МÖД ЮРКИНЛÖН МАНЬЧИ

Сунасьö сентябрьскöй лун, уль да кöдзыт, дзик ва бон. И посад улицаэзын некин оз тыдав — не морт, не пон. Сибалiс рытъяв час, кöр уджалан лун эз на чулав, а школаись челядь да велöтiссез мунiсö ни горттэзö.

Сэтшöм лöнь, что гажтöмыс сьöлöм дойдö: дзик мыйкö умöль лоöма.

Но, чу! — школаись öтiк классын кылö сёрни: осьтöм форточкаöт öтöрас петö. Не öддьöн гора, не öддьöн визыв.

Киннэз сэтчин сёрнитöны? Мый йылiсь? Ноко пыралам.

Ага, бöра сизимöт «А» шöрттöм дöрасö панö, кыдз шуö техничка.

...Пызан сайын, велöтiсь местаын, пукалö Нюра Аскина. Юрыс сылöн быгалöм, серакутшша. Да и чужöмыс мыйкö быгалöмкодь жö: рожабаннэс рöмтöмöсь, синнэс не лöзöсь, не чочкомöсь. Зато платьеыс — бикыв турун, куш голя вылын цепок свиттялö.

Нюра Аскина — классiсь староста. Сiя талун собраннё чулöтö. А собраннёыс не мукöд кодь — сы вылын висьтасьöны, кин кыдз чулöтiс гожумсö. Эта собраннё йылiсь челядь баитiсö эшö тулыснас, и то сiя лоис.

— Кин медодз висьтасяс? — юалö Нюра.

Кöть и доска дынö оз ков петны и умöля висьтасьöм сьöртi умöль оценка оз пуктö, но пондöтчисьыс оз адззись.

Пондöтны — пыр сьöкытжык. Быдлаын сiдз. Этö сизимöт «А»-ын бура ни тöдöны. Вон Аскина Нюралöн дедыс пондöтöма колхоз керны. Сэк сiйö районын ошкöмась, нельки велосипедöн премируйтöмась. А öнi видöны стариксö: дзугис пö деревнясис олансö...

— Список сьöртi колö, — висьталöны старосталö.

А кыдзи список сьöртi, дак колö Аскиналö пондöтны. Но сiя — оз бы, и классыслö шуö:

— Мед список сьöртi лоас. Только ме бöжсяняс пондöта... Юркин Юра, висьтась!

Кыз голоса Юра висьталö:

— Вашöт-ко одзлань! Ме тiян орсанöн ог орс.

Эта сiдз и эм: Юркин Юра татöн виль морт: сiйö колисö мöдiк год кежö. Колисö сысянь, что одзза годас дырöв шогалiс.

— Сэк Мöд Юркин, — кытсалö Аскина.

Мöд Юркин, быдöнныс не нимнас, а Мöд Юркинöн и шуöны, быдлаын дыш, только кыклаын чож — сёйны да фантазируйтны. И висьтасьны сiдз жö эз тэрмась: перво öтлань видзöтiс, сэсся мöдлань, сыбöрын парта вевт осьтiс да сувтiс, педзыштiс кок вылас и вöлись пондöтiс:

— Пондi гижны, этöка... Но... деревнялiсь история. Миян деревня, этöка, ыджыт. Куим хутор öтлаасьöмась: Валей, Йыван да Маньчи. Ны коласöт, этöка, котöртö юок, Сиява шусьö. Öт хуторас олöмась Маня да Ваня, этöка. Ваня лöгöтас Манясö, и Маня вузалас Ванясö помещиклö, öтнас кольччас. И пондасö сiйö видны Маньчиöн. И деревняыс лоас Маньчи. Мöд хуторсö некыдз абу шуöмась. Сэтöн, этöка, пожар лоöм. Йöзыс повзьöмась, öтöрас сулалöны, оз тöдö, этöка, мый керны. Маньчи локтас, горöтлö: «Ва лей, ва лей!» Ва кисьтласö, кусöтасö и шуасö Валей...

— Куимöтас пода бура, этöка, йылöм, сысянь — Йыван. Вот... А юокным миян, Сиява, перво некыдз абу шусьöма. Сэсся, этöка, ю дорас Маньчи нальккез сиялö. Локтö старик, юалö: «Кыдз юокыслöн нимыс?» Маньчи, этöка, абу кылöма, мый юалöны, да висьталöм, мый керö: «Сиява». Вот, этöка...

