Бöбöтчыны — не тöлöтчыны

Коми отирыс баитöны: бöбöтчыны — не тöлöтчыны, син оз ёгьясь. И Абач Петя сiдзжö думайтiс, да бöбöтчöмсянь шогö усис. А мыля пондiс шогавны, дак... Вайö-ко сьöрсьöн-бöрсьöн и висьтася, кыдз сэтшöмыс аркмис.

Абач Петя нето просто Абач — миян деревняись зоночка. Мыгöрнас сiя вöтö ни мамсö, кöть таво вуджис вöлись сизимöт классö. А мамыс сылöн Тагьяын, миян деревняын, инькаэс коласiсь медыджыт. Абачöн сiйö шуöны сысянь, что эта мортлöн юрсиыс са кодь сьöд, синнэс — сьöд сэтöр туссез, чужöмыс — горпöдан рöма — вот тэныт и сьöд абач.

Петялöн эта лунжугыс пондöтчис одз и умöля.

Кыдз только шыасис радио, Петяöс мамыс лэбтiс ольпасись, сюйыштiс киас бидон и тшöктiс мунны йöвла: гожумнас эд мöссэсö высьтöны чуть я не шондi петiкö. Сiдз кыдз зоночка синнэсö и чальнас эз гуддьышт, а нетолишто миссьыны, то посöдзас жö чужйисис кöмтöм кокнас и минута мымда чеччалiс пöв кок вылас. Но зубытыс сёравно эз чулав, и йöв ваялiсь кромликасьöмöн ветлiс йöвла да сiдз жö бертiс бöр.

И быдöс бы вöлi бур, кöбы не тупка.

Кöр Петя осьтiс ограда вороткасö, сы юр вевдöрöт кыш-паш лэбзис тупка. Зонка пырис да пöдналiс вороткасö, сувтöтiс бидонсö посöдзас и пондiс вöджжыны борда гöсьыс сьöрын. Да эз и казяв, кыдз пöрöтiс йöвсö.

Сэтчö петiс мамыс, и, конечно, лоис сiя, мый овлö этшöм случайез коста. А сэсся ковсис йöв пöрöтiсьлö эшö öтпыр кромликтыны соседыс ордö.

Кыкьямыс часö Тагшор дорын, кытöн кузь столб вылын павьялö гöрд флаг, пондiс орсны горн. Абач кышыштiс сивьяс рытсянь лöсьöтöм рюкзак, босьтiс киас кедаэз и котöрöн мунiс пионерскöй штабö.

Талун нылöн отряд мунö походö. Мунö сiя жö туй кузя, кытi вашöтiс Колчаклiсь бандаэсö Назукинлöн отряд.

Но Петяöс эз примитö дойдöм кокыс кузя. Мымда бы эз кеймись, мымда бы эз доказывайт, что сiя здоров, — нельки дойман кок вылас чеччалiс — эз босьтö и быдöс!

Дузгыльтчис зоночка и дыша, юрсö öшöтöмöн, мунiс пос дорö. Сэтчин, кыдз сiя думайтiс, öнi вуграсис Гавру дед, кöдалö позис висьтавны, кыдз сiйö öбидитiсö ёрттэс. И, конечно, кыйыштны сэтöн чери.

Сибöтчис Петя берег дорас, адззö: ю шöрас тульöтчö кытшöмкö зонка. Мый, жарыс ни кутiс сiйö? Али мöдö мыччавны, что сiя оз пов кöдзытсис?

Сунгисис зонка, дыр эз мыччись. Натьтö, уйö ва пытшкöт. А сiя петiс важ местас. Тыдалö, пыдöссö судзöтiс. Да мый сiйö не судзöтны — куим метр сэтöн пыдынаыс.

Ö, не! Сэтöн мыйкö мöдiк: купайтчисьыс сынсьö только öт кинас, а мöднас видзö мыйкö сьöдö да гöнаö. А мый — сьöкыт вежöртны. Поди, ваисьсö кутiс? Сiя пö, кыдз висьтасьö Шыргуника баб, как раз пос увдöрас олö.

