АСТЫРКИНЛÖН АР

Рассказ

Тöвся рытö, кöр машина чеччöтiс отирсö лесопункт контора одзö, Виктор Астыркинöс тшöктiсö пыравны парторг дынö. Сiя нёштöма нимкодялiс начальствосö, но гортас мунны эз лысьт ― кежис контораö.

Парторгыс дынö сразу эз пыр ― кежис бухгалтер дынö, пондiс юасьны сылiсь:

― Мыйлö корö, Рита?

― Колан, тыдалö, ― сьöкыта шаысис бухгалтерыс. ― Эн бы ков, дак корис разь?

― Эд тöдан, а он висьтав... Но и морт! ― лöгасис Астыркин да лöсьöтчис петны.

― Бур юöр висьталас ― мун.

― Бöбöтан ― берегитчы! ― рамжыка ни шуис Виктор. Мунiс парторг дынö ― нем кадсö öштыны.

Басни вöлi дженыт и веськыт, как раз сэтшöм, кытшöмö радейтö шоч кыла Астыркин.

― Тэныт сетам бригада, ― висьталiс парторг Геннадий Алексеевич Варанкин, кöр пуксьöтiс Викторöс аслас пызан дынö да вештiс сы ладорö сигаретаэз. Астыркин прокод радейтö гöснечсö, но сэтöн судзöтiс ассис, öзтiс, чöскыта кыскис тшынсö. Геннадий Алексеевич мöртiс рамыник синоккесö Астыркинлö мисьтöм, но волькыт чужöмас, тыдалö, мöдiс адззывны, кыдз вöрзьöтас сылöн юöрыс боёк вöр пöрöтiсьлiсь сьöлöмсö. Но Виктор и синлыснас эз вöрзьöт, бытьтö эз и кыв, мый сылö баитiсö, ― пукалiс тувдöм чужöма, тув сина, только тöвзьöм кымöссис, самöй рыжöй кудриэс увтiсь, пичкиссисö поснитик-поснитик ньылöм вотёккез. ― Мый тэ сэтчö шуан?

Шуны мыйкö сё ни колiс, но Виктор эз тэрмась. Сiя чапкис öлöдзсис ёгйöсь шапкасö да мазутöсь кеписсесö стул вылö, пöрччалiс телогрейка киззесö, юалiс герскöтчан голоснас:

― Виль бригада али кыдз?

― Вильыс абу. Аслатö кольччан.

― А Зоновыс?

― Мунö велöтчыны.

― Важын ни колiс, ― шовкйыштiс пидзöс кузяс долоньнас Виктор. И вöлi невежöртана, мыйлö радуйтчö мортыс: сылö, что мунö велöтчыны Зонов, али сылö, что оссьö вакансия?

И бöра сылöн эз вöрзьы не чужöмыс, не голосыс, только руд синкагаэс ровно бы чуть-чуть öзйыштiсö блед биокöн.

― Но, дак кыдз? ― тэрмöтiс Варанкин.

― Мый кыдз? Босьта! ― паськöтыштiс да лэбтыштiс киэсö Астыркин, бытьтö лöсьöтчис ни чукöртны кöсйöм бригадасö ас дынас.

Геннадий Алексеевич гажмис, нельки рöмсялiсö кельдöтöм рожабан йыввес. Сiя лöсьöтыштiс уна рöма галстуксö, веж сынанокöн сыныштiс вöснямöм и боккезсяняс пизьöсьмöмкодь юрсисö да перыта нюжöтiс учöтик кисö Астыркинлö.

― Поздравляйта тэнö! ― шуис сiя и бура зэгнитiс кисö, ― кыдз керöны кокнит сьöлöмсянь, кыдз керöны сэк, кöр надейтчöны мортыс вылö. ― Зонов туйö сетам мöдiк раскряжёвщикöс, а тэ сiдз и кольччан ― вöр пöрöтны... Ашын ме вовла тiянö, баитам вöлись.

Жаралöм и радмöм Виктор сапырнитiс кепись-шапкасö да корзьöм вешьяннас оча кок шаркöтöмöн петiс коридорö. Эстöн сiя не тэрмасьöмöн шапкаасис, сэсся лэдзчис крут лиснич кузя улö, паськыт ыбöсöн петiс öтöрö.

Мунiс кизясьтöг, чатырöнмоз, топ эз и кыскав лунтыр лым столаэз кузя электропиласö.

Вот эд кыдз гажыс мортсö бордалö да вынсьöтö!

Пöрöтны вöр ― Викторлöн судьба. Сiдз сiя не öтпыр ни гортас и йöзас баитлiс. Таво медбöрья месяццесö, правда, сылö мешайтiс Зонов ― не сы сьöртi, адззан, кöззэс водны пондiсö, и поснитыс уна чеглассис. Эта кузя Виктор думайтлiс ни корсьыны мöдiк бригадаö, но сё мыйкö норовитчис, сё видзчисис мыйкö. Но вот Зонов эз ло и некытшöм конфликт оз ло: позяс важмоз пöрласьны, сiдз кыдз мастер нем оз шу ― ветлöтö сыкöт öтiк туй кузя да и часто Астыркинкöт öтiк дозйись пичкö.

Бытшöм случай вот öнi сыкöт юыштны, да кысь часöт винасö адззан? Эм, натьтö, Тоськалöн, да öнтай лöгувьяс Виктор сiйö ылööв иньдiс ― öнi сэтчинiсь нывкатö чожа он бергöт ― лун-мöдсö ковсяс видзчисьны. Вот эшö сыкöт морокаыс лоас ― мывкыднас Зоновысся абу буржык. Зудъяжык эшö.

Тоська Викторлö не чужöй ― иньыслöн сой, или, кыдз пöрись отирыс шуöны ― свестя. Сiя жöник сайö эз на ешты петны и олö öтнас. Олö гажöн да горöн ― стрась любитö сьывны да йöктыны. Сытöг посёлокас оз чулав öтiк нимлун, öтiк каша, öтiк свадьба. Сiя сьылö комиöн, рочöн, татара да украинса моз, а танеццесö кужö йöктыны, натьтö, не öтiк дас отирлiсь. Эта йöктöм кузя Тоська мöйму кык месяц олiс Усть-Качка курорт вылын, кытöн бытшöма велöтöны йöктыны, а кöр бертiс Чойдор посёлокö, то клубас осьтiс йöктан кружок.

Талун Виктор пырис гортас нач мöдiк мортöн: гажöн окыштiс нылоксö, босьтлiс киас зоночкасö и нельки вöзйисис иньыслö вайны ва. Луиза, иньыс, мöдiс ни юавны, кытöн сiя ештiс нимыштны голюксö, но жöникыс одзалiс горöтчыны:

― Корлiсö менö парторг дынö, ― висьталiс и сьöкыта пуксис стул вылö.

