ВОТ И ОВ МУ ВЫЛАС

Кабан вöлi ыджыт да ён. Сiя олöма, тыдалö, öтнас, семьятöг. Сеня кывлiс ни: олö-олö пö кабаныс и, кыдз быдыс, пöрисьмö. А пöрисьыссянь кытшöм толк? Некытшöм толк сысянь абу. Враггезкöт тышкасьны оз прокмы, мыччавны семьяыслö буржык олан места оз письты. И сэк томжык, вынажык кабан, медбы лоны табунлö вожакöн, вашöтö стариксö, ассис дедсö, дыв: мун шатлась мöдiк туйез вылöт, эн мешайтчы кок увтын, тарöвтчы чожжык, а то лешки-вошки кера! Сэтшöм нылöн, эна дикöйезлöн, закон. Кин вынажык — сылöн и воля, кин прокажык да боёкжык — сiя и хозяин.

Кыдз опытнöй пода вöдитiсь, Миколь Сеня вöрöтыштiс кабансö сапог нырöн, думанас öшлiс зверьсö и петiс, что яйыс эстöн квать пуд лоас, если не унажык. Колiс бы, думайтiс сiя, чожжык орöтны порсьыслiсь голясö, лэдзны вирсö, медбы эз тшык яйыс. Думайтiс, а кыскыны голенище сайись пурт эз вермы. Сулалiс, берданкаыс вылö нырыштсьöмöн, и мыйкö бобгис аскежас, сэсся дзик онмöссис, юрыс уджавны нач дугдiс, бытьтö бастуйтны кутчисис — некытшöм дума торок сыын абу.

Мыйкö нёштöмö, умöльö кылiс сьöлöмыс. Беда видзчисис сiя. И Сенялöн добрöй голубöй синнэс везъясисö туманöн, куньсисö. Пастух адззис ни, бытьтö кытшöвтiс сiйö отир, öксисö инькаэз, мужиккез, шумитöны-рявзöны быдöнныс, видöны Сеняöс нёштöм кыввезöн, сьöлалöны чужöмас, кöсйисьöны сiйö, лёк браконьерöс, öшöтны онняюрöн чегöм йыла пипу вылö, кöда сулалö Веретя ворота дынын. А эта кин сэтöн, отирыс коласын? Ыджыт мыгöра, чужöмсö письти кокалöм... Иньыс, иньыс! Ах тэ, лешак! Быль, иньыс и эм. Парася паськöтöма киэсö, синнэсö мöдöртöма лöга, жагöник локтö и локтö жöникыс дынö. Некинiсь сiдз оз пов пастух, кыдз аслас инись. Видчö сiя страшнöя, горöтлö лёкгоршöн, кыдз лешачиха... Дзарнитiс Сеня иньыс чужöм вылö, мöдiс гöрöтчыны: «Тарав, тарав, вакрамешö, сайöвтчы син одзись. И вдруг казялiс, что чужöмыс эта совсем не иньыслöн, и письти сiйö абу и вöрзьöтöма. Öшöтчöм бурöй рожабаннэз. Рожабаннэс шöрын чуй видзö ыджыт ныр, кöда ёна вачкисьö нестандартнöй огурец вылö... И эшö: кымöс вылас, как раз синкыммес коласын, быдмöма чуньпон ыжда лöз бородавка. Господи, — кутiс Сеняöс лихорадка, — да эта жö ачыс Кузьма Кузьмич!

— Пöрöтiн? Даровöй яйтор керин? — сысйöвтiс пиннес коласöт лесник и нетшкöвтiс Сеня киись берданкасö. — Сi-i-iдз! Порох дук сё эшö дулоас. Самöма.

— Дак... Не ме жö, мыся, буди.

— Висьтав кинлöкö. Лешак, натьтö, петалiс. Не ме, не ме! Тöда ме тэнö. Бöбалыштны вöрас кöть кöр готов.

Нет, не дорйисьны Сенялö. Морт тöдö ни, мый сiйö видзчисьö: лесник горöтлас эшö невночка, повзьöтас Сеняöс досповна, а сэсся кыскас сумкаись бумага, гижас акт. Мöйму, кöр сiя уськöтлiс сьöласö, как раз сiдз быдöс и вöлi.

Вот петас жö притча. Вот и ов му вылас.

— Дак, не ме, мыся...

― Сивилёныт кыз — вештан штрафсö, — лöгöн шыасис лесник. — А оз адззись деньгаыт, дак и тюрьмаö вермасö пуксьöтны.

