ТУЙСÖ БÖРЙÖ СЬÖЛÖМ 1 страница

Энö кык мортсö, кöр нiя пырисö правленнёö, некин эз казяв, кöть нiя и эз вöлö учöтöсь да неприметнöйöсь. Öтыс вöлi чочком вира, ёныник, дженытик чикисёка нывка, мöдыс — сьöдвевья чужöма зонка. И пасьтасьöмась нiя öтмоз — гöрд спортивнöй йöрнöссэзö да руд вешьяннэзö. Нывкалöн киас сумка, сумкаын — öбед; зонка шамыртöм конувтас кык комбинезон. Мыгöрнаныс — дзик öтiк öшöпекись шульыштöмöсь. И ниммезныс почти öтмоз горалöны — Сима да Тасим, и годдэзныс öтмымдаöсь — восемнадцатöй гожум чулöтöны да вöлись только пондöтöны ассиныс удж биография.

Правленнёын сяткöтiсö счётыэз, сяркйис-ёркöтiс арифмометр, кышöтiс бумага. Кабинетын, кöда ыбöс вылын вöлi гижöма веж краскаöн öтiк кыв — «Механик», вöснитик голос орöттöг чирскис:

— Чиркан, Чиркан, Чиркан...

Но Чиркан, тыдалö, эз шыась, и звонитiсь морт жиль-жоль öшöтiс трубкасö да гартыштiс сэтшöм кыв, кöдö Сима да Тасим эз на пантавлö некытшöм книгаись. Локтiс председатель, керкуас лоис ровно дзескытжык — сэтшöм вöлi ён. Сiя нёджжöвтiс öтмöдöрö, здоровайтчис и пырис аслас кабинетö. Сы сьöрö вöтчис усiа бухгалтер, винерик да блед чужöма морт.

Председательöс Сима да Тасим тöдiсö не öтiк год ни. Кöть сiя и не татiсь, локтöмовöй, но отир сiйö радейтiсö кыдз бур хозяинöс да мывкыда мортöс и мöднёж, кыдз Фома Матвеич, эз шуö.

— Пырам, — шушкыштiс Сима ёртыслö. — А то этадз рытöдз сулалам, некин миянöс оз кор.

Сэтчö локтiс Иван Лукич, колхознöй механик, казялiс том морттэсö, шуис:

— Уджавны локтiт? Вот этö бур, öддьöн бур! — и горöтiс председательлö:

— Фома Матвеич, петав-ко татчö!

Председатель сувтчис осьтöм ыбöсö, дзик пыкöтасис сэтчö, и сувтöтiс синнэсö механик вылö, кöда сулалiс ордчöн челядькöт.

— Видзöт, Матвеич, смена меным локтiс, — пиннесö векыштöмöнмоз сералiс Иван Лукич. — Эта Тасим Чуканов. Орёл! Год уджалас — вежас менö. Экзаменнэз нысянь примитi, тöда.

— А мийö тöдсаöсь сыкöт, — горöтчис председатель. — Да орёлыс, адзза, не öтнас. Сыкöт и...

— Сима. Золото-нывка! — висьталiс Иван Лукич, кöда прокод морт йылiсь думайтiс буржыка, кыдз эм.

Эна кыввезсянь Сима гöрдöтыштiс, повзис, бытьтö керис мыйкö неладно и эз письты нем висьтавны паныт.

А председатель юасис ни Иван Лукичлiсь, кытчö сувтöтны виль механизаторрезöс, кытшöм удж нылö адззыны.

— Прицепщиккез озö тырмö вот...

Сякöйсö видзчисис Тасим татчö локтöн, да только не эттшöмö. Эшö позис согласитчыны, ежели вöзйисö бы умöлик трактор.

Зонка шай-пай лоис, öдззис мыктавны:

― Иван Лукич, кыдз инö, мыля инö...

— Прицепщикавнытö? — отсалiс Иван Лукич. — Не, зонö, сетам машина. Только... Ладно, мунö мастерскöйö, видзчисьö менö сэтчин.

Вежöртiс Тасим, мый мöдiс висьтавны механик: сетны пö сетам, да только не гöняйтны сiдз, кыдз школаас. А то и машинасö жугдат, кыдз мöйму Тасимыс, да и асьныт дойматö. Вот мый мöдiс висьтавны механик!

