КЫДЗ ШЫННЯЛÖ АПОСТОЛ 3 страница

— Мыччав председательыслö дуля, — öддьöн лöгöн висьталiс Куть-Кутиха. — Мун часöт жö правленнёö да сöт кулакнат пызан кузя: некытчö ог мун аслам позiсь! Некытшöм право тiян абу, медбы олан керку местö поганöй карта сувтöтны! Ох, пырöв-кери ме тэкöт грехас, пеллезви ни пыри. Чуть только ассит душатö эн сэрпöсьт.

Бöра ыджыт спасибо висьталiс Эринья Потаповна соседкаыслö бур совет понда. Мудрöй мортöн шуис сiйö. И ашынас жö, кöр чуть-чуть пондiс югдыны, котöртiс Ыджыт Дзимбырö, правленнёö, медбы висьтавны сэтчин, что аслас керкуись некытчö оз мун, нельки райö оз согласитчы лэбзьыны.

— Сэтöн кузь век олi, сэтöн и кула! — чорыта висьталiс сiя. Правленчи дыркодь сёрнитiсö сыкöт, сiдз и этадз ошкисö колхознöй виль квартирасö — нем эз вермö керны. Григорий Черепан, кöда эта кадö лöсялiс правленнёас жö, джын час сёрнитiс сыкöт — некытшöм толк эз судзöт. Ачыс Пётр Парамонович тожö джын час мымда öштiс — и тожö быдöс весь. Старушка дзик тувдiс öтiк местаын: ог мун некытчö аслам керкуись — и точка!

— Но и ов тэ аслат остожьяын, сiдз дак! — лöгасис колхознöй председатель. — Адззамö картаыс увтö мöдiк участок, мусö миянлö, слава богу, не одзöсавны. А тэ — кыдз тöдан. Правленнёö норасьны сэсся эн лок.

Вот сiдз сiя и шогмис, что кольччис Эринья Потаповна шоныт позтöг, öнöдз олö умöлик керкуын, кöда вот-вот киссяс. Куть-Кутиха пель сайесö адззис: вермис сёдаки öмлöсавны соседкасö, кывзiсьöн керис, паныт кыв эз горöтчы.

А сэтöн вдруг сэтшöм делоэз пондöтчисö, сэтшöм событиеэз местасиныс вöрзисö, что Эринья Потаповна и совсем, кажитчö, бöбмис, совсем юрсö öштiс.

Öтiк гажа лунö, кöр ласковöй тулысся шондiыс шыннялiс быд вын и пуэз вылын листтэз ни вöлiсö, старушкаэз кайлiсö могильник вылö, дозирайтiсö Макарлiсь могиласö, Эринья Потаповна сэтчин герьялiс курыт синваэзöн, а Куть-Кутиха шушкис молитваэз да юрбитiс Лысöй Чöвпан вылö, думайтiс гажтöма: «Важмис часовняным, вокорень пöлiньтчис. Вот пöрас öшö...»

Быль, важмис часовенка, ёна ни сiсьмис. А эд кытшöм басöк да ладнöй вöлi, купол вылын золотитöм крест сiдз и сотчис шондi югöррес увтын, двадцать пуд сьöкыта колокол тронгис престольнöй праздниккез коста. Висьтасьöны, сувтöтöма часовнясö Чöвпан вылас вывтi ни богатöй местнöй купец, сувтöтöм аслас деньга вылö, ачыс вайöма Усольеись дона святöй ликкез, вайöтöма кыськö дьячокöс. Юрбитö, морттэз, славитö господьыслiсь нимсö векись векö, да и менчим тожö эд вунöтö!

Коллективизация коста этö часовенкасö деревенскöй комсомолеццез-безбожниккез игналiсö, купол вылiсь золотитöм крестсö нетшкöвтöмась арканöн, чапкöмась пö кытчöкö йирö, колокол тожö чапкöмась, а дьячокыслö сетöмась лёнас — эн мешайтчы кок увтын. Мöдöмась комсомолеццез и святöй ликкесö быдöс петкöтны да сотны, медбы тожö и дук нылöн эз вöв, да мыйкö абу ештöмась керны этö сiя жö лунö. А кöр пырасö лун-мöд бöртi часовняас — синнэз барöтасö: иконостас вылас öтiк лик ни абу, кинкö ловкöй да проворнöй петкöтöма нiйö, нöбöтöма кытчöкö пемыт ойшöр кадö.

