|
Читайте также: |
Одз асывнас ме котраси асланым дöмöт дын и нем эг вай. Чери дугдiс шедны.
— Шабаш, — висьталiс Егор. — Сэсся ог пондö видзны мордаэсö. А часöт пуам анькытш, — и сiя кыскис пестерсис учöтик мешöчок, кисьтiс сэтiсь джынсö котелокö.
— Ась кöтасьыштас невна. Анькытшыс мöймуся.
Асылыс вöлi мича, лысватöм. Абу не лöдз, не ном, не мошка. Одзöв эшö нылö дзингыны, вот и абу кытчöдз. Самöй раз ягöдавны.
Босьтi ме корзинкаöс да мунi грань саяс, кытöн эг на видзö мöссэсö. Инми кушинокö, и синнэз бöбмисö: сымда вöлi сэтöн ягöдыс, что некытчö и кок сувтöтны. Гöрдвевья да зелёнöй сора пестрядь да и только! Быд долонь пасьта муок вылын быдмисö кык да куим за, а быд за вылын öшалiсö куим-нёль тусь, гырисьöсь да небытöсь, лöзöвкодь рöмаöсь вуджöрас и югытгöрдöсь шондiа местаас.
Полöм петiс тальччыны эта видзок вылö, медбы не дзугны, не жугдыны эттшöм гажсö, эттшöм басöксö, а только видзöтны сы вылö да любуйтчыны адззывлытöм картинанас.
И ме пöттöдз любуйтчи. Любуйтчи сэтчöдз, кытчöдз эг кольмы чöскыт дукнас. И эг лысьт дзугны этö басöк ковёрсö, кöдö кыйисö му, шондi да вöрлöн чöскыт руыс. Öктi озъягöдсö мöдiклаись, сэтшöм жö воöмö, только невна поснитжыкö.
Горошница вöлi чöскыт, но анькытшыс досповна абу пусьöма. А сiдз кыдз мийö вöлiмö тшыгöсь, да и мöссэсö колiс петкöтны ни, то эг пондö видзчисьны, кöр сiя небзяс досповна.
Пымыс, шуöны, ульнас оз овлы.
Егор чöвтiс бекöрö да крöшитiс сэтчö нянь. Сёйис сiя жагöника, бытьтö керис важнöй удж, кöр оз туй тэрмасьны. Да и шоча сiя тэрмасьлiс, но пыр и быдöс, мый бы эз кер, сылöн петлiс бура-бытшöма.
Менам öмö абу учöт, пиннезö лэчытöсь, и сёйи перыта — кыт курччалi, а кыт и курччавтöг ньылалi. И вот, кöр медбöрьяись ни паньыштi, тшöк мунi. Öтiк тусь инмис не горшам, а кавтыкам, пондiс мешайтны лолавны. И юи, и горшöс нöитi, и керксi купчитiсь курöг моз — нем эз отсав.
Что ме кашляйта, Егор казялiс Синяшорас ни. — Кынмалiн эд, зонка, — пондiс тöчитны сiя менö. — Кынымись баитi: эн узьлы куш му вылас, а тэ некыдз он вежöрт. Вот и вöтiс... Давай больницаö ветлы.
Ме висьталi, мыйсянь кашляйта, но Егор мылякö эз верит. Сэтчö Титовна вайис миянлö йöв, пешлiс менчим кымöсöс и адззис жар. А Титовналö нем и баитны, что ме эг кынмав. Да и ачым кылi ни, что юрö висьö. Сiдз и эм, видно, — кынмалi. Былись эд узьлi уль му вылын. И кöдзыт ва ювлi.
Титовна пуксьöтiс менö телегаö, йöв флягаэз одзö, закажитiс йöв кыскалiсьыслö кыскыны менö больницаö.
