Читайте также:
|
Титовна пыртiс казармаö йöв и висьталiс: — Вот тöння шедтöмныт, сёйö на здоровье да лэдзö мöссэсö. Егор босьтiс подойницасö, кисьтiс кружкаö сэтiсь йöвсö, а кружкасис — бутылкаö.
Кисьтiс подойница весьтас, медбы ортсö öтiк воть эз усь. Бутылкасö дзебис пестерас.
— Этö сьöраным босьтам, а сiйö часöт сёям, — шуис Егор и пондiс крöшитны сёёвöй бекöрö нянь. — Уна я талун высьтiсö, Титовна?
Заведующöй дугдiс гижны, тарскöтыштiс дженытик карандашокöн пызанпöв кузяс, мур-мар горöтчыштiс:
— Тöння асыв сьöртi чинтiсö. А рытсяыс унажык вöлi.
— Одзöв тöн йöртiмö, сiйöн. Ужо, содтасö. Адззылiн эд, кытшöм туруныс — блин туйö мöссэслö.
— Давайте старайтчö, дозирайтö буржыка, — советуйтiс Титовна и петiс. Гажтöм сiя талун, етша баитö. Вайисö юöр, что порссез шогалöны, вот и недолыт сылö.
Егор кöтöтiс крошкаэсö, паньыштiс раз-мöд и пуктiс няньсö пестерас.
— Сёй да струменттö сьöрат босьт.
— Кытшöм инструмент?
— Бекöрпаньсö инö. Пукты котелокас и нöбöт палёжас.
— А тэ разь он ни сёй?
— Ме асывнас эд ог сёйлы — узьöмнас пöт. Вот юышта буди, — и ведраись кисьтiс йöлöсь кружкаас ва и пöрöтiс кытчöкö уссэс коласö. Видно, öмас жö инмис, эз тай ортсö киссьы. — Муна осьта загонсö.
Сёйыштi ме крест на крест, босьтi бекöрпаньсö да пурт и вöтчи мöссэс сьöрö. Егор мунiс медбöрын и орöттöг нюжöтiс, дзик сьылiс, öтiкö:
— Но-око тпручы, но-око тпручы-ы!
Одзаным кыза и вöснита тронгисö джынняннэз, тиньгис сильканок да кышöтiсö мöс коккез.
— Кытчö, деда, вашöтам?
— Синяшорскöй палёжас пыртам.
— А-а, тöда сiйö. Эшö ключ котöртö. Неылын эд?
— Да вон одзись мöссэс кежисö ни. Тöдöны, кытöн бур сёяныс да юаныс. Ваыс сэтöн ключас öддьöн бур, чöскыт. Вовлiс мöйму öтiк учёнöй, неделя мекöт олiс. Дак шуö: курорта пö эстöн. Каждöй турунокыс, шуö, лекарство. Быдса ноша турунсö öктiс. Чочком воронеч да камлiсь турун ме сылö сетi. Камыс настой сэтiсь керлöма. Олансö пö содтö сiя туруныс.
— Кин сiя камыс?
— Камыс? Чудскöй морт сiя, атаман да колдун... Вот и локтiмö. Пукты котелоктö Лапьяас да ва кайöт. Ведраыс кöз увтас.
Лапья — этö шалаш. Сiя сулалö неыджыт, но öддьöн лапья кöз увтын, самöй ляга йылас, кысянь ключыс петö. Егор одзжык шалашсö шувлiс куа, а менам айö — лапья. Öнi быдöнныс сiйö, да и сы гöгöрись местасö, пондiсö шуны Лапьяöн.
Егор тöн ештöма вевттьыны сiйö виль лысöн, а важсö, гöрдöтöмсö, тэчöма кöз увтас. Сiйöн пондöма вадзöтлыны костёр. Пытшкас ольсалöма лыссэз жö да чапкалöма турун. Эстöн мийö пондам сайласьны зэрсянь, жарсянь да номмезсянь.
Шалаш бокас сулалö пызан, сы дорын — лабичок. Пызанпöвсö лöсйöмась кыз керись, а коккес туйö муас вартöмась вожа майöжоккез, дзик рогатка пуэз. Лабичоксö керöмась шöри поткöтöм чуркаись, а коккес туйö кольöмась кыз уввез.
Лапья увдöрын, логас, керöмась неыджыт прудок. Сэтöн юктавлöны мöссэсö, а Егор кöтöтлö нин, морда шать да понуль вужжез, кöднаись гöрдззö корзинкаэз.
