Ваюканiсь Яня

Омöн страна пасьта горалiс перестройка, и быд честнöй мортыс юавлiс ассис: «А ме мыйöн верма отсавны гортöлö, медбы сылöн вöлi бур да гажа олан?»

Витöт отрядiсь пионеррез — а нiя быдöнныс асьнысö лыддьöны честнöй морттэöн — тожö юалiсö ассиныс: «Кыдз отсавны страналö?»

Отряднöй вожатöй Паша Никова висьталiс:

— Медбур отсöт миян лоас — öктыны пöим. Колхоз быдтö лён, а лёныс радейтö пöим.

— Пöим? — юалö Яня Чибин, — Мый, пöимыс удобреннёся буржык? Удобреннёыс быдса сарай миян... Берсяыс — чочком, гöрд, лöзкодь.

— Таво оз ло, — юöртö Паша. — Папö висьталiс: «Минеральнöй удобреннё ог вайö, сiя мусö тшыкöтö. Пондам заптыны назём, торф да пöим»... Вежöртiн, Яня?

— Мый не вежöртны сэтöн — не коза ме... А сараяс миян тыр...

Паша оз ни кывзы сiйö. Паша командуйтö...

— Ашынсянь быд звенолö öктiсьны. Пондам соревнуйтчыны.

Лэбис шум. Кинкö чирзiс, что колö кутчисьны мöдiк удж бердö, что быдкодь öктiсьöмыс уммöтiс ни и что сiя абу интереснöй дело: и баббезным сiйö жö керисö, и мийö пö сэсся нем ог тöдö. Не буржык пö я мастерскöйын да кружоккезын уджавны — быгрöтчаннэз, толкушкаэз керны, гöрдззисьны?..

Кöд коста шумитiсö челядь, Миша Таров аслас звеноись пионерресö тшöктiс петны коридорö. Звено петiс, и Миша нуöтiс сiйö ылiсьжык пельöсö да пондiс гусьöн вашкыны:

— Эм сэтшöм план: часöт жö разведкаö, одзавны мöдiккесö. Кин медуна öктас пöим — сылö путёвка лагерьö... Может, и Артекö... Керам вот кыдзи...

Миша моз петiс, что пöимыс ачыс пырас ны киö. Звено ештас заптыны быдса тонна — не етшажык — öтiк выходнöйöн. Только оз ков сунасьны, а колö котрасьны. Сiдзкö, быд мортлö адззыны центнер пöим.

— Центнерöн? — пыксисö челядь. — Кöстiн дак кöстiн! Ачыт сымдасö öкты!

— А сiя разь уна — дас ведра! — шыасис Яня. — Ме öтнам кыкись унажык вая.

— Ошшась öддьöнжык! — сералöны челядь. Нiя тöдöны, что Яня дышöв да жаг, кöть и мывкыд юра. Ветлöтö — ош моз мегырасьö. Да эшö дзарьясьöмöн: кыкись оськöвтас — куимись дзарнитас.

— А вот адззылат, — оз сетчы Яня. — Кыдз шуи, сiдз и лоас.

— Конечно, адззылам, — висьталiс Миша. — Но, мунiм. Сёрман — весь кадсö öштан. Разведчик понда быд минутаыс — золото.

Челядь табунокöн петiсö школаись и рознитчисö öтмöдöрö, горттэзаныс. И Яня мунiс аслас деревняö — Ваюканö. А Толя, кöдакöт Янялö колiс мунны разведкаö, кежис магазинö. Колö тэрмасьны, а сiя падмöтö. Толя сэтшöм и эм — уна паныт мунö, отиркöт етша лöсялö. Но и ась, Яня öтнас вермас керны сiйö жö уджсö, мый и кыкöн.

Тэрмасьö Яня Чибин, довольнöй сетöм уджöн. Шыннялö мартовскöй шондi, и Яня шыннялö. Сылöн кыз тырппес, шег кодь паськыт нырыс, кузь тшöкаыс — быдöс тувсöвтöма ни, дубитчöма, кöть и шондiа кадыс нач етша вöлi.

Ыскöвтö Яня кокнит лыжаэз вылын, думайтö путёвка йылiсь, кöда вермас... не вермас, а дöнзяс сылö пöим понда. Бур бы вöлi сюрны Артекö. Öддьöн охота сылö моресö адззывны. А öзтiс зонкалiсь охотасö бур велöтiсь, кöр зоночка велöтчис куимöт классын. Мый только эз кылö челядьыс сысянь! И диковиннöй пуэз йылiсь, кöдна казялöмöн быдмöны да кымöрöдз кайöны, уна рöма галесник йылiсь, и зелёнöй саридз йылiсь... Чёрнöй море-саридз... Мыля сiя не татöн, миян Пармаын, а кытöнкö ылын-ылын?

«Ась и не матын, а колö кыдзкö ветлыны сэтчин», — решитiс сэк Яня и висьталiс эта йылiсь Толялö.

— Тöдан, мый ме кылi? — шуис Толя. — Öктыны кö спичкаэзiсь сто неöткодь картинка, сэк сы понда велосипед сетасö. А лоас велосипед — пуксьы да и мун...

— Ме сы вылын ог куж ветлыны, — кымöртчис Яня.

— Велалан! Ме вон городас олi, дак пукси и сразу мунi. И тэ мунан... Только медбы машинаэз матын эз вöлö... Ме вылö машинаыс невна эз кай, шофёрыс, тыдалö, том вöлi.

— Понда инö öктыны...

Но велöтiсь тшöктiс чапкыны этö уджсö: нем пö оз сетö сы понда. Сэк Толя адззис мöдiк туй, кöда вермис нуöтны лун ладорö: небны лотерейнöй билеттэз и выиграйтны машина нето путёвка. Но кытiсь деньгасö адззыны, медбы небны билеттэсö?

Нiя и эстöн эз öшö: пондiсö вузавны кольттез.

Яня висьталiс мамыслö, что пöжалöм кольть абужык полезнöй, и öнiсянь зоночка пондас сёйны только уль кольттез.

Мам пондiс колявны зоныслö öбед кежö, а Яня нöбöтлiс нiйö сельпоö.

И ны затеяись бöра нем эз пет: небöм билеттэс эз инмö выиграйтны.

— Давай тшыгьявны, — шуис сэк Толя. — Умöльтчан — сэк тэнö курорт вылö кыскасö. А курортыс — саридз дорас и эм.

— А кыдзи куламö? Сёйтöг дыр я терпитан?

— Пикан да тшöтшкöр пондам сёйны, эшö гонюш.

— Пондылам инö.

И уськöтчисö челядь веж турун вылö. А нянь, кольттез да мöдiк сёян ны туйö дзимлявлiс Ошко, Янялöн пон.

Куим лун этадз вöлi, а нёльöтас Яня висьталiс ёртыслö:

— Ме не мöс, мед турунсö сёйны...

— Трус! — шуис Толя и сэсся эз понды баитны Янякöт, А вот талун Янялöн бöра öзйис сьöлöмыс — вились саридзыс кыдз бы матынжык лоис. Öктан медуна пöимсö — и, пожалуйста, ыскöвт Артекö! Только мöдiккесö колö одзавны. Öнi жö кытшöвтны Ваюкансö, быд керкуын висьтавны, медбы заптiсö пöимсö ашын кежö. А сыбöрын посадö ветлыны, тётя Надя дынö, кöда сельпоын горрез лонтö. Сылöн тожö эм пöимыс. Арсяняс сельполöн полениччес шором ыждаöсь сулалiсö, а öнi вон только кляччез кольччöмась.

Мед не öштыны весись кадсö, зоночка гортас мунiкö пондiс керны гортся удж — думайтны рассказ аслас деревня йылiсь.

«Ваюкан — ыджыт да басöк деревня. Не деревня, а курорт — сад пытшкись оз тыдав. Быд карчйöрын поззэзöн-поззэзöн быдмöны льöмпуэз, рябина, ирга. И вишня да яблоняэз эмöсь. А миян — сэтöр, крыжовник, малина. Деревнясö кык торйö торйöтö учöтик шорок Ваюкан. Сiя и тöвнас етша кынмывлö, ой и лун чольгö-котöртö. Кöть учöт, да повтöм и вына: не жар, не кöдзыт оз босьт. Тöвнас береггесö сылöтö, а гожумнас — сайкöтö. Юас пескан да ар уна. И бур отирыс деревняас уна. Орденнэсö кыка новйöны: Никон дед, порсь вердiсь, да Егоровна — лён быдтiсь... Гожумнас лун покатын голубöй море кöвьясьö — этö лён цветитö. Тöв гуляйтö сэтi, натьтö, сiдз жö, кыдз Чёрнöй море вылын. А анькытшыс кытшöм! Пуртöсыс роззэзöн öшалö и каждöйыс пев кыза. Потласьö сiя, кöр воас, тачкöтöмöн, и туссес ылö лыйöны. Но отирыс оз лэдз лыйсьыны анькытшыслö — одзжык дзимлялö ыб вывсис... А лесниклöн эм ошпиян, и сiйö öтпырись Ошко пурис... Стоп! Эта йылiсь оз ков. И яблоняэс йылiсь оз ков: цветитöны бура, а яблокыс — анькытш гырися».