Вот сiдз быдöс и вöлi, сiдз и öшисö ликкес.

— А не кайлыны я миянлö, матуш, часовенкаыс дынö? — сьöкыта ыш лолалiкö негорöн юалiс Куть-Кутиха, кöр Эринья Потаповна герьялiс-керис пöттöдз и пуксис шоччисьыштны лабичок вылö. — Дзарнитам ужо, мый ни сэтчин керсьö.

Эринья Потаповна нёджжöвтiс Лысöй Чöвпанлань, пернапасалiс кымöссö, шушкыштiс мыйкö невежöртанаö да кыдз öдззас бöра герьявны быд вынiсь, кыдз öдззас киöн и кокöн вартны муыс кузя — нельки Куть-Кутиха повзис.

Эринья Потаповна причитайтiс:

— Господи, мыля тэ менчим Макарушкоöс сiдзи кер-и-ин? Господи! Эд кöбы не сiя... быдöс ликкесö сэки сотiсö бы-ы... Ой-ёй-ёй!

Нет, эз мöд горöтчыны сiя энö кыввесö, да казявтöг кыдзкö петiс. Куть-Кутиха сiдз и дрöгнитiс, чеччöвтiс кок йылö, лöчыт синнэсö Макариха синнэзö мöртiс:

— Дак этö сiя? Тэнат Макарушкоыт? И дзоньöсь ликкес?!

Ликкез вöлöмась дзоньöсь. Öнöдз куйлöны нiя надёжнöй местаын, джоджулын, кытчö енсö радейтiсь Макар мастеритöма кык пыдöса сусеккез. Сусеккезас хозяйка не öтiк дас год видзис сякöй барахло, а пыдöссэс коласын жагöник олiсö и олiсö святöй угодниккез.

Старушкаэз бытшöмика игналiсö ыбöссэз, медбы некин и чуксö эз вермы сюйыштны да дзар керны, кыкöн петкöтiсö джоджулiсь ликкесö. Перво сувтöтiсö нiйö керкуас, тёсовöй забор сайö, комö, кытöн вöлi залавка. Сэтчин нiйö зыртiсö, чышкисö баг да бус. Сэсся дошлöй Куть-Кутиха лöсьöтiс туисö святöй ваок, брызгайтiс чудотвореццесö-угодниккесö, бöра бытшöмика чышкис кöс трепичöн. И любуйтчöв-керис нiйöн. Господь тэ, батюшко! Югьявны пондiсö угодниккес, син гусявны пондiсö позолотаöн, бытьтö эз и куйлö сорок год мымда ульсалöм пемытiнын.

— Бытшöмöсь, — гусьöник шуис Куть-Кутиха. Сылöн голосыс таинственнöя дрöжитiс, синнэзас сотчисö биоккез. — Бытшöмöсь!

И только öтiк угодник невна дзугыльтiс сьöлöм, как раз сiя, кöдö джоджувсис и петкöтнытö эз мöдö. Перво старуха думайтiс, что эта некытшöм не угодник, а простöй пöвтор, кöдöн кöркö важын ни пöднавлöмась тшына керкуись öшынок: сьöд вöлi пöвторыс, свальнöя вевттьöма кыз нятьöн да бусöн, кытшöмкö сир кодь чорыт лякöн, сирöн я мый я. Куть-Кутиха эшö öтпыр зыртiс сiйö чышкöтöн, ва бонöн, сiдз и этадз бергöтлiс киас, бура видзöтiс öтмöдöрсянь — нельки синнэс мыдзисö. Нет, простöй пöвтор и эм, некытшöм чужöм сы вылын оз тöдчы. Сибöтчис старуха öшын дынö матöжык и сэтöн, син гусялана шондi югöр вылас, бытьтö сук да гудыра туман пырйöт казялiс перво строгöй синнэзлiсь чочком бугыллез, а вöлись и öм, и ыджыт веськыт ныр. Пöвтор вылас вöлi рисуйтöма кытшöмкö святöй. Куть-Кутиха киын вöлi сёдаки кытшöмкö угодник.