Кайöтi ме васö, пуктi Лапья одзас. Егор петкöтiс шалашсис мöдiк ведра. Сэтöн вöлi тöнсянь кöтöтöм сов-леденец, кöда ойнас ештöма ни сывны. Сорлалiс Егор росолсö мутовкаöн, гумыштiс чуманокöн сола васö да кисьтiс менам ведраö. Босьтiс сiйö ведрасö да лысовöй росок и бакöстiс-горöтiс:
Тпрукö-ö, тпрукö-ö! Локтö татчö, сераэз и сертöммез, сюраэз и сюртöммез! Локтö, матушкаэз, гöснечöн гöснечала!
Мунiс сiя мöссэслань, и сылö паныт вöрзьöтчис чуть я не быдöс табуныс. Медодз локтiс короб пасьта, джынняна, гöрд мöс — Шывка. Егор мыйкö сё баитiс и резiс васö öтмöдöрö. Шагньöвтас öтпыр — веськытланяс койыштас, мöдпыр шагньöвтас — шульгаланяс макнитас.
Куканнес эз локтö öтлаö, и Егор ачыс ветлiс ны дынö да чожа бертiс пустöй ведраöн.
— Рытъявнас эшö киськаламö, сэк нiя асьныс пондасö петны этчö. Солыс нылö конфет туйö, да вот етша сетiсö, — гусьöник, дзик секрет, висьталiс меным Егорыс. — Часöт ме муна морда шать керавны, а тэ узьышт невночка. Локта да лязгай* пуам.
Сiя чöвтiс плащсö, öшöтiс кöз увтас. Коскас сюйыштiс чер и лэдзчис ляга дорöттяс увлань.
Менам йöрнöсö да вешьянö вöлi куш нять, и ме решитi миськавны нiйö. Пöрччаси, чапки вывсим паськöмöс, пасьталi шабурöс. Но шабурнас жар. А ляч пасьтöг, кöть и вöрын, эг лысьт овны. И кери ме робинзоновскöй паськöм. Перво кульыштi нин, кыйи сэтiсь гезок. Сы бердö кышавлi ньыв лыссэз, пырей, кöчвонь. Петiс öддьöн бытшöм юбка. Эттшöмсö, натьтö, кöркö камыс новйылiс. Чапки шабурöс, кышалi вывтам юбкасö, зэлöтi гезоксö.
— Синяшорись кам пасьталiс виль костюм «рызы-бызы», — юöртi ме мöссэслö и лэдзчи прудок дорас да сюйыштi паськöмöс ваас — ась кöтасьö. Шабурö тоже нятьöсьмöма, но не öддьöн, и ме сiйö только нöитi да виззи мыр бердö — олас сiдз. Йöзыслöн буржык, да олö, кыдз баитсьö.
Нöитыштi ки коласам йöрнöсöс и вешьянöс, пидзралi бура. Эшö öтпырись тульöтi да кöсöдз пидзыртi. Öнi лэдзчис сöдз ва, сiдзкö, чочкоммис йöрнöс-вешьянö. И öшöтi нинпу вылö косьтыны.
Онö менам эз пет. Босьтi пурт да мунi кошшыны понуль, медбы керны ньöв да ньöвьёссез. Ветлöтi-кери, но матын понульыс эз быдмы. Известно, палёж. Понульыс шутём любитö. Эстöн только пипу, нинпу да поснитик льöмпуэз. И эшö сотчöм мыррез, валёжник, косьмöм пуэз — увтöмöсь, качтöмöсь — биыс быдöс вильöтöм да пеганитöм нiйö.
Бöрйи льöмпуок, пондi керавны пуртнам вуж бердöттяс. Кыла, кинкö локтö бöрам. Лэбтiси — Король сибöтчö. Менö дзик тöвчик чапкис местасим, и ог тöд, кыдз ме лои саöсь кöз вылын. Кинам и кокнам сывьялi кöзсö, видзся сэтöн. А порозыс улын сулалö да видзöтö ме вылö. Бур, что кöзыс ордчöн вöлöма, а то талис бы менö сiя.
Невна лöньси, смекайтча, кыдз бы буржыка лöсьöтчыны виль местаам. Но вот беда — öтiк ув оз тыдав. А видзсьыны этадз недыр верма. Мыдзасö киэзö, и ме нильда улö, самöй порозыс одзö. Сэтöн и овсяс меным. Мый сылö месянь колö? Абу разь мöдiккез, кинöс позис бы повзьöтлыны?
