Куськось — Яшалöн козин

Кывсис, что Валентина Васильевналö таво тырö двадцать год, и мöдöдз «Б» классiсь велöтчиссез быдса неделя споритiсö, мый козьнавны велöтiсьныслö нимлун кежас. Нылочкаэс висьтавлiсö öтiкö, а зоночкаэс — мöдiкö, да медбöрын сiдз и керисö: öттэс босьтiсö гöрд туся чунькытш, а мöддэс — басöка серöтöм ручка.

А Мылякин Яша ассяняс шуис лöсьöтны мыйкö сэтшöмö, кöда медбура лöсялас Валентина Васильевналö. Сiя думайтiс сiдз: и чунькытш, и ручка — умöль козин. Сылö колö козьнавны мыйкö сэтшöмö, кытшöм некинлöн абу. Но мый, мый?

Дыр думайтiс Яша, неöтпыр пöрись бабыслiсь, тожö кöркöся велöтiсьлiсь, юавлiс, да бабыс сё öтнёж висьтавлiс:

— Валентина Васильевна — оригинальнöй морт, сiдзкö, сылö колö сетны оригинальнöй козин. Культмагын пуовöй тури эм, давай-ко небам. Сiя эд тiян рисуйтчö...

Оригинальнöй — эта лоö — мöдкодь, не сэтшöм, кыдз мöдiккез. Но пуовöй туриыс разь оригинальнöй козин? Культмагас нiя уна сулалöны, и нимлун кежö нiйö, небось, кинлöкö тожö козьнавлöны. Мыйкö бы мöдiкö...

Вот сэтшöм минутаö и адззисис мöдiкыс: Валентина Васильевна не только рисуйтчö, но сiя эшö и скульптор и сёйись да гипсiсь лякö-керö морттэзöс. Не просто морттэзöс, а коми богатыррезöс. Сэк, кöр Яша отсалiс велöтiсьыслö нöбöтны портфель и пыралiс сы ордö, адззылiс нiйö. Пызан вылын сулалöны. Медбы не вунöтны, киннэз нiя, Яша гижис нылiсь ниммесö аслас тетрадьö, и öнi адззис этö гижöмсö да лыддьöтiс: Кудым-Ош, Пера-богатырь, Юкси, Пукси, Чадз, Бач, Мичко, Бурмат, Антипа. Öкмыс богатырь, öкмыс кöркöся герой...

Валентина Васильевна сэк висьталiс, что эшö бы öтiкö колö, медбы десятоксö тыртны, да абу пö сiя.

«Эм, эм! — готов вöлi горöтны Мылякин, кöр сылö тöдвылас усис öтiк былина. — Дасöтыс лоас — Куськось!»

Что Куськось богатырь, Мылякин тöдiс бура. Но Валентина Васильевна (этö зоночкаыс тожö бура тöдiс) пондас быдторсö юавны: кытöн богатырьыс олöма, кытшöм подвиг керöма, а кысь этö босьтны, кöр Яша кывлiс сiйö Арсенич дедсянь, а старикыт эшö мöйму кулiс?

Локтiс Валентина Васильевналöн нимлуныс, и ыджыт переменаöн нылочкаэс сылö сетiсö букет, открытка да чунькытш, а зоночкаэс — ручка. Валентина Васильевна радувьяс ветлiс буфетö да вайис челядьыслö дона конфеткаэз. Яша конфеткасö карманас пуктiс да кöд коста челядьыс сёйöны и чöлöны, корсис:

— А меным позьö?

— Позьö, Яша, — тшöктiс Валентина Васильевна. — Мый висьталан?

— Тожö козьнала бы...

Быдöнныс бергöтчисö Мылякинлань, но сылöн киас нем эз вöв, и сы вылö пондiсö видзöтны кин лöгöн, кин сералöмöн.

— Ме тiянлö сета богатырьöс. Босьтöте: сiйö шуöны Куськось.

Челядьыс перво шай-пай лоисö, нем эз сет, а — босьтöте! Сэсся дзик ва киссис:

— Ай да и Мылякин!

— Козин дак козин!

— Может, эшö эмöсь? И миянлö сет!.. Валентина Васильевна öлiс челядьсö, висьталiс Яшалö спасибо да шуис:

— А ме сы йылiсь ог на тöд. Ноко висьтась, кин сiя сэтшöмыс. Кывзамö, челядь!