― И тшöктiсö партияö пырны? ― перыта шыасис иньыс. ― А тэ, конечно, бöра ассит: «Одзöв меным, колö норовитчыны». ― Луиза иньдöтiс челядьсö асланыс жырö орсны, пуксис жöникыскöт паныт. ― Сiдз эд вöлi? Только сэтчö колiс содтыны: «Винасö кöть эшö öтiк вагон юа да вöлись...» ― И жалейтöмöн содтiс: ― Ох, Витя, Витя! Тэныт эд двадцать шесть тырис... Оланыт овсьö ни, а кöр нö мортас пöран?

― Тэ мозöн ме часöт абу морт? А кыдз партияас пыра, дак ашынас жö ― и морт?.. Челядь тэ эшö, Луиза, не весь нылыткöт аканнезнас орсан.

Иньыс старайтчис и эта бöрын эшö öтпыр тюкнитны жöниксö нырнас оланiсь фактö, примерö, кöдна сылöн заптöмöсь, пожалуй, быд случай понда, кыдз быд преступник понда кодексын статьяэз.

Колö висьтавны, что Луиза эттшöмыс лоис неважын ― Виль годсянь, кöр пондiс получайтны да лыддьöтны журналлэз.

― Вон соседыт, видзöт, кыдз олö: оз ю, оз вышитчы, керку аслыс сувтöтiс, машина небис. ― Этö Луиза баитiс Валька Юсев йылiсь. ― А кысянь пондöтчис? Кöр партийнöйöн лоис! И уджалö не умöльжыка тэсся, и техникумö велöтчыны пырис...

Кывзöв-керис Виктор да кыдз бы казявтöг висьтыштiс:

― Бригадир ме ашынсянь...

― Кытшöм бригадир? ― барöтiс ыджыт югыт синнэсö Луиза да пондiс видзчисьны ответ.

Жöникыс висьтасис, мый сылö баитiс Варанкин. Луиза кывзiс да думайтiс: «Вот эта как раз сiя, мый колö Витяыслö. Геннадий Васильевич сiйö мортö пöртас».

Сэсся Луиза отсалiс ашыння бригадирлö чöвтчыны и пöрччасьны, умывальникö кисьтiс шоныт ва и сетiс чöскыт дука матег. И ужинсö сiя лöсьöтiс праздникся кодьö: и маринуйтöм рыжык вайис, и селянка сковородатыр пöжалiс, нельки джоджулiсь петкöтiс антоновскöй яблоккез, кöднö Тоська сойыс вайис челядёкыс понда городiсь. Мöдiс и шампанскöйö петкöтны, но чожа Виль год, и чередь я сэсся, ежели юны этö, чожа адззан эттшöм добрöй винасö. А Виль годсö нiя любитöны пантавны шампанскöйöн.

Пöтöса ужин да бура воöм быгья квас вашöтiсö мыдзнысö да содтiсö гаж, и Луиза мымдакö триньгис гитараöн. И песняок сьылыштiс. Джын голоснас только. Горöна сьылас сэк, кöр Виктор лоас бригадирöн.

Сёйöм бöрын Астыркин мунiс узьлан комнатаас да босьтiс журнал и пöрöтчис кровать вылö, медбы лыддьöтны статья, кöдö тшöктiс Валька Юсев.

Öшын увтас норöн сьылiсö проводдэз. Нылöн ойся песняыс мылякö прокод дзуглiс сылiсь уджсö и нуöтлiс думаэсö мöдöрö. Частожык нуöтлiс сiя кадö, кöр сiйö, некывзiсь зонкаöс ― бöбкульöс ― мачехаыс бура сырйылiс мыйöн шедас. Эта понда Витька пыр керлiс, мый тшöктасö, набазуль, малодело, а то и совсем эз керлывлы. Зато öддьöн бытшöма кужлiс орсны картiэзöн, пыравлыны чужöй йöррезö, а мукöдпыр и йöз карманнэзö, мый понда ёна дöнзьывлiс айыссянь.

Мöдöдз страница вылас Астыркин ланьтiс.

Виль годся медодзза неделя чулалiс сiдз жö тэрмасьöмын да мырсьöмын, кыдз и быдöс мöймуся неделяэс. А субботаас, неделялöн медбöрья лунас, кöр отирыс пуксьыштiсö би дорö ― кин куритыштны, кин шоччисьыштны, а Тоська ― нимыштны конфета, ― Марзия, ув суййиссес коласын медпöрись инька, вöрзьöтiс бипурсö да горöтчис:

― Миянö гöсь вовлiс и шуис: «Весляна дорын уджавны бур, Весляна дорын деньга шедтыны бур». А миян мыля деньга шедтыны умöль? Марзия мунö пемыт, локтö пемыт, лунтыр черсö киись оз чапкыв, а касса сылö месяц понда сто семь руб сетö. Мыля, бригадир?

Быдöнныс, кин пукалiс да сулалiс би дынас (эстöн эз вöв öтнас тракторист), тöдiсö ни, мыля етша локтö деньга и не быдпырся сетöны премия: öткö, вöрыс посни да шоч; мöдкö, часто жугавлö трактор, и бригада олö весь; куимöткö, ОРС магазиннэзын некöр оз быравлы вина, и мужиккеслöн часто висьлöны юррезныс.

― Деньга лоас, Марзия, ― крапкис-висьталiс Астыркин. ― Лоас, кыдз вöрын голи. Эна луннэзö миянлö сетасö виль делянка, виль трактор, виль пила. Колö, дак и виль чер тэныт сетасö, Марзия. Только ковсяс босьтны ыджытжык обязательство да тыртны сiйö. Кужам кö сiдз гöрöдавны, дак квартальнöй план тыртамö и ыджыт деньга курмыштам.

― Кытчö нö сымдасö воштан? ― гуддьыштiс бригадирсö Валька Юсев, рамыник и осторожнöй морт.

― Менам капроннэзö пондам сюйны, Валька... Не öтiк гоз валяйтчöны, ― голоснас орсöмöн баитiс Тоська. ― Öтiкö тыртам ― и холодильникö, кыдз кынтöм хексö жö, мöдiкö тыртам — холодильникö...

― Дугды жö, векошка öм! Кывзы, мый баитöны, ― видiс сойсö Луиза.

― Сiдз, Луиза, ― отсалiс сылö Валька, ― делоыс серьёзной. ― И юалiс Астыркинлiсь: ― Ударнöй бригада миянiсь керöны бы, Виктор?

― Мöдöны. Долггезсиным эд кыдзкö колö петны.

― Да-а, делоыс серьёзной, ― бöра шуис Валька. ― Ыджытö я обязательствосö мöдан босьтны?

― Быд лунö ― норма да джын керны.