— Но, мый нö юртö öшöтiн? — юалiс Сима, правленнёись петтöн. — Али сьöлöмыт пессьö, полан?

— Ме вот мый йылiсь думайта, — висьталiс зонкаыс, — кытöн мöдiккес? Локны эд кöсйисисö.

— И тэ веритан, что Витя да Андрей локтасö? Кыдз инö не да! Видзчись, кöр туриыс гöрöвтас! Этö нылöн манёвр сэтшöм вöлi.

— Да но тэнö, — öвтыштiс кинас Тасим. — Кинлö колö сэтшöм манёврыс — бöбöтчаныс?

— Тэныт оз ков, а нылö, волькыттэслö, колö. Ме этö одзлань тöдi. И миянöс, и школасö бöбöтiсö.

— А тöдiн, дак мый нö чöлiн? — лöгöн юалiс Тасим. — Петö, что тэ отсалiн бöбöтчыны. А эшö школьнöй комсорг...

— Комсорг, комсорг... А мый ме верми керны, кöр дирекция сетöма приказ: труд да практика сьöртi нылö сувтöтны бур оценкаэз, экзаменнэз вылын двойкаэз не тэчны.

— Но, ась. Нем ны понда тöждiсьны. Может, и локтасö эшö. А озö, дак озö: уджыс оз сувтчы нытöг. Мунам мастерскöйö.

Колхознöй мастерскöй, кöркöся РТС, сулалiс ордчöн правленнёкöт, и минута-мöд бöртi челядьыс вöлiсö сэтчин ни. Моторнöй цехын, кытчö пырисö Сима да Тасим, кык пельшы оз кыв: дугдывтöг гурöтiс мотор; сылiсь шумсö мукöдпырся вермылiс кальскöтöм, кöда вукойсявтöдз чанöтiс пеллез. Кузницаын сьöкыта ружтiс механическöй молот: уух-бут, уух-бут!

Челядь кытшöвтiсö цеххесö, петiсö öтöрö. Некин эз юав, мыйлö нiя локтiсö, некин эз пантав. И цветтэз эз вöлö, кыдз думайтiс Сима. А Тасимлöн юрас поздiсис мöдiк дума: мый жö нылö сетасö — трактор али комбайн? Вильö али киссьöм телега кодьö? Конечно, не вильö. Виль вылас, натьтö, уналöн öмныс осьта. Да и то кыка только виллес.

— Вот этö бы сетiсö, — висьталiс Тасим, СК-4 одзö сувтчикö.

— А вон сiя оз ков? — Сима мыччалiс бокын сулалан машина вылö да серöмтчис.

— Сiя чапкöм ни. Адззан, быдöс кульöмась, мый дзоньыс вöлöма.

Ны басни вылö öтiк комбайн увтiсь петiс мавтчöм паськöма морт, юалiс:

— Но мый, жоннез, уджавны локтiт али экскурсияöн?

Тасим бергöтчис сыланьö, тöдiс, кин сiя, здоровайтчис:

— Дядя Михей! Здрасте!

— А, Тасимка! — шынньöвтiс комбайнер. — Бур лун!

Дядя Михей — Чукановвезлöн важся тöдса. Сiя олö мöдiк деревняын и Тасимкöт пантасьлö шоча. Тасим айкöт нiя öтдруг зонкаалöмась, öтлаын фашистöс паздöмась и öтдруг госпитальын куйлöмась. Овлö жö сiдз... Кöр пантасясö праздник коста, шутитöны кык ёрт: попыс пö миянöс öтiк купельын пыртöма, сiйöн и оланным öткодь. А судьба нылöн завиднöй. Кöть уна дöнзис ны век вылö, да этасянь эз пезьдö, а эшö вынажыкöсь, эшö крепытжыкöсь лоисö и мывкыдныс содiс. Конечно, сьöкыт оланыс — лёк кадыс — колис ассис пассö ны оланö, да и кинлö, кытшöм мортлö вöлi кокнит керны счастьесö, счастье не кылöн, не басниöн, а аслас мылаöн, аслас юрöн, аслас киэзöн?

Михейлiсь чужöмсö нёштöмтö кыз рубец — пулялöн след. Учöтнас Тасим повлiс эта рубецись, эз лысьтлы сибöтчыны Михей дынö, гöснеч эз примитлы. А öнi, конечно, тöдö ни: кöть Михейлöн нёштöм чужöмыс — вочöм рожабана, а киэс и душаыс сэтшöмöсь, кöдна не сiдз ни часто пантасьлöны.

