ЭШÖ ÖТIК ЗАГАДКА

Сiя чожа петiс бöр, нюжöтiс Максялö квасöн ыджыт эмалированнöй кружка.

— Вот давай-ко юышт. Кöдзыт квасинаыс.

— Спасибо, кратайтчыны ог пондö.

Кöмтöм бригадир сулалiс чöлöмöн, öт кокнас гыжьялiс мöдсö, сэсся горöтчис не öддьöн ятнöя, дзик аскежас:

— Нем ог ылöст, мый сэтöн и думайтны. Кузьма Кузьмич — морт солиднöй, деревняын уважайтöны сiйö. Кöда ладорсянь сы бердö кутчисьны? Исай Сергеевич дынö ветлыны я мый я?

Кыз тырппесö кепкаöн чышкикö, Макся горöтчис паныт:

— Некöр. Старухаыс вот-вот петас вöрсис. Сэтöн бы сiйö и...

Макся эстöн курччöвтiс кывсö, джöмдiс: Спиридон вдруг кыскыштiс сiйö йöрнöс сосöт, синнэзнас мыччалiс öтöрö:

— Вöралiсьлö и зверьыс паныт котöртö, — шушкыштiс сiя.

Паськыт ректановскöй улица шöрöт, сьöкыт сапоггезöн буткöтöмöн, мунiс Исай Сергеевич Вольлапин. Оськалiс сiя важнöя, öтмöдöрö нёджжасьтöг. Унажыксö ветлöтiс сiя бедьтöг, только тöвнас, кöр туйес вöлiсö нильыгöсь, босьтлiс киö кокнитик басöк коколюка. А талун сы киын вöлi кузь кыдзовöй бедь, кöда унажыксö вачкисис зор вылö. Председатель шагнялiс эта зор вылö нырыштсьöмöн, му бердöт кыскис дойдöм коксö. Макся, кöр казялiс сiйö, ёна дивуйтчис, нельки юрыс бергавны пондiс. Кытшöм могöн председатель эта одза Ректанö кромликтö? Вот эшö дзугас быдöс дело... Бригадир Спиридон мигнитiс гажтöм мыдз синнэзöн, тшаклялiс кырымын тошсö. Сiя эз вермы терпитны и петiс оградасис öтöрö.

— Исай Сергеевич, — шуис негорöн и öвтыштiс кинас председательлö. — Тэ мыля этö короминаöс орддян? Ноко кежав кöть джын минута кежö. Делоок эм...

Председатель öшöтiс юрсö и мыдза, джöмдалöмöн, пырис оградаö. Макся эз ешты сайöвтчыны пельöс сайö, пырны посöдзö или, шуам, гидйö. Вот мыля

Исай Сергеевич, кöр пöдналiс ас бöрын калитка, первöй делоöн казялiс Максясö, строгöя чукыртiс синкыммез. «Вот эшö пондöтас экзекуция, — думыш керис зонкаок и бöрйис аслыс сэтшöм места, кысянь позис бы, если ковсяс, ньöвьёсьöн кинитчыны калиткаö и чожжыка мавтны кок пятаэз. Но чожа лöнис. Экзекуция? Мый пода сiйö пондöтны? Макся нем сэтшöмсö, кажитчö, эз кер, медбы зубыта пöвсалiсö спина и боккез. Нет, нем сiя умöльсö эз кер. Сiдзкö, и повны немись.

— Максим Максимыч? — дивуйтчис председатель. — Этö тэ, дона сьöлöмшöриньöй? Сiдз, сiдз... Значит, не гортат узьлан, а йöз деревняын? Вежöртана!

Бригадир Спиридон бытьтö сэтöн и вöлöм:

— Мый вежöртанаыс? Нем вежöртанаыс абу! Макся узьöма талун Чукашор сайын. И вот кывзы-ко...

Сiя пуксьöтiс председательсö поспу вылö и висьталiс быдöс, мый тöдiс лесниклöн да сы мамлöн «штукаэз» йылiсь. Макся эта кадö жöдзис öтiк местаын, тальччалiс кокись кок вылö, гусьöник дзарьялiс аслас начальниклань. Нет, эта вöлi не тöння Исай Сергеевич — гажа сьöлöма, весёлöй морт, а нач мöдiк. Поспу вылын, юрсö морос вылö öшöтöмöн, пукалiс рушмöм и нöитöм ниндуль, ыджыт шогöн нырыштöм мужичок: чужöмыс вевттьöма гудыра везöн, син увтас öшöтчöмась гырись понмешöккез, юрыс, видзöт, öвтчö то öтöрö, то мöдöрö. Мый сыкöт лоис? Гöрис я мый я ойбыт или телегаöн ва кыскалiс?

— Сiдзкö, лесниклöн мамыс? — гажтöма шынньöвтiс сiя. — Хо! Лоас талун колхозниккезлö госа яй. Позяс и котлетаэз керны,

— Лесниклö, если сiдз, павкас. Кувтöдз оз вунöт! — шуис бригадир.

