Сьöкыт лун

Талуння лунöдз Олявкаöс этадз некин эз лöгöтлы, нельки код жöникыс, кöдалöн вöлi стрась сьöкыт и кылыс, и характерыс, и киыс, некöр эз висьлы эта бура сьöлöмыс, эз киссьылö сымда синваэз, медбы нысянь вамис чышьянок, эз вöвлы сiдз, медбы сибдiс горзöмсянь да вежис ассис горсö том голос.

Не йöз морт, не ылöстöм хулиган, а роднöй баб уськöтiс ыджыт мортöс, здоровöй мортöс, кок йылiсь, дзугис сылiсь гажсö и уджсö, дзугис сiдз, что и нянь шöрöмыс öмас оз пыр, кöть лунтыр нем эз сёй, ежели не лыддьыны шаньгатор да чаёк.

Эшö бы эз вöв сэтшöм шог, кöбы шогмис эта не Андрей Никитич дырни. Мый сiя думайтас öнi Олявка йылiсь, кыдз сiйö шуас?

Сiя жö минутаö, кыдз локтiс гортас, Олявка кошшис бабыслiсь чышьян да плащ, петкöтiс диван вылö и чорыта висьталiс аслыс: Дзолинь баблöн эта лунсянь и следыс оз ло сы керкуын! Зубыт лоас, но зубытсö öтпыр кывны.

Куйлiс сiя вель дыр, видзчисис «важ шеглiсь» локтöмсö, а сiя сё абу и абу. Думайтiс-керис да пыртiс чапкöм паськöмсö пытшкись посöдзас: öтöрас ветлöтöны Котöроклöн козаэс, вермасö сэрпавны, а виноватыс лоас сiя. Эшö и сельсоветö мунас жалуйтчыны, быдöс район пасьта лэдзас сы йылiсь умöль слава.

Кöр петалiс ограда сайö видзöтны, локтö, оз бабыс, подворотня бердiсь казялiс кулöм шырокöс. Сiя куйлiс гатш и тушаокнас бура вачкисис учöтик-учöтик кулöм морток вылö: сiдз жö тэчöма кынöм вылас одзись коккесö, нюжöтöма бöриссесö да каттьыштöма нiйö бöжнас, кыдз нинöн нето дöра торокöн оча домалöны, медбы эз паськалö, покойниклiсь коккесö.

«То сiя, оланыс, мыйöн кончайтчö — кынöм вылын лапаэзöн. А эд неважын котрасис, может, миян моз жö видчис-кöритчис — и нюжöтчис. Пурсям-видчам, а мыйлö, ежели вот этадз?.. Да не, не мыйлö. Мукöдпыр колö и йирсьыны, ежели сысянь эм кинлöкö польза, — и решитiс сiдз: — Чижьявтöдз видчыны, конечно, ог понды, а туйсö гортас мыччала талун жö — ась сэтчин тараканнэсö агитируйтö!»

Дзолинь локтiс дыр мыйись — мыдзöм, жаралöм, ырöша-сура, — и Олявка жалейтiс пöрись мортсö, эз шупкы сылö посöдзсяняс, кыдз мöдiс, паськöмоксö, а шытöг вештiс посöдз шöрас, медбы казялiс бабыс, ачыс пырис керкуас, пуксис диван вылö, пондiс видзчисьны, пырас али оз старухаыс, вежöртас я сымдасö, что сiйö репйöны эта керкуись, эта посадiсь.

Видзчисьö Олявка и думайтö, сiдз я керö. Не öддьöнöв я кöстö бедь вугсö, оз я сiйö чегöт? Мыйкö небытшöм жö лоö этадз казнитны мортсö, кöть сiя тэныт часöт, позьö шуны, враг. Да и баитны колiс, буждöтны сьöлöм вывсис ыджыт öбидасö, и, кöр бабыс негора кокöн тальччис керкуас да веськыта мунiс горницаас, Олявка пыдына-пыдына ловзисис да няр голосöн кöритiс:

— Баб тэ баб! Но мый жö тэ керин?

— Мый инö сэтшöмсö кери? — спокойнöя, бытьтö нем эз и вöв, дженыта панöвтiс внучаткасö и сьöкыта лолавтöн пуксис лабичас, матöжык пызан дынас, тэчис киэсö паськöтöм пидзöссэс вылö, дзар керис Олявкалöн горзöмсянь пыктöм синнэзö. — Мортöс эг жö стрöйды, натте?

Внучаткаыс баитiс ассис:

— Кöбы тöдiн, кыдз менö позоритiн! Сiдз позоритiн — и син öтöрö эн мыччы!