Деревняын Михейöс зэлыт мортöн лыддьöны, бур хозяинöн пуктöны.

— Дак, шуан, колхозö? Айыт туй кузя жö? — баитiс Михей. — Вот и ладно, вот и ладно. Тiян коддес, грамотнöйес, миянлö öддьöн колöны. Кыдз крестьянин оз вермы ырöштöг овны, сiдз и мийö, пöриссес, грамотнöйезтöг öшамö. Вон чертёжжез локтiсö, кыдз буржыка лафет лöсьöтны, а миянлö — пемыт вöр.

— Но, уж и пемыт вöр, — серöмтчис Тасим. — Кöркö велосипед вöлi ачыт керöмыт, а öнi...

— А öнi кутча, дак öтнамлöн нем оз пет. А тiянкöт — быдöс керам!

Баитiссез дынö чукöртчисö механизаторрез, кывзiсö. Öтiк тöдтöм детина, тыдалö, виль механизатор, гöгöртiс не тэрмасьöмöн челядьсö, видзöтiс, дзик товар бöрйис, и качыкнитiс юрнас Сима вылö:

— И эта аканьыс миян дынö? — юалiс сiя да чупнитiс паськыт тырппезнас. — Туяна!

— Татчö жö, — шыасис Сима. — Ме и комбайн, и трактор велöтi.

— Да но-о? — кешитчöмöнмоз юалiс детина. — Он и пöрьясь? Сразу комбайн вылö мöдан пуксьыны?

— Может и пукся. Не веснясьны жö татчö локтi.

— А ежели звездаокыс мезмас... — сэтшöм чача комбайн вылас эм, басöка эд бергалö — мезмас да лöсьыт кадж кузят, а то и кымöсат чеччöвтас? Мамуыт абу матын, и меным синваэтö некöр чышкыны... Сэки кыдз?.. Орсiн бы гортат аканнезöн, эн сад небыт киэтö. Сима видзöтыштiс лöз синкагаэзнас, юалiс:

— Небыт киэз, шуан? На видзöт, — паськöтiс, дзик мыйкö резыштiс киэзсис.

Детина вештiс нывкалiсь киэсö, бобгыштiс ныр увтас:

— Кытчö сюян?! И не сэтшöмöсь адззывлiм. Михей мигнитiс öбидитчöм мортлö да юалiс:

Но мый, Гоша, эз я лязö пиннетö? Сiдз и колö тэныт, кывтö эн видз кузя!

Гоша, бытьтö нем эз и вöв, сюйыштiс киэсö вешьян карманнэзö да шутнявтöн иньдöтчис тракторлань. Локтiс Иван Лукич, юöртiс:

— Машина сетамö, эд тöждiсьö. Вон сiя, роднöйыс менам, видзчисьö настоящöй мастеррезöс, — механик мыччалiс важ комбайн вылас. — Мотор дзонь, молотилка эм. Видзöтат, мый оз тырмы, а рытъявнас висьталатö меным...

Механик мунiс, челядь сибöтчисö матöжык, мед буражык тöдсасьны эта «роднöйкöт». Ны одзын сулалiс сэтшöм машина, кöда важын ни видзöтiс свалкаö, а не ыб вылö. Сыкöт только кадсö öштан, вынтö песан, а некытшöм прок оз ло. Колö откажитчыны сысянь, откажитчыны öнi жö. Ась сетасö вильö нето...

— Лок, ветламö Иван Лукичыс дынö, — горöтчис Сима да мыдз походкаöн иньдöтчис мастерскöйлань. Тасим — сы бöрсянь.

Эшö посöдзсянь нiя кылiсö Иван Лукичлiсь горöтлöм: сiя кинöскö подчитывайтiс умöль удж понда. Кöс да лэчыт кыввез чеччалiсö öшынiсь, ровно репродукторись, и кажитчис, что нылö оз ло конец. Механик, кыдз кöркöся кöдзись, чавкйис-коялiс нiйö расчётливöя, «челезнатöг», и, тыдалö, надейтчис, что нiя, кыдз сю туссез жö, сидзасö мортыс сьöлöмö, и ежели сiя не из кодь чорыт и абу эшö досповна изöртчöм, то умöлик, да лоас урожай.