— Эй, эз я тэныт кульыс шед?! — горöтiс Петя. Купайтчись эз шыась, а тэрмасьöмöн уйис береглань.

Но мый сiя кыскö сьöрас? Не я мортöс?

Чапкис котомасö, чеччöвтiс берег увтö, усис, тупыльтчöмöн лэдзчис ва дорöдз. А кöр чеччис, то казялiс: сы одзын моросви ваас сулалiс зонка и киэз вылас видзис нылочкаöс.

— Отсав жö, — негорöн корис сiя. — Мыдзи... Нюжöтчис Петя, мед кутны нылочкасö, но нильдiс и усис ваас. Кöдзытыс поткöтiс быдöс вывтырсö, нельки ловсö пöдтiс да кывсö кöрталiс — и ышнитны эз ешты.

— Чожжык, а то пöдас, — тэрмöтiс зонка и пуктiс нылочкасö берегас.

Петя петiс васис, турйöн-тарйöн кыскис сiйö ылöжык и думайтiс, кыдз колö ловзьöтны пöдöмсö. Отрядын висьтавлiсö эд, но сiя сы коста бумажнöй кайез керис и умöля кывзiс.

— Водтöтам эта кер вылö, — тшöктiс зонка. — Вот этадз, кыминь, — ачыс пондiс кокнитика нырны киэзнас нылочкалiсь спинасö. Петя жöдзис ордчöн, видзöтiс барöтöм синнэзнас зонка удж вылö и гегдiс-дрöжитiс.

Нылочка öмись шорокöн чепöссис гудыра ва, и сэк жö дрöгнитiсö сылöн пельпоннэс, кöстiсьыштiсö вöснитик кококкес и кöрчитчыштiс быдсöн вывтырыс. А эшö секунда-мöд бöртi нылочка пондiс сыркьявны.

— Ло-овзис, — радöн горöтчис зонка и пуксьöтiс нылочкасö кер вылас, ачыс пуксис ордчöн сыкöт да жмитыштiс бердас. Сэсся лöсьöтiс нылочкалiсь лэдзчисьöм юрсисö, вöлись юалiс: — Кыдз тэнö шуöны, кагу?

Нылочка сё сыркьялiс и эз шыась.

— Нюрка сiя, — висьталiс сэк Петя. — Мöдöрсис сiя.

— Тэ нуöт-ко сiйö гортас, а меным тэрмасьны колö.

— Кытчö?

— Ылö — тасянь оз тыдав.

— Но мун, ме нуöта.

— Да пым чайöн ась юкталасö, — пос вывсянь ни горöтiс зонка, велосипед вылö пуксикö.

Кöть и Нюркалö вöлись нёль год и сiя öддьöн винер, а Петя öдва кайöтiс сiйö берег увтсис и сразу водтöтiс лудок вылö.

Эстöн и адззисö нiйö походö мунiсь челядь и вуджöтiсö Нюркаöс гортас. А вуджтöнняс одзасьöмöн юасисö Петялiсь, кыдз сiя кыскис вöйисьсö ваись. И, конечно, «герой» висьтасис, кыдз сiя тигр моз уськöтчис пос вывсянь ва шöрö, кöр казялiс Нюркалiсь усьöмсö, висьтасис, кыдз адззис ва пыдöсiсь нылочкасö да петкöтiс берегö. Пионеррез мунiсö асланыс туй кузя. Нюркаöс бабыс юкталiс пым чайöн и водтöтiс гор вылö. Петя тожö юис пым чайсö да горш курöттöдз сёйис золотистöй ма и, стрась довольнöй, иньдöтчис гортас. Нельки чушкан чуньыс йылiсь вунöтiс.

Мунö Петя — нырсö вылына лэбтöма, — а сылö паныт детсадiсь челядь. Сувтöтiс тётя Клаша нiйö и шуö:

— Челядь, эта зоночкаыс — Петя.

— Абач сiя, не Петя, — триньгö вöснитик голосок.