— А бабтö? Тэ бабтö эн позорит?! Кыдз пон тай уськöтчин: «Вай! Вай!» Ульöн сёйны готов! Кык юр, дак öтыс усь!

— А тэнö мый — окавны колiс?

Кыным ылöжык, сыным пыдынжыка пондiсö гуддисьны, важсö кыскавны-бергöтлыны да быдöс öтiк кучаö тэчны — лöсялö я, оз я, а чукöрт, эн видзöт, мый сэтчö сюрö и мый сэтiсь сыбöрын аркмас.

Старуха пондiс дорйыны асьсö — некытшöм адвокат оз ков, — а Олявкасö, дзик сiя и эм эстöн виноватыс, вöтьны нятьö.

— Сiя разь стыд — отирлö бурсö керны?! — ыждалiс старуха. — Этö кöть кин, натте, вежöртö... Милицияытся да предытся. Стыдыс да позорыс не месянь, натте, а роднöй айкоытсянь, Савыркин Гаврусянь — вот кин преступникыс!

— Тэ, баб, ума али дебилка? Коммунистыс, чекистыс — преступник?

— А тэ кыдз думайтiн? — старуха малыштiс запоннас чужöмсö. — Чеки-ист, мыйнö! Тöдам, кыным семья розоритiс, кыным юр сёйис!

— Кинöс, например?

— Да монастырсиным не öтiкöс пуксьöтiс!

— Монастырсит! Адззöма кинöс дорйыны!.. Да и не сiя сiдз керис — закон тшöктiс.

— Дак не юртöм жö, натте, вöлi. Менö тай законыт тожö сякöйсö тшöктö керны, да быд осьтаö юрöс ог турнит, некинöс ог пур.

— Тэ йылiсь нем и баитны: тэ законнэсö пыр орддин. И вичкуытлiсь, и гражданскöйесö. И öнi орддян. И эн спорит, пожалуйста, менам юрö висьö.

— Отирыс понда кöть мый керны не грех. И Христос-батюшко сiдз керис, и комуниссэс сiдз керöны. Чикиськиныт тай менчим жö отсöтсö корис.

— А менö мыля он жалейт? Мыля уджöс, оланöс дзуган? Ме — не отир, да? — сэсся Олявка эз ни вермы видзсьыны да голоснас герйöвтiс. Сiя летöвтiс тув вылiсь чышьян, уськöтчис мöд жырас и сэтчинсянь ни лыйис-висьталiс: — Мун ов кытöнкö Христосыткöт, а татöн ась дукыт оз ло!

Дзолинь эшö мыйкö мöдiс висьтавны, но кылыс джöмдiс, и ачыс осьта öмöн тувдiс лабич вылас, пондiс думайтны, былись я сiйö вашöтö внучаткаыс. Оз я шогмы сiдз жö, кыдз керисö мöд внучаткаэс? Неужто сылö гид кодь керкуокас и овны кувтöдз, овны öтнаслö, дзик шутём дорись некинлö не колан увья кöзлö?

— Öвсьы жö, кага, — рамыника сибöтчис сiя. — Поди, мый и неладно горöтчи, дак ась еныс менö накажитас, а тэ простит пöрись бабтö,..

— Эн и баит эсся, ме тэнö ог кыв! И пет öнi жö!

— Ен тэкöт, Олявка, эн ышты...

— Ме мый шуи?! Пет бытшöмика...

Сэсся Дзолинь эз шыась: жагвыв мунiс порог дорö, кыша-паша пасьтасис и колис внучаткасö öтнасö.

Олявка кылiс, кыдз сьöкыта, ружтöмöн, пöднассис керку ыбöс, сыбöрын небурика вöрзисö посöдз плахаэз, дзур-вир керисö поспуэз и гыма-йирка пöднассис öтöрись вöрöта, но местасис эз чепöссьы, медбы, кыдз вöвлi одзжык, кольлавны бабсö автобус дынöдз нето посад дорöдз, а пуксис стул вылö и бöра пондiс норöн-норöн горзыны. И горзiс сэтчöдз, кытчöдз эз понды потласьны висян юрыс.

Ох и лун! Сьöкыт лун, лёк лун!

Вöвлi сякöйыс сы некузь оланын, но этшöм луныс эз на петав.

