ШЫЛЛЬÖН ДА МЫЛЛЬÖН

«Гöрд субöта», кöда кежö сы дырна лöсьöтчисö, чулалiс. И чулалiс, позьö висьтавны, не умöля. Эта тöдчö и сöстöм улицаэз сьöртi, и отир чужöммез да басни сьöртi.

— Но, кыдз сельпо уджалiс? — юалiс Венька, кöр пантасис Олявкакöт гортас локтiкö. Сiя баитiс гажöн, тырппес вылын то и дело мыччасис шынньöв; синнэс то ли тулысся югытсяняс, то ли бура мыдзöмсянь невна чикрасисö и дзöрисö чожжыка, нежели мöдiк луннэзö.

— Сельпо валеганитны, кыдз шуö Шурончик, оз куж, — сiдз жö кокнита шыасис Олявка и серьёзнöя содтiс: — Ештiм керны быдöс, мый мöдiм. Кафе лэбис... Кöбы пыр этадз уджалiсö!

— Сэк бы коммунизмыс тыдалiс ни, — дугдiс шыннявны Венька. — Материальнöй база важын готов бы вöлi.

— База... И базаыс лоас, но ежели мортыслöн юрас кыш-паш керö — коммунизмыс оз ло. Али не сiдз?

Томыник тулыс орсiс, сералiс, гажöтчис, и Венькалö часöт эз вöв охота споритны, и сiя бöра шынньöв пыр горöтчис:

— Лоас, Гавриловна! Быдöс лоас! Эд сiя отирыс юрын, миян юрын, дзоридзасьö жö ни!.. Но, мун шоччись, мöдпырся сы понда баитам. — Сiя чöвтiс фуражкасö, сюйыштiс шульга конувтас, мöд кинас лэбтыштiс юрсисö кöсичаэс вылiсь и тойыштiс пеллес сайö да оськöвтiс фермалань. Олявка нёджжöвтiс сылö бöрсяняс и дивуйтчис, что мужикытлöн, тридцать годсяытлöн, юр шöрыс куш, дзик сёртни бок.

«Кöр нö ештöма лысны? Мöйму, картов кучитiкö, юрсиыс рака поз кыза вöлi... Колö висьтавны, ась петшöр да катшасин пöжö и ванас юрсö миссьöтö, поди, быдмас эшö юрсиыс...»

Рытыс мича и жар, дзик гожумся. Апрельыслöн мöд джыныс прокод этшöм овлö, но таво надур ни одз сылöтiс лымсö да косьтiс галяа туйез и мысажык местаэз, унаöн одзжык поткöтiс пуэзлiсь почкаэз, чепöстiс да йывсöтiс лудовкаэз вылiсь турунок, лэбтiс борд йылö гуттэзöс, мошшезöс, бабыввезöс, бöбтiс юррез сьöдракаэзлiсь, и öнi ны чирзöмсянь кык пель шы оз кыв.

Одз тулысыс одзжык вöрзьöтiс и отирлiсь сьöлöммез, а нiя пондiсö тэрмöтны кикок, гудыртны жилаэзын вир и тойлавны морттэсö, медодз томпöлöссö, быдкодь бытшöм и небытшöм тор дорö.

Рытыс Мича, и оланыс мича. Вöв карта вылын, кытöн тёс, а не шифер, учöтик зоночкаэз лэбзьöтлöны мотора самолётиккез, а мöд дорас, шоналöм шифер вылас, орсöны-котрасьöны да горöн вургöны том дудiэз, и оз повзьöт нiйö не каннезлöн горзöм, не тавося чаннезлöн гöняйтöм, не челядьлöн споритöм.

Колö бы радъявны, шыннявны öмпасьта, сьывны медгажа песняэз, а Олявкалiсь сьöлöмсö курöтö да жмитö, кöрчитö, дзик сiйö ньыв сирöн сиралöмась. Отирыс коласын эшö позьö терпитны, а кыдз кольччас öтнас — стрась недолыт. И юрас шум ветлö, дзик вичкуын звонитöны: бытьтö кывзö пластинка, кытöн гижöма Ростов Великийлöн звонитöм. Может, сысянь недолытыс, что шульга сапогыс коксö небурика дойдö да?

Может, и сысянь... Мöдiс нiйö чапкыны ни да вильöсь небны, но эз пет сiдз. А висьтавны кö точнöйжыка — ачыс эз понды петкöтны. «Сэтшöм ме и эм — мöдöра кучик, кыдз айö шуö, — думайтiс сiя. — Йöзыс асланыс бур дынö ва пыр и би пыр кыссьöны, ем пысок пыр, кöр ковсьö, тöрöтчöны, и жельнöга тэльöт мунöны, а менчим тай нянь кусöксö öмсим мырддьöны».