Рассказыс эз и пет досповна, а Яня горт вевдöрас ни, кытöн отир ректöны доддезiсь назём да торф. И кучаэс сымда — оз позь лыддьыны. И нiя сё содöны и содöны... Не весь, тыдалö, Паша Никова шуис, что минеральнöй удобреннёыс оз ковсьы таво. И быль: мыйлö сiйö, кöр назём да пöим эм? Никон дед тай шуö: «Кыным назём додь ыб вылат кайöтан, сыным додь и няньсö амбарат пыртан».

Ыб вылын тыр отирыс, а деревняын некин оз тыдав. Нельки поннэс абу.

Улица понас сунасьöны чукыля бока пожуммез. Нiя лажмытöсь да паськытöсь. Лыдтöм уввес да вожжес чульöн-пельöн паськалöмась öтмöдöрö, пашмöмась. Пöльтыштас йöй тöлок, и öдззасö пожуммес чушьявны-вашкыны: «Кышш-кышш, нёштöм тöввез, эд шныритö татi».

Пожуммес увтын Яняöс панталiс Ошко. Зоночка сетiс сылö сумкасö, и пон важнöя мунiс гортас: вот пö видзöтö, менам ёрттэз, кыдз ме отсала аслам хозяинлö!.. Ошколö позьö ошшасьны мöддэс одзын: сiя ыджыт, коккес кузьöсь, и сумкаыс оз кыскась туй кузяс.

Разведкаись Яня бертiс гажтöм. Кытчö бы эз пырав, быдлаын кылiс öтiкö: «Люська вöлi ни, сылö кöсйим».

«Истöй учкись! — видiс Люсясö Яня, горт ворота одзын пукавтöн. — И кöр сiя ештöма?.. Учкись!»

Кыдзок вылын чивзiс кытшöмкö кай: чибирь-чибирь-чибирь! — дзик дозыляйтчис, сералiс, Янялiсь фамиллёсö кыскалiс.

— Мун эстiсь, эн модь! — вашöтiс кайсö Чибин. Кайыс лэбзис, но этасянь Янялö гажажык эз ло. Мöдiс пырны гортас, но мамыс эз на лок, и Яня иньдöтчис Толя дынö. Мыйлö — ачыс эз тöд.

Толя пантасис горт дынас, юалiс Янялiсь:

— Уна адззин? Может, тонна ни эм?

— Немымда абу. Мый öнi керны?

— Абу, дак и абу — кысь ваян?

— Мийö эд кöсйисим...

— Ме даки эг... А тэ кошшы, кошшы! Адзан кö — Артекö сюран... веськыт идзас вылын, — сералiс Толя.

— Не Артек йылiсь баитöны... Пöим колö.

— Кин видзö — öкты! А ме кино вылö муна. Яня öбидитчöмöн шуис:

— Но сэки менчим нем эн кор сэсся.

Эта висьталöмыс сувтöтiс Толяöс, кöда Янялiсь босьтавлiс то лыжаэз, то дадь.

— Эн горзы кöть, — висьталiс Толя. — Отсала, ежели тэ отсалан меным... Сет линзатö — и пöим лоас.

— Линзаöс? — Яня мöдiс мыччавны сылö кывсö, но кыдзкö сувтчис, медбы не лöгöтны Толяöс.

Сiя линзаыс веж ободока, а ободокыс серöтöм листоккезöн да цветоккезöн, кöдна ятнöя тöдчöны, видзöтны кö нiйö мöдiк линза пырйöт. Но не сы понда дона Янялö линзаыс — сiя бура ыждöтö. Ежели видзöтны сы пыр юрси тылöп, дак сiя лоö ем кыза. И шондi югöр бура кутö да пöрöтö сiйö бичирö — пу сотö.

— Жаль лоис? Но, ачыт тöдан.

Конечно, жаль сiйö Янялö. Кыдз не кыдз, а козин эд. Нимлун кежö сылö козьналiсö. Ваюканын некинлöн сэтшöмыс абу и, может, некöр оз и ло.

— Босьт конёккесö. Кöркö корин тай... И задачаэз понда отсавны решайтны.

— Öнi мыйлö конёккесö? Вон сылöтны мöдö. И быль: лымыс пакмö ни, сьöдöтö.

Думайтöв-керис Яня, мый бы эшö вöзйыны Толялö, но сылöн сэсся нем эз вöв сэтшöмыс, кöдöн позис бы «гöснечавны» чегласись зонкатö, и сэсся эз понды манитчыны — кöсйис сетны линзасö.

— Сьöрат сiя? — юалiс Толя.

— Гортын. Кöр пöимсö сетан, тэнат лоас.

— Лок инö... Сета ме тэныт пöимсö, эн горзы.

Подöна туёк, кöда нуöтiс Чибиннэз ордö, öнi чорзьöма, кынмöма, лоöма нильыг. Туй чоропыс свиттялiс стекло моз, а кень кодь вöснитик йыок пазалiс кок увтын да резсис бокö, лажмалöм лым вылö. Эта туёк вылын и вöлi решитöма мунны пöимысла сэк жö, кыдз Яня петкöтас линзасö да босьтас кöрым дадь. И вот веж ободока линза Толя киын, и сiя командуйтö:

— Эн кольччы ме сьöрись, вöрöт коккетö.

— Кытчö мунам?

— Вöтчы, мыся, — он öш.

Деревня сайын лоис кöдзытжык. Лог ладорсянь кайö кöс тöлок да кутчисьö пеллез бердö, бытшкалö нiйö, дзик ем йылöн. Яня лэдзис шапка пеллесö, ниртыштiс ныр йывсö. Тöдвылас усис Ошко, сiя горöн шутньöвтiс. Толя, кöда ылынкодь ни вöлi Яня одзын, котöрöн бертiс бöр да пондiс видчыны:

— Тэ мый выступайтан? Али пельбокат колö? Верма и сетны...

— Ме понсö кытсöвтi.

— Пикöстан ишшо — сэсся менö он адззыв...

Нiя кежисö бокö, пондiсö мунны туйтöг, чарöм кузяс, важ часовня ладорö, кöда бердö лякöтöмась виль лабаз. Чарöмыс вöлi вöснит, и нiя часто вöялiсö, но не сы пыдына, медбы куравны лымсö сапоггезö.

«Кытчö сiя нуöтö? — думайтö Яня, но юавны оз лысьт. — Порсь фермаö? Но мыля туйтöг?»

Фермаö Толя эз мун, а сувтчис лабаз одзö, осьтiс ворота.

— То кытöн Артекыт — курав, мымда колö.

— Кинлöн сiя!. Ме эстöн ог понды...

— Гöна трус! — видiс сiйö Толя да босьтiс дадьсö и сибöтiс пöим куча дорö. — Лок тэч. То и зырыс сэтöн вöлöма.

Мый-мый, а Яня йöз пуктöмсö юасьтöг эз вöрöтлы, и öнi сулалiс, дзик öшöм. Толя кватитiс зырсö и пондiс чавскыны-куравны пöимсö коробокас. Тэчис шупыта, киськалiс бокас, и пöимыс пуркйисис да лэбтiс бус.

— Меным оз ков эта, — горöтчис Яня и босьтiс дадь кöвсö да кыскыштiс асланяс. Толя ректiс зырсис пöимсö лым вылас и бöра эрзыштiс:

— Тр-рус тэ — вот кин!

Нылöн етшасьöмыс, может, и пырис бы ылöжык, но часовня сайын пондiс вувтны Ошко. Кыкнанныс лöньсисö, кывзiсисö: оз я кинкö лок?

Яня дзар керис öтöрас, но сэтчин пемдöма ни, нем оз тыдав. Толя чывк петiс сыбöрсянь и öшис пемытас. Яня мöдiс кытсöвтны сiйö, но вежöртiс, что этö öнi оз ков керны, и вöтчис сы сьöрö. Мунiс туйтöг, но чарöмыс öнi сiйö бура видзис, и кынымкö минута бöртi зоночка петiс туй вылö. Эстöн сiя эшö раз-мöд видзöтiс бöрланяс — оз я кин вöтчы? — но бöрас тыдалiс только коробка дадьыс, кöда горöн шаркайтiс дортöм полоззэзнас. Яня готов вöлi чапкыны дадьсö, да кыдз тэ сiйö колян, кöр сiя не аслат керöмыс, кöр ашын жö ковсяс мамыслö али аслыс жö? Чулалiс ни вöв карта, бöрö кольччис магазин, и Яня радуйтчис, что некин сiйö эз адззыв. Умöль дело — босьтны чужöй пöим. Бур, эз шедö кö...

Керку пельöс сайсянь тюк петiс морт да кутыштiс Яняöс пальто сосöт. Сiдз эз и ешты повзьыны, кыдз кылiс Толялiсь голос:

— Висьталан кинлö, дак то! — и зэгöтiс испоткиа кулаксö Яня ныр увтын. — Кылiн менö?

Яня и сэтчö нем эз шу, а мöдыс бöра öшис пемытiнас.

Гортас мунiкö Яня бергöтлiс юрас: висьтасьны эта йылiсь али чöвны? Висьтасян — вермас Толялöн кулакыс сы бердö павкны, а не висьтасьны — сьöлöм вылын сьöкыт.