Бур, что зоночкаыт медбöрья луннэзас уськöтiс тöдвылас былинаыслiсь бöжсö, и сэтöн жö и висьтасис:

Уйö Ковыляй ыджыт пыжöн,

Öтка синнас береггесö чышкö,

Чышкö да шыннялö öм дорокнас.

Гажа, долыт сылö, срамлö:

Кыдз чулалас эта гожся ойыс,

Сылöн шайка локтас Сылпан дорö,

Розоритас, куштас сэтiсь карсö.

Но Куськось, кöр пыжжесö казялiс,

Кöр казялiс Ковыляйлiсь черсö,

Лэбтiс зык, тарлавны пондiс иззэз,

Медбы туйсö синтöмлiсь пöднавны,

Медбы ыджыт пыжжесö сувтöтны,

Медбы ваас отирсö пöрöтны.

И люкасис пöла сина антус

Аслас пыжöн медодзза жö изас,

Пыжыс потiс да кыминь кыминьтчис...

— Спасибо, Яша, — висьталiс Валентина Васильевна. — Öддьöн бур козин тэ меным сетан.

Тöвся каникуллэз коста, Мылякинлöн чужан лунö, Валентина Васильевна локтiс зоночка ордö.

— Но, Яша, сибалiс кад и меным вештiсьны тэкöт. Поздравляйта тэнö нимлунöн! — и бöра малыштiс зоночкалiсь кудриэсö, окыштiс рожабансö. — А эшö козьнала тэныт то этö, — Валентина Васильевна кыскис сумкасис бумагаö каттьöм козинсö, путшöтiс, и быдöнныс казялiсö сы киись басöк скульптурка: ю дорын, кытöн ваыс иззэз коласöт гыасьö-визывтö, сулалö ыджыт юра морт. Сiя чочком йöрнöса и лöз вешьяна, кузь юрсиыс тöв йылас павьялö. Йöрнöс соссэс пуджсьöмась сысянь, что юр вевдöрас сiя лэбтöма ыджыт из. Сьöкытсяняс бура чурдöмась кисойес да сивилёныс, коккес мöртчöмась муас. Юрсö, лöг синнэсö бергöтöма сэтчин, кöдöрсянь локтö враг. Чужöмыс сьöртi позьö тöдны, что богатырьыс оз лэдз грабителлесö аслас му вылö: часöт чапкас этö изсö — и туйыс пыжжес понда лоас игналöма...

— Кин эта тiян? — юалiс Яшалöн бабыс, и Валентина Васильевна гаж кылöн горöтчис:

— Сiя Куськось, коми богатырь.

— Эм сэтшöм нима богатырь? Кытiсь сiя?

— Былинаись, баба, — висьталiс Яша.

— А мыля нö пон нима? — гуддьö-юасьö старуха — Сiдз и тöд, что мыйкö соралiт... Может, висьтасян былинасö, Яша, а?

Яшалö мый, кöр тшöктöны? Висьтасис да шуис:

— Адззан öнi, что богатырь?

— Ог адззы тай. Ноко мыччав.

Яша лöгöнкодь ни, öддьöн горöн лыддьöтiс:

Но Куськось, кöр пыжжесö казялiс,

Кöр казялiс Ковыляйлiсь черсö,

Лэбтiс зык, тарлавны пондiс иззэз,

Медбы туйсö синтöмлiсь пöднавны...

— Вежöртiн вöлись, бабуля?

— Вежöртi, öддьöн бура вежöртi, что Куськось — не богатырь, а месталöн ним... Кынымись тэныт шувлi, Яша, что оз ков тэрмасьны. Не весь шуöны тай: «Тэрмасян — сорасян». А этшöм делоын оз туй сорасьны.

— А может, сётаки... — пондiс сувтны Яша дор Валентина Васильевна. — Местаыс разь вермас сувтöтны врагсö? И мый сiя лоö — Куськось?

— Сiя, дона Валентина Васильевна, лоö то мый: кузь кось, а öннямоз шуны кö — юын кузь порог. Эн на вöвлы Куськосяс?

― Эг.

— Гожумнас ветлы. И челядьсö нуöтлы. Матын сiя — Иньва вылын. Петукбродöн öнi шуöны.

— А ме чайтi... — гажтöма шуис Яша. — Извинитö.

— Эн тöжды, Яша, — шуис Валентина Васильевна. — Ась и порог, а образыс богатырскöй. Да и, адззан, менам сiя из кодь, порог кодь и эм — дзик васис лэбтiсьöма-быдмöма. Шуам сiйö Куськось-Из. На-ко, босьт.

Дата добавления: 2015-11-16