МЕ ЫДЖЫТ НИ, МАМА

Сулалö жар, сулалö мича, туруналан кад, но видззез вылын оз тыдалö рöма чышьяннэз да йöрнöссэз — абу сэтчин куртiссез да зород тэчиссез. Талун петырлун, ыджыт праздник, и уджавны грех. Не быдöнныслö, конечно, грех: беднöй йöзлö позьö.

Вот и Овдя уджалö — тшöктiс мамыс. Сiя сiдз и шуис: беднöйлö уджавны абу грех. А Овдя — строшнöй, Амонлiсь мöссэз дозирайтö. Амон — посадас медбогатöй морт: видзö дюжина вöв-мöс, быдса табун баляэз, порссез, Сылöн эм гуна, вартан машина, праздничнöй телега. Да и Гавра вонсö еныс абу öбидитöма, быдöс сылöн эм, быдöс тырмö.

Овдялö некин оз отсав, некин сылiсь уджсö одзлань оз вешты: айсö война вылö иньдiсö, сiя германецсянь Россиясö дорйö, а мамыслöн киэс быдлаö оз тырмö. Нылöн коза да баля эм, вот и колö турунок заптыны. Да и кытшöм, поди, отсöт ни мортлö, кöдалö одиннадцать год?

Уджалö нылочка, тэрмасьö, ньылöмсянь пестрединнöй йöрнöсыс вамис. Векнитик чужöмыс, чангыля нырокыс, синлоппес, кöдна увтö дзебсисьöмась сьöд синоккез, — быдöс вазьöма, нельки кыз чикисьыс ровно бы нютша. Только кöмтöм коккеслö бур — ыркыт, кокнит.

Гавралöн видзыс паськыт, дак сiя öтiк тылöпöн оз öкты. Вот Овдя и вундö бадь колассэзсис пырейсö. Куим кольта ни керис.

— Талун тырмас, — висьталiс нылочка и пондiс лöсьöтчыны гортö. Домалiс турунсö, мöртiс чарласö кольта идзö, босьтiс ношасö сивьяс и мунiс посадö.

Тэрмасьö Овдя, котöрöн нетшкöвтчö гортас. Талун эд эз на сёй, и кынöмыс вашöтö. Вот локтас гортас, а мамыс сылö шыдöсовöй каша ваяс, рисяйöв чöвтас. Бур бы сметанаок — кöдзытö, гуись, — да кысь ни нылö. Этö Амоннэслöн поннэзöс вердöны — некытчö воштыны. Талун, кöр мöссэсö картаö йöртiс, Овдя адззылiс, кыдз поныс сметанасö лакис. Гуыс оссьöма, и Амонлöн кыкнан поныс сэтчö пырöмась. Сойка сметанасö вöлi сёйö, а Буско мыйкö кадуляись кошшö. Сытьнитiс нылочка поннэсö, да нiя и чутыр эз керö. Амбарись петiс Мотра, Амонлöн сойыс, вашöтiс чöскыт сёйись лапкоэсö. Бускоыс эшö яйтор нöбöтiс, а Мотра и кылöн понсö эз дойд — абу жаль, видно, доброыс. А мый нылö! Амоныс, шуöны, кöр мавтас бырсьöма, дак телегасö виöн мавтлöма.

Посадын пондiсö звонитны: ляпинчи-нюринчи-шорчи-сугонн! ляпинчи-нюринчи-шорчи-сугонн! Учöт колоколлэс, дзик кычаннэз, перыта-перыта тявгöны, а ыджытыс — жагöника, нюжвыла да горöн. Учöттэс тэрмасьöмöн кытсавлöны матiсь деревняэсö, а ыджытыс жагöника шувлö посадлiсь нимсö: кыдз-некыдз, а Сугонын и благороднöй отир олöны. Нiя пö бытьтö и небöмась ыджыт колоколсö. Перемись вайöмась. Эз бы вайö, дак öнöдз, натьтö, джыннян коддес и лявгисö.

Звонитö вичку — корö отирöс öбедня дорö. Овдя адззö, кыдз инькаэз лёдззöн-лёдззöн кайöны мысок вылö и пырöны кöртовöй стына оградаö. Посöдзас эта лунö кöдзыт ырöшöн кöньöс сулалö — мымда колö ю.

Мунö нылочка видз туёк кузя и касьтылö, кыдз сiйö попыс да учитель велöтчыны примитiсö. Айыс полiс, что бöр бергöтасö, и попыслö гортас гöснеч кайöтiс, — пуд рудзöг. И примитiсö.

Берсясö висьтасьлiс Овдялö айыс, да нылочка сэк етша эшö вежöртiс. Öнi бы вежöртiс — куим тöв ни школаас ветлiс. Но öнi кывзыны некинöс: айыс воюйтö, а Серга кытöнкö Сибирьын. Сергаыс ыстöмовöй, но öддьöн добрöй морт. Сiйö заводiсь вашöтöмась, мыля öтлаын мöдiккескöт бастуйтöма. Серга сiя годö тöвйис Овдяэс ордын, книгаэз уездiсь ваявлiс. И вот öтпыр нуöтiс сiйö урядник. И книгаэсö нöбöтiс. Кывсис, Сибирьö иньдöмась. А сэтчö и Овдялiсь айсö солдатö босьтiсö.

Таво тöвнас царьсö чапкöмась — сiдз школаын висьталiсö, — и «Боже, царя храни» уроккез коста дугдiсö сьывны. И вöр керавны воля вöлi. Стрась уна кералiсö, да керкуэсö сувтöтны эз ештö: кинлiсь кералöмсö мырддисö, кинöс война вылö иньдiсö, а мукöдсö сымдаöн штрафуйтiсö, что нiя и вайöм вöрсö, и мöссэзнысö вузалiсö... Чапкисö царьсö, а мöдкодьыс нем эз ло. И Сергасö, натьтö, гортас эз лэдзö.

Казённöй колодец дын, ыджыт кедррез увтын, кинкö орсiс сигудöкöн. Некытöн эз кыв код сьылöм да мездiсись инькаэзлöн горзöм. Эз на шумит базар, эз на гöняйтö вежсьöм вöввезöн Сийко да Мийко, меддёка праккез, и том мужиккез кабак бöрын эз на орсö «зöр сёйöмöн».

Гортас Овдя паськöтiс турунсö межаок вылö, сёйыштiс да котöртiс вевдöрись улицаö: сэтчин орслывлöны чижöн да шарпалкаöн. Овдя вуджис горт улицасö да пондiс кайны амбаррез дынö, кытчö öксьывлöны поснит йöзыс, и кылiс шум — видчöм, чирзöм, шутнялöм. «Вот и пондöтчö», — думыш керис нылочка да иньдöтчис шумыслань. Сылö паныт лэдзчис ыджыт утуга, и Овдя кежис йöр бокö да пондiс видзöтны, мый эта лоö.

Медодзас мунiс старик. Сылöн бокас летъялiс пешоркажуг, а пешорка бердас öшалiс кашник. Старикыс мыйкö бергалiс да баитiс, но сiйö некин эз кывзы. Овдя сразу тöдiс стариксö — Митит. Сiя олö мöд конецас, идзасöн вевттьöм керкуокын. Война вылын сылiсь орöтöм кидолоннесö, и öнi сiя не чер, не зыр оз вермы видзны. Но мыля сiя эстöн, коддэс коласын? Мыля чужöмыс вирöсь? Мыйись вартлöны нищöйсö? Разь вермис керны мыйкö умöльö сiя мортыс, кöда сiдз забавнöя висьтасьö сказкаэз?

— Воззьы сiйö, ворöс, гынды бытшöмик, ась мöдiккез пондасö тöдны! — велöтiс Амон и вартлiс верöсовöй бедьöн. — Гынды, эн жалейт! Талун сметана гусялiс, яй гусялiс, а ашын вöв нуöтас.

— Эг гусяв ме, отир! Сiя бöбöтчö! Адззö еныс — эг вöрöт, — кеймисис Митит. — Лöг сiя ме вылö, вот и кышалiс! Жалейтö калекаöс, жалейтö китöмсö...

Но Амон эз кывзы. Чöлiс и Гавра, топ немöй, и сё сырйис да сырйис Мититсö лэчыт плетьöн: шагньöвтас куимись — пöвсыштас, эшö куимись — вились косьöвтас.

Овдя эз вермы видзöтны эта вылö и быд вачкöм коста куньлiс синнэсö. «Дак не сiя эд, не сiя, — думайтiс нылочка. — Эд Амоныслöн поннэс горшалiсö!»

Овдякöт ордчöн сувтчисö стариккез. Шочыник тошока кöсыник дед горöтчис:

— Адззан, мый богаттёыс керö!

— Вор пö Мититыс, — шуис мöдiк, — а сiйö Амоныс кыдз нинпуöс кулис, дак абу вор.

— Нiя правдасö из увтö дзебисö — эн кошшы миян кодьыс! — висьталiс первöйыс.

— Оглоблясö шатьыс оз вермы, — шавгыштiс куимöт, а нёльöт, басöка пасьтасьöм старик, койыштiс кыввез:

— Быдöс эта социалисттэзсянь мунö, нiя отирсö дзугöны. Воля! Свобода! То тай свободаыс — амбаррез пондöны петкöтны.