Гортас, ольпасьын ни, Яня решитiс сiдз: кыдзи Толя бöр сетас линзасö, дак сэк — чöвны; оз кö сет — мамыслö норасяс нето аслас классын быдöс висьталас.

Öтöрын, кылö ыждалö тöв: сярöтö öшын вевдöрись дудi позöн, вежмасьö бокоушкаын, тарскöтö öшынö. А ольпасьын сэтшöм долыт, дзик дюттян вылын пукалан, и тöдвылын некытшöм шогтор абу...

Ашынас, кöр чеччис, Яня медодз петiс оградаö, дзимлялiс дадьсö посувтö — ылöжык мамыс син одзись. Ойнас усьыштöм лым, и сiя, конечно, сайöвтiс тöння следдэсö. Некин оз думайт, что Яня мымдакö вайис чужöй пöим. Да и уна я сiя — куим-нёль зыртыр.

Но мымда бы горш кань эз горшав гусьöника, сё ни кöркö шедö. А Яня и гусясьнытö эз мöд, да тожö сюрис.

Только ештiс Яня пуксьыны сёйны, ышки-пойки пырис Люся да тшöктiс локны Янясö вöв карта дынö. Керны нем — мунiс. А сэтчин видзчисьö сiйö Егоровна. Сiя пукалö додь вылын, лöг да кытшöмкö нёштöм: чужöмыс вежöтöма, синнэс вöйöмась. Сьöд шаль мöс сюрöн керсьöма кымöс весьтас, тырппес коласöт тыдалöны золотöй пиннез. Ягинь-ягинь и эм, только оз векышась да оз кальскöт пиннезнас, кыдз мöйму спектакльын орсiкö.

— Кин босьтiс складiсь пöим? — юалiс Егоровна. — Эта уджыс, челядь, тiян. Мöдiлаись некин эз вовлы.

Яня дрöгнитiс эна кыввезсянь, кыдз чаркнитöмсянь «Ковсяс винитчыны», — решитiс сiя и мöдiс ни висьтавны, кыдз аркмис гусясьöмыс, но Толя вирдыштiс сы ладорö ёся синоккезнас, пидзыртiс кулаксö. Мöддэс сулалiсö вöрöтчытöг.

— Дак некин тiян коласiсь эз ыжмав? — мöдпырся юалiс Егоровна. — Ладно, сэк висьтавтöг тöдамö.

Инька босьтiс идзас тылöп, чеглалiс сiйö дженытик торрез вылö, торресö сюйис паськыт кеписяс, треситыштiс кеписьсö да шуис:

— Кыскалö öтiкöн. Ежели тiян коласын абу виноватыс, торрес быдöнлöн öткузяöсь лоасö. А кöда гусялiс, сылöн — нюжалас.

Кывлiс Яня, что Егоровна не простöй морт. Сiя кужö и курсидзöм лöсьöтны, и синiсь ёг кыскыны, и скамья йöктöтны. А, натьтö, и ворожитны вермö. «Кин гусялiс, сылöн нюжалас... — думайтö Яня. — А ме джендöта тылöпоксö».

Сiдз судзöтiс кепись пытшкись идзасторсö, чепöльтiс сылiсь йывсö и öтлаын мöддэскöт пуктiс Егоровна долонь вылö. Пуктiс да кокнита ловзисис: сылöн кöть и содыштас, дак как раз лоас. Некин сiйö гусясисьöн оз шу, оз усь позорыс сы вылö.

— Вот и тöдiмö, — горöтчис ворожея да лöсьöтыштiс кымöс вывсис шальсö. И вот диво: ягинь лоис ласков мортöн. — Пöимсö нöбöтöма Яня. Сiдз эд, муксун?

— Ме... не ме, — öдззис мыктавны воришко. — Менам то эта эдö, дженытжыкыс, дак мыля ме? Толялöн вон медкузьыс.

— Тыдалö, и сiя отсалöма тэныт, — сералö Егоровна. — Висьтав ноко, чатыра Юр: отсалiн? Конечно, отсалiн! Дак вот менам кыв: мымда босьтiт, быдöс вайö бöр. Нето сивьяныт пöим мешöксö öшöта да деревня кузяс новйöтöв-кера...

Павжунсянь ни усьö лым, гырись да небыт. Сiя бöра шебралiс чарöмсö, йысялöм туйсö, дзик ватаöн каттис Ваюкансö, белитiс, мöдöтiс пуэзлiсь куш уввез да лякис керку юррез — дзебис ас пытшкас тулыслiсь приметаэсö. Только крыша доррезын сё сiдз жö гер öшалöны йыжоллез, да руыслöн дукыс не тöвся — ульжык и небытжык.

Керöс дорын, тырöмöсь юрсянь кокöдз ва лымöн, дзульзöны челядь. Нiя табуноккезöн ветлöны улö-вылö, соровтöны, нöитöны керöс дорись столаэз. Эстöн абу только кык ёрт — Толя да Яня. Öтiк кöртöтöн нiйö домалiс талун öбида, но и нiя абу öтлаын: сьöд кань ны коласöт котöртöма, дружбалiсь йитöтсö орöтöма. Вöснит, тыдалö, йитöтыс вöлöма нето тöрмöм, ежели сразу орис. И орис сiя сэк жö, кыдз Егоровна иньдöтiс воришкоэсö вöв карта дынiсь. Мунiсö нiя и шы эз сетö, дзик немöйöсь, а деревня шöрас Толя сувтчис да шуис:

— Быдöс этö тэ кузя, Чибу! Умöлик старуха моз лёкöтчан...

— Кöр лёкöтчи? Сiя ачыс тöдiс... Ме эшö чегöтi тылöпоксö.

— Бöбöв-бöбöв и эм! Сказкаö веритiс!

— А тэ умнöй? Кульбук сёйись!.. Вай буди линзаöс!

Толя кыскис кармансис линзасö, пондiс дразнитчыны сiйöн:

— На, кут! На! То сiя, то!

Яня нюжлалiс кисö, вöтлiсис сы сьöрын, но мöдыс пышшалiс, пиньласис быднёж да керсис и горзöмви керис ёртсö.

— Сэсся эн вовлы миянö! — горöтчис сэк Яня. — А локтан — коккетö клячала!

— Перво ныртö весöт да вöлись ошшась! Да ог и лок! И тэ эн вовлы миянö! И öнi кыскы пöимсö öтнат, Чибу!..

И ковсис Янялö нöбöтны пöимсö öтнаслö. А мый нö керан? Этö Толялöн совестьыс нач бырсьöма, а сылöн эм.

Сыбöрын Яня адззылiс, кыдз Толя гуддисис лог дорын — керис «крепость». Сёрöнжык «крепость» весьтын пондiс павьявны флаг, а окоп öшынö мыччисис труба — пушка. Но не флагыс, не пушкаыс эз отсалö Толялö чукöртны челядьсö ас гöгöрас, и чожа мыйись «крепостьын» шы эз ло.

Кресенняэсö Яня прокод видзчисьлiс гажöн и чулöтлiс нiйö сiдзжö гажöн. А талун — öтiк шог. А сё пöим кузя. Öнi быдöс классыс и отрядыс пондас тöдны эта йылiсь. И мамыссянь павкас, кöр сiя тöдас складö ветлöм йылiсь... Нечöскыт, батя, локтiс ойлуныс. Школаын пондасö видны, гортын тожö оз кутö ошкыны... Велöтiссеслö да Егоровнаэслö бур — некин нiйö оз вид. Только и кужöны указывайтны: «Этö кер, сiйö лöсьöт... Перестройка тшöктö тэрмасьны, эд дышöтчö...» Чожжык бы школасö кончитны да уджавны кутчыны. Лён быдтыны, кыдз Егоровна. А эшö буржык — бригадиравны. Командуйт, туйдöт отирсö!

А Ваюкан мыс сё дзульзис и спокой эз сет Янялö. Вот эд кыдз петö: öтiккезлö гаж, а мöдiккез горесянь кучиканыс оз тöрö.

Видзöт кöть мымда челядьыс гаж вылö, а тэ дынö ачыс гажыс оз лок. Вежöртiс этö Яня да кышыштiс коккезас лыжаэз и колис горт ворота одзсö — ыскöвтiс шор дорö. Шорыс сьылiс ассис пырся сьыланкывсö и тэрмасис котöртны, бытьтö полiс, что ежели сувтчыштны секунда кежö, то усян лымыс тыртас сiйö, пöдтас сылiсь сьылан горсö.

Янялö тэрмасьны некытчö, и сiя нырыштсис бамбуковöй беддез вылö да пондiс видзöтны ваас, дзик адззылiс васö первуись. Шапкаыс чожа чочкоммис лым увтас, а зелёнöй лыжнöй костюмыс лоис сера.

Ю пыдöсас куйлiс пес чурка, кöда падмöтiс ванырсö. Сiя местын шорыс прудитчöма, лоöма паськытжык и не сьылö, а лöгöнмоз мурзьö. Вöйöм пес ропкöтö чайдöм жельöпöн, гудыртö шорсö. Ваныр валькыта быгыльтчö пес вевдöрöт, гарйö мусö, нöбöтö сьöрас сьöдмусинсö.