Но механик нето мыдзис, нето бырсис сылöн «кöдзысыс» — вдруг лöньсис и пондiс баитны гусьöнжыка да ласковжыка. Öнi сiя ошкис Тасимöс да Симаöс, кöдна кутчöмась лöсьöтны чапкöм комбайн. И сiя, Иван Лукичыс, веритö, что челядь петкöтасö машинасö ыб вылö.

— Видзчись менö, — шуис Тасим. — Ме пырала.

— Эн на... Совсем эн пыр, — Сима кутiс ёртсö сосöттяс.

— Ме недырик токо, — зонка саясис пемыт коридорö.

Сима ниртiс тшöкасö — этадз сiя керлiс прокод, кöр вöлi мыйöнкö недовольнöй али думайтiс ыджыт дума. Мый лоас öнi? Откажитчыны первöйся жö лунас... Не, не сiдз нiя решитiсö, кыдз велöтiс нiйö Аркадий Аркадьевич, логика сьöртi преподаватель. «Некöр эн шу, что ог вермы керны, ежели эн на кутчыв удж бердас», — баитлiс сiя. И эшö: «Сизимись меряйт — öтпыр орöт». А нiя... не, оз ло сiдз, Сима чеччöвтiс посöдзö и люкасис морткöт.

— Тэ мый, акань, синнэтö гортат колин али похмеллё нöитö?

— Ой, эг казяв... Пемыт эстöн...

— «Эг казяв, пемыт!» — нерис сiйö тракторист, кöдакöт Сима «гыжьясис» неважын. — Вот — ме югдöта!..

— Сима, на-ко видз! — петiс посöдзö Тасим да пондiс сюйны сы сумкаö кытшöмкö книгаэз, бумага, карандаш. — Тэ пондан гижны дефектнöй ведомость.

***

Лукасов... Тэ тöдан, ёртöй, мый сiя сэтшöмыс? Ежели тэнат деревня бокöт визывтö Иньва, нето больгö Сэполь, нето жагöника, величавöя катöвтö да чуть тöдчöмöн гыасьö Велва нето Весляна — тэныт тöдса эта ассяма гожся сёяныс. Коми морт тюкö-панялö сiйö, кöр нем пуны, но сёйö сiйö и сэк, кöр пызан вылын сяр видзö берся сёян. И курыт сiя — чизырсов, да коми мортлö, тыдалö, чöскыт.

Тасим бертiс мастерскöйись уна рыт ни. Гортас некин эз вöв. Котрасис огородечö, чеплялiс кырымтыр луктурун, тырис бекöрö. Сэсся крута солалiс (буржыка нырсяс и чöскытжык лоас!), нöитiс токмачöн — пичкис «лук госсö» — кизертiс ключ ваöн. Рудзöговöй чöвпан вöлi небыт, кыдз подушка, аппетит — бурся-бур, и зонка гардiс-сёйис лукасовнас джын няньсö.

А син одзас вежласис кольöм лун, жар да мыдзан. Небурика чушкис ключöн дойдöм чуньыс, дöлöтiсö-лудiсö ньылöмöн боссьöм кокгумаэс: эд кузьлун олiс комбинезонöн да сапоггезöн! Кузьлун... Да уна я сiя — öтiк луныс? Сэтшöммес сы оланын эшö пантасясö уна тысяча, пантасясö, может, эшö сьöкытжыкöсь, пантасясö сэтшöмöсь, кöдна бы вексö эз вöлö. И сёжö этö лунсö Тасим оз вунöт некöр — Севернöй полюсын ли лоас, Южнöйын ли али кытчöдз тöдтöм да судзöттöм планета вылын — сёровно. Эта луныс — виль механизаторлöн чужан лун. Эта лунö зонка керис куимöт важнöй оськöв, кöдна коласын первöйыс вöлi семнадцать год бöртi — сэки отсалiс оськöвтны сылö мамыс; мöдiк оськöв сiя керис неважын, аймамыс да школа отсöтöн; а талун сiя смела иньдöтчис виль туй кузя, кöда нуöтö удж подвиг дынö, удж слава дынö, кöда пыртö оланö.

