Кыкпöвса праздник. Семён локтiс. Операция «Гöрд югöр». Сюримö налькö. Меднöй руббес разь добро?

Эта неделяыс вöлi медкузь и медгажтöм. Öткö, ойезнас часто гымалiс да вирдалiс, а луннэзнас пöжис, и миянлö эз вöв спокой не лунöн не ойöн; мöдкö, дзуздинскöй вöррезын пондöмась ыжмавны бандиттэз; куимöткö, посадын явитчöма чёрт, кöда ойезнас пыравлö керкуэзö, мырддялö отирлiсь деньга да паськöм; нёльöткö, кулöма Арча Кима. Кулöма как раз сiя рытö, кöр мекöт пантасьлiс Шонытмысын. И абу адззöмась сы керкуись не деньга, не золото.

Кузь эта неделяыс вöлi эшö и сысянь, что бригадир миянöс тшöктiс кöртавны сто гоз корось колхознöй пода понда. Вот и ойбыт мийö видзимö мöссэсö син одзын, а луннас заптiм корось. Но йöвсö мöссэс эз чинтö, удойес эз öшлö. Этöн вöлiмö довольнöйöсь и мийö, и Титовна.

Петырлун вечерняö, асывнас, Титовна вайис меным йöв и шуис:

— Но, зонка, тэ эд ашын нимлуна, натьтö.

— Нимлуна, — висьталi ме.

— Уна я тырас?

— Тринадцать.

— Вот и работник лоин... Но, ыджыта быдмы и айыт кодь жö вежöра ло.

— Ладно.

— Тöн председателькöт ме баитi. Сетiс тэныт пизёк кык кило. На, получит, — и Титовна мыччис меным гижöток. — А эшö лэдза ме тэнö кык ой кежö шоччисьны.

— Ладно, — бöра шуи ме. — А кыдз инö дедö öтнас?

— Мыля öтнас? Ме лоа, да кинöскö эшö колямö. И Егорсö луннас шоччöтамö.

Мунi ме Егор дынö, ошшасьны пизёкнам и выходнöйöн.

— Вот и бур, шоччисьышт, — висьталiс сiя. — Только вот малина öктыштам, и лэдзчы.

— Абу на воöма да.

— Местаок öтiкö тöда, одз сэтöн воö, — шуис Егор. — Ветлам-ко да видзöтам.

Пырим сэтчин, кысь ме адззылi уна озъягöдсö. Былись, кöр орддим рöма видзоксö да петiм мырьяинö, адззим гöрдöтöм малина. Унажык туссес вöлiсö эшö дзорöсь, но час бöртi ме öктi малинасö джын корзинаам. Может, и тыртi бы дозöс, но сюрис сэтшöм ягöд, кöда ачыс пырö öмö и некыдз бы оз пыр корзинаö.

Егор жагöна öктiсис, а сылöн туисокыс чожа тырис. Мöдiс и меным отсавны öктiсьны, да ме эг тшöкты: сiдз ни сiя öддьöн мыдзис.

Мекöт старик иньдöтiс ассис туисоксö да висьталiс:

— Ашын тiянö вовла. Кружка брага лöсьöт. Оз ло, дак зу вылö пуксьöта.

— Лöсьöта, деда, — кöсйиси ме. — Может, и сур керас мамö. Тэ любитан сурсö?

— Кин жö сiйö оз любит?..

Лэдзчикас ме эшö кежалi Гавкамысö. Сэтчин гуддисьыштi невна яма гöгöрас, да нем вильсö эг адззы. Ветлöтi-кери мыс кузяс, смекайтi, абу я кытöнкö мöдiк богатырскöй бедь.

Мöдiкыс эз вöв сэтöн.

Нетшкöвтi кузь кöчвонь — Витялö чача, пуктi сiйö шабур карманам и веськыта, а не Шулимöт, петi вöрсис.

Лена Витякöт менö панталiсö ытшкöм ни видз дорын. Сэтöн жö ме висьталi нылö, что синяшорскöй кöч нылö иньдöтiс гöснеч.

— Кытшöм гöснечыс? — юалiс Лена.

— А то кытшöм, — ме осьтi корзинасö и мыччалi нылö малинасö.

— Эта ягöд, а не гöснеч, — висьталiс Витя. — Гöснечсö лавкаын вузалöны.

— Кöчыслöн чöскытжык, Витю, — велöтiс сiйö Лена и сюйыштiс Витялö öмас малина тусь. — Чöскыт эд?

— Чöскы-ыт! — сёйис тусьсö да чупнитiс öмокнас Витя и сэсся ачыс судзöтiс ягöдсö да вердiс Ленаöс. — А эшö мый сетiс кöчыс?

— Кöчвонь сетiс, — кыски ме кармансим кöчвоньсö да катти голя гöгöрас.

— Кöчнинкöмсö эз сет?

— Эз на. Кыйтöмöсь пö эшö.

— Ась кыйö.

— Кыяс... Мунам гортö, — и ме босьтi вонокöс киам да пыртi керкуö.

Лена вайис бекöр, ме кисьтi сэтчö ассим джын малинасö, а туисоксö кайöтi Жысь Егорикалö. Сьöрам босьтi и кöзичка: пизьсö сеталöны Шулимын.