Кизерик тошаыс дöвгис сылö:

— Мый керöны сочилисттэс, мийö огö тöдö, а кыдз Амоннэс сёйöны йöзсö — адззам...

Утугаыс чулалiс ни Овдясö и петiс ю дорас, а Гавра да Амон сё вартлiсö калекасö. «Виясö беднöйкаöс!» — вирдыштiс нылочкалöн дума, и сiя вöтчис отирыс сьöрö да одзалiс нiйö.

— Эд вартлö, сiя эз гусяв! — горöтiс Овдя. — Сойка да Буско сёйисö! Ачым адззылi!

— Прись эстiсь, кань кок! — зыкнитiс Амон и забгис нылочкалö сiдз, что Овдя нюжалiс туй шöрас. И сэк жö Гавра шöрыштiс плетьöн сы пельпон кузя. Ойнитiс нылочка, кыссис йöзыс коккез увтiсь бокö. Öбидасянь да зубытсянь син одзас югытыс кусiс. Ки увтас шедiс галя, и сiя босьтiс галясö да чеччис. Шентiс бы, натьтö, Гавра сивилёнö, да кинкö малыштiс сылiсь юрсö и кокнита кыскис сы киись галясö.

— Оз ков, кага, — кылiс Овдя кыз голос. — Мун бокö, а то эшö дойдасö. Но эн вунöт этö, — гусьöнжык содтiс сiя да иньдöтчис утугаыс сьöрö. Кынымкö шаг бöртi висьталiс горöн: — А ноко, öвсьö, отир!

Быдöнныс бергöтчисö гора голоса мужикыс ладорö и пондiсö нёджжавны тöдтöмсö. Сiя, конечно, вöлi не татiсь: базарскöй паськöма, свиттялан сапога, суконнöй кепкаа...

Шумыс лöньсис. Инькаэс окньöвтчисö берег дорсис, бытьтö нiйö тортаöн вештiсö сэтiсь, и Овдя казялiс, кыдз Гавра татшкис кулакнас Мититлö ордлыэзас. Старик тур-бар берездасис берег увтас.

— Масьтö ворсö галяэзнас! — командуйтiс Амон.

— Юрвоманас кавскö, юрвоманас! — отсалiс воныслö Гавра да сюйыштiс мужик киэзö зор.

— Вешшö, мыся! Кинлö висьталiсö? — бöра шыасис городскöй паськöмаыс.

Овдя, кöр казялiс, что пондiсö рознитчыны и мужиккес, кокнита ловзисис, сибöтчис ва дорас. Тöдтöм мортыс лэдзчис Мититыс дынö, чеччöтiс калекасö.

— Да эта эд Кончаков Серга! — вдруг горöтiс Амон. — Буззьö сiйö, каторжникöс! — и шупкис галя. Код мужиккес, кöдна заптiсö галяэсö Митит понда, öнi иньдiсö нiйö Серга юрö. Серга öт кинас сайöвтiс юрсö, мöднас тойлалiс стариксö ваас. Митит кув-ков пырис ваас, тэрмасьöмöн пондiс кевны мöдöрас. Эта коста Серга юрö сидзисö ыджыт галяöн. Мужикыс сувтiс, мыйлöкö чöвтiс кепкасö и пезьдалöмöн оськöвтiс аслас враггезлань.

— Нырыштö сiйö, мужиккез, нырыштö рестантöс! — горöтiс Амон да тойыштiс Серга вылö код мужикöс. Сы бöрсянь лэдзчисö берег увтас эшö морт-мöд, но Серга садясис ни да резiс нiйö дынсис. Гавра вылiсянь макнитчис зорöн. Овдя ойнитiс, кунис синнэсö. А кöр осьтiс, то казялiс, что Сергаöс, кыдз начкылан порсьöс, нырыштöмась галесник вылас и каттьöны киэсö гöрд йиöн.

Амон чышкö ки бöрнас кымöссö да койö-баитö: — Сьöлаыс, видзöт, ачыс налькас пырис. Важын ни видзчисям! Каторгаись пышшöма, бандит!

— А миян дынiсь оз пышшы, — гöрöдсö зэлöтiкö ошшасис Гавра. — Мийö сiйö старшина дынö...

— Мокей Ильичсö праздникнас ог пондö вöрöтны, — боткö Амон. — Лунсö-кыксö амбарын ружтас, оз нёр, поди. А чорзяс, дак горзыны ог пондö.

— Лэдзö, отир, — корсис Серга. — Эд лэбтö шумсö...

— Лэдзны? — юалiс Амон и висьталiс: — Лэдзны вермам — менам колодецö...

— Добром кора, Амон: лэдз!.. Некытiсь ме эг пышшы...

Чеччöтiсö, кышалiсö юр вылас кепкасö да тойлалiсö берегас, туй шöрас. Вешьяныс бусöсьмöм, йöрнöс воротыс косясьöм, тошокас кышасьöмась ёггез.

Синваэз петiсö Овдялöн — сэтшöм жаль лоис Сергасö. «Бöра пуксьöтасö, — решитiс нылочка. — И вийны вермасö».

Серга локтiс Овдя весьтöдз, тöдiс сiйö и горöтчис:

— Эн горзы, Овдя! Чожа и миян шондiным петас! Амонлöн да Гавралöн быздö плетьныс, вот нiя и пурсьöны.

— Тэ вöрöт коккетö, а эн лёб сякöйсö, — плетьпунас чувйыштiс Сергасö Гавра. — Вот турнитасö Сибиряс, дак куим шондi сэтчин петасö.

Серга кыввезсянь гажмыштiс Овдялöн сьöлöмыс. Сiя чышкис синваэсö, лэбтiс юрсö. Сылö охота лоис сувтны Сергакöт ордчöн да, кыдз сiя жö, гордöя мунны посад шöрöт. Эз думайт сiя, бур эта али умöль. Раз морт мездiс Мититöс, сiдзкö — бура керис. Быдöс посадыс этадз висьталас. Эз мезды, дак пöдтiсö бы калекаöс ваас, кыдз год-мöд одзтi керисö ляпинса.

«А кытöн нö Мититыс?» — пондiс кошшыны синнэзнас Овдя. Нёджжöвтiс вывлань, увлань — абу. Поди, вöйис да? Эз, эз — вон сiя кытöн, баддяин дынас ни ляшмасьö.

Дыркодь эшö Овдя видзöтiс Митит бöрсянь и эз тöд, кöдöрö чепöссьыны, кинлö отсавны — кöркöся квартирантыслö али калекалö. А Митит сё мунiс и мунiс — ылöжык посад дынсянь, лёк отир дынсянь, — мунiс гожся лöняс, чöскыт дука зеленяс, мунiс сэтчöдз, кытчöдз вермисö нуöтны коккес. И сэк Овдя чож джыджöн быркнитiс гортас, мамыс дынö.

— Мам, Сергасö кутiсö, — эшö порог сайсянь юöртiс Овдя.

— Кытшöм Сергаöс и кин кутiс? — эз вежöрт мамыс.

— Кöда кöркö миянын олiс...

— Кысянь сiя? Эд Сибирьö, шуисö, иньдöмась.

— Сiя, мам, Мититöс мездiс. Мититсö Амон да Гавра öддьöн вартлiсö. Рожаыс куш вир, — тэрмасис висьтасьны Овдя.

— Мый понда сiйö?

— Сметана пö гусялöма да яй. А сметанасö поннэз сёйисö, адззылi ачым.

— Öнi кытöн нiя? — юалiс мамыс.

— Сергасö амбарö мöдiсö йöртны, а Мититыс мöдöрас вуджис да ыб туй вылас усис.

— Вод узьны, — тшöктiс мамыс, — ме кинкöткö баитча.

— А ме Мититыс дынö котрася, — висьталiс Овдя. — Ме талун ойнас узи.

— Мый тэ, Овдю! — повзис мамыс. — А кыдз тöдас Амоныс? Эн мун.

— Кулас Мититыс, сiя эд садьтöг усис. Кöть ырöш нöбöта.

— Ой, беда! — клоп вачкис боккезас мамыс. — Ветлы ли мый ли... Кулас кö, меным грех лоас. Ырöшоксяняс, может, и садясяс. Только гусьöн, ась некин оз тöд, — велöтiс мамыс джоджулö пыртöн.

— Ме кöджöттяс гöгöрта, увтi, а сэсся расокöттяс...

Митит, котомкатöм и гырничтöм, куйлiс туй шöрас и эз и вöрöтчы. Вачкисис сiя пуовöй Христосыс вылö, кöда сулалiс сугонскöй вичкуас: сiдз жö паськöтöма киэсö, сiдз жö кöстыштöма öт коксö, сэтшöм жö сьöд да кузь юрсиа, только куйлiс кыминь. Шабур полаэзсис, виззя вешьянсис, нямöттэзсис кайис парок — нiя пöжсисö дзирыт шондi увтын. Нинкöммезсис рудзалöма ва, и незьдöм буссис аркмöмась кык тупöсёк. Юр весьтас мышкыртчöмась рудзöг тылöппез, öшöтöмась кузь шеппезнысö, бытьтö тöждöны ыджыт горесянь.