― Охо!..

― А унажык оз позь? ― дузiсö мужиккес. Но Астыркин эз и кыв нылiсь серöмнысö, висьталiс:

― Ковсяс, тыдалö, уджавны и выходнöйезöн.

― Сi-идз, ― мыйкö бергöтлiс юрас Валька. ― Уджавны выходнöйесö, а сiя лунö керöмсö содтыны мöд луннэс дынö?

― А кыдз инö? Сэк и процент ыджытжык лоас, и премия содас.

― А кöдна кубиккесö да руббесö лыддьöны, оз крюкыштö? ― сё юасис Валька.

― Быдöс панöм-кыйöм: нылö ― бур слава, миянлö ― деньга, ― боёка янсöтiс доходдэсö Астыркин. Тöдчис, что сiя этö не ачыс думайтiс, а висьталiс кинлiськö баитöм басни. ― Вот сiдз, Марзия: миянлö ― деньга. Вежöртiн?

― Нылö ― тожö деньга локтас, ― шуис Марзия да чеччис. ― Кос сайкалiс ― шонтны колö; чер гажтöмтчис ― тюк-тюк керны колö... Раз босьтiм обязательство ― деньга лоас ― кыдз голи...

Этöн оланнас Марзия горшви пöт ― не то что Тоська, кöда кокнит борда бабылок моз бырьялö оланас и оз тöд уна челядя мамлiсь сьöлöм висянсö, оз тöд юись мужиккезлiсь код фокуссэзнысö, оз тöд гор дорын да öр дынын бергалöмсö. А лоас я кöркö пöт деньганас?

Шоччисьöм бöрсяняс, а может, и дзирыт баснисяняс, лöгжыка пондiс сьывны пила, зубытжыка öдззисö керасьны черрез, öддьöнжык кутчисö ризьöтны да водiканыс уксыны пуэз. А вот тыра трактор сё сiдз жö кыссис не тэрмасьöмöн, дзик кузь бöжа гöнагаг, да лёка прыскайтöмöн нöитiс гусеницаэзнас чашьяа да уввезсора лымсö, кöдö бöрсяняс волькöтiсö кузь ньыввезлöн, кöззэзлöн да кыдззезлöн дыннэз.

Трактористыс абу том и важын ни уджалö вöрас, но мыйкö не письтiсь. Ветлöтö жагвыв, бытьтö нюкайтчöмöн, и сiдз жö вашöтлö машинасö. Видас сiйö бригадир: «Маласян, кыдз Малань бабö! Этадз тэ тшыгйöн миянöс виян!» ― и кынымкö час тракторыс чепсасьö, дзик том вöв, а сэсся бöра чинö öдыс, и сiя вöрöтчö, топ лёль.

Мöд неделя вылас пö локтас виль тракторист, а невна сёрöнжык ― виль трактор. Этадз парткомын висьталiсö. Сэк Астыркинлöн том гвардия пондас босьтны победа бöрсянь виль победа. Этö сiя тöдiс, этö сiя вывтырнас кылiс. Сiя лыддис, что олансö керö деньга, мортсö кок йылö сувтöтö деньга, уджсö тэрмöтö ― только деньга. И кыным унажык пондас локны деньга, сыным перытжыка пондас уджавны отир, сiдз кыдз мортыс деньганас оз вермы пöтны.

Кыдзкö Марзия горöтчис:

― Умöля уджавны ― умöль мортöн лоны, ассит бригада не радейтны.

Кыдз уна тöдiсь, кыдз ыджыт начальник Астыркин поткöтiс-висьталiс:

― Мортсö бурöн деньга керö, Марзия. Эшö Пушкин висьталiс, что морт вермас бöбöтны тэнö, а копейка ― некöр! Копейка, учöтик копейка, пыр вернöй ёрт тэныт!

― Сiдз Чичиков шуис, сiдз умöль морт шуис, ― веськöтiс ассис бригадирсö Марзия, а ― не Пушкин.

― А кöть кин ― вöлi бы висьталöм правильнöя, ― орöтiс баснисö Астыркин да бергöтчис Марзия дынiсь. И Марзия сэсся шы эз сет.

Но не быдöнныс эта пиньтöм инька кодьöсь. Мукöдыс вермасö и крюкавны. А медодз ― Тоська, Викторлöн свестяыс. Тожö бур асныр. Сысянь берсясö позьö видзчисьны: и парткомö вермас жалуйтчыны, и прогул керас, и вина юöм понда кöритас.

Вижжитö пила, сёйö узян пуыслiсь коксö, гуддьö сьöлöмсö. Дрöгнитас пуыс, дзик суныштас, сувтсöн и пондö усьны, а сэсся клобысь водас-нюжöтчас. Лöньсьыштас вöрыс, кöр пилаыс дугдас уджавны, и сэк ыджыт кырныш сыркйöвтас-бöрдчас пöрöтöм кöзыс понда, и китш-котш серöмтчас тараторка-катша.

Кылö и оз кыв энö шыэсö Астыркин. Сiя тэрмасьö мöдiк пу дынö, медбы и сiйö чожжык водтöтны ордчöн одззаыскöт. А юрас кругöн ветлö дума удж йылiсь, дума аслас ёрттэз йылiсь. Вот Валька Юсев. Коммунист сiя, сознательнöй морт, но öддьöнöв законнэз сьöрын видзöтлö. Мыйкö оз понды гленитчыны сылö ― и дзугас Викторлiсь планнэсö. Диво кутö, мыля сiя талун шы эз сет выходнöйся удж понда. Зоновкöт лыддисьöв-керис бы. Али мöдö вежöртчыны? Не талун, дак ашын вежöртчас ― оланыс велöтас. Коммунистыс эд тожö нянь сёйö и не пыр öтiк ва вылын олö ― деньгаыс и сылö колö.

Вöркерассö казявтöг каттис рытся пемыт. Астыркин сэк жö, кыдз только пöрис ыджыт кöз, волькыт да веськыт, выключитiс пиласö да пуксьыштiс пöрöтöм пу вылас. Пила горыс сё эшö олiс пеллезын, сё эшö небурика, чуть тöдчöмöн, дрöжитiсö киэз. И пизисö позялöм кок пыдöссэз.

Личöтiс каскалiсь кöвсö, нюжöтчис. Бур, долыт!

А волок дорас горöтлiсö инькаэз да жексöмöн пиксiс гудок ― нiя тшöктiсö отирсö чожжык петны вöрсис. Тоська, натьтö, пукалö ни кабинаын и планируйтö, кинкöт да кыдз пондас йöктыны рытнас клубын.

― Уджалiм эд, видзöт, ― челядь кодь сöстöм голосöн радуйтчис Астыркинлöн отсасись Перин, кöдö, дженытик да чукыля кока мортöс, чойдоринскöй шутниккес шуöмась Пера-богатырьöн. ― Кык норма лоас.