Конечно, няньсö öмсис оз кыскö, этö инькаыт весь сiдз ас йывсис шуö, но мукöдпырсяс честнöй мывкыд кузяс уна умöльсö керö аслыс. Вот и удерлун, кöр тöдiс, что сельмагись вузасись гусьöн, аслас роднялö да тöдсаэзлö, сеталiс гожся сапоггез, кырныш моз уськöтчис сы дынö, тшöктiс быдöс тэчны прилавок вылö и висьталiс: «Понедельниксянь эстöн он ло: ме тэнö предупреждайтi ни...» Конечно, сiя кöмкöтыс сэк жö и петiс, и сiя кольччис рашкыны важ сапоггесö.

Гублянка ю дорын, кöвдöм кодь грива вылын, кытöн отирыс семикöн да стречалунöн вексö кöртавлöмась да пöрччавлöмась кыдз, челядьыс керöмась дюттян, и сэтöн öксьöм да пизьö, натьтö, джын посадыс. Нылö, конечно, отсалiс Котöрок: сетiс ассис медбур геззэз, вöв карта дынiсь бöрйис медъён потшшез, медбы керны ныись куим вожа дюттян коккез да куимпöвса дюттян сёр, бытшöмика, кыдз керлывлiсö кöркö деддэз, öшöтны сы бердö крепытжык пöв, кöда бы терпитiс дас мортöс, — увтöм, веськыт слоя, щеллясьтöм плаха-сороковка.

Сэтöн жö и ыджытжыккес, кин велöтчö городын нето уджалö колхозын. А колхозас öнi томпöлöсыс кöть и не вывтi уна, нö эм: и подасö сiя дозирайтö, и машинаэс гöгöр сiя, и стройка вылын сiя жö. Таво десятöй классiсь джын велöтчиссес бöра сетiсö Венькалö, гублянскöй бригадирлö да парторглö, заявка: примитö пö миянöс горт колхозö.

И примитасö, и удж сетасö ны сьöртi, а мукöдыслö, кöдна одзжык локтiсö да охотитöны велöтчыны, колхоз сетас путёвкаэз.

Васькишна огородеч сайын, грива дорас, кинкö триньгö балалайкаöн. Уличка понас Олявка сувтчыштiс, видзöтчис-керис, но эз казяв, кин орсö. Не Котöрок я чуннесö перкйö? Не, не сiя: старикыт шонтiсьö аслас öшын увтын. Видзöт, шапкасö-клобуксö вежöма ни гублянка вылö, а пась туйö вывтас кышыштöма рыжöй, кöрт сiмöн мичöтöм зипунок, кöда, натьтö, только год-мöдöн ассяс томжык, а сё дзонь, сё шоныт — нойсö-сукносö одзжык кужлöмась керны!

Балалайка сьöртi мужиклöн небытик, шёлковöй голосок пондöтiс частушка:

Ой, шар галя, ды, шар галя,

Кок увтын тарласьö.

Ой, менам дона, ды, сьöлöмшöрö,

Чöскыта окасьö.

Триннитiс-серöмтчис балалайка да перытжыка, тэрмасьöмöн, кытшöвтiс орсан туйвежсö, и инька голос Мордасова моз вынöн везöвтiс:

Эх-хе-хем, конфетка эм,

Шöри чеган — сёйны нем.

Ягöдинка ыш лолалö,

Сэсся оз куж керны нем.

Ассис шогсö висьталiс бöра шёлковöй голосок: Ой, Жогормыскö, ды, сьöлöм кыскö, Абу зника, ды, абу он. Сэтöр синаöкöт мийö Олам васно кань да пон. А сылö паныт:

Менам милöйезö кыка,

Кыка эд и колöны.

Кинлöн кыка да куима,

Нiя гажöн олöны.

Балалайка вежис горсö, пондiс орсны вöснитика, и мужикыт сы моз жö вöсньöтiс голоссö:

Ой, ноко орс жö, ды, орсачок,

Сетам тэныт, ды, пятачок.

Ой, кыдзи пондан орсны бура,

Тэныт сетамö бандура.

Ассис темасö чижйöвтöмöн нюжöтiс женскöй голос:

Сьöлöмшöр менам Семён,

Дзик картовнöй шаньга, ён.

Тэ висьтав, картовнöй шаньга,

Менö босьтан али он?

