ЖУГДÖМ КРЕСТ

Туй вылас сулалiс пöлiньтчöм машина флажокöн, кöда пемытiнас шовкöтiс, дзик рака борд. Машина бокас, кöсжык местаэсö кошшöмöн, ветлöтiс ыджыт мыгöра кышöтан плаща морт. Шоныт улькодь тöлок мукöдпырся тöвчикöн уськöтчывлiс мортыс вылö, вартiс плащ поланас ружьё кузяс, мавтiс дзик ульсалöм бусöн чужöмсö да уссэсö. Машина сулалiс сöнöга лымöн тырöм канаваын. Колесоэз увтiсь боргöмöн петiс шорок. Улын, керöс увтас, энö и мöдiк шорресö öктöмсянь бöрдiс да чеглалiс йысö Сирва.

Ойыс маитчис и пессис, вöлi тырöма тулысся шумöн, боссьöма тревожнöй видзчисьöмöн.

Мортыс шочыника сибöтчывлiс автомашина дынö, сюйыштлiс брезент пельöссö чорыт мешöккез увтö. Мешöккезас — стройка понда взрывчатка, сiйö оз туй вадны. Кöбы эз кутчы сэтшöм крута сылöтны, машина локтiс бы местаöдззас. А öнi вот сибдiс этчö, шофёрыс узьö правленнёын нето чай юö, а пöрись колхозник Вадимер Петрович войö сапоггезнас лымсора нятьсö и дöзöритö опаснöй да дона грузсö.

Сулалö, кыдз вöвлi война коста, Öтнас пемытiнын, öтнас аслас думаэзкöт.

Мый вермас усьны тöдвылас пöрись мортлö? Конечно, том порася выныс, конечно, одззася оланыс.

Вот сiя, батрак, лэбтö додьö кöньöс кыза ворота столб. А вот зыбунiсь кыскö хозяиныслiсь сибдöм вöлöс. А то кайöтлö керöс увтiсь куим пуд сьöкыта иззэз... Дрöжитöны коккес, чуклясьöны некокнит ношасянь, пöдтö ловсö, пемдö син одзас. Вот-вот чужйисяс, усяс, нырыштас изыс, жамйыштас коссö. Кинкö видзыштiс бы, отсалiс... Но сэтчö локтö Кузь Терень, жагöника путшöтö ороп вылас каттьöм нагайкасö. Эшö оськöв и — шлыч вачкö Вадимерлö чужöм кузяс.

Дрöгнитiс Вадимер Петрович, осьтiс синнэсö и не сразу вежöртiс, кытöн сiя и мый сыкöт.

Сё сiдз жö пöльтiс тöв, шовкöтiс брезент пельöснас, вöснитика шутнялiс туйдорись баддезас. Посадын дзардiсö биэз, пессис плотинаöн öмлöсалöм Сирва. Вадимер Петрович кошшис ассис керкусö, эз адззы и сьöкыта ловзисис: «Узьö, натьтö, Марьяö. Гор вылын узьö. Гор вылас бу-ур!»

Ветлöтöв-керис, эшö видзöтыштiс посадланьö да пöрöтчыштiс столб бердö. Столб сьылiс нюжвыв нора песня, сьылiс мича нывка Марья йылiсь, кытшöмкö чуть тöдса зонка Вадимер йылiсь, тулыс йылiсь да эшö кытшöмкö öддьöн-öддьöн дона морт йылiсь, кöда вöлi и öшис пыр кежö. Сiя вöлi учöтик, шоныт да небытик киока. Эта вöлi Марина, сылöн ныв. «Мымда бы сылö тырис таво? Двадцать?.. Да-а, аймамыслö отсалiсь бы вöлi, внучеккез бы чужтiс... И мыля сiдз петö: öтiклöн челядьыс — курöгпоз, а мöдiклöн öтiк абу? То и керкуöс жын-жын строитi, любо видзöтны, а кин понда? Эттшöм бытшöм керкуыс: вит стенаа. Дыр сулалас.... Старухаö вон öшын одзас пукалö, менö видзчисьö... Ноко, лэдз, старуха! Мыля каличасин? Эн ыжмав, эн ваксьы! Кылан, öбедня дорö звонитöны. Осьт чожжык, а то жугда воротасö», — и тапкис пельпоннас, ачыс чуть-чуть эз усь.

— Мый эта? Бöра вöтаси эд, — нёджжасьö Вадимер Петрович ас гöгöрас. — Но кин звонитö?

Кывзiсьыштiс: былись звонитöны, только эшö öддьöнжык пондiсö, дзик бöбись. Сэк вöлись посад весьтiсь казялiс би, кöда югдöтiс пемыт небосö.

Пожар!

Вадимер Петрович чепöссис машинаыс дынiсь, но сэк жö сувтчис бöр. Не, мунны оз туй!.. А мый, ежели мунны? Кин сiйö вöрзьöтас?