Исай Сергеевич перыта лэбтыштiс юрсö, дзар керис лесниклöн керкулань. Синнэс сылöн пондiсö öддьöн чожа мигайтны, рожабан йыввес вевттисисö гöрдкодь рöмöн. Сiя негорöн шуис:

— Лесник, конечно, сiя лесник и эм. Но дикöй чёртсö, кабансö, дона менам дружоккез, сёдаки пöрöтi ме!..

Макся юр кузя бытьтö сьöкыт зорöн сöтiсö. Зоночка кунис синнэз, вирскис нырнас. А бригадир Спиридон бöра сiдз и чеччöвтiс кок йылö, осьтiс öмсö. Быд торсö видзчисис сiя, только не этö. Висьталiс бы кинкö мöдiк, а не ачыс председательыс, дак некöр бы эз верит. Эшö сералыштiс бы пöттöдз: адззöмась тожö вöралiсьöс! А сэтöн мый нö шогмö?

Спиридон кыкнан кинас видзис коссö, гажтöма видзöтiс рушмöм Исай Сергеевич вылö, осуждайтöмöн гогынялiс юрнас, бытьтö баитiс: эх, зонö, зонö, и кыдз тэнö муыс терпитö? Горöн юалiс:

— Кыдз жö сiдз аркмис, Исай Сергеевич?

Исай Сергеевич жмитыштiс пельпоннэзнас, шуис не öддьöн горöн:

— Ачым ог тöд. Тыдалö, сюраыс дзугис. Хо-хо! Да, конечно, сiя. Пырöма Кузьма Кузьмичлöн кучикö и кешитчö...

Максялö неохота лоис дзöрны ограда шöрас, сiя пильснитiс-серöмтчис, сэсся пуксис пес чурка вылö, лöнис. И вдруг нюжöтiс коккесö, вöрзьöтыштiс-керис пельпоннэзöн, бöра пильснитiс. Медбы не öдззыны серавны лёкгоршöн, не повзьöтны Ректанiсь олiссесö, сiя аскадö топыта вевттис öмсö ки долоньöн. Но буравны некыдз эз вермы, важмоз нюжлалiс коккесö, чатрасис н китшкис, бытьтö кытшöмкö ненормальнöй.

— Тэ мый этö, Максим Максимыч? — мöртiс сы чужöмö синнэсö Исай Сергеевич. — Ме вылö сiдз смехыт петö? Или садьыт бырис, кольмин, поди?

— Несерьёзнöй морт кытшöмкö. Мöдöра кучик вылö вачкисьö, — горöтчис Спиридон. — Видзöтан, дак зонка кыдз зонка. А сiдз — Чомор,

— Пхе, пхе! — шыасис паныт Макся. — Может, и Чомор. Только лесникыс, Кузьма Кузьмичыс, и былись эд сюра чёрт! Кымöс вылас, адззылiт, натьтö, бородавка сылöн быдмö — настоящöй сюр. Ме важын казялi!..

— Быль эд, сюр вылö вачкисьö!

— Ах тэ, икота!

Куимнанныслöн настроеннё невна бурсялiс, кокнитжык лоис сьöлöммез вылын и, кажитчис, часöт жö öдззасö ваксьыны-серавны, пондасö нюжласьны кынöм висянöдз. Но серавны нiя сёдаки эзö пондö. Невна гажмыштiсö — и только. Тöдiсö быдöнныс, что Исай Сергеевич понда смехыс любöй часö вермас мöдöрö бергöтчыны.

— Кузьмичыс, сюра лешакыс, öтöрын талун эз на мыччась? — вдруг юалiс председательыс бригадирлiсь. — Поди, важын сiйö вöрö нечистöйыс чапкис.

— Тэныт сiя öддьöн колö?

— Конечно, öддьöн, — вартчöм тырппесö нюлiкö, горöтчис Исай Сергеевич. — Сы дынö эта одза и тэрмаси. Охота баитыштны сыкöт öтi-мöдi йылiсь. Сетiс меным загадка — öтнат некöр он курччöвт.

— Курччöвтан. Лесник, колö думайтны, некытчö эшö эз мун. Мамсö, натьтö, видзчисьö. Поди, горшыт косьмö? Ужо, петкöта квасинажугсö.

Спиридон бöра пыравлiс керкуö, петкöтiс кружка тыр квас.

— Ныргорöн узьö старухаö, стыдыс и чуньпон мымда абу, — юöртiс сiя. — А саймыны кад ни. Мöс высьтыны колiс бы.

Исай Сергеевич юис квас. Юис сiя горша, сiдз жö, кыдз и тöн рытнас, магазиныс дынын. Только ачыс вöлi не сэтшöм, кытшöм тöн вöлi: тöдчöмöн пöрисьмыштöма, чужöмсö везъялöм дженытик сьöд щетина, ачыс умöльтчöм, горбыльтчöм. Сьöкытö ойсö чулöтöм председатель, мучительнöйö. Поди, ойбыт и ончир эз кер, ох-ох...

— Мый сёдаки вöлi вöрас? Кыдз тэ эта кабанкöт пантасин? — юалiс Спиридон.