Складыс как раз вöлi осьта — лöсьöтчöны мунны изны — и ме мыччи гижöтсö кладовщикыслö. Сiя босьтiс гижöтсö, лыддьöтiс и сетiс бöр:

— Рытнас вовлы, часöт и шырлö нем сёйны. А кыдзи оз изö талун, сэк вöлiсь ашын асывнас. Только одзжык.

Егорика гортас эз вöв, и ковсис меным ветлыны видз вылö.

Бертi ме гортö тшыг, мыдзöм и чожжыка кысси сарайö да сразу ланьтi.

Пемдандорас менö саймöтiс мамö. Ачыс лонтiс баня, а ме киськалi огуреццез и котраси пизьла. Сыбöрын мийö Витякöт мунiм пывсьыны, а мамö да Лена миськалiсö джодж.

Вылына ни лэбтiсис шондi да вашöтiс асывся ыркытсö, а ме сё нежитчи туруновöй ольпасьын. Эстöн ыркыт, не ном, не лöдз абу, оз ков думайтны мöссэз йылiсь. Бокам пишкö-узьö Витя и мыйкö сералыштлö — натьтö, вöтасьö гажа вöт.

Мамö эшö шондiтöг высьтiс да вашöтiс мöссö поскотинаö и мунiс ытшкисьны. Чожа локтас гортö да пондас стряпайтны. Сыбöрын ветлас куртны и совсем ни локтас. Отирлö праздник — и сылö праздник.

Оградаö йирка-ёрка пырис Пашка. Ме сiйö ог адззы, но тöда сылiсь кок шыэсö — дзик тоиннэз вылын ветлöтö. Тöда сылiсь и привычкасö клопöтны ыбöсöн да воротаöн.

— Пашка, этö тэ? — горöтi ме сарайсяняс.

— Тэ кытöн, Петька? — шыасис сiя паныт. — Лок татчö.

— Мыйлö? Кай ачыт сараяс.

— Мыйлö, мыйлö! — лöгасис Пашка, но кайис сараяс. Перво мыччисис сылöн пашмöм юрыс, сэсся ыджыт синнэс и кузь нырыс. Вöлись ачыс кайис сараяс — лöз йöрнöса да сьöд вешьяна, кöмтöм. — Семён локтiс, а тэ узян! Юалiс ни тэнö.

Семён меным лоö очавонöн. Велöтчис сiя университетын, но кончитны эз ешты: босьтiсö армияö. Мунiс сiя мöйму, и кольлалiс сiйö джын деревняыс. Инькаэз и мужиккез, нывкаэз и зонкаэз кутчисьöмöн мунiсö улица шöрöт и нюжöтiсö:

Ветлö-öта-а, о-отир, ме тiя-а-анкö-öт,

Гуля-айта-а ме-эдбöрья луно-о-ок...

Сьылiсö норöн-норöн, синваэз пыр: кольлалöны сорок седьмöйöс, а панталiсö вöлись куимöс, да и нiя калекаэз. Кытшöм ни сэтöн гажа сьылöм!

Семён эз сьыв, а горзiс. И меным обидно вöлi сы кузя: татöн горзö, а мый нö фронт вылас лоас?..

— Кöр, Пашка, локтiс?

— Неважын. Орденнэс тыр. Лок чожжык.

Вот праздник дак праздник — Семён локтöма! Кыкпöвса праздник!

Чепöсси местасим, пасьтаси, а кöмасьны эг ни понды. Но Витясö эг лысьт кольны сараяс да мöдi саймöтны. Сiя няпрасис и некыдз эз вермы осьтны синнэсö. И сэк мийö Пашкакöт лэдзчöтiм сiйö узянсö, пыртiмö керкуö, водтöтiмö Лена бокö. Ась вöлись эстöн узьö кöть рытöдз — джоджсис некытчö оз берездась!

Семён пукалiс пызан дын и баитiс стариккезкöт. Голосыс кыз лоöма да гора, а ачыс сё сэтшöм — чангыля ныра, винерик, паськыт пеля. Порогувтас, ровно свадьба коста, сулалiсö и пукалiсö старухаэз да челядь. И быдöнныс видзöтiсö этö том командирсö.

Ме петыштi отир коласiсь, нёджжöвтi сы вылö и кынми местаам: ух тэ кытшöм! Быдöс сылöн свиттялö: и киззес, и ремень, и сапоггес, и орденнэс.

— Но, мый нö, Петя, сiдз видзöтан? — горöтчис Семён. — Али эн тöд?

Шагньöвтi сы дынö, нюжöтi киöс:

— Здорово, Семён.

— Здравствуй, Петя! — сiя чеччыштiс, жмитiс киöс. — Здравствуй, вонö.

— Тэ артиллерист? — юася ме.

— Артиллерист.

— Калинин энö сетiс?

— Генерал сетiс.

— Катюшасö адззылiн?

— Адззылi. Бур штука.

— А «тигрресö»?

— Куштiм невна.

— Покрышкинсö тöдан?

— Кывны кывлi, да эг пантасьлы. Сiя — кымöрас, а ме — улын... Ноко пуксьы, ме тэныт мыйкö сета часöт, — Семён мунiс комас и петкöтiс сэтчинiсь пурток да фонарик. — Месянь козин тэныт.

— Немецкöйöсь?

— Итальянскöйöсь.