— Господи, кысь сiя сэтшöмыс? — дивуйтчис старуха. — Миян часовняын некöр и некöр эз вöвлы сэтшöмыс. Этö ме утлянно тöда.

— И ме сiдз жö думайта, — согласитчис Эринья Потаповна. — Эз вöв сэтшöмыс.

— Дак кытiсь инö сэк? Кыдз сiя шедiс джоджулас?

Эринья Потаповна только синнэзнас кваркышалiс.

Куть-Кутиха ёна волнуйтчис, нельки пизис. Сiя котрасис пельöсiсь пельöсö, сувтчывлiс джодж шöрас, мыйкö дырöн думайтiс, орöттöг шушкис молитваэз и паймöмöнмоз дзарьялiс öтмöдöрö. И вдруг сiя горöтчис таинственнöя:

— Кыськö локтöма сiя! Кылан, матуш?

— Да мый тэ, мый тэ!

— Локтöма, мыся. Думайтышт юрнат: часовняын эз вöв, енполка вылын эз вöв, некинлöн сэтшöмыс эз вöв и вдруг — тэнат джоджулын, öтлаын быдöнкöт. Сiя ачыс локтiс! Отец Мисаил сэтшöммесö новоявленнöйезöн шуö.

— Мый тэ, мый тэ! Неужто ачыс локтiс?

— Быль баита. Важын сэтшöм делоыс часто вöвлi. Вот öнöдз тöдвылын...

Куть-Кутиха эз понды öштыны кадсö, чожжык брызгайтiс новоявленнöйсö святöй ваокöн, молитва лыддьöтiс. Коми молитваэсö сiя некöр эз кывлы, сiйöн и лыддьöтiс рочö: «Утробу девичью освятивый рождеством твоим... И ныне спас еси нас, Христе боже, но умри во бренах жительства и укрепи...»

И сэк жö сувтöтiс гöрдöтöм синнэсö Макариха вылö, дзик пыжьянöн бытшкис сьöлöмö, биа öгырöн сотiс быдöс вывтырсö, горöтчис строгöя:

— Пемытiнын видзин святöйесö! Грехыс, грехыс кытшöм! Да сувт чожжык богородицаыс одзö пидзöссэт вылö! Эк, тэ!

Эринья Потаповналöн кымöсыс öтiк мигö клей кодь ньылöмöн вазис, коккес пиньöвтчисö. Повзьöмсянь сiя и ачыс эз тöд, кыдз усис пидзöссэс вылö, шушкыштiс святöй молитва. А Куть-Кутиха думайтны пондiс. Мый жö ликкескöт керны? Оз я туй ны отсöтöн унажык нажитка шамыртны? Сылöн юрвемын чардбиöн югйöвтiс дума: «Опонькосö öнi, поди, кокнитжыка сермöталамö... Подико, эшö мыйкö гардам-вотам... Доброок кытшöмкö...» Öддьöн охота вöлi часöт жö курыштны быдöс ликкесö, тэчны ыджытжык мешöкö и нöбöтны гортö. Но Куть-Кутиха вöлi опытнöй морт, аслас кузь векын ештiс шедлыны сякöй делоö, быд берсясö адззылiс. Сiя думайтыштiс-керис и решитiс не тэрмасьны кытчöдз. Эшö некин оз тöд, мый эна угодниккезлöн юрын-тöдвылын. Пемытiнас да ульсöтас олiкö, нiя, поди, лöгасисö? Не весь жö, колö думайтны, господьыс Макарушкосö чапкис кондовöй пожум увтö...

Дыр эшö сiя думайтiс. Сэсся тöдчöмöн рапмис, пондiс баитны не сiдз ни строгöя:

— Нем бурыс талун юрö эз пыр. Мый и кер сэтöн. Колiс бы сувтöтны нiйö кытчöкö югыт местаö, йöз син сайö, да сразу-ту эд он и вежöрт, кыдз да мый.

— Поди, тэ ордö, матуш? — полöмöн шыасис Эринья Потаповна. — Сöстöм тэнат керкуат, югыт.

— Оз туй! — чорыта шуис Куть-Кутиха. — Народ миянö часто пыравлö. Сiя жö Гырдзза-Аршин, антихрист ёрдöм, быд лун вовлö. Пырас мукöдпырся, понгöн, пуксяс лабичö и но жö мöдравны гöрд синбугыллесö, сiйö и видзöтö, мый бы сöтны. Сэтшöммессянь бурсö эн видзчись. Да и Ольга Фоминаыс тожö, кöбыла рожа, дзарьясьö. Кылас мыйись-мый, дак мырддяс быдöс, сотас костёрын.