Исай Сергеевич горöн фырснитiс, пельпоннэсö жмитыштiс. Эз и лэбты юрсö, пондiс баитны дыша, виноватöя, öдва кывнас вöрöтiс:

— Кужомöн сiя менö арканалiс. Кыдз быльнöй колдун, оз и веритсьы. Кыскис чераньвезö, синнас кваркыш эз кер. Локтiс удерлун сельсоветö, пондiс шушкыны: «Кöдзыт нюрын, Гырка йирын, харьюззэз кульмöны, ваыс сiдз и пизьö... Ей-бо! Ме некой пору куталi тöн тыр пестерь... Эг мöд некинлö висьтавны, да тэныт висьтала. Добрöй тэ мортыс... Кый черисö нимлуныт кежö». Сiдз шушкис лесник. И эшö содтiс, что менам врагö, ылöстöм ошыс, тожö йирыс дынын шатласьö, черисö кыйö бы. Öзтiс сiя менö, лёквир. Веритi сылö, мунi тöн Гырка йирыс дынö, быдса час вуграси. И кöть бы кулöм песканöс кутi. Йирас лягушкаэз только нёштöмасьöны, сэсся некинлöн и дукыс абу. Но, пукси ме колода вылö, жаканöн зарядитöм пишальöс ордчöн сувтöтi, думайта: мыйлö Кузьма Кузьмичлö ковсис бöбöтны менö? Кытшöм сэтшöм мог? Поди, бöбöлöн лыддьö, дуракöн? Думайтi, думайтi — нем юрö оз пыр. А сэтöн вдруг шорокыс мöд ладорын турун кышöтны пондiс, кусттэз вöрзьыштiсö. Кыла, кинкö нять лойö — квотш, квотш... Кин? Босьтi ме чожжык пишальöс, видзöта, и вот петö сiя кусттэз коласiсь. Сьöд, нятьöсь, горба. Ош! Менам враг! Купайтчыны, видно, решитiс, нето горшсö кöтöтны. А, поди, бöра чериок думайтiс мырддьыны.

— И лыйин?

— Лыйи, Спиридон Иваныч, повзьöтöм могись. Почти эг и метитчы, сiдз и косьöвтi, а инми, видно, сьöлöмас. Зверь нельки эз и пикнит, сразу берездасис и чуксö муö мöртiс. Чеччöвтi ме колода кузя шорыс сайö, видзöта, а сэтöн... Куль тöдö, мыля сiдз шогмис.

Исай Сергеевич вынöн öвтыштiс кинас, кымöс кузя сöтiс.

— Бытшöма сiя тэнö кыйöма. Велöтöма, кырныш, быдöс тэнчит качествоэтö и сöтöма, кытчö колö. Хитрöй, сатана, ой, кытшöм хитрöй. И смелöй. Адззан, кыдз кутчисьöма! Но, а сыбöрын-ту мый вöлi? Казялiн тэ ассит ошибкатö: ош туйö кабанöс берездöтiн... И давай пышшыны?

— И давай пышшыны. Пон öдззис лявгыны матын, уввез ризьöтны пондiсö, но ме и котöртi, кыдз кöин. Чожа вежöртi: Кузьма Кузьмич нарочно бöбöтiс менö, ылöтiс капканö. Но мыйлö? Мыйлö? Ойбыт талун ончир эг кер, жугдi юрöс, маитчи. И шогмис, Спиридон

Иваныч, сэтöн öтiк колдовство... öнöдз кикок дрöжитö...

Макся дугдiс лолавны, мöртiс синнэсö председатель öмö. Бригадир Спиридон эз вермы öшшыны местаас, вешшис Исай Сергеевич бердö топ, шамыртiс тошсö кырымö, давай нямравны-летны.

— Нюжöтi ме этадз киэзöс кровать юр вевдöрöт, — одзлань баитiс Исай Сергеевич таинственнöя, — кошша пызан вылiсь папиросаэз да истöггез. Öт кинам папиросаэз кошша, мöднам — истöггесö. И колö жö! Кыдз кватитас кинкö киöс... Чирöстi ме лёкгоршöн, иньöс кулавлытöдз повзьöтi, асылöдз сiя эз вермы бурасьны.

— Кин кватитiс-ту, — эз вермы терпитны Спиридон.

— Кин, кин! Ачым кватитi. Шульга киö кутöма веськытсö!

— Нерваэз тэнат фундамент вылiсь нильдöмась, — шуис Спиридон.

— Нильдiсö, тыдалö.

Деревня эта кадö казявтöг тырис сё виль и виль шыэзöн. Кытöнкö совсем неылын, угловöй керку сайын, горöн сёрнитiсö инькаэз, быдöс деревня пасьта баксiсö мöссэз, бöбись китсасисö петуххез и готсисö курöггез. Колодец дынын жольöтiсö ведраэз и, аслас сьöкыт олан вылö норасьöмöн, нёштöма дзуртiс важ и, натьтö, сiсь ни, ва лэбтан ворот. Спиридон керкуын дзуркнитiсö косьмöм джодж плахаэз: чеччис старуха-хозяйка, часöт сiя гывйыштас чужöмсö кöдзыт ваöн, босьтас подойник и петас мöс дынö, кöда важын ни сьöкыта ыш лолалiс картаын.