— А ноко кывзö менö! — горöнжык ни баитö тётя Клаша. — Эта зоночкаыс — Петя. Сiя кыскис миянлiсь Нюраöс ваись. Кыдз бы не сiя, вöйис бы Нюра. Öнi Петялö сетасö медаль. А мийö висьталам сылö спасибо — раз, два, три...

— Спасибо! — öтдруг горöтiс детсад и чанöтiс деревня дорись ягсö.

Этасянь Петялö лоис эшö гажажык. И усис сылö тöдвылас, кыдз öтпыр школаын ошкисö Витяöс, кöда ю дорись адззис важ гырнич торрез да изовöй чер. Уна завидуйтiсö сылö. И Петя тожö, нельки эз баит кынымкö лун: эд сiя ачыс адззывлiс нiйö, нельки чужьявлiс, да эз босьтлы киас. А öнi вот ась сылö завидуйтöны: вöйись мортöс кыскыны — не изжуг школаö вайны... Газетаö сы йылiсь гижасö. Школаись директор, кöда размöд ни видлiс сiйö, öнi ошкыны пондас. Может, и фотографируйтасö.

Радувьяс Петя строк-строк чеччöвтыштiс коза моз, китöстiс петух голосöн, онняюрасис и мымдакö мунiс киэз вылас.

Пос шöрас сiя сувтчылiс, видзöтчис, кысянь буржык чеччöвтны ваö. Дзар керис улö — ого! — вылын тай! Лысьтас я чеччöвтны сiя эссянь? А ковсяс, дак и чеччöвтас.

Син вылас усис кольöм рюкзакыс, и зоночка босьтiс сiйö, шутнялöмöн мунiс гортас. Сэтöн сiйö видзчисисö ёрттэс — лöсьöтчöмась ягöдавны.

Петя чапкис рюкзаксö ворота одзö и мунiс челядькöт. Мöдiк лунö бы, натьтö, эз мун, а талун мунiс. Конечно, дозтöг. Не öктiсьны, а только сёйны.

Сэтшöм гажа талун сьöлöм вылас — кыдз не мунны!

Нiя ветлöтiсö расоккезöт да логгезöт, сёйисö озъягöд да гöрд сэтöр, кежалiсö анькытш йöрö. Ягын, вылын пожуммез увтын, дыркодь лыйсисö ньöввезiсь и вöлись рытъявнас бертiсö деревняö.

Гортас пырикö Петя казялiс рюкзаксö и тöдвылас бöра усис Нюрка. И вдруг сы юрö сидзис дума: а кыдз кывсяс сылöн бöбöтчöмыс тöдтöм зонкалö, кöда кыскис Нюркасö? Сэк мый шуасö сы йылiсь? Эта думасянь сiйö нельки жарö чапкис, и зоночка пырис чуланö да водiс узьны. Дыр куйлiс зэв куньöм синнэзöн, но ланьтны некыдз эз вермы — мешайтiс сярканлöн сярзьöм. Чеччис, кайис керку юр вылö и лэдзис сяркансö да бöра водiс. И кöть öнi нем ни эз мешайт сылö, а онмöссьыны тожö эз вермы.

Эх, дзугсис сылöн тöння планыс, быдöс мöднёж лоис. Этö Витя кузя эз босьтö сiйö походас. Сюйлö нырсö быдлаö. Доктор! Но, чужйисис Петя, дойдыштiс чуть певсö — и вир эз пет. То и зубытыс оз ни кыв, только пыктыштöм невночка. А сiя: велöтчы пö перво волькыт туй кузя ветлöтны, а вöлись походö корсьы. Но виноват разь Петя, шогмис кö сiдз?

А может, эстöн тупкажугыс быдсöн виноват? Поди, не весь пöрись Шыргуника баитлiс, что вöрын олiсь деревняö просто оз лок, а мыйкö умöльö сьöрас вайö?

