Нырьясь, эн нырьясь. . .

Тöн вöлi суд, и Олявка лунйис городын да и кольччис сэтчин узьны, медбы видзöтны виль коми драма. Сы йылiсь уна баитöны — ошкöны и кулитöны — гублянскöй колхозниккез, кöднö неважын кыскылiсö театрö кыдз бур уджалiссезöс.

Спектакльыс бура гленитчис. Сiдз бура, что видзöтiкас вунöтчис, кытöн пукалö, сылö кажитчис, бытьтö адззö быльнöй деревня, быльнöй ферма и сэтiсь уджалiссесö, а не сцена да артисттэзöс, но кыдз только лоис антракт, быдöс думаэсö и настроеннёсö гудыртiс судыс, кытöн часто и не бур ладорсянь касьтывлiсö Гублянскöй сельпосö, сэтiсь уджалiссесö и, конечно, сiйö, Савыркинаöс, сельпо правленнёись юралiсьöс. Кутiс ыджыт досада, что сiйö винитöны нем понда: Чикиськин да Феня шыралöмась одзжык, кöр Олявка эз на вöв преднас, а вöлi товароведöн.

Мöд торсö видзöтiкö бöра вунöтчылiс судыс йылiсь, эз касьтыв сiйö и гортö бертiкö, Андрей Никитичкöт оча пельпон оськавтöн, и аскöттяс сё нюргис-сьылiс спектакльсис песнясö. А квартираас, кыдз пуксисö юны чай, син одзас сiдз и паськалiс суд вылiсь картинаыс, сiдз и пуктiс пеллезас приговорыс: райпотребсоюзiсь товароведлö — сизим год, Чикиськинлö — куим год, Фенялö — нёльö. Нёль год тюрьма инькалö! Кытшöм сiя инька, кытшöм мам, кытшöм морт, кöда асьсö лэдзö сэтчöдз? Некöдö сiя оз жалейт, некöдö оз дорйы, но жальöсь Фенялöн нёль челядь да жöникыс, кöда сразу, кыдз пуксьöтöмась иньсö, лэдзчисьöма юны да ветлöтны и немымда оз видзöт ныввес да зоннэс сьöрын. Ладно, что не ни учöтöсь: и гор лонтöны, и песласьöны.

Талун асывсяняс пыралiс видчыны райпотребсоюзö, но сэтчин видiсö асьсö. Председатель, кöр Савыркина пуксис сы пызан одзö, кымöра чужöмöн юалiс:

— Но кыдз мунö миян культурнöй революция? Сiя вöлi невесёв, бритчытöм, и этасянь — нёштöм рожабана, бытьтö сы вылö кышалöмась нöитчöм маска. Юалiс не тöння суд йылiсь — округ пасьта позоритчöм йылiсь, а сы йылiсь, кыдз Олявка тыртö сельполiсь медпервöй заповедьсö — уджавны культурнöя, уджавны сiдз, медбы эта уджöн вöлi довольнöй быд босьтасисьыс.

— Мунö сiдз, кыдз и колö.

— Кинлö колö?

— Отирыслö, сельпоыслö... И государствоыслö, — сiдз жö дженыта, кыдз и мöдыс, висьталiс Олявка.

— Ага, сiдзкö, — отирлö... А на-ко лыддьöт то этö. Редакцияись вайисö, — председатель сетiс неыджыт гижöт. — Сэтöн отирыс мыйкö не тэ моз баитö. И этö лыддьöт, — сетiс мöдiкö.

Кыкнан письмоас норасьöны зуйпиягса: сельпо игналiс пö магазин, и öнi отир кайлö босьтасьны Гублянö.

Лыддьöтiс Олявка, вештiс письмоэсö бокö, сьöкыта ловзисис.

— И сё жö ме ог вермы пуктыны торгуйтны, кин шедас: меным колö специалист. Ась и не специалист, но ась лоас сöстöм киа и сöстöм сьöлöма. Тэ ачыт думайт: Феня гусясис, мöдыс — пируйтны кутчис, а ежели и куимöтыс ны кодь лоас, дак мый нö вöлись йöзыс шуас миян йылiсь, потребсоюзыс удж йылiсь? Кытшöм репутация лоас, кин миянлö пондас веритны?

— А кин плансö пондас тыртны? — öдззис öддьöнжык горавны мужикыт. — Куим точка игналiн сразу, куимö! Кыдз лысьтiн? Кинлiсь юасин?