Больницаын фельдшерыс эз вöв. Менö примитiс Максимовна, больничнöй сторожиха и техничка. Гожумнас лечитiс унажыксö сiя. Фельдшер-старик то ытшкисис аслыс, то заптiс лекарственнöй быдмассэз, то отсалiс сельсоветлö öктыны кольтаэз, йöв, вурун да налоггез. Часто и шогавлiс. Сэк сiйö лечитiс тожö Максимовна.
Старушка, векнитик да моршитчöм чужöма, пуксьöтiс менö лабичокö, кышалiс кузь ныр вылас важ очкиэз, сюйыштiс конувтам градусник. Тшöктiс бура видзны, не уськöтны — сэсся мöдiк абу пö. Ачыс пондiс юасьны, кинлöн ме, кыдз шуöны и кытшöм висян менö вайöтiс сы дынö.
Ме кашляйтi да висьтаси, мый мекöт лоис Синяшорын и кин менö татчö иньдöтiс.
Максимовна кывзiс, гогинялiс юрнас да волькöтiс киэзнас пидзöс вывсис запон дорсö. Сыбöрын босьтiс градусниксö, дыр видзöтiс öшын одзын очкиэс пырйöт, сэсся лэбтыштiс очкиэсö кымöс вылас да эшö видзöтöв-керис.
То ли нем сылö эз висьтав градусникыс, то ли эз казяв, кытчöдз кайис лöз сунисокыс, но старуха пуктiс кöдзыт кисö менам кымöс вылö. Видзис дыркодь, натьтö, шонтiс. Ме видзчиси, что и мöд кисö эшö шонтас, но этö эз кер, а шуис:
— Жарок эм. Кöдзыт ва юин, вот и сайкалiсö лёгкоэт. А горшыт оз вись?
— Оз, некö, — ответитi ме. — Абу тай зубыт. Максимовна пуктiс градусниксö банкаö, стаканiсь кыскис сартасок, нуöтiс менö öшын одзас да тшöктiс осьтны öмöс. Ме осьтi. Максимовна нырыштiс кылöс сартасокнас.
— Висьтав: а-а-а.
Висьталi. И сэк жö öдззи кашляйтны. Öтпырись сiдз кашельтi, что öмсим мыйкö чеччöвтiс да сярк вачкис стеклоас и чеччöвтiс джоджас. Сразу кашельö чулалiс, и кавтыкöс дугдiс бытшкыны.
Кошши джоджсис, мый усис, и адззи анькытш тусь. Учöтикö, дзик дробь. Сетi сiйö Максимовналö. Сiя бöра видзöтiс очкиэс пырйöт и очкиэстöг, рып-рып серöмтчис да висьталiс:
— Былись тай анькытш шогöт вöлöма. А ме мöдi банкаэз тэчны.
— Оз ков, баба. Некыт менам оз вись, — висьталi ме.
— Вот и бур. Оз ков томмеслö шогавны. Мун гортат, — лэдзис менö Максимовна. — Малинаыс оз на во?
— Дзор туссес уна ни, — шуи ме. — Чожа гöрдöтны пондас.
— Кöть öтпыр бы кайлыны. Кык ранитöм солдатöс ме ордö сувтöтiсö. Томыникöсь, топ зоночкаэз. Нiйö бы вердыштны.
— Асьнысö иньдöт, ме мыччала ягöдсö.
— И-и, кытчö ни! Öтыс чотö, мöдыс пакля.
— А мыля нiя не госпитальын?
— Местаыс оз тырмы. А тiянын абу?
— Абу тай эшö.
— Но мун шоччись. Менам нiйö вердны колö... Недырик кежö пыралi гортö, вежи Витя тележкаись потöм круг, киськалi огуреццез и кайи палёжö. Может, и дыржык бы олi, орсыштi бы Ленакöт да Витякöт, но некыдз эг вермы кывзыны Ерика баблiсь горзöмсö, видзöтны сылiсь бусас туплясьöмсö. А горзö сiя, натьтö, куимöт лун ни. Горзö аслас ныв понда, кöда мöйму ачыс корсис фронт вылö. И вот öнi сiя абу: удерлун локтöма похоронка.