Кузьма Кузьмич кыскис кучиковöй пуртöсiсь ыджыт пурт, орöтiс зверьлiсь горшсö. Му вылö больгыштiс-киссис бурöй вир. Пурт оропыс шучкöп ни боссьöма сэтшöм вирöн, сьöдöтöм. Неетша подасö, зверьсö потрошитöм эта пуртыс, уджалыштöма аслас векын. И эшö öддьöнжык повзис Сеня. Мылякö кажитчис, что лесник обязательно кутчисяс тышкасьны. А сiя, Кузьмичыс, чожа да кужомöн кулис зверьсö. Синнэс сылöн дугдiсö койны бичиррез, чужöм вылас кынмис пиньöла, нёштöм шынньöв.

— Но, кыдз? Акт рисуйтны пондамö, — турунöн пуртсö чышкикö юалiс лесник. — Бумагаыс пыр сьöрам.

Карандаш тожö.

— Не ме эстöн вöлi. Мöдiк кинкö лыйис, буди. Пышшис сiя.

Локтiс ны дынö Гришка, повзьöм, паськыт синнэзöн видзöтiс-керис порсь кучик вылö, вежöртiс, кинöс вийöмась, юалiс:

— Кин сiйö, тятю?

— Эка, кин? — нюмыртiс тырппесö лесник. — Вон тачкöма!

— Тятюö? Да сiя мöсöс высьтiс, кöр лыйисö.

— Баит! Адззан, дулосис сё эшö порох тшын петö... Кузьма Кузьмич кыскис кытiськö чер, пондiс керавны яйсö торрез вылö. Сенялö недолыт вöлi видзöтны сылiсь уджсö и лöсьöтчис вöлi мунны, но лесник сувтöтiс:

— Кытчö тэрмасян? Сулалышт, басни эм. А тэ, — висьталiс Гришкалö, — марш татiсь. Мун дозирайт подасö. Но, кинлö баита!

Гришка эз тэрмась. Сiя гажтöма нёджжöвтiс лесник вылö, сэсся айыс вылö:

— Тятьö абу виноват. Мöдiк кинкö лыйис, — шуис сiя не öддьöн чорыта. — Весь миян бердö кутчисин...

Эна кыввезсянь лесник бытьтö бöбмис. Сiя дыр буравитiс зонкасö лöг синоккезöн, нырыс гöрдöтiс и пондiс вачкисьны не огурец вылö ни, а чукыля-викыля ыджыт гöрд картов вылö. Лесник öвтыштiс кинас поскотиналань, рявкнитiс:

— Шыть избушкаö! Мый сулалан? Вот часöт-жö арестуйта и нуöта посадö чижовкаö. Мыйлö Максялö лёбин, что кабаннэзöс адззылiн? Эх тэ, лякöсь ныр! Вот шедан меным...

— Мун, Гришка, — гусьöник шуис айыс. — Тожно, будичи.

Кöр зоночка саясис кусттэз сайö, Кузьма Кузьмич локтiс Сеня дынö, сьöкыт кисö пуктiс сылöн винерик пельпон вылö.

— Кывзы-ко, Семён Миколаевич, — миритчöмöн, шоныт голосöн, пондöтiс сiя. — Морт тэ умнöй, унасö весь лёбны он радейт. Но и кывзы: эн ванзы, что вийин дикöй порсьöс. Быдöс колö керны умöн-толкöн. Абу меным некытшöм расчёт штрафуйтны тэнö зверьсö вийöм понда. Вежöртiн? Ачым тöда — пустöйöсь тэнат карманнэт. Но дак вот — эн лёб унасö, чöв! Ме тэныт бурö кера, тэ меным керан. Лоам кыдз добрöй морттэз, кыдз бур отир. Вот кывзы. Кöр тэ мöдан податö Морошка грива вылö вашöтны? Неделя бöртi?

— Одзжык думайтi вашöтны, — шуис Миколь Сеня. Сiя эз тöд, мый колö лесникыслö, мыйлö пондöтiс этö баснисö. — Эта загонын, кöть и паськыт вöлi, а туруныс мылякö чожа бырсис. Быдöс травитi. Ашын нето мöдлун вашöта подасö гриваыс вылö.

