö. Ылiсянь тэ сьöрын видзöтлi и пыр гажтöмтчи да тöждiси. Только öтпыр пезьдi бокö да кори вовлыны дынам — этö сэк, кыдз больницаас куйлi. Сэк ме и свет вылас эг видзöт бы. И сё думайтi: а колö я этадз маитчöмöн овны? Мыйлö? Но сiдз охота вöлi тэ вылö дзарнитны: сё я сэтшöм?.. Тэнат вовлöмыт, тэнат бальзамовöй кыввет сувтöтiсö менö кок йылö...

Менам гардчöм-пиньласьöм оланын тэ прокод вöлiн мекöт, тэ менам сьöлöмись некöр эн петав, ме дынiсь öтiк минута кежö, öтiк оськöв вылö эн вешшыв. Ме часто, думанам юасьлi тэнчит: кыдз эстöн керны, а кыдз — сэтчин. Советуйтчи, кыдз овны... И вот ми пантасим курссэз коста. Этö сэк, кöр тэ лоин директорöн. И тэ бöра вöрзьöтiн лöньсьыны ни пондöм сьöлöмöс. Сiдз бы и уськöтчи тэ дынö, жмитчи морос бердат, сывьялi тэнö и сэсся некöр бы эг лэдз дынсим, некинлö эг сет бы. Тэ юасян, а ме мый и баита, ог инмы отвечайтны, али чöла и то гöрдöта, то бледöта.

Менö важмоз кыскö тэ дынö, менам радейтöмö эз вежсьы, сё сiдз жö öгралö, ежели не вынöнжык. Может, тэ шуан, — глупость! Инькалö сорок сибалö, и вдруг кытшöмкö радейтöм!.. Но эта сiдз, менам дона!

Кöть и тэ бура адззан мирсö, тöдан отирсö, олансö, а вот этö — менчим некусан да некусöтан радейтöмöс — эн казяв.

Годдэс быдöс ниртöны, сiсьтöны, пöрисьтöны, а сiйö, менчим дзирыт радейтöмöс, эз орöтö, эз чинтö. Эз чинт не кадыс, не шогöттэс.

Кöр петi жöник саям, висьтаси жöникöлö, кыдз ме косьми мöдiк понда, — ась, мыся, тöдö, — да аслам юр вылö горесö курмалi: сы понда сiя менö сёйöмöн-сёйö, кульöмöн-кульö. Тэ он тöд, кытшöм недолыт, кытшöм зубыт терпитны, кöр нятьöсьтöны, тальöны кок увтын тэнчит сöстöм чувствосö, видöны тэнö медумöль кыввезöн? И только тэ, да челядьö, да мымдакö школа отсалiсö меным адззыны вын, медбы овны, а точнöйжыка висьтавны — медбы юкмöсö не пырны.

А кадыс чулалiс, вились олансö он пондöт. Кольччö öтiк: этадз и мырсьыны медбöрья лунöдз. Но ме ог кывт ва ньылат, песся аслам олан понда. А ежели öтпырись вдруг кылан, что ме эг ло, сiдз и тöд — пöдi эта пессьöмын.

Вежöртана я менам басниö? Но эн жалейт менö — сiя меным оз ков. Только тöд: мый бы эз шогмы, мый бы эз вöв, а тэ вöлiн и лоан вексö мекöт, лоан менам. И ме тэнат и только тэнат — сьöкыт думаэзнам, сьöлöмнам, быдсöн сiйöн, мыйöн верми бы лоны тэнатöн...

Эта вылын письмоыс орис, и Олявка нельки жалейтiс этö, а öтлаын сыкöт и авторсö, и сылiсь олансö, кöда кокнита, дзик лэчыт черöн, суййöма сылiсь уввесö-борддэсö. Тöдчö, что мортыт уна адззылöма, содззезтыр куралöма курытсö и шöмасö и стрась етша адззылöма бурсö. Тöдчö и сiя, что эта «стрась етшаыс» сё жö вермö умöлик унасö, сiя сы понда шондi — и шонтö, и югдöтö, и гажöтö — тшöктö вöрöтчыны, öдззöтö овны-уджавны.