Зонка, кыдз любитiс баитны сылöн дедыс, пöтiс дрин-дрин. Но локтiс мамыс, вайис стаканöн парнöй йöв и силöй тшöктiс юны. Тасим, медбы не обидитны мамсö, тырпыштiс размöд да кисьтiс остаткисö кань дозö. А мамыс сысъялiс йöв да тöчитiс зонсö. Да и не видiс, а сiдз, порядок могись, ласковöямоз баитiс:

— Кин сьöрö тi ая-зона и мунöмась, — нюжлалiс Савельевна. — Айыт этадз жö кöркö керис: рабфакын велöтчис, учителявны бы вермис, а лякасис кытшöмкö «фордзон» бердö. А таво, видзöт, мый керис: фермаö юрсö сюйыштiс. Да кöть бы нö завöн, а то порссез вердны... Асныррез тi.

— Мам, а вильжыкыт нем абу? — сералö зоныс. — А то пельсадь ни бырис öтiксяняс.

— Эм, и вильжык эм, — лöгöнжыка ни баитiс Савельевна. — Часöт токо кылi вот, кöр мöссö вайöтi. Егош Малань нывсö сёйöмöн-сёйö, медбöрья кыввезöн видö да менö честитö. А сё тэ кузя. Ачыт мунiн колхозас и Симасö сьöрат кыскин. Маланьыс эд сельпоö сылö места адззöма... Горöтлö тай: ме, шуö, мортö нывкасö мöдi пöртны, а сiя пö тамыш синыскöт гозъясьöма. Быдтi, шуö, волькöтi сэтчöдз, что госыс пондiс гилявны... Гладь бöбмöма инькаыт весь овтöнняс, — клопнитiс боккес кузя Савельевна да пондiс петкöтлыны йöв доззэсö.

Тасимлö вдруг усис тöдвылас öтiк басни, и сiя серöмтчис. Ны деревняын, Лопарас, уна чавкан олö, и мед нiя эз ыжмалö боби петалiкö, быд огородечын обороника-бабашорика сувтöтöны. А Малань, Сималöн мачехаыс, оз сувтöтлы нiйö. Немлö пö нiйö меным, ачым прокод огородечас... Бабашорика... Сэтшöм сiя и эм, только и кужö чавканнэсö вашöтлыны да отирöс ладсис дзугны.

Тасимлö сiдз охота лоис купайтчыны, что сiя, кöть и пемдiс ни, котöртiс вадöрö. Деревня дынас, Курöг бродын, боргис Сюзя, волькöтiс визвачас галясö. Улынжык, кöдж йылас, пондöтчö йир. Сыланьö видз кузя кыссис подöна туёк. Сiя чуклясис, ордйылiс кöчкаэз да баддез и петiс посок дынö, купайтчанiнö. Бур эстöн, йирас, тульöтчыны: кöть уяв, кöть сунгисьлы нето пос вывсянь, а то и берегсянь чеччав. Тасим сiдз и керлiс одзжык, а талун мыйкö неохота, мыйкö дзик нырыштö сьöлöмсö и кок садьыс абу. Этö, натьтö, мыдзöмсянь. Али сысянь, что сiя талунсянь не челядь ни, а ыджыт морт — механизатор? А может, мамыс баснисянь да?

Не тэрмасьöмöн, деловитöя, бытьтö керис серьёзнöй удж, зонка бонокöн ниртiс жаритчöм да ньылöмсялöм вывтырсö да сэсся уйыштiс ва шöрö. Ваыс абу на ештöм сайкавны лунся жарсянь и öддьöн ни небыт, топ вотьва. И рытыс сэтшöм жö шоныт, и лöнь, и сöдз да небыт. Благодать.

И Тасимлöн этасянь сьöлöмыс небзис, дугдiс ордавны. Пасьтасикö зонка нюргис ни кытшöмкö песня, а туёк кузя шагнялiкö пондöтiс «Космонавттэзлiсь песня». Видз шöрас сiя казялiс паныта локтiсь мортöс. Чужöмыс эз тыдав, а походкаыс вöлi тöдса: этадз кокнита ветлöтö только Сима. «Натьтö тожö миссьыны мунö», — решитiс Тасим и горöтчис:

— Тэ мый ойнас ветлöтан, кöиннэс эд сёясö!

Сима эз шыась, локтiс сы дынöдз да чышьян пельöснас вевттис синнэсö.

— Тэ кытчö, Сима? Нывка синваэз пыр шуис:

— Туй кузяс. Муна, муна да кытчöкö локта жö.