Биыс сё паськалiс, а звонитöмыс вынтöмсялiс, тыдалö, мыдзис сiя, кин вартiс колоколас.

— Кинлöн жö сотчö? А вдруг миян?.. — пессис стариклöн сьöлöмыс. — Тьфу, мый и пырö юрö. Мыля непременно миян?

Но эта эз лöньсьöт Вадимер Петровичöс.

— Кöть бы чожажык локтiс шофёрыс... Мый только сiя думайтö.

А биыс кутчисис мöдiк керку бердö. То и куимöт пыкнитiс, сэк жö бикыввез судзöтiсö лажмыт тулысся кымöрсö.

Эз вермы отир öдöлейтны пожарсö, а городсис, натьтö, оз локтö пожарнöйес эттшöм туй кузяс.

Но вот мыс вылын мыччисисö биэз. Локтiсö машинаэз. Жагöника, но кыссисö одзлань. Мукöдпырсяас биыс дзик джöмдавлiс, купырасис ныроккезö, нето, бытьтö код морт, пöрласис то öтланьö, то мöдланьö.

— Молодеццез, пожарниккез! Сёжö эз сибдö! — И старик пондiс видны шофёрсö, кöдалiсь дöзöритiс машинасö эттшöм суматошнöй кадö. Быдкодь думаыс ройöн ветлiс юрас. И сё видзöтiс посад вылö, мöдiс тöдны, кинöс павкöтiс бедалöн лёк киыс. Сы коста билöн öдыс чинiс, посадыс лöньсис. Но Вадимер Петровичлöн сьöлöмыс пессис сё öддьöнжык. Кытшöмкö тöдтöм чувство сöскис сылiсь душасö.

Кöр рознитчис тулысся пемытыс и пондiсö тыдавны керкуэс, старик эз адззы ассис крута вевттьöм шатровöй крышасö...

Вадимер Петровичöс кыдзкö эз и казялö, кöр сiя сибöтчис аслас усадьба дынö. Басöк, ыджыт керку местын кольччöма öтiк гор. Сы вылын сулалiс жугалöм дора кринка. Быдöс, мый вöлi чукöртöм — лöсьöтöм уна годöн, пöртчис пöимö, мунiс тöв йылöт. Нельки эз и веритсьы, что сэсся нем эз кольччы эта крепыт хозяйствоись. Но палитчöм гор гажтöма видзöтiс белитöм печурка синнэзнас и тшöктiс веритны эта несчастьелö. Куш юра хозяиныс сулалiс аслас очаг одзын, дзик покойник дын. Бöрсяняс кинкö сибöтчис, кашельтiс, но старик эз кыв этö.

— Здорово, Вадимер Петрович, — кокныррез вылас видзöтiкö, дзик виноватöй, здоровайтчис председатель Илья Зыбов.

Сэк вöлись Вадимер Петрович садясис да юалiс:

— Кытöн старухаö?

— Правленнёын. Ловья, здоров. Мунам сэтчин. Мый эстöн öтнат сулалан? Отсалам, быдöс наживитан и...

— Эх, Илья, Илья. Тэ дзик кагаöс бурöтан, а ме ог мöд бöрдчыны. Сяко овлi, ачыт тöдан, нем тэныт и висьтавны. Видзöт, кытшöм дворец сулалö, — мыччалiс тшöканас баня вылö. — Айöлöн керкуокыс умöльжык вöлi, а семьяöн олiм. Сэтчö и петам, кытчöдз суд да дело.

Былись, льöмпуэз коласö дзебсисьöма черепицаöн вевттьöм вельыджыт баня.

— Бур баняыс, да сёжö баня. А овны колö керкуын, — шуис председатель, правленнё посöдзö кайикö.

...Марья Пименовна куйлiс краснöй уголокын, ольсалöм тулуп вылын, да чышкис синнэсö лöз запоннас.

Жöникыс кышалiс пишальсö тув вылö, пуксис бокас да кибöрнас павкöтiс иньыслiсь кымöссö.

— Эн ни горзы, то ачыт сотчан. Адззан, кытшöм жар... Вильö керам...

Марья дугдiс горзыны, а жöникыс чеччис, кыскис плащсис кулёк и сюйыштiс Марьялö киас. — Сёй, тöн эшö босьтi, да эг ешты гортö кольны... Вот и нимлун тэныт... Эк-кö-кöй, — ыш ловзисис ачыс. Марья босьтiс конфетка, курччöвтiс сiйö, а чужöм кузяс вились пондiсö котöртны синваэз. Жаль лоис изюмыс, кöдö кöтöтiс нимлун кежас. Быдса кило вöлi небöма, а тусь-мöд только и чапкылiс öмас. И сарафансö вильö вурöтiс. Мыйлö öнi сiйö?

— Тырмас ни, тырмас. Эн бырöт мылатö, берегит синбуртö. Öнi нем ни он кер, — Вадимер Петрович жмитiс Марьялiсь юрсö бердас и нежнöя сюйис инькаыслiсь пашмöм юрсисö чышьян увтас. Нiя кыкнанныс лöньсисö, донаöсь и роднöйöсь öтамöдныслö эта минутаö.

