ВÖЛI ЫДЖЫТ ЗЫК

Вöлi сё эшö одз асыв. Вöрöн вевттьöм Кайскöй уваллэз сайсянь öдва-öдва ештiс мыччисьны меднöй кымöса шондi. А Ректановскöй хозяйкаэз ештiсö ни высьтыны мöссэз, вашöтны нiйö поскотина вылö и часöт дружнöя лöсьöтчисö покос вылö. Литовкаэзöн, кураннэзöн нiя шумöн локтiсö деревня ворота дынö, меддорись керку пельöс сайö, кытöн гургис телегаа трактор-колесник. Кисö кос вылö пуктöмöн Макся локтiс томыник тракторист дынö, поздравитiс сiйö добрöй асылöн.

— Ытшкисьны талун пондат? — юалiс трактористлiсь.

— Кин ытшкисьны, а кин и сенаж заптыны, — шыасис сiя.

Трактор сайись, луд вылiсь, Макся казялiс нылочкаэзöс, кöднакöт öтлаын велöтчис школаын, бобгыштiс ны вылö, кыдз сто годся дед:

— Дырöн, дырöн узят, малинтуссез. Ойбыт я мый я сьылiт да йöктiт? Миян веретинскöй горадзуллез важын ни видз вылын, турун не öтiк зород сувтöтöмась, сенаж быдса траншея заптöмась. А тiйö вот лöсьöтчат только. Небытшöм делоыс петö. Вердас, вердас заптыны колö. Колхознöй богатствосö вердас содтö.

Боёк нывкаэз, вежöртана, сетiсö сылö достойнöй отпор, шуисö Максяöс весь олiсьöн, мисьтöм чужöмöн да эшö кыз кынöма чинодралöн. Годдэза ни тётка, кöда куйлiс сэтöн жö, луд вылас, меряйтiс Максяöс пыжьян кодь лэчыт синнэзöн и содтiс:

— Оз куж не вундыны, не вартны, пукалö сельсоветын да сос бердас зырым гардö, а тожö эд критикаöн, торта пель.

Нылочкаэз сiдз и кусiньтчисö смехсянь. Макся эз обидитчы. Мöднёж, радмис сiдз, бытьтö инькаыс не нёштöм кыввез горöтчис, а дзарнитiс сы вылö ласковöй любитан синнэзöн. А чожа мыйись и доррезви гажöн тырис: сiя кылiс, кыдз юок сайын, вöр дорас, горöна шыасьлiс зоночкалöн голос: «Тпруте, тпруте!» Этö Гришка юöртiс Максялö: öмтö осьтöн эн видз, старухаыс петö ни вöрсис. Макся загадочнöя мигнитiс нылочкаэслö:

— Тi только саймитö, а ми сельсоветiсь председателькöт важын ни кок йылын. Вот и локтiм видзöтны, мый Ректанын керсьö. Председатель Исай Сергеевич беда мыдз тöждiсьö, ойез оз узь.

— И Исай Сергеевич татöн? — юалiс тракторист.

— А то кыдз жö. Жагöна туруналатö, вот и ветлöтö. Пхе! Кузьма Кузьмич ордын пукалö, важнöй вопрос кыкöн решайтöны.

— Интересно, интересно.

— Адззöм кинкöт сенокос йылiсь баитны. Лесниккöт! Миян дынö мылякö оз лок, — лöгалiсö инькаэз. — Мый сiйö вдруг кудобаыс лесник ордö кыскис?

— Локтас и тiян дынö. Чулалас минута-мöд и локтас, — шынньöвсорöн юöртiс Макся. — Бригадирöс видыштны мöдö: мыля, шуö, пым сёян отирыслö оз готовитö? Яйöн, шуö, колö вердас заптiссесö вердны, госа яйöн, а не кöс няньöн.

Некин, конечно, Максялö эз верит. Пондас тай Исай Сергеевич пым сёян йылiсь абусö лёбны... Инькаэз эз и кывзö зонкасö. Бура тöдiсö Чоморöс. А сiя, вöр ладорö видзöтлiкö, мигнитiс нылочкаэслö, киэсö крест на крест морос вылö пуктiс. Нылочкаэз лукавöя сералыштiсö згальник вылын.

