КЫДЗ ШЫННЯЛÖ АПОСТОЛ 7 страница

Нылöн пызанок дынöт мунiс чочком паськöма, кöс лысина дама, синькаöн мавтöм синнэс вöлiсö кыдз покойниклöн, öмыс пильтыртчöма, дзик öддьöнöв мавтöмась тырппесö гормöгöн нето тёритöм хренöн. Дама дзарнитiс ны вылö ехиднöя, нёштöма, бытьтö сьöвзис да эшö бытшкис сьöлöмö пыжьянöн. Опоньколö лоис недолыт, а Фаина керис вид, бытьтö эз и казяв некинöс. Дама мöдiк пызанок вылiсь лöсьöтiс да волькöтыштiс пызандöра, босьтiс мыйлöкö солонка, бергöтiс-керис сiйö киас, мыйкö бобгыштiс ныр увтас, сэсся горöн торс чапкис сов дозоксö бöр аслас местаö. Кухняö пырикö, сiя бöра косöя дзарнитiс нылань, брезгуйтöмöн пильснитiс. Фаина гусьöник тожö серöмтчис, чувйыштiс Опоньколö бокас:

— Заведующöй миян. Адззан, лöгалö. А меным кöть мый! Тожö цаца! Пуктö асьсö барыня местö, а ачыс — кульöм кань! Тöдан, Опонько, жöникыс сылöн кодуль, джын годся дыржык ни некытöн оз уджав, юö иньыс деньга вылö вина да эшö тышкасьö. Тьфу, сьöлöм гудрасьö, кöр видзöтан ны вылö. Да ме бы сэтшöм мужиксö...

Опонько тöдiс, мый бы сэтшöмсö керис Фаина, если бы жöникыс шедiс кодуль и бузотёр. Пыркöтiс бы, пожалуй, сiдз, что вунöтiн бы сразу, кыдз юöны винасö. Вон сiя кытшöм — боёк, городскöй. И öддьöн дивуйтчис, кöр Фаина лукавöя нёджжöвтiс сы вылö, хитрöя шынньöвтiс и горöтчис:

— А мый, Опонько, вайны тэныт рюмка вина? Миян кладовкаын видзöны сiйö. Вдруг кинлöкö ковсяс... Назапас видзöны...

Опонько уськöтiс кисис вилкасö, синнэзнас бöра унаись кваркыш-кваркыш керис. Сiя öвтыштiс кудриа юрнас, шуис решительнöя:

— Оз ков. Вина юны — висьталан тожö. Но сiйö!

Фаина горöн серöмтчис, öтлаын стулнас вешшис зонкаыс дынö топ, кажитчö, готов вöлi сывьявны сiйö. И, натьтö, сывьялiс бы, кöбы эз вöв залас отир.

— Этö бур — горöтчис Фаина и сетiс Опоньколö уськöтöм вилкасö. — Тэ давай сёй. Вайны тэныт эшö блинчиккез? Эд чöскытöсь нiя!

— Öддьöн чöскытöсь, — кокнит сьöлöмöн висьталiс Опонько. Сiя, тыдалö, сiдз нем эз и вежöрт, эз и кватитчы, мыйлö Фаина вöзйис винаторсö. — Ме эттшöм блинчиккесö нельки вöтöн эг на сёйлы. Мамö сё похлёбка да похлёбка пуö.

— Öтiк похлёбка вылын и олатö? — дивуйтчис Фаина. — Колхозныт разь сё эшö беднöй? А меным баитiсö...

— Не, мый тэ! Колхоз миян передовöй. Неважын райцентрын ошкисö, флаг сэтчин лэбтiсö, премия сетiсö. И быд торыс öнi тырмö ни. Только мамö стряпайтнытö оз куж, томнас нем дорын вöлöма велавнытö, а öнi сёр ни. — Думыш керис Опонько и содтiс: — А тэ, Фаина, кужан. Тэ бура стряпайтан.

Адззылiт, кыдз сiя шогмис! А эд уна сэтшöммес пантасясö, кöдна думайтiсö, что Опонько öмись лишньöй кывсö и арканöн он кыскы. Нет, Опонько не пентюх, этö ми веськыта висьталам. А ноко видзöтыштам, мый одзлань шогмас. Ноко, Опонько, мыччав асьтö!