Вылiсьжык казялi дженытик ув. Четверть кузя только, но кыз. Кысси сы дынöдз, кышыштi öт лядьвейöс. Долытжык лоис. Öнi туяс öт кинам видзсьыны, а мöдöс шоччöтны.
Медбы джендöтны кадсö, кутчи стиххез сочиняйтны. Пашка не öтiкö ни гижис и менö велöтiс, кыдз колö гижны. Нельки песня сочинитiс, и сiя меным öддьöн гленитчö. Вот эта:
Öтпыр Гитлер сетöма приказ:
Жугдыны Москвасö пö рез-паз.
Но Гöрд Армия лэбтiсис,
Бöбöв фюреркöт вештiсис
― Вот пö тэныт, фюрер, вас ист дас!
Молодец Пашка!
И вот менам чужисö кык строчка:
Олас да вöлас Синяшорын кам,
Там-тара-рам, там-тара-рам...
Кöть и шуöны, что колö только пондöтчыны, а сэсся лöсялас делоыс, но менам падмис. Сiдз и этадз пондылi, а некыдз эз пет. Натьтö, сiйöн, что эта ёрдöм пу вылын пукала. Если бы пызан сайын гижны, кыдз писатель Попов, — этö мöдiк дело. Сылöн пö, Семён висьтасис, тодильнöй пызан эм, шкапокöн. И не простöй ручкаöн гижö пö, а писательскöйöн, золотöй пероöн.
Нет, оз адззисьö меным колан кыввес, абу, видно, нiя меын. А абу, дак и оз адззисьö. Кöзас то абу виыс, дак кöть мымда пичкы, сёравно оз пет.
— Бу-о-о, — казьмöтчис Король, кöда йылiсь ме вунöтчи кодь ни.
— А-а, этö тэ? Ме дынö локтiн? — пондi дозыляйтны сiйö. — Синяшорскöй камыс, ваше величество, талун оз примайт. Но если öддьöн ни колö тэныт сёрнитыштны мекöт, то кай, пожалуйста, ме дынö, эн дышöтчы. Только извинит, некытчö пуксьöтны. Может, ветлан аслат королевствоö и ваян тронтö? А ме видзчися эстöн, некытчö меным тэрмасьны.
— Мме, — бöра шыасис порозыс и лэбтыштiс юрсö менам коккез дынö. Ме ур моз чылыштi вылöжык да ответитi сылö:
— Да, да — тэ! Али тожö абу троныт? Брынгисö, тыдалö, бöж увтат мистер-твистеррет, дак öнi татчö, буржуйскöй рожа, локтiн? Не, ме талун ог примит тэнö. Мун Висьöлыс дынö, сiя, поди, примитас. И сюрресö сылiсь кор — лоас тэныт корона.
Сералi ме порозыс вылын, а аслам синваэзö чуть öшшöны.
Сэтчö кысянькö локтiс кыр, пуксис юр вевдöрам и давай пусö сизьдыны. Юр вылам киссис чаг ёг, са, и мыйкö синам пырис. И сiдз ни öдва öшши местаам, а ковсис эшö синöс ниртны. Бур, что ёгыс петiс синсим.
— Мун вакрамешö эстiсь! — горöтi ме кырыслö. — Али абу сэсся гагья пуэс?
Кыр эз повзьы менам видчöмись, сё кокис пусö да лэдзис ме вылö ёгсö. Лэдзчыштi ме улöжык, пукси ув вылас да шлёпнитi долоньнам пу кузяс. Кырыс лэбзис.
Матын пондiс сьывны кытшöмкö каёк. Гажöна-гажöна. И ме тожö пондi сьывны, кöть и сьöлöмöс дзик жельнöгöн жельнöгалiсö. Пондi сьывны, медбы не горзыны.
Ме Синяшорись кам, Ме Синяшорись кам, Тара-рам, тара-рам...
— Мый тэ, Синяшорись кам, сэтчин керан? — кылi ме улiсь вöснитик голосок и видзöтi, кин баитö,
Пу дынас сулалiс Зойка, Титовналöн нылыс. Менам киэзö чуть эз мезмö, кöр ме казялi сiйö. А Зойка лэбтöма меланьö понпутша чужöмсö, береститö киэзнас чикись конецсö и чирзö:
— Тэ мый, кывтö сьöрат эн кайöт, Синяшорись кам? Ме юала: мыйлö кайин сэтчö?