Нiйö видзчисисö, и Виктор чеччис, малыштiс каньлöн кодь шочыник усоккесö, эшö öтпыр нёджжöвтiс талуння пöрöтöмсö, надза горöтчис:

― Кык не кык, а жекйим даки... Ноко, дзимляв пиласö да мунам.

Дозирайтны бригадир сьöрын Перин любитiс. Сiя кокнита лэбтiс пиласö пельпон вылас да нöбöтiс складö.

Первуись Астыркинöс кыдз бытшöм бригадирöс бура ошкисö да премируйтiсö Советскöй Армия лун панытö. И ошкисö не весь: бригада кык месяцнас тыртiс нёль месяцся план. Эттшöмыс леспромхозас эз на вöвлы.

Виль костюма, чочком йöрнöса, кöдалiсь воротсö зэв видзис розовöй рöма галстук, Виктор югьялiс, дзик горадзуль. Сiя пукалiс сцена вылiсь пызан сайын, самöй шöрас ― тожö первуись, ― и кывзiс доклад. Кывзiс да шыннялiс Луизалö, Тоськалö, Марзиялö, а кöр пантасьлiс синнэзнас Перинкöт да Грицкокöт, смуглöй сина трактористкöт, гажöн мигайтiс нылö. Быдöнныс вöлiсö радöсь, лöньöсь, небзьöм сьöлöмаöсь, только öтнас Марзия орöттöг дзарьялiс бöрас ― видзöтлiс ассис Гамирсö, ― и вöлi тöждiсян чужöма.

Эз радуйтчы и Валька Юсев, дзик мыйöнкö недовольнöй вöлi.

А мыйöн бы? Сiйö тожö ошкисö ― и дёка уджалiсь, и рационализатор, и томмеслö быднёж отсалö пö. И деньгаöн оз обижайтö. Керку отсалiсö сылö сувтöтны, путёвка Болгарияö сетлiсö. Мый эшö вöр шöрын олiсьлö колö?

Ашынас вöрö пыртöн эз вöв Перин. Астрыкин казялiс этö и ачыс мунiс саймöтны сiйö. И саймöтiс, но чеччöтны ольпасись эз вермы. Сiдз и кольччис мужичокыт гортас, нельки иньыс козоноккезiсь, кöдналiсь бура ни тöдiс кöрсö, эз повзьы. Бригадир бура пидзралiс лудан кулаккесö, но эз вачкы, а только бытшöма кресталiс винасянь кольмöм мортсö меднятьöсь кыввезöн да кöсйис мырддьыны премия.

Лöг, дзик зуралöм пон, Астыркин пукалiс машина кузовын, бытьтö чужöй, и видiс думанас ассис отсасисьсö. Видiс сэтчöдз, кытчöдз нырокын бокас эз чувйышт зыр ороп да эз уськöт тöдвылас öтiк гажа басни. Этö баснисö, шуöны, баитöма богатырикаыс ачыс.

Ветласö богатырь гозъя гöститны и локтасö гортаныс, кыдз и овлö, шоныткодьöсь. Водасö узьны, мужикыт сразу ланьтас. А инькаытлöн абу оныс, гажтöм сылö. Саймас Перин, юалö: «Мый, хоккей пондöтчö?» ― «Кытшöм хоккей, ойшöр ни чулалiс». ― «Дак мый нö чувйисян?» ― öбидитчас мужикыт да бöра онмöссяс.

Бергалас, бергалас богатырика и мöдпырись бирскас жöникыс бокö. «Мый, вöрö ни колö пырны?» ― юалö Перин. «Кытшöм вöрö эта одза?» ― «Дак мый нö тэныт колö?» ― «Мужикöс колö». «Кысь ме сiйö ойнас адзза?»

Вöрас пырисö дзар югытöн и вель дыр лöсьöтчисö. Виктор тэрмöтiс отирсö, а нiя жагвыв кыскалiсö черрез, зыррез, пилаэз да касьтылiсö тöння рытсö. Бригадир видзсис, видзсис да öдззис горöтлыны. Тоська нимкодялiс сiйö Асныркинöн, öддьöн кужöмöн нерис сылiсь видчöмсö да вöлись мунiс суййисьны.

Может, этасянь, а может, мыйсянькö мöдiксянь Викторлöн паджсис уджыс. Сiя талун быдöс керис не сiдз, кыдз колiс бы, и сё тэрмасис, тэрмасис, тэрмасис. Пöрласьны öтнаслö вöлi сьöкыт, но отсасисьöс эз босьт. И вот ыджыт кöз пöрöттöн пиласö сибдöтiс. Охота не охота, но ковсис кытсöвтны Валькаöс. Сыбöрын жалейтiс, что сiйö, а не мöдiкöс корис.

Кöр мезмис пила и усис кок йывсис пуыс, Валька сэтöн жö и чарöтiс-висьталiс:

― Тшыкöтö тэнö ошкöмыс, Витька. Кыдз одзлань уджавнытö мöдан? А эд ыджы-ыт дело пондöтiн ― вештыны лесопунктлiсь долггесö да лэбтыны сылiсь авторитет.

― Ме разь не сiдз кера? ― Астыркин чапкис каскасö, тэчис пу вылас кеписсесö, пуксис ны вылö.

― Не сiдз. ― Валька пуксис ордчöн и пондiс пыркöтны пельпоннэс вылiсь лыс ёгсö. ― Эттшöм уджöн мийö босьтам умöль слава... Да, нёштöм слава. Разь позьö этадз пöрлавны, Витька?

Астыркинлöн гыркыс лэдзчисис: «А ме чайтi ― мöдкодь лоис...» Сiя мöдiс иньдыны Валькасö дынсис ылöжык и сэсся не öштыны весись кадсö, но только сьöвзис кок увтас да то ли сьöкыта ловзисис, то ли небурика ружтыштiс, вöлись кешитчöмöн шуис:

― Велöтiсьö бы пуксян? Но, но... Пондыв...

Сё сiдз жö рамыника, кыдз ёрт ёртлö, Валька баитiс:

― Тэ, Витька, уна тöдан, и эта ― бур. Бур ас пондасит, бур миян понда, бур лесопунктыс понда. Но эн думайт, что быдöс ни тöдан и что оз ков тэныт велöтчыны.

― Тöда сымда, мымда меным колö. Но не етшажык, натьтö, вон энася, ― Виктор мыччалiс юрнас бöрланяс, кытöн уджалiс Ташкиновлöн бригадаыс.

― А тэ ветлы да видзöт, кыдз нiя уджалöны...

― Видзöттöг тöдам, ― öвтыштiс кинас Астыркин. ― Этö тэ каждöй бöж увтö ныртö сюйыштны готов, а ме мöдкодь.