— Может, бöр нiйö сэтчинка?

Куть-Кутиха эшö öддьöнжык синнэсö лöг биöн öзтiс, кокнас джодж кузя сöтiс:

— Юртöм тэ! Адö охота шедны?

— Чуланö менам ыджыт, каличыс крепыт, — вдруг юöртiс Эринья Потаповна.

— Öшыныс кöть эм я?

— Эм, матуш, эм.

— Мыччав!

Чулан сылö гленитчис. Былись, ыджыт, öшынок эм. Калич кытшöмкö хитрöй, стариннöй — кымöстö поткöтан, а пырны он вермы. Сякöй барахлоыс чуланас, конечно, тырмö, но эд лишньöй срамсö: потласьöм корчагаэсö, гырниччесö, бырöм зипуннэсö да косьмöм-киссьöм кöньöссэсö, шуам, позьö и сарайö петкöтны, сёравно нiйö некин оз гусяв.

Висьталöм — керöм. Барахло петкöтiсö сарайö, ёг чышкисö, чераньвез да кыз бус тожö чышкисö, быдöс стенаэз да джаджоккез зыртiсö ва бонöн. Куть-Кутиха тшöктiс вайны святöй ваокнас туиссö, бура да бытшöма брызгайтiс джодж да потолок, медбы нечистöй вын эз вермы аркмыны да пырны. Эта бöрсянь кык старуха сьöрсьöн-бöрсьöн сувтöтiсö ликкесö джадж вылö. Казявтöг петiс настоящöй иконостас. А сiйö сьöд пöвсö, новоявленнöйсö, Куть-Кутиха сувтöтiс боковöй джадж вылö, сiдз кыдз веськытiсяс сiя аслас видöн тшыкöтiс быдöс картинасö. Этö тöдтöм угодникöс Куть-Кутиха вевттис чочком дöраöн, а остальнöйесö — кузь чышкöттэзöн. Басöк мöдöтчанаöсь быдöнныс лоисö, важнöйöсь. Иван Креститель сiдз веськыта и бытшкö моросö да сьöлöмö аслас югыт синнэзöн, богородица гажася-гажа лоис, шынньöвтiс бытьтö бы. Апостол Пётр да сылöн дружок Павел тожö гажмисö, — тыдалö, гленитчис нылö виль оланiныс.

— Басöкöсь лоисö быдöнныс, басöкöсь, — синва сорöн шуис Куть-Кутиха.

— Бытшöмöсь, матуш. Нем умöльсö он шу.

Энö кыввесö нiя крепитiсö святöй молитваöн и куимись чуп да чуп окалiсö богородицасö веськыта тырппезас.

Асыввезнас дзимбыровскöй сельскöй магазинын пыр зык сулалö, прокод сэтöн шуксьö уна йöз. Оз ешты вузасисьыс ыбöссö осьтны да халат пасьтавны, а магазинлань öтмöдöрсянь котöртö ни том и пöрись.

Быдöнся одзжык, кыдз правило, поздравляйтö вузасисьсö добрöй бур асылöн да бытшöм торговляöн Гырдзза-Аршин, неыджыт мыгöра кöсыник старичок, кöда тöв и гожум щеголяйтö ыджыт, унаись ни вочöм пимиэзöн да бырöм ни дублёнöй пасёкöн. Кыскö пенсионерöс отирыс коласö, охота сылö тöдны медбöрья виль торрез-юöррез, баитыштны соседдэзкöт öтi-мöдi йылiсь.