Опонько сёйис блинчиккез, юис чай и сэсся кытчöдз нем эз висьтав. Фаина тожö чöлiс, мыйкö думайтiс и быглялiс пызаныс вылöт нянь крöшкиэз, чукралiс кымöс кучиксö. И — бум-м-м! — бытьтö бедьöн сöтiс Опоньыс юр кузя:

— А эта быль, что тэнö мамыт тшöктö юрбитны? Вичкуö поп дынö тшöктö ветлыны?

Крепыта öбыртiс Фаина жöникыс юр кузя. Молодец кунис синнэсö, öштiс садьсö. Сылöн дрöжитiсö киэс, чужöмбан йыввес сiдз и пыкнитiсö биöн, пеллес вот-вот öзъясö. Фаина видзöтiс веськыта синнэзас, видзчисис ответ. Эз вермы терпитны Опонько нывкалiсь видзöтöмсö, сьöкыта, дзик пороз, бергöтыштiс юрнас. Сiя пöрччалiс вевдöрись йöрнöс кизьсö, öктiс вын и вöлись только, кöр ловзис, пондiс баитны. И вермис сёдаки юöртны, кыдз вöлi делоыс. Медбöрын висьталiс:

— Вичкуыс меным совсем немлö. Ме дедушко Фокич ордын быгляси.

— Садь бырас! — шуис Фаина. — Быдса сутки йöз керкуын быглясьöма. А мамытлö разь эн вермы висьтавны, что еныслö он верит и некытшöм вичкуö он мун? Тэ жö не кагаок кытшöм-нибудь, а ыджыт морт ни...

— Дык! — горöтчис Опонько и эз содты сэсся нем, бытьтö ньылыштiс кывсö öтлаын блинчиккескöт.

Фаина, тыдалö, вежöртiс, что одзöв кутчисис велöтны Опонькосö, басöка шынньöвтiс. Зонка сразу радмис, сьöлöмыс öдззис токöтны ровнöя, сорасьлытöг.

— А меным эстöн öддьöн и сьöкыт, умöль овнытö, Опонь, — норасис Фаина. — Сэтшöм гажтöм, сэтшöм гажтöм! Мукöдпырся усясö тöдвылö миян вöррес, миян Вильва — сьöлöмö сiдз и пот мунас, быдöс вывтырö сiдз и дрöгнитас. Тöдсаэс татöн абу, сё öтнам да öтнам. Мунан мукöдпырся киноö, а сэтчин кузь юрсияэс лякасьöны, овны оз сетö. Сэтшöм стыдтöмöсь.

— А тэ нiйö жогйы! — лöгасьöмöн шуис Опонько, нельки сёйны дугдiс. — Тэ пöвсав нiйö, Фаина!

— И то! — серöмтчис нывкаыс. — Ме ныкöт кужа сёрнитнытö. Чуть мый, дак сразу — ноко вешшы ылöжык, нятьöсь чук, тарöвтчы шакардаöн. Только сёравно öддьöн гажтöм. Гортö кыскö. И заявленнё гижи ни, медбы лэдзисö удж вывсис.

Эта юöрыс ёна радуйтiс Опонькоöс, дзик куим шондi сылö петiсö. Сiя казявтöг бурамис досповна и вились кутчисис блинчиккез бердö.

Раздача дынын эта коста пондiс öксьыны народ, тшыггес эз вермö терпитны, сiдз и жöдзисö, чеччалiсö кокись кок вылö, чуть эз пöрöтö турникетсö. Фаина горöтiс кытшöмкö Нюркалö, тшöктiс вердны отирсö, ачыс эз и мун жöникыс дынiсь.

— Кытшöм тэ, Опонько, лоöмат! — бöра дивуйтчис сiя. — Быдмöмат. А юрсиыт! Кытшöм кудриэз!

Опонько дзебис синнэсö, мыйкö дырна нем эз письты горöтчыны. Но терпитiс быдöс, лöнис жагöник и шуис:

— А тэнат чикиссез вöлiсö чуть я не кокпятаöдз. А часöт?

— Мый тэ, мый тэ, Опонько! — гöрдöтыштiс и Фаина, сярзис перыта: — Чикиссесö öнi шоча ни новйöны, вежсис модаыс. Öнi нывкаэс татöн новйöны дженытик причёска. Сiдз-ту буржык и басöкжык. Шуан, не?