— Деду, тэнö вылö корöны, — горöтiс порог вывсянь зоночка.

— А гусьöнжык оз позь? — лöгöн видзöтiс сы вылö Вадимер Петрович.

— Да öнi жö корисö. Керкуэз сеталöны.

— Но, мунам инö, сеталöны дак. Правленнёын тыр отир. Вадимер Петрович смекайтiс, кытчö бы пуксьыны, но местаэс эз вöлö. Чеччис аслас стул вылiсь Оля — агроном и öддьöн вежливöя, дзик шогалiсьлö, висьталiс:

— Пуксьö, пожалуйста, татчö.

Гор саяс кинкö тэрмасьöмöн висьтасис:

— Пилька эд тöдан кытшöм: öдззас юны, дак он дугдöт. Юыштöмась быдöс винасö — етшаöв. А заптöмыс абу вöлöм. Пыдой торопитöм Ульянасö вина кошшыны. Старикыс пö радейтлiс курытсö, дак и касьтыламö бытшöмика. Мунöма инькаыс, а масiссесö абу кусöтöма. Нiя, аляммес, и тарöвтчöмась сы коста. Но, а биыс, натьтö, и кутчисис обойес бердö.

— А кыдз нö асьныс эз сотчö?

— Кыкыс петöмась, а Пилясö Ульянаыс бисис ни кыскöма. Кыкнанныс больницаын öнi...

— Тырмас шумитны, — висьталiс председатель, аслас кабинетiсь петiкö. — Пондöтамö. Мийö парторгкöт то кыдз думайтам: виль керкуö, кöдö öнi керимö, селитны Зыковвезöс да Вадимер Петровичöс. Нылöн семьяэс учöтöсь... Максим Власович мунас менам стариккез ордö — тöрöтчасö. А Пилялiсь челядьсö интернатас и колям кытчöдз. Мöдiк вопрос: кытчö сувтöтам виль олiссесö, спеццесö? Механиклöн куим челядь да инь. Колас иньдöтны куимöт участокö. Сэтчин эмöсь öтка колхозницаэз. А эшö кык семьялö сетам одзза «Союзлiсь» важ правленнёсö. Кинлöн мöдiк дума? Абу? Значит, баитам одзлань.

* * *

Чожа мыйись, кыдз только петiсö виль керкуö, Марья пондiс шогавны. Сiя норасис юр вылас, но фельдшер эз адззы некытшöм висян, а сiйöн тшöктiс нуöтны городö. Но чожа Марьялö лоис долытжык, и сiя кольччис гортас. Шоччися пö невна, и быдöс чулалас. Сiдз кыссис неделя, а шогалiсьыс эз чеччыв. Кресення ойö сiйö пондiс кынтны. Вадимер Петрович куталiс кикоксö — сайкытöсь. Вештiс ольпасьсö горбокö, каттис коккесö шальöн да чапкис вывлас паськöмсö, кöда кольччис пожар бöрсянь.

— Небасöк делоыс аркмö, — явитiс мöддэслö. — Ковсяс Марьясö больницаö лэдзчöтны.

Соседкасö тшöктiс видзöтлыны иньыс сьöрын, ачыс мунiс доддясьны.

Вöв карта дынас ни вöтiс Зыков да бергöтiс Вадимер Петровичсö. Висьталiс, что Марьяыслöн кылыс шегьясис.

Тöдiс бы Вадимер Петрович, что этадз лоас, эз бы мун доддясьны. Эз кыв иньыслiсь медбöрья кывсö, эз адззыв сы умнöй ласков синнэзлiсь медбöрья видзöтöмсö. Пыр кежö нуöтiс смертьыс прока, мыдзтöм киэсö и нора песнясö, и гажа прибауткаэсö. Сэсся оз адззыв Вадимер Петрович сылiсь не удав кадрильсö, не потешнöй «тусь масьтöмсö», кöднö некин сысся буржыка эз йöктывлы посадас.

Куйлiс сiя дзик ловья, бытьтö узис нето лöсьöтчис сьывны йöктöтан песня да куньыштiс синнэсö, мед думыш керны, кытшöм проглазöн пондöтны. Öм дорыс невночка оссьыштöм, ровно лöсьöтчö горöтчыны. Вот-вот шынньöвтас, öктас моросас русö да и пондöтас:

Олöм вöр дорын сьöла,

А деревняын дöва.

Их-ух, вöр петух,

А деревняын дöва.

Но Вадимер Петрович одзын вöлi не визыв Пименовна, а кöдзыт ловтöм тело.

А кык лун бöртi джын посадыс кольлалiс Марья Пименовнаöс ягöдззас. Понуль кусттэз бокын быдмис, первöй эта тулысö, ежаöн вевттьöм да ньыв лысöн баситöм виль мысок.