Талун первöйез коласын сiя небис джын кило свежöй нянь, кыдз сiя горöтчис, лунся рацион, а сiдзжö пачка маргарин, невна сахарнöй песок да сов. Быдöс этö товарсö сiя бытшöмика тэчис корзинкаö, сэсся жагöник вешшис прилавок дынiсь, думайтыштiс мыйкö и горöн юöртiс земляккеслö:

— Интереснöй делоэз деревняаным керсьöны! Пыран миян Макариха ордö (этö лоö Эринья Потаповна ордö) одз асывнас — Куть-Кутиха сэтöн ни пукалö. Дзарнитан павжуннас — Куть-Кутиха бöра сэтöн пукалö. Да мый! Пыран сёрöн рытнас, а Куть-Кутиха — вот сiя, шлёпнитчöм лабичö, бытьтö не сылöн и дело, пукалö, нырнас пишкö да синнэзнас öтмöдöрö — зырк, зырк... Недобрöй эстöн делоыс, висьтала ме тiянлö. Не весь быдöс эта керсьö, да! Куть-Кутиха томсяняс хитрöй чёрт вöлi, ловкöй да ашнöй, кыдз кайскöй руч. Мый сiя лякасис Макарихаыс бердö? Эй, Опонь! — горöтiс старичок абыз кодь ён да крепыт детиналö, кöда сулалiс очередьыс конецын, — висьтав тэ меным, лешак сьöктан, мый кошшö тiянiсь эта икотаыс? Просто сiдз сiя пыравлö мамыт дынö али не просто сiдз! Мый тэ эта вылö горöтчан, а?

Опонько паськыт пельпоннэзнас трекнитiс, пеллесви осьтiс öмсö, сэсся кинас волькöтыштiс сьöд кудриэсö.

— Дык! — горöтчис сiя. Думайтыштiс джын минута мымда, видзöтöв-керис йöзыс вылö и содтiс увереннöя: — Пенсия вылын жö кыкнанныс.

— А ме тэныт висьтала: не просто сiдз! Да, трижды-трою!

Уна Кайскöй волокын деревняэз да хуторрез. И öдва я адззан сэтшöмсö, кытöн бы эз тöдö Гырдзза-Аршинöс. Знаменитöй сiя татöн мортыс, пыр йöз коласын бергалiс. Важын ни кöркö, эшö томнас, сiя служитiс местнöй аршинниклö, вöлi приказчикöн и, медбы весь не мыдзтöтны асьсö, не меряйтны инькаэзлö ситецсö купеческöй аршинöн, ловкöя меряйтiс сiйö аслас гырдзза отсöтöн, эта коста пыр бобгис гажöна: «Гырдзза — аршин». Коллективизация коста купецлiсь амбарресö да лабаззэсö кытшöмкö варнаккез, пышшалiссез я мый я, сотiсö. Эз вермы терпитны сэтшöмсö нэпман-купец, чожа мыйись нюжöтiс коккесö. И ковсис том приказчиклö öтлаын купеческöй нывкöт гижсьыны колхозö. Уджалiс не умöля, честнöя керис быдöс, мый тшöктывлiсö. Важын ни отирыс вунöтiс, кыдз сiя жöдзис да сярзис прилавок сайын, а вот нимкодьсö эз вунöтö, сiдз и лякасис сы бердö, немöн он зыртышт. Колö сёдаки висьтавны, что шуöны сiйö Гырдзза-Аршинöн не лöгувья, а чожажык привычка сьöртi, и старичок öвтыштiс кинас: шуö кöть гырничöн, только горö эд сувтöтö. Öнi Гаврил Фокич — сiдз сiя гижöма документтэзö — колхознöй пенсионер, деревняын уважаемöй морт. Сiя эшö öддьöн чож, энергичнöй. Учöт Дзимбырын оз чулав öтiк событие, кытöн бы эз павьяв сiя, нем эз баит. И талун, кöр сiя висьталiс, что Куть-Кутиха да Эринья Потаповна не просто сiдз лякасисö öтамöд бердö, быдыс согласитчис сыкöт.

— Быд берсяыс ны коласын вермас лоны.

— А кытшöм нуждасянь сiя, Куть-Кутихаыс, эта неделяын мöдпырся ни вичкуö котöртiс? — эшö горöнжыка юалiс Гырдзза-Аршин. — Не сэтшöм сiя старухаыс, медбы весь кадсö öштыны. Нет, не сэтшöм.

— Гленитчис, поди, сылö отец Мисаилыс, — горöтчис кинкö. — Ладнöй поп.

— Сiя и эм, что ладнöй, — пильснитiс старичок. — Хех-хех-хех! А тöдатö я, мый сiя лöсялiс миян ладорö? Од тöдö? А ме тöда!