— Но, ме муна, пожалуй, — поспу вылiсь чеччикö, шуис Исай Сергеевич. — Муна и шуа сюраыслö: висьтав ноко, дона сьöлöмшöриньöй, мыля тэ менö сiдз стыдтöг лешки-вошки бöбöтiн? Кытшöм сэтшöм мог вöлi? Баит, пон бöж, кыдз ен одзын, эн чуклясь!

— Котöрт, — öвтыштiс юрнас Спиридон. — Натьтö, öддьöн интереснöй басни тiян коласын артассяс. А мый, если тэкöт и ме муна? Ме эд сельсоветiсь депутат сёдаки.

Председатель думайтыштiс-керис. Сэсся горöтчис:

— Оз лöсяв. Сельсоветiсь депутат дырни аслас мог йылiсь Кузьмич баитны, конечно, оз понды. Мый, дурак я мый я сiя? Не, лишньöй морт дырни интереснöй сёрниыс миян коласын оз артассьы. Муна ме öтнам.

— Сулав, — горöтчис паныт Спиридон. — Вот кывзы-ко. А мый, если Максякöт мийö пыркнитам сы карчйöрö, пуксям мудьöт вылö и невночка... кывзыштам тiянлiсь баснинытö. Лоамö, позяс кö шуны, свидетеллезöн...

Исай Сергеевич нем эз висьтав, сiя только гажтöма серöмтчыштiс да грозитiс кыкнанныслö чуньöн: видзöтö менам, осторожнöя действуйтö. А то... Сiя дзарьясьыштiс öтмöдорö, петiс оградаись, перыта поперегалiс улицасö и, кöр ровняйтчис лесниклöн керкукöт, тэрмасьöмöн сибöтчис ворота дынö, горöн пондiс жольöтны калитка иганöн. Эз чулав, натьтö, и минута, кыдз ворота сайын кылiс Кузьма Кузьмичлöн кыз голос:

— Кин сэтчин?

— Осьт! Этö ме.

— Гхе, Исай Сергеевич? Пыр, пыр, гöсьöн лоан! Макся и Спиридон дзарнитiсö öтамöд вылö: чожа, часöт чожа ни...

ОЧА МОРОС

Медбы не öштыны дона кадсö, Спиридон нельки и кöмасьны эз понды, öвтыштiс кинас — кöмтöг кокнитжык. Сiя петкöтiс Максяöс перво ас карчйöрö, сэсся поперегалiс улицасö и картаэз сайöт котöртiсö Кузьмичлöн керку сайись вöрлань, а сэтчинсянь кок чуннез вылын, кыдз опытнöй ойся воррез, гусьöник локтiсö паськыт льöмпуэз дынö. Кынымкö минута бöртi бригадир Спиридон, бытьтö сiдз сiя и колö, пукалiс ни лесниклöн керку мудьöт вылын, мöдöртiс пеллесö и жаднöя куталiс каждöй кыв, кöдна осьта öшынöт петiсö керкусис öтöрö.

А Макся нёджжöвтiс-керис карчйöрсö омöн, шынньöвтiс ас кежас и перыта, дзик кань, кöда сьöрын вöтчис пон, кайис медыджыт и медпаськыт льöмпу вылö, вожасьöмöн пуксис кыз ув вылö, кужöмöн дзебсисис лöз листтэза улоккез сайö. Бурö сiя местасö бöрйис, немöн кулитны он вермы. Керку öшынсянь зонкасö некин оз казяв, зато Максяыс, если невночка паськöтыштас уввесö, вермис не только кывны, но и адззыны, мый сэтчин керöны. Макся старайтчис не поиктыны, не пишкыны ныргорöн. Сiя мöртiс синнэсö керку öшынö, тожö öшöтiс кузь пеллесö и, кажитчö, дугдiс лолавны. Вылiсянь сылö тыдалiс быдöс, кыдз ки долонь вылын. Первöй делоöн сiя казялiс, что лесниклöн керкуыс торйöтöма неöтiк жыр вылö. Медыджытас, горницаас, кытчö пырис Исай Сергеевичыс, вöлi югыт, гажа. Порог дынiсь веськыт пельöсö шлёпкисьöма паськыт крестьянскöй гор, шульгаланись стена бокын сулалiс ыджыт да тожö паськыт кровать. Пызан вылiсь Макся казялiс сёян-юан: бекöрын вöлi, натьтö, шыд, а может, окрошка, сулалiсö няньöн тарелка да ырöш туис, — тыдалö, хозяин да хозяйка лöсьöтчöмась сёйыштны.

— Öдя, Öдя! Да кытчö тэ, кудоба, воштiсин! Он адззы, дона гöсь локтiс? Ах тэ, быздöм, быздöм! Сё эшö саймыны он вермы. Кыскассьö, кыдз узьмöм, — горöтлiс иньыс вылын лесник.

Боковöй жырись гусьöник, кыдз шыр, петыштiс Öдя, кыккусiнь копыртчис гöсьлö. Öт кинас сiя тэрмасьöмöн сюйис чышьян увтö кымöс вылö петöм юрси тылöпоккез, мöднас видзис запон дорсö.

— Вай, мый тэнат эм, пызан вылö, да видзöтлы менам — вöрöтчы перытжыка! — командуйтiс хозяин. И кöр Öдя шупыта котöртiс горöдзлань, Кузьма Кузьмич вöлись сетiс сьöкыт кисö Исай Сергеевичлö — здоровайтчис.