Крест вылын, стекло сайын, тыдалiс фотокарточка. Потшшалока том инька сералöмöн видзöтiс кытчöкö бокö; гырдззаэсö паськöтöмöн чуньпоннэзнас видзис чышьян конеццесö. Нiйöн, натьтö, орсiс тулысся тöв. Сасьöд синкыммес чукыльтчыштöмась вывланьö, бытьтö лöсьöтчöны лэбзьыны...

Вадимер Петрович сьöкыта чулöтiс энö луннэсö. Быдöс вöлi эта тулысö не сы сьöртi. Тöдчöмöн чочкоммис сьöд юрсиыс, ыждiс юрпыдöсас кушиныс, кöдö неважын эшö сайöвтлiс шочыник юрси. А Мишка Зыков кыдзкö юалiс:

— Деда, а мыйлö тэ британ юр шöртö? Тятюö некöр сэт оз брит...

Но олан эм олан. Сiйöн сiя и ыджыт да мудрöй, что вермö пöдтыны горесö, уджöн тыртны сьöкыт луннэсö да годдэсö.

Только Вадимер Петровичлöн эз ни вöв одззася öдыс, жагöна аркмис уджыс. Рыттэзнас дырöн пукавлiс газета одзын, но унажыксö видзöтiс сы вевдöрöт, öшынö, видзчисис öшöм онсö да ашыння уджсö. Только столярнöй мастерскöйын и вунöтлiс ассис шогсö, гажöн камöтiс молотокöн, гарйисис öжынöн. Мукöдпырся нельки мурзис кытшöмкö песня.

Öтiк рытö пондiс лыйны пеляс.

— Эшö эта эз тырмы. Ме ас вылам не рад, а сэтчö эшö пöрöс, — думайтiс Вадимер Петрович и, кыдз пыр, мунiс юасьны Зыковвез ордö..

Нiя тшöктiсö ветлыны Öнись дынö: сiя пö тöдö толксö этаись. Эз мун, кöть и ойбыт ончир эз кер. Ашынас сiдз öдззис чушкыны, что Илья Зыков тшöктiс кыскыны öтка мортöс больницаö.

* * *

Жагöна веськалiс Вадимер Петрович. Ёна висис пельсайись коскаыс. Эшö бы не висьны: писькöтiсö зубилоöн! Сысянь и юрас лыйö, и садьыс дук абу. Сэтчö жö тöдсаэс некин оз вовлö. Гажтöм.

Эттшöм кадö и локтiс Вадимер Петрович дынö Öнись.

Эшö ыбöс сайсянь кылiс Öнисьлöн баитöмыс. Сестра эз мöд лэдзны палатаас этö «чирöм уткасö», кыдз нимкодялiсö Öнисьсö посадас. Но ушлöй старуха вермис даки öмнас:

— Сiя, матушка, роднöйся донажык меным. Радейта ме сiйö, сиротаöс, ас пиянся буржыка. Не ай, не мам — некин сылöн абу. Иньыс неважын кулiс. Чунь öтнас, дзик ен одзын масiсь, кольччис.

Пырис сiя палатаас лапöталöм кымöса, кöсыник, вöйöм рожабана да одзланяс нюжалöм тшöкаа. Халат увтiсь тыдалiс кузь набивнöй дубас. И мунiс сiя, ровно уйис: коккес эз тыдалö и позис шуны, что сiя ыскöвтö паськыт дубас дор вылас.

Видзöтыштiс бокись ыбöсö, пернапасасис да вешшис шогалiсьыс дынö.

— Йöзас пö и бур оланыс косьтö, Вадимер, а тэнат куимпöвса шогöтыт... Вот ме и локтi сьöлöмтö бурмöтны да кадсö джендöтны. Не быд лекарствоыс веськöтö мортсö, а бур кылыс пыр отсалö. Гöснеччез то вайи. На-ко, сокол, пешлышт, — и корзинаись судзöтiс банка. — Эстöн ма. Сiя быд тягостьсянь пользительнöй.

Вадимер Петрович эз радейт Öнисьсö. Но охота вöлi адззывны кинöскö горт ладорись, тöдны, мый вильыс посаданыс. Сiйöн и рад лоис нельки эта лёбись инькалö.

— Меным нем оз ков, Öнисся, ме и сiдз веськала ни. А сы понда спасибо, что локтiн. Висьтась нö, кыдз олöны.

Быдöс висьталiс Öнись, бытьтö сводка сьöртi, ачыс то радуйтчис — чивзiс дзик кай, то лöгöн шушкис — видiс артавтöм морттэсö, то бедуйтiс отир вылö, кöдна вунöтöмась енсö.

«Кысянь эттшöм басниыс сылöн? — дивуйтчис Вадимер Петрович. — Топ артист ольсалö».