— Сима, ме былись юала...

— Ме тожö былись баита. Репйисö гортiсь.

— Кыдз репйисö? Кин?

— Пондiс юасьны — кыдз да кин! Не тятюö жö и не учöттэс.

— Но кытчö тэ öнi мунан? Лок миянö, узян ойсö, а...

— Тiянö? — повзьыштiс Сима. — Да менö сэки ульöн сёяс мачехаö! Тэ тöдан, мыля ме мунi гортiсь? Он? Тэ кузя! Сяко тэнö шуис: и сьöдкульнас, и ошлопаннас, и сяко-сяко. Ме сё терпитi. А сэсся — мортсёйись, шуö, сiя! Но сэки ме сылö и видзи ответсö: богатина тэ, мыся, вражина — вот кин! Да эшö тунеядка! Кытшöм, мыся, Тасимыс мортсёйись? А бадь вылас, шуö, кöзыс оз быдмы: кытшöм айыс, шуö, сэтшöм и зоныс. Сёйисö, шуö, нiя менчим Пашкуöс, Сибирьö турнитiсö да сiсьтiсö сэтчин.

— Оз ков, Сима, эта йылiсь, — Тасим босьтiс сылiсь котомкасö. — Мунам.

Сима сьöкыта ловзисис, шуис:

— Мунам! Нарошно муна тiянö, ась кучиксис петö тожно...

И петас жö сiдз: тэ некинлö умöльсö эн кер, не чальöн эн павкöт, не кылöн эн дойд, а тэнö мортсёйисьöн шуöны. Тасим тöдiс, мый понда сiйö оз любит Малань.

Уна ни буждiс Курöг брод весьтiсь берегыс сэксянь, кыдз Лопарын жугдiсö виль вартан машина. Тасим сэк эз вöв эшö, но колхозниккез нет-нет да и висьтасясö сы йылiсь öнi...

Тасимлöн айыс кыдзкö вайöтас Лопарö аслас тракторöн полусложка. Сувтöтасö сiйö гуна пытшкö, кöдö колхоз мырддис Пашкулiсь, пöдналасö воротаэсö и мунасö шоччисьны. Лэдзчисис ой, Лопар ланьтiс. Но Пашку гозъяöс оз узьöт. Нiйö ровно чувйö кинкö, вашöтö сэтчин, кытöн сулалö виль машинаыс. Висьтасьöны öнi, что Пашку мöдöма сотны гунасö, да жалейтöма. Сiя сё надейтчöма, что олан вежсяс, локтасö бöр поппез да урядниккез, и гуна бöра сылöн лоас. Да и сылöн «Очёрка» сы пытшкын сулалöма, кöть умöлика ни вартö, да сё машина, сё аслас. Вот и пырас Пашкулö öшка юрас: лэдзны колхознöй машинасö крутикас. Гунаыс как раз берег дорас и сулалöма, öнöдз эшö öвин ямаыс эм. Ош статя Пашку иньыс отсöтöн тойыштас машинасö поката долонь кузяс, öдззöтас да лэдзас керöс увтас. Керöс крут да изъя, и берездасьлiкас джын машинаыс рез-паз мунас.

Асывнас Чуканов да председатель локтасö Пашку ордö. Кулак гöснечалас нiйö ружьёись. Сэсся суд. Пашкуöс иньдiсö гортсис, а иньыс кольччис Лопарас видзчисьны жöниксö да ёрдны соседдэсö. Жöникыс эз берт. Война бöрас вöлись кывсьöма, что Пашку кодувьяс кытöнкö юкмöсö инмöма. Сэк Малань петiс дöвеч сайö, Сима ай сайö, но важсö öнöдз эз вунöтчы. Сiя быд год ветлö вичкуö, енсö тшöктö ыстыны Чуканов юр вылö мыжа, а сы род вылö лэдзны пöрöс.

* * *

— Вот тэныт, мамыс, и монь, — серöмтчис пöрись Чуканов, кöр Тасим тойыштiс керкуö Симаöс. — Бласловит, мамыс, чöвпаныс как раз киат лöсялiс.

— Эн жö тэ рызйы весись, — шуис Савельевна да пуктiс джынысви шöралöм чöвпансö пызан вылас.

— Вашöтöмась, мам, сiйö гортсис, — висьталiс Тасим.