Лесник öмалiс сiйö:

— Эн лысьт кытчöдз вашöтны! Оз туй! Вунöтiн я мый я, что эта гривакöт ордчöн менам покос. Но дак вот и кывзы. Менам участокын туруныс таво умöль быдмис, кöс ситурун только. А Морошка грива вылын, адззылi ме, моросви ёткöма клеверсора тимофеевка. Культурнöй поскотина! Вот кывзы! Одз асывнас нето ойнас ми иньöкöт ытшкамö турунсö додь-мöд, новьям кошенинасö менам участок вылö. И сразу жö, мед некин эз казяв, гриваыс вылö лэдз подасö, ась йирсьöны миян бöрын мöссэс... Вежöртiн, кыдз колö кернытö? Быдöс лöсялас, кыдз колö. Мöйму адззылiн, кытшöм ладно петiс? Сiдз?

Сеня, конечно, согласитчис. Сiя, кöр вежöртiс, мый колö лесникыслö, пельпоннэсö паськöтiс, юрсö чатыртiс. Сiя пондылiс нельки шынньöвтны. Норовитны невночка? Не ашын вашöтны подасö виль загонö, а невна сёрöнжык? Да неужто оз позь? Конечно, позяс норовитны. Неделя мымда эшö позяс вердны откормочниккесö эта загонын. Позяс. Привессэс, конечно, чинасö, пода невна тшыгьялыштас: туруныс татöн абу ни. Но да не штраффез жö вештыны немыс понда! Не тюрьмаын жö пукавны.

— Сiдз, бат, и керамö. Ытшкы, мымда колö... Лесник кольччис öддьöн довольнöй. Сiя шуис Сенялö:

— А яйсö верман босьтны мымдакö. Только осторожнöя нырьясь. Ме тэча сiйö чуманнэзö и вöтьöта кöдзыт шорас. Сэтiсь и босьтан. А часöт мун-ко избушкаат. И — чöв! Шуан кö порсьыс йылiсь кинлö-нибудь кöть джын кыв — вештан штраф. А то и тюрьма лоас. Вежöртiн? Кер быдöс умöн-толкöн. Эн лёб унасö.

— Дак кыдз инö. Кыдз позьö лёбны? Эн тöждiсь! Сеня эз сайлав ассис радуйтчöмсö, избушкаö мунiс киэсö бöрас пуктöмöн. Мунiс сiя пишальтöг: лесник мырддис сёдаки.

ТЫРМАС ГАЖÖТНЫ СЮРАСÖ

Поскотина вылö, избушкаö, Гришка локтiс айысся невна одзжык. Сiя вайис пызан вылö быдöс, мый вöлi пуöма и жаритöма, неыджыт няньтор чапкис Шариклö. Понок только дзарнитiс сы вылö, сёйны эз понды, нельки эз и нюкайт. Умöлик понжуг, а тожö гордöй. Видзöтö Гришка вылö гöгрöса гажтöм синнэзöн, дзик юасьö: мый понда менö вартлiс айыт? И эшö дзик кöритö: кытшöмкö срам морткöт, лесниккöт, тышкасьны прокыс абу, а мекöт, беднöй сиротакöт, — кытчö тэ... Воин!

«Воин» пырис избушкаö кокнита, пуксис сразу пызан сайö. Настроеннё сылöн вöлi бур, синнэс, кöдна почти пыр вöлiсö кусöмöсь, часöт югьялiсö шоныта, койисö счастье югöррез. Эшö бы не радъявны Сенялö — этшöм бедаись мезмис! И колiс жö сылö, проктöмлö, котöртны вöрас, кöр лыйисö. Видзöтан, некытшöм печаль бы матын эз и вöвлы. А сэтöн... Но да ась, ась! Беда котöртiс боки. Эта бур.

Пызан сайын Сеня чикыртöм синöн видзöтыштiс зоныс вылö, öм дынас нянь шöрöм вайöтiкö, шуис гажöна:

— Дак, будичи... Кыдз заваритiс-лыйис пишальö...

Хо! Öдва ловья кольччи. Сiдз бузгис, зараза...

— Мыйлö тэ лыйин?

— Ачыс камгис, Гришка! Шор саяс котöрттöн, ме кыски, видно, затворсö, а сыбöрын бöр лэдзнытö вунöтi. А тожно пишальыс и камгис-лыйис. Кöр Шарикыс кузя сöтi...