— Давай пуксьы пызан сайö, ужо сёйыштамö, — рочалiс гöсьсö и перыта бергöтчис иньысланьö: — Сё эшö дзöран? Онмöссин разь? Эх! — И котöрöн петiс посöдзö, гымнитiс сэтчин чулан ыбöсöн.

Исай Сергеевич пуксис лабичö, нёджжöвтiс горницасö омöн. Максялö кажитчис, что председатель дзар керис öшынö, льöмпуэзлань. Тыдалö, казялiс сiйö — мылякö ёна дузгыльтчис. Неужели, быль казялiс? Да эз жö, эз. Нем умöльыс абу. Исай Сергеевич, адззан, эз чепöссьы öшын дынö, эз вöрзьы местасис. Сiя уськöтiс юрсö морос вылö, кынымиськö нуöтiс кинас чужöм кузя, гыжьялыштiс юрбöрсö. Öдя сувтöтiс пызан вылö эшö öтiк бекöр, вайис огуреццез, ордчöн ныкöт пуктiс кынымкö лук и мунiс бöр аслас жырö. А Кузьма Кузьмич, кöр пырис керкуö, шыннялöмöн торс сувтöтiс пызан вылас бутылка вина.

— Важын ни неби, да сё эз удайтчы юыштнытö. Талун джагöтам.

— Асывнас?

— Бур морткöт и асывнас лöсялас. Вешшы пызан дорас, Исай Сергеевич. Да тэ мый синнэтö дзебан, кыдз том нылiньöй? Пуксьы, мыся. Вот вешшы татчö, пельöсас.

— Не вина юны локтi. Дело эм.

— Пызан саяс и баитыштам. Ме эд тöдi, что локтан... Кыдз жö, кыдз жö... Деревняын оз позь приятельтöг овны, сьöкыт. Бур друг кöть кöр отсалас.

Хозяин кутiс председательöс сосöттяс, кыскис пызанлань.

— Дугды! — чорыта шуис Исай Сергеевич. — Будденнезö винасö ме некöр ог ю. Некöр. Нельки öтiк грамм ог ю.

— Ме тожö не вина гаг, — шыасис лесник, — а талун... А талун, ме думайта, позис бы и бöбалыштны невна. Позис бы и юыштны, гывьялыштны тэнчит удачнöй лыйöмтö. Не быдпырся сiдз аркмö...

— Удачнöй лыйöм? Мый сэтöн удачнöйыс?

— Давай огö пондö, Исай Сергеевич. Огö пондö, дружок. Ми эд не учöтик пучейез, не зырымбеддез. Ме мыччалi тэныт туй, дак висьтав кöть спасибо, пукалышт мекöт ордчöн.

И вились, бытьтö нем эз и вöвлы, трекнитiс Исай Сергеевичöс сосöттяс, синнэзнас мыччалiс пызан вылö. Öдя сулалiс горöдзын, повзьöмöн дзарьялiс то хозяиныс вылö, то гöсьыслань, ачыс сё нöитiс запон дорсö. Вöлi инькаыс бытьтö вартлöм пон: быдöс вывтыр кöрчитчöма, горбыльтчöма, бытьтö пельпоннэз вылын видзис не только юр, а эшö мельничнöй изын нето чуж мешöк. А кöр хозяин нёштöма дзарнитiс сылань, Öдя чожжыка вотьыштiс боковöй жырокас.

Öтöрын кылiсö гора голоссэз — отир лöсьöтчисö покос вылö. Туй кузя гурöтiс-мунiс трактор. Исай Сергеевич чöлiс.

— Сьöлöмыт, небось, сё эшö кок пятаэзын? — серöмсорöн юалiс лесник. — Овлö, нем он кер. Но чожа чулалас шогыт. Чулалас и сэк казялан, что ме только бурö думайтi, быдöс сьöлöмсянь отсавны тэныт мöдi. Кывсис, петушоккезöс пö жогьян, отирсö смешитан. А вöрас ыджыт зверьыс да пöткаыс тыр. Мыля бы и не чöсмасьыштны невнасö бур яйöн? Думайтыштi сiдз и решитi иньдыны тэнö колана туёк вылöт, отсавны кыдз добрöй друглö-приятельлö. Суськисьны ог понды, думайтыштi и сы йылiсь, мыся, Исай Сергеевичыс — мортыс вежöра и мывкыда. Мыйись-мый, шуам, лоас, дак и меным тожö отсалас, оз коль бедаö: Исай Сергеевич — начальство, сельсоветын сiя хозяиныс... Хе-хе... Хозяинкöт дружнöя колö овны. Айö, покойнöй, прокод сiдз баитлiс.

— Кытчö кöстан? — лэбтiс юрсö Исай Сергеевич, — Сьöкыт тэнö вежöртны, баитiн бы лучше морт моз. А то чуклясьö-веклясьö.