— Кытшöм нö концерт сэтчин? — юалiс Олявка Венькоика Леналiсь, кöда вадöрсянь кайöтö гывьялöм паськöм.

— Чикиськинлöн гöссез тай вежмасьöны.

— Мый нiя? Чикиськиныс туйö гажöтчöны? Али сiйöн — пукалö да?

— Праздниксö панталöны, мый сэсся, поди? Ыджыт лун эд ашын, — и рочалiс: — Вовлö, гöрд кольтьöн верда.

Адззö Олявка, что мортыт тэрмасьö, горöтчис:

— Асьныт петалö.

Горт дынас сибöтчикö сiя казялiс инькаöс да мужикöс, кöдна жагвыв, городскöйез моз, лэдзчисö Жогормыс вывсянь и саясисö Котöрок керку сайö. Пот мунiс сьöлöмыс: «Колька эд локтiс... жöникö локтiс!..» Чепöссис гортланяс, медбы чапкыны коксис сапоггесö да кöмавны туфлиэз, вежны бусöсьмöм платьесö. И вдруг: «А мыйлö вежны, мыйлö мöдöтчыны? Разь жöник сiя? Нельки гижсьыны эг пондылö», — и чывк бергöтчис посадлань. «Кыдз локтiс, сiдз и мунас!» Но вит-квать оськöв бöрын сувтчис, дзар керис пельпон вевдöрöттяс и бертiс бöр. «Кин шогья пышшала, бöбöв? Мыйись пола? Колька виноватыс, сылö колö стыдитчыны. Вон тай бöра, тыдалö, виль инька...»

Кытчöдз сiя споритiс аскöттяс, локтiссез пуксисö машинаö, кöда сулалiс Котöрок стройба дынын. Югытлöз легковушка жагвыв, небурика дюттясьöмöн, локтiс неволькыт, эшö тальтöм туйöт, да сувтчис ворота весьтö, и Олявка кокнита ловзисис: руль саяс пукалiс не Колька, а тöдтöм морт, и сыкöт ордчöн вöлi межрайбазаись машинистка Ося, Савыркина группаись заочница.

Вот Ося петiс машинасис, макайтыштiс куим тюльпанöн — нiя вöлiсö нежнöйöсь-нежнöйöсь да югытöсь, дзик бикыввез, дзик тулысся петан шондi.

— Бур лун, подружка! — жебыника, рамыник голосокöн горöтчис Ося, чеччöвтыштöмöн, ровно школьница, кöть и аслас ни ныв невестаö пöртчö, сибöтчис Олявка дынö топ, чупнитiс пельбоксö да сетiс цветтэсö. — Сувтöт ваö, медбы эз рушмö!

— Ачыт быдтiн?

— Цветтэсö? — недовольнöя юалiс Ося. — Ны дорöдз я? Чожа сессия, а менам кык контрольнöй кертöмöсь. Кыка! Вежöртан? — Сылöн ёсякодь рожабаннэс югмисö, дзик тюльпаннэс жö лоисö, а сöстöм синнэс — пемдiсö. — Может, öтсö кера, а мöдсö, мыша, Савыркина сетас, сiя, мыша, сёравно ни керис, — тэрмасьöмöн торгис гöстяыс. Ося важын ни олö Кудымкарын, а сё баитö ас мознас, кыдз велалiс гортас, Тиминаын. — Но, осьт ыдзöстö да вердышт мыйöнкö, а то кулам, — и корис мужикыслiсь: — Валюш, тэ кыскы сэтчинiсь кöшельсö да пырт керкуас.

Кузь юрсиа, öшöтчöм ныра да щетина кодь чорыт уссэза Валюш шытöг судзöтiс машинасис кушаккезiсь вурöм сумка, пырис инькаэс бöрсянь.

Олявка думайтiс, мыйлö локтiсö Ося гозъя, да нем эз вермы думайтны. Но бура тöдiс öтiкö: не контрольнöйез понда и не гöститöм могись. Просто сiдз, делотöг, сэтшöм надззес, сэтшöм жикморрес цветтэсö да гöснеччесö — нельки бур вина босьтöмась — оз вайö. И машинасö эта ылынаас оз пондö вашöтлыны, оз пондö резина бырöтны да дона бензин сотны. Нiйö Гублянас кыскис мыйкö мöдiк.

— Но, кыдз субботник тiян чулалiс? — пондöтчис Олявка ылiсяньжык, медбы не дзугны жö сразу аппетитнысö веськыта юасьöмöн. — Мый уджалiт, мымда керит?