― Сэк ньöр тэныт, Витька, колö. Пöжöмö, кытшöмöн деддэзным некывзiссесö велöтiсö, ― пöжöмö, мед зубытжыка дöнзис! Мийö эд быдöс ловьясö масьтамö, а Ташкиновыслöн поснитыс семьдесят процент дзонь кольччö. Семьдесят!

― Тэнö, Валька, нинкöмын, видно, пöжöмась, ― серöмтчис Виктор. ― Тайгасö нем жалейтны ― миян век кежö тырмас сiя, а кинлö оз ― синтетикаись пондасö керны.

― Тэ моз уджавны, дак и синтетикаыс оз ло. Эд сiя, уна тöдiсь, му бердас жö видзсьö, му бердсис пельдö, ― дзирытжыка ни пондiс баитны Валька. А Виктор лоис спокойнöйжык, баитiс одзлань ровнöя:

― Меным висьталiсö: кыдз кужан, сiдз и кер, только сет сто пятьдесят процент. Ме сета ― двести! Сидзис юрат?

― А тэныт öнöдз эз сидз, мый обязательствоаным гижимö?

― Ог тöд и абу охота тöдны, ― вдруг бöра лöгöн висьталiс Астыркин да чеччис и сюйис киас кеписсез. ― А ежели тэныт гленитчö Ташкиновыслöн бригадаыс, дак ме тэнö ог видз. Сылö как раз тэ кодь законниккес и колöны. ― И включитiс пила. Сьöд вöрлiсь негора шушкöмсö вевттис моторлöн урган шы.

Юсев зэг-зэг керис юрнас да мунiс аслас местаö. Астыркин кольлалiс сiйö лöг нёджжöлöн, думайтiс: «Эта оз ло мöдкодьыс, оз».

Пила орсiс, пила горöн сьылiс. Сылöн пиннес сьöкыта, ныжа мöртчисö кын пуö, нильдалiсö, но сёжö жагвыв зыртiсö галя чорыта мяндачсö, писькöтчисö небыт сьöлöмöсö. И сэк вöлись Виктор тшöктiс пиласö сьывны мöднёж, и пилаыс пондöтiс сöстöм голоса кокнит песня. Эта песняö мастер пуктылiс быдöс ассис вынсö, кужöмсö, пуктылiс джын сьöлöмсö.

Радъялiс эта коста пилаыс! Радъялiс и Астыркин, кыдз радъялö аслас поз дорын саридз сайись бертöм сьöдкай. Но пöрис пуыс, и мортытлö бöра гажтöм лоис: тöдвылас усис Перин. Виктор мöдiс ни сiйö сувтöтны приятеллез лёдзö, ― и нате вот! Эд кытшöм надёжнöй вöлi ― дзик пон, а тöн, кöр собраннё бöрсяняс юыштiс, паныт лельгыны пондылiс. Бригадирлö паныт!

Сiдз сiя и эм: йöз сьöлöмыс ― дзиб вöр.

Чинö, чинö приятеллеслöн лёдзыс. И Валька янсöтчö сы дынiсь... Нельки Луиза, кöда арсяняс топ ем сьöрын сунис, сы гöгöр котрасис, öнi тожö беринясьны пондiс. И сё мораль лыддьöтö: «Тэ отирыскöт не сiдз баитан, тэ книгаэз он лыддьöт, тэ соревнованнё йылiсь он думайт...»

Он думайт пö!

Оз баит сы йылiсь, а думайтö уна. Пыр думайтö, нельки ойнас, кöр Перин кодьöммес садьтöг узьöны. Думайтö сы йылiсь, медбы лоис премия, медбы Марзия шедтiс уна деньга и небис ыджытжык телевизор. Эта понда колö пöрöтны унажык вöр. Пöрöтны, пöрöтны и пöрöтны.

Пöрöтны кыдз шедас, кыдз чожажык ― вот сылöн, Астыркинлöн, лозунг.

Главнöйыс ― не метод, а результат.

И пила бöра пондiс сьывны сьöлöм бурмöтан песня.

Виктор Астыркин вöтасис умöль вöт: повариха эз понды сiйö вердны öтлаын мöдiккескöт, а чöвтiс шыдсö пон дозö. Бригадир пондылiс матькыны, но повариха сапырнитiс сiйö кузь юрсиöттяс, кыскис öтöрö, сунгис нырöмнас пон бекöрö: «Виргы, кытчöдз поныс абу!» Виктор пидзыртiс ошлопаннэсö да бöр чепöссис столовöйö, но сылiсь туйсö игналiсö Тоська, Марзия, Валька и Перин. Нельки Луиза, роднöй иньыс, топ-топ тальччис кокнас да мыччалiс чуньнас ыбöс сайö. И Виктор шымырöн-шымырöн мунiс пон доз дынö. Но сэтчö сибöтчис тигр ыжда сьöд пон и сöтiс лапанас Викторыс чужöм кузя. Не сымда зубытсянь, мымда позорсянь мужикыт унньöвтiс лёкгоршöн и саймис.

Куйлiс минута-мöд и эз тöд, мый керны. Эз тöд сысянь, что юрыс вöлi дзик пустöй куд, кöдаын и бустор абу.

― Луиза! ― негорöн кытсöвтiс иньсö.

Иньыс эз шыась, и Виктор ёркöтыштiс стенаас ― корис Тоськаöс, кöда олiс ордчöн.

Кыдз и пыр, Тоська йöктан походкаöн пырис зятьыс дынö. Сiя вöлi шоныт спортивнöй костюма и сапога, но чышьянтöм.

― Мый, бригадир, кунганыт потласьö? ― басöк, вöснит голосöн юалiс Тоська. ― Верма симöтавны, медбы эз торьясь, сiдз кыдз талун ― не уджавны.

Юрыс Викторлöн немымда эз вись, но сылö вдруг охота лоис юыштны.

― Вай мерзавчик...

Кык минута бöртi, кöр Виктор чеччис да ештiс ни малыштны синнэсö, Тоська вайис четушка вина да сола ниндуллез.

― На жö, дона зятёк, бригадир миян бытшöм, веськöтчы чожжык, ― тараторитiс Тоська. ― Да эн вунöт, кин добросö тэныт керö...

― Тэ мый бöра? ― юис да вöлись юалiс Астыркин.

― А отгул эта четушка понда сетан. Мöд субботаас свадьба вылö корöны.

― Дак сысянь и колiс пондöтчыны, кульпиян... Тöдi бы ― некöр эг ю.

Не первуись Виктор юö готовöй босьтöмсö. Может, и недолыт жö мукöдпырсяс, но кöритны некин оз кöрит. Только эд долгсö прокод вештöны... И Виктор вештiс. Вештiс, кыдз шедас: öтiкöс ― донтiс, мöдiкöс ― шонтiс, куимöтöс ― весöтiс. А Тоська четушкаэсö вежлiс уджалан луннэз вылö.