Öтiк ныв и вöлi Ерикалöн — öтiк гаж, öтiк надежда — и эз ло: старухалö öнi мича луныс не лун, гажа гожумыс не гожум, оланыс не олан.
Дыр я эшö кыссяс войнаыс, кöр дугдас киссьыны отирлöн вирыс?
Адззыны бы сьöктантурунлiсь цветсö, сэк бы ме вештiси фашисттэскöт и Ерика Анюта понда, и Зойка ай понда, и Егор зон понда. Вештiси бы и мамö синваэз понда, и челядьыс тшыгьялöм понда.
Но сёдаки абу, тыдалö, волшебнöй цветокыс. Вöлi бы, дак важын ни кинкö пöртчис невидимкаö, и öнi эз ни бы вувт бöбсялöм Гитлерыс.
Думаэз да быдкодь планнэз пырисö юрам, дзик мордаö кульман чери. Ме готов вöлi пöртчыны, ежели бы туйис, меднёштöм гадö, медбы только вештiсьны Гитлеркöт.
Вöлi нельки сэтшöм дума: мунны гортiсь гусьöн фашисттэзкöт воюйтны. Но жаль вöлi кольны мамöс, Ленаöс да Витяöс, кöднö тшöктiс берегитны тятюö. И быдöс нiя думаэс, ыджыттэс и учöттэс, кыдз чожа пырисö юрам, сiдз и бöр мунiсö. Петö öтiк: не Ерикалö, не айöлö, не фронтлö ме немöн ог вермы отсавны. Нельки ог вермы адззыны кладдэсö, кöдна куйлöны кытöнкö ордчöн.
Эна думаэзöн ме локтi Шонытмысöдз, кытöн быдмис шочыник вöр да поздiсисö понуллез.
Нем эта мысын эз вöв бурыс да басöкыс, разь только ыджыт кöдзыв кучаэз, кöдна тыдалiсö и кöз бабушник увтын, и важ мыррез бокын и просто волькыт местаын. Ыджытöсь и учöтöсь, ёся йылаöсь и тупикаöсь, нiя вöлiсö не сымда басöкöсь, мымда интереснöйöсь асланыс оланöн, асланыс уджöн да порядокöн. Кынымись бы эн лок сэтчö, кучаэз гöгöрын сё шуксьö кöдзыв, сё кылö уна тысяча поснит коккезлöн кышöтöм. Нiя и чеччöны шондiкöт, и водöны шондiкöт, и уджалöны выходнöйезтöг, абу кö зэр.
А шонытöн мыссö шуöмась не весь: гожся ойö эстöн тöдчöмöн шонытжык, нежели ордчöн.
Пондi чулавны ни мыссö да казялi мортöс. Сiя вöлi ляч пасьтöм, бытьтö пывсьöма баняын да петöм ыркöтчыны, только киас видзис чышьян. Может, разбойниккез чöвтiсö, и сiя оз лысьт пасьтöг мунны гортас? Может, ачыс разбойник? Буржык лоас, если не шедöтчыны сы син одзö.
Бöрйи ме увьяжык кöз, пасьталi шабурöс — огжык понды тыдавны — и кайи пу вылас. Пасьтöмыс бергöтчис меланьö, и ме сiйö тöдi — Арча Кима, миян деревняись старик. Сiя, кыдз баитсьö, деревняаным меднадз и меджаднöй морт.
Но мый сiя керö эстöн, мыля пасьтöм?
Кима нёджжасис öтмöдöрö да баитiс гусьöника. Умöля сiя адззö и дырöн öтiклаас видзöтö. Но вот мыйкö казялiс да мунiс мыр дынö, кытöн вöлi ыджыт кöдзывкар. Малалiс кучасö и чышьянасис. Неужто мöдö пуксьыны? Быль! То паськöтiс кучасö, пырис шöрас и пуксис. Да эшö чукöртiс ёгсö ас гöгöрас, моросви лэбтiс.