Уна бы ме сылiсь юаси, но сэтчö пырис Пиля Ваней, ыджыт öма, шаньга рожабана детина. Таво сiя куйлiс госпитальын, неважын локтiс гортö. Керöмась сылö операция — пельпонсис да гырдззасис кыскалöмась осколоккез. Öт киыс сылöн öшалö öнi чышьян вылын, а мöдыс здоровöй, но сiя киын только öтiк пев. Кöр удасö сылö брага, сiя паськöтö чуньтöм долоньсö, и сэтчö сылö пуктöны кружкасö. Пань и вилка сiя бура видзö.

Праздник кузя Ваней юыштöма ни, и öнi сiйö няньöн эн верд, но сет баитны. Любитö сiя баитны, любитö и содтыштны ассяняс. Быдöс деревняыс этö тöдö, но быдыс кывзö сылiсь висьтасьöм. Кывзö сiйöн, что Ваней висьтасьö война йылiсь, сьöкыт солдатскöй олан йылiсь. Кывзö и сiйöн, что сэсся некинöс кывзыны.

— Но, здорово, сосед! — нюжöтiс хозяинлö чуньтöм кисö Ваней. — Ловья и дзонь локтiн?

— Коскаэзö кытчöдз дзоньöсь, Иван, — Ванейлiсь кисö треситiкö баитiс Семён, — а кучикö дöмаса жö... Кыдз тэ?

— Кыскалiсö вот яйсим фашистскöй гöснечсö да вочисö осьтаэсö. Кытчöдз ог кув, дак овны понда.

— Кытöн ранитiсö тэнö, Иван? Сталинградын?

— Не, одзжык менö павкöтiс. Москва сайын... Вот юа да висьтася вöлись, — и сiя кутiс кинас кружка пыдöссö, кöдö Семёнлöн мамыс лöсьöтiс Ваней одзö. Юис быдöс, чышкис певнас öм дорсö. — Дасöт бой сiя менам вöлi. Правда, мöдiк танк ни получитi, первöйсö Калинин дын сотiсö, гаддэз... Сетiсö сигнал — атакаö. «Давай, Ваня», — шуö командирыс. Вöрзьöтi местасис, сэсся сюйыштi медбöрья скоростьсö. Вижжитö моторыс, кыдз зверь, машинаыс тöвчикöн пöльтö. А немецкöй окопыс паныт лэбзьö. Повзис фрицыт, пышшыны пондiс. А мiйö сiйö вурам, а мийö вурам! И пушкасис, и пулемётсис. Вдруг — бумм! — и башняыс гиль-голь усис. Ме сё зэлöта и зэлöта одзлань, крöшита гусеницаэзнас зверресö да нылiсь поззэзнысö! А пулемётыс ытшкö и ытшкö. Вдруг — трах-таратах! — и гусеницаыс одзам чеччöвтiс да кыдз нямöт ольсассис. А ме сё зэлöта и зэлöта...

— Норовит жö, Иван, — сувтöтiс Ванейсö Семён. — Этö кыдз жö... гусеницатöг...

— А вот сiдз, Семён, гусеницатöг! Эх, зверьё нiя! — сöтiс долонь дорнас пидзöс кузяс Ваней и пондiс горзыны да гирчыктыны пиннезнас.

Порогувтас кинкö ыш ловзисис, кинкö енсö касьтылiс, и сэсся шытöг сьöрсьöн-бöрсьöн быдöнныс петiсö керкусис.

Ны бöрсянь и мийö Пашкакöт колимö этö керкусö да котöртiмö миянö, мед пемытiнын видзöтны да донтыны козинсö. Но гидйö мийö эг ештö пырны — пантасис мамö, и перво колiс пыравны сёйны. А сёйöм бöрын мамö пыртiс базарскöй вешьян да алöй сатиновöй йöрнöс, кöдö вурис меным тятюö йöрнöсiсь, и тшöктiс нiйö пасьтавны.

Менам чужис виль план, кöда сьöртi мийö Пашкакöт судзöтам Арча Кималiсь золото. А эттшöм басöк йöрнöссö сэтчин не только мавтан, но и косявны верман.

— Сёрöнжык, мам, пасьтася, — висьталi ме да кыски Пашкаöс сьöрам.

Пыримö мийö гидйö, пöднасим. Ме öзтi фонарикöс, и стена вылын югйöвтiс чочком кöчок.

— А часöт гöрд лоас, — висьталi ме да вештi фонариксис кнопка. Стена кузяс пондiс шныритны-котрасьны гöрд югöр. — Адззан?

— Вот этö фонарик! — дивуйтчис Пашка.

— Эшö зелёнöй эм, — ошшаси ме одзлань да вежи гöрд стеклосö зелёнöйöн. — Öнi позьö пондöтны öтiк операция. Секретнöйö, — гусьöн содтi ме.

— Кытшöм операция? — эз вежöрт Пашка.

— Операция «Гöрд югöр», — юöртi ме да сэтöн жö висьтаси Пашкалö аслам план йылiсь.

— Ö-ö, быдöс этö весь, — макнитiс кинас Пашка.

— Не, не весь, Пашка, — пондi шушкыны сылö пель одзас. — Ачыс Кимаыс меным висьталiс, что сылöн эм золото.

— А мыля эн юав, кытöн сiя куйлö? — серöмтчис Пашка.

— Муын, шуö, лоас, кöр кула... Джоджулiсь колö кошшыны.