Эта кадö кинкö гыма-йирка кайис посöдзö, торс-торс керис сьöкыт сапоггезöн. Чожа оссис ыбöс, и магазинö пыркнитiс гöрд чужöмбана, моднöй курткаа детина — ачыс Юрий Андреевич Кушманов. Гырдзза-Аршин сэк жö чепöссис сылö паныт, жмитiс том мортлiсь кисö:

— Добрöй асылöн тэнö, Юрий Андреевич, шондiа добрöй асылöн, батюшка! Кыдз нiя, öнняся важнöй делоэс, кывтöны-нильдöны?

— Да кытчöдз быд торыс овлö, Гаврила Фокич, — стыдитчöмöн моз шыннялiкö, горöтчис Юрий Андреевич да чожжыка сувтiс очередьö. — Ола öнi чунь öтнам, хозяйкатöг. И вот, адззан, асывсянь ковсьö котрасьны магазиннэзöт. Тöн рытнас вунöтi нельки няньтор небны, талун öмö чапкыны нем.

— Этö вежöртана быдöс. Делоыс эта сэтшöм, значит, томся кадö овлö сэтшöмыс, — дженытика пильснитiс-серöмтчис старичок. Сылö, тыдалö, öддьöн охота вöлi баитны учёнöй морткöт и сувтiс очередяс ордчöн Юрий Андреевичкöт, эз и думайт калькöтчыны. — Тöн дыр бöра заседайтiт?

— Чуть я не югдандорöдз, дед. Петуххез куимись китсасисö, а ми сё пукалiм. Чуть эг тышкасьö, а делоыс эз и вöрзьы местасис. Сувтöтiс председатель обсудитны важнöй вопрос — виль карта строитöм йылiсь. Висьталiс: «Медбы ёнжыка специализируйтны животноводствосö, миян богатöй колхозлö важын ни колiс строитны типовöй животноводческöй комплекс, кытöн позис бы видзны мöссэз тысяча гöгöр. Картасö строитны колö каменнöйö, медбы куим век кежö тырмис...» Öтiккез сулалöны сы дор, а мöдiккез сувтiсö паныт, чирзöны: одзöв сэтшöм карта бердö кутчыны, розоритас сэтшöм комплексыс миянöс — эд кирпичсö ковсяс станцияись ваявны. А сэтчинöдз тристася унажык километра.

— Этö сiдз! öддьöнöв донöн сувтас миянлö кирпичыс. Хех-хех-хех! — авторитетнöя горöтчис паныт Гырдзза-Аршин. — Розоритас, пожалуй, колхознымöс, долгö ковсяс пеллезви пырны.

— Правильно! — горöтчис и Ольга Фомина, местнöй бригадаись бригадир, кöда тожö сулалiс очередяс. — И охота меным тöдны, кин жö Пётр Парамоновичсö сэтшöм ловкöя заразитiс гигантоманиянас? Не Григорий я Черепан?

— Баитöны, сiя пö!

— А тэ, Юрий Андреевич! Мый тэ висьталiн правленнёас заседаннё вылын? — öмалiс Фоминасö Гырдзза-Аршин?

— А ме — мый? Думайтыштi ме, дед, и висьталi ассим кыв: медбы миянлö строитны сэтшöм ыджыт мöс карта, колö, медперво, строитны кöть бы учöтик кирпичнöй завод.

— Этö сiдз! Хех-хех! Том тэ, а юрыт уджалö. Ыджыт руководительöн лоан, Юрий Андреевич!

Опонько сулалiс Юрий Андреевич одзын, кывзiс йöзыслiсь серьёзнöй баснисö и думайтiс ассис сьöкыт дума: керкужуг вот-вот киссяс. А мый, если сёрнитыштны Юрий Андреевичыскöт? Поди, совет кытшöмö сетас, отсалас донтöмжыка небны колхознöй делянкаись вöр? Да эз лысьт магазинас баснисö пондöтны. «Ужо, рытнас пыравла правленнёас», — решитiс сiя.

Мöс карта йылiсь басниыс сразу жö орис, кыдз только магазинö пырис Гырдзза-Аршинлöн соседка Экся. Старушка горзöма я мый я: öмыс пильтыртчöма, синнэс пыктöмась. Да и часöт нем он вежöрт: то ли горзö сiя, то ли сералö — чужöм вылас кыкпöвса невежöртана гримаса.