— Ежели менам киын правленнё...

— Эн лукавит, Савыркина, ог любит сэтшöммесö,— эз лэдз баитны хозяиныс. Сiя сьöкыта вöрзьöтчис места вывсис, и кыз яй увтас жек-жек керис басöк стулыс. — Он кö тырт öнi месяцся плансö — висьтала веськыта: зубыта вачкам. Да и работниккет, думайта ме, нетыртöмыт понда оз ошкö тэнö. Кысь премиятö, кöдö быдöнныс... тэсся, конечно, видзчисьöны, босьтан?

— Кöр велалам торгуйтны, сэк и босьтам. Этадз и законыс тшöктö. А тыртны план... Ме сэтiсь ог пов, что игналöм точкаэс кузя планыс оз тыр. Да и кыкыс ны коласiсь — не точкаэз, а точкаоккез: столовöйись буфет да киоск, кытöн донтöмик товарресö вузалам. Сетö колан товар, и лоас колан процент. Эта йылiсь ме пыр зiля, а мый толкыс? Кöда оз ков — сетат, кыкнан кинаныт тойыштат, асьныт ваят: «Босьт, Ванёв, кöда меным оз ков!» Пуовöй зыррез тай да гуна россэз миянö, вöрас, быдса вагон вöлi иньдöмась.

— Но и мый? Вöлi, да эз ло, — бöра эз сет досповна висьтавны хозяиныс. — Тэ висьтав, мый гижам редакцияас. И тöд: тэ вылö ыстiся. Кыдз шуан, сiдз и гижа. А оз пет сiдз — зубыта вачкам, — эшö öтпыр кöсйис сiя.

— Гиж этадз: Зуйпиягын магазиныс оссяс мöд неделя вылас, а öнi мунö учёт.

— Сiдз и гижа. И проверита сыбöрын... Эта — öткö. А мöдкö, удерлун тэ бергöтiн кык машина бочковöй вина. Мыля?

— Ме тэныт баитлi ни: сiя миянлö оз ков, и сэсся некöр, мыся, эд вайö... отраванытö. Сельскöй сходдэз сiдз тшöктiсö... Протоколыс тiянын эм.

— Мый инö мöдöны юны? Аскероксö?

— Лучше пö сiйö, шуисö мужиккес, нежели вайöм кунвасö.

— Эн нырьясь,Ольга Гавриловна.

— Нырьясь, эн нырьясь, а...

— Дугды, висьталi! — чеччис местасис хозяин. — И гиж объясненнё, мыля откажитчин. Этö — мöдкö.

— И куимöткöыс эм?

Мужикыт пиньöла синöн дзарнитiс Савыркина вылö, гöгöртiс пызансö, сувтiс öшын дорö да бытшöмика ни горöтчис:

— Менам запискаöн тэ дынö локтас мужик, тэ сылö сетан комбикорм.

— А мыйöн асьным пондам вердны? Эд миян быдса порсь ферма.

— Тырмöтчан. Нiйö столовöйыт вердас...

Öнi, кöр Олявка пукалiс автобусын да орöтчытöг видзöтiс öшынö и любуйтчис тулысöвтöм туйöн да сы нёжöт садитöм кöз лёдзöн, юрас мöдпöв пусис эта басниыс. Пусис дыр, кыдз горби одзын рисовöй каша, но эз паськав, эз небзьы, а чукöртчис чорыт комокö, кöдаын эз вöв бур лад. Сэсся уськöтiс тöдвылас быдöс бытшöмсö и умöльсö, мый пантасьлiс сiя кадсянь, кыдз пырис уджавны сельпоö, мый адззывлiс эта коста мöдiк магазиннэзын, мöдiк районнэзын, сравнивайтiс сыкöт, кыдз сiйö велöтiсö уджавны техникумын, кыдз велöтiсö лоны настоящöй товароведöн, уважайтны законнэз да пессьыны кузь киа да совестьтöм вузасиссезкöт, кöдна медбöрья годдэзö пондiсö йывны, кыдз öтпыр шуис Котöрок, дзик номыр.