Савельевна шытöг босьтiс зоныс киись котомкасö, öшöтiс тув вылö, а Симаöс пуксьöтiс пызан сайö. Пöрись Чуканов пуксис аслас местаö — пызан пельöсö, судзöтiс быдса шöрöм, шуис:

— Эн тöждiсь, Серафима, умöльыс нем абу. Колö кö — миянын лоас тэнат горт, — и кöр казялiс, что нывкалö мыйкö думно лоис, серöмтчис бöра: — Да тэ сёй на здоровье, ме ог мöд тэнö гöтравнытö... Ме вот мый йылiсь: быд мортлö колö горт. Да не только мортлö. Вон и кöдзыв аслыс поз керö. И тэ эн пельдöтчы горт бердсит.

Тятюытлö, чайтан, кокнит эттшöмсö терпитны? Бур морт сiя, да мачехаыт тшыкöтiс.

— Миша, сет жö нывкаыслö сёйнытö, эн дурмöт юрсö, — öлiс жöниксö Савельевна.

— Разь не сiдз ме баита, мамыс? Сима, висьтав ноко!

— Сiдз, дядя Миша, — горöтчис нывка. — Но ме сёровно гортö сэсся ог пыр. Кöть юрöс орöтö, а ог мун да и быдöс! Ежели бы эта петiс одзжык, тöн али удерлун, мунi бы Перемö, училищеö. Да и сойö вон письмо гижöма, дынас корö.

— Дак эд и öнi, некö, абу сёр? — юалiс Чуканов. — Сiдз-ту честнöйжыка бы петiс.

— Сёр ни, дядя Миша. Мийö... Ме кыв сетi, что колхозын понда уджавны, и ассим кылöс ог веж.

— Вот эта понда ошка, — радöн горöтчис хозяиныс. — Эта миян моз: кöсйисин — кер!

— Да сёйö тiйö, сёйö няняшыдсö, — горöтыштiс Савельевна. — Тырмас басниэсö лöсьöтлыны! Оййыны я мый я пызан саяс мöдатö? И тэ, Тасим, пуксьы.

Эта горöтыштöмыс, тыдалö, вежöртöтiс сёйиссесö, и электролампочка увтын только паннез пондiсö вирдавны да горалiс лызгöм.

Пызан сайись петiсö, кöр пондiсö китсасьны петуххез. Тасим кайис турунвидзанiнö, а Симаöс водтöтiсö горницаö, перина вылö. Шоныт да небыт ольпасьыс, сэтшöм небыт, что Сима, кыдз водiс, сiдз и вöйис сы пытшкö. Но он эз вöв. Вöлi öбида, вöлi шог. Охота горзыны, а синваэз абу, только горшын курыт, дзик баня чад, а пеллезын — мачехалöн чирыштан голос, понньöсь кыввез; син одзас — айыс, öшöтчöм рожабана, гудыра сина кодыш старик. Старик... А сiя эд том эшö, Чукановся томжык. Вина сiйö сэтчöдз воштiс, а винакöт тöдсöтiс Малань. Сiя жö и вашöтiс гортсис Сималiсь сойсö — Ленаöс. Да öнi сылö бур: олö городын и некытшöм мачеха сы вылын оз ыждав, ачыс хозяйка. Корис эд сойсö сьöрас, да мачехаыс эз лэдз: уськöтчис шогалiсьöн, лун-лун полатьын ружтiс да вичкуэзöт рышшитiс, а горт уджсö Сима пельпоннэз вылö кышалiс.

Дыр эшö нывка бергалiс бокись бок вылö, думайтiс кольöм лун йылiсь, горт йывсис, а юрсис некыдз эз пет сойыс: сiя кыскис дынас, зника эз сет. И нывка решитiс мунны городö. Но этасянь оныс тожö эз лок и эз ло долытжык сьöлöм вылас. Вежöртiс нывка, что просто бöбöтлö асьсö, вежöртiс, что мунны сiя оз вермы татiсь, оз вермы кольны ассис Лопарсö. Но мыля, мыля? Мый сiйö татöн видзö? Мунöны жö тай отирыс пыр кежö, вунöтöны ассиныс ёрттэзнысö, вунöтöны роднöй аймамнысö, вунöтöны гортнысö! Да, мунöны. И сылö позьö мунны, но колö я этö керны? Разь гортын абу сiя, мый тэныт сьöлöм сьöртi? Эм, конечно, эм. И нывка, кöть эшö етша олö, прокод бöрйис аслыс уджсö сьöлöм сьöртi и неетша ни керис бурсö отир понда. Но керöмыс — тöння лун. А мортлö колö думайтны сы йылiсь, мый эшö кертöмыс, мый колö керны ашын, мöдгод...