Сiдз сiя пукалiс сэтчöдз, кытчöдз эз мыдз косыс, кытчöдз эз пондö дзескöтны коккесö неважын босьтöм носкиэс. И сэк водiс узьны — и платье эз чöвт, только носкиэсö и чапкалiс. Онмöссьыны эз вермы, куйлiс да видзöтiс потолокö. Кылiс, кыдз öтöрас телегаöн мунiсö, сэсся чань гöрöвтiс — вöснитика, кузя, дзик кага бöрдчис, — и сылö спокойнöя, гажöнмоз, шыасис мамыс. Эта бöрсянь кинкö дыр заводитiс мотопила нето мотоцикл, гегзiсö дзодзоггез. Сыбöрын пондiсö кытсасьны петуххез, и Жогормыс дорын öдззис орсны-гажтöмтчыны гитара.

Шваткис-оссис ворота зашотка, кинкö сьöкыта, мужик кока, иньдöтчис посöдзö. Олявка чеччис, мало-дело волькöтыштiс диван вевтöссö, юрсö малавтöн дзарнитiс трюмоö, комод вылiсь пондiс кошшыны духи да уськöтiс коробкаок, кытчö вöлi чапкöма быдкодь посни торокыс: киззез, еммез, чунькытш, важ деньгаэз, булавкаэз — быдöс сiя, мый эз понды ковсьыны, но оз вермы чапкыны öтöрö хозяйственнöй морт, мый вермас пригодитчыны сёрöнжык. И быдöс эта гизь киссис джодж пасьтас, веськыт стена дынсянь порог дорöдз, локтiсьыс кок ныррез увтö.

А локтiс не сiя, кöдö видзчисис: пырис Шурончик, — нятьöсь халата, косясьöм чулкиа, лэдзчисьöм чышьяна, — и юасьтöг мунiс джодж шöрас.

— Мый нö кернытö, Гавриловна? — сярзьыштiс кладовщица. — Вайисö хозтовар, ректiсö ограда шöрас.

— Но и мый? — киззесö öктiкö юалiс Олявка. — Продавецыс примитiс?

— Сiя и эм, что эз — свадьба вылö нуöтiсö... Ашын кежö... Да и товарыс бы некытчö оградасис эз ло, а эд вадны вермас. Видзöт öшынат: кымöрыс, дзик сьöд зород, лэбтiсьö... Вевттьыны колö.

— Ась рабочöйес вевттясö.

— Сiя и эм, что немöн сайöвтнытö.

Олявкалöн шогыс сё эз чулав, и сiя лöга горöтiс кладовщица вылö, дразнитiс-видiс сiйö:

— «Сiя и эм, сiя и эм» Тэ баит морт моз! Ме-ту причём сэтöн? Миян тэкöт не хозтовар, а юан-сёян.

— Сiя и... — Шурончик бöра мöдiс висьтавны «сiя и эмсö», да кыдзкö ештiс ни сувтчыны. — А морт моз, дак вот мый: предсö кыскисö больницаö, и сiя ас туяс колис тэнö.

— Мый лоис?

— Сьöлöмыс. Инфаркт — мый сэсся? Куимöтпырся ни лэдзчöтiсö. А кайöтасö я? — Шурончик босьтiс джоджсис пелькытш, береститiс-керис киас да чапкис коробкаас и пуксис стул вылö. — Эн вунöт: ограда шöрас — кык тысяча руб. Ежели незьдас сiя, кинлiськö юаласö, натьтö.

Нiя, кин вöдитчöны товарöн, суммаэсö адззöны и вежöртöны пö не кыдз число, не просто цифра, а мыйкö сэтшöмö предметнöйö — баля, мöс, телевизор, керку, машина... И кыным ыджытжык сумма, сыным сiя буржыка тыдалö да вöрзьöтö сьöлöм и тшöктö буржыка уджавны юрвем...

— Мунам инö, — Олявка чапкис коробкасö комод вылас да кватитiс плащ и чышьян, кöмалiс сапоггез. — Кытчöкö, поди, тöрöтам асланым навес увтö.

— Некытчö. Быдлаын — крыша бердöдз, нырöмöн да тальöмöн тэчöм.

— А сё горзам: торгуйтны немöн!.. Эм мыйöн, да ог кужö.

— Сiя и эм, что...

Ворота саяс жö нiйö панталiс ыркыт тöлок, кöда важынкодь ни эз кежавлы таланьö. Виль Гублян сайын мур-мар шыасис гымалан кымöр, кöда ештöма ни везтыны джын небосö и унапöвса шебрасöн-вевтöсöн öшöтчöма посад весьтö.

— Оградаас эд, некö, шифер эм? — юалiс Олявка.

— Эм, — шуис Шурончик. — Навес керан?

— Мыля ме? Рабочöйес керасö.

— Угланнэс? Нiя куим лун пондасö маласьны. Венькасö кор.

— Сiя абу гортас. Ковсяс Карп Ивановичсö нуöтны. Гымыштiс öддьöнжык, мыс ладорсянь уськöтчис медодзза тöвныр, дзик мезмис йöрданiсь, и öдззисö шувгыны тополлез.