— Пемыт сэтчин, — висьталiс Пашка.

― А эта мыйлö? ― мыччалi ме сылö стена вылын югыт югöр. — Часöт жö и мунам... Он мун, дак ме öтнам.

Сёдаки Пашкалö тожö охота вöлi адззыны золотосö да небны сы вылö самолёт, и сiя согласитчис.

Босьтiм мийö зыр да вила и огородеччес бöрöт мунiм деревня конецö, вуджим лог сайö. Сэтöн, мысок вылын, сулалiс тёссэзöн дорöм öшына керку. Сыкöт ордчöн шондi югöррез увтын свиттялiс чочком крыша. Эта — амбар. Сiйö Кима неважын вевттис виль тёсöн, мед и öтiк зэр воть эз сюр сусеккезö, эз тшыкöт бы сэтчинiсь пизьсö да сюсö. Торйын керку дынсянь, уна вожа пöрись льöмпу дынын, ляпкöтчöма баня. Керку бöрас одзжык вöлiсö гиддэз, но старик мöйму нiйö разис да лонтiс горын.

Посöдз ыбöс вöлi замока, а ворота пыкöталöма пытшксяняс, и мийö гöгöртiмö огородечöт да пыримö керкуас карта ладорсянь.

Керкуас вöлi пемыткодь, но быдöс тыдалiс: öшыннэс дорöмась шоча, и пöввез коласöт сидзис шондi. Джоджын куйлiсö отопкиэз, отрепьё да гор весьтас сулалiс векнитик скамья. Сэсся нем эз вöв - не лабич, не пызан, нельки пöлатьсö мыйлöкö разьöмась.

Непаськыт, но кыз плахаись керöм западня ыбöсöт мийö пыримö джоджулö. Сэтчин вöлi югыт, сöстöм, кöс. Этö сысянь, что джоджулас кык öшын, и нiя кыкнанныс осьтаöсь. Пырим, топыта пöдналiм джоджув ыбöссö.

— Ямасис нем кошшыны, — висьталiс Пашка, — сэтöн абу.

― Тэ мый, шучкöп адззан? ― юалi ме. ― Может, как раз ямаас.

― Тулыснас сэтöн ва пукалö, ― шуис Пашка. ― Ме мамöсянь кывлi. А ваас разь дзеблöны деньгасö?

― Этö сiдз, ― согласитчи ме. ― Сэк мудьöтсис пондам кошшыны. Давай чувйы виланас. Только тшöка и тшöка, простöй места эн коль.

— Ачым тöда, не учöтик, — öбидитчис Пашка и пондiс бытшкавны кöс да рышкыт, дзик пöим, мусö. Сы бöрсянь и ме öдззи масьтыны мудьöтсö зырнам, бытьтö сечкаöн пельнянь яй.

Уджалiм пымавтöдз, но бытшкалiм только öтiк стена пöлöт. Сэсся шоччисим невна да вились кутчим соровтны мусö. Но Пашка пондiс дышöтчыны, меным ковис тэрмöтлыны сiйö.

— Киэз ни орисö, — жалуйтчис сiя, — а видзöт, сё нем абу.

— А тэ думайтiн öтпыр гуддьыштны и сразу пуд золото кыскыны? Не, сiя кокнита оз шед.

— Кöбы эм, дак и неделя бы кошшиси эстöн, но...

— Эм, Пашка, эм! — öзйöта ме сiйö. — Только кошшыны колö.

Четверть бöрсянь четверть, метр бöрсянь метр мийö чувйимö нёльнан мудьöтсö, но кладыс эз пантась.

— Может, пыдынжыка колiс гарйыны? — шуа ме. Пашка макнитiс кинас да висьталiс:

— Ась сiсьмö, абу жаль. Менам кынöмö сималö...

— Норовит, Пашка, — кеймися ме. — Эм татöн золотоыс.

— Эм, дак кошшы, а ме муна, — орöтiс баснисö Пашка и иньдöтчис западня увтö. Менам и лöгö петiс сы вылö, но öтнам кольччыны ог лысьт.

Пондiс петны Пашка джоджувсис, а ыбöсыс оз оссьы.

— Тойышт буржыка, — велöта ме сiйö. — Зэлытöв, адззан.

— Тойышт-ко, оз оссьы дак, — пиньгö мекöт Пашка. — Замокассис, тыдалö. Мыйкö тач только керис, кöр вöрзьöтi. Хитрöй замок сэтöн, вот мый. Налькö сюримö. Пукалан öнi эстöн быдöс праздниксö. — Пуксис, öшöтiс юрсö.

— Ог пукалö, эн пов, — баита ме.

— А кыдз петамö?

— Жугдам ыбöссö.

— Тэ эн я бöбмы? — повзис Пашка. — А кыдзи кылас кинкö?

— Но пукав гусьöн, охота кö, — висьталi ме и пукси Пашка бокö. Конечно, ыбöс ме эг мöд жугдыны. Öткö, кыз сiя, мöдкö, жаль сiйö чеглавны, а куимöткö, вермас кинкö кывны ёркöтöмсö да локны миян дынö. А эта лоас медумöль дело — воррезöн шуасö. Миян деревняын сэтшöмыс эз на вöвлы, мед кинкö гусясис.

— Давай стена увтсö гарйыны, — висьталiс Пашка.