— Тэ öддьöн басöк, Фаина! — серьёзнöя и ятнöя шуис Опонько и нёджжöвтiс нывкаыслö веськыта синнэзас.

Вот сiя кытшöм, Опонькоыс! А тi баитiт...

И сёдаки шогмис сыкöт неыджыт конфуз. Бур да кодя жöникöн мыччалiс асьсö Опонько, шагньöвтiс быдöс испытаннёэз, а сэтöн, пызан сайись чеччытöн — этта, кытшöм сiя оша-миша! — казявтöг сидзис кокнас стул бердö и сiя, эта сьöкыт стул-креслоыс, öштiс равновесиесö да кыдз брякнитчас джодж вылас. Быдöс стенаэз дрöбалiсö, öшын стеклоэз триньгисö. Горöн серöмтчисö пызаноккез сайын пукалiссез, гажöна ваксисö раздача сайын нывкаоккез. Опонько эз и тöд, мый сэтöн керны, кытчö воштыны киэсö, сулалiс бытьтö тувдöм, öшöтiс юрсö. А ехиднöй, кöс лысина дамаыс, конечно, сэтöн и вöлöма:

— Но, зонка! Но, лешакпиян! Да тэ, ош мыгöр, этадз миянлiсь быдöс мебельсö паздан. А эшö нывкаöс бöбöтлö кытшöмкö волокö, вöр пыдöсö!

Дорйис Опонькосö Фаина. Сiя внимательнöя видзöтöв-керис заведующöйыс вылö, юалiс:

— Тэныт мый эшö оз тырмы? Мый зонкаыс бердö лякасин? Да мортыс сiя золотöй. И сьöлöмыс тожö золотöй! Да ме сыкöт не только Кайскöй волокö, ме сыкöт быдлаö муна!

Медбы не öштыны весь кадсö, Фаина кутiс жöниксö конувтöт, эшö öтпыр дзирыта нёджжöвтiс заведующöйыс вылö, мигнитiс сылö и шынньöв пыр горöтчис Опоньколö:

— Мунам, ош мыгöр тэ менам, ужо кольлала тэнö кöть невночка. Дед Фокич, ме думайта, некытчö эз и котрась. Некытшöм приданöй эз и думайт кошшыны. Сiдз и эм! Вон поспу вылын пукалö, узьö, некö.

Ыджыт Дзимбырын, центральнöй колхознöй усадьбаын, библиотека нач эшö виль, первöй год только сулалö — стенаэс вежöсь, джодж да потолок тожö вежöсь, немымда эз ештö сьöдöтыштны, сир дукöн нырö вачкöны. И сякöй книгаыс сэтöн — быдса море-океан. Эн дышöтчы, колхозник, лыддьöт, мымда колö, öкты унажык умтö. Юрий Андреевич эз дышöтчы, чуть да бöра пыравлiс татчö: то знаменитöй роман босьтас гортö, то журнал кытшöмöкö, а унажыксö, конечно, лыддьöтiс нiйö книгаэсö, кöднö лэдзö издательство «Колос». Том агроном старайтчис дзарнитны эта издательстволöн быд виль книгаö. А талун ны вылö сiя нельки эз и видзöт. Сiя эз сулалышт талун и нiя стелажжез дынын, кöдна вылын вöлiсö художественнöй литература да мöдiк разделлэз. Агроном сувтчис только кузь полка дынын, кöда вылын басöк букваэзöн вöлi гижöма: «Атеистическöй темаэз вылö литература».

Уна быдкодь книгаыс сулалiс эта полка вылын. Вöлiсö сэтöн классиккезлöн-просветителлезлöн кыз томмез, öння авторрезлöн брошюраэз, вöлiсö уна папкаэз, кöднаись позис адззыны журналлэзiсь да газетаэзiсь заметкаэз, статьяэз.

Юрий Андреевич кузь рыт пукалiс библиотекаас, эз и чеччывлы. Сигаретаэз йылiсь вунöтiс, кынöмыс йылiсь вунöтiс. Сiя, кыдз медодзза экзамен кежö лöсьöтчикö, тэрмасьöмöн листайтiс брошюра бöрын брошюра, гижис тетрадьö быдöс, мый кажитчис сылö интереснöйöн да убедительнöйöн. Эта удж бöрын агроном кужöмöн серöтiс лекциялö тезиссэз, бöрйис колана цитатаэз. Бытшöм аркмис реферат. Юрий Андреевич лыддьöтiс сiйö аскежас, шынньöвтiс: «Не реферат, а дзимбыровскöй поповщиналö могильнöй плита. Но, Эринья Потаповна, янсöтчы еныткöт, Христосыткöт. Видзöтан, спокойнöйжык лоас оланыт».