— Мыйлö? Колiс, видно, — бобга ме, да ачым думайта, кыдз кокнитжыка бергöтчыны этiя дзескыт историяын. — Кайи да и видзöтла, кытчö мöссэс мунöны. Тасянь быдöс тыдалö.
— Ноко мун, Король, мый эстöн ньывсян? — горöтыштiс Зойка и шовкнитiс порозыс голя кузя, Король бергöтчис и дюттясьöмöн мунiс мöссэслань, а ме гуж ыскöвтi улö.
— Ха-ха-ха-ха! — вакйöвтiс Зойка, дзик анькытш гиззьыштiс джоджö.
— Мый ваксян?
— Да куш са тэ, бытьтö баня горö пыралöмыт. Кин тэнö вашöтiс пу вылас? Вон сы вылö бы кайин, кöда абу палитчöм.
— А меным эта вылö колiс, — пондi бöбöтчыны ме. — Шабур судзöтi.
— Кытшöм шабур?
— Миськаси ме да косьтыны öшлi паськöмöс. А шабурöс вон сiя мыр вылö чапки. Но и пондi льöмпу вундыштны. Сэтчö — вжжу-у! — тöвчик уськöтчис и лэбтiс шабурöс вылö-ö и вылö да чапкис эта пу йылö. Вот и кайлi.
— Йылöдззас?
— Медйылас.
— О-о-о! — дивуйтчис Зойка да дыр видзöтiс пу йылас. — А кытöн нö шабурыт?
— Лапья дынас. Вылiсянь чапки, да тöлыс нуöтiс.
Зойка дугдiс серавны. Веритiс. Ме адззи пуртöс да мунi прудок дорас, медбы миссьыны.
— Мыйöн öнi сасö миссьöтан?
— Вон мый ваыс — быдса пруд.
— Оз эд мун кöдзыт ванас.
— Мымда мунас, сымда и ладно.
— Ме матега турун вая. Грань дорас быдмö сiя.
Ваыс шоналöма ни, и ме пыри медпыдын местаас да пондi миссьыны. Но кыным öддьöнжык ниртi, сыным сьöджык лоис яйö, дзик дьöгöдь коялi вылам.
Локтiс Зойка, вайис гöгрöсакодь листока турун.
— Лöсьöт спинатö, — командуйтiс сiя, — нирта сасö.
Сiя пöрччалiс нинкöммесö, пырис ваас и пондiс зыртны ме вылiсь нятьсö.
— Кытшöм тэнат сiя матег? Может, камтурун?
— А камсö мыйöн нö миссьöтöны, кыдз не камтурунöн?
— Былись, кыдз сiя шусьö?
— Парматег эта. Мамыт разь оз видз сiйö? Али эм матегныт?
— Ог тöд.
— Пондан тöдны. Вон кытшöм быгья. Öнi чапкы камовскöй юбкатö да ачыт миссьы... Мымда манитчи тэкöт.
— Тэ мый пондан керны?
— Корось чеглавны.
— Ме отсала тэныт.
— Перво миссьы, сэсся аслыт чеглав, вöлись и отсав... Адззисьлытöдз, синяшорскöй кам, трам-тара-рам! — Зойка кöмасьыштiс, котöртiс граньланьö да эшö горöтiс сэтчинсянь: — Шабуртö ылöжык пукты, а то локтас тöвчикыс и совсем нуöтас!
Чапки «рызы-бызыöс», зыртчи туруннас, кытчö киö павкис, пасьтаси, кöмаси.
Куканнес пöтöмась ни да водöмась, а мöссэс рознитчöмöн ветлöтöны. Шывкалöн джынняныс кытöнкö боткö вöр дорас ни. Панöвтны бы сiйö, да порозыс матын ветлöтö: мöдпырся кайны пу вылас абу ни охота.
Сэтчö локтiс Егор, вайис ыджыт ноша шаттез да вужжез.
― Саймин ни? ― юалiс сiя.
― Эг водлы, деда.
— Мый нö керин?
— Орсi да мый да.
