СЫЛÖН ОЛАН ВУЖ

(«Веж Ыб», 1960)

Арся рытö сюри ме Ойвож деревняись стариккез дынö. Пыри правленнёö шоччöтны мыдзöм коккезöс кузь туй бöрсянь да и вельдыр пукалi, кывзi пöрись отирлiсь нелукавöй, немудрёнöй баснинысö.

Гор бокын шонтiсис волькыта сыналöм юра тоштöм старик. Кöбы не чукрасьöм чужöмыс да не шоныт гуняыс — шуин бы сiйö томöн. Пызан дорын, волькыт бедь вылö тшöканас нырыштсьöмöн, пукалiс мöдiк — плешсялöм, кöстiсьöм спинаа; сыкöт ордчöн — куимöт, ид шеп кодь синкыммеза да ёся ныра Опонь. Кык братан — Öндраш да Конаш, кöдна, кыдз гоз нинкöм, пыр öтлаын и батрачитöмась, и графлö руда шедтöмась, и öтiк котелокись солдатскöй каша сёйöмась, и керöмась медодзза колхознöй борозда, — удобнöя лöсьöтчöмась небыт стуллэз вылö. Эна пöрись морттэс, кöдналö ровно бы немлö и петны керкуись, баитiсö государственнöй делоэз йылiсь, политика йылiсь, сы йылiсь, кыдз лэбтiсьö деревня, вöтчö город сьöрö.

— Юра, маш коколь, миян правительствоыс, — нюжвыла баитö Опонь, — быдöс адззö и тöдö, кыдз бур хозяин, мый керсьö аслас хозяйствоын и соседыслöн. Да отирсö велöтö, быдöс висьталö, мый бур, мый умöль. Видзöт, маш коколь, мый петö: одзжык ме тöлöдз эг вермы вежтыны сорок кило яй, а мукöдпыр эг и вежтывлы. А таво, маш коколь, оз и корö менчим, а ме четыреста кило вузалi! Мыля этö, а?

— Антирес тэнат эм — сiйöн! — шуö Öндраш. — Висьталан тай, вит тысяча босьтöмыт...

— А кыдз инö не да? — содтö Конаш. — Антирес, ыджыт антирес овны керисö! Токо ов да ов — не олан, а малина лоас. Вот бы годов десяток чапкыны мышкись, а?

— Пыр бы кöс погоддя сулалiс, дак олiн бы эшö. А то свищень, то морока... Нöитö сiя, висьöтö миянöс, — норасьö горбокись дед.

— Вот бы томтiсö миянöс нето мöдпöв кисьтiсö! — öдззöтö сылiсь баснисö Öндраш. — А то эд и уджыс миян понда эз ло. Мöйму ме завёрткаэз да мый да кыйлi, а таво кöртовöйöсь дорисö. Сторожжез оз колö... Öх-хö-ö!

— А тэ, маш коколь, — велöтö Опонь, — мырддьы внучекытлiсь комбайнсö! Вон мый Пиляйыт уджалiс: эз сет ассис вакансиясö — и быдöс! Кöть калека, а томмесö янöтö.

Меным охота лоис тöдны, мый керис Пиляй, кытшöм «вакансия» сылöн. Видзчисьыштi, кöр дугдасö баитны стариккез, да кори висьтасьны эта йылiсь дед Опоньöс. И то мый тöдi.

Дед Пиляй ныкöт годок — сизимöт десяток тыртö. Юрыс быдöс чавмöм ни, бытьтö тэсьöн мавтöмась, но öтiк тылöп эшö абу усьöма. И синыс сё лэчыт: очкиэзтöг емö сунис пысалö. Да и котрасьö эшö бедьтöг, кöть и пукок вылын дзурликтö: коксö германскöй война сёйöма. Орöтасö сэтчин коксö и иньдöтасö Пиляйöс гортас. Только гöтрасяс — революция лоас, гражданскöй война лэбтiсяс. Пиляйöс бöрьясö беднота комитетö. Сыбöрын чочкоммез локтасö. Айыс мунас гöрддэзкöт обозö, а зоныс оз ешты, гортас кольччас. Пиляй шедас чочкоммес киö, кувтöдз сiйö вартласö, штыккезöн спинасö лöсъясö да, кыдз понöс, чапкасö кырасö, кытчö отирыс упадь кыскавлiсö. И кин эд изгиляйтчис — аслас сосед, урядник пиян! Кынмис бы сiя, шöри стрöйдöмыс, кöбы эз инмы Пиляй вылö öтiк инька. Каяс сiя идзасла да и казялас Пиляйсö. Каттяс сiйö аслас пасёкö, пуксьöтас кöрым дадьö да и вайöтас иньыс дынö гусьöн. Вельдыр вöдитчас иньыс, но Пиляй сё жö лэбтiсяс. Только оланыс эшö мöдпырся сюрресö мыччалас.