Лöсялiс талун айыслö, бура лöсялiс, эз шед заряд увтö. А то, сiдз и тöд, ыджыт семья кольччис бы юр вердiсьтöг. Беда мунiс боки. Этö сiдз. А сьöлöм вылын, моросын, сёравно вöлi гажтöм. Курыт шог сэтчин поздiсис. Кöр сiя дугдас маитны мортсö, кöр пышшас аслас туёк кузя? Лесниклöн пиньöла рожаыс сулалiс син одзын, лöгöн нюмрасис, гудыртiс сьöлöм — тьфу, тьфу! Умöлик сiя вöлöма морт, лесникыс, срам. Арестуйта, шуö... А мый понда, колiс бы тöдны?

— Пишальтö мырддис я мый я? Али ачыт сетiн? — юалiс Гришка.

— Босьтiс тай. Ась, шуö, невна ме дынын олö. Но тэ эн пов, бöр сетас. Ми баитчимö.

И сiя висьталiс, кыдз нiя баитчисö. Сэсся бöра шуис:

— Тэ эн пов. Мöйму, кöр сьöланас кутiс, сiдзи жö керимö. Быдöс тай бура аркмис. Аркмас и таво. Только тэ öмтö паськыта эн видз, а то...

Гришка мöдiс юавны, кыдз жö этö сiдз, тять? Тэ жö эн пöрöт кабансö, дак мыля лесникыс тэ бердö лякасис? И мыля тэ эн сет сылö, кыдз баитсьö, пиннес кузя? Мыля сыкöт сразу согласитчин? А Морошка гриваыс кинлöн? Эд сiя колхознöй. Эм я лесниклöн кытшöмкö право ытшкыны культурнöй поскотина вылiсь аслыс турун? Абу сэтшöм правоыс. А привессэс миян чинасö эна луннэзö, колхоз öштас не етша яй.

Мöдiс Гришка юавны этö, но эз лысьт. Шуис гажтöма:

— Колiс бы репöтны Кузьмичсö ылöжык. Колiс бы тупкыны сылiсь öмсö.

— Горлопан сiя, лесникыс, будичи... Некодя морток. Оз ков сыкöт пантасьны. Вийöм зверь дынын кутiс, кырныш. И пишальö менам, кыдз нарочно, бузгис-лыйис, страм... Кыдз суськисян?

Вот и баит сэтшöммескöт. Кытшöмкö жаднöй чёрт лэбтö кисö колхознöй добро вылö, а айыс — кыдз суськисян? Да сэтöн не суськисьны колö, сэтöн шум колö лэбтыны. Эх!

Сеня öмтырнас сёйис пым каша, шлёпöтiс кывнас. Тапкас öмас кашасö тыр пань, дзурснитас туисiсь кöдзыт йöв, сэсся бöра каша паньыштас. Гришалöн лöг петiс айыс вылö и уськöтiс паньсö, жаритöм тшак горшö тасасис. Сэтшöм чöскытöсь да басöкöсь рыжиккес — а видзöт тэ — тасасисö. Бытьтö не йöвсорöн, а сiсьмöм касторкасорöн вöлiсö жаритöмöсь нiя. Умöликöн кажитчис айыс, мыйкö небытшöм бокись бок вылö тарласис моросын. Воин! Сэтшöмыскöт ылö он мун.

Гришка бура вежöртiс: он кö падмöт лесникöс, то сiя, конечно жö, ытшкас иньыскöт Морошка грива вылiсь быдöс добрöй турунсö, новьяс сiйö ношаэзöн аслас участок вылö, сувтöтас зород. А грива вылö коляс только ситурун заэз да ядовитöй кöканнэз. Вот тэныт и виль мöс карта лоас, комплекс, кöр привессэс чинасö... А мыйöн сылö дзуган, кыдз? Висьтавны: эн лысьт вöрöтны колхознöй добро, тарöвтчы гриваыс вылiсь вакрамешö! А сiя, мустöм, и котöртас милицияö: «Вот, кутi пастухöс, кабанöс вийöма... Пишаль дулоын свежöй са... Штрафуйтö сiйö, лёк браконьерöс!..»

Порог дынын, пельöсын, чуть да бöра гусьöник никсiс Шарик, сё гажтöма дзарьялiс Гришка вылö: мый понда менö сэтшöм зубыта вартлiсö, отир? Гришка гусьöник видзöтлiс айыс вылö. Охота вöлi юавны, кыдз досповна мезмыны лесник киэзiсь, кинлiсь корны отсöт? Но айыс сёйис каша, юис кöдзыт йöв и шлёпöтiс кывнас. И чöлiс. А мый сiя, сэтшöм воиныс, вермис висьтавны? Кытшöм сiя сёдаки неладнöй... Жагöник вöрöтö аннэзöн, тырппезöн и кывнас — шлёп, шлёп. А нырнас — вирс, вирс... Не-ет, сэтшöмыскöт каша он пу.