А Öнись сё сярзис и сярзис:

— Грешитам öнi, ой кыдз грешитам! Енсö вунöтiмö, сiйöн и иньдö эд быдкодь наказаннёсö му вылас... Вот эд, батюшко, вöлi бы енокыт керкуат да кöть öтпыр сувтлiн бы сы одзö пидзöс вылат, дак, может, и берегитiс бы керкутö. А биыс — сiя не вор. Ворыс пыралас, дак стенаэсö оз нöбöт, а биыс нем оз коль... Вот и мыжйис.

Вадимер Петрович ружтыштiс, бергöтчис бок вылас.

— А Пиляыслöн мыля инö сэк сотчис? — падмöтiс Вадимер Петрович.

— Сiдз, натьтö, еныслö колiс. Тыдалö, умöля кеймис: öт синнас еныс вылö видзöтiс, а мöднас — кабакö.

Öнись норовитiс невночка, лöсьöтiс койка вылiсь лэдзчисьöм одеяло, пуктiс киэсö öлöдзас и бöра öдззис шевгыны чупыша öмнас:

— Вöтаси ме семик панытас Пименовнатö — царство сылö небеснöй. Помяни, господь, душу грешную рабы божьей. Сулалö бы этадз, посад понас, ляч пасьтöм. Ачыс невесёв, и коскаэс сяр лэбöмась. И шуö бы: кынöм пö стрась сималö, да ог лысьт этадз-ту гортö локнытö. Эг пö юрбитлы да и йöрнöс-дубасöс нем эз сетö. Висьтав пö, душа Öнисся, — этадз и шуö, — ась бура кеймöны ен-батюшкоыслö... Сайми и думайта: вот, мыся, девять дёнсö эг касьтылö, не гоз нямöтлö гроб вевдöрöттяс некинлö эг мыччö. Чеччи да и пондi пöжасьны, а сэсся лампадка öзтi да суслотор пызан вылас сувтöтi, и зэв бура вошшис грешнöйлöн душаыс. Öнi бы новьянсö кинлöкö сетыштны, дак быдöс благо лоас...

Эз ни кывзы Вадимер Петрович Öнисьлiсь баснисö, думайтiс мöдiкö. Бöра пырис юрас: а мыля сылö сэтшöм оланыс петiс? Былись я кытшöмкö греххез вöтiсö? И Зыков эта йылiсь жö мыйкö гарддис...

— Бабушка, тэ сё тай татöн пукалан, — вöлись кватитчис сестраыс. — Öнi жö мун, а то кöиннэз сёясö эд туй вылас.

— Бережливого и бог бережёт, лапушка. Но, сэк муна ни... Дак сета нö, Вадимер, сарафансö. Водтöн и чеччытöн пондас касьтывны, — ыбöссяняс ни вашкис Öнись.

Мöдыс эз вежöрт, мый йылiсь мунiс басни, но согласитчис,

«Мыйлö сiя вовлiс татчö? Неужто натодель ме дынö? И ма вайис. — Вадимер Петрович осьтiс дозсö. — Поди мыйöнкö сорлалiс, старухажуг? — Вайöтiс ныр увтас. Но маись петiс видз да цветтэз дук. — Кыдз инö сiя шуис сестрасö? А-а: лапушка».

Паньыштiс öтпыр — ма кыдз ма, чöскыт. И сэк жö лакыштiс джынсö, нельки кöрыс öм пытшкас öшис.

И чожа пишкис ни чöскыт онöн, а быгалöм уссэс дзебисö челядься серöм. Вöтасис только бурö: адззылiс бöра чочком Москвасö, ветлöтiс «Народдэзлöн дружба» фонтан гöгöр. Сэсся видзöтiс китайскöй цирк. Мортöс, шöри пилитiсö, а сылö абу страшно, сылöн смехыс петö: тöдö, что эта не быль, да и не китаеццез нiя, а нинпуовöй пильщиккез, кöднö Вадимер Петрович керис Зыков зонлö.

Дырöдз узис эта асылö Вадимер Петрович, а сёйикö корис эшö содтöт. Рытъявнас петалiс садöдз. И зонкаоккезлö, кöдна эз тöдö, мый керны, висьтасис сказка.

Быд лун Вадимер Петрович пондiс пукавлыны садын, орслiс челядькöт нето акация пуртöссэзiсь керлiс пиксаннэз да мöдiк чачаэз. Öтпыр пуксис сы бокö пöриськодь морт газетаöн киас. Лыддьöтiкö сiя чупкöтiс öмнас, сьöласис, сералiс — вöлi öддьöн страннöй. Лыддьöтiс-керис да чувйыштiс Вадимер Петровичöс:

— Не, тэ кывзы, кывзы, мый гижöны: «Тöн ёрт Хрущёв примитiс всея Руси да Московскöй патриарх Алексийöс, кöдакöт дыр сёрнитiс». Но, мый висьталан? Тыдалö, вичкуыскöт тожö лыддисьöны.

— Натьтö охота лоис баитны попыслö и ветлiс, — шуö Вадимер Петрович. — Сiдз просто...