«Кыдз нö шуöны вöйöм пессö? — думайтö Яня. — Никон дед неважын сiйö кывнас видiс öтiк трактористöс... Ага: ёлтыш».

Öтпыр сiдз мамыс и Яняöс шуис.

Ёлтыш...

Яня сравнитiс асьсö эта пескöт и нельки думанас пуктiс асьсö сы местаö. Пуктiс да дзик кылiс, кыдз пыкöтасьö сыö ваыс, кыдз тойыштö бы сiйö аслас туй вылiсь ванырыс, а сiя оз вешшы, пыксьö.

Ёлтыш...

Не, Яня абу ёлтыш. Сiя некин туй вылын оз сулав, некинлiсь туйсö оз падмöт. И оз понды. Некöр. Вот Люсяöс öбидитiс: складас пöимсö сiя чукöртлöма...

Медбы ёлтыш эз мешайт котöртны шорыслö, Яня судзöтчис бедьнас да бергöтiс вöйöм пессö доль. Ваыс мезмис, прудокыс ямис, ропкöтöм лöньсис. Чожа мыйись руд песок тыртiс ёлтыш местасö, ровняйтiс гöпоксö, и Яня иньдöтчис шор дорöт вывланьö.

Мунö, борö лыжаэзнас лымсö, а кытöнкö кылö ведра вуггезлöн пиксöм. Дзик нiя шувлöны: Я-ник, Я-ник — бытьтö кытсалöны сiйö. И сiя дзарнитiс сылань, кысянь локтöны эна шыэс, и сук лым пырйöт казялiс нылочкаöс. Лöз фуфайка да калошаа пимиэз сьöртi тöдiс: этö Люська. Сiя мунö вала, и сылöн ведра вуггес пиксöны коромысла пеллезын. И озö корö Яняöс, а видöны, кыдз Толя жö: Чи-бу, Чи-бу! И Яня ыскöвтiс одзлань: ылöжык мунiс эна нёштöм шыэз дынсянь. Но кылiс Люсялiсь голос. Мый сiя шуис, эз вежöрт зоночкаыт, а сувтчис, сэсся бергöтчис бöр и мунiс Люсялö паныт, лöгöн горöтчис:

— Мый колö месянь?

— Кинлö? Меным — нем оз ков.

— Мыйлö нö корин?

— Ме кори? — Люся сувтöтiс сы вылö кузь синлыса синнэсö. — Ме нем эг и шу.

— Чайтi, кытсалiн... Мыся, может, отсавны мый колö... Пес поткöтны, ва кайöтны...

— Кайöт, — кокнита согласитчис Люся. — А ме лыжаэзнат ысласьышта.

Радмис Яня, что Люся сы вылö абу лöгасьöма, сюльтыртö-баитö лыжаэсö мездöтлiкö:

— Бурöсь шедiсö лыжаэс. Первöй сорт. Кокнитöсь, бура мунöны...

Радмис эшö и сысянь, что Люся отсалас, поди, öктыны пöим

Öктыны бöбöтчытöг, ылöтчытöг, честнöя. И овны честнöя, кыдз Егоровна, кыдз Никон дед. Да и кыдз Люся.

Люся öтпырись ыскöвтiс керöс вывсянь и горт дынас вöтiс Янясö, кöда зэркыта мунiс керöс паныт тыра ведраэзöн. Коромысла нюмрасис, ваыс плескайтчис, дзик кинкö коялiс сiйö кырыммезöн.

— Ме тэныт верма и пöимсö отсавны öктыны, — шуö Яня.

— Оз ков. Ме быдса додь ни чукöртi. Öнi верма и тэныт отсавны.

— Отсав...

Тётя Надяöс, кöда дынö нуöтiс Яня Люсяöс, адззисö сельмаг одзись лым весöтiкö. Сiя, мужик статя, кöбис паськыт зырöн рышкыт лымсö да чапкис вылына лэбöм чукöр вылö.

— Ме кылi, тётя Надя, что тiян сельпоын пöим эм, — казьмöтчис Яня.

— Сэтшöм товарнас ми ог вузасьö, — серöмтчис инька. — Юасисö ни мöдiккез, но абу, дак кысь...

Сэтчö магазинiсь петiс Толя кытшöмкö зонкакöт. Сiя, натьтö, городскöй: дженытик пальтоа, кепкаа, векнит вешьяна, кыз пыдöса ботинкиа.

Казялiс Толя Яняöс, бöра пондiс серавны сы вылын:

— Но, кöр Артекат мунан? Яня паныт сылö:

— Вай линзасö!

Толя кыскис кармансис линзасö, лöсьöтiс син одзас да шуис:

— Перво видзöта, кин тэ сэтшöмыс — микроб али бактерия, а вöлись сета... нырöмат.

Янялöн кытiсь и локтiс сэтшöм чожыс — сiя скок чеччöвтiс Толя дынö, кватитiс сы киись линзасö да чепöссис бокö, но сэк жö усис: коксö крюкалiс Толялöн виль ёртыс да горöтчис:

— О-о, нечестнöя сiдз! Ноко сет бöр да извинитчы!

Яня сюйыштiс линзасö öмас. Люся сiдз повзис, что зоночка виньдас сiйöн, и нем эз вермы горöтчыны.

— Ме мый висьталi, пацан? — шуис тöдтöм зонкаыс и кутiс Янясö горшöттяс. Этö казялiс тётя Надя, сибöтчис мышкыртчöм зонкаыс дынö да чувйыштiс сiйö зыр оропнас.

— Мый эстöн куль пизьсö изатö? Ноко лэдз, стиляга, Янясö, а нето öбырта зырнас, сэк пондан тöдны, кыдз учöтжыккесö песны!

— Эн чувйись! — чеччис городскöй. — Мийö орсам.

— И ме орса... Поди, эшö колö? — вöзйисьö тётя Надя и сэк жö зыкнитö мужик моз: — Ноко марш эстiсь-ка, шляга, кытчöдз боккетö эг гынды!

Толя ёртнас тэрмасьöмöн сайöвтчисö киоск сайö, а Яня чеччис, пыркöтчис да шуис:

— Спасибо, тётя Надя.

— Нем понда... А пöимыслö лесоцехö бы ветлiт. Ылынкодь жö, но сэтчин уна.

Шондiыс пырис ни Ваюкан логö, кöр Яня да Люся локтiсö лесоцех дынö. Кузь труба лэдзис уна тшын, сiйö дзик кинкö тойлалiс пытшксяняс, чапкалiс быдса ноппезöн. Тöлыс паздiс энö ноппесö да гардiс, кыдз кужис, и нöбöтiс сьöрас — вöр посёлоклань.

Челядь пырисö кочегаркаö, юалiсö Öртемöс, кыдз тшöктiс тётя Надя..

— Ме и эм Öртемыс, — шуис самöм паськöма да чужöма мужик. — Мый мöдат висьтавны?

— Мийö пöим кошшам... Лён быдтыны.

— Эм сiя доброыс, — эз откажит Öртем. — Лонтам эд пильнöй чагöн.

Кочегар нуöтiс нiйö кочегарка сайö, мыччалiс ыджыт чукöр вылö. — Этö эд вöрöтö, сiя лымсора, вамлiс, натьтö, А эта, — нуöтiс мöдiк дынö, — кöс... А мыйöн нöбöтны пондат?

— Быдöс босьтамö?

— Од кö дышöтчö — быдöс. Не спекулянитны эд, Егоровналö, натьтö.

— Сылö, — шуö Яня. — Ашын вöлöн локтам. Только некинлö эн сет. А то миян звенолöн öтiк чир абу.

— Сiдз и керам. Локтö. Только одзжык, а не талун моз... Чожа пемдыны пондас.

Ужнайтöм бöрын Яня лыддьöтiс мамыслö басöк сказка, лöсьöтiс асыв кежас сумкасö да водiс. Водiс и сэк жö ланьтiс: лесоцехö ветлöм мыдзтöтiс. И крепыт онкöт, кыдз овлö öддьöн шоча, локтiс дивнöй вöт....Котöртö-ребритö видз кузя Ваюкан-шор, тэрмасьö öтлаасьны мöдiк шоркöт. Ваыс сöдз, дзик синва, и быд чериокыс тыдалö, быд галяокыс тöдчö. Шор дорас, небыт турунас, пукалöны Миша, Люся, Паша, Яня и мöдiккез, кин отсалiсö колхозлö быдтыны тшöк да сöстöм лён. Пукалöны нiя ордчöн и тульöтöны ваас коккезнысö, а чериэс миссьöтöны нылiсь коккезнысö асланыс борддэзöн да бöжжезöн.

А гöгöр дзоридзасьö лён — топ голубöй шёлк ольсассьöм. Эта шёлкöт уйö Егоровна да сыналö паськöтöм чуннезнас вöснитик тылöппесö, ачыс негорöн, ласкова баитö:

— Благодатьыс кытшöм, благодатьыс! Ай да челядь миян, ай да соколлэз! Эд эттшöм благодатьсö нiя керисö-быдтiсö, пöим отсöтöн зорöтiсö...