— Кыдз локтiс, сiдз и чулалiс, — серöмтчыштiс Ося. — Менам пинь пондылiс висьны да Валюшсö тшöктылi больницаö кыскывны... А сэсся, мыша, видзöтам светсö...

— Дак висьтасьö нö, мый светас керсьö, кыдз тiянлö овсьö, — öдззöтiс баснисö хозяйка.

Ося тырпыштiс фужерись вина, юалiс жöникыслiсь:

— Кыдз овсьö, папа?

Мöдыс лэбтыштiс пельпоннэсö, валитчис стул бöр вылас, нюжöтiс чуксö, шляп-шляп керис тырппезнас, вильöтчис, вильöтчис да пичкис öмсис кык кыв:

— Веснясям малодело...

Мужикыс небаитiсь — öмас ва кынмöма, а, кыдз ошшасьлiс иньыс, овны кужö. Сiя сэтшöммез коласiсь, кöдна йылiсь баитöны: «Киыт асланят кöстiсьö, дынат чукöртö».

— Тiйö эд мöдiт кооперативнöй квартира небны?

— А небим «Жигуль», — горöтчис Ося, — да и гöняйтам, адззан.

— Охотаныт эм дак, мый не гöняйтны...

Ося эшö пешлыштiс винасö, сувтöтiс фужерсö пызан шöрö, ылöжык ас дынсис, босьтiс шоколаднöй конфета, кушöтiс джынсö, пельдöтiс чочком-чочком пиннезнас учöтик торок, аклялыштiс öмас и тойыштiс кывнас ан саяс, чöскыта чупнитiс, нюмыртiс öмоксö:

— Кытшöм охота, Оленька?.. Валюш кынöмнас маитчö, дак ма кошшам. Кывсис, что сельпоаныт эм. Бур я?

Мужикыс бöра нюжöтiс тырппесö — керис порсь чук, нырыштсис гырдззаэзнас пызан вылас и кутчис нёджжавны потолоксö.

— Петiс ни, — шуис Олявка. — Но кило-мöдсö, натьтö, соседöлiсь адззам. Может, эшö мыйкö колö? Тэ казьмöт, эн чöв.

— Колö бы. Колö... Эна луннэзö кыв йылыт эз луд?

— Мыля лудас, некинкöт эг лöсьöтчы видчыныт да?

— Ме мöда видчыны тэкöт.

— Сэки видчы, мый нö кыскан? Только сыбöрын эн каитчы.

— Ме и кöр пурся, да ог каитчыв, — эз суськись Ося, висьталiс, кыдз эм. — А тэ?

— Овлö и каитча, кöр казяла, что не сiйö кери.

— А сы понда, что сельмагсит вузасисьöс весь поркйин, эн на каитчы?

«Дак вот мый понда тэ локтöмыт!» — лыйис юрас дума, и Олявка эз ни понды чуклясьны:

— Каитча, подруга, сы понда, что сэк жö эг гиж приказ, медбы тöв ньылат татiсь иньдöтны. Сiя тiян увтырись?

— Сойöлöн ныв, племяшка. Династия нюжöтiсь: бабыс да мамыс туй кузя мунö. А сiйö туйсö эшö прадедным пондöтöма — еммез вузалöм... Грош вылö — дюжина. Вежöртан этö, Оленька?

Мужикыс чеччис пызан сайсис, мыйкö бобгыштiс шпынъя уссэзас. Иньыс и пöв синсö эз бергöт сылань, только гöрд гыжа чунёкнас вöрзьöтiс, и мöдыс петiс керкусис.

— Вот и ладно, эн гиж дак. Сiя глупость, что сразу вашöтны. Медбöрья наказаннё. Тэ велöт сiйö: не сiдз пö, а то этадзи кер... Перво пö няньтö кöт, а вöлись сукты да пöжав — вот и мортö пöрас и тэнö век оз вунöтчы... Кывзы, Оленька, кывзы, умница, менö: эн вöрöт сiйö, глупышкасö, местасис, жалейт... Подумаешь, лöгöтiс öтпырись! Ась извинитчас! Эд и сiя не резиновöй крокодил, а нерваэза морт. Быдöнным отир, быдöнным кынöмаöсь, да эшö паськыт синаöсь и кузь кылаöсь... Ась месткомö корласö... Но, подружка? Сiя тэныт эшö пригодитчас, эшö отсалас...

Кык год ни нiя тöдсаöсь, öтiк сессия коста нельки öтлаын олiсö, а Олявка часöт вöлись вежöртiс, кытшöм морт Ося, и мый понда сiя старайтчö шылльöн да мылльöн босьтны товароведлiсь диплом — не кад, не деньга оз жалейт, и шынньöвнас, и ласков кывнас отсалö судзöтны сiйö, но не велöтчöмöн.