— Перво видзöтам, оз я туй осьтны ыбöссö.

Лэбтiси ме поспу вылас, иньöдi фонариклiсь югöрсö ыбöсас. Неужели хитрöй иган?

Пыкöтаси ыбöсас киэзнам и юрнам, зэлöтi öддьöнжык — ыбöсыс шовк оссис.

— Эх тэ, клад кошшись! — пондi серавны ме Пашка вылын. — Тэ эд дзирсö осьтiн, шарнирресö мöдiн орлавны!.. Лок пет.

Ме мыччыштi юрöс западня вевдöрас и чер-бар берездаси улö, а ыбöсыс хлопкис-пöднассис.

— Мый лоис? — шушкö пель одзам Пашка. — Кинкö эм? Менам и кылö оз бергöтчы, дзик кынмöм, и чеччыны ог вермы.

— Но, мый тэ? — зэгйö пельпонöс Пашка. — Кывтö ньылыштiн я мый я?

Куйлыштi, чулалiс менам повзьöмö. Вöлись шуи:

— Порог вылас кинкö быкöн сулалö... сюра. Синнэс сотчöны. Öмсис би петö.

Висьталi этадз, и Пашка ме бердö ляпкöтчис, не кулöм не ловья пукалö. Етша сiя вöвлi вöрын, шоча ветлывлiс чериавны ой кежö и öддьöн полö сякöйсис. Мый ни сы йылiсь баитны, кöр и ме шöри повзи.

— А кин сiя? — дрöжитö Пашка, но кылыс сё жö бергалö умöлика.

— Часöт адззылам, — храбритча ме. — Тэ зырнас лэбтышт ыбöссö да досповна эн осьт.

Пашка сувтiс, пыкöталiс зырнас ыбöссö, колассьöтiс чуть-чуть. Ме кутi виласö, бытьтö винтовка, и негорöн, но лöгöнмоз юалi:

— А но шыась, кин сэтчин!

Кыш-паш кинкö пырыштiс керкуас да дзик никсыштiс. — Пон, некö, Пашка.

— Пон? — юалiс Пашка гусьöн. — Лапкоыс, поди, да? Кылiс кышöтöм, гыжьясьöм да никсöм.

— Миян Лапкоыс! — серöмсорöн горöтчис Пашка да ванйöвтiс джоджув ыбöссö. — Но тэ и Лапик-ляпик! Повзьöтiн дак повзьöтiн! — öдззис горöтлыны Пашка да петiс джоджувсис.

— Эн чирзы, — öлi сiйö ме, бöрсяняс петiкö.

Пашка лöньсис. Сувтöтiс сiя зырсö порог дорас, кутiс понсö одзись коккезöттяс, пуксис западня вылö. Ме тожö сувтöтi вилаöс ыбöс дорас да пукси скамья вылö.

Пукалам да чöлам. Пашка любитö понсö, а ме гуддя чуньнам нырöс, кыскала буссö. Öбида кутiс менö, что вот сымда öштiмö кад — гажа праздник кад, — а пыстöм ем эг адззö. Или умöля кошшим, или мöдiклаын кладыс. А что эм эта керкуын золотоыс, ме бура веритi этаö, бура тöдi. Сьöлöмнам, кыдз баитö Жысь Егор, кылi, быдöс вывтырнам кылi. Но кытöн, кытöн сiя? Может, вон сiя пазын — öшын вевдöрас? Мыйлöкö эд тупьялiсö жö сiйö баклушнас?

Чеччи ме, сувтöтi скамьясö öшын весьтас, медбы видзöтны, мый дзебöм баклуш увтас. Югдöтi фонарикöн баклушсö. Сiя пазас зэв сюйыштöма, но кöрттулöн абу дорöма. Мöдi видзöтны, мый пытшкас, да киэзö оз судзö. Сувтöтi скамьясö дорвыв, пöрöтыштi стена бердас. Пашка пондiс видзны сiйö, мед эз пöр, а ме кайи скамья коккез вылас. Но только ештi павкöтчыны баклуш бердас — скамья кокыс чегис, и ме гуж лэдзчиси джоджас. Лапко повзис да вотьыштiс-петiс керкусис, а ме пукала джоджас да нирта стена бердö зыртыштöм кымöсöс.

— Доймин, Петька? — юалiс Пашка да содтiс: — Но сiйö, эшö вийсян эстöн! Мунам сёйны.

Одзам куйлö чегöм скамья кокыс. Мыля сiя чегис, эта кызаыс? А-а, сiсь пуись керлöмась, шöрас гырк эм. Но и мастер жö вöлöма — ён пусö дышöтчöма кошшыны.

Босьтi коксö киам, шондi югöр весьтö вайöтi, нёджжала. Былись, пуыс гырка вöлöма, а гыркас вурун сюйöмась. Интересно, мыйлö сiйö? Кыскалi чепöльнам вурунсö — мыччисисö вежкодь гöгляннэз. Судзöтi öтiкö, берестита киам.

— Мый сiя, — юасьö Пашка, — не я золотоыс?

— Меднöй копейкаэз, — ыш ловзиси ме да сетi деньгасö Пашкалö. — А шуис: кытчö пö доброöс воштыны. Эта разь добро?

― Важ деньгаэз, — шуö Пашка. — Не копейкаэз, а руббез. То гижöма: пять рублей... 1904 год.