Овдя орддис куйлiсьсö сюöттяс и сувтчис юр ладорас, но сибöтчыны эз лысьт: Митит эз лолав, кулöма. Вон и лöдззез мöртчöмась голяас, ыджыт сьöд гуттэз кыскасьöны вирöсь пель кузяс, а мортыс чутыр оз кер — конечно, кулöма.

Крестыштiс кымöссö Овдя, бöр-бöр керсис. Усис тöдвылас Мотралöн висьтасьöмыс: кулöм нищöйес да бродягаэс куталöны челядьöс и сöскöны вир.

Мöдiс мунны ни нылочкаыс, да казялiс, что Мититыслöн вöрöны лопатка йыввес. И сэк Овдя пуктiс туисоксö да сибöтчис старикыс дынö. Дзир-бар видзöтыштiс ас гöгöрас — абу я кин матын? — и кытсöвтiс:

— Митит, а Митит!

Сьöкыта, дзик вывтас вöлi сю мешöк, вöрзьöтчис куйлiсьыс да лэбтiсис гырдззаэз вылас. Эшö сьöкытжыка лэбтiс юрсö, гудыртчöм да онзыля синнэзöн видзöтiс нылочкасö.

— Горшыт косьмö? — гусьöнмоз юалiс Овдя. — Ме ырöш вайи, кöдзытö. — На-ко, пешлы, Митит. — Овдя осьтiс туисоксö, сорлыштiс ырöшсö. — Горшыт, натьтö, öддьöн косьмис?

Старикыс ружтöмöн да ойзöмöн пуксис, тулис синнэсö. Овдя пöльыштiс ырöш быгсö да сюйыштiс туис дорсö Мититыслö потласьöм тырппезас, и сiя пондiс юны — гульк, гульк, гульк. Юис быдöс, и кымöссис дзулльöн пондiс котöртны ньылöм.

— Кинлöн тэ, кага?

— Опонь Анналöн, Овдя ме.

— А-а, быль тай, — дзик радмыштiс старикыс, но сэк жö бöр кымöртчис. — Ок-ко-ко, быдлаöт висьö... Сивилён, сотчö, дзик говня пуктöмась.

— Кучикыс кульыштсьöма сэтi, — видзöтiс да висьталiс Овдя.

— Лапкор лякöт сэтчö, ньöльöктöм местас.

— Ой, а мамö эшö алой ва сетiс, — усис Овдялö тöдвылас, и сiя кыскис писис посудаок.

— Этö бур, — ошкис Митит настойсö. — Кисьт-ко öмам, ачым ог письты.

Овдя кисьтiс, и старик быдöс ньылыштiс сразу.

— Висьтав спасибо мамытлö. Да лапкорсö лякöт. Туй вылас только и быдмис лапкор да лудтурун, и Овдя кок увтсис нетшкöвтiс паськыт, пыдын бороздаока листок, чышкыштiс бан ладорсö кинас и лякöтiс Митит сиви бердö. Сэсся чеччöтiс стариксö, отсалiс сылö мунны расокас.

— А ме чайтi, неловья тэ, кöр локтi, — льöмпу увтö пуксьöтiкö баитiс нылочка. — Чуть бöр эг мун.

— Кулöммеслiсь нем повны, нiя оз пурсьö. Тэ ловьяэслiсь, Амон коддеслiсь, пов. Сё сы ордын строшнöялан?

— Ну, мöссэз дозирайта. А мамö Гавраыс ордын поденщинаын.

Льöмпу увтас старик чапкис шабурсö, ойзöмöн пуксис му вылас, пондiс пöрччасьны. Овдя думайтiс, что сiя ачыс оз вермы пöрччавны вонь гöрöдсö, а сылöн гöрöдыс абу. Сылöн вонь конецас крючок: мездöтiс — и быдöс.

— Митит, а мыля тэнö вартлiсö? — пондiс юасьны Овдя. — Тэ эд эн гусясь, а кыдз ворöс новйöтiсö.

— Менам киö йöз доброыс вылö оз лэбтiсь, — старик пыдына ловзисис, ольсалiс бокас нямöттэсö, сэсся нюжöтiс пытшыннэсö и вöлись керку юрöн сувтöтiс нинкöммесö оча ныр. — Судитчи ме Амоныскöт таво тöвнас. Муок мöдi бергöтны, кöдö кöркö менчим курмыштiс... Важын ни этö, кöр менö японскöй война вылас босьтлiсö. Иньö вöлi кулöма сэк, а сiя, горш поныс, гижöм ас вылас муоксö... Учöт эшö тэ, Овдя, нем он вежöрт олансö. А сiя, оланыс миян, лё-ок! Лёк, да сё ни олан, сё ни дона.

— Амоныс мöдiс вийны тэнö?

— Вийнытö оз вий, а повзьöтны мöдö — ась пö оз кутчы мекöт.

— А мыля тэ вартлыны сетчан, мыля паныт он кутчы? — досадуйтö Овдя.

— Ö-ö, кытчö ни öнi меным! — макнитiс кинас Митит. — Нiя вон мымдаöсь, да чисто кыдз пороззэз... И сюйыштiс жö поныс гырничсö меным!

— Кытшöм гырнич?

— Да сметананас!.. Муна ме морткулисьыс дынöт, а паныт — Мотра. Кытчö, мыся, пöрись, гырничнат рöктан-гöнитан? Пон, шуö, сэрпалiс, дак чапкыны мöда. Видзöта: джынняс сметана. Мыйлö, думайта, добросö чапкыны? Война вылас и поннэсö сёйлiм да... И кори. А пöрисьыс кут да и сет! Босьтi, неылö и муныштi — Амоныс дружоккезнас пантасис... Ок-ко-ко!.. Но чöв, вирьюись, кöркö быдöс понда сразу босьтан...

— А Сергасö мöдiсö амбарö йöртны, — юöртiс Овдя дыр мыйись, кыдз дугдiс баитны старикыс.

— Кинöс этö?

— Кöда тэнö мездiс, миян патерщикным.

— Кончаков Серга?

— Сiя и эм.

— Вон кин! Видно, лэдзисö?

— Пышшöма пö.

— Пышшис бы, дак луншöрнас посадас эз пыр. Тэ вот мый кер, Овдю: тöд, кытчö сiйö нуöтiсö, и эн дышöтчы, вовлы эшö ме дын.

— Тэ мый нö, матуш, талун сыодза? — панталiс Овдяöс Мотра. Сiя пукалiс оградаись лабичын, ыркöтчис. Чукыра кымöсыс талун волькыштöм, рожабан йыввес гöрдöтыштöмась. Этö — ягöда ырöшсянь. Радейтö старухаыс сiйö юансö. И синнэс сылöн югмыштöмась талун, и ачыс дзик томсялöм да добрöйжык лоöма. Только тшöка вылас жельнöгпозыс сё сэтшöм жö сьöд да лöг. И чышьяныс нёштöм — сарöма. А дубасыс бур: югыт-лöз, веж туся. Овдя топ сибöтчис умöля кылiсь Мотра дынö, горöтiс пеляс:

— Мыся, Ерошыс, поди, эз юктав вöввесö, дак сiйöн одзжык кежи.

— Сiя работник бытшöм, тöдö ассис уджсö, матуш, — жагöник, быд кыв бöрын юрнас гогышалöмöн, баитiс Мотра. — Пырав керкуас, вердышта мыйöнкö. Гортаныт стряпайтiт жö?

— Стряпайтiм мало-дело, — чирзiс Овдя. — Ме пöт, только вот горшö пактö. А керкуас ог пыр.

— Пукав, матуш, ме петкöта, юанок петкöта, — висьталiс Мотраыс и вдруг казялiс нылочкалiсь туисоксö. — А кытчö нö туисокнат?

— Туисокнам? Да сiдз ветлi тай, — эз письты висьтавны Овдя и джöмдiс джын басни вылас.

— Ягöдавны, тыдалö? А мыля инö кöмтöг? — сё бы тöдö Мотра. И Овдя сэк горöтiс сы пельö:

― Шутём вылö мöдi котрасьны, да некин эз ёртась.

— Ашын лун, матуш, лоас, ашын. А озъягöдыс кымöрас оз кай, оз...

Кыдз только Мотра кайис шöрись посöдзö, Овдя летöвтчис амбар дынö, шушкыштiс кань пыранö:

— Дядя Серга-а, тэ татöн? Этö ме, Овдя. Кылан менö?

Некин эз шыась.

Овдя горöнжык кытсöвтiс — шы не тöв.

Дзуркнитiс посöдз пöв, и Овдя репис-мунiс лабичок дынö. Мыччисис Мотра, киас видзис сёёвöй кружка, а кружка вылас вöлi пирöг.

— Свежöй капустаись кери, свежöйись, — ошкис пирöгсö старуха. — А эстöн сурок... Умöля мыйкö виялiс, эз шогмы.

Конечно, Мотра вайис сылö сурбöж, кöдö ашын, ежели оз вермö юыштны талун Овдя да Ерош кодьöммез, кисьтасö порсь öрö. А пирöгыс туяна: сочоныс шогдiовöй и бура мавтöм, а капустаыс сметанаöн.