― Но-но. Кытшöм эттшöм гажаас узьöм? Лок öктiсям öнi да лязгай пуам. А лун-мöд бöртi, думайта, чери пондам сёйны. Сэсся тшак-ягöд петалас, и оланыс гажажык лоас. Ог пондö зонка, тшыгйöн овны вöрас. Юррез миян эмöсь, синнэз эмöсь. И коккез не говняэз, а киэз не сырсаэз. Кöинлöн вон и киэс абу, да сё тай олö. ― Сiя нуöтiс менö ключ саяс, мыччавлiс, кытшöм туруннэз колö öктыны. ― Эта ― кайтшöтшкöр, сiйö быдсöн босьтам, ― пуктiс вершок кузя, вöснитик кока да куим листока турунок запонас. ― Гонюшлiсь орöтам только дзолисö. Вон борштурун нюжöтчöма, сылiсь пучкасö орöтам. Шыранькытш то пырей бердö кутчисьöма, сы бокöт тожö ог мунö, пуртöссэсö шырзьыштамö невна, а мукöдсö кöдзыс вылö колямö. Адззи ме öнтай мутшаккез. Нылiсь васö юамö, а асьнысö ― тожö котелокö. Эта то вирвужья, да сiйö оз сёйö, а только чайöн юöны ― сiйö талун ог босьтö. Но и тырмас кытчöдз. Мöдпырся виль туруннэз мыччала. Позис бы эшö пожум туганнэз пуктыны да чорзьöмась ни.
Лапья дын миянöс видзчисис Король.
― Тэ мыля нö, кöзяин, табунтö колин, а? ― стыдитö сiйö Егор. Да эта скöтиналöн эм разь стыдыс? Паськöтöм бугыллесö и сулалö да то öтiк кокöн, то мöдiкöн кынöмсö ассис чувйö ― мошкаэзöс вашöтлö. ― Али горшыт косьмö? Чöв, юкталас Петюыс.
― А... а оз люкав?
― Оз, öддьöн рам. Мун кайöт васö прудсис. Адззан: оз лысьт коккесö нятьöсьтны, чочком гыж.
― А мыля не ключсис, деда?
― Жар костас кöдзыт ванас оз юкталö подасö.
Кайöтi, пуктыштi сэтчö, кыдз Егор тшöктiс, сола ваок а мунны ог лысьт порозыс дынö.
— Эн пов, зонка, эн пов, — баитö Егор. — Полiсьыслö беда умöль овны. Кöч тай полö, дак лун и ой дрöжитö, а сё ни аслас смертьöн оз кув. Сiдз жö и полiсь боец... Повтöмсö и пуляыс орддьö, а полiсьыс и окопись оз мыччись, да дырсö оз сайлась.
И былись: разь ме трус? Абу.
Öтпыр шагньöвтi, мöдпыр. Король нюжöтiс голясö меланьö, но местасис эз вöрзьы. Сэк ме повтöг мунi порозыс дынö и сувтöтi ведрасö сы одзö.
— На, Король, ю да сёйны мун, — висьталi ме и эг вöрзьы местасим, кытчöдз порозыс эз сюйышт чуксö ведраас. Вöлись малыштi кымöссö чунь йыввезнам, сыбöрын шагньöвтi одзлань да пондi малавны голясö. Король сё чурскис-юис. Эшö ылöжык вешши, но ачым пöв синнам видзöта юр вылас. Павкöтчи бокас, а порозыс кыдз увйыштiс меланьö — кöч моз скокйыштi Егорыс дынöдз. Если бы адззылiс этö физрукным, сразу бы отлично пуктiс меным, а Егор только рыз-рыз серöмтчис да висьталiс:
— Сiя лöдзöс повзьöтiс, а не тэнö. Мун гыжьялышт юрпыдöссö. Стрась радейтö. Кыдз ме пым корось радейта.
— Ог ни часöт, мöдпырся...
— Öнi он, дак мöдпырся и арканöн тэнö он кыскы сы дынö. Лок ноко, эн мугсьы, — сiя дугдiс бöрйыны туруннэсö, нуöтiс менö порозыс дынö. — Вот, Король, эта тэнат виль кöзяин.
Король нюлыштiс перво Егорлiсь кисö, сыбöрын менчим. Кылыс вöлi чорыт, ровно гырись песока зуд, и кöдзыт.
Пондi ме сылiсь перкйыны буса да килля юрвомансö, и Король мышкыртiс юрсö менам коккез дынö — покоритчис.
— Лэдз öнi, ась мунö, — тшöктiс Егор. — Миссьы да пöвсав картов, а ме биок кера.