— Кöть и руббез, да сёравно важöсь. Мый нiйöн керны?

— Семёныслö сетам. Сiя эд öктö важжесö... Может, и мöд коккезас эмöсь?

Пашка бура видзöтiс, абу я пырöтлöмась вевдöрсяняс мöдiк коккес, но нем сэтшöмыс эз тöдчы. Пондылiс чеглавны скамья коккесö, но тожö эз вермы: абу гыркаöсь, сiйöн и эз чегö.

Ме лöсьöтi йöрнöс подулöс, Пашка трекнитiс сэтчö скамья коксис деньгасö. Нiя быдöс вöлiсö öткодьöсь, вачкисисö виль трёхкопеечнöй деньгаэз вылö, только сьöкытжыкöсь да кызжыкöсь.

— Тэ, Пашка, некинлö эн висьтась эта йылiсь.

— Ачым тöда, не учöтик ни.

— Но ежели ковсяс, дак сiдз висьталам: тупка пö лэбзис Арча керкуас, и кутны мöдiм.

Семён пантасис неылын миян керку дынсянь. Вöлi сiя не öтнас, а Прокопкöт, но ме сё жö сувтöтi нiйö да кисьтi öлöдзсим важ деньгаэсö лудовка вылас.

— То мый адззим, — висьталi ме. — Может, тэныт колöны, Семён?

— Кысь тэ нiйö?! — повзьöм голосöн горöтыштiс Прокоп и сувтiс пидзöс вылас да пондiс öктыны деньгаэсö кырымас. — Одиннадцать золотушка! Бöра клад кошшин?

— Сiя разь... эта разь... золото? — öши ме. Радсянь юрам жар кайис, сьöлöм вартiс, дзик шальнöй. Золото! Золото адззим! Вон сiя кытшöм, а ме эг тöд.

Семён босьтiс Прокопыс киись öтiк деньга, видзöт керис да висьталiс:

— Николаевскöй золото. Девяносто шестöй проба. Только мыйкö дзик сьöджыкöсь.

— Дыр ва местын, натьтö, олiсö, вот и сiмыштiсö чуть, — висьталiс Прокоп.

— Золотоыс оз сiм, — шуис Семён.

— Пемдö сёдаки, — висьталiс Прокоп. — Аслам вöлiсö, тöда... Тэ сiйö дзеб, Петька, и некинлö кытчöдз эн висьтась сы йылiсь.

— Мыля не висьтасьны? — эг вежöрт ме Прокопсö.

— Сы понда, зонка, юртö öштан, — легöтiс чуньнас меным синнэз одзын Прокоп. — На-ко да нöбöт чожжыка кытчöкö, — и сiя тэчис деньгаэсö менам кырымö.

— Эн повзьöтлы, Прокоп, челядьсö, — шуис Семён. — Нем оз ло... Но кытiсь тiйö адззит золотосö?

Ме дзарнитi Пашка вылö, сiя — ме вылö: висьтавны али не? Секретнöй операция эд миян вöлi.

— Ежели оз туй висьтасьны, дак силöй ог тшöкты, — тöдiс менчим думаöс Семён. — Эдö жö, поди, гусялö.

— Тiянлö туйö висьтасьны, тiйö солдаттэз, — решитi ме.

— Не эстöн, не эстöн, — сувтöтiс менö Прокоп. — Öтöрыс и паськыт сина, и кузь пеля.

— Мунам сэк миянö, — корис Семён.

Пырим Семён ордö. Мийö Пашкакöт пуксим лабичö, лöсьöтчим висьтасьны, кыдз адззим золото.

Кöть и керкуас некин эз вöв, но кöд коста Семён кошшис ырöш да чöвтiс сiйö кунганö, Прокоп нёджжöвтiс комö, пöлатьö, гор вылö — абу я кин сэтчин? — вöлись пуксис миян бокö да шуис:

— Арчу пиянын тiйö, угланнэз, кошшисит. Сэсся некысь босьтны.

Мийö Пашкакöт барöтiм синнэзнымöс: мыйöн сiя тöдö?

— Сiдз эд? — чикыртiс синнэсö Прокоп да зорöна видзöтiс миян вылö.

— Сэтчин вöлiмö...

— Кытчö дзебöм?

— Скамья кокö.

— Эта мымда и вöлi?

— Сымда.

— Чапкö сiйö медпыдын йирö — и конец. Золото — эта несчастье.

Семён удiс Прокоплö ырöш, горöтчис:

— Но мыля жö йирö, Прокоп? Банкö колö нöбöтны. Оборона фондö, шуам, сетны. Кыдз тiйö, челядь, думайтат?

— Меным мый? — висьталiс Пашка. — Петькаыс адззис, ась сiя и висьталö.

Тöдчö, что Пашка повзис ни. Быдöнныс тöдöны — слабöй сьöлöма зонкаыс, полiськодь, кöть и стиххез кужö гижны.

— Сетам, — решитi ме.

Прокоп юис жагöника, дзик неюись кукань чурскöтчис. Юис, миянöс юкталiс да сетiс кунгансö Семёнлö.