— Ö-ö, не-е. Примитöм! Не просто сiдз, а кыдз кытшöм-нибудь Неруöс или Египетскöй правительöс... На, лыддьöт-ко, ме коля сiйö, — и эта мортыс котöрöн саясис пуэз сайö.

Вадимер Петрович эз на ешты и лыддьöтыштны досповна, кыдз бокас пуксис Öнись.

— Муна этадз забор пöлöнняс да и казялi тэнö. Кежала, мыся, суседö дынö. — И бöра öдззис сярзьыны — быдмавны öтi-мöдi йылiсь.

Сымда вильторсö вайис, что Вадимер Петрович и пеллесö öшöтiс. Мый только эз выттьы-гарйы! Катшаракаыс, я мый я, сылö ваялö бöж вылас! Öтiк юöр дойдiс Вадимер Петровичöс.

«Дак вон мыля оз вовлы Ильяыс: ветлöтны лэдзчисьöм», — думайтö Вадимер Петрович, но сёжö юалö:

— А не напраслина я эта? Томувьяс сiйö эз керлы, а öнi кысь поди?

— Грех тэныт сiдз ме йылiсь думайтнытö, грех. Али ме бöбöтча? Иньыс висьтасьö. Вайи, шуö, ужнайтны, а сiя юис да только ыбöсö. Правленнёö пö тэрмася. А кайöма логöттяс вöрланьö. Сэтчин пö Оля — агрономыс видзчисьö ни. Вот тэныт и правленнё! — Öнись нельки пильскнитiс-серöмтчис, но сэк жö кватитчис, что сiдз небытшöм, и нюжöтiс чукасö.

— Сiя эд ныв туйö Ильяыслö, Öнись! Мый тэ ыштан?

— Öнi оз видзöтö, дзор сiя нето том детина, медбы только мужик дука вöлi... Но, бöра тай пемдö ни, — пондiс тэрмасьны Öнись. — Видз-ко, батюшко, банкасö. Эшö вайи. Да вот книгаоксö кут, кöр-некöр видзыштан киат. Сэтчö добрöй отирыс гижöток да перна пуктiсö... Кольччы енкöт да веськав шупытжыка.

Вадимер Петрович паськöтiс бумажкасö. Лыддьöтiс öтпырись, мöдпырись:

«Кышав пернасö, витiсь пернапасась и гиж эта кодьöсь вит письмо да ысты вит мортлö. И еныс босьтас ас вылас быдöс греххетö. Аминь».

— Мый ни сэтшöмыс лоö? Бöра греххез! И киннэз эна «добрöй отирыс»? — жугдiс юрсö Вадимер Петрович, палатаö мунтöн.

Дыр эшö куйлiс осьта синнэзнас ольпасьын и ланьтiс вöлись асъяойнас. Сiдз эз и ешты лыддьöтны Öнисьлiсь книжкасö. Ашынас Вадимер Петровичöс лэдзисö гортас, а книга кольччис подушка увтас. Бертiс бы бöр, если бы эз пантав Ильяöс.

— Куимöтпырся локтi и бöра обход коста, — кутiс пельпоннэзöттяс ассис приятельсö председатель. — А талун, мыся, сёровно видзчися. И не весь: кыска посадöдз. А тэ, Вадимер, кизертчöмат татöн, — шамралiс Илья ёртыслiсь киэсö.

А Вадимер думайтiс: «Кыдз бы не сiдз, сё обход коста». И шуис:

— А рытнас, этадз, шондi пуксян дорын, тожö некöр вöлi?

— Йывды, йывды: виноват, — эз дорйы асьсö Ильяыс.

И мунiкас ни висьтасис, мымда сылöн уджыс öнi. Эд нёль колхоз öтлаасисö. А пондыв-ко эттшöм хозяйствосö киын видзны, кöр тэныт пятьдесят саяс ни, а институтыс вöлi ректас вылын да вартан дорын. Вот öнi и мырсьы. Адззан, сизим год ни агрономö велöтчö, а дипломсö сетасö вöлись таво. Вермас я экзаменнэсö сетны? Илья оз пов сэтiсь. Медсьöкыт экзаменсö сiя видзис ни. 70 копейка туйö таво колхозниккеслö дöнзяс куим рубöн быд трудодень вылö. Нянь — килограмм кыкöн-куимöн. Пöт лоас отир, пасьтасяс и, видзöтан кö, война годдэзся надсадасö вывтсис чапкас. А кöр богатсялас колхозыс, позяс и пенсия вылö петны. Но öнi...

— Шоччись, öкты вынтö, а сэсся доддялам. — Илья нёджжöвтiс машина пытшксянь.

— Кытшöм шоччисьöм? Тырмас. Ашын жö пета, — шынньöвтiс Вадимер.

— Вот и бур! — радмис Илья. — Одзöв эшö дедас пуксьыны. Эшö уджалам!