Да тöдны разь, мый тэнö одзат видзчисьö?

Некöр он тöд.

Лöсялiс сiя Эринья Потаповналöн сiсьмöм керкуö как раз сэк, кöр хозяйка юрбитiс енлö да лыддьöтiс лунся молитва. Старуха сулалiс енполка одзас пидзöссэс вылын, паськыта пернапасалiс кымöссö и кадiсь кадö клёнöтiс эта кресталöм кымöсöн джодж кузя, шушкис невежöртана кыввез. Ордчöн сыкöт бöрись лапаэс вылын пукалiс пушистöй сьöд кань, видзöтiс ликкес ладорö и, веськыт лапасö вылына лэбталöмöн, миссьöтiс пельсайсö. Юрий Андреевич перво неумöля повзис, сэсся чуть эз öдззы ваксьыны: сылö кажитчис, что и каньыс тожö кеймисьö енлö. «Ачыс чёрт оз вежöрт, мый эстöн шогмö», — дивуйтчöмöн шушкыштiс сiя бöрлань петитчикö. Но петны и мунны ылöжык эз ешты: Эринья Потаповна вдруг дзар керис бöрас, дрöгнитiс и орöтiс молитвасö мединтереснöй местаын: костiалiс агроном.

Юрий Андреевичлö ковсис керны вид, бытьтö öддьöн рад, мыля сюрис татчö, шынньöвтiс:

— Примит гöсьöс, Эринья Потаповна! Мешайтi эд тэныт?

Хозяйка нырыштсис киэзнас джоджö, сувтас кок йылö, дыр зыртiс позялöм коссö, сэсся мыччалiс кинас лабич вылö:

— Но дак мый инö... Пуксьы, — шуис нюжвыла. И вдруг ловзис, пондiс перыта жöдзны: — Пуксьы, пуксьы, добрöй морт, шоччись!

Ловья эшö Кайскöй волокись деревняэзын обычай: кин бы эз пыр тэ ордö — öддьöн матiсь родня или жö совсем тöдтöм морт, а первöй делоöн гöститöт сiйö кöть бы квасинаöн нето сюромкаöн, а то и брагаöн, ырöшöн. А оз кö лöсяв не квас, не брага, то вай мортыслö кружкаын ваок — тожö спасиботöг он кольччы. Вот и пондiс жöдзны Эринья Потаповна, чожжык котöртiс комö, босьтiс залавка вылiсь сёйöвöй кружка да лэбзис öтöрö, гуямаö.

Юрий Андреевич пуксис лабичас, нёджжöвтiс öтмöдöрö. Умöлик керкуокыс, важ: стенаэс пиньöвтчöмась, лажмытик потолок самöма тшынсянь, уна местаöт вазьöм — виялö крышаыс. Жугалöм öшын стеклоэз местын сiсьмöм трепич торрез — тупкöттэз. И мыля этö старуха колхознöй квартираö петны откажитчис? Не вежöртана делоыс. А кытöн сiя святöй угодникыс, новоявленнöйыс? Енполка вылын только öтiк сьöдöтöм ни лик сулалö, сэсся нем. Поди, Куть-Кутиха ордын красуйтчö?..

Быд щельын и пазын кышöтiсö тараканнэз, забор сайын, öшынас я мый я, шумöн вартчис стекло бердö балямош. Мыля сiя пырис татчö — пондыв вежöртны. Джоджын, сё эшö ликкез вылö видзöтiкö, миссис кань. Эз вермы терпитны Юрий Андреевич, серöмтчис да вынöн сöтiс сы кузя кепканас — эн вежмась, нечистöй дук, тарöвтчы ылöжык! Каньыс фыркнитiс и, кыдз кольмöм, чеччöвтiс потолокöдз, сэсся сьöд чарньöлöн лэбзис öтöрö, ыбöс коласас чуть эз люкав хозяйкасö, кöда пыртiс кружкаын квасина.

— Бöб эшö каньыт, томыник, тыдалö, — виноватöя шуис агроном. — Малалыштны мöдi спинасö, а сiя...