— Банкö нöбöтны недыр, — пондöтiс Прокоп. — Ме кöркö тожö нöбöтлi кык гöглянок. Мöдi богатсявны, да олан вылас не рад лои... Примитiсö, деньга сетiсö. Эз и юалö, кытiсь сiя меным сюрис. Но ашынас только сайми — милиционер локтiс. Шапкасö, кыдз поп жö, пызан вылö и давай юасьны. Кыскис бумага, карандаш, гижны лöсьöтчö, кытiсь ме судзöтi золотöй чачаэсö. Меным, мыся, айö кольлiс, кöр кувны пондiс, а сылö — тожö айыс, но кысь нiя шедлiсö — огö тöдö... Тэ, шуö, эн ылöтчы, а веськыта висьтав. Ме шуа: мый тöда бур морт, быдöс висьталi, дзик поп одзын, а öнi уджавны колö мунны, а то бригадир штрафуйтас, ежели сёрма. А сiя: он висьтав пö меным, дак мöдiклаын висьталан. Инькаö кеймисьны пондiс, медбы некытчö менö эз нуöтö, божитчö, что былись сiдз и эм, кыдз ме висьтаси. Быдöс, шуö, сетам, мый эм, только эн нуöт пö хозяинöс. А милиционерыс юалö, уна я эшö эмöсь золотушкаэс. Кыскис иньö коробьясис остаткисö, чышьянокнас сы одзö и пуктiс. И деньгасö, мымда вöлi — öтлаö. Ачыс сё кеймисьö, медбы менö гортö колисö и некытшöм бумага эз гижö. Но, лыддис сiя деньгасö, каттис быдöс чышьянокас и пуктiс сумкаас. А бумагасö сё жö гижис. Только гижис, что миян абу некытшöм золото. Лыддьöтi ме, подпись пуктi. Милиционерыс курöтiс менö чöскыт табакöн и мунiс... Месяц-мöд бытшöмика эг онмöссьыв сыбöрын, да кыдзкö чулалiс... Чапкö йирас, ась веж юрсиаыс сыкöт вöдитчö.

— Эн пов, Прокоп, — шуис Семён. — Верма ме нöбöтны.

— Ачыт тöдан, Семён, — висьталiс Прокоп. — А ме моз, дак эз ков. И чудскöй кладдэсö эз ков бы вöрöтны.

— Кинкö разь вöрöтö? — юалiс Семён.

— Ёртö то менам, Петькаыс, Гавкамысын гарйöв-керöм, — висьталiс Прокоп.

— И мый адззин, Петя? — юалiс Семён.

— Нем эг адззы, ― öшöтi ме юрöс.

— А мый понда кошшан? Богатсявны мöдан, кыдз Прокопыс?

— Не-е, Москваö мöдi иньдыны, ась, мыся, самолёт керасö.

— Вон кыдз! — горöтыштiс Семён. — А не пондывны ли миянлö чудскöй карын гарйисьыштны, геройез? Чугуйкарын, шуам, нето мöдiклаын. Интереснöй сiя уджыс, кöть, может, и золотоыс абу сэтчин.

— Чугуйкарсö гарйисö ни, — казьмöтiс Прокоп.

— Ме тöда, что кошшисисö, но не сэтöн, кытöн колiс бы.

— Сэтчин золотöй джек эм, — висьталi ме. — И шодз, тожö золотöй.

— Мыйöн тэ тöдан? — юалiс Семён. — Али кыскин ни?

— Жысь Егор висьталiс.

— Жысь Егор? Ковсяс юасьны öтi-мöдi.

Прокоп пондiс панлавны сiйö, эз тшöкты вöрöтны важ местаэсö. Стариккес пö эшö баитлiсö, что карресö не гöрны, не ытшкыны оз туй. Сэтчин, важ местаэзас, сякöй шогöт да пöрöс пö дзебöм и, если вöрзьöтан нiйö, лоас кытшöм-нибудь беда.

— Локтiн шоччисьны, дак и шоччись, — медбöрын висьталiс Прокоп.

— Вот и понда Чугуйкарас шоччисьны, — отвечайтiс сылö Семён. — Шондi вылын жаритчыны, купайтчыны. Курорт эд сэтчин!

— Сельсоветас бумага эм — оз тшöктö карресö вöрöтны, — сё панласьö Прокоп. — Буди, винаöн предыс дынö ветлан. Любитö сiя юыштны, кöр нем керны.

— Ме, Прокоп, бумагаöн сы дынö муна, — висьталiс Семён. — Эм менам разрешеннё... Ме эд археолог.

— Сiдз буди дак... А то мый бы умöль эз пет.

— Быдöс бур лоас, — шуис Семён и юалiс миянлiсь: — Отсалат меным, геройез?

— Отсалам, мый сэтöн баитны, — висьталi ме.

Но Пашка эз согласитчы: ыстiсис удж вылö. Конечно, уджавны колö, только не удж кузя сiя откажитчис, а сiйöн, что повзис Прокоп басниись. Ме тай шуа: слабöй сьöлöма.

— Но ладно, мунö котрасьö öнi. Ме ашын этö царскöй деньгасö банкö сета, а рытнас Синяшорö кая...

Кузь гожся луныс — кык тöвся лун кузя. Мийö ештiмö и Арча керкуын кошшисьны, и Семён ордын дыркодь пукалiмö, и анькытшла ветлiмö, а шондiыс луншöрöдз вöлись локтiс.