— Он я шогав, соседушка? — небытика и ласковöя юалiс Гырдзза-Аршин.

— Кытшöм шогöт! Буржык бы вöлi талун жö джагöтчыны, — öвтыштiс кинас Экся. — Зонö менам, Петрованыс, зырымöсь бедь, гöститны локтiс. И мый соровтiс! Локтi тöн рытнас ыб вывсянь гортö, а пызан вылын сковородаын жаритöм яй госын шваркйö. «Кытiсь яйсö судзöтiн?» — юала сылiсь, Петраыслiсь. «Гы-ы, петухлiсь юрсö мургыльтi». Котöртi ме гидйö. И быль — абу породистöй петухö, только гöннэс валяйтчöны. Пондi герьявны ме, беднöй старуха, а сiя, неморт, пиннесö мыччалö меным, пукалö пызан сайын, вина рюмка бöрсянь рюмка юö да эшö сатанинскöй песняэз рявзö.

— Но эта форменнöй ни безобраззё! — öддьöн дзирыта горöтчис Гырдзза-Аршин и мыччалiс косьмöм кулаксö, дзик кöсйисис вартлыны Петровансö. — Да мый ни сэтöн и баитны. Бöра жö аслас причина эм: нiя, вичкуись шарлатаннэз, сэтчöдз вайöтiсö мортсö, тшыкöтiсö вокорень. Кытчöдз гортын олiс да жагöника му гöрис, нормальнöй вöлi, морт кыдз морт, а кыдз только нильдiс городас да, аслас бöб юр увья, кутчисис вичкуас сторожöн, мезмис подшипниккес вылiсь, винагаг лоис. Быдöс эта весь олöмсянь, быдöс бöб юрсянь. Оз ни часöт сiя мортö пöрмы, кувтöдз варнак лоас!

— Вот ме и баита, — пондiс сыркьявны Экся. Казялiс сiя Юрий Андреевичöс, öдззис дзирыта кеймисьны: — Отсав меным, дона зонкаиньöй, эн сет кувнытö смерться одзжык. Тэ, батюшко, кор сiйö, ёрдöмöс, кытчö колас, велöтышт бытшöмика. Если ковсяс, дак ньöрöн, ньöрöн нето потшпонöн сöт юрыс кузя!

— Кыдз этö потшпонöн юр кузя позьö? — повзис агроном. — Сiдз оз лöсяв, бабушка. Сэк эд и ачымöс тожö потшпонöн заваритасö. Локтас, шуам, прокурор и мыччалас петырлун. Да и кыным год тэнат Петрованлö?

— Сорок, сорок неважын тырис, батюшко! А умокыс и чепöль мымда оз öксьы. Семья чапкис, öтнас и олö, кыдз мисьтöм кöин. Вот муна вичкуас и лöсьöта попыслö öбедня. Сiя, кыдз ме думайта, виноват эта делоын.

— Веськöтны зонтö колö. Ачыс оз мун, дак милиционерöс кор — нуöтас больницаö, — висьталiс агроном. — Вот лоас свободнöй кад, дак баитышта сыкöт. А часöт некöр — трактористтэз дынö тэрмася, ыб вылö. А рытнас бöра заседаннё. Председатель сiдз и горöтчис: «Мöс карта йылiсь вопроссö сувтöта голосованнё вылö. Быдыс должен висьтавны ассис мненнё».

Уна интереснöйсö позьö кывны асывнас сельскöй магазинын, быд берсясö позьö кывны. Рытöдз этадз сулалан очередяс и немымда он мыдз. Да кадыс оз видзчись, колö гöрны мунны. Опонько небис мый сылö колiс и котöртiс гортас, пыдын лог сайö. А гортас мый? Öтiк юркольмöт, сэсся нем. Некытшöм гаж абу. Мамыс пукалö горби одзын лабичок вылын, юрсö öшöтöма, чужöмсö везтöма тöждöм:

— Кыдз овнытö пондамö, зону?

— Да мый тэ, мам? Ог жö, поди, кулö!

— Керкуным сiсьмис. Поди, и быль этö кернытö... Куть-Кутиха неважын казьмöтö вöлi... роднитчö бы сiя миянкöт. Керкуыс сылöн виль, шоныт...