Мöд письмоыслöн вöлi только бöжыс:

Не, ме ог вежöкты. Менö кутö ыджыт öбида сысянь, что вот ме бöра öтнам, что некинлö ог ков и некин некытöн менö оз видзчись. А что гижи, кыдз тэ шуан, законнöй иньытлö, дак мый сэтöн умöльыс? Ме сiйö эг вид, эг кöрит, а висьталi аслам право йылiсь, висьталi ассим сьöлöмшогöс да правдаöс. Колö кö, дак и тэныт эшö висьтала, эшö öтпырись казьмöта... Ог, немлö! Немлö вöрöтны важсö.

Чöскыт ягöдсö öктiм öтлаын, Шöма ягöдсö — öтнам ме...

Весь тэ умöльсö ме йылiсь думайтан, ох, весь! Эн думайт сiдз, пожалуйста, и некытшöм ярлык ме вылö эн кышав. Тэныт, кöр пантасьлiм, ме сетлi быдöс-быдöс, мый позис, а эта понда тэнчит нем эг кор... Меным сiя ни бур вöлi, что верма жмитчыштны тэ бердö да кывзыштны, кыдз ёткö тэнат пöттöм сьöлöмыт, пессьö менамкöт ордчöн, а не кытöнкö сизим ю сайын, сизим волок сайын.

Кыдз пондасö нiя ёткöпавны öнi?

Но тöд: мый бы эз вöв, а ме одззамоз понда овны тэöн, понда корны да видзчисьны тэнö...

Гижöтыс дженыт, но сiя Олявкалö уна висьталiс, отсалiс керны öтiк вывод: Андрей Никитич вешшö бы ылöжык Вероника дынiсь, пышшö бы сы радейтöмись — сiя оз ков сылö. Сiдзкö, эта ситуацияын медбöрья кывсö колас висьтавны Олявкалö. Эстöн Фемидаыс сiя и мечыс сы киын.

И вот медбöрья письмо. Сiя и юртöм, и бöжтöм. И кыштöм-пасьтöм, дзик ядро, топ кушöтöм нерв.

Тöдан я, кыдз думаэс зэлöтöны юр пытшк и готовöсь поткöтны мортыслiсь чашкасö? Тöдан я, кыдз летсьö учöтик тороккез вылö ловья сьöлöмыс?

Он, натьтö! И ась ен оз шу тöднытö!

Тэ öддьöн добрöй, ласков, вежöра. Тэ жалейтан менö. Но кытчöдз, дыр я пондан жалейтны?

Ме ог вермы тэтöг овны — этö сiдз. Ме тэнö радейта öддьöнжык, нежели ачымöс. Любита тэнчит идеяэтö, затеяэтö, и думаэтö. Быдöс тэын ме понда дона. Двадцать год одзтi ме сюйыштi юрöс адö, медбы не дзугны тэнö ладсит... Менö чапкалiс судьбаö, кыдз бабапельлiсь пушок. Меным вöвлi кöдзыт, дзескыт, курыт... И вот панталi тэнö. Бöра панталi...

Тэ — менам ангел-спаситель. Тэ содтiн, нюжöтiн оланöс. Тэ шонтiн менчим сайкавны пондöм сьöлöмöс. Мый эшö инькаыслö колö?

Тöдi, что пантала кö тэнö, сьöкыт лоас янсöтчыны... Ме босьтi тэнчит ловзьöтан би торок — и быдöс локтiс аслас местö: ме ловзи, кыдз тулысöн льöмпуок, и лöсьöтчи дзоридзасьны... Кыдз этакöт янсавны?

Кытчöдз эг адззыв тэнö — только вöтасьлi. А часöт — сьöлöм потö, тэ дынö кыскö... Ковсяс кö — пидзöс вылам кысся... Но этö быдöс колö орöтны ас бердсим, пельдöтны сьöлöм бердсим.

Верма я?

Позьö я кусöтны некусан бисö?

Но мешайта кö тэныт — висьтав. Висьтав чуклясьтöг. Ме ог понды видны тэнö и некинлö ог понды норасьны — менам шогö, менам тöждöмö ме пытшкын, менам биын сотчас. Тэ эд меным эн кöсъясь, клятва эн сет. Но эшö öтпыр висьтала: тэ пыр лоан менам сьöлöмын. Этö некин менчим оз мырддьы, нельки — тэ он вермы...