Пашка кайис Шулимö — дедсö проведайтны, а меным некытчö мунны (Витяöс и Ленаöс мамö мöдiс босьтны сьöрас, и гортын, натьтö, некин абу). Кöть деревняын, а дзик Синяшорас жö — некинкöт и шыасьны.

Ветлi ме купайтчыны, уялыштi керрез вылын, да öтнамлö гажтöм и Иньва дорас, миян гöгöрись медбасöк местаас.

Öтöрас жар, но гортö мунны абу охота. Лучше туплясьны берег дорас, жаритчыны шондi увтас, нежели пукавны лажмыт да дзескыт керкуын.

Небоын öтiк кымöрок оз тыдав, бытьтö волькыт голубöй сатин öшалö юр вевдöрын. И только шондiлöн биа дзульыс писькöтöма öтiклаöт этö сатинсö, и сiя осьтаöт визыв шорöн киссьö му вылас жар да югыт.

Деревня сё эшö пустöй: разь старушка-гöстя беддясяс-мунас да котöртасö кинöнкö повзьöтöм баляэз и сайöвтчасö вуджöрö. Нельки кöзаэз, кöдна оз полö жарсис, талун оз сюйлö юррезнысö стыннэз коласö, оз пелитчö огородеччезö.

Но вот Гортлуд йöрись петiсö инькаэз. Пельпоннэз выланыс кураннэз, киэзаныс туиссэз. Корзинаэз, сумкаэз да пешоркаэз нылöн талун абу — эз босьтлö павжунсö. Нывкаэс мöдöтчöмась: базарскöй платьеэз пасьталöмась, рöма чышьяннэзöн чышьянасьöмась, виль нинкöммез кöмалöмась, а мукöдыс и ботинкаэз. Медбасöка пасьтасьöма Шурка: чочком кофтаа, сьöд юбкаа; юр вылас сылöн лöз берет, а коккезас гöрд туфлиэз. Берет увтiсь öшöтчыштöмась сьöдкодь кудриэз, пеллезас вирдалöны пелькытшшез. Бöра, натьтö, Пашкалiсь ручкасö калитiс да каттьылiс сы вылö пилиммесö. Мöйму вöлi öтiк ручка нач сотöма, и Пашка дыркодь гижис аскерöмöн.

Шурка мыйкö тараторитö-висьтасьö аслас подружкалö да китшкö-сералö. Аслас рожабан йыввес сiдз и öгралöны. Натьтö, сурсянь да брагасянь. А может, и туримольöн мавтiс.

Инькаэс мунöны жагöник, чöлöны.

Праздник талун, но курыт праздник. Курыт сысянь, что абу деревняас мужиккез. Быд хозяйкаыс, натьтö, сизимись ни талун уськöтлiс тöдвылас ассис жöниксö — и кружка брага дорын, и черинянь дорын, а коса лопатитiкö, может, уськöтiс и синва.

Мамö челядьнас петiс воротасис медбöрын. Сiя кипöлöттяс нуöтiс Витяöс, а Лена кыскис му кузяс куран. Витя сяркан моз сярзис-баитiс, а кöр казялiс менö, лэдзис мамöлiсь кисö да котöртiс меным паныт.

— Тэныт веска, вот, — радъялiс сiя. — Ашын корöны.

— Кытшöм веска?

— Мам, вай сiйö! — корис Витя.

— Ештiн ошшасьны ни? — юалiс мамö сылiсь да висьталiс меным: — Повестка почтальон сетiс. Милицияö ашын корöны.

— Менö корöны?

Тöдвылам усис Прокоплöн öнтайся висьтасьöмыс, и менö чапкис жарö.

— Бандитсö, натьтö, судитны лöсьöтчöны, — шуис мамö.

— А-а, вон мый! — гажми ме да пондi думайтны: висьтавны не висьтавны часöт Арча ордö пыралöм йылiсь? Но Витя эз сет думайтны меным.

— Петька, а менö суседко талун керкуас пыртiс.

— Кытшöм суседко?

— Сьöд и сьöд. Гöна. Тошнас тёритiс кымöсöс. И водтöтiс Ленаыс бокö.

— Ме тэнö пыртi, бöбöв. Некытшöм суседко абу.

— Эм. Ерика бабöс тöн личкылöм да гуду-гуду висьталöм. Годъян пö.

— Öк тэ, ырбылёк менам, — серöмтчыштiс мамö да малыштiс сылiсь юрсö. — Кысь мый эд и кылас!

Ештiм только пырны мийö гортö, локтiс Пашкалöн мамыс. Чужöмыс повзьöм, синнэс полькьяöсь — вот-вот брызнитас синва. Кöр шушкис сiя мамöлö пель одзас, то чуннезнас перкйис чышьян пельöссö, дзик мöдiс косявны, да эз тырмы выныс.

— Петька, эта быль? — кыз голосöн юалiс менчим мамö. Ме вежöртi, мый йылiсь нiя шушкöтчисö, и эг понды суськисьны, качыкнитi юрнам.

— И уна?

— Невночка.

— Мыйлö пыралiт?

— Тупкаöс мöдiм кутны.

— Осьта разь ыбöсыс?

— Осьта.

— Ой, беда тiянкöт, — ыш ловзисис мамö. — Ветлам, ужо, Семёныс дынö. Вот только верда ме нiйö... А тэ, Петя, мун ва кайöт.

Дата добавления: 2015-11-16