Жаралöм старуха пуксис лабичö, пондiс чышкисьны запоннас. Овдя сёйис да юис и сё видзöтлiс амбар вылö. И часöт вöлись казялiс: ыбöсыс коласöн кольöм, амбарыс замоктöм. А Сергасö игантöг эз бы видзö.

Кортöм гöстя висьталiс спасибо сур да пирöг понда и мöдiс лöсьöтны басни Митит йылiсь — добрöй талун старухаыс, висьтасяс берсясö, — но ёркнитiс ворота калич, и ван осьтöм вороткаö бут-бат пырис попадья. Ачыс сiя учöтик да кыз, топ зöр суслон. Юр вылас сылöн ыджыт кашемировöй подшалок, вывтас зелёнöй дубас, да сэтшöм кузь, что Овдя эз вермы тöдны, мый кöмалöма попадья.

Мотра эшö öддьöнжык югмис и рып-рып уськöтчис дона гöстяыслань, а Овдялö шуис:

— Мун котрась, матуш, котрась.

Может, сiйöн, что посадын талун аркмис вöвлытöм случай — улицаöт новйöтiсö ворöс, — ой кежö вöввесö вайöтiсö одзжык. Кöр локтiс Овдя (сiйö талун иньдiсö Ерош туйö), видз вылын вöлiсö ни Мишка да Васёк. Нiя, кыдз прокод, пукалiсö мöддэс дынсянь торйын. Васёк одзасьöмöн висьтасис Митит йылiсь, кöда петкöтöма Амонлiсь гу и кöдö абу сетöма вартлыны рестант Серга.

— А кытöн öнi Сергаыс, тöдат? — юалiс зоночкаэзлiсь Овдя.

— Рестантскöйын — кытöн сэсся, — висьталiс чож кыла Мишка, бытьтö утлянно тöдiс, кытчö пуксьöтiсö Сергаöс. — Кыскисö уездö и йöртiсö рестантскöйö.

— Он тöд, дак эн лёпкы, — видiс ёртсö Васёк. — Сiйö Амон ордö пыртiсö, ачым адззылi. Вийисö, натьтö, и важ колодецö, кöда Амоныс йöр бöрын, чапкисö.

— Мы-ый? — лöгöн юалiс Овдя. — Вийисö?

Васёк, ыджыт, пельöса юра да кузь чужöма зоночка, прокод баитлiс сiйö, мый думайтлiс, и некöр эз кужлы бöбöтчыны. Казялiс, что неладно горöтчис, пондiс дорйисьны:

— Ме мыйöн тöда! Может, и эзö. Только ме сiдз кылi.

— Сэк тожö абутöмсö эн масьты, — видiс сiйö Овдя. — Сергасö оз вийö. Оз вермö — ачыс баитiс, кöр миянын олiс. Колдуйтöм сiя — пуля оз мöртчы.

— А чер — тожö? — юалiс Мишка, и Овдя увереннöя висьталiс:

— Оз.

И сылö кыдз пöрисьжыклö да грамотнöй мортлö, кöда бура тöдö Сергасö, веритiсö. Да и мöдiккезсянь кывлiсö ни, что Серга и колдунлiсь оз пов. А колдуныс эд вермö и кила кöртавны, и шева лэдзны. Вон мöйму лэдзлöмась öтiк мортлö, дак шеваыс, уна юра пиявкаыс, мортлiсь вирсö ойкöлöн сöскыштöм.

Гöрöвтiс вöв, и быдöнныс чеччöвтiсö кок йылö, петiсö зороддэз коласiсь. Небыт отава вылын йирсись вöввез дынö сибöтчис Кузя дед. Сiя пукалiс сивöй мерин вылын, а одзас вашöтiс кык воронöй кöбылаöс. Ны бöрсянь гажтöма люгисö и часто-часто öвтчисö бöжжезнаныс кык чанёк.

Кузя нем оз кыв и шоча шыасьлö отирыскöт. Вот и öнi видзöтыштiс челядьыс ладорö и вашöтiс ассис вöввесö ты дорö. А сэтчинсянь шочыника пондас видзöтлыны и мöдiк вöввес сьöрын, и челядьыс сьöрын.

Куимнанныс бöр пуксисö зород бокö, лöньсисö. Овдя адззис, что и зоночкаэс жалейтöны Сергасö. Да мый то керан, ежели пуксьöтiсö?

Овдя эз на висьтав ассис думасö — отсавны бедаö шедöм мортлö. А ковсяс висьтавны, нытöг сылöн нем оз пет. Сылö колö мунны посадö. Не висьтавны кö ёрттэслö правдасö — Мишка да Васёк öтнаныс оз кольччö вöввескöт. А висьталан — öммезныс виялöны. Мишкалöн, кöть сылö öкмыс тырис, эшö видзсьö öмас, а Васёк, öддьöн честнöй зоночка, мый йылiсь тöдö, сы йылiсь и баитö.

— Тöдат мый, челядь? — пондöтчис Овдя. — Тiйö кывнытö вермит бы дом йылын видзны? Тайна видзны вермат?

— Кыдз этiйö? — барöтiс синнэсö Мишка.

— А вот кыдз, — Овдя сибöтчис матöжык челядьыс дынö. — Этö пондам тöдны только куимöн — ме, тэ и тэ, — чувйыштiс сiя быд моросö чуньнас, — и сэсся некин и некин!

— И Буланкоыслö оз туй висьтасьны? — бöра юалiс Мишка.

— Вöлыслö позьö, — шуис Васёк да содтiс: — Ежели сiя тэнат ёрт.

— Не, некинлö оз позь, — висьталiс Овдя. — Тэ пондан вöлытлö висьтасьны, а морттэз кыласö. Суворов и аслас подушкалö тайнасö эз висьтась. Этö Серга меным висьталiс.

— Кöть и матын некин абу, сёравно оз висьтась? — гусьöн юалiс Мишка.

— Оз, — эшö гусьöнжык висьталiс нылочка. — Дак вот, — сiя чеччылiс, гöгöртiс зороддэсö — оз я кин кывзiсь? — бöр пуксис местаас да эшö юалiс: — А кыдзи кин кöдзас тайнасö, сыкöт мый керны?

— Коккез петшöралан нето кульбукöн вердан, — висьталiс Мишка, а Васёк шы эз сет.

— То тайка — петшöралан! — недовольнöя шыасис Овдя да пондiс кыйны путшалöм чикись йывсö. — Тöдасö тайнасö, дак менö тюрьмаö пуксьöтасö али виясö. Кин нö сэк петшöралас?

— Мый понда виясö? — юалiс Васёк.

— Эн чирзы тэ, — видiс сiйö Мишка, кöть и Васёк эз баит сысся горöнжык.

Овдя строгöя висьталiс:

— Кöть и виясö менö, дак мöдiккез вештiсясö сыкöт, кин тайнасö висьталас. — Ме тшöкта Амоныс Бускоöн пурöтны. Сiя орлалас сiдз жö, кыдз тай сэк — эд вунöтö? — кöинсö.

Мишка дзарнитiс посадлань и матöжык вешшис Васёк бокö. Сiя эз вунöт джагöтöм кöинсö, сiйöн и чожжыка горöтчис:

— Ме и вöлыслö ог висьтав.

— А тэ, Васёк? — юалiс Овдя.

— Ась дзöдзылö пöртча, ежели висьтася, — кöсйисис Васёк.

— Сэк кывзöте... Колö отсавны Сергалö. Колö адззыны сiйö и лэдзны. Ме быдлаись ни кошши — некытöн абу. Тiйö видзöтлö менчим вöввесö, а ме эшö ветла Амоныс ордö. Сергаыс сэтчин кытöнкö.

— Ме жö шуа: сэтчин пыртiсö, — шуис Васёк, — джоджулас сiя, сэсся некытöн лоны. Тэ, Овдя, öшынокас видзöт.

— Ежели сэтчин, кыдз сiйö лэдзны?

— Босьтлы миянлiсь ножовкасö и ыждöт öшынсö. Лэчыт и лэчыт сiя — во! — Мишка мыччалiс певсö.

— Но да! — серöмтчыштiс Овдя. — Амон гозъяыс кулiсö, думайтан? Да эшö Ерошыс сараяс узьö.

— Сэк керку увтсö гарйыны, — висьталiс Васёк. — Ойланьсяняс, кытöн öшыннэс абу.

— Сэтчин адззылам, — шуис Овдя и чеччис. — Колас кö, дак ме кора тiянöс. Сiдзкö, кольччатö?

— Кольччам, — висьталiсö зоночкаэс.

Гортас Овдя босьтiс нянь — этö

Серга понда. А мамыслö висьталiс, что локтiс нуöтны сьöрас Амонлiсь понсö — сыкöт гажажык ойнас.

Шондiыс важынкодь ни пуксис, и кымöр шöрас дзуз видзисö звездаэз. Невылына уйисö шочыник кымöррез. Ны сайсянь мыччасьлiс тöлiсьлöн джын круг, гöрд и гöрд, кыдз Митит сиви вылын ранаыс.