Макся ошшасис:

— Бура таво каникуллэзö чулалöны, беда кытшöм ладнöя. Быд лун отир коласын, сё мыйкö вильö и вильö кыла да адзза. И ачымöс мыччала тожö. Чожа знаменитöйöн лоа. Тöдат, сочинитi песня и сьыла сiйö народлö. Видз вылын сьыла, клубын рытнас сьыла, öддьöн бытшöм песняыс аркмис. Вот кывзö:

Зонкаок ме бытшöм стрась,

Весь öтöрын ог шатлась!

Нылочкаэз сiдз и кутчисö кынöммез бердö, сералiсö семдытöдз:

— Этö тэ-ту «бытшöм стрась?» О-о, Чомор! Чомор вдруг вачкис долоньнас аслас кымöс кузя, дугдiс китшкыны. Эта лоö: сы юрын чужис мыйкö виль, кытшöмкö дума.

— Кывзы-ко, Мариш, — шуис сiя öтiк нылочкалö. — Мöйму ошшасит тiйö, бытьтö лесничестволö мыйкö керны отсалöмась. Мый тi сэтчин керит?

Мариш, виньöрик нылочка, думайтыштiс невна, горöтчис:

— Уджалiмö. Кöз голиэз öктiм кöдзыс вылö, кедра голиэз судзöтлiм. Уна быд берсясö керимö. Кык неделя олiм вöрас.

— Эта бур, — шуис Макся. — А туруннэз, туруннэз эд öктö?

— А кыдз жö! И туруннэз öктiм лекарственнöйöсь. Öтлаын лесникыслöн мамкöт öктiсим. Сэтчин, вöрас, эм лесничестволöн керкуок и сарай. Сэтчö и петкöтлiм неöтiк дас ноша.

— Вежöртi. Быдöс вежöртi.

— Мый тэ вежöртiн?

— Часöт тöдны пондат. Кынымкö минута бöртi. Не весь баитöны: аппетитыс локтö сёйикö. Сiдз сiя и эм.

Макся пöвсиннас видзöтыштлiс вöрлань, кыскис и кыскис кадсö. Сiя ыджыт чувствоöн сьылiс песняжугсö конецöдз, сэсся подробнöя висьтасис, кыдз мöдiс тöн ысласьны пыжöн и мый сылöн петiс. Сiя важын ни казялiс лесниклiсь мамсö, но кужöмöн керис вид, бытьтö старухаыс сiйö немымда оз интересуйт. Локтö старуха вöрись гортас, но и мед локтö жагöник, ась мегырасьö. Миянлö сы дынöдз некытшöм дело абу.

Томыник тракторист, бригадирöс видзчисикö, кыскис карманiсь сигарета, пондiс куритны-папкыны. Пельöс сайсянь петiс эшö öтiк трактор, жиля-жоля мунiс гöрны пар. Чожа кöмасяс гортас и локтас бригадир Спиридон. И отир мунас удж вылö.

Весь öтöрын ог чатрась,

Гожум шöрын новья пась,

— вежмасис нылочкаэс одзын Макся.

Старуха шагнялiс жагöника, сьöкыт ноша нырыштöма сiйö кыккусiнь. Этшöм ноша увтын сiя ветлöтiс, видно, не первуись ни, пыр ветлöтiс отир син одзын и часöт отирыс вылö и дзар эз кер. Соседдэз да соседкаэз сы вылö тожö нельки эз и дзарнитö. Мый сы вылö видзöтнытö? Вайö пöрись кокора вöрись тшак, но и мед вайö. Сымда сылöн и удж.

Локтiс отир дынö бригадир Спиридон, юалiс тэрмасьöмöн:

— Быдöнныт öксит? Вот и ладно. Висьтала тiянлö, луныс талун жар лоас: куим машина иньдöны сенажсö кыскавны.

Кöр старушка ровняйтчис ныкöт, Спиридон гажöна сетiс сылö поклон, шыннялöмöн öдззис сярзьыны:

— Тэ и тшакьявны ни ештiн ветлыны, Варвара Денисовна? Ах, кытшöм тэ боёк да чож. Мукöддэс эшö ольпасьын нюжласьöны, а тэ, небось, джын тонна рыжиккез öктiн ни?

— Уна таво сякöй тшакыс шогмöма, — небыт голосöн шыасис Варвара Денисовна. — Öддьöн уна. И ельдöгыс, и рыжикыс, и сякöй волнушкаыс да синявкаыс. Урожайнöй годыс таво, слава енлö.

— Эта бур. Рыжиккез, нiя тöвнас, батя, сёян — первöй сорт.