И эстöн Гришка чорыта решитiс лоны самостоятельнöйöн. Нем кадсö öштыны весь, колö мыйкö керны. Дона быд минута. Вöрын öткöн полöм петö ветлöтны. Колö мунны деревняö, йöз дынö. Кин-нибудь да сёравно отсалас. Не только Кузьмиччез олöны светас, эмöсь и добрöй отир. Позяс и сельсоветö пыравны. Колö мунны деревняö, йöз дынö.

— Тять, а няньыс эд миян немымда эз кольччы. Натьтö, и ужнайтны лоас немöн. Деревняö, гортö котрасьны колö, — горöтчис Гришка и дзебис синнэсö, бöбöтiс айсö: няньыс вöлi эшö.

Сеня думайтыштiс невна, трекнитыштiс пельпоннэзöн:

— И то. Котрась ужо. Лесникыт висьталiс тай, яйтор, шуö, верман босьтны. Нöбöт гортö кило-мöдсö.

Гришка только киöн макнитiс. Сiя чожа кышалiс пельпон сайö ассис походнöй пестерок, дзар керис öтмöдöрö, дзик мöдiс казявны, быдöс я сэтöн бур да ладно, эз я вунöт мыйкö керны, — и вöлись уськöтчис öтöрö.

Ошпозъяинiсь гортö пустöй киэзöн Гришка некöр эз вовлывлы. То озъягöд сойеслö да воннэслö чумантыр öктас, то дикöй ма гырка пуись судзöтас. А талун пестерокыс вöлi пустöй. Эз босьт Гришка сьöрас не озъягöд, не ма. Вунöтiс кöч гöснеччез йылiсь зоночка, сыбурна гортö, отир дынö тэрмасис. Сiя котöртiс тöдса вöр туёк кузя, öвтiс киэзöн и думайтiс. Вот эд кыдз! Не учöт эта вöр, эта Ошпозъяин, а эз вермö öтамöдöс ордйыны боки, оча чук пантасисö ёрдöм лесниккöт. Позьö думайтны, эта лякöсь ныр сэтöн и пукалiс понуллез увтын, видзчисис, кöр Сеня котöртас вийöм кабаныс дынö. Бытьтö тöдiс, что Сеня обязательно котöртас. Эх!

Интересно, кин лыйис?

Гришка сувтiс минута кежö, малыштiс ки долоньöн кымöссö. А не ачыс я Кузьма Кузьмичыс? Конечно, ачыс! Некинлö сэсся эна дзирыт страднöй луннэзö вöрын шатласьны. Адззан, кырныш, кытшöм ловкöя быдöс арталöма! Вийöм кабансö самöй поскотина дынас, видно, тöдiс, черань, что сылöн, Гришкалöн, айыс оз вермы терпитны, сёравно чепöссяс лыйсисьыс дынö. И вот на тэныт! — кыйис айсö паськöтöм везас. И неужто сылö отирыс веритасö, а айыслö озö? И кыдз сэк татöн овны?

Öбида бöра кутiс зонкасö. Лолавны лоис немöн.

Вöрись петтöн, Гришка вдруг вежöртiс, что и деревняас эта кадö, вот самöй эта минутаö, öдва я кинкö отсалас. Ылiсянь тыдалiс: Веретя бытьтö узьö, öтiк морт оз тыдав сы улицаын, пустöйöн кажитчис селитьбаыс. Быдöн, кин кöть невночка прокмис уджавны, часöт вöлi, конечно, видз вылын. А нiя, киннэз ытшкисьны да куртны озö ни письтö — кöсыник стариккез да старушкаэз, посни челядь, — небось, мунiсö вöрö тшакьявны да ягöдавны. Вермасö разь нiя этшöм гожся лунö пукавны гортын?

Пустöй деревняыс, дзик кулöм. Öтнас бабка Митипериха, сто годся дед Митиперлöн сьöлöмгажыс, пукалö поспу вылын, дзор юрсö пуктöма ки долоннез вылö, думайтö мыйкö: забедно, натьтö, мыля вöрас оз ни вермы котрасьны. Кытчö сылö! Раз старикыслö сто год, то Митиперихалö стося унажык. Висьтасьлöны пöриссес, бытьтö кöркöся жöниккез кошшывлöмась невестаэзнысö ассяныс пöрисьжыкöсь, медбы прок нылöн вöлi ыбын да видз вылын мисулитны-уджавны, а не только кагаэз ваявны... Öнi Митиперихалöн уджассьöма ни. Ветлöтö бедь вылö нырыштсьöмöн, кыккусiнь, öдва коккесö кыскалö. Гришка эз понды вöрöтны сiйö, мунiс здоровайтчытöг: поди, узьö бабыс. Старуха тожö эз и лэбты сы вылö синнэсö. Тыдалö, быль эд узис.