― Луизаыс кытчö нö мунiс? ― юалiс Виктор.

― Гаражö кайис. Тшакьявны лöсьöтчам, дак машина колö. Ме мунi...

Тöн сетiсö премия, и Виктор «гывйыштiс» сiйö. И пондылiс ошшасьны аслас бур уджöн, аслас славаöн и эшö öтi-мöдiкöн. А Тоська да Луиза сiйö сувтöтiсö, эз лэдзö досповна баитны. Адззан тэ, мый нылö колö: гажа олöм, честнöй удж, бур семья. И оз пö ков гора слава, оз колö орденнэз, оз ков ыджыт деньга. Марзия, кöда рытйис Астыркиннэс ордын, нельки кутчылiс стыдитны кык сойöс: «Кыдз жö этö деньга оз ков, кыдз этö орден оз ков? Мый понда нö уджаламö, мый понда лымын гöгви броддямö, мый понда здоровье öштамö?»

Деньга ― этö Виктор бура тöдö ― колö быдöнныслö. И Луизалö колö.

А ― славаыс?

Гора славаыс, кöдасянь мортыслöн борддэз быдмöны, кöдасянь уджын мыла содö ― неужели оз ков?

Бертiс Луиза. Викторлö, кöда бытшкалiс бекöр пыдöсiсь пазалöм сола тшаккез, висьталiс:

― Колхозö иньдöны талун. Ме челядьсö соседдэс ордö коли... Давай лöсьöтчы. ― И сэтöн сiя казялiс, что жöникыс ештöма веськöтны висян юрсö, и лöгöн камгис кулакнас сойыс жырö.

Сэк жö, ровно ыбöс дорас и сулалöма, чывк пырис Тоська.

― Бöра пондiн? ― не öддьöн лöга юалiс Луиза.

― Тэнат тожö висьö, союшко?

― Эн вежмась, Тоська!

― Дак мыйлö нö стенасö кисьтан? Сiдз только вина корöны.

― Дыр я эшö пондан?

― Кытчöдз отгуллэз пондас сетавны. Локтан субботаö свадьба вылö корöны, вот и старайтча.

― Но и руч! ― орöтчис сёян бердсис Астыркин. ― эныт бы кольöм векас колiс чужны. А веськыта кö шуны, эта лоö: мортыс мортыслö ― ёрт...

― Вот, вот! ― чикнялiс-шыннялiс Тоська. ― Кöбы не ме ― кулiн бы винатöг, менам дона ёрт, менам бытшöм бригадир...

Вöлi бы Луиза местын мöдiк хозяйка, дак рез-паз видчис бы да и вашöтiс син одзсис этшöм кузь кыла мортсö. Но Луизалöн характерыс учöтик да небытик, дзик надз стряпкалöн тупöсёк.

― Но ладно, мунамöте, ― только и шуис сiя. ― Видзчисьöны, натьтö.

― Картошка гарйыны? ― юалiс Виктор и висьталiс: ― Ме даки ог мун. Колхозниккес тшакьялöны, а ме ― муын гуддись? Кушман нылö ― вот мый!

― Этö тэ, зятёк, весись сiдз, ― панöвтiс Астыркинöс Тоська.

― Ме тöда, мый баита, ― висьталiс Виктор. Сiя юис кизерик ырöш, чапкис öмас слива и чеччис пызан сайись. ― Ноко, Ёська (этадз сiя шувлiс Тоськасö бур настроеннё коста), чукöрт бригадасö.

Бытшöм планнэс, кыдз бур стиххез, чужöны видзчисьтöг...

Колхозö адззисисö мунны вель уна, и парторг Астыркинлiсь бригадасö лэдзис вöрö. Лэдзис сы понда, медбы бригада чожжыка тыртiс ассис сетöм кывсö.

Асылыс вöлi тöла и не сентябрь сьöртi кöдзытöв, сiйöн быдöнныс пасьтасьöмась шоныта, а инькаэс юррезнысö каттьöмась шоныт чышьяннэзö, только Тоська сё вöлi гожся косинкаа, но сiя вöрас кайö «Москвичöн», кöдöн Валька эз пов талун пырны керасöдз: туйыс кöс, кымöррес абу. А тöлыс асыввыв, сiя зэрсö öддьöн шоча вайöтлö.

Пессис погоддя, пессис вöрыс. Кöззэзлöн, ньыввезлöн, пожуммезлöн йыввез чепсасисö и койисö ладтöг, дзик эз тöдö, кытчö воштiсьны. Нiя кышасьлiсö оча ув, куштiсö лыснысö, öшталiсö голиэз. Кынымкö пу горöн дзуртiсö, бытьтö зубытсянь ружтiсö да ойзiсö и норасисö асланыс умöль олан вылö.

Тöлыс сидзис и улöжык, кытöн жар биöн сотчисö рябиналöн сьöкыт роззэз. Нiя вартчисö тöв вылас, мукöдпырсяс павкалiсö öтамöд бердö и резiсö эшö чорытöв туссезнысö.

Пессис сьöлöмыс и Астыркинлöн, вартсис то перыта-перыта да горöн, то жагсявлiс и лöньсьывлiс, медбы сыбöрын вились пондыны буткöтны бöб вынöн. Пессис сiя, дзик корсис мороссис петны да кайны кытчöкö пу йыввезас нето эшö вылöжык, кытöн соровтöны-ветлöны пемыт-руд кымöррез, кытöн вермасьöны лёк выннэз.

Мый сылö колö, медбы вермис лöньсьыны ― винатор али дзирыт удж?

Кабинасяняс нёджжасикö Виктор тэрмöтiс шофёрсö сэтчöдз, кытчöдз эз локтö вöр керасö. Эстöн, кыдз только петiс кабинасис, горöн висьталiс:

― Давайте тэрмасьны пондам, луныс уна ни...

― Кöть куритнытö сет, ― шыасис Перин. Сылö отсалiс Марзия:

― Шоччисьтöг пондан уджöтны, бригадир, дак ныр вылö усямö. Да эшö Валька эз на лок. Тоська абу.

Астыркин сэсся шы эз сет, нельки пиласö эз тшöкты вайны ― ачыс босьтiс и мунiс тöн пондöтöм пасекаö. Бöрсяняс вöтчис Перин, шытöг мездöтiс пиласö бригадир пельпон вылiсь.

Уджалiсö часся дыржык, эз и пуксьылö. Астыркин сё брякйис и брякйис и сувтöтлiс пиласö только сэк, кöр ковсьылiс öзтыны папироса.

Вон мый сьöлöмыслö колöма!