— Ага, сiя, натьтö, сё эд картаас. Вот ме часöт перкья сылiсь бордтыввесö, — висьталiс Петя и кок чуннез вылас; мед не повзьöтны нёштöм кульöс, петiс чуланiсь и лэдзчис картаö. Сэтчин сiя нёджжöвтiс гидö, курöгвидзанö, смекайтiс крыша увтiсь — абу. Кайис сарайö и сразу казялiс: шатинка вылын, ордчöн короссезкöт, пукалiс тюгуй — ыджыт тупка.

— А-а, шедiн вöлись! — лöг серöмсорöн горöтiс Петя и чепöссис тупка дынö. Но сiя пуркнитiс медпемытiнас — мöдiк шатинка вылö. Зоночка босьтiс куран да мöдiс чувйыштны сiйöн веж синнэзас, но тупка бöра лэбзис важ местаас. Сэк Петя, кураннас öвтчöмöн, уськöтчис сы сьöрö. Тупка кинитчис улö и пуксис паськöм öшлан гез вылö. Гезыс бергöтчис — и тупка öшöтчис онняюрöн да лöньсис.

— Ух тэ! Тешитчыны мöдан ме вылын? Чöв, ме тэнö сакала, тэ он мун ме дынiсь! — Петя чапкис курансö, лэдзчис кряжись керöм лиснич кузя. — Шедан тэ меным, ёрдöм млекопитающöй! Видзöтам, парнокопытнöй тэ али не! Пондан тэ пукавны школаын öтлаын шкелеттэзкöт!

Тупка эз вöрзьöтчы, кöть и Петя вöлi ордчöн ни. Сэк зоночка сибöтчис эшö матöжык, нюжöтiс киэсö сы дынö, а паськыт син и юрсö эз бергöт. Сапырнитiс сiйö Петя борддэзöттяс — эз и вöрзьöтчы; кыскыштiс асланяс — эз лэдзчись. Сэк зоночка пондылiс мездöтны сылiсь гыжжесö гез бердiсь, но тожö нем эз пет.

— Коли сiдз, дак ме тэнö гезнас пырта! — лöгасис Петя и кутчис пöрччавны столб бердö домалöм гезсö. Летiс, летiс, а ладсö эз адззы — пемытöв ни лоис.

Осьтiс воротасö — лоис югытжык — и сэк вöлись пöрччалiс. Но кöр гезыс личалiс и лэдзчисис джоджас, тупка лэбтiсис коккез вылас, чеччöвтыштiс и шытöг уйыштiс воротаö.

Лёп мунiс кикокыс Петялöн — дзикöдз садьыс бырис, и сiя пуксис поспу вылö.

Эстiсь и адззис сiйö, мыдзöмöс да гажтöмöс, мамыс, кöр локтiс уджалансянь.

— Мый тэкöт, Петю? Он я шогав? — повзьöмöн юалiс сiя да пешлiс зоныслiсь кымöссö чорзьöм кинас. — Сiдз и эм: жар. Кынмалiн, натьтö, Нюркасö кыскикö.

— Ме эг...

— Висьталiсö ни меным. Молодец! Лок вод, ме лекарство сета, — и веськалан...

Мамыс и киськасис ни, и ужин лöсьöтiс да сёйис, и вельдыр ни узьö, а Петя сё куйлiс осьта синнэзöн да сьöкыта лолалiс. Öнi былись лэбтiсис жар и висис юрыс. Этасянь, натьтö, и вежмасисö син одзас то Витя, то Нюрка, то сылöн бабыс и нёштöма, векыша пиннезöн, сералiсö. И Петялö кажитчис, что нiя быдöнныс тöдöны ни сы бöбöтчöм йылiсь.

«А если висьтавны, что не ме кыски васис Нюркасö? — думайтö зоночка и пуксьö койка вылö. — А былись, мыля не висьтавны? Да, колö висьтавны. Ашын жö... Не ашын, а сейчас! Вон öтöрас сё эшö югыт. Мунны Нюркаэс ордö и быдöс висьтавны. Только вот юрö висьö».

Петя чеччис койка вылiсь, осьтiс öшынсö и казялiс, что сылöн некыт оз вись. И сэк сiя чожа пасьтасис да гусьöника петiс öшынöттяс...

Дата добавления: 2015-11-16