Читайте также:
|
Городöдз мийö локтiмö кокнита и чожа: лöсялiс лесопунктовскöй машина. Правда, сiя вöлi газген и мунiс дзик пöрись вöв: то керöсö оз вермы кайны, то вдруг волькыт местаын сувтчас. Кыдз сувтас, шофёр сэк кайö кузовö, осьтö кабина бокись бочка-гор и пондö сорлавны сiйö кöртовöй бедьöн да чапкавны горас кыдзовöй баклушшез. Горыс тшынöтö, дзик сьöд баня, песыс чискö да тэчкасьö, а мортыс орöттöг несйö, бытьтö видзö сiйö насмока. И шофёрыс унажык вачкисис кочегар вылö — садiсьöм, тшынасьöм, сотчöм пиджака.
Кыскис миянöс сiя весь — и копейка эз босьт — да эшö висьталiс бур юöр: тöн Краснöй Армия босьтöма не öтiк город да посад и талун сё мунö одзлань.
Вот этö юöр!
Мийö нарошно кежим рынокö, медбы кывзыштны асланым пеллезöн военнöй сводка.
Ыджыт столб дын, кöда вылын öшалiс кринка ыжда динамик, чукöртчöмась уна отир да кывзöны радио. Öтiк старушка каждöйсö чувйис неволькыт бедьнас да юасис, кöр кутöмась Гитлерсö и мый сыкöт керöмась. Сiя, тыдалö, немымда эз кыв, а тöдны вöлi öддьöн охота, мый керсьö фронт вылын. Старуха вылö макайтiсö киэзнаныс, видiсö — тшöктiсö лöньсьыны, но сiя сё чувйис и чувйис отирсö сэтчöдз, кытчöдз нiя эз рознитчö. Медбöрын старуха кутiс дзор старикöс, кöда петiс киссьöм крышаа столовöйись, и нылöн пондöтчис колана басни.
— По секрету висьтала, пöрись, — ванзiс старик старуха пельö, — Библияын гижöма: гöрд вöв зуралас сьöд вöвсö — вияс. Вот и зурзис, токо не вийтöдз.
— Совсем вийöмась? Царство сылö небеснöй! — кресталiс мороссö старуха. — А миличаыс мый видзöтö?
— Кинöс вийöмась? — юалiс ны бокöт мунiсь инька.
— Некинöс эз вийö, — шавгис старик. — А Гöрд Армия вермас немецсö. Вот адззыв!
— Дзöдзыв, шуан? — юалö старуха. — Кылi, зонка, кылi. Куим юра пö, курöггесö пö ловйöн ньылалö...
— Вот и баит сыкöт! Ме шуа: öшис мöс, а сiя кылö: чегис тырлöс! — старик макнитiс кинас и мунiс сы дынiсь.
Рынокас торгуйтiсö етша: морт-мöд вузалiсö табак, кольттез да важ паськöм. Унажык отир вöлi öтöрас, кытöн сулалiсö вöввез. Сэтiсь позис небны картов и лук, нин и бан, öр и коромысла, косьтöм тшак и свежöй ягöд. Семён пантасис öтiк кока солдаткöт. Конувтас солдатлöн костыль, а киас волькыт коколюка. Пондiсö баитны нiя, а ме мунi неыджыт очередёк дынö, кöда аркмöма ён старик одзын. Сiя кыскалiс кучиковöй чемоданокись бумажнöй пакетоккез и негорöн ошкис ассис товарсö: — Препарат «Паразитин»! Вийö лудыкöс, тараканöс, тойöс! Вына яд!
Öтiк инька босьтiс пакетоксö, лыддьöтiс сы вылiсь гижöмсö, нюкайтiс, горöн несйис и сетiс куим руб вузасисьыслö. Сыбöрсянь пондiсö небны этö препаратсö и мöдiккез. Миян сымда вöлi лудыкыс, что нiя нельки луннас ветлöтiсö стенаэз кузя да кошшисö мортöс, мед пурны сылiсь яйсö. Мамö сетiс меным как раз тройка, сiдзкö, позяс небны лудык виян ядсö. Сувтi ме очередьö, босьтi öтiк пакет. Нöитi кинам — порошок кылö. Кыдз сiйöн лудыккесö выживитны — ог тöд. Юалi старикыслiсь.
— Видзчись, зонка. Кыдз вузассяс — висьтала.
Семён сё сулалö, оз тэрмась. И ме видзчиси, кöр петiс старикыслöн товарыс.
— Но, кыдз, дедко? — юала бöра.
— Мый — кыдз?
— Лудыксö выживитны.
— А-а... Кут бöжöттяс, öмсö осьт сылiсь и уд ядсö. Вежöртiн?
— Ме сiйö кута, дак и чуньнам ляпкöта.
— Позьö и сiдз. Но, адззисьлытöдз!