Водiсö пу бöрсянь пу. Виктор лыддис нiйö. Лыддис не лыдсö, а нылiсь кубометррез, а ныкöт öтлаын ― кытшöм деньга пырас сы кöшельö.

Шоччисьöмыс шогмис казявтöг: Перин кутiс ёжöс, и этö адззывлытöм зверьсö локтiсö видзöтны быдöнныс (Чойдор посёлок дорись ёжжесö эшö некин эз пантавлы). Астыркин терпитны эз вермы «окояннöй подасö», но тожö дугдiс уджавны. Сiя чапкис пиласö мыр бокö, Перин сы одзö вайöтiс ёжсö. Сэтчö локтiсö и мöддэс, кытшöн керсисö ёжыс дын ― кин пидзöс вылас сувтiс, кин пуксьыштiс моз, а бригадир нёльподöн кыскасьö, дзик некотрасись кага.

Вдруг пилаыс рокнитiс порсь моз, чеччöвтiс местасис и ярскис цепнас Астыркинлiсь дзулля вевдöрсö. И сэк жö бöр лöньсис да куньыртчис винерик кöзок увтö, бытьтö дзебсисис.

Виктор жмитiс сапог голенищесö дойдöм кок бердас и видзöтлiс то пилаыс вылö, то иньыс вылö и эз тöд, мый керны. Перин лэдзис ёжсö, кыскис пиласö кöзок увтсис, павкöтiс чуньнас цепсö, шуис гусьöн:

― Вирöсь...

Мый аркмис, медодз вежöртiс Марзия, и пондiс туйдöтны мöддэсö:

― Колö сапогсö чöвтны! Колö коксö кöртавны! Теплушкаись вайисö йод да кöртöт. Чöвтiсö сапогсö, путшöтiсö нямöтсö, и быдöнныс, кин вöлi эстöн, казялiсö кыдз пилалöн кыз пиннес нетшкöмась Викторлiсь кок кучиксö да яйсö.

― Ой-ёй! ― повзис вирсис Луиза и кунис синнэсö. Бригадирлöн не шы, не синва, только нырнас пишкö, ровно узьö, да тырппесö зэлытжыка жмитöм.

― Оз ков повны, ― висьталiс Марзия. ― Вай чышьян! Тэ кылан, Астыркина?

― Кыла, кыла, ― шыасис Луиза. ― Кöртавны колö... И жгутöн зэлöтны. ― Чöвтiс увтiсь чышьянсö, чиж косялiс кык торйö. ― Нате вот!

Локтiс Валька, видзöтiс Викторлiсь ранасö, сетiс команда:

― Больницаö!

Сiя ачыс каттис дойдöм местасö, буржыка зэлöтiс жгутсö и кутчöтiс Астыркинсö мышкас.

― Во правильно! ― ошкис Валькасö Перин.

Валька аслас машинаöн кыскис бригадирсö посёлокö. Сыкöт лэдзчисö Луиза да Перин.

Бригадаыс джöмдiс öт кок вылас, пондiс чотны.

Минута-мöдöн сёрöнжык тракторист кайис мыр вылö и пуксис сэтчö не öтiк час кежö. Бригада джöмдiс и мöд кок вылас. Уджыс паджсис.

Тоська да Марзия öктiсö тшаккез, пуктiсö нiйö пöжавны и пуксисö сёйны.

Кыв дынö кыв, басни дынö басни ― и нiя жагвыв, кыдз кужöны только инькаэс, бöрйисö быдöс тöння рытсö, талуння лунсö и вöлись адззисö виль тема.

― Тэ, Тоська, он и пöрисьмы, ― завидуйтiс нывкалö Марзия.

― А мый меным пöрисьмыны? ― гаж шынньöвсорöн юалiс Тоська. ― Уджала ― некин оз чувйы, узя ― некин оз вöрöт, сёя ― некин оз öмйы... А тэ кытшöм лоин ― увья майöг! И мыйлö тэныт каждöй год ваясьны, а?

― Ваясьны мало верма ― сiя оз умöльт, ― тöждiсьöмöн висьтасис Марзия. ― Вот Гамир гуляйтö ― сьöлöмöс косьтö... Турун сэтшöм колö, мед эз гуляйт, ― турун...

― Дак ветлы Турьяникаыс дын, сiя сетас.

― Вайлi сылiсь, быдса неделя сiйöн юкталi, а Гамир виль подруга адззис...

Вак-вак серöмтчис Тоська, нельки Марзиясö повзьöтiс, и висьталiс:

― Тэ сiйö турунсö меным вай, а ме тэныт мöдiкö сета. Только частожык сiйö удлы Гамирытлö, ― и дугдас гуляйтны... И подругаыслö позяс дöнзьöтны. Мамö сiйöн веськöтiс айöс.

― Былись? ― радмыштiс Марзия.

― Конечно! Колö кö, талун жö сета. Камин вылын менам олö, а шусьö сiя ― öшöпек.

Вöлись пондiс китшкыны-серавны Марзия. А Тоська лöг голосöн, дзик былись лöгасьöм, тотис:

― Сэтшöм жöниккесö колö тiльны, тiльны и тiльны! Но Марзия дугдiс серавны и гажтöма шуис:

― Вартлыны оз туй. Сiя менам жöник.

― Оз туй, дак сiдз и косьман... Ог вежöрт ме тiянöс, инькаэсö.

― И он вежöрт, Тоська. Тэ ― комсомолка.

Кöть и Астыркинöс иньыс шувлiс шудтöм чудöн, а сё жö эм Викторлöн счастьеыс: и машина увтiсь петлiс дзоньöн, и пу увтын эз кув, и пилаыс не сьöлöмас пиннесö мöртчöтiс.

Кокыс доймис недыр: куимöт неделя вылас бригадир пондiс уджавны. И бöра важмоз öдззис няркйыны-пöрлавны гырись пуэсö кыдз шедас, медбы перытжыка содiсö-йылiсö «кубиккез» да руббез. Эна руббес, дзик симöттэз, сайöвтiсö сылiсь синнэсö, и Астыркин нельки умöля адззис, мый керсьö ныр увтас. Бригадирлöн пондiс разьсьыны дисциплина и содны етшасьöм.

Медодз этö казялiс Валька Юсев. Медодз сiя и висьталiс чуклясьтöг:

― Тэныт, Витька, оз туй бригадиравны, тэ давай чапкись. Сылö синнэзас видзöттöн Виктор юалiс:

― Тэ бы пуксян?

― Эн ылöтчы. Не сiдз уджалан тэ...

Астыркин нюмыртiс öмсö, куньыштiс öт синсö да мыйкö дырна чöлыштiс, бытьтö метитчис, вöлись ыжмалöм могись юалiс:

― Дак мыля, ноко, меным оз туй бригадиравны? Али ме сiсь кока, али тютя-ляпа?