Кытчö мунны, кинкöт часöт баитны-висьтасьны?

Быдöс деревняыс, дзик ки долонь вылын. И некытöн öтiк морт оз тыдав. Курöггез, и нiя забгисьöмась кытчöкö, нельки петуххез оз базанитö. А поннэз? Кытöн жö поннэз? Кысь вöлi тöдны Гришкалö, что сылöн школьнöй дружок Макся, эта Чомор-пон кулись, мыччалiс тöн бускоэзлö гажсö, сiдз велöтiс любитны свободасö, что нiя асланыс пон собраннё вылын примитiсö решеннё: кытчöдз эта варнак уджалö сельсоветын, некöр некытшöм могöн-делоöн не шатласьны деревня улицаэзын. Лучше уж бöж шымыртöмöн пукавны посöдз увтын нето поиктыны вöрын кусттэз коласын, а öтöрö не петны.

Лöнь вöлi деревняас. Нельки номмез эзö дзингö.

И вдруг зоночка сувтiс, öшöтiс пеллесö. Сы дынöдз кысянькö локтiсö сьöлöм бурмöтан шыэз: трень-трень-трень, брень-брень-брень... Гришка эшö кузьжыка ошöтiс пеллесö, эшö ёнжыка пондiс кывзiсьны. И недыр мыйись вежöртiс: шыэз локтöны сельсовет ладорсянь. Вот тэныт и на! Неужели этö сельсоветiсь председатель Исай Сергеевич сiдз гажöтö асьсö? Да не жö, оз вермы лоны! Конечно, не Исай Сергеевич этö, а Макся, згальник-чоморик, гажöтчö мымда прок, музыка отсöтöн джендöтö кузь гожся лунсö. Эк сiйö, кыдз чарöтö-орсö!

Локтiс Гришка матöжык сельсоветскöй ограда дынö, дзарнитiс калиткаö. Сiдз и эм — Чомор! Вон пукалö навес увтын колода вылын, шыннялö аскöттяс и треситчö быдöс вывтырнас, кыдз киноын пöрись шаман. Мылякö кажитчис, что эта артист часöт жö уськöтчас луд вылö йöктыны «Камаринскöйö» и йöктас сэтчöдз, кытчöдз оз быр садьыс.

Но нет, Макся йöктыны эз понды. Сiя вдруг öдззис сьывны. Да сэтшöм басöка и гажöна, что Гришка минута кежö нельки вунöтiс аслас горе йылiсь, тожö пондiс шыннявны. Интереснöй вöлi Максялöн песняыс. Кöть недосуг тэныт, а сёравно кывзан:

Зонкаок ме басöк стрась,

Весь öтöрын ог чатрась.

Ме öтöрын ог шатлась,

Гожум шöрын новья пась!

Вот стыдтöмыт! Этö сiя басöк? Колö жö! Гöгрöса чужöмыс куш понпутш, юрсиыс сынавтöм... Басöк стрась! Вот юавны бы, кытшöм гажсянь сыбурна ошкö асьсö? Эз тöд Гришкаыс, что Макся неважын только кык часся дыржык чулöтiс интереснöй беседа ёрт Храповицкийкöт, кань моз нюжласис чуланын. Кысь вöлi тöдны этö Гришкалö? Эд Максяыс сразу, кыдз саймис, лэдзчылiс ю дорö и, медбы не лоны онзiлляöн, бытшöмика тульöтчис Пихтовöй йирын. А кöр бертiс сельсоветö, сiя первöй делоöн гывьялiс асьсö одеколонöн. И, конечно жö, öддьöнöв старайтчис. Чожа казялiс, что сельсоветын немöн лоис лолавны. Сэк и петiс сiя навес увтö, судзöтiс слега коласiсь ассис важ балалайка и, асьсö гажöтöм могись, пондiс чарöтны мымда вын.

Кöр Макся казялiс Гришкаöс, сылöн чуть сьöлöмыс эз пот, сiдз радмис: музыка кывзiсь локтiс! Джын кыв вылын сiя орöтiс ошшасян песнясö, балалайкасö сувтöтiс колодаыс бокö.