— Сiдзкö, тэ эта понда и локтiн? — юалiс Олявка, но ответсö эз понды кывзыны, а одзлань баитiс: — Дак лыддьы, что весь локтiн: кöть приказыс абу на гижöм, но менам висьталöмыс вöлi, а ме не мукöд кодь: кыдз шуи, сiдз и кера... Уналiсь ни сiя синбур тшыкöтiс — пес керавны оз мун, колхозын оз турунав, пода понда лыс оз чеглав бы. А товар ылöтны бокö вермö... Может, сельпоас и колямö, а магазинас сiя оз ло — не места сылö сэтчин. Ачыт тай велöтiн менö: «Сэтшöм коргагсö товарыс дынiсь колö хлорофосöн!..»

— Ог тöд мыйкö, — паджис Ося баитiсьсö. — А кöть и шуи öтпыр, дак просто сiдз. А эстöн конкретнöй дело, конкретнöй морт, кöдакöт лыддисьны колö, кöдö жалейтны колö.

— Конкретнöй морт, менам племяшка, шу... Этасянь и колö жалейтны. И эта сiдз: колö жалейтны мортсö, — согласитчис Олявка. — Ме сiйöн и сувтöта бы мöдiлаö, что жалейта кыдз мортöс. А коль ме сiйö этчö — эшö ёнжыка велалас плутуйтны, нач тшыкöтас асьсö.

— Мый жö тэ каттян, Савыркина, а? Кыдз тэ лысьтан мортсö оскорбляйтны? — обидитчис Ося да вдруг пондiс витшыктыны.

— А тэ бы кыдз шуин сiйö, кöда вузасьö, дзик купчина? Кыдзкö шедiс содталöм ценаэзöн, мöдпыр — наволочкаэз понда гöснеч босьтöма, удерлун — пола увтсяняс вузасис. Кытöн сiя велöтчис — государственнöй училищеын али прадедыс дын? Этшöм династия нюжöтiссес, кыдз адззан ачыт, миянлö оз колö.

— Некöр эг думайт, что сэтшöм нотнöй да идейнöй тэ, Савыркина, — дыр мыйись шыасис Ося. — Некöр эг видзчись этö тэсянь. — И медбы дугдöтны витшыктöмсö, горштырьяс кватитiс винасö и тшöк мунiс да кашляйтiс семдытöдз, а кöр чулалiс кашельыс, эшö öтпыр шуис: — Да, эг видзчись, мыша, этö тэсянь...

Ося петiс öтöрö — и прощайтчыны эз понды. А кöр хозяйка уськöтчис ворота сайö, машинаыс бöрсянь кольччöма только басöк колесо сер да шочыник бусок Венька дынiсь чукылёкын, кöда сайö свигнитiс югыт-лöз машинаыс.

«Ладно я ме кери? — эстöн вöлись кватитчис Олявка, но думайтны вöлi некöр. — Лöгасяс, пожалуй, дугдас баитны... Но и мед! Аснырреслö потачкасö оз ков сетны!»

Гублянка ю сайсянь кылiс кытшöмкö ровно бы тöдса и невежöртана шы, и сiя пондiс буржыка кывзiсьны. И пеляс пырис ятнöй кривзöм:

— Крив-крув! Крив-крув! Крив-крув! Туриэз! Конечно, туриэз локтöны!

«Ноко лыддя, параа али паратöм медбöрьяыс, — кайесö кошшикö думайтiс сiя. — Öтiк, кык... öтiк, кык... öтiк, кык, — лыддис сiя öт вожсис. — Эстöн быдöс гозъяöсь. А мöдас?» — и бöра жагвыв, дзик ыджыт деньгаэз, лыддис вит гоз. Сiдзкö, ежели веритны важся приметалö, таво и Олявкалö инмас паритчыны — керны законнöй семья.

«И колö, — дзик кинкö мöдiк висьталiс сы юр пытшкын. — Колö пессьыны-кыссьыны сылань, кöдöрын долыт олан, кöдöрын радейтöм — дзирыт, пыр кежö. И веритны этаö. Висьталöма тай кинкö: «Радейт и верит радейтöмас — и лоан счастливöй...»

А кымöрсянь лэбзисö туриэзлöн гажа шыэз: — Крив-крув-крув! Крив-курув! Кыдз не гажöтчыны — гортö локтiсö!

Дата добавления: 2015-11-16