Вылiсь улицаас, ключ дорын, нывкаэс сьылöны басöк тöлiсь йылiсь песня. Сьылöны норöна и дружнöя, дзик öтiк голос. Посад шöрын — лöнь. Сiдзкö, воротаэз да ыбöссэз каличалöмась и тасалöмась, и отирыс узьöны ни. Узьöны сьöкыт онöн, кытшöм овлывлö пöт сёян да сур-ырöш бöрсянь.

Лöнь и Амон керку дын — тожö узьöны. — Может, Мотра оз узь, дак сiя нем оз кыв. Буди, поннэс кыласö да шыасясö.

Овдя пырис стын бердiсь поленич сайö и гусьöник-гусьöник шутньöвтiс поннэсö. Сойка бура тöдö этö шутнялöмсö и петас. А Бускоыс ойнас прокод домйылын.

Сойка кыссис ворота увтöт, и Овдя петiс сылö паныт. Поныс никöстiс и водiс ворота одзас. Сэк нылочка сибöтчис джоджув öшын дынö, малыштiс кинас — абу я тупкалöм? Öшыныс осьта вöлi, и нылочка вашкыштiс сэтчö:

— Дядя Серга-а!

Чöлö джоджув.

— Дядя Серга, шыась!

Джоджулас кинкö кыш-паш керис. Овдя радмис, нёджжöвтiс öшынокас и бöр-бöр керсис — джоджулас югйöвтiсö кык биок. Бöра усисö тöдвылас биа сина куллез, и коккес тувдiсö. Кутчис молитва висьтавны: «Да ловзяс еныс и вашöтас врагсö...» Одзлань Овдя вунöтiс кыввесö и мöдпырся пондöтiс сiйö жö. Сэтчö öшынокас пелитчис-петiс кинкö сьöд, и Овдя сылiс местаас. Но öшын дынö уськöтчис Сойка, и сьöдыс гыжвач кайис стена кузяс да пырис öшынö. Сэк вöлись нылочка казялiс, что öшыныс нач осьта.

Сойка пондiс увтны — кылiс морттэзöс. Овдя бöра дзебсисис поленич саяс. Сэк жö дзур-вир оссис посöдз ыбöс и кинкö петiс оградаö да мунiс огородечö. Этö Мотра. Вон сiя мунiс кыдззес увтö, сэсся кежис мöд межа вылас да иньдöтчис важ колодецлань. Мый сiя сэтчин керис — Овдялö эз тыдав.

Поныс эшö увтыштiс, и Овдя кылiс Амонлiсь лöг голос:

— Сыть, бöбöв! Тэ мый — кöзяинтö он тöд? «Амоника вайöтö код жöниксö, — вежöртiс Овдя. — Одзöв, одзöв».

Сойка эшö öддьöнжык öдззис камгыны-увтны, и Амон висьталiс:

— Сiя тово... сiя кылö йöз мортöс.

— Быль эд, — повзьыштiс иньыс, — вон йöраным кинкö ветлöтö!

— Ась ветлöтö, мед ветлöтö, — бобгыштiс Амон и кыскис иньсö гортас. — Ме вот пишаль петкöта... Ме часöт...

Огородечсяняс пондiс туткыны-видчыны Мотра:

— Локтiсö, ойшöрикаэз! Чеччыны ни колö, а нiя эз на водлö. Ужо, осьта воротасö, игана сэтчин... Ойшöрикаэз!

— Тэ чöв, рушмöм кульбук, — дöвгис аянылыслö Амониха.

Кöр ёркнитiс посöдзын игнасян потш, Овдя петiс поленич сайись. «Мыйлö старухаыс саяс ветлiс? Может, Сергаыс сэтчин кытöнкö? — думайтiс Овдя. — Колö видзöтны». Сiя кытшöвтiс Амонлiсь йöрсö ва кайöтлан уличкаöт, петiс важ колодец дынö. Стын саяс жолькнитiс цепь, эрзыштiс пон. «Бускоыс эстöн. Мыйлö бы этö?» Чупнитiс поныслö, небурика кытсöвтiс. Льöмпу увтiсь петiс Буско, сьöрас жольöтöмöн кыскис цепь. «Татöн Сергаыс»! — радмис Овдя. Сiя коласöтiс стынсö, пырис огородечас. Межаэс ытшкöмöсь ни, а яма гöгöрыс сё тырöма порськокöн да пöлянöн, петшöрöн да урбöжöн. Нылочка эшö чупöтiс поныслö, но Буско только никсыштiс и мунiс карч видзан яма дынö. «Вон мый тэ, Буско, дозирайтан — ямасö!» — казялiс Овдя и жагвыв, медбы не лöгöтны понсö, мунiс пыранiн дынас.

— Тэ сэтöн, дядя Серга?

— Тише ты... гусьöник! — рочöн-комиöн горöтчис Серга. — Часöт вовлiсö. Кыласö, дак беда.

— Водiсö ни нiя, — шушкис Овдя яма öмас. — Ме часöт лэдза тэнö.

— А кысь ключсö? Ме эд замок сайын.

Овдя куталiс решёткасö, адззис замок — ыджыт, кыз вуга. И решёткаыс паськыт полосаэзiсь дорöма, кыдз купеческöй лавкаын.

— Жугöтны колö, — шуис Овдя.

— Кывзы менö, — тшöктiс Серга. — Чоботар Андрей гортас?

— Гортас вöлi.

— Ветлы сы дын и висьтав, кытöн ме. Только гусьöн.

— Но-о...

— Сiя жалейтö миян кодьсö, — баитiс Серга. — А кыдз локтас, понсö нуöт эстiсь, ась оз увт.

— Сiя некöр оз увт, сразу пурö. Но, ме мунi. Амон керку дынöт Овдя мунiс кок чунь вылас и сё видзöтлiс öшыннэзас — оз я кин нёджжась? И син вылас бöра усис пöднавтöм öшыныс. А тöдвылас усис мöдiк: сiя öшын дын, кöртовöй тув вылын, öшалöны ключчез. Поди, и ямасис сэтöн? А мый, вермас лоны.

Стена пöлöн нылочка сибöтчис шöрись öшын увтö, кывзiсис мымдакö, видзöтчис. Сэсся кайис мудьöт вылö, бöра кывзiсис да сыбöрын вöлись судзöтчис наличникöдз, тальччис пазö и сюйыштiс юрсö öшынö. Кытöнкö ыбöс дынас ныргорнас узис кöзяиныс, горницаас чöскыта пишкис Амоника.

Лöнь киа-кока Овдя пуксис öшын вылö, кошшис кинас тувсö. Сэтöн öшалiсö куим ключ. Кöда ны коласiсь? Öтiкыс дженытик, кутанас — кольцо. Сы увтын — ыджыт, топ молоток — амбар ыбöсiсь. Медулын шуль кодь ляпкöса и векнит — не сiя. Сiдзкö, ямасис — вевдöрисьыс.

Дзуркнитiс пöв, Овдялöн ёткöп лэдзчисис сьöлöмыс. Кылiс шебрасöн кышöтöм, пыдына ловзисьöм.

Этö Мотра бергалö важ кроватьын, кöда сулалö полать увтын и вевттьöм роч шебрасöн — одеялоöн.

Дугдiсö вöрöтчыны керкуас, и нылочка босьтiс ключсö, дзебис öмас да лэдзчис öтöрас. Кöть и дзирс пемыт, а туйыс тöдса, и нылочка котöртiс яма дынö.

— Ме ключ вайи, — висьталiс сiя Сергалö, — а Чоботарыс ордö эг ветлы.

— Кысь адззин?

— Ме тöдi, кытöн овлö... Часöт осьта.

Овдяэзлöн абу замоккес, но сiя адззывлiс, кыдз нiйö осьтлывлö Амоника, и кокнита осьтiс. Но пробойсис мездöтны эз вермы — сибдiс замок вугыс. А ямаыс пыдын, Серга оз судз решёткасö.

— Но, мый нö дыр?

— Оз кыссьы да.

— Вай-ко сажень кузя зор. Да гусьöник...

Баня дорись нылочка адззис ён потшпон и сюйыштiс сiйö ямаас. Серга, тыдалö, кыдзкö лöсьöтiс сiйö поспу моз и сы вывсянь мездöтiс замоксö да петiс öтöрас. И Буско сразу жольнитiс цепнас, мурзьыштiс лöга. Серга кватитiс пöв, юалiс:

— Оз пур?

— Ме сiйö каттьöтi льöмпу гöгöрас, цепьыс аршин кузя кольччис.

Серга кöмасис юсö вуджöм бöрын, а Овдя негорöн висьтасис, кыдз сылöн чулалiс талуння рытыс. Ю дорас вöлi туман, и нiя нем эз адззö ас гöгöрсиныс. Вот кылiс кышöтöм и нылочка гусьöник висьталiс:

— Кинкö локтö.

Сапогöн киас чеччöвтiс Серга, и сэк жö кытсöвтiсö сiйö. Но Серга эз шыась.

— Митит локтiс, — чепöссис бокö Овдя и юалiс негорöн: — Тэ öтнат, Митит? Лок татчö.

Туманiсь перво мыччисис пашмöм юр, а сыбöрын и быдсöн мортыс — мышкыра, дзик костöм.