― Эн пöртчы бöбас... Ме потш только верма лэбтыны, дак керсö тай ог босьт, ― баитiс Валька. Но Астыркин важмоз кöтiс аслыс:

― Этö тэ он вермы, а ме верма. Нельки сiдз верма, что премияэз и первöй места босьта. Тэныт, поди, оз и ков премияыт? Ме и этö верма. И кора тэнö, дона ёрт, не велöтны менö. Ме абу учöт и быдöс тöда, ― чирыштöмöн ни горöтчис медбöрья кыввесö бригадир.

Бöра эз пет бур басниыс. Но Валька костi эз мун, сiя эшö пондылiс öвны быдöс тöдiсь бригадирсö:

― Он кывзы менчим советöс, дак сказка нö кывзы... Кыдзкö öтiк старик некывзiсь зоныслö сетас волшебнöй бедь да шуас: «Ковсяс кö лэбзьыны, вожась бедь вылас и тшöкты: мена-кумена, кыскы менö...» «Тöда, тöда!» ― шуас зоныс да лэбзяс, оз лэдз висьтавны, кыдз бедьсö сувтöтны. Лэбзяс и дырöв лэбалас ― старикыт кулас сы коста...

― Ме надейтча, что тэ чожа он кув, ― висьталiс Астыркин.

― Вежöртчы, Витька...

― Тэныт, Валька, колö вежöртчыны, ― ыждöтiс голоссö Астыркин. ― И мый тэныт охота чужöй нямöттэсö миськавны ― ог вежöрт! Не тэ сьöртi татöн ― волькыт туй тэныт мöдiк бригадаö!

― Мийö технологиясö дзугам, тшыкöтам отирсö... государствосö бöбöтлам! Он кö вежöртчы ― не лоны тэныт бригадирнас.

Но Астыркин Виктор вöлi созлöй чойдорскöй морт ― асныра да поперёшнöй ― и гортыслiсь славасö эз öшты. Может, и содтыштiс эшö мымдакö.

Ноябрь витöт лунö Астыркин бригадаö юасьтöг-висьтасьтöг локтiс парткомовскöй газик и вайöтiс джын конторасö ― и парторгöс, и рабочкомöс, и комсоргöс, и нельки бугхалтерöс. Вöлi ныкöт и фотокор.

Кöр кытсöвтiсö бригадирсö, сiя мыйкö дзик повзьыштiс. Но Геннадий Алексеевичлöн чужöмыс вöлi мича, кыдз юр весьтсис шондiыс, и Виктор вежöртiс, что умöльыс нем эз ло.

Быдöннысö корисö будка дынö, пуксьöтiсö лабиччез вылö, и парторг сувтсöн лыддьöтiс директорлiсь приказ: Астыркин бригадалö сетны приз.

Лоис сiдз, кыдз баитiс Астыркин.

Киэс сылöн важын ни лöсьöтчисö босьтны призсö, и чужöмыс лоис югыт да рам. Сiя бöрйис кыввез, кöднö ковсяс висьтавны козинсö босьтiкö. И сё ни ковсяс, думайтiс сiя, висьтавны ны йылiсь, кин эз верит бригадирыслö, эз верит сы юралан талантö.

Чеччис Астыркин, видзчисьö.

Газетаись фотокор лöсьöтчис керны вöвлытöм кадррез, и рабочкомись председатель путшöтiс сереброöн пежьялан статуэтка, шув-пав оськöвтiс бригадирлань, но чужйисис пев кыза мырокö и дбрунь нюжалiс кынöм вылас, а статуэтканас жогйыштiс бочка дор кузя. Югыт тороккес, дзик йыжоллез, резыштiсö öтмöдöрö. Öтiк сидзис Астыркин моросö, кышасис куртка бердас и свиттялiс, дзик виль медаль.

― Ох, куран кок! ― пидзыртiс тырппесö парторг. ― Тьфу! Фотокор казявтöг керис кык снимок, а кöр казялiс неладносö, мунiс ыджыт кöдзывкар дынö.

― Не миян вöлöма, ― шуис Валька да чеччöтiс рабочкомсö. ― Эд доймö?

― Еныс эд не Астыркин, адззö, мый керсьö, ― отсалiс Валькалö Тоська.

― Пöднав панясянтö, ― эргыштiс Астыркин да пуксис и öзтiс куритны.

Эттшöмсö Геннадий Алексеевич и вöтöн эз вöтасьлы и нач öшис.

Кытöнкö матын нёштöма горзыштiс сьöд кыр: «Кли-а-ан, кли-а-ан!» ― но и эта нора шыыс эз вöрзьöт отирлiсь сьöлöммезнысö.

― Тiйö бы деньга вайит, ― шуис Марзия. ― Деньга оз жугав...

― Мый понда миянлö деньгасö? ― сувтöтiс сiйö Тоська. Эта юалöмыс вились шонтыштiс парторглiсь сайкалöм ловсö.

Сiя вештыштiс шапкасö юрбöр вылас, матöжык сибöтчис Тоська дынö, пондiс баитны:

― Эм мый понда! Ташкинов бригадалöн ― 120, а тiян ― 140 процент! Эта ― геройство! Эта ― подвиг! Разь абу сiдз?

― Абу сiдз, Геннадий Алексеевич, ― висьталiс Валька. ― Двадцать процентсö мийö нылiсь гусялiмö ― прокод бур вöрын керасим, а нылö сетлiсö кляччез да пипу вожжез. Эта абу честнöй дело.

― А мöдпырся буржыкыс нылö сюрас...

― Миян и прогуллэз, и чöпö... И ёрт ёртыслiсь уджсö оз тöд, и виль технологиясис поламö. Мöдiклаын ― ыджыт бригадаэз, увсуйян машинаэз, а миян мый?

― А миян ― Астыркин! ― горöтчис Тоська.

Кöркö кайöма кымöр, и куш му вылö койыштiс шочыник кöс лымок. Кокнит тöвныр, кöда мезмалiс сук вöра мыс сайсянь, резiс лымсö отирыс чужöммезö, каттьытöм голяэзö. Геннадий Алексеевич пыдынжыка кышалiс юр вылас пыжиковöй шапкасö, лэбтiс каракулевöй воротниксö, ― тыдалö, эшö мöдiс митингуйтны, но Астыркин чеччис местасис, шагньöвтiс лабич вевдöрöттяс да тэрмасьöмöн мунiс керасянас.

― Эг видзчись ме этö, ― гажтöма юöртiс Геннадий Алексеевич да прощайтчытöг колис бригадасö, кöда вылö эшö тöн, кöр сы понда директорлiсь корис приз, надейтчис, кыдз ас вылас.

Дата добавления: 2015-11-16