Егоровна петö лён пытшксис, пуксьö челядькöт ордчöн, баитö:

— Локтiс кад вештiсьны тiянкöт, силиэз. Сизим путёвка сетiсö, öтiкыс — Артекö. Кинлö сiйö сетамö?

— Люсялö! — öтiк öмись шуöны челядь. — Сiя медуна öктiс. И мöдiккезлö отсалiс.

Люся чеччис, трекнитiс лён содз кодь волькыт чикисьнас, жаритчöм кокнас коза моз топнитiс да висьталiс:

— Ме некытчö ог мун. А мунас Яня Чибин. Медунасö не ме, а сiя öктiс.

Яня пыксьö, тожö оз бы мун:

— Ме мортыс нечестнöй... Перестройка коста бöбöтчи... кöр быд мортлö колiс честнöя уджавны. Менö совестьö оз лэдз Артекас.

А Люся öтiкö зiльö: Яня да Яня, бытьтö Ваюканын и ним мöдiк абу!

— Не только пöимыс понда, — вермалö öмнас Люся, — а сы понда, что Яня лоис честнöй мортöн, — Артекö иньдöтам сiйö, Чибинöс. И сэсся ог пондö баитны.

— Ладно, Люська, — согласитчис Яня. — Ме дак ме... Ме бы öддьöн-öддьöн-öддьöн моресö адззыла! А локтан тöлö тэныт путёвкасö шедтамö...

ПОКРОВ ЛУНÖ

Мама-ныла мунiсö непаськыт, но кузькодь ты дорöт. Мунiсö ордчöн, öтыждаöсь, öткодь плащаöсь, и тöдтöм морт шуис бы нiйö сойезöн нето подружкаэз: мамыс и чужöмнас, и вывтырнас сё эшö том, кöть сылö не етшажык тридцать пять годся. Туйыс не öддьöн волькыт, но кöс и небыт. Сiя — вöр туй, сэтi ветлöны только тöвнас, а гожумнас машина-мöд разь кайласö коросявны да тшакьявны, кыкись-куимись ваясö турун. А талун сiя туйыс нуöтö мама-нылаöс праздникö.

Вдруг ва кузяс — шлёп да шлёп! — дзик веслоöн сöтiсö.

Лиза, нылыс, дрöгнитiс да уськöтчис мамыс дынö. Мамыс сувтчис, бергöтчис ты ладорас, горöтчис:

— Но, не я тэ, Покров, повзьöтчан? — И сералöмöн содтiс: — Вашыррез польöтчöны кытöнкö. Баддес увтын, натьтö... А Покровыс этчинка воно, вöрок саяс, миянöс видзчисьö.

Нылыс сибöтчис берег дорас, видзöтöв-керис баддес увтö, но некинöс эз казяв и шуис мамыслö:

— Мун öтнат, ме гортö берта. Мамыс стыдитiс:

— Тэ тай не нывка морт, а суса: то öтлань, то мöдлань керсян. Мыйлö инö гортсянь вöрзьöтчин? Давай вöтчы ме сьöрö! Покровыслöн миянöс видзчисьтöн, натьтö, джын мылаыс бырис ни.

И Лиза мунiс мамыс бöрсянь.

Вöр дорас туйыс лоö вожа: öт вожыс пырö пипуа-кыдзза расö, а мöдыс кежö бокö да шутёммез кузя лэдзчö юок дорö, медбы километр бöртi кайны понуля мыс вылö. А мыс вывсис туйсö оз и позь шуны туйнас — не вöв, не трактор абу ветлöм. Эстöн кык районлöн граница, и отирыс етша сибавлö.

Лиза эна местаэзын некöр эз вöвлы. И талун эз мöд эстi мунны, да мамыс видчöмöн нуöтiс, ки пöлöттяс кыскис. Не сы понда кыскис, что колö ёрт, а мöдiс ошшасьны важ родня одзын: то пö кытшöм басöк да умнöй нылö! Быдтi пö öтнам, сизимöт классöдз вайöтi. Лоас пö быдöс бур, Лиза горт школа бöрсянь пырас сельхозтехникумö, агрономöн лоас и ме моз оз понды пö порсь картаын гуддисьны.

Ошшасьöмыс понда жö пасьтöтiс-кöмöтiс нывсö медбур мöдöтчанöн, нельки ассис виль туфлиэсö сетiс, ачыс резиновöй сапоггез кöмалiс.

Луныс ыркыт, туйыс волькыт, и мунны кокнит.

Тöн ойö кынтыштiс и шыдöс кодь лым петалiс, а талун мичамис да косьтiс. Бур Покровыс — не шонытöв, не кöдзытöв. А расыс, расыс кыдз пасьтасьöма — ассис медрöма, медмича шёлккесö мыччалö!..

Мамыс паськыт спинаа, ёновöй, но висйö-мунö сiдз, что некытчö и кокыс оз падмы, не мысокö, не гöпö оз кышась. А кыдз инö: не пес керавны, не назём петкöтны — гöститны мунö. Мый дырна ни важ родняас эз вöв, мымда басниыс чукöртчис — куим лунöн, натьтö, не баитны! Да басниыс — басни, а эм эшö буржык тор: сэтчин сэтшöм чöскыт сурöн юктасьöны, кытшöмö, натьтö, сэсся некытöн оз кужö керны. Кыным ни год чулалiс, кыдз медбöрьяись юис Покров лунся сурсö, а кыдз усяс сурыс тöдвылас, сiдз и петö дульыс.

Гажа öтöрыс, а Лизалöн сьöлöм вылас из куйлö. Талун сылö колiс орсны баскетболöн, а мамыс эз лэдз. Талун рытнас кино, кöдö нылочка видзчисис джын месяц, а мамыс сылiсь и киносö мырддис. Ашын кежö, понедельник кежö, Лиза эз на кер кык гортся удж. Мыйлö сiя, велöтчись, мунö гортсис? Видзöтны мамыслiсь важ роднясö? Дак Лиза и сiдз тöдö, кытшöм сiя — мамыс мывкыда жö. А мамыслöн мывкыдыс — некытшöм праздник, некытшöм гажа рыток не орддьыны. И гортас то нимлун, то касьтiсян осьтас, и, видзöтан кö, керкуын бöра майöв дук орсö, бöра гора сёрни киссьö, а кöр и — синва.

«Но мый кошшыны ме сэтчин муна? — ветлö Лиза юрын дума. — Сыкöт öтiк позор адззан, сэсся — нем...»

— Лизу, тэ тай кольччан мыйкö? — мамыс сувтчыштiс, видзчисьö нывсö. — Етша ни кольччис, давай вöтчы мамыт сьöрö. — Сiя павтыртiс плащ соссö, видзöт керис часы вылö. — Как раз öбед кежас локтам. Кылан? Вöтчы давай!

Нылыс нерсьö:

— Вöтчы давай! Эн кольччы!.. Вот кута да и кольчча, мун öтнат да и пируйт...

— Мамтö он жö этчö коль, он жö чапкы. Али ме абу ни жаль?.. Али мыдзин, кага? — мамыс рамыник голоса, ласков. — Вот менам лоас премия, тэныт часы босьтам. Кыдзкö адззылi, тридцать руб сулалö... Ог и жалейт, босьта.

— Кыдз велосипедсö жö, — оз надейтчы нылыс.

— А сэк деньгаö эз лöсяв сьöрам. Сэсся велосипеддэс эз лоö. А öнi премия, öнi босьта.

— Эн на бы ошшась премиянат. Керан прогул — и оз ло. Талун кöть юасин жö муннытö?

— Юаси, Лизу, юаси. Тёткатö ас туям коли. И ашын кежö...

— Ашын кежö тожö? — Лиза сувтчис. — Тэ мый? Али нач ни юрат ыркыт?

— Да чöв тэ, канюк! — сувтöтö нывсö мамыс. — Мыся, колас кö, дак эшö выходнöй эм. А гортö талун жö, конечно. Час-мöдсö пукыштам, баитам-керам да и гортö... Но, мунам, мунам... Ашын сэки культмагö ветлам, часыэс, натьтö, сё эмöсь.

— Ме муна тэкöт, — висьталiс Лиза, — но кыдзи коддзан, ме тэнö коля. Сiдз и тöд — коля!

— Да мыля жö тэ сiдз баитан? Но юыштам, может, но сьылыштам, дак эд сэтшöм праздник — Покров! Год вылас сiя öтпырись овлö, абу грех и гажöтчыштны. Шуа тай: не пыр жö порссескöт овны!

Этö сiдз: мамыс эшö абу пöрись, сiя олö бы сiдз жö, кыдз мöдiккез — сылöн соседкаэз, сылöн ёрттэз.

Лиза иньдöтчис мамыс сьöрö, но эшö öтпыр висьталiс:

— Кыдзи бöбöтан, сыбöрын ме вылö эн обижайтчы. Жалейтi öтпыр, тырмас.

Этö нылыс казьмöтiс мамыслö нёштöмтор йылiсь, кöда шогмис неважын, сентябрь вылас.