Лесник гажмис, шуис веськыта:

— Охота видзны бур хозяйство, а законнэс миян, ачыт тöдан, озö сетö кузьжык оськöв керны, — бобгис лесник. — Быд берсяын норма: видз öтiк мöсок, öтiк öшкаок, öтiк куканёк, öтiк дöчка. Унажыксö кольны эн лысьт. А мыля бы и унажык не видзны? Öнi уна лёбöны личнöй хозяйствоэз йылiсь. Колö пö унажык видзны пода. Вот и артав делосö, Исай Сергеевич, сет меным ыджытжык воля. Тэ быдöс верман керны, тэ — председатель. Гиж шнуровöй книгаас, бытьтö скотинасö ме видза нормася не унажык... Мамö вылö торья статья рисуйт. И шито-крыто. Некинлö дело абу. Тэ верман этö керны, Исай Сергеевич... И эшö вот мый... Эшö öтiк делоок эм. Вот кывзы-ко.

Лесник гусьöник дзарьялыштiс бутылкаыс вылö, дзик корис сысянь отсöт, ветлöтiс пельöсiсь пельöсö, торскöтiс дорöм сапоггезöн и гусьöн, бытьтö аскöттяс, баитiс Исай Сергеевичлö:

— Вöлi таво тулыснас городын, кежавлi нем керöмсянь колхознöй рынокö. Нем интереснöйыс сэтчин, конечно, эз вöв. Вузалiсö инькаэз сякöй берсясö, кöда миянлö, вöрын олiсьлö, и даром оз ков. Но вдруг адзза: локтiс ворота дынö виль «Москвич», петö сэтiсь этатшöм кöсыник старичок — пöльышт öддьöнжык, дак лэбзяс кымöрöдз, кыдз кай гöнок. Пасьтасьöма дедок кыдз нищöй — куртка лешки-вошки, картуз бырöм да косяссьöм... Кыскис сiя машинаись куим ыджыт мешöк, кокнитикöсь, тыдалö, вöлiсö, дзик пуховöй подушкаэз. Бöрйис пöрись морт ларёккез сайын места, лöсьöтчö вузасьны. Но, думайта, видзöтыштам, мыйöн тэ йöзсö гажöтан. А йöзыс, висьтала ме тэныт, котöртöны ни öтмöдöрсянь, очередь арталöны. Диво!

И кывзы-ко! Сувтöтiс сiя машинасö забор бокö, ыбöссö игналiс ключöн. Сэсся локтiс мешöккез дынö, пондiс тэчны товарсö прилавок вылö, И öдззис вузасьны. Мыйöн, думайтан, вузасьнытö пондiс? Некöр он тöд. А пондiс сiя, Исай Сергеевич, гажöтны йöзсö быдкодь быдмасöн-турунöн. Быль! Не простöй турунöн, а лекарственнöйöн. Тöдан эд, öнi почти быд газетаын да журналын гижöны, что дона лекарствоэсö ми кок увтын талям, огö öктö колана вужжез, цветтэз да лекарственнöй быдмассэз. Мода лоис туруныс вылö. И летö отирыс старичоклiсь товарсö киэзсорöн, деньга чапкöны сылö, мымда корас. Пымалi ме этö делосö видзöттöн, кольми вокорень.

— Кытiсь старикыслöн сымда лекарственнöй туруныс? — юрсö морос вылын видзикö юалiс Исай Сергеевич.

— Вот сэтöн делоыс и эм! Вöрись öктiс! — сувтiс гöсьыс одзö да дзирыта горöтчис Кузьма Кузьмич. — Ме не öддьöн уна лекарственнöйесö тöда, зато мамö сотняся унажык турун тöдö, кöдöн быдöс шогöттэсö веськöтны позьö. Вот и старичокыс сэтшöм вöлöма — колдун да и только. Кинкö отсöтöн öктöма добросö быдса зород и давай вузавны йöзыслö. Сiя, пöрись мыр, «Москвичсö» туруннэс вылö и небöма. А ми, бöбöввез, олам вöрын и нем ог думайтö.

— Баит, баит, ме кывза. Эта öддьöн интереснöй басниыт. Он я тэ думайт, что котöрта ме вöрö турун тэныт öктыны?

— Мый тэ, мый тэ, Исай Сергеевич! Сымдаыс и юрын эз вöв. Ме думайтi вот мый йылiсь. Миян сельсоветын эм восьмилетка, кытöн велöтчöны кык сотняся унажык челядёк. Сет школаыслö заданнё — öктыны аптекаэз понда лекарственнöй сырьё. Лун-мöд котрасясö челядёккес вöрö, öктiсьыштасö мамöкöт бöбалöм могись, заптасö не öтiк тонна. Мамö сякöй турунсö стрась уна тöдö. Ме эстöн быдöс думайтыштi ни. Керамö сiдз, что некин оз и казяв.

— Некин, сiдзкö, нем оз и казяв?

— Оз, Исай Сергеевич. Ме вöрöтыштi веммезöн. Медбы умöльсö некин нем эз думайт, медбы некин эз кватитчы, — ми организуйтамö школьнöй лесничество, маскировка могись пондам керны öтi-мöдi удж, шуам öктыны кöдзыс понда голиэз да мый да. А унажыксö, конечно, пондам заптыны лекарственнöй туруннэз. Мамö пондас вузавны нiйö городын. А мыйись-мый, дак сойыт, Марфа Сергеевнаыс, отсалас следдэз чышкыны...