— Тэнат быдöс? — юалö Аскина, ачыс сё гижö мыйкö тетрадьö.

— Быдöс кытчöдз, — шуö Мöд Юркин, и Аскина корö мöдiкöс:

— Öнi кывзам Валентинöс. — Аскина гижö тетрадьö ним-фамиллё. — Висьтась, Валентин, кытчö ветлiн, кыдз шоччисин, кыным книга лыддьöтiн.

Валентин шуö:

— Книга эг лыддьöт, некöр вöлi.

— Öтiкö эн? — точнöйжыка бы тöдö Аскина.

― Эг.

Аскина эта дивосянь сiдз чужöм вылас вежсис, бытьтö öштiс голя бердсис дона цепоксö пернанас:

— Но тэ и гожйöмыт! Зоночкалöн ёрттэс сералöны:

— Чапаев тожö эз...

Аскиналö эм мый бердö кутчисьны:

— Тi бы кöть грамм етш думайтiт, мый баитат! Разь вунöтiт, кытшöм кадö Чапаевыс олiс да мый керис? Разь вöлi кöр сылö лыддьöтны? Адззöмась кинкöт Валентинöс ровняйтны!

— Меным, может, эшö некöржык вöлi, — шыасис Валентин. — Чапаевыс мый уджалiс, Нюра? «Смирно!» да «Вольно!» тöдiс висьтавны. Сылö вöв — седлоалöны, шашка — зудъялöны, сапог — мавтöны. А ме быдöс ачым кера. Тэ вежöртан сiйö?

— Вежöрта, — шуö Аскина. — Колiс чужны командирöн, сэк ачыт эн бы кер.

Басниа Мöд Юркин Валентинлö советуйтö:

— Тэныт, этöка, гöтрасьны колö.

Классыс вак-вак серöмтчис, а Нюра Аскина öмсö нюмыртiс:

— Кыдз тэныт абу стыд, Мöд Юркин!

Мöд Юркин дор сувтiс Вален (сизимöт «А»-ын берся нимыс эм):

— А мый, вон Узбекистанын...

— Эн лёб, мый оз ков! — лöгасис Аскина да шовк вачкис долоньнас пызан кузяс. — Давай висьтась, мый керин гожумнас... Кывзам, челядь, Валенöс, мый миянлö вайис Узбекистанiсь.

Мöд Юркин пиннесö кеслö:

— Верблюдöс мöдöма вайöтны, да самолёт ыбöсас абу тöрöм. Челядь рызйöны-сералöны, а Вален бут-бат петö пызан дорö, сувтчö ордчöн Аскинакöт и волькöтö читкыля юрсисö. И сулалöны нiя, дзик кык дзоридзок — гöрд мак да лöз астра.

— Мый кери гожумöн? — öдззöтчö Вален. — О-о, бура гожумсö чулöтi! Ветлi Москваö да Ленинградö, лэбзьылi Бухараö, Ферганаö...

Кинкö сэтчö горöтчис:

— Веськыта шу: сьöдрака моз лэбалi. Мöдiккез веськöтöны:

— Сьöдракаыс токо кык места тöдö — гортсö да тöвьянсö. Аскина чунькытша чуньöн тарскöтö пызан кузя, медбы эз мешайтö Валенлö. Но Валенлö нем оз мешайт, кöр сiя кутчас мыйкö висьтасьны. Сылöн кылыс бытшöма мавтöм, некытчö оз кышась.

А сiя, что Вален зэв бура гожумсö чулöтöм, тöдчö и сы чужöм сьöртi: жаритчöм рожабаннэс дзик идзас тылöпöн пöльтöмöсь, синоккес госсяняс пыктöмöсь.

— Ме уна снимайтi, но карточкаэсö эг на кер — бур бумага абу. Кöр лоас бумага, печатайта да выставка осьта. Адззылат, дак шуат: сказка!

Нылочкаэс оча ки шовкöтöны, радуйтчö и Аскина да ошкö боёк туристсö.

А Валентин йылiсь вунöтiсö, эз и юалö, мыля сiя гожумбытöн и книга эз осьтлы. Может, дышыс эз лэдз?

Радöсь нылочкаэс, да не быдöнныс. То медбöрись парта сайын пукалö сьöд платьеа, дзик монашка, нылочка. Юрсö öшöтöма, пельпоннэсö лажмöтöма, топ курöжок зэр шогья дзебсисьöм. Сiя не татiсь, и нимыс сылöн не татiсь — Лора. Сiя беженка.