Етша эшö синнэзö адззисö и юрö вежöртiс, кыдз баитiс Егор, но казялi, что бöбöтiс менö эта городскöй старикыс. Да только разь менö! Может, сто пакет, а то и унажык, сылöн вöлiсö и некой пору вузалiс. Но мый ни керан. Гыжйыштi юрбöрöс да мунi Семён дынö...
Банкын Семён перво тöдiс, кытöн босьтöны золото, сыбöрын сетiс нiйö öтiк öшынокö. Чожа мыйись петiс миян дынö военнöй паськöма морт да пыртiс сiйö аслас кабинетö. Ме видзöтi картина, кöда вывсянь ыджыт сина красноармеец мыччалiс чуньнас ме вылö. А сы увдöрын гижöма: «Тэ мыйöн отсалiн фронтлö?» Ме сылö гусьöн-гусьöн ответитi:
— Вот часöт отсалам. Сетам золото.
Петiс Семён. Сiя вöлi гажтöм, чужöмыс пымалöма.
— Сорасим мийö тэкöт, Петька. Деньгаыт латунись керöм.
— Мыля?
— Жулик кытшöмкö керöма. Может, сiя купецыс и керис, кöдалiсь Кимаыс адззис. Но вермисö и купецсö вурыштны, кöть и сьöкыт сiйö бöбöтны. А öнi ковсяс милицияö мунны да докажитны, что деньгасö не мийö керим.
— Оз разь веритö?
— Не виноват, дак веритасö. И тэнчит юасьыштасö. Только эн бöбöтчы.
— Мыля ме понда бöбöтчыны!
— Он тай! Мамытлö мый висьталiн тöн? Тупкасö, шуан, куталiтö?
— Этö мамöлö сiдз... мед эз видчы.
— Вот и верит тiянлö.
Туйыс миян вöлi кузь ― öт дорсяняс мöд дорöдззас мунны, но Семён сэсся шы эз сет. Ме мунi бöрсяняс, тожö чöлi да видi Арча Кимаöс, кöда сомуститiс менö аслас доброöн. Висьталiс эд Прокоп ― чапкыны, да эг кывзö сiйö. И весись эг кывзö. Но эд эг тöдö, что этадз лоас! А мый лоис, кыдз лоис? Разь мийö мыйкö умöльö керим? Эгö. А мыйись нö сэк тöждiсьны?
— Но, тэ мый сiдз кымöртчин? — висьталiс Семён, кöр мийö локтiм куимсувда чочком керку дынö. — Вот-вот зэрны пондас. А зэрыс öнi оз ков — сенокос. Вежöртiн?
— Вежöртi! — висьталi ме да шынньöвтi.
— Вот сiдз! Öнi мун кошшы кабинетсö, кöда повесткаат гижöм. Одзжык петан — видзчись менö.
Адззи ме кабинет, пыри, здоровайтчи.
― А-а, здравствуй, Петя, здравствуй! ― пызан сайись чеччис Василь Сидорыч да локтiс меным паныт. Сiя вöлi не милицейскöй паськöма, но тöдчис, что не учöт начальник. ― Тöдан, мыйлö кори? Подарок тэныт сетамö. Сы понда сетам, что тэ отсалiн кутны миянлö сiйö кöинсö. Вот тэныт костюм понда сукно.
Кинкö тарснитiс ыбöснас. Василь Сидорыч висьталiс: «Да». Ыбöс оссис, и кабинетö пырис Семён. Сiя здоровайтчис да сувтчис ыбöс дорас.
— Меным подарок сетöны, Семён, — эг вермы видзсьыны ме ыджыт радсянь да ошшаси.
― Но, спасибо висьтав, ― мур-мар горöтчис Семён. Сiя мыйкö вöлi гажтöм. Сэтшöм гажтöм, кытшöмöн ме эг на адззывлы сiйö. Неужто аркмис сiя, мый йылiсь уна баитiс Прокоп? И мыйлö сiя пырис татчö, эта кабинетö?
— Сiя кин тэнат? ― юалiс менчим Василь Сидорыч. — Вон я мый я?
― Очавон, ― шуи ме, ― командир.
— Тожö Алимов?
― Тожö, ― висьталiс Семён. ― Тiйö менö корит?
― Да. Банксянь звонитiсö. Но, висьтасьö нö, ― тшöктiс Василь Сидорыч да пуксис аслас местаö...
Рытъявнас мийö Семёнкöт жагöника шагнялiмö Синяшорö, мед юасьны Жысь Егорлiсь чуддэз йылiсь быль.
Егор висьтасис. Висьтасис уна, но мийö медбура кывзiмö вот этö.
Дата добавления: 2015-11-16; просмотров: 55 | Нарушение авторских прав
| <== предыдущая страница | | | следующая страница ==> |
| Кыкпöвса праздник. Семён локтiс. Операция «Гöрд югöр». Сюримö налькö. Меднöй руббес разь добро? | | | Жысь Егорлöн öкмысöт висьт |