Кыдз Зуйпи разбойниккезöс вермис

Татi одзжык нюр да вöр вöвлöм. Кытчö эн видзöт — сьöд видзö. Только кык пугыр, кык парма, югытжыккес сулалöмась — Ошпияг да Зуйпияг. Сэтöн богатыррез олöмась — Ошпи да Зуйпи.

Ош увтыр пöта олöма, и Зуй увтыр абу тшыгьялöма. Öтыслöн — кар и мöдыслöн — кар. Самöй яг доррезас, крутиккезас. Сэтчö и ыджыт ва оз кай, и разбойник оз сибав, и ылö тыдалö.

Вот кывсьö: локтöны кык богатырь, кык разбойник. Нiя пö карресö розоритасö, мужиккесö виясö, инькаэсö сьöраныс босьтасö, а челяддесö крутик увтiсь ваö вöтясö.

Кылас этö Зуйпи, видзас мöд карас юöр: миян муэзö Дявпельыс, умöль еныс, вайöтö беда — гöрд Ыштайöс да сьöд Гамальöс. Ыштайлöн рыжöй вöв юэз вевдöрöт чеччалö, Гамальлöн сьöд вöв пармасянь пармаöдз лэбзьö. Давай пö карресö йöрьям эшö вылынжык йöрöн, ог сетö вийны ассиным отирсö. Ошпи шуö:

— Менам черö абу ныж, и отирö абу вынтöм, меным нем повны. Полан кö тэ, дак йöрйись.

Зуйпи аслас карын заплодсö керас кык сувдаö, вевдöрас йыла керрезiсь пряслаэз лöсьöтас, только сразу оз лэбты, дзир вылö öшöтас.

Вот локтасö разбойниккес Ошпиягö, шуöны:

— Осьт йöртö, Ошпи, лэдз миянöс карат, юктав да верд и сет золото. Он сет — жугдам картö.

Ошпи шуö нылö:

— Пондыв, вöрзьöт! — и карись дружина лэбтiсьö заплод дорö.

Разбойниккес рыз-рыз серöмтчасö и мунасö бöр. Чожа мыйись гöрöвтас вöв — говкыс гымöн-гамöн ветлö, — и тöвчикöн лэбзьö гöрд Ыштай.

Чеччöвтас вöлыс заплод вевдöрöт, одзись коккезнас Ошписö вияс, а бöриссезнас — дружинасö.

Гöрöвтас мöдiк вöв — вöрыс, дзик турун, окласьö, — и тöвнырöн лэбзьö сьöд Гамаль. Чеччöвтас вöлыс карас — быдöс керкуэсö жугдас.

И виясö разбойниккес быдöс мужиккесö, челядьсö ваö вöтясö, инькаэсö сьöраныс босьтасö. Локтасö разбойниккес Зуйпиягö, шуöны:

— Осьт йöртö, Зуйпи, лэдз миянöс карат, юктав да верд и сет золото. Он сет — жугдам картö.

Зуйпи тöдö: кöть сет, кöть эн — сёравно пондасö пырны карас, и шуö нылö:

— Öтiк кар жугдiт ни, дак мый эшö колö тiянлö? Рыз-рыз серöмтчасö разбойниккес и мунасö бöр. Гöрöвтас вöв — говкыс гымöн-гамöн ветлö, — и тöвчикöн лэбзьö гöрд Ыштай.

А Зуйпи сувтöтöма ни медвылiсь пряслаэсö, и разбойниклöн вöлыс повзяс сэтiсь да мöдас бокижык чеччöвтны, но кышасяс сермöтнас йывдöм керö и сы сорöн берездасяс яг саяс, и гöрд Ыштай вийсяс.

Гöрöвтас мöдiк вöв — вöрыс, дзик турун, окласьö,— и тöвнырöн лэбзьö сьöд Гамаль. Сылöн вöлыс оз казяв йыла керресö и самасяс ныö, кыдз вугырокö нидзывгаг, а öтлаын сыкöт вийсяс и Гамальыс.

Кöда местö усяс первöй разбойникыс, сiйö пондасö шуны Ыштай, и талун сё сiдз шуöны. А кытöн Ошпилöн карыс вöлöма, сiйö местасö пондасö шуны Ошыб.

Дата добавления: 2015-11-16