Öтпыр рытнас нуöтас иньыс Пиляйöс пывсьыны, а посöдз ыбöссö пытшксяняс потш вылö игналас. Сы коста урядник пиян вайöтас код солдаттэзöс: кылöма, что Пиляй ловья. Горöтлöны, ыбöссö чегöны, тшöктöны осьтны керкусö. А керкуын шы абу. Сэк унтер тшöктас гöрд петух лэдзны: ась пö быдöнныс сотчöны, кин эм керкуас. Öзтасö öтмöдöрсянь, öшыннэзас гранатаэз чапкаласö да ванзöмöн мунасö. Урядник зонлö и эта етшаöв лоöма: кольччас да мунас банясö палитны. Сибöтчас баня дынас да и кылас пывсян дуксö. Юрас, тыдалö, виль дума пырис, поди, мöдiс пасьтöммесö лым кузяас вашöтлыны, а то эшö кыдзкö кешитчыны. Но Пиляй видзчисьöма ни гöсьсö, адззылöма, мый уджалiсö солдаттэс. Осьтас урядник пияныс öтöрись ыбöссö, горöтлö: «Петö, а то сота!» Пиляй голосыс сьöртi тöдас, кин локтöма, да крепытжыка жмитас киэзас каменица вылiсь босьтöм изсö. Урядник пиян иньдöтас штыксö одзланяс, чувйыштас öтöрö-мöдöрö пемытiнас, сэсся юрсö сюйыштас лажмытик ыбöсокас да лöсьöтчö вожмöвтны порогсö. Пиляй лэбтас да лэдзас изсö сы юр вылö, но небура инмас. Мöдыс пышналас бы штыкнас Пиляйсö да только пемытiнас пась поласö сылiсь писькöтас да штыксö керас сибдöтас. Пиляй кöть и öтiк кока да и сiя извередитöм, но ки выныс öксьöма ни. Мöртас чуннесö солдатыс кавтыкö да и личкас порог одзас, кавтыксö бы нечистöй душа сорнас нетшкöвтö.

Иньыс кулöм не ловья банясис петас, сулалö, киэсö öшöтöмöн, оз лысьт сибöтчыны ны дынö. А керкуыс, дзик сартас чажöтö-сотчö, картаын подаыс умöль голосöн горöтö. Но смевжык соседдэс петасö гортсиныс, чукöртчасö сотчан керку дынас, палитчöм подасö гидсис лэдзасö, а кусöтчыны сёр ни. Сулалöны, кин пернапас пуктö, кöда синвасö чышкö, и некин шы оз сет. Сэтчö челядьыс казяласö баня дынсис мыйкö сьöдö. Мунасö стариккес, видзöтöны: морт вылын морт куйлö. Öдва мездöтасö Пиляйлiсь киэсö солдатыс голя бердiсь, а солдат синнэсö барöтöма и пон моз öмсис кывсö бокö чапкöма — мыччöма. Пиляй сувтас пидзöс вылас, миссьöтас киэсö лымнас. Ачыс думайтö: «Öшис юрö срамина понда. Но кöть öтiк живодёрöн светас етшажык лоас!» — и шуö отирлö:

— Нате, сёйö менö... Да эд вунöтö: правдаыс миян дор! Сiя вермас...

— Ен тэкöт, зонка, — горöтчис кинкö пöриссес коласiсь. — Мийö не юрсёйиссез, грех сiдз-ту миян йылiсь думайтнытö!

Сэк вöлись Пиляй казялас, что сы гöгöр аслас соседдэс, сэтшöм жö гов отир. Дзимляласö урядник зонлiсь трупсö, сетасö Пиляй гозъялö вöв да иньдöтасö Кувакушö, кытiсь висьталiсö гöрддэсö. А сэтчинсянь мунасö нiя и Омутнинскöй заводöдз. Тулыснас айыскöт пантасяс, да только айыс чожа синнэсö игналас, сiйö сюйыштасö муö: обоз вылö уськöтчасö чочкоммез, быдöс стариккесö кераласö.