— Öштi ме тiянöс, — пондiс баитны Митит. — Куимöтпырся ни татчö локтi, а вуджны мöдöрас ог лысьт. Кывзiся, кывзiся да бöр вадорсис вешша.

— Дзик тюрьмаын жö видзисö, пондыв-ко пышшы! — шуис Серга. — Решёткаыс кыз — оз позь жугöтны. Да и киэзöс дыр эг вермы мездöтны.

— А кин киэтö пöрччалiс? — юалiс Овдя.

— Джын лунсö стена бердö порсь моз зыртчи, — висьталiс Серга, — и орис йиыс... Но вот ме и готов! Спасибо тэныт, Овдюш, кыдзкö лэдзин.

— Кöбы эг лэдз, дак пуксьöтiсö?

— Мый нылiсь босьтан? Гижасö политика и — Сибирьö...

— Воляыс чожа петас? — сё юасьö Овдя.

— Лоас, Овдюш, лоас, — чорыта шуис Серга. — Меным öтiк умнöй морт висьталiс сiдз: «И джын годыс оз чулав, кыдз мийö, большевиккез, властьсö босьтам ас киö. Абу сэтшöм вын, кöда вермис бы падмöтны миянöс».

— И сэк Мититыслö мусö бöр сетасö?

— Сетасö. Да мыйлö калекаыслö мусö? Сiйö волостьö, Мокейыс туйö, пуксьöтасö.

— Но, тырмас сказкаэтö висьтасьны, — сувтöтiс Сергасö Митит. — Мунам-ко давай.

— Эта быль, старик, — серьёзнöя баитiс Серга. — Большевиккез оз бöбöтö.

— А тэ социлист? — юалiс Овдя.

— Не, ме только рабочöй, — висьталiс Серга и пондiс прощайтчыны. — Но, Овдюш, котöрт. Мöдi вот тiянö вовлыны, и Чоботар Андрейкöт мöдi баитны, а мöднёж петiс... Ладно, адззисьлам эшö. Только эта ой йылiсь, Овдюш, ась некин оз тöд, а то умöль дело аркмас. Вежöртiн? А Чоботарыслö — быдöс висьтась, сылö этö колö тöдны.

— Вежöртi.

— Спасибо, кага, — горöтчис и Митит. — Мун вöввет дынö. Кöркö и ме вештiся тэнат добро понда.

Митит да Серга мунiсö. Овдя эшö сулалöв-керис да лэдзчис берег увтö, медбы вуджны гортланяс.

Сугон весьтын лоис югытжык ни, но му бердас сё эшö каттисис сук пемытыс, и эта пемытын гусьöн-гусьöн лэбалiсö кушборддэз. Нiя кольлалiсö нылочкасö посад дорöдз, а сэсся öшисö. Мотра баитö, что кушборд да дзöдзыв оз лысьтö пырны деревняэзö, кытöн эм вичку али часовня. А Овдя таво тулыснас адззылiс дзöдзывсö Амон оградаись, и Ерош висьталiс, что эта умöль одзын.

Позис бы узьыштны талун и дыржык — праздник ашын — да Овдя тшöктiс саймöтны асьсö одзжык. И Мишка, кöда видзöтлiс вöввес сьöрын шондi петiкö, саймöтiс сэк, кöр шондiыс локтiс вичку крест весьтö.

Сугонын сё сулалiс лöнь, но уналöн ни лонтiсисö горрез. Лонтiсис и Мишкаэзлöн: чочком тшынок, дзик пар, везъясис-петiс керку юр увтсис быд осьтаокöт. Эта сiйöн, мыля нылöн керкуыс сьöд — горыс трубатöм, тшыныс петö потолокись осьтаöт. Амонлöн вон чочком, дак тшыныс столбöн путриктö. Нылöн горöм весьтас кöртовöй чуман, а чумансяняс крыша вевдöрöдз петö труба. Овдялöн эз ни тшынöт трубаыс, натьтö, ештö ни мамыслöн горыс.

Онзыля синнэзнас Овдя дыркодь видзöтiс горт ладорас и думайтiс, мыйсянь пондöтны этö мича лунсö: нето котрасьны Чоботарö, нето кайöтны вöввесö. Мишка пуксьöтöма долонь вылас енкутюöс и зiльö:

Боба, боба — сера зоба, Висьтав меным: зэрас, оз? Оз, дак лэбзьы, Зэрас, дак му вылас пуксьы.

— И енöшкатöг тöдчö — зэрас талун, — висьталiс Овдя. — Туруныс нач кöс, ватор абу.

— Натьтö, зэрас, — шуис Васёк. — Эта праздникö прокод зэрлö.

— Прокод? Вот и не! — пондiс споритны Мишка. — Оз прокод. Петырлуннас сэк зэрлö, кöр розосвонас лымьялö.

— Таво розосвонас соровтiс. Чу, кинкö локтö... Видззез вылö петiс неыджыт мужик да веськыта иньдöтчис челядьыслань. И вöлись дыр мыйись Мишка тöдiс локтiсьсö:

— Ерош тай. Тэ дынö, Овдь, локтö.

Овдя повзьыштiс, вирыс сiдз и чепöссис чужöмас. «Тöдiсö, что ме лэдзи... — Овдя уськöтчис баддез дынö, босьтiс шабурсö, пондiс пасьтасьны. — Пышшыны колö, Амоныс вияс лöгувьяс. Дедö ордö колö...» Сiя тэрмасис пасьтасьны, но некыдз эз адззы соссö и бергалiс öтiк местаын. А Ерошыс сё матынжык и матынжык, то и шынньöлыс ни сылöн тыдалö. И, конечно, не весь сералö...

— Чеччит ни, шегтельöп? — кылö Ерошлöн небытик голосок. — Давай кайöтö вöввесö.

— Кытчö сы одза? — недовольнöя юалö Мишка, и Ерош сэк жö лöньсьöтö сiйö. — А тэ кольччы, колö дак. Меным асланым колöны — рестантöс мöдöны кыскыны, кöдö тöн кутiсö тай.

Кокнитжыка ловзисис Овдя и петiс бадь сайсис зоночкаэс дынö да юалiс Ерошлiсь:

— Быдöс вашöтны али только Буланкосö кайöтан?

— А мый ни, подикось, кольны? — Ерош видзöтiс вöввесö, сыбöрын дзар керис кымöрö. — Шондiыс, видзöт, мый сувда ни кайис.

— А мый сiйö керасö? — матöжык Ерошыс дынö вешшö Мишка. — Тюрьмаö пуксьöтасö?

— Сергасö? — чикыртö синнэсö Ерош. — Сибирьö, пожалуй, бöра турнитасö. Оз жалейтö пö ны коддесö. Амоныс, вон, висьтасьö тай, мый Питерас петöма. Мунöмась, шуö, Серга коддес царьыс дынö...

— Царьыс öнi абу ни, Ерош, — веськöтö мужиксö Васёк.

— Но, кытчöкö сэтчин, — висьтасьö одзлань Ерош. — И чирзöны: «Мусö — отирлö, властьсö — отирлö! Воюйтны дугдам!» Дак нiйö пишаллезiсь пö... Адззат, мый петö.

— Вийлöмась? — гöгрöсмöм синнэзöн юалö Мишка.

— Сiдз тай висьталö вöлi, — кончитiс Ерош да тшöктiс зоночкаэслö панöвтны вöввесö.

Кыдз только бергöтчисö зоночкаэс, Ерош кыскис йöрнöс увтсис кытшöмкö бумага, смекайтчис-керис да гусьöн шуис:

— Ноко висьтавлы, мый эстöн гижöма. Да тэрмась, ась оз кылö шег юррес.

— Мый сiя? — юалiс Овдя.

— Эта газет, — висьталiс Ерош. — Сэтöн гижöны быдöс, мый öнi Россияас керсьö.

Нылочка полöмöн босьтiс газетасö, ас пондасис лыддьöтiс медгырися гижöмсö: «Солдатская правда», — и вöлись шуис горöн:

— Вот мый гижöмась: «Если сами крестьяне и батраки не объединятся...»

— Крессяна и батраки пö? — дзугис лыддьöмсö Ерош. — Сiдз и гижöма?

Овдя эшö öтпыр видзöтыштiс, висьталiс:

— Сiдз и эм.

— Ноко, мый одзланяс?

— Одзлань вот мый: «...если сами не возьмут собственной судьбы в свои собственные руки, то никто им не поможет, никто их не освободит от кабалы помещиков...»

— Во-он кыдз-и! — нюжöтыштiс Ерош да бöра видзöтчис. — А ноко эшö.

— Эшö? Кывзы... «Солдаты! Помогите объединению и вооружению всех рабочих и крестьян... тогда народ получит всю землю, народ избавится от кабалы у помещиков...»

— Сю землю пö? — дивуйтчис Ерош.

— Ну, всю землю, — шуис Овдя.

— А нылö сэк мый кольччас? — юалiс Ерош и босьтiс Овдя киись газетасö да дзебис пиас.

— Кинлö — нылö? — эз вежöрт Овдя.