Эринья Потаповна шынньöвтiс тырп дорнас и мунiс комö, сувтöтiс залавка вылö кружкасö и мыйлöкö котöрöн бöр петiс посöдзö. Минута бöртi сiя пыртiс неыджыт чуман, кöда вöлi вевттьöма фанера торöн, сувтöтiс сiйö ордчöн кружкаыскöт. Агроном пукалiс чöлöмöн, нёджжалiс хозяйкаыслань и жугдiс юрсö: мый сiя сэтчин колдуйтö, мый сэтшöмсö лöсьöтö-стряпайтö? Кытшöмкö пизь я мый я пыртiс...

А хозяйка эта кадö судзöтiс пань и былись пондiс колдуйтны: пуктiс квасинаас пань-мöд пизьсö, сорлалiс бытшöмика, думайтыштiс-керис и содтiс эшö пань етш. Агроном сэтöн вöлись вежöртiс: тэсь, тэсь лöсьöтö! Но-но...

Кайскöй волокись деревняэзын тэсьнас не праздничнöй лунö, будденнез коста, гöститöтöны только меддона гöссезöс.

— Вот пешлы-ко, зонö, эн брезгуйт, — кыдзкö простöя шуис Эринья Потаповна.

Юрий Андреевич эз понды тшвакны, висьталiс спасибо да кутiс кружкасö, юыштiс кык-куим гульк, паськыта шынньöвтiс:

— Бытшöм тэсьыт, лöсялö! Бурмöтiн сьöлöмöс, бабушка! Важын эттшöм юансö эг пешлы, важын!

Тэсьыс и былись вöлi туяна: кöдзыт, не сiдз сук и не сiдз кизер, самöй раз. И шöмакодь вöлi сiя и невна чöскыткодь. Бытшöм юан. Юрий Андреевич, конечно, тöдiс, что юöны тэсьсö не тэрмасьöмöн, учöтик гульккезöн, не быдöс сразу, а невночкаöн: керин гульк и калькав кружкаыс бердiсь, артав хозяйкаыскöт басни, сёрнит жагöника. Эта коста кружкасö эн пукты бокат, а видз киын. А мыля бы не видзны? Видзны киын сiйö позьö, только вот баитнытö мый? Сiя дзарнитiс енполка вылö, перыта лэдзис синнэсö, вайöтiс кружка дорсö тырппез дынö. Эринья Потаповна эз сайлав, что рад, мыля пырис сы дынö учёнöй морт, дона гöсь, котöрöн мунiс забор сайö, мыйöнкö жолькнитiс сэтчин. Юрий Андреевич юрнас гогинялыштiс: и эта пöрись пермячкалö, добрöй и простöй старушкалö, сiя мöдiс лыддьöтны лекция, добротнöй философскöй трактат? Но и но!

Öшис том специалист, думыш керис гажтöма: велöтiсö институтын сякöй берсясö керны, а кыдз уджавны вот эттшöм макарихаэзкöт — эзö висьталö. Öнi кöть мый сэтöн кер, кöть чеччöвт лабичись да чепöссьы öтöрö. Кытчöдз Эринья Потаповна жольöтiс кухняын, залавка дынын, сiя чожажык сюйыштiс «могильнöй плитасö» пыдöжык карманас и, медбы казявтöг, Макарихаыскöт баиттöн, не кыскыны бöр, кармансö бытшöмика кизялiс «молнияöн».

— Пуксьы тэ, Эринья Потаповна, шоччисьышт, — рочалiс хозяйкасö Юрий Андреевич. — Ме эд могöн пыри. Ужо баитыштамö, кытчö миянлö тэрмасьны.

Эринья Потаповна эна кыввезсянь невна öшис и повзьыштiс, но мугны эз понды, пуксис ордчöн, киэсö тэчис пидзöссэс вылö.

Быд пенсионер дынö ни талун пыравлi, — кружкасö öм дынö вайöтiкö шуис агроном. — Миколиха дынö кежавлi, Степаника дынö тожö. И вот тэ дынö эшö решитi. Делоö менам сэтшöм, Эринья Потаповна. Таво первуись ми кутчимö быдтыны ыбын капустно-брюквеннöй гибрид. Эта, поди кылiн ни, öддьöн интереснöй штука: муас быдмö корнеплод — калег, а му вевдöрас капуста. И добрöй хозяиннэз, висьтала ме тэныт, урожайесö босьтöны вöвлытöмöсь, быд гектар вылiсь семьсот-восемьсот центнерöн.

