|
Читайте также: |
Эттшöмыс петiс важынкодь ни. Уна мöс сэк миян вöлi ― кыкись унажык тавося. И прокод ветлöтiм ны сьöрын, но сё жö öштавлiм. Только кошшисикас нинкöммез эг бырöтлö — седлоын пукавлiм, дзик казаккез. А кианым кузь плеть — гöснеч не кывзiсь мöслö.
Кыдзкö öшис мöс. Öшис и öшис. Видзлiм сэк мöссэсö пыд вöрас, Гыркалог сайын сё.
Пажнайтiмö, айыт пуксис вöв вылö — Бурчикнас сiя ветлiс — и мунiс Гыркалогас. Местаэс сэтчин — ой-ой-ой! — чудскöйöсь, клад вылын клад куйлö. И заговорённöй чисто — вöрисьыс дöзöритö нiйö.
Баитi сылö: гиж кабала — лэдзас мöссö. А сiя сералö: вöрисьыс, шуö, тэ кодь жö, Егор, грамотейыс, дак мыйлö пö весь симöтсö изводавны?
Но, петас лог дорас, вуджö бы мöдöрас, а Бурчикыс чушьялö, бöрöн-бöрöн мунö и дрöжитö, дзик лёк тресся кутöм. Но, шуас айыт, вöрисьыс я мый я панлалö тэнö, Бурчик? Горöтчас этадз, адззö: лог саяс ош. Вöвлi сэтчин, лог саяс, вожа кöз — ог тöд, эм я öнi. Эта кöз йыввез коласö вöлi пöрöма пу, и йылыс сажень кык кузя саяс петöма.
Вот сэтöн и пукалö пö ошыс да дюттясьö, ровно зыбкаын кага. Да эшö одзись лапаэзнас пö шовкöтö. Чöв ужо, шуас айыт, велöта ме тэнö. Чеччас да босьтас кляч — повзьöтны ошсö мöдас — некин пу йылас абу.
Конечно, сiя не ош вöлi, а Висьöлыс ош обличчоын.
Пуксяс вöв вылас, мöдö вуджны, а бöрас — джыннян шы. Кывзiсяс-керас — öшöм мöсыслöн джынняныс бунчитö. Мунас эта шы вылö, топ ни локтас мöсыс дынö. Но джынняныс мöдiклаын, бокас ни тронъялö. Бергöтас вöвсö сэтчин, кытi туйö — рыпкö, кытi оз — жагвыв кыссьö.
Вот матын ни кылö, сiдз и пуктö пеляс. Вот часöт мыччисяс мöсыс — и бöра шы оз ло сэтöн, а джынняныс бöрас боткö. Ойшöрöдз сiдз вöтлiсяс — Висьöлыс сё новйöтiс сiйö. Лют сiя, ме тай шуа, тешитчыны отирыс вылын.
Лöгасяс айыт да кыдз горöтас: — Эн тешитчы, вöрдядь, а то видзöт, плетьнас куля боккетö!
— Бу-бу-ук! — укнитас Висьöлыс да сувтас вöлыс одзö. Бурчикыс брызнитас-чеччöвтас бокö. Айыт кожгас Висьöлыт кузя плетьнас, а сiя и нетшкöвтас сы киись плетьсö, чисто плетьпу кöвсö орöтас.
Вöлыс сточма вöрсис петас, оз ни вермы айыт сувтöтны сiйö. Ашынас, чуть тыдавны пондiс, бöра эд вöрас пырис. Совсем недыр и пыралiс. И мöссö вайöтiс, и плетьсö адззöма. Кöзок бердö, шуö, гартыштсьöма. Только эта бöра жö вöрисьыслöн уджыс. Кöр сiя сетчас мортлö вачкыны? Вот и сюйыштiс плеть увтас кöзоксö. Пемытiнас дыр я сылö этö керны.
Мöсыс даки, висьтала веськыта, бульды-бальдi вöлi. Важ йöла, вöраыс оз дзескöт, вот и олö вöрас, оз нöит весь коккесö. И хитрöйся-хитрöй. Кöр абу матын мийö — сёйö, джынняннас вöрöтö. Кыдзи кылас кинöскö, тэлляинö пырас да джыннянсö кöзок йылö кышалас и сулалö, кыдз гыр. Сэтшöм местаись и застанитöм вöлi айыт.
Дата добавления: 2015-11-16; просмотров: 46 | Нарушение авторских прав
| <== предыдущая страница | | | следующая страница ==> |
| Кабала. Вöрисьлö инми синас. Эстöн кинкö сайласьö. Василь Сидорович и сылöн ёрттэз. Прокоп шедiс. Том старик | | | Жысь Егорлöн сизимöт висьт |