Сiя рытö фермасяняс мамыс бертiс одзжык и вöлi ырöша ни. Тэрмасьöмöн лöсьöтiс подалö юан, тшöктiс петкöтны. Лиза чапкис тетраддесö, дозирайтiс и порсьсö, и баляэсö. Гидас, конечно, орсыштiс дзелькöт, кöдö дыр вердiсö посудкаись, и сiя лоис кань кодь рам. Пырис керкуас, а мамыс пасьтасьöма чики-брики да лöсьöтчö мунны гортсис.

— Тэ кытчö нö, мам?

— Ме недырик, Лизу.

— Тöда тэнчит недыриктö! Мунан да öшан.

Не сы понда нылыс панöвтö мамсö, что öтнаслö гажтöм рытсö чулöтны — велалiс ни, не первуись! — а мамсö жалейтö: етша узьö, а сэсся шогалö.

— Джын час кежö петала.

— Некытчö он пет! Чöвтчы!

— Дядьыт корис, Лизу. Сылöн нимлун талун.

— Кин бы эз кор — сё вина пондан юны.

Вина йылiсь мамыс шы эз сет, мöдмоз нывсö босьтö:

— Лöгасяс дядьыт. Ачыс тай пыр отсалö, а мийö мый?.. Йöрнöс мöдi козьнавны сылö. — И эшö мöдiк туй вылö инмис: — И тэ, Лизу, петалiн бы. Не чужöйö, айыт вон ордö.

Дядьыс былись бура отсалö: и пессö вайö, и пилитö, а таво гожумнас ограда весьтö виль навес керис. Лиза радейтö дядьсö, сылiсь быд кывсö, дзик айлiсь, кывзö. Конечно, козинсö сылö колö сетны, да не умöликö. И мамыслö шуö:

— Видзчисьышт, ме открытка дядьöлö гижа. Козиныскöт сетан.

Мунiс мамыс рытся югытöн, а локтiс асъя югытöн, кöр Лиза сёйис ни да лöсьöтчис мунны школаö. Пырис гортас сьылöмöн, керкуас пезьдiс, усис.

Сысянь, что мамыс бöбöтiс, что кодöн локтiс да оз мун уджавны, Лизалöн син одзас пемдiс, и сiя первуись видiс мамсö недолыт кыввезöн:

— Пöттöм мöс! Алкашка!

Лöгасис и мамыс, синнэс гöгрöсмисö:

— Ме — мöс? — сiя пуксис джоджас, öшын весьтö. — Тэ, понпиян, лысьтан мамыткöт жевгыны?! Да ме... Да тэ...

Мыйкö мöдiс висьтавны лёкжыка, но, тыдалö, нем сэтшöмсö эз адззы. Казялiс öшын вылiсь утюг, кöдöн Лиза неважын волькöтiс галстук, босьтiс сiйö да иньдöтiс нылыс юрö...

Эта бöрсянь Лиза быдса неделя олiс дядьыс ордын, и мамыс быд рыт вовлiс сы дынö каитчыны.

Сiя кадсянь Лиза дугдiс веритны мамыслö, сыкöт баитлiс етша и некöр эз торйöтчы аслас думаэзöн, нем эз юась мамыслiсь, нем эз кор, только висьталiс, что деньгасö, кöдö сетöны Лизалö айыс кулöм бöрсянь, пондас босьтны аслыс.

Сэксянь жö мамсö эз понды шуны мамнас.

* * *

Вот мамыс и важ родняыс ордын, чужан деревняас. Эстöн сылö сё эшö унатор тöдса, унатор дона. Гажмö инькаыт, кокнитжыка да чожжыка оськалö, гажöнжык баитö. Вот и керку, кытöн сiя олöма нывканас.

Сiйö панталöны ворота одзын, ки пöлöт пыртöны керкуö, а керкуас порог дорсянь и пондöны потшшуйтны.

Мамыс шыннялö öмтырьяс, мамыслö долыт. Сiя — счастливöй.

Медодзза кружка бöрсянь сылöн чужöмыс гöрдöтö, синнэс югмöны. Эстöн жö, порогувтас, визывжыка пондö баитны.

Лиза мамыс бöрын сайласьö, оз мыччась не оз шыась. И сiйö оз и казялö: родняыслiсь синбурсö Покровыс джендöтöма ни, но зэв бура личöтöма кывсö — только и кылö та-та-та да ля-ля-ля!

Но вот мама-ныла пуксисö лабичö, вöлись и Лизасö казялiсö, пондiсö юасьны. Хозяйка шуö:

— Этiя кин тэкöт? Не я нылыт сы ыжда ни лоöма? Хозяин хозяйкасö янöтö:

— Он разь адззы: люпки-ляпки айыс! Хозяйка оз сетчы:

— Висьтав кинлöкö, а не меным!.. Синнэс будичи тятюыслöн. А ныр чангыльыс, видзöт-ко, быдсöн мамыслöн.

Лизалöн мамыс вежöртöтö:

— Сiя — нылö. Хозяйкаö менам... Гортын быдöс ачыс керö: и васö вайö, и горсö лонтö, и подасö дозирайтö. Кöр и песласяс.

Хозяйка тожö ошкö:

— Тöдчö: умнöй сина. Мамыс сьöрья... Ноко вешшö пызан саяс. Сёям да тожно и баитам. Вешшö жö, вешшö — Покровсö эд пöрисьтö.

— А локтiм, дак и пызан сайö ковсяс пырны, — шуö Лизалöн мамыс.

Мама-ныла чöвтчисö, пызан сайö пырисö. А сэтöн кружка сьöрын и рюмка пондiс котрасьны. А сiя, кöть и учöтжык, кöть и нем вылö видзöтны, но хитрöйжык да лёкжык.

Лиза не сымда сёйö, мымда мамсö панлалö — кöр синнас, кöр чуньнас, кöр и кывнас: эн вунöт пö, гöстя, мый висьталiс нылыт! И мамыс берегитчö: босьтас жö рюмкасö, но тырпалас да бöр сетас.

Сёйисö пöттöдз, чеччисö пызан сайись, ошкисö юан-сёянсö да спасибо висьталiсö. Мамыс эшö гöрджык да гажажык лоис, эшö кокнитжыка сюльтыртö:

— Но, Лизу, хозяйка менам, дедыт кыдз баитлiс? А сiя то кыдз висьтавлiс: «Сёйин, юин — кынöм пöт, нинкöм ныртö бöр бергöт!» И миянлö колö нинкöммезнымöс гортлань бергöтны.

А хозяиннэс сэтöн и эмöсь:

— Тiйö мый этö? Юрныт эз на мыччись, а бöжнытö ни миянлань бергöтат? Ноко сьылыштам перво, а сэсся Покровыс ачыс висьталас, мый керны.

И сэтöн жö, джодж шöрас, пондiс горавны сьыланкыв:

О-о-ой тэ, ны-ы-ылiньö-ö-öй,

Сьö-ö-öд синкы-ы-ыминьö-ö-öй,

Тэ-э-э эн ви-и-ид мамтö-ö-ö,

Э-э-эн кöри-и-ит ме-э-энö-ö-ö!..

Сьыланкылыс нюжвыв, не тэрмасян, рамыник. Сьылöны вынсьöтчытöг, да öддьöнöв норöн, дзик синва сорöн голоссэзнысö кыскалöны. Но голоссэзныс öддьöн бура лöсялöны, сьöлöм вöрзьöтöны.

Лиза кывлiс ни этö сьыланкывсö, но медбы этадз бытшöма сьывлiс мамыс — эз на вöвлы. Сьылö сiя, ачыс и юрнас, и кинас вöрзьöтö — сьывнытö отсалö.

Тэнö быдтi ме,

Лэбтi кок йылö.

Öнi ачыт пет

Шуда туй вылас...

Сьывсис сьыланкылыс, и Лиза босьтiс кыкнан плащсö да пондiс нуöтны мамсö гортас. Мамыслöн öт кокыс öтöрлань тальччö, а мöдыс — поперегасьö. Сэтчö сы киö бöра тыра рюмка сюйыштiсö, но Лиза кутiс мамыслiсь кисö:

— Тырмас, сэсся ог лэдз!

Хозяйка Лизалiсь спинасö лапкöтö да висьтавлö:

— Кага тэ кага! Да мамыт эз на ю! Курöг унажык юö! Мыйöн нö Покровсö пондас касьтывны? Не юны, дак и локны эз ков... Ась эта туй бедь местö лоас...

Эта басни увтö мамыс босьтiс рюмкасö мöд киас да чатыртiс-пöрöтiс öмас. Лизалöн син одзас луныс кусiс, и сiя сап кутiс мамсö киöттяс да тур-тар кыскис ыбöс сайö.

— Норовит жö, Лизу! — кеймисьö мамыс. — Рюмкасö сьöрам ог жö нöбöт...

Нылыс пыртiс рюмкасö да вöлись петкöтiс мамсö öтöрö. Сэтöн нiя пасьтасисö, кутчисисö оча ки и шытöг петiсö деревня сайö, сэсся янсöтчисö и сьöрсьöн-бöрсьöн иньдöтчисö гортлань.

Мамыс дузiс, дзик учöт кага: öтiк кыв оз горöтчы, только пишкö-чушыктö.