Гусьыник типок моз сувтiс Лора да шыв-шыв шыасис:

— Вален шуö: Бухара — сказка, Фергана — сказка. Ме шуа: Бухара — сказка, Фергана — горе. Ме сэтчин олi, тöда. Вöлi менам подружка — Чинчей. Сiя турчанка. Сiйö вартлiсö да вашöтiсö гортсис. И миянöс повзьöтлiсö, да ми локтiм бабö ордö. Татöн сказка абу, татöн горе абу...

Сьöд паськöма нылочка пуксис, классыс лöньсис.

Кинкö сьöкыта ловзисис, мыргыштiс Вален, мöдiс мыйкö висьтавны, да тожö лöньсис.

Осьта форточка дорö пур-пур пуксис гöрд кока, гöрд синока дудi, пондiс нюжлавны ён голясö, пöлiнявны волькыт юроксö, бытьтö тöдö бы, мый эстöн керöны морттэс, мыля нiя оз петö öтöрö. Кöть и кöдзытöв öтöрас, да сэтчин сöстöм ру, саддэз да ыббез — воля!..

Дудi вургыштiс да пурка-пырка лэбзис, и вöлись Аскина юалiс Лоралiсь:

— А мый тэ адззылiн гожумнас интереснöйсö, мый керин?

— Ме уна цветок быдтi. Эм роза. Вовлö видзöтны. Ырöш да сур велалi керны. Интереснöйсö эг адззыв. А Чинчей адззылiс — лэбалан тарелка. И кык марсианинöс.

— Дак висьтась, Лора! И Лора висьтасьö:

— Чинчейлöн айыс чабан*. Чинчей айыслö отсасис.Öтпырись одз асывнас айыс дынö кошара* дынсянь мунö. Кошара сайын мыйкö югыт-югыт. Юрта ыжда, топ кыминьтöм бекöр. Учöтик öшыноккез, ыбöс абу. Чинчей думайтö: «Этö миян космонавттэз. Не Казахстанö, а Ферганаö инмöмась лэдзчисьны. Айöлö висьтала, сiя радио пыр юöртас». Чинчей мöдас котöртны, но тарелка мыччас кык антенна — кыдз ишаклöн пеллез. И оссяс ыбöс. Петас морт. Ыджыт, паськöмыс свиттялö. Кузь киа, кузь юра. Ыбöс дорись оз мун. Кинас корö: лок пö татчö! Чинчей локтас матöжык. Пытшкас быдкодь биоккез, нiя кусöны-öзйöны. Сэсся нем абу. Морт пырны тшöктö. Чинчей повзяс, вешшö сы дынiсь. Морт повзяс, тарелкаö пырас. Чушш — и ыбöс пöднассяс. Тарелка лоас чочком электролампа кодь — видзöтны оз туй, синнэз гусялö. И лэбзяс...

Лора дугдiс висьтасьны, пуксис. А Вален горöтлö:

— Кылiт, мый шуис Лораыс? Ферганаын пö сказка абу. А эта — ишак пеля бекöрыс — не сказка? Сiя — басöк сказка!

Лора бöр чеччö:

— Чинчей — бур подруга менам,Чинчей оз бöбöтчы. Тарелка — не сказка, тарелка — быль. Сiя лэбалö. Куим чабан сiйö адззыласö. А кытчö пуксьылiс — вит гöпок.

Аскина висьталö:

— Веритам, Лора, веритам. — И сэтöн жö мöдiкöс чеччöтö: — Наташка, пет ме дынö и висьтась!

Пызан дынö петö Наташа, чочком юрсиа нылочка. Юр вылас лöз бант вöрöтчö, дзик паськыт борда бабыв йöктö. Юрсиыс спина вылас лён сöдзокöн лэдзчисьö.

Наташа талун пасьтасьöма нач мöднёж: чочком кофтаа, гöрдвеж юбкаа, косас — вышивайтöм чочком йи. Быдöс эта — ас кыйöм, ас вышивайтöм, ас вурöм.

Аскина сiдз и этадз бергöтлiс Наташасö, бытьтö акань мыччалiс челядьыслö, да юöртiс:

— Этö костюмсö Наташка керис ачыс. А кыдз керис — ачыс жö и висьтасяс.