— Кыдз кинлö? Амоннэслö да Гавраэслö! Нылiсь эд мöдöны мырддьыны и сетны меным. Али сэк нiя ме дын строшнöявны пондасö? Ö-ö, да мый ме тэнчит юася? Лоас пö сiдз: кто был пö ничем, дак лоас пö сем, — Ерош иньдöтчис ни посадö да эшö сувтчыштiс и корис Овдяöс не висьтасьны газетаыс йылiсь.

Овдя вашöтiс вöввесö и думайтiс газета йылiсь, Ерош басни йылiсь, ыджыт Питер город йылiсь, кытöн лёк отир пишаллезiсь лыйлöны морттэз кузя. А может, бöбöтчöны? Ерош — мужик правдивöй, бöбöтчыны оз куж: мый донöн босьтiс, сы донöн и вузалö. Но эз я бöбöт Амоныс? Мыйкö тай Сергаыс мöднёж баитiс да. И газетаыс сы моз жö гижö.

Кöр вöввес петiсö ни воротаись, кöдö осьтiс Ерош, Сугон сайын кылiс негора гымыштöм. «Вот и зэрны мöдö ни», — думайтiс Овдя и пондiс смекайтны кымöрресö. А небоыс вöлi волькыт и сöдз, только вичку саяс, шондi панытас, чуть-чуть гудыртчыштöм. Некытöн кымöртор абу, а гымалö. И сэтöн нылочка казялiс, кыдз ыджыт туй кузя посадö пырис телегаа вöв, и вежöртiс вöлись: этö не гымалöм, а поссö гыма-йирка вуджис телегаыс. Тöдчис, что локтö не простöй мужик: вöлыс ыджыт, бурсиыс тшöтшкöртöм; дугаыс вылын, узöра да цветтэза; сийöс-сермöт бура мавтöм дьöгöдьöн и серöтöм. Воронöй гöныс вöлыслöн свиттьöвтiс, дзик горби одзын сковорода. Да и коробокас пукалiс не деревенскöй паськöма морт. «Мокейö нето учитель ордö локтöны — нiя рочческöт тöдчöны», — сразу казялiс Овдя.

Вевдöрись улицаын пондiсö камгыны-увтны поннэз — этö панталiсö да кольлалöны гöсьсö посадскöй поннэз.

― Тэ, Овдю, верман гортат мунны, — тшöктiс Ерош, — а ме кайöта вöввесö. Вон и зонкаэс вöтöны ни, отсаласö.

Но, вашöтас, дак ась вашöтö — Овдялö этадз эшö буржык: сiя ештас котрасьны и Чоботар ордö, и нылочкаэз дын кежалас, корас нiйö ягöдавны. Позяс ветлыны и базарö, видзöтны, кытшöм ситеццез вайисö ылiсь торговöйез. А цыган, может, бöра ошöс вайöтас и пондас сыкöт йöктыны.

Луныс кузь, уна позяс сякöйсö керны, но медперво сёжö колö керны сiйö, мый тшöктiс Серга — ветлыны Чоботар ордö.

Медбы не гöгравны улицаэзöт, Чеботарсянь Овдя локтiс огородеччезöт веськыта: Андрейсянь пырис Васёккез йöрö, а сэссянь — асланысö. Учöт нылöн карчйöрокыс и йöр бердöдз гöрöм топ и топ, только шöрас кольöмась межа — баня туй.

Межа кузя мунiкö нылочка картов коласiсь нетшкöвтiс жабрей, сöскис цветтэзсис ма. Сэсся казялiс курöггезöс и вашöтiс нiйö öтöрö, бытшöмжыка ольсалiс дöраэз. Мöдiс эшö лук дорö кежавны, да кылiс, кыдз ны ордö пырис кинкö улица ладорсянь. Пырис кинкö чорыт кöмкöта, йирки-ёрки мунiс посöдзöт. Кин бы этö сэтшöмыс? Может, айыс локтiс? Мамыс тай прокод видзчисьö сiйö.

Овдя пыркöтыштiс дубасоксö, юрси пилиммесö чышьян увтас сюйис да котöртiс оградаö. Посöдзас сувтчыштiс, кöр кылiс тöдса, но лöг голос — Амон локтöма.

— Кытöн понпияныт, мыся, кытöн?! — кучиксис петiс Амон.

Мамыс петiс джодж шöрас; сiя видзис киас нянь бекöр и перыта-перыта кресталiс чужöмсö. Но кöр

Амон мöдöтпыр горöтiс, инька спокойнöя шуис:

— Менам, Амонушко, абу понпияннэс. Висьтав кöть, мый лоис.

— Ишшо юасьö сiя! — бöра горöтiс Амон и пондiс, тыдалö, кошшисьны полатись да гор вылiсь.

— Уджалö, Амонушко, — видзис оча кыв хозяйкаыс, — кытöн сылö сэсся лоны? Не тэнчит я добротö дозоритö?

— Дозоритöма тай — бандитöс лэдзöма! — Амон чурс сьöвзис кок увтас и кöин моз унньöвтiс ыджыт лöгсянь и досадасянь, пуксис лабичö да шовк вачкис пидзöс кузяс.

— Да мый тэ! Кытшöм бандитöс? — повзьыштiс мамыс.

— А сэтшöмöс, кöда Мититкöт гуэз да абмаррез ректö, а может, и керкуэз палитö! Эх, колöма тöн ковскыны юрвоманас — сымда и олiс бы!

— Ен-батюшко! Да кин жö керкуэсö сотны пондас?

— Кончаков Серга! Бур патерщикыт тэнат.

— Кöркö вöлi патерщик — писарь сувтöтлiс, а öнi ог тöд, кытöн сулалö. Не тiянын я?

— Тэ ишшо?! — чеччöвтiс местасис да бöра рякöстiс Амон. — Ноко марш волостнöйö, пиня кыр! Лудö, кыдз ме адзза, спинаыт.

Казялiс мамыс, что неладно горöтчис, и пондiс веськöтны не сiдз баитöмсö:

— Норовит, Амон, сет няньсö пöжавны, а сэсся ачым кая.

— Тэ менö сэссяэзнат эн верд, а лöсьöтчы! Урядник видзчисьö. Пöжасö сэтчин боккетö, дак пондан тöдны вöлись.

— Он жö кер сiйö, Амон, — кеймисьöмöн баитiс Анна. — Мийö тэкöт öтiк увтыр эд.

— Кульпиян тэныт öтiк увтыр, а не ме. Марш волостнöйö! — Амон сiдз горöтiс да топнитiс, что инькаыс эз лысьт сэсся шыасьны, а пуктiс валянкасö сельничаö и петiс керкусис.

Овдя кок чунь вылас чепöссис картаö да сайöвтчис пемытжык пельöсокö, кытчö идзасовöй крыша пырйöт эзö сидзö шондi югöррез. Сiя адззылiс, кыдз мамыс, кöмтöм, умöлик йöрнöс-дубаса, петiкас пыркöтiс пизьöсь запонсö, а Амон, шпын юрсиа, йиасьтöм, пезьдалöмöн кыссис Овдя мам сьöрö.

Жиль-жоль игнассис воротка, торс сувтiс ворота одзö тас, и кокшыэз лöньсисö. Овдя чепöссис ны сьöрö, но öтöрас петны эз лысьт: казялас кö сiйö Амон, öддьöн и вартлас. А мамсö, мамсö? Сiйö эд тожö вермасö... Ох, ась ен оз шу! Дак мый нö керны? Поди, мунны волостнöяс — ась сiйö, Овдясö, вартлöны, а мамсö оз вöрöтö? «Ветла Андрейыс дынö, юася да вöлись», — решитiс Овдя и бöра огородеччезöттяс котöртiс Чоботаррез ордö,

Андрей кытчöкö мунö вöлi, и нылочка вöтiс сiйö ылынкодь ни керкуыс дынсянь да висьталiс мамыс йылiсь. Шы эз сэт мужикыт, только дыр видзöтiс кытчöкö нылочка юр вевдöрöт, бытьтö любуйтчис кöз качись керöм крышаöн, кöда весьтын сулалiс, и жагвыв иньдöтчис волостнöй правленнё ладорö. Мунтöнняс сiя кежалiс öтiк керкуö и мыйкö баитыштiс хозяиныскöт.

Неылын базар дынсянь нылö пантасис вöла таратайка. Сэтöн пукалiс Меленьтей, трепич да коска öктiсь, Андрейлöн ёрт. Но Чоботар Андрей и сыкöт эз баит, а только здоровайтчис — лэбтыштiс картузсö — и мунiс одзлань. А Меленьтей бöра пондiс сьылöмöн моз чирзыны учöтсянь велöтöм кыввез:

Меняем, меняем!

Вежсям-пансям!

Ложку на кошку,

пань на кань!

Тряпку на нитку,

трепич на сунич!

Трепич на сунич!..

Былись, Меленьтей öктö сякöйсö, нельки каннезöс, только нiйö тöвнас, кöр нылöн гöныс оз усь. А веськöтчан туруннэз — парматег, пöлян, уразнöй, сьöдтурун, кöчвонь — кöть кöр.

