Деддэс сiдз висьтасьлiсö.
Чуд — баля кока да порсь кока сьöд тварь. Овлöма сiя пемытын, би дорö, шондi увтö повлöма петны. Сiйöн и шуöны: баня чуд, öвин чуд, вöр чуд. Бес родiсь сiя, не морт. Только и думайтö, кыдз отирлö покась керны.
Чучкöйес, чудляна — нiя йöз родiсь, миян кодьöсь. Каррез строитлöмась, гуэзын олöмась. Вöралöмась, чери кыйöмась. Вына отир нiя. Нылöн богатыррез вöлöмась. Черрезöн, пöткöтчан нöшшезöн шупкасьлöмась. Да не матына, а мыс вывсянь мыс вылöдз. Шуам, керасяс, поткöтлас керрез богатырь и юалö:
— Овö-ö! Кинлö черыс колö?! Кинлö нöшыс колö?! Сылö и шуöны:
— Овö-ö! Шупкы татчö, Бакармысас! Черныс öтiк вöлöм, вот и шупкасьöны.
Но не только черöн да нöшöн шупкасьлöмась — и кöртовöй мяччезöн. А мыйез нiя? Может, бомбаэз?
Мяччесö, видно, разбойыс вылö шупкавлiсö.
Разбойыс чудлянаыслiсь золото мырддявлöм. А золотосö кыргыз да татара ваявлöмась — ош кучик понда, лось кучик понда, ур кучик понда, низь понда.
Медбы эз мырддьö золотосö да серебросö, чучкöй отирыс нiйö муö дзебавлöма, горт гöгöраныс. Нiйö шуöны увтöрскöй кладöн, учöт кладöн.
А эмöсь — ыджытöсь. Ыджыттэс — кватя. Кватьöтсö шуöны Енгорт нето Ендор. Сэтчин Зарни-инь сайласьö.
Сiдз деддэс миянлö висьтавлiсö.
Кывзiсикö
Крещеннё рытö öтiк инька мунöма кывзiсьны. Сiя кытöнкö Иньва йыввезас, не татöн, вöлöма. Гуна долонь вылö мунас да сёрöн эд, уна рытöн, кöр чудыс чеччалö-ыждалö.
Пукси, шуö пö, баля кучик вылö, гормöччанöн круг кери ас гöгöрам и куни синнэзöс да пукала, видзчися, мый кывны пондас. Пукалi, пукалi, нем оз кыв. Но пö, мöдi тöдны, мый тавося год вылын лоас, а сiя миян кодьыслö, умöльыслö, оз и уськöтчы. Только, шуö пö, этадз ештi думайтны, кыдз кыла: гуж-важж, гуж-важж — ыб ладорсяняс да вöрланьсяняс. Этö пö вöр кыскöны да нянь — бур годлö лоны, бура овны.
Эшö кыла пö: ровно бы морттэз баитöны и не морттэз. Öтыс шуö: «Ны-ы!», а мöдыс — «Тпру-у!» Гусьöника сiдз — известно эд, кыдз кывзiсикас кылö: дзик гу пытшксянь то ли стена сайсянь. Ме тай, шуö пö, осьтыштi синнэзöс и адзза: не гуна пытшкын пукала, а вадöрын, самöй юкмöс дынас. Пернапасаси пö, гормöччаннам черта кери юкмöс дорöттяс да вöлись пö чеччи öвчина вывсис. Кöбы эг осьт пö синнэзöс — тульчиктiсö бы ваас чуддэс, вакульыслö вузалiсö.
Антуссэз*
Мортыс, кагаэз, не öтка, сы гöгöрын ёртыс и ортыс* тыр. Висьтала веськыта — ёртыс етшажык, а врагыс, лёк кульыс — о-о-о!
Вот, шуам, инька чужтö кага. Öтнас чужтö, гöгиньбаб сы дын абу. И перна голяас абу, и молитва юрас абу. Еныс иньдö сэтчин ангелöс. Ангелокыт локтас, а сэтöн важын ни кытшöм-ненабудь чуд але антус чертитчö: то мамсö вöрöтö — öм вылас пуксьö, вежöрсö гусялö, то кагасö пöдтö бы. Ежели ангелыт полiсёвöй инмас — öдöлейтас сiйö антус увтырыс и кыдз-ненабудь да декуйтчас кагаыс вылын, то синсö пиньöвтас, то коксö чукыльтас, то кывсö дзугыльтас. А ежели ачыс Дявпельыс локтас, дяввеслöн еныс, а Ойпельыс, отирыслöн еныс, оз ешты сэтчö сибавны, то враг чукöрыс и кагаыслiсь, и мамыслiсь ловсö кыскас. А кыдзи босьтас сразу кык ловсö, ыджыт праздник антуссэтлöн лоö. И не Ойпель, не Ен нiйö оз вермö öвны сэтчöдз, кытчöдз нiя, пöттöммес, тринадцать душа отирсис озö босьтö.
А ышö овлö то кыдзи. Пырттöмлö жö, натте, сiдз овлö.
Чужас пиянокыс бур да бытшöм, ангелыт радувьяс лöньсяс, кагасö бокö коляс. А чудыт сэтöн и эм: кватитас морт пияноксö да чапкас сы местö ассис. Вот вöлись и маитчöны аймамыс.
Кывсис, натте, мый Зуйпиягас вöлi? Эз? Дак висьтася инö.
Олö зонкаокыс год, кыкö, куимö, а не оз баит, не оз котрась. Двенадцать годöдз олас и сё зыбкаын дюттясяс — кинас тойыштсьö и тойыштсьö джодж бердас, потолокöдз кайлö, а чеччыны оз вермы: коккес оз видзö. Сэсся ена ваöн юкталасö, и кулас седуныс. Кулас да не морт лоас — сiсь чурка.
Вот мый керö чудкельöпыт!
Дата добавления: 2015-11-16; просмотров: 42 | Нарушение авторских прав
| <== предыдущая страница | | | следующая страница ==> |
| КИНАТ ОН ЛÖСЬÖТ | | | Вöриссез |