— Сойö! Да тэ кин бердö лякасян?

— Ог ме лякась! — лöгöнмоз шуис лесник. — Овны тэнö велöта. Сойыт уджалö потребкооперация системаын, кöдалöн эмöсь заготовительнöй ларёккез. Мыйись-мый, дак сойыт, мыся, отсалас миянлö: судзöтас колана квитанцияэз, что вот примитiс сэтшöм сырьё... И эн пов, быдöс лöсялас-артассяс. Отирыс, мыся, машинаэз небöны, а миянлö разь оз туй? Организуйтам «Зелёнöй отряд» и öдззамö куртны-гардны. Ме отрядас и командирöс ни смекайтi. Если тэ он ло паныт, то пуктамö командирнас Максяöс. Зоночка сiя удав и öддьöн вежöра. Тайга сiя радейтö кулавлытöдз...

«Вот эта кöин дак кöин, — чуть я не бöбсялöмöдз лöгасис Макся. — Вот эта кулак! Менам киэзöн решитöма аслыс добросö куртны. Колö жö! И Марфа Сергеевнаöс смекайтöма ни, черань...» Но эз горöт зоночка, эз тарав льöмпуыс вылiсь, кöть сiйö зубыта пыркöтiс лихорадка. Эз понды горöтлыны и Исай Сергеевич, кöть тöдчис, что лöгсянь пиньöвтчисö аннэс. Сiя, кыдз тувдöм, пукалiс местаас, дивуйтчöмöн видзöтiс веськыта лесникыс синнэзö.

— Зверьыс йылiсь öтiк сатана оз кыв, — шуис лесник.

— Некин нем оз кыв, этö сiдз, — согласитчис Исай Сергеевич. Думайтыштiс невна и юалiс спокойнöя: — А совестьыт? Сiя, вонö, кылас. И мый, если ме муна кытчö колö да юöрта быдöс? Юöрта, например, кыдз тэ меным арталiн козинсö, мый сы понда корин? Тэ эта йылiсь думайтыштiн кöть невночка?

— Мый тэ, мый тэ, Исай Сергеевич? Кин туйö тэ менö пуктан? — тожö öддьöн спокойнöя, кыдз бы кешитчöмöн, шыасис паныт Кузьма Кузьмич. — Ме, конечно, думайтi эта йылiсь. И öтi-мöдi тор заптi, медбы... Но, думайта, некытчö тэ он мун. Мыйлö тэныт лёк браконьерлiсь славасö ас бердö лякöтны? Тэ эд месся буржыка тöдан, что браконьерресö öнi ёна куштöны. Шедiн, дак вай ыджыт штраф да мун, ёрт начальник, должностьыт вылiсь позорöн: дрынгасö тэныт небыт местаат, эн тöждiсь.

— Ме не браконьер, — шуис Исай Сергеевич.

— Браконьер, Исай Сергеевич. Вая йöзыс одзö öтiк тор, улика, и нiя сразу шуасö: сельсоветiсь председатель — лёк браконьер. Вöрас тöн адззи уликасö.

— Пишаль? Адззин? Но, лешак! И патронташ вайин?

— Уськöт вöрас ем — и сiйö адзза, — ошшасьöмöн Шуис Кузьма Кузьмич и бöра мыччалiс синнэзнас пызан вылö. — Вешшы пызан дорас, баитыштам. Ог пондö öштыны кадсö. Дона öнi сiя: ытшкисьны колö мунны.

— Морошка грива вылö? Культурнöй поскотина вылö? Кулитчыны огö пондö: добрöй сэтчин туруныс ёткöма... Но тэ эн мун сэтчин. Эн вöрöт колхознöйсö — шедан. Мöйму эн шед — таво шедан.

Нюжалiс лесниклöн чужöмыс, нюмыртчисö тырппес. Бобгис:

— Öвсьы, зонка, кытчöдз абу сёр. Миколь Сеня шы оз сет. Пишальыс сылöн тожö ме дынын. Топнит сы вылö кокнат — и Сеня курччöвтас кывсö. А он öвсьы, дак вашöтасö тэнö сельсоветсис, ыджыт штраф вештан. Быдöс колö керны умöн-толкöн.

Исай Сергеевич öшöтiс юрсö, кунис синнэз. Кузьма Кузьмич сувтiс сы одзö, киэсö пуктiс бöрас. Кыкнанныс дыр чöлiсö, бытьтö эз тöдö, мый эшö горöтчыны. Сьöкыта и дыр кыссисö кынымкö минута, шы не тöв вöлi керкуас. Сэсся, дивуйтчöмöн и лöгöнмоз лесник вылö видзöтiкö, Исай Сергеевич юалiс:

— Кыдз тэныт сёдаки удайтчис дикöй чудсö менам заряд увтö чапкыны? Не гортся эд порсь сiя. Тэ тöдiн, что кабаныс чепöссяс Гырка йирыс дынö?