«Мыля сiдз, мыйсянь? — думайтö Олявка. — Кин нiйö пöжö, кин вердö, кин туйдöтö? Оз я отсав ачыс начальствоыс? — и дзик кытöнкö бокын, а не сы юрын, чужис вывод: умöля действуйтöны контроль да милиция, дышöтчö профсоюз да комсомол, жагöна бергалö парторганизация — оз старайтчы видзöтны ылöжык, ашыння лунö, оз гуддьышт пыдiжык олансö. — Сiдзкö, мийö, шöрöт мыгöра начальствоыс, тожö виноватöсь. Эд миянлö колö лоны ёся синаöн: не только адззыны умöльсö, неладносö, но и колö адззыны сылiсь природасö — мыля, мыйсянь сiдз лоö? — да кужны умöльсö вежны бурöн...»

Этчö Олявка небытшöм кылöн касьтiс Чикиськинöс, кöда вöлi одзза парторглöн отсалiсьöн, а сiдз лякöсьтiс коммунисттэзлiсь нимсö. И не весь, натьтö, Нина, Андрей Никитичлöн сойыс, кöр сiйö воныс пондiс тшöктыны гижсьыны партияö, шуис: «Ме ог куж ылöтчыны да бöбöтчыны, и меным Чикиськиныскöт öтлаын лоны оз лöсяв...»

Тöдвылас усис, что сiйö тшöктiсö гижны объясненнё. «Но и мый? Гижа... Ме гижа, ёрт председатель, ог откажитчы. Только не сiдз, кыдз тэ коран. Мöднёж кера, то этадз: «Ме лыддя, лоис система, что райпотребсоюз юасьтöг-висьтасьтöг деревняэзö кыскö нач не сiйö, мый колö, и этöн не только мешайтö уджавны ритмичнöя сельполö, но и дзугö уджсö да олансö отирлiсь, кöда колан товарысла мунö районö да городö, öштö уна кад, чинтö ассис заработок... Райпотребсоюз бöбöтö заготовителлезöс, карч вузалiссезöс, бадь кач заптiссезöс. Сiдз, миян сельполö мöймуся закуп сьöртi колö сетны кык мотоцикл да куим «Дружба», но öнöдз абу нем... Ме лыддя, что локтiс кад жалейттöг наказывайтны быд нечестнöй мортсö и одзлань не лэдзны сэтшöммесö прилавок сайö, складö, буфетö, а эта понда колö керны сiдз, медбы чёткöя, кыдз и колö, уджалiс контроль, медбы аскадö керсисö быдкодь отчёттэз, сходдэз, семинаррез, а сiдзжö — и этö ме лыддя медглавнöйöн, — паськыт синöн видзöтны и казявны, кыдз мийö готовитам кадррез, кыдз ныкöт уджалам сыбöрын... Колö пыр видзны тöдвылын, что честьыс да славаыс — удж сьöртi лоö. А конкретнöя кö баитны, дак ме моз талун колö керны то кыдз...»

Эна думаэзöн сiя локтiс Гублянöдз, тэрмасьöмöн, медбы не вунöтны думайтöмсö и чожажык гижны сiйö, чеччöвтiс автобус поспу вылiсь, да сэтöн жö и панöвтiс сiйö Катай Катя:

— Сулышт-ко, Гавриловна, кывзышт миянлiсь няргöмсö да эргöмсö!

— Мыля эргöм? — не öддьöн рама горöтчис Олявка, сiдз кыдз думанас сё эшö ольсалiс ассис правотасö райпотребсоюзiсь начальник одзö. — Тэ разь пон увтырись?

— Мамö, чайта, инька жö вöлi, да öнi то тай миянöс оз ни пуктö мортас, может, и сельсоветскöй списоксис чиркнитiсö ни.

— Тэ висьтав, мый колö месянь.

— Джодж ковёр тай вöлöма, а мыля нö миянлö эд сетö? Думайтат, миянлö некытчö чапкыны — джоджыс не городскöй, али тальны ог кужö? Думайтат, коккезным чукыляöсь? Али деньганым назём дука?.. Мийö сы понда сельпоат быдса порсь туша сетiм, а Максимовнаыт, шоголь-моголь интеллегоыт, кöдалöн яйыс бердас токо, дак босьтöма, небось. — Миян сельмагись?

— Кысь нö ишшо? Чочком юсьыт, городскöйыт, и сетöм сылö... Ачыс ошшасис Максимовнаыс.

— Тэ давай эн видчы, а час бöртi пырав ме дынö, — корис сiйö Олявка. — Палас тэныт лоас, яйсö сетлiн дак. Спасибо, что öтi-мöдi йылiсь казьмöтiн.