Эринья Потаповна, кöда кузь век уджалiс колхозын, и конечно, бура тöдiс, мый сiя лоö восемьсот центнерыс, перво öмсö осьтiс, сэсся строгöя видзöтiс агрономыс вылö, дзик шуис: пырин, дак видз асьтö кыдз колö, а эн лёб арттöмсö.

— Восемьсот центнерöн? Эг на кывлы, медбы миян гектар вылын быдмис сымдаыс. Эг кывлы. И не лешаччöй я сiя карч? Не сатанинскöй я? Муын быдмö калег, а вевдöрас капуста?

— Кытшöм жö сiя сатанинскöй плод вермас лоны, кöр отир быдтöны? — дивуйтчис агроном. — Обыкновеннöй гибрид, виль быдмас сэтшöм. И сетiс меным председатель Пётр Парамонович сэтшöм совет: организуйтны натодиль звено, кöда бы дозирайтiс да быдтiс этö культурасö. А мый, Эринья Потаповна, кыдз и тэнö ми гижамö эта звеноö?

— Менö? Да мый тэ, мый тэ, зону. Кытшöм ме работнича: косö оз кöстась, юрам джынняннэз тронгöны. Да öддьöн ни мылякö не сьöлöмви меным эта кипритыс. Некöр сы йылiсь эг кывлы. Поди, сатанинскöй да?..

Мыйкö вöрзис Эринья Потаповна моросын, жöдзны пондiс местаас, сё частожык и частожык дзарьялiс енполкалань, тыдалö, эз вермы видзсьыны, медбы не пернапасавны кымöссö. И пернапасалiс бы, конечно, да йöз морт одзын эз жö лысьт.

Бурöтiсö сiйö агрономлöн кыввез:

— Бытшöм тэнат тэсьыт, ох, бытшöм!

— Ю пöттöдз, зону!

Юрий Андреевич юис тэсь, гажöтiс сьöлöмсö. Сiя видзöтыштiс енполка вылö, пильснитiс, шуис, бытьтö ас кежас:

— Учöтик и эм святöй ликыс, а вына. И талун, кöр ме пыри тэ ордö да казялi, кыдз тэ юрбитан, сразу жö усис тöдвылам забавнöй сэтшöм случай. Таво тулыснас Гундырын вöлi сiя, случайыс. И смешитiс йöзсö сэтчинiсь öтiк кöсыник старичок Зобня Ведень. Поди, кылiн сы йылiсь?

— Кыдз жö, кыдз жö, — перыта шыасис Эринья Потаповна. — Ме сiйö бура тöда. Дзорыник сэтшöм дедушко, баитö этадз нюжвыла и вокорень етша. Лишньöй кыв оз горöтчы.

Зобня Веденьöс сiя былись тöдiс. Мöйму, кöр Куть-Кутиха совет сьöртi ветлiс вичкуас, сылöн ёртöн вöлi не кин мöдiк, кыдз ачыс Зобняыс. Кыкöн сыкöт, ордчöн позьö шуны, сто верста подöн мунiсö, вичкуас бöра жö ордчöн амвон дынын сулалiсö, а сыбöрын и гортö кыкöн бертiсö, не тэрмасьöмöн баитiсö нiя делоэз йылiсь, кöдна мукöдпырся шогмöны и небоын, и му вылын. И мый жö сыкöт, Зобняыскöт, таво тулыснас шогмис? Кытшöм сэтшöм случай? Поди, кулiс ни беднöй старичок?