Волостнöй правленнё дынö чукöртчöм уна йöз. Мый сэтöн — сходка али солдатö иньдöны? Но праздник коста некöр эз иньдöтлö. Овдялöн пик мунiс сьöлöмыс: «Поди, мамöс вартлöны да?» Сiя одзалiс Андрейсö и дзескöтчис-пырис отирыс коласö, кыссис ограда ворота дынö. Не заборын, не воротаын щельтор абу, и оз тыдав, мый сэтчин керсьö, только кылö моритöм шатьлöн швычкöм да бырöм голоса горöтлöм: «Эг ме, вашродь, эг ме!»

— Кин этö? — юалiс Андрей, и кынымкö морт öтдруг висьталiсö:

— Батраксö Амон велöтö.

— Ерошöс лöсйöны.

— Крессянаöс, кинöс сэсся... бырöм вешьянаöс...

— Мый понда? — бöра сiдз жö дженыта юалiс Андрей.

— Кин нылiсь тöдас... Бандитлö пышшыны пö отсалöма.

Овдя сразу вежöртiс, кин понда вартлöны Ерошöс — сы понда. Сайкалiс сылöн сьöлöмыс, син одзас пемдiс. Думанас уськöтчис бы оградаас, но коккес эз вöрзьö местасиныс, дзик не аслас лоöмась. Сы кузя вартлöны мортöс, а сiя сулалö и чöлö, дзик ловтöм гыр! Ох, беда, беда! А кыдз эшö мамсö пондасö?

Шать дугдiс швычкыны, и оградаын мыйкö öдззисö боткыны-баитны, но шумувья эз позь вежöртны нем.

Правленнё посöдзö петiс писарь, лöсьöтыштiс кузь уссэсö, кыйис киэсö кыз кынöм вылас, пондiс баитны:

— Но мый тiйö, отир, видзчисятö, а? Али сюромкаэзныт бырсисö ни?

Ворота дынiсь мужиккес бергöтчисö посöдз ладорас, лэбис шум. Овдя öнi лоис медбöрын, но кылiс и адззис, мый керсис поспуэс дын.

— Серафим Изотыч, корлы-ко старшинасö, Мокей Ивановичсö, — тшöктiс писарьсö Чоботар Андрей.

— Мыйлö? — лöгöнмоз юалiс писарь. — Колö мый, дак меным висьтав.

— Старшинасö, мыся, кор, — спокойнöя шуис Андрей. — Öнi жö ась петö.

Писарь эшö мыйкö мöдiс висьтавны, но отирыс шумитiсö, и сiя пырис. А правленнё дынö локтiсö виль морттэз — мужиккез, инькаэз, челядь. Этчö чукöртчисö не только нiя, кин вöлi талун базарын, но и нiя, кин пукалiс нето уджалiс гортас.

Овдя пырис Андрейыс дынö, самöй посöдз дорас, и пондiс видзöтны ыбöс вылö. Мый жö, петас, оз старшинаыс?

Мокей Иванович петiс лöг да мыдз, дзар керис öтмöдöрö и пондiс кизявлыны йöрнöс киззесö. Тöдчис, что сiйö саймöтöмась талун одзöв, нельки абу сетöмась сынавны зыр тошсö да шочыник юрсисö.

— Но баит, Андрей Иванович, — дыша горöтчис старшина да сюйис певвесö басöк йи саяс.

Андрей шагньöвтiс одзлань, пондiс баитны:

— Мый нö эта петö, Мокей Иванович: царь вöлi — лöсйисö, Керенский, мужик дорйись, лоис — бöра кульöны. Али сё эшö важ указыс сьöртi олат?

— Висьтала, Андрей Иванович, — отвечайтiс старшина, — вот мый: разбойниклö да ворлö пыр öтiк указ — розгаöн велöтны. Вот гусяв ме тэнчит виль сапоггетö, дак, небось, лязан нырöмöс. Сiдз эд?

Отирыс öшис, отирыс чöлiс. Мужиккес гыжьялiсö юрбöррезнысö, а инькаэс сулалiсö вöрзьöтчытöг.

— Но мый нö чöлат? — Öдззöтчис старшина. — Вöлi бы тiян власть, дак мöднёж разь керитö?

― Мый гусялiс Ерошыс? Кинлiсь? — юалiс Андрей. — Мыйкö тай эз кывсьыв сэтшöмыс.

— А тэ сы хозяинлiсь, Амонлiсь, юав... Кинлöнкö вына ки кокнита вештiс Овдяöс бокö, и ордчöн Чоботар Андрейкöт сувтiс солдатскöй паськöма морт, а сы бокö — мöдiк (нiйö лэдзöмась пö гортаныс веськöтчыны). Кöда петiс одзжык, висьталiс лöга:

— Раз волостнöйын вартлöны, значит, мийö тэнчит юалам.

— Ме тай висьталi ни, — шынньöв пыр шуис Мокей Иванович. Сылö паныт шыасис мöд солдатыс:

— Мийö сэтчин вир кисьтам, а нiя эстöн айезнымöс ловйöн кульöны...

— Да некин оз куль, граждана, некин! — дорйисьö старшина. — А что размöд шатьöн кинлöкö павкöтiсö, дак коскаыс эз чег, а одзлань сiя, да и мöдiк, умнöйжык лоас. И не ме сiйö кери, урядник керис. То сiя ачыс петö.

Öтмöдöрын пондiсö баитны горöнжык, содiс шум. Оссис ыбöс, и посöдзö шагньöвтiс чочком паськöма морт. Бергöтчыштiс öтланьö, мöдланьö, сувтчис вевдöрись поспу вылас, Овдялö паныт. Сы сапог ныррез вылын öзйыштiсö шондi югöррез. Нылочка тöдiс этö учöтик мыгöра, но паськыт мороса мортсö — урядник, кöда кöркö вовлiс ны ордö и нуöтiс Сергаöс. Сё сэтшöм жö чатыра, кыдз бокас öшалан шашкаыс. «Шуисö, пышшöма урядникыс, кöр царьсö чапкисö, да весь, тыдалö, лёбисö, — думайтiс Овдя. — Быль, видно, бöра мöдö важмоз лоны... Важмоз? Не, оз ло важмоз!»

— Кытшöм зык, мужиккез? — вöснитик да рамыник голосöн юалiс урядник. — Мый мöдат висьтавны? А?

Бöриссес, натьтö, оз и кылö сылiсь баитöмсö, но лöньсьыштiсö. Эта коста и висьталiс Андрей, да сiдз, медбы кылiсö быдöнныс:

— Отирыс корö лэдзны Ерошöс да Опонь Аннаöс! Бöрсяняс горöтлiсö мöдiккез:

— Тырмас тешитчыны крестьянаыс вылын!

— Он лэдз — пондам мöднёж баитны! Мийö не песканнэз!

Урядник сыныштiс отирсö чикыртöм синнэзöн и одззамоз рамыника шуис:

— Кин жö нiйö видзас, господи! И некин нiйö татчö эз кор. Этö Амонлö юрас пырöма вöлi, — сiя бергöтчис ыбöсланяс, горöтiс: — Эй, писарь, ась петö инькаыс!.. А тiйö, мужиккез, мунö гортö. Мунö, ен тiянкöт. Вон и заутреня пондöтчö... — Урядник öзтiс кузь чубука трубка, швыр да швыр кыскис öмас тшынсö и пондiс папкыны-куритны.

Öдззисö сьывны колоколлэз: ляпинчи-нюринчи-шорчи-сугонн! Ляпинчи-нюринчи-шорчи-сугонн! Инькаэс пондiсö юрбитны да жагвыв рознитчыны. Босьтiсö шляпаэзнысö и кресталiсö кымöссэзнысö стариккез да пöрисьжык мужиккез, а томмес борскисö-койисö ас коласаныс, бытьтö эз и кылö звонитöмсö.

Овдя казялiс мамсö эшö ыбöссис и мöдiс уськöтчыны сылö паныт, но поспонас сё сулалiс да швыньгис-куритiс урядникыс, и сiя кольччис местаас. Мамыс кокнита лэдзчис нылыс дынö, и Овдя жмитчыштiс юрнас мамыс морос бердö. Анна ласкова малыштiс нылыслiсь юрсö, лапкöтыштiс спинасö. Этасянь Овдялö лоис сэтшöм бур, сэтшöм долыт, что сылöн рудзисö синваэз.

— Мунам, кага, чожажык, — шушкис мамыс, — няньным эд пöжавтöм.

Нылочка чышкыштiс синнэсö, петiс мамыс одзын отирыс коласiсь и корис:

— Мам, тöдан мый? Тэ менö эн ни шу каганас, но? Ме ыджыт ни, мама.

Анна сьöкыта ловзисис, кокнита горöтчис:

— Мамыслö аслас пияныс прокод лоас кага... А тэ эшö челядь.

— Кöть и челядь, да ыджыт ни...

— Ыджыт тай, — недовольнöя баитiс мамыс. — Ыджыттэс сымдасö бы эз керö, а тэ...

― Да эд некин оз тöд, мам!

— Кыдз озö! Амоныс омöн ни кöдзöма — и тöв ньылат, и тöв паныт. Кöть бы и некин эз тöд, да эд аслыт шог этасянь!..

«Былись, неладно петiс — Ерошöс вартлiсö, — думайтiс Овдя. — Но зато Сергасö мездi. Эта разь умöль? Сiйö бы тюрьмаö...»

Дата добавления: 2015-11-16