Ковёрресö öнi ваялöны уна и часто, а сёравно оз тырмö: мода сайöвтны стенаэз да джодж локтiс и сьöд вöр шöрö, кöркöся ошпозъяинö, кытöн штукатурка, краска да югыт би орöтiс тараканлiсь да лудыклiсь родсö, и райпотребсоюз, медбы унажык заптыны яй, этö öддьöн колана товарсö тшöктiс вежны яй вылö.

Губляннэз ладорын пода йылö, ровно кöдзыв, и сельпо тöвбыт торгуйтiс гажöна да боёка, босьтiс джын сотня порсь туша, мыйсянь, кыдз думайтiс Савыркина, кольччис довольнöйöн и район, и деревня, а медодз — Гублян посад. А вот петöма, видзöт, не быдöс сiдз, кыдз мöдiс петкöтны правленнё. Этö Олявка сразу казялiс, кöр Шурончик, кöда ки пыр мунiс яй, вайис öткодь список, а сельмаг — мöдкодьö.

Олявка мунiс сельмагö, юалiс вузасисьлiсь:

— Мыля Катялö палас эн сет? Мöдыс сэтöн жö и чижйöвтiс:

— Но жö зараза! Морт кылöн сылö шуи: сета мöдпырся, эн каньгы!

— Приказсö вунöтiн?

— Ох! — ружтыштiс вузасись да кунис лöз синлопа синнэсö и качайтыштiс юрнас. — А кинлöн яйыс абу — век эн босьтась, да?

— Кин ноко яйтöмыс эз босьтась? Максимовнаыс, поди?

— Кöть бы и сiя...

— Как раз инмин!.. Каждöй год пö небö, — шуис Олявка.

— Да Перемö иньдалö, — отсалö Шурончик.

— Адззан, кытшöм мийö добрöйöсь! — лöг серöм пыр горöтчис Олявка. — Ежели эшö сiдз лоас, предупреждайта: вид асьтö. А Катялö, кыдз ваясö виллесö, медодз сетан...

Эта бöрсянь Савыркина баитiс Катякöт — бурмöтiс сылiсь сьöлöмсö, сэсся то öтiккöт, то мöдiккöт телефонöт, петалiс видчыны трактористкöт, кöда пöрöтöма ворота столб, и ветлiс Ванько Вань ордö. Старикытлöн оссьöма фронтовöй рана, ветлöтны оз вермы, а колiс поздравитны Советскöй Армия нимлунöн и сетны козиннэз. Эстöн сiя вит минута мöдiс олыштны, а пукалiс часся дыржык: масленица кузя Ваника керöма кулиггез, нянёвöй öреккез, кишкаэз да сур, и гöстялö, медбы не лöгöтны морт радейтiссезöс, ковсяс пыравны пызан сайöдз. А сёйöм бöрын — кыв дынö кыв — и шондiыс нёджжöвтiс рытвыв öшынас ни.

«Но и кузь лабич, — видiс асьсö Олявка, кöр петiс Ванько Ванись. — Шляпкиси-пукси да и чеччыны ог думайт. Натьтö, кошшöны ни бöра...»

И былись, только сибöтчис хозмаг дынö, сы посöдзись лэдзчис кузь портфеля зонка и кытсöвтiс сiйö:

— Ёрт Савыркина, ме комсомол райкомсянь заявкаöн.

— Кытшöмöн?

— Гражданскöй война туй кузя мунöны кык отряд. Кресенняас татöн лоасö, колö обед лöсьöтны. Нате вот, эстöн гижöма, мый колiс бы.

Савыркина лыддьöтiс, кöсйис:

— Вердам няньöн-солöн. Шыд, котлета, тупöссез. Чай, кисель лоас. Школаись столовöяс локтö. Лöсялас сiдзи?

— Лöсялö. Спасибо.

Бергöтчис зонкаыс дынiсь, а сылö паныт кыссьö Котöрок, гажтöмся-гажтöм. Сразу тöдчö: стариктö личкö кытшöмкö шог: нето висян маитö, нето сьöлöмсö лёк дума чеплялö. Нельки кöстiсьöма, бытьтö сивьяс гыр тöбалöма, и коккес чуклясьöны.

— Мыйкö неладно аркмис, Карп Иванович? Не сьöлöмыт я бöра жмитö?