Бертасö гöрддэс, вашöтасö чочкоммесö миян му вылiсь, а ныкöт локтасö и Пиляй гозъя. Пиляй — грамотнöй мужик, смышлёнöй. Босьтасö сiйö уездö, год-мöд сэтчин уджалас, челядь лоасö. Кöр лöньсяс гражданскöй война, Пиляй пондас гортас корсьыны: сьöкытöв сылö пöв кок йылас бергавны да и му бердiсь, кытi первöй шаггесö керис, сьöкыт калькöтчыны. Мужиклöн эд душаыс му бердас видзсьö, кыдз вужжезнас пу. Орöт тэ сiйö му бердiсь — косьмас. Вот сэксянь и уджалö öнöдз Ойвожас, уджалö и купыр оз кер. Уна год ни колхознöй лён быдтö да сэтшöмö — любо видзöтны. Неетша отир сы дынö велöтчыны вовлö.

А Пиляй быдöннысö привечайтö, быдöнныслö, дзик профессор, висьтасьö, кыдз сiя аслас звенокöт сэтшöм «чудосö» керö. А мöйму, кöр джын районыс öтiк колхозö öтлаасис, Пиляйöс курорт вылö иньдöтлiсö, но сiя одзжык сэтчинсянь локтiс, джын сроксö только и олiс. Бытьтö тöдiс сылöн сьöлöмыс, что мыйкö умöль вермас лоны гортас, сё Ойвожас, вöрас кыскис. И былись, эз бöбöт старикöс пöрись сьöлöмыс: дед Пиляй туйö мöдiкöс пуктöмась, ась пö шоччисьö ни, нем сылö орöтны асьсö. Дак мый сiя керас! Пöрись мортöс пö бокö вештыны?! Да меным пö некытшöм курорт оз ков, то пö сiя курортыс — Ойвожас, некытшöм пö пенсия, некытшöм деньга оз ков, но лён дынiсь эд вашöтö!

— Ме тай шуа, — висьтасис одзлань Опонь, — сiя мусö, кыдз кагаöс пеленайтiс — зорöтiс, уна нужда курмыштiс сы кузя, дак зубыт сыкöт янсöтчыны... сёровно кыдз кучиктö кульыштны. А мыля öнöдз чож, öнöдз кушык оз кер, дак ме думайта, муыс кузя жö. Сiя, муыс, сэтшöм мортсö берегитö, ассис вынсö сетö...

КОСИНКА

(ордч.: Кымöрыс мунiс гымавтöг)

Рита саймис ракаэз да чавканнэз гайзöмсянь. Сiя мöдiс уськöтны тöдвылас, мый жö сэтшöм бурсö да мичасö вöтасис узикас, мыля сэтшöм долыт да кокнит öнi сьöлöм вылас. Но вöтыс вунiс, рознитчис, дзик кизерик туман. А шондiлöн рамыник югöррес нюлöны чужöмсö, гильöтöны голясö, и нывкалö кажитчö, бытьтö сiйö малалöны мамыслöн шоныт киэс, кöдна боссьöмась шöмтöм ырöш да йöв дукöн.

Но мыля жö талун сэтшöм гажа асылыс, мыля сiдз радуйтчö Риталöн сьöлöмыс? И казялiс тумбочка вылiсь лöзкодь бумажка.

Телеграмма! Федясянь телеграмма: сiйö вайисö тöн рытнас.

Нывкалöн сразу онзiльыс öшис, бытьтö ваöн сы кузя койыштiсö. Вот и локтiс сiя луныс, кöдö сы дырна видзчисис Рита. Только вот рака табуныс öддьöн ни шумитö. Не весь этö, сiдз и тöд, зэр лоас. Сьöд борда кай пессьö непогодь одзын. Дзугыльтчисмоз нывкалöн сьöлöмыс, дугдiс токöтны сiдз радöн, но Рита сэк жö макнитiс кинас: ась пö карзöны сьöдкуллез асланыс юр вылö. Да кытшöм, поди, зэр, кöр öтiк кымöрок оз тыдав?