Менö дрöж кутiс этасянь, а сылö, тыдалö, бур: пукалö, оз и вöрзьöтчы, топ кын мыр.
Коккес пö висьöны сылöн, вот и лечитчö. А больницаö сiя оз мун. Подöн ― сьöкыт, вöв босьтан ― вештыны колö. А сетасö ли эшö вöвсö, кöр и гöрны оз тырмö. Эта мымда босьтiсö армияö, томмесö вöв-мöд колисö.
Кима олiс зонкöт да монькöт. Зоныс армияö мунiс да öшис ― то пленö сюрис, то ловья абу. Старик эз понды лöсявны моньнас. Янсöтчисö. Сэк и кывсис, что Арча Кималöн эм амбартыр нянь да уна золото. А золотоыс дöнзьöма сылö весь. Посадiсь, важ керку разьтöн, адззöма.
Эттшöм деньга дырни, эта мымда нянь дырни старик праздниккес коста ветлöтö кортöн да норасьö тшыг олан вылö, бедуйтö шудтöм судьба вылö. Быдыс эд тöдö, кытшöм надз мортыс.
Кыдзкö Ерикалöн горас öгырыс кусöма. Петалас öтiклаö, мöдiклаö, а нылöн тожö абу öгырыс. И спичаэс абу. Если кинлöн и эмöсь невна, дак одзлань берегитö. Мунас старуха мöдöрас, Кима ордö пырас. И как раз инмас, старик чукöртö шоммесö гор пельöсö, медбы вевттьыны нiйö кыз пöимöн,
Сетас Кима кык шомок, старуха спасибо висьталас да мунас. Неделя бöртi Кима локтас Ерика ордö и юалö:
— Долгтö кöр нö мöдан бергöтны?
— Кытшöм долг?
— Бисö тай кыдзкö нöбöтiн.
— Да кöть часöт босьт.
― Часöт эд только бичиррез ни, а тэ кык говня босьтлiн. Вот сымда жö и бöр вай...
Петiс Кима кучасис, треситчис, чышкис вывтсис быдöс кöдзыввесö да ёгсö, мунiс понуллез сайö. Чожа петiс сэтчинiсь понитока, пимиа, шапкаа. Киас бедь, кыз да увья, кöда отсöтöн сiя и ветлöтiс, и кошшис туйсö. Этöн бедьнас старикыс кынымиськö вöлi öбыртöма Пашкалö, кöр сiя шедöма Арчаэс льöмпу вылын.
Меным охота лоис дозыляйтыштны этö лёк стариксö. Горöтны, шуам, вöрись моз, а сыбöрын вак-вак серöмтчыны — ась повзяс.
Старик локтiс ме весьтö да пондiс кежны бокö, ме вунöтчи, кыдз вöрисьыс ыксö, и мылякö горöтi ку-ку. Кима сувтiс, недырик видзöтiс долонь увтсяняс меланьö и öдззис бобошитны:
— Но-о, кöк сьылö. Мый одзын нö сiя? Рудзöгыс тай нö шепья ни а... Видно, ог ни эд лэбтiсь, овсис, видно. Ноко мымда эшö пуктан меным?
Перво эг вежöрт, мый сiя тшöктö пуктыны, и дыркодь чöлi. Старик сё сулалiс да видзöтiс кöз вылас. Тöдчис, что сiя оз мун эстiсь сэтчöдз, кытчöдз оз кыв кöклiсь ответсö.
— Али немымда ни он пукты, таво тшöктан кувны?
— Кук-куу, — сьылыштi ме öтпырись.
— И сы понда спасибо... Да и ачым тöда: не олiсь ме сэсся. Девяносто эд тырта ни. Поди, таво ни пышша отирыс коласiсь. — Старик лэдзис кисö, сьöкыта ловзисис. ― Он я, кича, висьтав, кытчö доброöс воштыны? Али тöв йылöт лэдзны? А поди, селикö нуöтны?