Чöлö и Лиза, а пеллезас горалö нора сьыланкылыс, кöдö сьылiсö неважын мамыс да сылöн важ родняыс: «Ой тэ, нылiньöй, сьöд синкыминьöй...» Горалö да эшö öддьöнжык вöрзьöтö сьöлöмсö — дзирытжыка, зубытжыка.

Кöр дугдiс ни тыдавны деревняыс, мамыслöн лöгыс чулалiс, и сiя пондiс частушкаэз нюргыны-сьывны, но сы сьöлöмын эз ни вöв праздникся гажыс да öдыс.

Джын туйсö нiя сiдз и мунiсö: нылыс — одзас, мамыс бöрсяняс. Кынымиськö мамыс пондылiс выргыны, но этö видчöмсö нылыс бытьтö эз и кыв. Но вот вöр дорись туйвежын мамыс сувтчис, бергалiс-керис да иньдöтчис бöрлань.

— Тэ кытчö эшö?! — панöвтö мамсö Лиза. — Тэ кылан менö? А мамыс, кöть и пезьдалö, сапкö-мунö нылыс дынсянь.

— Ме мый шуи? Берт öнi жö!

Рытнас öтöрыс кöдзытжык лоис, лымоккез лэбалöны, а мамыслö, тыдалö, шонытöв: мунö и мунiкас чöвтчö бы, да некыдз плащ соссö оз вермы кыскыны. Мырсис, мырсис да туйсö öштiс. Коккес турунас каттисисö, и мамыс сунгисис ныр вылас. Пондылiс чеччыны, но выныс эз тырмы, и водiс гатш, лöньсис.

Шондiыс пипу йыввезö павкö ни, а Лизалöн рытся уджжез кертöмöсь, и нылочка пондiс тэрмöтны мамсö:

— Ноко чеччы, эн енöвтчы этчö!

Мамыс и синнэсö оз осьт, только мурзьö да пиннесö йирö.

— Чеччы, чеччы! Эн тешитчы! Мамыс оз и вöрзьöтчы.

Лиза кутiс сiйö киöттяс, пуксьöтiс, зэгнитiс пельпонöттяс. Вöлись саймис мамыс, лэбтiс юрсö, дзарнитiс нылыс вылö, Лиза повзис: синнэс мамыслöн тувдöмöсь, дук оз вöрö, дзик стекляннöйöсь.

— Мам! Мама!.. Тэ кылан жö менö? Гортö колö, мам! Нылочка видзчисис мамыссянь сэтшöм жö ласков кыв, кытшöмöсь шуис ачыс, но мамыс жевгыштiс:

— Мун öтнат, понпиян!

Эта бöрсянь и Лизалöн чорзис кылыс:

— И тэ мунан! Чеччан и мунан гортö, кылан, мый шуа? Гортö!

— Эн велöт, зырымбедь! Кульбук пöла юра...

Лиза дугдiс паныт шыасьлыны, а кутiс мамсö конувтöттяс да чеччöтiс, оськöвтiс гортлань, но мамыс сэтчö жö и тушмыльтчис му вылас. Нылыс вились лэбтiс сiйö, пырис конувтас, дзик мешöк пельпон вылас кышалiс, да куим оськöв бöртi кыкнанныс усисö.

Куимöтпырсяс Лиза эз ни вермы лэбтыны мамсö — сiя быдсöн сырлёль лэдзчисис, немымда кок йылас эз öшшы.

— Тэ мунан али он? — бырсис Лизалöн мылаыс. — Вот коля этчö, дак адззылан вöлись... касьтывлан праздниксö!

— Понпиян... Кульбук...

Лиза сэтчö и колис мамсö, горзöмöн котöртiс гортлань. Но юрас сидзис: «А кыдз машина этчö локтас?..»

Котöрöн жö бöр бертiс, кутiс мамсö киэзöттяс да турйöн-тарйöн вермис кыскыны туй дорись пипуэс коласö, кöдна увтö арыс ольсалöма гöрд-вежа ковёр.

— То тэныт ольпасьыт!

* * *

Гортас Лиза ваялiс ва, дозирайтiс подасö и, медбы асыв кежö етшажык кольччис удж, пыртiс пес. Мамыс йылiсь эз бы и думайт, а сiя син одзас и вöлi. И пеллес прокод кылiсö сылiсь сьылан голоссö, сьыланкывсис медодзза шыэсö: «Ой тэ, нылiньöй, сьöд синкыминьöй...»

Но вот быдöс рытся уджыс керöм. Колö пöднасьны, шедтыны би да пуксьыны тетраддез сайö. Но сьöлöм вылас мыйкö недолыт, мыйкö оз тырмы. Конечно, сысянь недолыт, что мамсö колис вöр дорö и некинлö эз висьтав эта йылiсь.

Петiс ворота сайö, видзöтчö да думайтö, мый керны. А öтöрас лоöма эшö кöдзытжык, кынтö ни.

«А сiя плаща да резиновöй сапога!..» — думайтö мамыс йылiсь.

И мунiс дядьыс ордö...

Пемдандорас Лизалiсь мамсö вайöтiсö тракторöн. Сiя вöлi садьтöм. Фельдшер керис уколлэз, но вöлöма сёр ни: сьöлöмыс вартсьыны эз понды.

МАКЕДОН

Лёва Чуртанов первöй классянь велалiс лыддьöтны книгаэз. А вот газета сылö син одзас оз ков. Сымда и видзлiс сiйö киас, мымда кыскывлiс почта ящикись да пыртлiс керкуас. Но öтпыр, кöр велöтчис öкмысöт классын ни, петiс сiдз, что Лёва лыддьöтiс районнöй газетаись ыджыткодь статья...

Сiя пыртiс почта — кык газета да айыслö письмо. Чапкис газетаэсö пызан вылö и вевдöрись газетасис казялiс фотография: тоша старик öт киас видзö вöлöс, а мöднас кутöма чанёклiсь голя.

«Цыганöс снимайтöмась, — решитiс Лёва. — Мый понда? Кин сiя?»

Босьтiс газетасö, лыддьöтiс снимокыс увтiсь: «Македон дед аслас крестьянскöй хозяйствоын».

«Македон дед? Македон...»

Мыйкö тöдса вöлi и цыган кодь сьöд тоша чужöмыс, и эта аскодя нимыс — Македон.

«Кин сiя, кытiсь? Может, эшö мыйкö сы йылiсь гижöма?»

Вöлi гижöма. И сы йылiсь, кыдз локтöма овны чапкöм деревняö, кыдз керöма виль керку, гöтрасьöма. Видзö дас мöс, уна куканнез, кöть и пенсионер ни.

И вежöртiс Лёва, что Македон дед как раз сiя мортыс, кöдакöт пантасьлiс кынымкö год одзтi. Пантасьлiс случайнöя, недыр кежö...

* * *

Пондöтчис гожум. Вöлi сетöма ни медбöрья экзамен, и Лёвалö, мыдзтöм чери кыйисьлö, ковсисö виль вугыршаттез. Важжес эшö бурöсь, но дзик дженытöлöсь, и зоночка босьтiс черок да кайис вöрö. Адззис кыдззаин, кералiс сэтiсь шаттесö, волис.

Лэбтiсис вына тöв, пондiс букйыны пу йыввезын, нёкравны нiйö. Вöрыс, кöда шöрö кöшельöн пырöма ыб, пондiс пыкны, сувтöтны тöвсö, но эз вермы, да кутчис эшö öддьöнжык пессьыны тöлыскöт.

Кöшель пыдöсас перво ризьнитiс, вöлись куж-каж пöрис пу. И сэк жö вöрсис петiс кузь плаща морт, и Лёва вежöртiс, что пусö не тöлыс чегöтiс, а пöрöтiс сiя мортыс.

«Натьтö, Ондрон дед пöрласьö, — решитiс зоночка. — Сё черöн...»

Но сiя вöлöма мöдiк морт, тöдтöм. Лёва нельки повзьыштiс, кöр старикыс локтiс матöжык: чужöмыс куш тош, не ныр, не öм оз тöдчы, а тошыс сьöдся-сьöд. Не вöрись дедыс я? Вон и бырöм шляпасö синнэсви лэдзöм, мед эз казялö, что синкымтöм...

Полöм не полöм, но Лёваöс мыйкö вöрзьöтiс местасис да тойыштiс гортлань. Нельки мукöд вугыршаттесö чапкис, колис только кузьжыккесö да веськытжыккесö.

— Сулав! — не горöтчис, а дзик пон моз увтыштiс старикыс. Тöлыс дугдiс букöтны, и Лёвалöн юрас чардбиöн койыштiс:

«Не вöрись дед, дак колдун... Тöвсö лöньсьöтiс...»

Эттшöм легендаэсö Лёва, вöр дорись деревняын олiсь, кывлiс неетша. И кöть тöдiс, что некытшöм куль абу, а полöмыс эз чулав. Но и пышшыны эз ни понды. Старик сибöтчис, юалiс:

— Тэ кытiсь?

Зоночка нем эз вермы горöтчыны.

— Тэ он кыв али пöриссескöт он баит бы? — голосыс абу лöг, но небура кижгöтчö. — Ме юала: кытöн олан?

— Гортын.

— Тöда, что гортат. Быд мортыс гортас олö. Тэ кодьыс... Кытшöм деревняись, юала. Не Чукырись я?