Веж «Победа» роксыштiс порсь моз, шаркнитiс колесоэзнас и дюттясьöмöн саясис керку угöв сайö. Вадимер Петрович зыртыштiс чуньнас юрбöрсö: «И поныс нылiсь вежöртас. Поди, забыль агрономкаыскöт кыйсьöны? Пöрись вöлыс оз муг, шуöны. А сiя эшö гогольöн видзöтö. Дедас, шуö, одзöв пуксьыны». Пырис гортас. Сы жырын сулалiс кытшöмкö пöддук, дзик неолан керкуын. Некин эз пантав сiйö, нельки Мурка эз чеччöвт лабичсянь, эз зыртчы хозяиныс коккез бердö. Пышшöма. Сiйöн и шырыс öксьöма. Вон мымда покаститöма джоджас.

— Ох-хо-хо, — сьöкыта ловзисис Вадимер Петрович, пöльыштiс скамья вылiсь буссö, пуксис, öшöтiс юрсö.

Сэтчö тюк только пырис Öнись и, ровно сваха, пуксис матица весьтö. Тыдалö, талун некöр вöлi дырсö пукавны и сэк жö висьталiс ассис могсö. Колö пö керны кресток. Дитятко-сиротаöс пö еныс босьтöма, дак басöкжыкö, серöтöмö, кытшöм алтарь весьтын вöвлi.

Ылöтiс старик: висьöтö пö сiйö, да и оз пет сы киись сэтшöмыс, ыджыт мастерство сэтчö колö.

— Чайтчан дак эн величайтчы еныс одзын, Вадимер. Адззан, сiя веськöтiс тэнö. Мийö ой и лун пондам касьтывны тэнчит нимтö еныс одзын, — корис Öнись.

«Он эд мездiсь сы дынiсь, — думайтö столяр. — Лякасяс сирвез моз — рад да нерад керан.

Да и киэзö оз косьмö этасянь. Сiя тай меным тожö отсалiс».

Ойбыт уджалiс Вадимер Петрович, баситiс крестсö. Аркмис кокнитик, волькыт, дзик чача. Сэтшöм жö, кытшöмö кöркö керлiс аслас Марина понда. Асывнас сюйыштiс коскас чер и мунiс правленнёö.

— Здорово, здорово, Вадимер Петрович! — радъялiс бухгалтер Митрофан. — А ме тэ дынö лöсьöтчи. Локтiс деньга госстрахсянь. И колхозыс сетiс аванс.

— Вот кыдз! Менам разь абу? Сотчис книжкаö, а деньгаыс дзонь.

— Ö-ö, друг, да черöн ни. «Мича лунöн оз узьöт, гажа рытöн оз пукöт»? Эх тэ, старина, беспокойнöй хозяйство! Котöрт сэки, вöт челядьтö. Во-он мунöны. Кирпичнöй завод строитам. Рытнас кежав.

И пöрись мастер бöра сунгисис колхознöй уджö. Бöра оланыс бергöтчис сылань чужöмнас да кыйис аслас вына, счастливöй киэзö. И ыджытся-ыджыт мир бöра корсис сы сьöлöмö: колхознöй мир аслас будденься заботаэзöн, черрез камгöмöн да крепыт стружка дукöн, косилкаэз сярзьöмöн, парнöй йöла да клевер дука руöн, Сирва дорын гажа песняöн, кöдасянь сьöлöмыт тырö гажöн, кöдасянь охота овны вексö...

Кыдзкö бертiс Вадимер Петрович удж вывсянь, босьтiс киас газета. Вдруг — машина: правленнёö пö корöны. Мунiс. Панталiсö кöдзыта. Сiдз кöдзыта, кыдз некöр эз вöвлы.

— Святöйö, шуан, гижсин? Да? — юалiс председатель Илья Зыбов.

Эз вежöрт старик, сералöны нiя нето забыль баитöны, и паныт шуис:

— Примитас кö еныс, угодникö мöда пöртчыны.

— Дак эта быль? А мийö — депутатö бöрйим, выставка вылö иньдылiм!

— Чöлö жö... Мый тi гöрдззат? — öбидитчис старик.

— Гöрдззам? — лöгасис Илья. — Этö тэ гöрдззан, сказкаэсö посадас висьтасян... Сёрнитан кытшöмкö... кыдз нiйö... духхезкöт, кöдна веськöтöмась тэнö, и кöсъян эта понда вичку керны.

— Да тэ мый? Ылавлан?

Вадимер Петрович сiдз и сылiс местаас. Кыдз шум пыр кылiс председательлiсь баитöмсö сы йылiсь, что Öнись осьтöма гортас вичку, сувтöтöма ыбöс вевдöрас крест — «Вадимерсянь енлö дар» — да повзьöтлö народсö страшнöй судöн, если оз пондö корны, мед посадын оссис вичку.