Куимöтсö лыддьöтiс мöдпöв — жагвыв, быд предложеннёсö торйöн, лыддьöтiс критическöя, и вдруг чужис виль дума: сьöлöмсяняс я эта быдöс гижöм? Ачыс я сiдз думайтö? Может, чужöй чувствоэз вузалö? Этшöмсö любöй романiсь позьö шульыштны. Адззан, кытшöм читкыля кылыс — дзик стиххез гижö... «А поди, ачыс да? Эд институт кончитiс, не ме кодь баля дзель...» А чувствоэс? Сэтшöмöсь я, кыдз письмоас висьталö? Быль я сiдз любитö? Кыдз этö проверитан?.. Но ежели бы мортыс эз радейт, дак эз бы, натьтö, понды лёбны сы йылiсь.

Дугдiс ни баитны радио, а Олявка, дзик бабука, вöрöтчытöг пукалiс ольпасяс и кывзiс, кыдз вермасисö сылöн ыджыт и учöт думаэс, кыдз öт ладорсяняс видiсö-кыскалiсö инькажугöс, кöда кышасьö чужöй мужик вылö, и ошкисö добрöй мамöс, смев инькаöс, кöда уна-уна год ни сотчö сэтшöм жар, сэтшöм сöстöм радейтöмöн.

«А ме? Ме верми бы сiдз керны? Эм я менам сы кодьыс? Вöлi я кöркö? Дак кинлöн ыджытжык правоыс — менам али?..»

Эта вылö Олявка нем эз вермы висьтавны: мыдз юрыс вöлi топ пыктöм, дундöм и нач и нач пустöй, бытьтö вевта пестер, — эз ни вермы думайтны.

Сiдз сiя пукалiс коккез позявтöдз, тувдытöдз, сэсся вöрзьöтчис, нöитöв-керис пидзöссэсö, кусöтiс бисö и лöсьöтчис узьны, но бöра кыссис час бöрсянь час, а кыз оныс, кöда стрась бытшöма вашöтö лёк думаэсö да мыдзсö и кокньöтö юр, эз лок. То ли осьта син одзас, то ли вöтын шергйис-кöвьясис золотистöй платьеа Вероника. Сiя чужöмнас вачкисис Алла Пугачёва вылö и нельки мыйкö сьылiс сы голосöн, а ачыс небытик трепиччезöн, кытшöммезöн Олявка кöркö каттьывлiс зонсö, шебравлiс зыбкаэз, но лёк тöв павтыралiс шебрассö, нöбöтлiс сiйö зыбка вевдöрсис, а Вероника сё шебралiс и шебралiс.

Сэтчö мыччисьлiс Андрюша — руд костюма, шляпатöм, кузь каблука ботинкиа, — сувтчывлiс неылö Вероника дынсянь, ниртiс гöжöм киэзнас чочкоммöм пеллесö да виноватöя шыннялiс, а тöлыс перкйис сылiсь костюмсö, юрсисö, и öтiк пилим то и дело сайöвтiс синсö да пырис öмас. Вероника казялiс этö, дугдiс шебрöтчыны, сибöтчис мужикыт дынö да нетшкöвтiс, дзик грядок вылiсь лук грез, пилимсö вуж сорнас.

— Тэ мый этö керан, неморт?! — горöтiс Олявка и осьтiс синнэсö да эшö öтпыр шуис: — Мый керан, а?! — и повзис аслас голосiсь: сiя вöлi сибдöм, вынтöм, дзуртан, дзик öддьöн шогалiсь мортлöн, и öддьöнжык горöтчис: — Кытöн тэ часöт, Андрюша? — и вежöртiс, что голосыс гора, сöстöм. — И кинлöн тэ?..

А сьöлöмыс гажöн-гажöн тукйис-вартсис моросас, и быдöс вывтыр кузяс ветлiс сылöн говк: «Менам, менам, менам...»

Радиолöн медодзза шыэс чеччöтiсö Олявкасö ольпасись, и сiя перыта дзимлялiс письмоэсö, умöлика шебрыштiс койкасö да сёйтöг-ютöг мунiс лойны лымöн тыртöм гублянскöй туйсö.

Дата добавления: 2015-11-16