— Нем сэтöн хитрöйыс абу, Исай Сергеевич, — шынньöвсорöн висьталiс лесник. — Нем хитрöйыс абу. Эта кабан не öтiк год и зыртчö йирыс дынын. Таво сэтöн и тöвйис. Колö тэныт тöдны — кабан, ашнöй гырк, сэтшöм зверь, кöда быд торсö тыткö-жорскö: турун, пу вуджжез, öктö ыб вылiсь шеппез. Казялас аслас туй вылiсь кулöм кöинöс, дак и сiйö трескас. Öддьöн радейтö картов, калег, сёртни, нельки кушман. Вот ме и чапкавлi кадiсь кадö быдöс этö добросö. Тулыснас таво резлi тинаас анькытш, турнепс... Петавлiсö недыр мыйись, быдмыны пондiсö. Кабанлö эта готовöй сёян. Мыйлö сылö кытчöкö мунны? Олö кабаныс, висьтала тэныт, öтнас, семьятöг. Сэтшöм уж мывкыд нылöн, дикöйеслöн. И быдпырся, кöр ме вовлi йирыс дынö да пуксьывлi колода вылö вуграсьны, адззывлi этö зверьсö. Вот и пырис юрам: если ме сiйö адззыла, то мыля бы мöдiклö не казявны?

— Сiдз! — дивуйтчöмöн шыасис Исай Сергеевич. Сiя дзик дрöгнитiс, перыта вöрöтыштiс пельпоннэзöн: — А если бы сiя менö этадз невночка... шуам, повзи бы ме, чепöсси пышшыны, а öтка лешакыс вöтiс бы, конечно, ковпиннезнас пышналiс бы пу бердö и вильöтiс менö, чöскöтiс öмсö? Мый тэ шуан?

— Сiдз бы и вильöтiс тай! — паськыта шынньöвтiс лесник — Ме эд йир дынас жö вöлi, дас кыным метра ылынаын и сулалi бöрат. Куст сайын сулалi. Мыйись-мый дак берездöтi бы кабансö, пишальыс эд киам вöлi.

— Леш-шак!

Вдруг Исай Сергеевич шынньöвтiс быдöс чужöмбаннас, юрнас гогынь-гогынь керис:

— Любитан тэ, Кузьма Кузьмич, ошшасьнытö, ох, кыдз любитан. Боньган, бытьтö вöр пыдöсiсь и ем адззан. Сiдз? А мый гортат, ныр увтат керсьö, он адззы. Максяыс, сiя вежöра Чоморыс, кöдö мöдан «Зелёнöй отрядас» командирöн сувтöтны, вот льöмпу вылат пукалö и кывзö спокойнöя быдöс, мый баитамö. Эта разь не свидетель. А мудьöт вылат, кыла ме, эшö кинкö эм... Спиридон, натьтö...

Паныт сылö лесникыс сiдз нем эз и висьтав. Сiя эз письты горöтчыны öтiк кыв, мыля кольмис юрыс, тырппес тувдiсö. Сылöн чужöмыс вевттисис перво бурöй краскаöн, сэсся пондiс чочкоммыны. Сыбурна бледöтiс — дзик белитöм чочком дöра лоис. Синнэс, кöдна почти пыр вöлiсö ехиднöйöсь и лöчытöсь, бытьтö кайварышлöн гыжжез, чожа баралiсö, кажитчö, петiсö кымöс вылö, öмыс пиньöвтчис. «Вот эта нокаут!» — ештiс шушкыштны Макся, и сэсся нем ни эз кыв, нем ни эз адззыв, мый шогмис керкуас: сiя и ачыс оз тöд, кыдз таралiс льöмпуыс вылiсь, кыдз петiс карчйöрсис улица шöрö. Садясис Макся только Спиридонлöн оградаö пыран воротка дынын. Сувтчис сэтчö, шоччöтiс ловсö. И сэк жö видiс асьсö: трус! Но мый тэ котöртiн, что чуть юртö эн пиньöвт? Лесниксис повзин? Эх, тэ! Да перво мыччалiн бы сылö куимпöвса дуля...

Котöрöн локтiс сы дынö Спиридон, шыасис сразу:

— Адззылiн, кыдз петiс? Нырыштiс сiйö сёдаки Исай Сергеевичыс. Кыдз сiя печиктiс Кузьмаыслö ныр кузяс! Бенц! Часöт лесниклö не лэбтiсьны ни. Сэтöн нем ни он гиж. Чарöтiс мортсö председатель.

— Эта мый! — шуис Макся. — Эта только цветок. Ягöдыс эшö одзат.

Лесниклöн усадьбаланьö видзöтiкö, Спиридон содтiс:

— Но и но! Да ло жö тэ куимись зуралöм! Кин бы вермис думайтны сымдасö? Олö ордчöн, мужик кыдз мужик. Тьфу, понгöн, прости господи!

Лöгувьяс Спиридон сьöвзис сэтшöм вынöн, что дульыс лэбзис лесниклöн керку ладорö, кыдз пуля. Эта бöрын бригадир тшöктiс Максялö котöртны дорись керкуыс дынö, кытöн быд асылö отир öксьывлiс мунны видз вылö, тшöктiс видзчисьны сэтöн лесниклiсь мамсö, а ачыс пырис гортас кöмавны сапоггез.

Дата добавления: 2015-11-16