Старик, кулаккесö пидзралöмöн, чепöссис öтöрö да иньдöтчис Öнись керкулань. Киас сюрöм кытiськö шорень и нуöтö сiйö, дзик пуртöсiсь кыскöм сабляöс. Отирыс тэрмасисö кежны ылöжык бокö, а Вадимер Петрович, дзик кодувья, ванзiс:

— Сарафансö нöбöтöма! Напраслинасö Ильяыс вылö гарддис. Бöбöтлiс, страмина!.. Сирота кытшöмкö!

Уськöтчис, кыдз тип вылö варыш, ворота вылас, осьтiс да пырис оградаас. Ыбöс юр вевдöрись казялiс югыт-лöз крест. Нетшкöвтiс сiйö енсорнас — и керкуас.

Öнись казялiс Вадимер Петровичöс крестнас, вешшис пыдöжык еннэз увтас и часто-часто кресталiс кымöссö:

— Образумь, мать пресвятая...

— Ме вежöртöта тэнö! — рякöстiс Вадимер Петрович. — Дитяткоöс, шуан, еныс босьтiс... а ачыт ыбöсат пелитöмыт, торта кöк тэ, — старик кошшис öбиднöйжык кыввез, но нiя эз адззисьö: эз куж сiя видчыны-кöритчыны и висьтавлiс лöгувьяс, мый кыв вылас шедас. — Эшö медбур чаркиэсö сетi, кöть оча кок каттян-ветлöтан. Отопкаэз тэныт новйыны как раз... — Шоччисьыштiс недыр, мöдiс эшö мыйкö висьтавны и, кöр эз адззы нем, пондiс желльыны крестсö джодж бердас. Шöри повзьöм старухаэз, кöдна вöлiсö керкуас, вотьыштiсö осьта öшынас да ыбöсас, а Öнись кулöм не ловья ляпкöтчис угöлас.

— Вот! Кеймы сы вылö, — мыччалiс мастер джодж шöрас, кытöн куйлiс эшö öтпыр казнитöм христосыс.

Öнись лэбтiс киэсö еннэс ладорö, бытьтö корис нысянь отсöт, ачыс горзöмöн горöтлiс:

— Страшнöй суд тэныт лоас! Страшнöй суд, анчикрис!

* * *

Эшö павжунсянь клубö пондiсö öксьыны колхозниккез. Суд пондöтчöмöдз отир эз ни тöрö залоö. Судьялö да заседателлезлö ковсис петны площадь вылö, мед быдöнныс адззисö и кылiсö, кыдз пондас мунны судыс.

Свидетеллес, нiя старухаэс, кöдна вöлiсö Öнисьыс ордын, каттисö сэтшöмö, что Вадимер

Петровичöс то жарö чапкылiс, то кынтiс. Вадимер Петрович эз верит нылö, но сёжö думайтiс: «Может сiдз и вöлi да ме вунöтi лöгувьям, мый кери?»

Илья висьталiс, что эстöн виноватöсь быдöнныс: и правленнё, и парторганизация, и сiя ачыс. Вадимер Петрович аслас векын и понöс эз öбидит. А вот чапкисö старикöс öтнасö, вунöтiсö сы йылiсь и мортыс чуть эз сюр «святöйез» кляпчаö. Ильяöс поперегалiс старуха Зарубина. Гымгис бедьнас му кузяс и корис ыстыны этö «еретиксö» Сибирьö, а то пö посадыс быдöс сотчас либо мöдiк беда лоас. Эд крестсö жугдыны не шутейнöй дело. Еныс вежтас эта понда.

Но сэтчö петiс судья одзö комсомолец Валя Тарасов и корис кыв.

— Вадимер Петрович медбур колхозник, а не преступник. Быдöс эта аркмис Öнись кузя, кöда мортыс горе пыр мöдiс керны аслыс райсö. А мийö чапким стариксö, и эта пережитокыс — Öнисьыс — пырис сы душаö... Вот... Колö игнавны Öнисьыслiсь этiйö... кресттэзнас лавкасö. Тырмас сылö чужöй няньсö сёйны, ась ачыс шедтö.

Валялöн кыввес быдöнныслö лоисö сьöлöмви. Отир öдззис шовкöтны киэзöн, а судья мыйкö гижис бумага вылö.

Вадимер Петрович, дзик öшöм, дзарьялiс öтмöдöрö, а асьсö пöдтiсö синваэз. Ны пыр тыдалiсö гöрдöтöм, радъялан чужöммез Ильялöн, Зыковлöн, Валя Тарасовлöн, агроном Олялöн и эшö кинлöнкö.

И первуись сiя кадсянь, кыдз сотчис керкуыс да кулiс иньыс, Вадимер Петрович вежöртiс, что сiя не öтнас и сiйö оз повзьöт некытшöм «страшнöй суд».

Сылö колö овны, и бура овны; уджавны, и бура уджавны. Уджавны эстöн, му вылас, отиркöт, аслас соседдэзкöт. А небонас ась занимайтчöны учёнöй морттэз — нiя адззасö, мый сэтчин керсьö, кин сэтчин олö. Сылöн «райыс» татöн.

Дата добавления: 2015-11-16