Рита чапкис шебрассö, чеччис да тэрмасьöмöн пондiс пасьтасьны. Быд нывка тöдö, что пантавны зонкаöс, кöдö любитан, абу кокнит. Сiдзкö, колö лöсьöтчыны. Рита котрасис миссьыны, сыбöрын плитка весьтын шонтiс кöртовöй ручка да каттис сы вылö пельбокись лэдзчисьöм пилиммесö.

Сэтчö и подружкаэс саймисö. Узьны бы нылö кресенняас дыржык, нежитчыштны мымдакö, но позьö я туплясьны ольпасьын, кöр подружка мунö пантавны ассис сьöлöмшöрсö! Не шутка эд — кык год зонкаöс армияись видзчисис!

Öтiк вöзйö Риталö часы, мöдiк тшöктö пасьтавны ассис платьесö, куимöт сетö виль туфлиэз — быдöнныс пасьтöтöны бы нывкаöс бытшöмика и каждöйыс ас мознас. Рита только киэзнас öвтö: нем оз ков. И пасьталö платьесö ассис, голубöйсö, кöдö лöсьöтöма эшö рытсянь.

Катя, Риталöн бур подружка и городскöй морт, перво быд ладорсянь видзöтö нывкалiсь паськöмсö, сэсся тшöктö мыччавны и пиннесö, кыдз нiя весöтöмöсь.

— Сöстöм пиннез, — велöтö Катя, — шыннялiкö медважнöйöсь. И краситöм тырппез... Эн вунöт эта йылiсь.

Катя — модница. Сiя и пасьтасьö бура, и йöктö ас мознас — быднёж пиньласьö. Сылiсь сярзьöмсö позьö и не кывзыны. А шынньöлыс Риталöн и сiдз бытшöм: кыдз серöмтчас, сiдз и гöпоккез лоасö öм дорас — серöмтуссез, кыдз шуис нiйö Федя. И тырппес зэв рöмаöсь, дзик жельнöг цвет.

Но вот Рита и готов, позьö мунны ни.

— А чышьяноктö босьтiн? — юалö Риталiсь Катя.

— Ой, Катька, вунöтi эд!

Рита кыскис джодж шöрас чемодан, осьтiс сiйö и сылiс местаас: медвевдöрас куйлiс голубöй косинка. Жырын шы эз ло, только кылiс, кыдз öшын увтын дзингисö мошшез — кошшисö нектар.

Рита мöдiс бöр игнавны чемодансö, сайöвтны басöк косинкасö йöз синсянь, да эз вермы и чуньöн вöрзьöтны, бытьтö кикоксö кинкö гезöн кöрталiс. Да мый дзебан, кöр быдöнныс казялiсö ни косинкасö? И, конечно, сразу тöдiсö. Сiйö эз позь не тöдны — сэтшöмыс педучилищеын вöлi öтiк только Катялöн. Öшис косинкаыс неважын. Сэк дыркодь шумитiсö нывкаэс, споритiсö неетша, а Катя нельки горзiс — косинкасö Москваись вайлöма. Сiдз и эз вермö тöдны, кытчö сiя лоис. И вот адззисис. Адззисис Рита чемоданын.

Ыш ловзисис Рита, кыдзкö полöмöн, дзик калитчöм кöрт, босьтiс косинкасö да нюжöтiс Катялö:

— На, дзимляв, сыбöрын быдöс висьтася.

Катя примитiс косинкасö, нюмыртiс паськыт тырппесö и пинь пырйöттяс шуис:

— Мый ни öнi висьтасьны? И сiдз вежöртана...

— Эх тэ! Корин бы, дак ачым сетi, — и чывкнитiс-мунiс Рита одзöт ыбöсланьö, чуть кок чуннесö подружкаыслiсь эз таль.

Сы бöрсянь юрнысö öшöтöмöн петiсö и мöддэс. Рита, дзик öшöм, гöгöртiс размöд жырсö да уськöтчис кыминь аслас кровать вылö. Öнi сiя эз берегит нöитчöмсянь не воротничоксö не платьесö, кöдö сiдз бура утюжитiс тöн уборщица Фима ордын.

Фима олiс эта жö керкуын, улiсь этажас. Вöлi сылöн жöник, да мунiс кытчöкö ылiсь стройка вылö, колис инькасö нёль челядьöн. Медыджыт нывсö Фима сетiс школа-интернатö, а мöддэсö, кыдз вермис, ачыс быдтiс. Ваяс куш пызан вылас нянь да похлёбка — вот нылö и öбед. Мукöд велöтчиссес, кöдна ваявлiсö Фималö песласьны, сюйыштлiсö челядь киэзö то кöвдöм, то пряник, то конфетка.