— Лок жö татчö, лок шупытжыка, Григорий Семёнович, — паськыта шыннялöмöн корис сiя дружоксö. — Пуксьы вот бокам, кер вылас, висьтась да баит, кыдз да мый сэтчин, вöрас? Кылiн, кыдз ме базанитi-орсi? Вот сiя и эм! Этö ме, вонö, ас йывсим песнясö сочинитi. И кыввесö, и музыкасö ачым гижи. Бура эд петiс? Мый тэ шуан, а?

Гришка локтiс дружокыс дынö шыннявтöн, ки сылiсь жмитiс и сэк жö ёна нюмыртчис, нырсö нельки долоньöн вевттис.

— Тэ мый? — дивуйтчис Макся.

— Öддьöн ни мыйкö сьöкытöн тэ дынсянь пöльтö.

— Этö одеколонöн ме брызгайтчи. Невна унаöв, тыдалö, кисьтi, чуть я не джын флакон.

— Фу-фу, нырын кильöтны пондiс. Несйöтö.

Макся виноватöя серöмтчыштiс, кымöссö киöн малыштiс.

— Тэ председатель дынö я мый я? — юалiс сiя.

Мунiс эшö асывнас пастуххез дынö. Ошпозъяинас сiя эз вöв?

— Эг адззылö. Эз висьтась, кöр локтас?

— Сы дынö, важнöй делоöн.

— Важнöй делоöн? А председательыс эд абу гортын.

— Этö эз баит. Но, натьтö, чожа локтас. Сiя должен, Гришка, ашын кежö быд удж йылiсь оперативнöй сводкаэз öктыны. Значит, чожа локтас. Тэ пукалышт мекöт. Гажтöм меным öтнамлö, беда! Деревняын öтiк чож морт абу, если мамзиккезöс не лыддьыны. Öтнаныс старичоккез ружтöны. Лöгöсь нiя ме вылö. Тöн чуть юрöс эз мургыльтö.

Макся подробнöя висьталiс, кыдз вöлi делоыс, кыдз геройскöя дорйис сiйö Исай Сергеевич, эз сет стариккезлö артавны экзекуция. Гришка нельки серöмтчыштiс.

Максялö эта öддьöн гленитчис. Сiя босьтiс киас балалайкасö, чуньöн сöтiс струнаэз кузя:

Зонкаок ме басöк стрась,

Гожум шöрын новья пась!

Бура сiя орсiс. И сьылiс, веськыта позьö шуны, замечательнöя. «Наградитас жö природа вот этшöм згальниккезöс быдкодь таланттэзöн», — завидуйтiс ёртыслö

Гришка, кöда йöктыны да сьывны народ одзö эшö некöр эз петавлы. А Макся выступайтiс ни и районын, и эшö кытöнкö. Сiя, Максяыс, и сьывны кужис, и гармонняöн орсiс. Тöвнас ветлiс художественнöй самодеятельность смотр вылö и баянöн сiдз орсöма, что сетöмась первöй места. И премия сетöмась — фотоаппарат. Талантливöй мортöн шогмöма згальникыс, эм мыйкö сыын сэтшöмыс.

— Баит, Гришка, веськыта: бур менам песняö али кыдз? — вдруг совсем видзчисьтöг юалiс сiя, кöр дугдiс орснытö. — Ас йывсим гижи. Бöбöтчыны ог понды. Но, баит, мый нö чöлан?

Гришка перво öшис кодь, но думыш керис и чуклясьны эз понды, висьталiс кыдз друглö веськыта:

— Öддьöн бытшöм мелодияыс. Только сочинитiс сiйö, кыдз ме думайта, кинкö мöдiк, а совсем не тэ.

— Баит, баит, разбойник! Любита правда-маткасö! Гришка серöмтчис и критикуйтiс одзлань:

— Неважын сетiсö миянлö транзистор, вот и кывзамö вöрас радио. И этö песнясö тожö кывзiмö айöкöт.

Москваын сьылiсö. А тэ — ачым гижи! Етшажык бы ошшасин да бöбöтчин. Сёдаки государственнöй учрежденнёын уджалан.