— Аркмис, Гавриловна. Кык неладно налле: Мемесьö шогалö и медаллезöс öштi. Ашын школаö корисö, мöдiсö снимайтны. Нучокö стих пондас ме йылiсь висьтасьны: «Дедö фашисттэсö вурис ёна, сылö медаллез сетiс страна...» А вот öнi абу.

— Кытчö лоисö? Кошшы буржыка и адззан.

— Ог адззы: тöн Мемесьö сёйис. Кыкнансö. А талун куйлö и куйлö, оз сёй не оз ю... Примитан кöза яйсö?

— Ветеринарнöйö звонит, может, отсаласö.

— Юаси ни, оз отсалö...

— Примитам инö...

— Ачым эд травитi, мак-маковей! Кыски медаллесö, мöдi морос бердам кышавны, да тöдвылам Сталинград усис. Сулала этадз öшын дорас, ёрттэзöс касьтыла. Сэтчö пиянокыс, кыла, öмсö мöдöртiс. Дзар кери öтöрас: мак-маковей! Стын коласас сибдöма, джагалö. Ме сы дынö, пасьтöмыс, и медаллезö сьöрам шедöмась. Чапки нiйö лабичокас, мездi сапйöсь нырсö, видзöта: кöртоккеслöн токо местаыс. Кытчö лоисö? Бокас — абу, увтас — абу... Мак-маковей!.. А Мемесьыс сэтöн сулалö да нювсьö... Ашын вая, примитан дак.

— Висьтав Шураыслö, что вайны мöдан.

Час бöртi, кöр сельпо контораын некин ни эз вöв, Олявка гижыштiс объяснительнöй запискасö, пуктiс сiйö конвертö, пондiс замокавны сейф. Эта коста контора одзас жжик сувтчис машина, и сэтiсь, öт ыбöсöттяс и мöдöттяс, петiсö кык том морт — мужик да инька, пасьтасьöмась сьöд пассезö. «Не я Ферганасис бöра?»— казялiс Олявка да уськöтчис öшын дынö, но локтiссес кайисö ни посöдзас. Вот оссис ыбöс, жыр шöрас оськöвтыштiс Тонька, а сы бöрсянь важнöя, дзик богатöй корасись, пырис Витя. Сiя сувтчис ордчöн Тонькакöт, сывьялiс сiйö пельпоннэзöттяс, горöтчис:

— Эн видзчись, сойö? А мийö локтiм...

— Кысянь?

— Перемсянь. Асланым машинаöн.

Тонька гöрдöтыштiс, мышкыртiс юрсö: сiйö, тыдалö, павкöтiс «асланым» кылыс. Олявкалö сысянь тожö думно лоис, и сiя юалiс:

— Шöриöн я мый я босьтiт? Али... али... Сылö отсалiс Витя:

— Да, да, сойö: тили-тили-тесто, ай-яй-я...

— Ен тэ, батюшко! — Дзолинь бабыс моз горöтчис Олявка. — Мый тiйö керат, жöник да невеста? Думайтö жö: сват да сваття эд лоат!

— Думайтiм, сойö, — шуис Витя. — Эстöн нем умöльыс абу: не öтiк вираöсь мийö. Папö, конечно, чеччалöв-керас, а тэ эд вежöртан, что тили-тили-тесто... Вот сiдз вот.

— И кöрсянь эта «тестоныт»?

— Неважно кöрсянь... Чожа загсö мунам.

— Разь гижин ни диссертациятö?

— Эг на, мыйкö некöр вöлi.

— А кыдз инö этiя: «Кытчöдз ог гиж, инька меным оз ков?»

Витя серöмтчис:

— Он разь тöд: «Вселеннöяс быдöс кывтö, быдöс вежсьö...» Сiдз вот, сойö...

— А мамыт, невеста, тöдö ни, кин сайö мунан? — юалiс Олявка.

— Тöдö, что муна, а кин сайö — оз, — сё сiдз жö мышкыра юрöн шуис Тонька. — Ме кора тiянöс: ветлам сы дынö,

— Ох, беда тiянкöт... Ветлам инö. Эд свадьба кежö колö лöсьöтчыны.

Свадьбаэз, свадьбаэз!

Олявка оз тöд нiйö: йöзыслiсь эз видзöтлы, и ассис эз адззыв — не свадьба вöлi, а умöлик пирушка. Но ны йылiсь кывлiс берся вöвлöмсö и вöвлытöмсö, мый йылiсь тожö вермас висьтавны веж тетрадьыс...

Дата добавления: 2015-11-16