Наташа баитö жагвыв, кыввесö горöтчö ятнöя и сорасьтöг.

— Мöйму тулыснас ми бабöкöт кöдзим лён. Гожумнас лёнсö нетшким, шырзим юрсö, арнас вöвдiм видз вылö. Лёныс куим неделя куйлiс и бура тыасис. Куралiм, сыбöрын косьтiм баняын, нярьялiм, Вöлись пыркöтiм, зуалiм, тöвнас печким. Бабö шöртсö ректалiс ректаннэзö, тулыснас ректаннэзсис шöртсö панiм да кыйим дöра. Менам костюмö сiя дöраись.

Мöд Юркин корö кыв:

— Позьö, Аскина, висьтавны?

— Но, висьтав.

— Эм, этöка, предложеннё: öнi лёновöй паськöмсö сетны музейö... Наташкаыскöт öтлаын, конечно!

Некин эз ешты серöмтчыны, сiдз кыдз Наташа сэтöн жö и кутчис кыввезнас Мöд Юркин бердö:

— Тэнö, стыдтöмöс, музеяс колö сувтöтны да одзат табличка öшöтны: «Маньчинскöй Мюнхаузен»!

Наташа вынöнкодь видчис, нельки бантыс юр вылас йöктiс, но не жö сэтшöм лöгöн, а медбöрын шыннялöмöн ни юалiс Аскиналiсь:

— Тэ, Нюра, веритiн Мöд Юркиныслö?

— Мый веритi?

— Что история гижö, что нальккез сиалöны.

— Мыйкö разь не сiдз?

— Сiя бöбöтiс миянöс. Юркин некытчö эз ветлы, некинлiсь эз юась и некытшöм история эз пондыв гижны. Этö ме бура тöда. Сiя кузьгожум доминоöн да картiöн орсiс, мамыслö гоз ва эз кайöт, öнi мамыс картовсö öтнас гарйö.

Наташа койис, койис кыввесö да пуксис местаас, Мöд Юркин бокö, и бергöтiс чужöмсö мöдöрö, öшынланьö. Сэк шыасис Вален:

— Мый тi Мöд Юркиныс бердö лякасит? Ме даки сылö верита. И картiыс эстöн нем понда...

Бöра сувтiс Наташа.

— Миян деревня йылiсь историяыс гижöма ни. И гижисö сiйö Мöд Юркинлöн соседкаэз — студенткаэз... И некытшöм Маня да Ваня эзö вöлö, некин рочöн-комиöн эз баит. А сэтöн кöркö олöмась манси отир. Асьнысö шуöмась мань си — учöт род. Комиэс пондöмась шуны нылiсь деревнясö Маньчиöн. Валей да Йыван — мансилöн морт ниммез. Юнысö нiя шуöмась Си я — родлöн ю. Комиэс сы бердö содтöмась «ва», вот и Сиява.

— Мый сэтчö шуас Мöд Юркин? — кошшö правдасö Аскина. Мöд Юркинлö дыш чеччыны, сiя пуксöн баитö:

— Ме, этöка, эг бöбöт. Чесслов, эг! Сiдз папöсянь кывлi.

— Сiдз и колiс висьтавны! — вирдыштiс сы вылö синнэзнас Наташа, а Нюра Аскина содтiс:

— Маньчи деревня йылiсь легендаыс тожö басöк. И ме шуа: быдöнныс, кин висьтасис, гожумсö бура чулöтöмась, уна вильсö тöдöмась.

Лора юалiс:

— И Мöд Юркин — бура? Да? А Валентин — этö умöль, да? Валентин ытшкисис, куртiс. Сiя бабыслö ыджыт зород тэчис. Сiя колхознöй турун вöлöн куртiс. Эта — абу интереснöй?

Форточкаö пырис машиналöн шы да лöньсис. Челядь жöв керсисö, пеллез чурдöтiсö. И сэк машинаыс тутöстiс-кытсöвтiс:

— Петö-ö-ö!

Эта команда сьöртi классыс шувка-шовка чеччис партаэз сайись, уськöтчис коридорö.

А кытсöвтiс челядьсö колхознöй автобус. Сiя мöдiк деревняэз пырйöт мунö Маньчи деревняöдз, кöда шöрöт котöртö Сиява юок.

* Чабан ― пастух.

* Кошара ― баля карта.

Дата добавления: 2015-11-16