Лёва кылiс горт деревняыслiсь нимсö, и сылö лоис гажажык.

— Сэтчинiсь.

― Гурьевнаöс тöдан? Чукыля кокасö?

― Тöда.

— Сiя свестя менам. Иньöлöн сой... Мыччав-ко Чукырас туйсö.

Лёвалöн öнi полöмыс нач чулалiс, кылыс домйывсис мезмис да пондiс сярзьыны, кыдз тöдсакöт баитiкö.

— Лок мунам... А тэ кытiсь?

— Ме? — джöмдiс старикыс. — Кыдз тэныт и висьтавны, медбы не бöбöтны... Ме — некытiсь.

— А шуан: быд мортлöн эм горт.

— Да, шуи сiдз. А менам абу. Посёлоксянь веськыта локта и öши.

— Нем эн öш. Вот вуджам логсö да петам ыб вылас — нырыт Чукырас и пыкöтасяс. Разь Гурьевнаыс ордын важын ни эн вöв?

— Эз лэдзö вовлыны. Иган сайын видзисö, — мыйкö не öддьöн серьёзнöя баитiс старикыс. — Кыдз баранöс, торйын видзисö, медбы эг люкась.

— Гурьевнаыс барансö тожö иган сайын видзö — ёнтö. Логсö эз пондö гöгöртны — веськыта мунiсö. Лог пыдöсас инмисö мампöв тар вылö: котöртö, бордсö турунöттяс кыскö.

— Ранитöм, лэбзьыны оз вермы, — жалейтöмöн горöтчис Лёва.

Старик шуö:

— Борд сылöн дзонь. Сiя ылöтчö, поз дынас оз бы лэдз.

— Видзöт буржыка — чегöм.

— Эн вермась ассят сьöджыккескöт. Вöтчы-ко сьöрас, дак адззылан.

Чепöссис Лёва тарыслань, вугыршатьнас макнитiс, и тарыс пур-р лэбзис шорок саяс да пырис ловпуэз увтö.

— Ме мый баита: ылöтчö. Да и мый кольччö керны сылö? Вувтны оз куж, пишаль сылöн абу. Кыдз враггесö вашöтны? Тэ эн вöрöт сiйö, ась спокойнöя пöжсьö.

Эта басниыс Лёвалö гленитчис: сы моз жö думайтö старикыт. Петiсö лог мöдöрас, мунöны одзлань да баитöны.

— Кин тэнö иган саяс видзис? — тöдö бы Лёва. Старик тарыс моз жö бы ылöтчö, чуклясьö баснинас:

— Вöлi бы кинöс видзны, а видзиссес адззисьöны: Тэнö кыдз нö шуöны?

— Лёва.

— Лёва... Небытик нимыт, дзик воöм льöм. А менам — Македон. Чорыт, кöдзыт, тон-тон кын. Да мый керан? Не ачым эд бöрйи... А кыным год тэныт, Лёва?

— Двенадцать.

— Ыджыт ни. Ме тэнат годдэзын гöрны пондi... Дак вот, Лёва: миян оланыс лёк! А лёк пон мый керö?

— Увтö, повзьöтлö.

Старик нетшкöвтiс кок увтсис тшöтшкöр, орлалiс листтэсö да сюйис öмас и нiйö аклявтöн висьталiс:

— И пурсьö, Лёва. И лёк оланыс сiдзжö пурсьö. И сiя менö пурис.

— Бура куртчöвтiс?

— Зубыта, зонка! Да не кытiкö, а лолöс, лолöс! Нёль годöн пурöм местаыс эз веськав.

— Эз ков лöгöтны...

— Олансö ме эг лöгöт — мортöс. Да и не мортöс, а мортжугöс лöгöтi. Но эта йылiсь ог пондö баитны.

«Мортжугöс видан, а кытшöм ачыт? — думайтö Лёва. — Вон и паськöмыт леш-вош, и тошыт — пашмöм вурун. Тюромщик — тюромщик и эм».

Думайтiс этадз, да усис тöдвылас: эн видзöт, кыдз пасьтасьö, а видзöт, кыдз керö. И сылö жаль лоис этö мортсö. Оз тöд, мый понда, а жаль. Этö, натьтö, бабыссянь сы дынö локтiс. Бабыслiсь айсö кöркö тожö пукöтöмась кыдз бунтовщикöс, и старуха öнöдз бура жалейтö сiйö да часто сьывлö сьыланкыв:

Арся лунö мам-старушка

Тюрьма одзö локтöма.

Аслас зонлö, дона зонлö,

Юны-сёйны вайöма.

— Сетö, сетö гöснечокöс,

Видзö мамыссянь юöр.

Эд тюрьмаас пукалiсьыс

Бурсö оз адззыв некöр...

Лёва — мортыс сэтшöм: мый бердö кутчас, дак керас досповна и бытшöмика. И öнi ассис мывкыдсö эз веж: вайöтiс мортсö Гурьевна ордöдз, пыртiс керкуас. А керкуас некин абу. Эттшöм гажа лунас разь кинöскö пукöтас керкуас?

Петiсö улицаас да и панталiсö хозяйкасö, здоровайтчисö. Старуха косöй синнас дзар керис тоша морт вылö да виззьыштiс лёк кыввезöн:

— Кинöс эстi лешакыс кыскалö?

Гурьевналiсь бур кывсö етша кылан, но эттшöмсö Лёва эз жö видзчись.

— Эн тöд, свестя? — рамыника горöтчис старик. — Кысь тöдан — эта дырна эг адззисьлö. Ме Македон.

— Мый татiсь кошшан! Смерттö я мый я? Разь мöдiлаын он вермы чезнитны?

— Кывзы жö менö...

— Сойöс вийин да öнi ме бердö мöдан кутчыны? Мун татiсь вакрамеш, ась пельö оз и кыв, синö оз адззы!

Лёва бокынмоз сулалö да кывзö, оз и вöрöтчы. Македон кульыштiс юр вывсис шляпасö, нямыртiс кырымас да зыртыштiс шляпанас кымöссö.

— Эн вирдав, свестя, грехсö эн шедты. Сойыт ме сьöрись кольччис здоровöн.

— Да кок йылас сiсьмис. А кин кузя? Чайтан бур олан кузя? Да тэ кузя и нёрис!

— Не ме кузя, а умöль отир кузя... умöль законнэз кузя. Думайтан, меным абу жаль сiя?

— Вöлi бы жаль, дак сы йылiсь тöждiн, а эн тöдчы лешаччöй шайкаэзкöт. Кöбыла рожа тэ, вот кин!

Македон одзлань эз кутчы вермасьны, только висьталiс:

— Кытшöм шайка, тэ мый? Этö умöлик мортыс, доносчик, вöлi гижöма, что Македон мöдö сотны райком... Ноко пуксям да баитам, правдасö и неправдасö лэбтам... Ме бы тэ ордö овны корся, свестя. Кöть неделя-мöд кежö.

— Овны? Ме эг на бöбмы да... И порог дорöдз ог лэдз! Тöв ньылат локтiн, тöв ньылат и ыскöвт! Меным тюромщиккес оз колö! И некинлö оз колö!

Гурьевна шырк пырис оградаö, ёрк вештiс ворота иган — эд пырö!

— Мда-а, — ыш ловзисис Македон да кышалiс юр вылас шляпасö. — Ме сiдз надейтчи сы вылö, а сiя — морт вийись пö... Вот сiдз, Лёва вонöй. Кыдз сказкаын: мун кытчö-некытчö, ов кытöнкö-некытöнкö — не му вылас, не кымöрас. Кöть и не ош ме, а некытчö менö оз примитö... Не городö, не деревняö. — И гажтöма юалiс Лёвалiсь: — Оз я адззись тэнат чаёк?

— Ырöш эм, йöв эм, а чай абу.

— Эм кö ырöш да йöв, дак и чайтöг позяс овны.

— Сэк мунам...

Македон сёйис жагöна, дыр, и Лёва эз тэрмöт сiйö. Адззис, что мортыс тшыг. И пиньтöм. А сэтчö жö — горттöм. Этасянь сылö старикыс жальжык лоис. И Лёва сы одзö ма доз сувтöтiс. Но Македон шуис:

— Масö ачыт сёй. А меным, ежели адззисяс, сетышт уль картов да лук.

— Адззисяс, — кöсйис Лёва. — Лöсьöт мешöктö. Сыбöрын Лёва кольлалiс стариксö прудок дорöдз, медбы иньдöтны мöдiк деревняö, кытöн овлöма Македонлöн тöдса. Но Лёва сьöртi петiс, что сэтчин сэтшöмыс абу.

— Сiя — кулöм деревня: керкуэс тыр, а не би, не радио абу. Ми походö ветлiм да узим сэтчин. Кык морт олöны.

— И ась. Ме, может, куимöт лоа.

Прудок дорас янсöтчисö, Лёва иньдöтчис гортас. Кынымкö оськöв бöрын видзöт керис старикыс ладорö — сiя некытöн эз тыдав. Волькыт места вылiсь öшис, дзик муыс сiйö ньылыштiс нето тури гусялiс.

«Эстöн мыйкö невежöртана...»

Дата добавления: 2015-11-16