Лесник Кузьма Кузьмич, тыдалö, казялöма öшынöт мамсö. Гыма-йирка петыштiс посöдзö, öдззис рявзыны деревня пасьта:

— Шупытжыка шагняв, шупытжыка. Тэнö эд видзчисям!

Старушка дрöгнитiс, вöрзьöтыштiс пестерь волыссэз и содтiс шаг. Быдöн, кин вöлi сэтöн, паськыта осьтiс öм, кöр бригадир Спиридон вдруг дугдiс шыннявны, строгöя шуис старухаыслö:

— Сулав, матуш, кытчö тэрмасьны? Кулавлытöдз охота, дзарнитны рыжиккез вылö. Кытшöмöсь нiя таво? Поди, золотöйöсь?

Ворота дынö, киэзнас паськыта öвтiкö, котöрöн локтiс Кузьма Кузьмич, нетшкöвтiс бригадирöс моросöт:

— Мый пöрись морт бердö лякасин, смола? Но?! Спиридон и сэтöн дивитiс ректановсасö, рявкнитiс лесник вылö, бытьтö ранитöм ош:

— Шыть, поганöй понкучик! Ме сельсоветiсь депутат и вöрзьöт только сэрпöсь киэзнат. Шыть!

Лэбис ыджыт шум-скандал. Инькаэз чирзiсö, ойзiсö. Локтiс сельсоветiсь председатель Исай Сергеевич Вольлапин. Казявтöг петыштiс пельöс сайсянь Гришка, чуйнитiс йöзыс коласö, матöжык Макся дынö. Сiя некыдз эз вермы вежöртны, мый эстöн шогмö. А Спиридон эз вермы видзны асьсö, вынöн летыштiс старуха пельпон сайись пестерь, чапкис луд вылö. Кузьма Кузьмич досповна сатанасялiс, зверь моз мурзьöмöн сывьялiс бригадирсö, лöсьöтчис нöитны. И, натьтö, нöитыштiс бы, если бы Исай Сергеевич эз нырышт асьсö. Быдöс эта шогмис сэтшöм чожа и видзчистьтöг, что инькаэз нельки синöн кваркыш эз ештö керны. И только сыбöрын, кöр Варвара Денисовна пильтыртiс öмсö да ванзöмöн чепöссис аслас оградалань, отир лэбтiс зык:

— Господи, мый миян шогмö?

— Исай Сергеевич, висьтась!

Исай Сергеевич не öддьöн берегитöмöн тойыштiс рапмöм лесниксö бокö, горöтчис сельчаналö:

— Нем сэтшöм особеннöйыс, ёрттэз, эз шогмы. Виноват ме тiян одзын: дикöй кабанöс вöрас берездöтi. Эг и думайт вийны, а вот петас жö! Но эта йылiсь сёрöнжык баитам подробнöя.

— Вот, вот! Эта йылiсь сёрöнжык баитам сельскöй сход вылын, — висьталiс отирыслö бригадир. — А часöт, поди, видзöтыштамö, кытшöм чудеснöй рыжиккез быдмöны миян вöрын? Эй, Макся, пöрччав-ко пестерьсö, мыччав йöзыслö комедь!

Макся бытьтö сэтöн и вöлi, эз понды мугны — чожжык пöрччалiс пестерь, кыминьтiс сiйö. Луд вылö, небытик турунö, усисö гырись яйторрез. Йöзыс дивуйтчöмлö эз вöв конец.

— Яй! Тшакыс туйö, видзöт жö, яй?

— А ме мый тiянлö баитi? Лоас, мыся, тiянлö жаритöм яй. А тi эд веритö, сералiт, — торжествуйтiс Макся.

Исай Сергеевич тожö ёна дивуйтчис, кöр казялiс этö картинасö, но чожа вежöртiс быдöс, ошкис Максяöс и шуис горöн, мед быдöн кылiсö:

— Яй и эм! Кабанöс, мыся, тöн берездöтi. Да! Ме пöрöтi сiйö, а яйсö, адззат, Кузьмич гортас кыскалö. И петö, если веськыта висьтавны: вор ворлiсь коколюкасö гусялöм!

— И эшö сельсоветiсь председательöс капканö пондылiс жамнитны, — горöтчис бригадир.

— Миколь Сеняöс повзьöтöм кулавлытöдз. Челядь киэзöн аслыс добро куралö, — содтiс Макся.

— Быдöс эта йылiсь сход вылын баитам, — öмалiс сiйö Исай Сергеевич. — Часöт некöр, сенокосыс оз видзчись.

Дата добавления: 2015-11-16