Эг видзчись ме сылiсь энö вопроссэсö и эг тöд, мый керны. Кытшöм добро йылiсь сiя баитö, кытшöм селик йылiсь?
— Чöлан, кича? — дöвгис меным Кима. — Но, но. Кысь тэныт тöдны сiйö. Некин оз тöд, кытчö вошта. Ась муын сiсьмас. Некинлö ог сет. Матушка му сетiс, сiя и босьтас. Сiдз кöркö Чугуйкарас керлöмась важ отирыс... Вот сiдз, кича.
Бергöтчис ме дынiсь старик да мунiс юланяс. А ме дыр эшö пукалi кöз ув вылын, гыжьялi юрбöрöс да думайтi мудрёнöй селик кыв йылiсь. Мый сiя сэтшöмыс? Может, ним? Конечно, ним! Эм жö разбойник Селим, а мыля не лоны Селиклö? Натьтö, тожö эм. Старик, может, шуис не селикö нуöтны, а Селиклö?
Öнi меным охота лоис тöдны, кин сiя Селикыс и кытöн олö. Кималöн приятель, натьтö, сы кодь жö надз да жаднöй. И золотоыс сылöн, конечно, быдса мешöк. Не весь эд баитсьö: золотоыс золото дынö кывтö. Вот и мунас Арча Кималöн золотоыс сэтчин, кытöн унажык сiя. Но мый керны, медбы эз мун Кималöн золотоыс сэтчин?
Быдкодь плансö пондылi панны, но некытшöм эз лöсяв. Сыбöрын усисö тöдвылам Кималöн кыввез: «Ась муын сiсьмас. Некинлö ог сет». Петö, что старик мöдö дзебны золотосö муö, но кытшöм местаö, кытчö? Может, тожö джоджулö сюйыштас, кыдз купецыс?..
Синяшорын ме юалi Егорлiсь, кин сэтшöм Селик.
— Эг кывлы сэтшöмыс йылiсь, — висьталiс старик, — миян ладорын абу. Эм селик, дак сiя не морт.
— Разбойник сiя, деда, ну?
— А разбойникыс разь не морт?
— Морт жö, но сёдаки...
— Сiя селикыс, кöдö ме тöда, öнi шусьö сельсовет. А мийö, пöриссес, сiйö важмоз шуам — селик. Вежöртiн?
— Вежöртi, деда...
Эта рытö мийö нуöтiм мöссэсö Гыркалог дорö, травиттöм местаэзö. Сэтчин вöлiсö волькыт видззез — не пу, не кöчка, не колода абу. Только шочыника тыдалiсö лöзöтöм мыррез, дзик ведраэз кыминялöмöсь. Тöдчö, что эстi одзжык гöрлöмась, но сыбöрын мылякö дугдöмась. Эз понды, натьтö, няньыс быдмыны, а назьмитны немöн — деревняись он эд эта ылынаас назёмсö ваяв.
Егор мунiс лог саяс кошшыны телега вöр — оглобляэз, дорогаэз, чукыля тассэз — мый пантасяс. Ме тöдсаси виль поскотинаыскöт, любуйтчи логнас да сы дорись уна рöма гажа видззезнас.
Кушинас логыс вöлi веськыт и паськыт: öт покатыс джын километр пасьта и мöдыс сэтшöм жö. Кыкнанныс пологöйöсь, вевттисьöмась ситурунöн, горадзульöн, чочком цвета катшасинöн. Ны коласын быдмö дженытик турун — дзульган, или денежник. Дзульган чорзьöма ни, и, кöр мунан эта турунöт, сiя кышöтö да муркöтö дзик виль бумажнöй руббез. Этö сiдз сяркöтöны сылöн ляпкöса, топ йöрнöс кизь, руд кöдзысоккез.