Котöрок ачыс пантасис нылö, и Олявка тэрмасьöмöн висьталiс сылö ассис могсö.

— Мак-маковей! Öтiккезлö зэрыс колö, кыдз нянь, а мöдiккез полöны сыись, кыдз биись, — шыасис Котöрок.

— Дак отсалан, Карп Иванович?

— Отсала, Гавриловна. Мыля ог отсав? — бергалiс старик кымöрсö нёджжавтöн. — Токо навессö ог ни ештö кернытö. Тэ кор работшшöй йöзтö, ме брезент сета. Ась вöв карта дынас локтасö.

Кымöр сё кайис и кайис, и быд минутаöн сылöн гымыс лоис ятнöйжык да лёкжык. Сiя öнi сайöвтiс ни пуксян шондiсö, и неболöн сöстöмнас кольччис непаськыт клин, кöда эз ни вермы бытшöмика югдöтны мусö, мыйсянь посадсис керкуэс лоисö пемытжыкöсь, гажтöмжыкöсь и дзик лажмалiсö, буражык ляпкöтчисö му бердас да матöжык локтiсö öтамöд дынö.

Вына тöв бöбись куснялö пуэзлiсь уввез да йыввесö, улица шöрись лэбтö да нöбöтö бус-ёг. Некытöн оз тыдав не отир, не пода — сьöд кымöр быдöс вашöтöма öтöрсис, быдöс йöртöма, каждöйсö пыртöма аслас позö. Нельки сьöдракаэз, вына да повтöм кайез, дзебсисьöмась пу уввез коласö, матöжык асланыс поззэз дынö, да шочыника и небурика шыасьлöны сэтчинсянь.

Лöз би югдöтiс омöн небосö и мусö, и гора да кузь гымалöм жагвыв кытшöвтiс посад гöгöрсис ыббесö и вöрресö.

Вот-вот койыштас дзугсьöм сыввесö-воттесö зэр.

Котöрок полан сьöлöмöн осьтiс кладовушка — юасьтöг сетö, а брезентыс колхознöй и виль! — висьталiс Олявкалö:

— Босьт, Гавриловна. Ашын, кыдз дугдас зэрны, этчö жö ваясö...

Только ештiсö путшöтны брезентсö, склад крыша кузя котöртыштiс чукыля да дженыт кока перевалка, кöдö костiалiс лэчыт вирдыштöм, а сыбöрсянь, гымыштöмкöт öтдруг, му вылас киссис гырись веськыт зэр.

Зонкаэс да Шурончик шытöг чапкисö брезентовöй öнсö товар чукöр вылö, паськöтiсö, кыдз колö, дорресö личкисö кирпиччезöн. Проходнöяс ни, кöр трекнитiсö вывсиныс ва воттез, Шурончик мыччис четушка, висьталiс:

— Тяпырнитö, зонкаэз. Да и мийö тiян сайсянь...

Эта эз гленитчы Олявкалö.

— Не одзöв я нылö винасö юны? — небура пондылiс падмöтны сiя, но öвсис: «Эшö шуасö, вот пö кольччис предыс туйö час кежö и сразу мораль бердö кутчö...»

— Одзöв? Да нылö арнас армияö мунны!.. Ноко юам, Гавриловна, — Шурончик сетiс Олявкалö басöк рюмкаöн вина и медодз пöрöтiс аслас дозокись да пондiс йирны одзлань лöсьöтöм сола чери. — Бöбöтам зэрсö: сiя думайтö — йöртiс миянöс, а миянлö и горе абу... Нате кисьтлö аслыныт, зонкаэз.

Зэрсö бöбöтны нiя эз вермö. И важынкодь ни зонкаэс мунiсö, и Шурончик Олявкалiсь кольччöм винасö юыштiс ни, и гымавны ни дугдiс, а негырись веськыт зэрок сё вартiс ыбöс сайись посöдзокö, дзик ошшасис аслас кужöмöн, аслас кыз мылаöн, что вот сiя, зэр, пуксьöтiс отирсö керкуэзö, дзик шыроккезöс позö, и вермас нiйö сэтчин видзны мымда колас сылö.

Шурончик гортас мунны эз тэрмась — этö Олявка казялiс эшö öнтай, кöр пырисö керкуокас, — и лöсьöтлiс басни бöрсянь виль басни, нельки ошшасис сiйöн, кыдз котрасьöны сы сьöрын бур инькаа мужиккез.

— Кирилл Потаповичсö талун адззылiн?

— Эг.