Роднитчыны Куть-Кутихакöт? Гöтрасьны, сiдзкö? И босьтны ас сайö Параськаöс? Но и но!

Дивуйтчис-керис Опонь, но паныт мамыслö и кывджын эз горöтчы, чожажык сюйыштiс карманас няньтор и петiс керкусис, котöртiс ыб вылö гöрны пар.

Котöртiс сiя шупыта, сувтчывтöг, кыкнан кинас öвтiс. Эт, кöдöрланьö делоыс бергöтчö... Гöтрасьны пö колö, Параськаöс босьтны. Пырас жö пöрись мамлö юрас сэтшöмыс! Ух, ух... Ковсяс талун жö баитыштны правленчикöт, ась сетöны вöр, колö виль керку строитны.

...Лунтыр уджалiс сiя ыбын, гöрис тракторöн пар, а сёрöн рытнас, мыдз и тшыг, кежис колхознöй правленнёö. Приёмнöйын некин эз вöв, öтнас сторожиха пукалiс гор сайын да юрсö лэбтытöг гöрдззис мыйкö тöв кежö. А председательскöй кабинетiсь топыта игналöм ыбöс пырйöт петiсö жеркöтчана шыэз:

— Колхозниккез матегаласö миянöс, если сы ыжда деньга видзамö весь. Вот и «Родинаын» строитiсö комплекс, а мый толкыс? То öтiк оз лöсяв, то мöдiк, машинаэз оз пö уджалö... Миллионся унажык видзам, а подасö пондам важ картаын видзны, öтiк изъян лоас. И не только материальнöй.

— Кирпич кыскавны станцияись? Да но сiйö вакрамешö. Юрий Андреевич правильно баитö: колö перво аслыным кирпичнöй завод строитны.

— Глинасö миянлö не одзöсавны — Лысöй Чöвпаныс, баитöны, куш глинаись аркмöма.

— Колö юасьны-висьтасьны бытшöмика, гöгöртны этö вопроссö быд ладорсянь, йöзö ветлыны, видзöтны-керны да вöлись стройка бердö кутчыны.

— Правильно!

Сэтшöм шыэз петiсö председательскöй кабинетiсь. Опонько гажтöма дзарнитiс сторожиха вылö, гыжьялыштiс юрбöрсö и шы эз сет, сiйöн-сорöн и петiс öтöрö. Не аскадö локтiс талун, ужо мöдöтчид кöр-нибудь.

Кысь сылö вöлi тöдны, что Пётр Парамонович нылö важын ни вöзйис виль колхознöй квартира. Куть-Кутиха тупкалiс мамыслiсь öмсö, тшöктiс нем не баитны Опоньколö колхознöй квартираыс йылiсь. Нельки и джын кыв не горöтчыны. А то...

Куть-Кутиха бертiс вичкусис только кык лун бöртi. Старуха ёна дивуйтчис, кöр кылiс, что вичкуись сторож, Экся соседкалöн гажа зон Петруха, эшö тöн локтöма гортö. Кöр сiя ештiс? Панталiс удерлун вичкуын, отпуск йылiсь некытшöм басни эз вöв. Диво, диво... Но старуха эта йылiсь кыдзкö чожа вунöтiс — и Петрухатöг заботаэс тырмисö, кöть и шоччисьны эн пуксьывлы, быдса суткиэзöн уджав. Довольнöй и важнöй, Куть-Кутиха сразу жö чепöссис Эринья Потаповна ордö, юöртiс таинственнöя:

— И счастье жö усис тэныт, матуш. Сэтшöм ыджыт счастье, уж сэтшöм великöй шуд — мöдiклö и вöтын оз усь сымдаыс.

— Ох, вöлi бы сiя, счастьеыс.

— Эн модь, кöдö оз ков, — строгöя топнитiс кокнас Куть-Кутиха. — Эн лысьт лöгöтны енсö. Гöститöтiс тэнö господьыс быд берсянас — и сьöкытнас, и курытнас, проверитiс тэнö, видзöтiс моростö шучкöп — и пожалуйста! — на тэныт счастье! Жаль я мый я сылö...

Куть-Кутиха вешшис соседкаыс дынö, пуксис сыкöт топ-топ, пондiс шушкыны эшö таинственнöйжыка:

Дата добавления: 2015-11-16