— Смешитöв-керис сiя менö, Эринья Потаповна, — сьöкыт кружкасö киын видзикö, гажöна висьтасис агроном. — Вöлi ме Гундырын, тулысся сев коста, узьлi Зобняыс ордын. И адзза: оз и дугдывлы старичок, сё енлö юрбитö. Асывнас копырасьö лик одзын, луннас, павжун коста, копырасьö, рытнас — бöра сiя жö картина. Сайми ме кыдзкö ойнас, видзöта — старичок öзтöма лампа, сувтöма пидзöссэз вылö енполка одзö и бöра киöн öвтö: позис бы думайтны, бытьтö физзарядка керö. Но и но, думайта. Вот эта веритö дак веритö еныслö — обязательно райö шедас. Мешайтны ме сылö, конечно, эг понды. Юрбитан — но и юрбит пöттöдз, аслат эд пидзöссэт да киыт, öвт мымда колö. А одз асывнас ме иньдöтчи ыбö трактористтэз дынö. Муна жагвыв Льöмва берег вылöт, природаöн любуйтча, каёккезöс кывза да мый да. Бытшöм этадз сьöлöмö вылын, гажа. Сибала ме, Эринья Потаповна, как раз сiя места дынö, кытöн юыс Попановскöй хобот керö, гывьялö Попан нима шихансö. Если кöр-нибудь тэ, Эринья Потаповна, вöвлiн эта шихан дынын, то непременно адззылiн интереснöй штука: юыс ладорсянь керöсыс пытшкö мыйсянькö шогмöма пыдын осьта, дзик пещера...

— Господи, — öдва öшшис местаас Эринья Потаповна, кöда орöттöг видзöтiс агрономыслö öмас. — Да тöда ме этö осьтасö, кöркö видзöтны сiйö нарошно ветлi. Сылöн и ним аслас эм — Юмгорт.

— Сiдз, сiдз! Юмгорт. Этö сiйöн, Эринья Потаповна, мыля, кыдз висьтасьö стариннöй легенда-преданнё, эта пещераын кöркö олöма чудинскöй ен Юм. Чудиннэс, миян предоккес, ёна почитайтöмась Юмсö, юрбитлöмась сылö орöттöг, вайлöмась быдкодь козиннэз, сотöмась ямаыс дынын ыджыт костёррез, пуöмась яй, славитöмась ассиныс таёжнöй олансö.

— Да и эта йылiсь тожö кывлi стариккезсянь, кöр ачым том эшö вöлi. Кыдз инö, кыдз инö...

— Вот сiдз, Эринья Потаповна, значит делоыс вöлi. Жагöник сибала ме пещераыс дынö и адзза: кинкö ловья морт пидзöссэз вылö сувтöма, юрбитö осьтаыс вылö. И мый дивитiс менö, дак этö öддьöн невежöртана дело: мортыс пернапасалiс асьсö не веськыт кинас, а шульганас!

― Ах!

— Быль баита, Эринья Потаповна! Öвтö шульганас и кöть бы мый. Локтi ме мортыс дынö, видзöта: пидзöссэз вылын сулалö Зобня Ведень! Эг вермы видзсьыны, юалi: «Кинлö нö сiдз юрбитан? Мыля жö тэ шульга кинат öвтан? Веськыт китö эд ошыс эз нямляв?» — «Эн мешайт меным, эн мешайт, зонка. Сiдз колö!» — спокойнöя шуис меным Ведень. И дыр сiя öвтiс шульга кинас, дас кыным молитва лыддьöтiс. Да сё вот кытшöмöсь: «Отче наш, иже еси...», «Да славится имя твоё...» Православнöй молитваэз сярзьö, некыдз вежöртны оз позь: мыля языческöй енлöн оланiн дынын?

— Ох, ох! — ыш ловзисис да ружтыштiс Эринья Потаповна. — Вот эшö тай!

Юрий Андреевич минута мымда пукалiс чöлöмöн, нёджжасис öтмöдöрö. Эринья Потаповна, кöдö зэв ёна повзьöтiс агрономлöн висьтасьöмыс, чеччылiс лабичись, сэсся шлёпкисис бöр — сылö вöлi недолыт.

Агроном висьтасис одзлань:

— Сэтöн вöлись, Эринья Потаповна, ме кылi вот мый. Зобнялöн дедыс велöтöма сiйö, Веденьсö: эн ло, внучок, осьта öмöн, юрбит сразу кык енлö — и Христослö, и Юмлö, действуйт смелöя. Кылас Христосыс тэнчит молитватö — удача ыджытö иньдас, Юм кылас — бöра удача. И лоас тэныт, видзöтан кö, удачаыс кыкпöвса. И юрбитöма Веденьыс томсянь сразу кык енлö. Мунас, шуам, чериавны, дак перво гортас Христослö веськыт кинас юрбитас, а берегыс вылын и Юмыс оланiнö копыртчас, шульга кинас кымöссö пернапасалас. Хитрöй сiя! Только бöбасьöма невна: пöрись увьяс юмовскöй молитваэсö нач вунöтöма и лыддьöтö кыкнан еныслö православнöй молитваэз. Ме, Эринья Потаповна, кутi да и висьталi сылö, что Христосыс да Юмыс вексö абу лöсялöмась, что Христосыс, кыдз висьтасьö преданнё, öтпыр кутöма Юмсö тошöттяс да и шупкöма сiйö, беднöй старикöс, зыбуна нюрö, лешакö сiйö пöртöма. Кывзiс менö Зобня Ведень, чуть весьö эз пöр, сыбурна повзис. «Эта мый жö, шуö, сэтшöмыс петö? Юмыслö юрбитöмöн ме кузь век, лоö, Христосыслö паныт мунi? Согрешеннё тай!» Вот кыдз повзис ю дорын Зобня Ведень, нельки чериавны сiя лунö эз понды. Чапкис вугыршаттесö и чожжык котöртiс гортас: видно, Христосыслö решитiс буржыка юрбитны, кеймисьны, кыдз этö колö, да прошшеннё корны, — кончитiс ассис рассказсö Юрий Андреевич.

Сiя пöвсиннас дзарьялiс старухаыс вылö, сэсся вайöтiс кружкасö бöра öм дынö, учöтик гульк юыштiс чöскыт тэсьсö, ошкис сы понда хозяйкасö. Эринья Потаповна пукалiс не кулöм не ловья, сьöкыта трекöтiс пельпоннэзнас, дзик сылö вöлi кöдзыт, кöрчитчис комокö.

— Но дак кыдз, Эринья Потаповна, сiдзкö, не гижны тэнö звеноас? — юалiс агроном.

— Господи, господи, мый часöт сылö лоас?

— Кинлö, Эринья Потаповна?

— Да Веденьыслö, Веденьыслö! Сэрпалiс эд душасö, грехас юр пыдöсви пырис. Адззан-ко, кузь век Христосыслö паныт мунöма, кинлöкö мöдiклö молитваэсö лыддьöтöм.

Юрий Андреевич нуöтiс ки долоньнас чужöмыс кузя, зыртыштiс юрбöрсö и шуис серьёзнöя:

— Думайта, нем сылö оз ло, олас спокойнöя кувтöдз. Неважын вöлi ме Гундырас, пантавлi стариксö ю дынын. Пукалö берег дорас, бытьтö не сылöн и дело, чери кыйö. Щукаэз дасся унажык кутöма, да сэтшöм гырисьöсь, дзик пес плашниккез. «Но, кыдз ни овлан, кыдз делоэт мунöны?»— юася сылiсь. А сiя шыннялö, дзик гожумся шондi, öмыс сийöс пасьта: «Мунöны тай делоэзö!» — «Чудиновскöй яма дынö сё эшö котрасян?» — юася одзлань. Серавны пондiс Ведень, кинас öвтö: «Кöр котрасьнытö? Да и мый сэтчинiсь кошшыны? Не, ог ни котрась сэтчин. Но нiйö вакрамешö, Юрий Андреевич, и Юмсö этö, и Христоссö тожö. Вон мымда талун черисö кыйи, а эд асывнас некöдалö эг юрбит, нытöг и кыйи...» Иванкоыс, дедлöн внучокыс, кöда сев бöрас армияись бертiс, осьтöма дедыслö синнэсö, докажитöма конкретнöй факттэз отсöтöн, что светас некытшöм Юм, некытшöм Христос эз вöлö и некöда абуöсь, что быдöс эта — поповскöй сказка, сэсся нем. Бытшöм зонка вöлöма эта Иванкоыс, унажык бы миянлö сэтшöммесö.

Эна кыввез бöрын Юрий Андреевич пелитiс юр вылö кепкасö, иньдöтчис ыбöслань, но мыйкö усис тöдвылас, крутöя бергöтчис и öддьöн дзирыта горöтчис хозяйкаыслö:

— Чудеснöй тэнат тэсьыт, Эринья Потаповна, веськыта верма висьтавны, чудеснöй юан тэ керöмат. Спасибо тэныт ыджытся-ыджытö! И тöдан мый? Чожа менам лоас сiдз шуана каша, дак тэ лок гöститны. Медпочётнöй местаö пуксьöта, бабöн кагаокыслö лоан!

Дата добавления: 2015-11-16