— Сiя сюра. Тöн Африкан сылö сувтöтiс.

— Тэ пондаись?

— Ну. Важын ни кошшис, учкись... Öнi эта кузя менö пурны пондас, вештiсьны кутчас. Мунны ковсяс сельпосис. Вовлiс ни öнтай, канючитiс. Бöра бутылка сетi. Трескы, мыся, калымщик, польды!

— Ой, Шура, Шура! — жалейтiс ли, кöритiс ли сiйö Олявка. — Тэ мый керан? Али карманыт — деньга мешöк?

— Мешöк не мешöк, а кытчö воштiсян? Чукляся-викляся, кыдз кужа.

— Но и Чикиськин! Велалöма овнытö!

— Шыравны велалöма, йöз киöн ассис чом тыртны... Вот адззылат, кыдз том дзелёккезнытö куштас — бакöстасö ёна, — баитiс Шурончик. — Шырас сiя нiйö... И комсомольскöй невестаыт тожö, кöдалiсь добросö дзимлялiм часöт.

— Мыля, Шура? — юалiс Олявка, но Шурончик казялiс ни, что унаöв ырбыльтö, и серöм сорöн висьталiс:

— Мыля бöрокыс быгыля. — И корис: — Мунам давай, пемдö ни...

Видзчисьны вöлi нем: зэрыс эз лöсьöтчы дугдыны, и нiя петiсö проходнöйсис. Олявка веськыта гöппезöт, кöдна вексö олöны эна местаын, вуджис мöдöрас и казялiс вöла мортöс. Сiя плаща, юрсö дзебöма капюшонö, и Олявка эз тöд мунiсьсö. Зато мöдыс тöдiс сiйö, шыасис:

— Бур рыт, Ольга Гавриловна! Но и кожгис, но и юкталiс мусö! Адззылiн бы ыббесö — сьылöны! Да, да! Кылö, кыдз сюыс кышöтö-быдмö!

— Этö тэ, Венька? Нарошно кывзiсьнытö ветлiн?

— Талун — не нарошно. Кудымкарсянь кая.

— Сёрöн тай?

— Театрö кежалi. Литературнöй праздник сэтчин. Грузияись, Сибирись да мый да гижиссес локтöмась... Аркадий Арканов смешитiс — кынöм кучик зубыт!

— Кин сiя?

— Москваись. Анекдоттэз висьтасис. Сэтшöмöсь висьтасис!..

— Адзза, адзза. Öнi быдса неделя пöт лоан нысянь.

— Пöт лоа нiйöн быдса год, — висьталiс Венька и кежöтiс вöвсö видззезлань. — Но, ашынöдз! Чöскыт он тэныт!

Кöр Олявка локтiс горт дынас, вöлi нач ни пемыт, и сiя не сразу казялiс, что ворота одзас сулалö морт.

«Кин сiя и мый сылö месянь колö?» — думыш керис Олявка и сайöвтчис моз улица шöрись паськыт, приставкаа столб сайö да пондiс видзöтны мортыс сьöрын, кöда, дзик кылiс, что сiйö казялiсö, и тэрмасьöмöн мунiс Котöрок керку ладорö да сорлассис пемытыскöт.

«Кинкö зэр шогья дзебсисьлiс... А может, сiя, — вдруг усис тöдвылас Андрей Никитичлöн кöсйисьöмыс, и Олявка чепöссис ни вöлi мортыс бöрсянь да бöр сувтчис. — Не, сiя ойнас оз лок... А вдруг жöникö? — и сэтöн жö серöмтчис гусьöн: — Жöник? Кытшöм жöник? Ме жö чапкöм, ме жöниктöм...»

Зэрыс лöньсьыштiс, дугдiс кожгыны да польöтны ва гöппезын, но Олявка эз тэрмась вöрзьыны местасис, мыйкö сё видзчисис. А кöр лöсьöтчис мунны, бöра мыччисис кузь плаща мортыс и пезьдалöмöн мунiс Олявка дынöт, эз и казяв сiйö. Öнi сылöн киас вöлi ведра, сыись петiс то ли солярка, то ли масло дук...

«Этö кинкö гусясьö, — Думайтö Олявка. — Может, висьтавны Венькаыслö, ась вöтчас? Да разь адззан сiйö часöт?»

Пырис гортас, тэрмасьöмöн чöвтчис и водiс ольпасьö — и мыдзис, и вамыштiс, да и сёр ни.

«Не, узьны оз ков, может, керкуöс мöдöны сотны... Мымдакö лыддьöтышта...»

Но босьтiс не книга, а папкасис веж тетрадьсö.

Дата добавления: 2015-11-16