Чожа лязгайным пизис. Егор сэтчö содтiс лук, йöв да сола ва, пизьöтыштiс эшö недыр и босьтiс котелоксö би весьтсис. Ме вайи паннез, нянь да бекöр, Егор чöвтiс лязгайсö бекöрас.
Сэтшöм чöскыт вöлi эта сёяныс, что ме некöр эттшöмсö эг панявлы.
Но и Жысь Егор!
Быдöс бы, натьтö, ме сёйыштi лязгайсö, да сэтчö локтiс мужик, Егорлöн, тыдалö, приятель. Старик сетiс сылö ассис паньсö, а ме вештi сы одзö бекöрсö.
Прокоп, кыдз шуис мужиксö Егор, кыскис ремень сайсис важ оропа черок, чöвтiс пилоткасö и чапкис нiйö бан юк дынö, кöдö эшö одзжык пуктiс Лапья бокас. Сыбöрын пöрччалiс ременьсö да сэтчин жö пуктiс. Вöлись гимнастёрка подулас чышкис кузь ныра чужöмсö и пуксис пызан сайö.
Натьтö, тшыг вöлi сiя, но сёйис жагвыв, дзик пиньтöм старик, кöть и эз вöв эшö пöрись.
— Öнi курöт, Егор, — корис Прокоп, кöр бура вильöтiс паньсö да пуктiс бекöрас. — Тэнат, натьтö, важыт сё эм?
— Вильыс эз на быдмы, — висьталiс Егор. — Видз кисетсö.
— А ме вильсö ни чепляла, но турун турун и эм. — Сiя видзöтыштiс ме вылö и юалiс Егорлiсь: — Кинлöн эта зонкаыс? Не я Васькаыслöн?
— Сылöн и эм.
— Вачкисьö... Кыдз тэнö шуöны, мужик?
— Петяöн.
— Гижö айыт?
— Гижö часто. Разведчик сiя.
— Сьöкыт разведчикнас, — ыш ловзисис Прокоп. — Но Васька умнöй и смев. Некытöн оз öш сiя. Действительнöйсö öтлаын служитiм, тöда... Ме öнi тожö разведкаын вöлi, но вот нинкöммез тшöктiсö кыйны.
— Бöра кыян? — юалiс Егор.
— Сельпокöт договор кери. Тысяча гоз кöсйи. Джынсö сетi ни. Бан кошша то, нач бырсис.
— Юрыт оз ни вись?
— Кöр сiя, ранитöмыс, оз вись? Но кудобаыс дугдiс чапкавны.
— Ме тай шуи: ю настойсö — и чулалас. Прокод ю... А бансö он адззы татiсь. Гавкамысын вот кыдз-мöд эмöсь.
— Сэтчинсянь и локта. Вон тай кульыштi учöтикö... Сэтчин кöда пусö пöрöтiтö?
— Петяыс. Мöс вöлi тöн сибдöма, чуть абу джагалöма.
— Видзöтi ме. Но и лёльöм жö черокнас эта кызасö.
— Мывкыда зонкаыс, — ошкис менö Егор.
— Удав, тыдалö. И Гавкаыслiсь бедьсö шедтöма, — юöртiс Прокоп.
— Но-о? Видзöт-ко тэ! А меным эз и висьтась... Этö быль, Петю?
— Быль, — öшöтi ме юрöс, — но золотоыс абу, только простöй иззэз.
— Ноко висьтась, кыдз вöлi, — тшöктiс Егор.
Ме висьтаси быдöс, но кыдз мöсыс повзьöтiс — сы йылiсь шы эг сет.
— Висьöлыс гусялiс, — клоп вачкис пидзöс кузяс Егор.
— Некин эз гусяв, а не сэтöн бедьыс, — висьталiс Прокоп. — Кывлi стариккезсянь, Дзодзог кулигын пö бедьыс. Кöда местаын, ог тöд, но сэтчин пö.
— Сiя и эм, кöдö гарйис, — эз сетчы Егор, — но, ме тай шуа, Висьöлыс эз сет. Вот кывзы, мый öтпыр аркмис öтiк мужиккöт...
Дата добавления: 2015-11-16; просмотров: 54 | Нарушение авторских прав
| <== предыдущая страница | | | следующая страница ==> |
| Жысь Егорлöн медодзза висьт | | | Жысь Егорлöн мöдiк висьт |