Вот и тöн Фима вöлi мышкыртчöма öр весьтö, а челядь орсiсö: медучöтыс кыскасис джоджын, а ыджытжыккес идзас тылöп понiсь лэдзалiсö поллез. Лабичын ордчöн матегкöт куйлiс нянь шöрöм. Сiйö боёка то öтыс, то мöдыс кöс чуннезöн чеплялiсö челядь и сюйисö öманыс.

Рита утюжитiс платьесö и кутчис ни ыбöс вуг бердö, да казялiс, кыдз нылочка каттьö голубöй косинкаö трепичись керöм аканьöс.

— Таню, тэ кысь этö? — косинка вылö мыччалiкö юалiс Рита. Нылочка и öмсö эз ешты осьтны, кыдз сы вылö уськöтчис мамыс, буткис кулакнас лопаткаэс коласö да нетшкöвтiс кисис косинкасö.

— Кин тэнö тшöктiс вöрöтны! — чирзiс Фима. — Мыйлö чувьян?! Рита кыскис ас дынас нылочкасö, кöдалiсь мамыс грöзитчис пиньöвтны юрсö, и юалiс:

— Тётя Фима, кытiсь тэ сiйö адззин? Эта эд Катялöн.

Сы туйö, медбы видзны ответ, Фима пуксис пеславтöм паськöм груда вылö и горзöмсорöн пондiс норасьны аслас умöль олан вылö. Сiя висьтасис артавтöм жöникыс йылiсь, орöм-киссьöм паськöм йылiсь, тшыг челядь

Рита нем эз шу паныт: не эз винит этö винерик инькасö, не эз дорйы, не эз öв. Кыдз тшын пыр нывка адззис лöзöтöм ныра дулльöсь мужикöс, кöда пасьтöг чеччалiс лым столаын да ошкис ассис начальниксö бур магарыч понда. Усис тöдвылас код песня:

Раз-здайся, нар-род, Меня пляс-ска берет!..

— Нимлун медыджытыслöн, — висьтасис Фима одзлань.— Öтнас эд сэтчин, интернатас, айтöм-мамтöм... И пыстöм ем некöр эг вöрзьöтлы, а вот дявыс, тыдалö, чувйыштiс, — и бöра пондiс горöтлыны: — Да и оз ков, оз ков меным чужöйсö!.. Мый нö синнэтö барöтiн? Мун, мун норась, ась ньылыштасö менö!

Фима сюйыштiс косинкасö Рита киö и тойлалiс сiйö ыбöс сайö.

«Мый жö эта сэтшöмыс? — думайтiс öтöрас öшöм Рита. — Мый öнi керны?»

* * *

«Мый öнi керны, мый керны?» — шушкис Рита горзöмсянь вамöм подушкаö.

А öтöрын, дзик ведра понiсь, кисьтiс крут зэр. Сiя вартiс стена кузяс, гывьялiс бусöсь öшыннэсö, миссьöтiс пу листтэз да кöтöтiс рака поззэз. Сётаки не весь карзiс рака чукöрыс...

Рита куйлiс кровать вылас и эз тöд мый керны. Ежели бы тöн жö висьтавны, кыдз аркмис. Но Катя бордпавйöн бы котöртiс комендант дынö, лэбтiс шум. А вашöтасö Фимасö, кытчö сiя мунас? Не удж, не оланiн оз ло. Öтнас бы вöлi, дак эшö, а челядьнас... И суськыны оз туй, и не суськыны тожö. А сэтчö эшö Федяыс локтö.

Сiдз Рита и водiс тöн, нем бурсö эз вермы думайтны. А косинкасö чемоданас чапкис: ашын пö мыйкö кера.