— Сiдз сiя и эм, кыдз баитан! ― радмис Макся. — А ме эд тожö кылi, да вунöтi. И вот жугда юрöс: кытiсь менам пеллезö пырис эта музыкаыс? Юр кольмöтан кытшöмкö мотивыс, лякасис, кыдз сир. Некыдз оз вунöтсьы. И пондiс кажитчыны, бытьтö ачым сочинитi. Но да ладно, тырмас сы йылiсь. Значит, председатель тэныт вот часöт жö колö? Важнöй делоöн сы дынö? Кытшöмöсь, интересно, тэнат вермасö лоны важнöй делоэз?

— Öддьöн важнöйöсь, Макся.

— Эк тэ... А но, баит да висьтась. Может, Исай Сергеевичтöг как раз вопростö и решитамö. Тожö не юртöмöсь.

Гришка лэдзис синнэсö. Юöртны аслас дело йылiсь талантливöй Максялö сiя кыдзкö эз и думайт: öддьöн ни мортыс несерьёзнöй. Кажитчö, вурöмась зонкасö уна рöма тороккезiсь, он и вежöрт сразу, кытiсь мый босьтöма. И мыйкö петöма сера-виззя, дöмаса-узöра, бытьтö старухалöн ватнöй одеяло. Мукöдпырся он и видзчись, а Макся сэтшöм «штука» арталас — кöть кок йылiсь тарав. А ачыс и синöн кваркыш оз кер... Сiдз эта, быдöс сiдз. Но, если буржыка думайтны, то мый позьö шуны? Позьö шуны: не сёравно разь, кинлö тэ висьталан лесникыс йылiсь. Вöлi бы польза. Лишь бы лэбтыны шум. А сэтчин, видзöтан, öдззас бергавны колесоыс. Лесниклö, кыдз и колö, сетасö нятьöсь киэс кузя — эн нюжлав, кытчö оз ков.

— Бедаö ми шедiм, Макся. Уж сэтшöм крепыт гöрöдö. Кинкö, кывзы-ко, вийис талун Чукашор сайын дикöй кабанöс. Эн на вунöт, мый баитi ме тэныт? А Кузьма Кузьмич, лесник эта...

— Кабанöс? Вот этö, Гришка, история. Баит, мый падмин?!

Сайласьны вöлi сёр ни, часöт сёр ни. И Гришка, кöр вежöртiс этö, эз понды дозыляйтны дружоксö, висьталiс быдöс, кыдз вöлi делоыс. Сiйö кывзiкö. Макся сiдз и жмитчис быдöс, зэлалiс, кыдз стальнöй пружина, вот-вот чеччöвтас местасис и, бытьтö кольмöм, чепöссяс вöрö, кытöн вийисö кабансö. Но Макся эз котöрт. Сiя кывзiс Гришкаöс конецöдз, сэсся лапкöтiс другсö пельпоннэс кузя. «Тыдалö, лоас меным удж, — думыш керис Макся. — Öнi эн сунась: локтiс сiя исключительнöй случайыс. Да эшö кытшöм!» И лесниклöн кыввес тöдвылö усисö: «И лоан тэ начальникöн. Пондан командуйтны ыджыт отрядöн...» Мый мöдiс висьтавны лесник? Кытшöм отрядöн командуйтны? Эх, если бы тöдны! Эм эстöн мыйкö загадочнöйыс да таинственнöйыс. У-уф! И вот бöра лесник, бöра кабан!

— Бура тэ вöрзьöтiн сьöлöмöс, Гришка, — горöтчис сiя другыслö. — И этшöм дело тэ сайлалiн месянь, эн висьтась сразу? Эх, Гришка, Гришка! Но, ладно. Бур ни сiя, что меным юöртiн, а не мöдiклö кинлöкö. Эта öддьöн бур. Часöт сюрасö гажöтны меным некöр лоас. Кутчисям настоящöй дело бердö.

— Тэ думайтан, миянлö позяс отсавны? — сувтöтiс сiйö Гришка. — Кыдз? Лесник мырддьöма пишальсö...

— Öтiк кыв сэсся эн горöтчы, Гришка. Быдöс вежöртана. И верита ме тэныт: эз вермы айыт дикöй порсь вылö кисö лэбтыны — прокыс оз тырмы. И керам быдöс, медбы Кузьма Кузьмич дугдiс тешитчыны тiян вылын. А кыдз — этö ог на тöд. Сет срок — мыйкö пырас юрö. Тэ вот мый, мун öнi гортат, лöсьöт, мый колö тiянлö: нянь, сов, луктурун. И видзчись менö. Ме öтнам думайтышта невночка, сувтöта оперативнöй план и вöлись пондам костёр жарöтны. Но и лунок усис! Исключительнöй случай!

Дата добавления: 2015-11-16