Горадзуль да катшасин коласын шочыника тыдалiсö лöз колокольчиккез, пытштурунлöн коричневöй юроккез, татарниклöн алöй зуоккез. Быдöс этö кытшöвтö вöр: лог саяс — югыт-зелёнöй кыдзза рас, а ме ладорын — пемыт-зелёнöй кöзъяин. И кыным унажык тэ видзöтан эттшöм картинасö, сыным öддьöнжык кутö тэнö диво: кытшöм мастер керис этö, кысь сiя босьтiс энö син бурмöтан краскаэсö, кыдз кужис серöтны басöкся-басöк узöрресö?
Менчим думаэзöс дзугис Король. Видз шöрас, ыджыт мыр дын, сiя баксiс-буалiс да куртiс-картiс одзись коккезнас. Турун да му резсис бöрас, вартсис кынöм увтас. Порозлöн голосыс горалiс то кыза, то вöснитика-вöснитика; сiя и кижгис, и сыркьялiс, и гымалiс. Эта баксöмын кылiс и пургалöн бöрдöм, и ранитöм зверьлöн эрзöм.
Неылын Король дынсянь пондiс кыскавны голоссö Мыйко, пороз-годовик. Сiя эшö эз куж буавны Корольыс моз, а может, и эз вöв охота, и чожа дугдiс баксыны, но кутчис вермасьны мыркöт. Неужто мöдöны люкасьны?
Не, сэтöн вöлöма мöдiк причина, мый кузя пондöтчис эта шумыс.
Вöр дорас, меным паныт, сулалiс вöрмöс. Сулалiс и нюжöтöм чукнас нюкайтiс русö. Эта вöлi волькыт, чалöйкодь гöна пороз, чатыра юра да уна вожа сюрреза.
Ме адззывлi нiйö нюрись, кöр мамöкöт ветлiм туримолявны, но нiя вöлiсö сюртöмöсь — мампöввез — да ыджыт нёштöм юраöсь. Эта сулалiс дзик картинка.
Сулалыштiс сiя, смекайтчис моз, сэсся трекнитчис и кокнит шагöн иньдöтчис мöссэз дынö.
Король гымалiс и чарлалiс, резiс коккезнас мусö, мöдiс, тыдалö, повзьöтны кортöм гöсьсö, но вöрпорозыс эз и видзöт сыланьö. Ме тöждi, что повзясö мöссэс да пышшасö гортö, а нiя сё одззамоз вöрöтiсö мышкыртöм юррезнаныс — бöрйисö чöскытжык турунсö. А Шывка нельки ачыс повзьöтiс вöрмöссö: кыдз пышнитас, увйыштас да тронгас джынняннас, порозыс скок только бокö чеччöвтiс!
Не чожа бы, поди, мунiс миян дынiсь вöрпорозыс, но Егор мыйлöкö гымгис-вачкис чер обухнас кöс пу кузя, и басöк сюра гöсь жагöника котöртiс вöрас.
Локтiс Егор, пельпон вылас петкöтiс кыдзовöй потш да чукыля потшок. Чапкис нiйö турунас, юалiс менчим:
— Адззылiн сiйö?
— Адззылi.
— Эн повзьы?
— А мый повны? Только недыр олiс вот.
— Ме вашöтi. Кылiн, натьтö?
— Нарошно вачкин?
— Нарошно.
— Весь этö. Сiя нем оз кер мортсö.
— Сяко овлö.
— Кöть и он вöрöт сiйö, вермас уськöтчыны?
— Вермас.
— Мый понда?
— Эмöсь сэтшöмöсь, кöдна оз вермö терпитны морт дуксö. Асьныс нiя морт родiсь жö.
— Кыдз этö морт родiсь?
— Да вот сiдз кöркö петöма... Давай-ко биок керам, ась номмес пышшасö, и ме тэныт висьтася эта йылiсь.
Дата добавления: 2015-11-16; просмотров: 53 | Нарушение авторских прав
| <== предыдущая страница | | | следующая страница ==> |
| Жысь Егорлöн сизимöт висьт | | | Жысь Егорлöн кыкьямысöт висьт |