Сима эшö и эшö бöрйис юрас, мый вöлi гижöма моральнöй кодексын, кошшис сэтiсь главнöйсö — оланiсь сьöлöм жиласö, — но эз вермы сiйö адззыны: сэтöн быдöс колана, быдöс дона, быдöс главнöй.

* * *

Саймис Сима ведраэзöн жольöтöмсянь. «Тыдалö, ачыс талун юктасьö», — думайтiс сiя мачехаыс йылiсь. Но кöр казялiс стена вылiсь Чуканов гозъялiсь портреттэз, вежöртiс, кытöн сiя узьö.

Неыджыт жырын вöлi öддьöн сöстöм да гажа. Öшыннэз одзын, натодиль керöм лабичоккез вылын, сяр сулалiсö цветтэз. И нельки желля алой, кöдö Сима оз радейт, татöн вöлi басöкжык, и яя да вазылькья уввес шуч тыдалöны, дзик зелёнöй стекло. А эшö мый дивоыс, дак этö алойлöн мыгöрыс — потолокöдз нюжалöма. И кысь сiя сымда вынсö босьтö, мыйöн олö? Чуш-паш пырис Савельевна, кровать юр вылö чапкис петуха чышкöт. Казялiс, что нывка оз ни узь, пуксис сы дынö, юалiс, кыдз чулалiс ойыс виль местын, мый уськöтчис вöтö.

— Ме, Савельевна, кытшöмкö сэтшöм, не морт кодь я мый я, — шуис Сима. — Шоча вöтасьла и то быдöс вунöта.

— Сьöкыта уджалан, сiйöн и вöтыт абу, — висьталiс Савельевна. — Буржык сiдз-ту. Ме кытöн токо вöтнам ог овлы, мыйсö ог кер, а сэсся лунтыр думайта: мый одзын сэтшöм вöтыс? Нем оз ков вöтасьны... — И бергöтiс баснисö мöдöрö: — Мийö неважын баитiм тэ йылiсь. Мишаыслö оз гленитчы гортсит мунöмыс, но, шуö, ежели согласитчас, дак ась пö олö миянын кытчöдз.

Вылына лэбтiсис нывкалöн моросыс, пыдына ловзисис Сима да бергöтчис бок вылас. Конечно, татöн сылö бур лоас. Но мый деревняас пондасö баитны? Шура, подружкаыс, тöн вöлi сералö ни: лякасьöмат пö Тасимыт бердö, кыдз шышыбар... Да и айсö жаль: öнi эшö öддьöнжык пондас юны. Сылiсь, роднöй нылыслiсь, мымдакö кывзiс сёжö, совеститчис невна, а Маланьлöн баитöмыс — öтiк час кежö.

— Нем ог тöд, кытчö и воштiсь.

Зато Савельевна тöдiс, бура тöдiс, кытöн нывкалö овны. Сылöн и синыс адззис, и сьöлöмыс кылiс, мый пусьö нывкаыт моросын: радейтö сiя, öмидз тусиньöй, сылiсь зонсö. Ась синнэс пемдасö, ась сьöлöмыс измас, ежели не сiдз, ежели нiя вермасö бöбöтны пöрись мортöс, кöда ачыс быдöс этö новйöтiс аслас юрын и моросын нывся кадö. Тасимöс да Симаöс öтiк йиöн судьбаыс йитас. И кужис Савельевна мортыс дынö сибöтчыны, кужис бергöтны сiйö асланяс, ёртасьны мортыскöт. Тöдö Савельевна мудрöй поговорка: курöгöс — верданöн бöбöтöны, а нывкасö — леститöмöн.

— Но да ладно, — шуис сiя, — эн тöждiсь öддьöнсö, эн пöрисьты асьтö, горадзуль, — и малыштiс небыт юрсисö. — Он кö узь, дак чеччы. Ме сёйны лöсьöта, — и лап-лап нуöтiс кинас пельпон кузяс, сэсся бöра малыштiс нывкалiсь юрсö.

Дата добавления: 2015-11-16