Вот и видзчисис ашынсö. Эшö öддьöнжык делоыс гардчис. Лэбас слава: Рита гусясьö. И самöй экзаменнэс одзын! Эшö бы не забедно вöлi, ежели первöй годас. А то ашыння велöтiсь — и нате. Сэтшöм характеристика сетасö — тюрьмаö пондан ёркöтчыны и то оз лэдзö. Э-эх!.. Дак мый жö, примитны славасö, терпитны эттшöм позорсö? Али мунны директор дынö и висьтавны веськыта? Колö ветлыны. Нем тшыкöтны том олансö. А то ыскöвтас счастьеö бокöттяс: и Федя, и любимöй удж, и гаж — быдöс öшас. Вöлись и каитчы, кукуйт öтнат, кыдз кöк вöр пыдöсын. Но сётаки... Ась Фима умöль морт, а челядьыс? Нiя не виноватöсь. Нылö колö гаж да пöт олан. А Рита эд том и öтнас, сiя кöть кöр адззас местасö оланас. Светыс паськыт, и бур отир быдлаын эм. Колö норовитны. Мый лоас, сiя и ло.

Посöдзын небурика дзуркнитiс ыбöс. Рита чепöссис кровать вылiсь и сувтiс öшын одзас, ыбöсланьö бöрöн. Пырасö кö нывкаэс, буржык лоас, ежели не видзöтны ныланьö, не пантасьны ны синнэзкöт. Сiдз абужык стыд.

Зэрны дугдöма, öтöрын мича да гажа. Осьта öшынöт кыссьö ыркыт руок. Ыджыт зэр дзик томмöтöм да öддьöнжык зеленитöм пуэсö. И öнi, кöр пуэс чапкисö вывтсиныс чалöй буссö, нiя нежитчöны да чöскыта сунасьöны шондi югöррез увтас. Только чуть-чуть дрöжитыштлöны тополь листтэз да öтi-мöдiлаын усялöны незьдöм му вылас ва воттез: тёп, тёп, тёп...

Риталiсь кинкö малыштiс юрсö. Нывка бергöтчис: одзас сулалiс Фима. Сылöн синнэс гöрдöтöмась горзöмсянь, но öнi абу лöгöсь, кыдз тöн, и югьялöны, дзик стекляннöй доноккез.

— Вöлi ме комендантыс ордын, — юöртiс Фима. — Думайтi, важын ни юртö вердiн. А сiя менö тэ дын ыстö: кор, шуö, воровкасö, репйыны колö сiйö. Подружкаэс, шуö, сэтшöмыскöт оз пондö овны. А ме сылö паныт: кыдз, мыся, репйыны? Нёль год велöтiт, деньга видзитö, а öнi репйыны? Ежели сiдз, мыся, дак менö вашöтö. Сэтчö и винитчи ме, висьтаси вöлись... Ме босьтi — меным и вежтiсьны. Ачым эд сьöд кымöрсö — эттшöм грозасö — кори. Да не лёк, тыдалö, тулысся кымöрыс: эз гымав, эз вирдав, а только буссö кöтöтiс. Подружкаэт жалейтiсö менö, чапкöмсö. Ковсяс пö, дак быдöс комсомолсö лэбтам, челядя инькаöс ог сетö вöтьны. Вöв нёль кока, и то джöмдалö. Порука пö видзамö.

Рита жмитiс Фимасö ас бердас. Кыдз жö сiя вермис не надейтчыны отир вылö, кöднакöт öтлаын юö-сёйö, кöднакöт олö öтiк крыша увтын и ветлöтö öтiк туй кузя? Фимаöс умöлик мортöн лыддис, нывкаэзсянь полiс, Федя йылiсь думайтiс, что осудитас.

Не, батя, не сэтшöмöсь нiя, кыдз Рита думайтiс, — буржыкöсь, добрöйöсь, и кöть кöр готовöсь отсавны мортлö.

* * *

Ю дорись туёк кузя мунöны кык морт: голубöй платьеа нывка да быгалöм и вежöтöм паськöма солдат.

Паныт нылö котöртöны нывкаэз. Нiя локтiсö татчö тшöтшкöравны да öктыны цветтэз, и, конечно, нылö охота видзöтыштны асланыс счастливöй подружкалiсь другсö.

Чöскыт, ма дука, видз весьтас руыс, гора да гажа кайезлöн дзульзьöмыс, сöстöм зэрбöрся небоыс, дзик голубöй чышьян. Только ылын-ылын, кытöн небоыс öтлаасьö вöр зеленькöт, öшалö руд кымöрок, учöтик да кокнитик, кыдз шёлковöй косинка.

Только сiя и уськöтö тöдвылö зэра кымöрсö, кöда неважын повзьöтлiс отирсö аслас лöг мурзьöмöн.

Дата добавления: 2015-11-16